Allir flokkar eru nú á fleygiferð við að raða upp á lista sína. Kristrún Frostadóttir, formaður Samfylkingar, hefur úr nógu að moða þar sem fylgi flokks hennar fer með himinskautum. Lukkuriddarar streyma til hennar, veifandi vopnum sínum og verjum. Miklar hræringar eru innan Samfylkingar. Guðmundur Árni Stefánsson varaformaður stefndi í oddvitaslag í Kraganum en hætti snögglega við. Þá tvístígur Dagur B. Eggertsson, fyrrverandi borgarstjóri, og bíður eftir grænu ljósi frá Kristrúnu.
Á meðal þeirra sem tilbúnir eru til að taka þátt í baráttunni er Björgvin G. Sigurðsson, fyrrverandi viðskiptaráðherra Hrunsins. Nokkrum dögum áður en Bjarni Benediktsson boðaði þingrof upplýsti Þórður Snær Júlíusson, fyrrverandi ritstjóri Heimildarinnar, að Kristrún hefði leitað til sín um að fara í framboð. Þórður þykir vera sannkallaður lukkuriddari, tungulipur og auk þess klókur þar sem kemur til undirmála.
Hann á sér þá fortíð innan Samfylkingar að hafa til skamms tíma unnið með Árna Páli Árnasyni, þáverandi formanni. Hann hvarf úr því starfi jafnskjótt og hann birtist.
Þórður er skjólstæðingur og náinn samstarfsmaður Vilhjálms Þorsteinssonar, fjárfestis og bandamanns Kristrúnar, sem stundum er kenndur við Tortóla. Ekki er einhugur innan Samfylkingar um að tefla Þórði Snæ fram til áhrifa. Einhverjir hafa áhyggjur af farangri hans …