Sigríður Dögg Auðunsdóttir, fréttamaður Ríkisútvarpsins og formaður Blaðamannafélags Íslands, er í nokkrum vanda vegna yfirlýsinga Páls Vilhjálmssonar, kennara við Fjölbrautarskólann í Garðabæ, sem fullyrðir að hún hafi sloppið með skrekkinn eftir að hafa skotið undan tugmilljónum frá skatti. Gerð var sátt um „endurálagningu“ eins og Sigríður Dögg upplýsir á Facebook-síðu sinni án þess að skilgreina málið nánar eða staðfesta upphæðir. Jafnframt hraunar hún yfir Pál sem hún segir vera dæmdan æruníðing og samkvæmt því ekki marktækan. „Við hjónin fengum endurálagningu opinberra gjalda vegna útleigutekna fyrir nokkrum árum og greiddum þá skatta …,“ skrifar Sigríður Dögg. Páll svarar þessu með fullyrðingunni „Sigríður Dögg játar skattsvik“ sem er gefur færi á að fá hann dæmdan öðru sinni fyrir meiðyrði, ef rangt reynist.
Margir inan fjölmiðlastéttarinnar hafa samúð með Sigríði formanni. Sumir sýna það með því að þegja yfir málinu og meintum skattsvikum en aðrir lýsa stuðningi við hana. Þeirra á meðal er Friðrik Þór Guðmundsson, fyrrverandi formaður siðanefndar blaðmanna, sem stendur með sinni konu. „Eltingaleikur Moggaritstjórans við bábiljur Páls Vilhjálmssonar halda hins vegar sjálfsagt áfram með einum eða öðrum hætti, faglegum blaðamönnum fjölmiðilsins til tjóns …,“ skrifar hann.
Sigríður hefur hunsað spurningar blaðamanns Mannlífs um að opinbera nákvæmlega hvert vandamál hennar gagnvart skattinum var og þá upplýsa hvort og í hverju Páll sé að segja óstatt. Þögnin ein er svarið. Sjálf er hún þekkt fyrir hörku í starfi sínu og lætur viðmælendur sína ekki komast upp með neinn moðreyk.
Málið allt er hið vandræðalegasta fyrir RÚV sem á einhverjum tímapunkti kallaði mál á borð við þetta skattsvik. Fyrir liggur að ef skúrkurinn Páll hefur rétt fyrir sér þá er Sigríði Dögg hvorki sætt í Blaðamannafélaginu eða í starfi sínu hjá RÚV. Málið er allt hið vandræðalegasta þar hún sýnir á spilin sín. Undir í málinu er heiður Blaðamannafélags Íslands og Ríkisútvarpsins og ný viðmið í flutningi frétta þegar um er að ræða skattasniðgöngu …