Margir undrast þá meðferð sem Tómas Guðbjartsson hjartaskurðlæknir hefur fengið á Landspítalanum þaðan sem hann var hrakinn í leyfi vegna plastbarkamálsins svokallaða. Fjölmargir telja sig eiga Tómasi líf og heilsu að þakka og telja rangt að refsa honum með þeim hætti sem nú hefur gerst, 13 árum eftir plastbarkaðagerðina. „Ég þekki Tómas ekki sjálfur persónulega, en er honum þakklátur og væri hugsanlega ekki á lífi í dag ef ég hefði ekki komist undir hans læknishendur,“ segir Tómas Ponzi, forritari, listmálari og garðyrkjubóndi, við DV. Tómas er afar ósáttur við umfjöllun um mál Tómasar skurðlæknis að undanförnu og telur um aðför að ræða.
Brotthvarf Tómasar er rakið til umfjöllunar RÚV sem greindi frá því á Rás 1, að Tómas væri kominn í leyfi vegna málsins. Mikil umfjöllun hefur orðið í kjölfar heimildaþáttaraðar um ítalska skurðlækninn Paulo Macchiarini, sem ber ábyrgð á plastbarkaígræðslum í sjúklinga sem létust í kjölfar aðgerðanna. Tómas, sem starfaði undir stjórn Ítalans, hefur viðurkennt mistök í málinu og segist hafa verið blekktur. Hann baðst afsökunar og hefur verið fús til að upplýsa um sinn þátt.
Í umfjöllun RÚV nú er gert út þá það að Tómas hafi stært sig af störfum sínum og staða hans sé til skoðunar hjá stjórnendum Landspítalans. Spítalinn hefur beðist afsökunar á aðkomu sinni að aðgerðinni og forstjórinn hefur vísað því til ríkislögmanns að kanna hvort rétt sé að greiða skaðabætur.
Mikil kergja er innan spítalans vegna málsins þar sem menn skiptast í fylkingar og ýmist fordæma framgönguna gegn Tómasi eða vilja losna við hann úr starfi og kalla eftir ábyrgð hans. Aðrir benda á að Tómas hafi fyrir löngu tekið út refsingu sína og mál að linni.
Tómas Ponzi segir aðför vera gerða að nafna sínum skurðlækninum og RÚV sé notað sem refsivöndur.
„Nú er verið að taka út einn færasta hjarta og lungnaskurðlækni landsins, Tómas Guðbjartsson og RÚV notað óspart,“ skrifar Tómas Ponzi um nafna sinn.
Víst er að margir taka undir með listmálaranum og telja að uppákoman nú sé dæmi um nornaveiðar og sjá ekki réttlætið við að refsa Tómasi lækni meira en orðið er …