Þau áform fjárlaganefndar að rétta sjónvarpsstöðinni N4 100 milljónir króna af almannafé vöktu í senn reiði og athygli. Þá kom í ljós að sannkölluð frændhygli kom við sögu því Framsóknarmaðurinn Stefán Vagn Stefánsson, sem situr í fjarlaganefnd, er mágur Maríu Bjarkar Ingvadóttur eins og Mannlíf benti á eftir að málið komst í fjölmiðla.
Fjárlaganefnd hrökk til baka eftir að velviljinn komst í hámæli. Í stað þess að eyrnamerkja fyrirtækinu peningana verður Lilju Alfreðsdóttur ráðherra sendur tékkinn og henni falið að útfæra styrkinn á almennum grunni. En staða sjónvarpsstöðvarinnar er grafalvarleg ef marka má bréf Maríu til fjárlaganefndar þar upplýsir hún að ef styrkurinn fáist ekki blasi gjaldþrot við og stöðin muni þurfa að loka um áramót. „Ríkisstyrkur þessi mun gefa okkur von um að það takist en ljóst að fleiri þurfa að koma að málinu, bæði sveitarfélögin og “Angels-investors” sem eiga stöðina í dag,“ skrifar María Björk sem upplýsir jafnframt að styrkurinn einn og sér dugi ekki til bjargar og leggur til að N4 sameinist Ríkisútvarpinu og almenningur taki við hinum beiska bikar.
Einn helsti bakhjarl stöðvarinnar er Samherji sem greitt hefur fyrir dagskrárgerð að einhverju marki og þannig haft mikil áhrif. Svo er að skilja á bréfi Maríu að sveitarfélög á Norðurlandi hafi brugðist N4 og ekkert fjármagn sé að hafa þaðan lengur. Hugsanlega er staðan þannig núna að ef Samherji kemur ekki þessu fósturbarni sínu til hjálpar muni stöðin fara í þrot …