Enn ein úttektin á hvarfi Geirfinns Einarssonar er að koma út. Að þessu sinni er það Sigursteinn Másson sem gefur út þáttaröðina Réttarmorð undir merkjum Storytel. Sigursteinn, sem á að baki frábærar umfjallanir um sakamál, hefur sagt opinberlega að um sé að ræða mikla afhjúpun á máli sem hefur verið ein mesta ráðgáta þjóðarinnar allar götur frá því Geirfinnur hvarf sporlaust. Inn í þá ráðgátu blandaðist svo hvarf Guðmundar Einarssonar sem er annars óskylt mál að öðru leyti en því að með bellibrögðum tókst að tengja Sævar Cieselski, Erlu Bolladóttur og félaga þeirra inn í þessi dularfullu mál og fá þau dæmd. Seinna voru þau sýknuð og greiddar háar bætur.
Bæði Mogginn og Vísir hafa farið mikinn í umfjöllun um nýju þættina en allt er undir formerkjunum hugsanlega og líklega. Sigursteinn boðar í viðtali við Vísi uppljóstrun á hvarfi Guðmundar þar sem hann telji „nokkuð ljóst“ hvað hafi gerst eftir að hann varð viðskila við félaga sína eftir dansleik í Hafnarfirði í byrjun árs 1974. Hann segir að aftur á móti sé óljósara hvað orðið hafi um Geirfinn sem hvarf í nóvember sama árs. „Ég er á því að við séum að nálgast þann punkt að geta sagt með nokkurri vissu hvað varð um Geirfinn,“ segir hann við Vísi. Aðspurður telur hann að einhver viti sannleikann en að ekki sé hægt að útiloka sjálfsvíg.
Víst er að Storytel mun fá áskriftir út á Réttarmorð en svo virðist sem að litlu verði bætt við það sem áður hefur komið fram um hvarf Geirfinns og Guðmundar. Það er djúpt á sannleikanum um Geirfinn …