Margt áhugavert er að finna í bókinni Rauði krossinn á Íslandi: 100 ára saga sem er nýkomin út en Guðjón Friðriksson skrifar hana og óhætt er að segja að hún sé nokkuð vegleg því bókin er rúmar 450 blaðsíður.
Eitt sem þykir sérstaklega merkilegt í ljósi kosningamála sumra flokka í ár er kafli þar sem fjallað er um palestínska flóttamenn sem komu til Íslands árið 2008 en þeir höfðu verið í flóttamannabúðum í Írak. Ingibjörg Sólrún Gísladóttir, þáverandi utanríkisráðherra, sagði að það væri siðferðisleg ábyrgð og pólitísk skylda Íslendinga að taka móti fólkinu en um 29 manns var að ræða.
Vekur Guðjón athygli á því að ljót umræða hafi myndast vegna komu fólksins og bendir á að slíkt hafi ekki gerst þegar 54 flóttamenn frá Kólumbíu komu 2005 til 2007 eða þegar 223 manns frá fyrrum Júgóslavíu komu í kringum aldamótin. Telur Guðjón að þar hafi óbeit fólks á íslam verið undirliggjandi ástæða og kynþáttafordómar.