Sigmundur Davíð Gunnlaugsson, formaður Miðflokksins, er á meðal frumlegustu en jafnframt furðulegustu stjórnmálamanna samtímans. Uppákoman í Verkmenntaskólanum á Akureyri undirstrikar enn og aftur þann skrýtna karakter sem á stundum brýst fram í gervi Sigmundar. Leiðtoginn dundaði sér við að krota á myndir af frambjóðendum annarra flokka og hegðaði sér eins og versta meinhorn. Yfirvöld skólans gerðu svo eins og venjan er með óknyttakrakka og ráku hann út úr skólanum. Þegar fjölmiðlar báru þetta undir Sigmund laug hann og þrætti fyrir að hafa verið rekinn á brott. Nú hefur verið staðfest af skólayfirvöldum að hann þótti ekki í húsum hafandi og myndskeið eru til af honum að krota á myndir af kollegum sínum í Framsóknarflokknum.
Furðuleg uppátæki Sigmundar hafa áður vakið athygli. Hann át hrátt kjöthakk á sínum tíma fyrir kosningar og ætlaði með því að undirstrika hollustu íslenskra landbúnaðarafurða en hafði það eitt upp úr krafsinu að vera talinn ruglaður.
Þá vakti innkoma hans í dólgspartý flokksmanna hans á Klausturbarnum athygli. Hann var meðal þeirra yfirveguðustu af drykkjurútunum en fullkomlega meðvirkur sínum mönnum sem hrakyrtu og úthúðuðu konum í stjórnmálum.
Fíflagangurinn í Verkmenntaskólanum er af svipuðum toga og þessi tilvik. Töffaralætin verða óskiljanleg og undirstrika aðeins vafasaman karakter á atkvæðaveiðum í gruggugu vatni …