Mál Þórðar Snæs Júlíussonar, frambjóðanda Samfylkingar, hefur tröllriðið allri stjórnmálumræðu og nánast slegið flokk hans kaldan. Hermt er að óformlegir neyðarfundir hafi verið haldnir innan forystu flokksins vegna málsins. Meðal þeirra lausna sem hafa verið reifaðar er að kvennaskelfirinn lýsi yfir því að hann muni ekki taka sæti á Alþingi og lágmarka þannig skaðann sem hann er að valda öðrum frambjóðendum.
Einsýnt þykir að flokkur Þórðar muni tapa stórt á veru hans á listanum í Reykjavík. Viðreisn er á fullri siglingu og um það bil að taka fram úr Samfylkingu sem hægt og bítandi hefur verið að missa fylgi. Þórðarmálið gæti kostað Kristrúnu forystuna eftir kosningar og þar með forsætisráðuneytið sem fellur þá hugsanlega í skaut Þorgerðar Katrínar Gunnarsdóttir.
Mörgum þykir sem staða Kristrúnar sé sorgleg í ljósi þess að hún sé ein bjartasta von íslenskra stjórnmálaleiðtoga en missi flugið vegna manns sem hefur í farangrinum kvenhatur og þankagang sem vekur mörgum hroll en aðrir á borð við Guðmund Andra Thorsson, fyrrverandi þingmann Samfylkingar, hafa réttlætt með því að hann hafi verið að máta sig við hættulegar hugmyndir.
Sjálfur hefur hann sagt sér til varnar að hann sé betri maður í dag og virði konur og rétt þeirra til jafnréttis. Margir efast um þá yfirlýsingu og telja karlrembu hans og ósannsögli enn vera til staðar þótt viðbjóðslegur og hatursfullur orðaflaumurinn gegn konum hafi stöðvast …