Það er frekar þungt undir fæti hjá Katrínu Jakobsdóttur, fyrrverandi forsætisráðherra, sem glímir við þann fylgisbrest að minni spámenn hafa skotist fram fyrir hana í kapphlaupinu um Bessastaði. Fyrirfram var talið að Katrín, sem er hlaðin pólitískum þokka, myndi sigra með glæsibrag. En nú er staðan viðsjárverð og allt eins talið að Halla Hrund Logadóttir orkumálastjóri eða Baldur Þórhallsson prófessor muni hreppa hnossið.
Vandi Katrínar er sá að skrímsladeild Sjálfstæðisflokksins hefur lagt á hana ofurást og beitir öllum meðulum til að sverta og knéseta andstæðinga hennar í baráttunni. Þar hafa flestir sótraftar verið dregnir á flot. Hannes Hólmsteinn Gissurarson, fyrrverandi prófessor, er stuðningsmaður hennar rétt eins og sá dæmdi æruþjófur, Páll Vilhjálmsson, framhaldsskólakennari og pistlahöfundur Moggans, sem lýsti yfir stuðningi við draumaprinsessu skrímslanna.
„… er tilfallandi þeirrar sannfæringar að einn forsetaframbjóðandi uppfylli best skilyrðin til forsetakjörs. Það er Katrín Jakobsdóttir,“ skrifar Páll á heimasíðu sinni.
Katrín þarf ekki óvini með þessa kappa í framlínunni …