- Auglýsing -
Sundkappinn og tónlistarmaðurinn Már Gunnarsson er þekktur fyrir að gefa ekkert eftir þegar mannréttindi hans eru í húfi. Már, sem er blindur, þurfti að yfirgefa veitingastaðinn Langbest í Keflavík vegna þess að starfsfólkið krafðist þess að hundi hans, Max, yrði vísað frá. Andúðin gegn hundum er opinber stefna veitingastaðarins sem telja að gestir þeirra eigi ekki að þola návíst dýranna. Már stundar nám á Englandi og ætlaði sér að eiga stund með fjölskyldu sinni á veitingastaðnum áður en hann héldi utan eftir jólafrí. Það endaði með hálfgerðum ósköpum og Már og gestir hans yfirgáfu Langbest.
Hann skrifaði um málið á Facebook og lýsti niðurlægingunni. „Tilfinningalega er það glatað að fá svona höfnun og niðurlægingu á almannafæri í andlitið þegar maður er að gera sitt besta að lifa eðilegu og sjálfstæðu lífi sem blindur einstaklingur …,“ skrifaði Már sem í kjölfarið fékk símtal frá iðrandi eiganda Langbest sem sagðist ekki hafa þekkt þau lög í landinu sem kveða á um að leiðsöguhundar fái að fylgja eigendum sínum á opinbera staði. Már var beðinn afsökunar og boðinn velkominn með hund sinn þegar honum hentaði.
Már er maður fyrirgefningar og tók afsökunarbeiðni eigendanna og hyggst mæta á Langbest þegar hann kemur næst til landsins. Óljóst er hvort aðrir hundar eru velkomnir á staðinn …