Útvarpsmaðurinn góðkunni, Sigurður G. Tómasson, var í hressandi viðtali á Rás 2 í tilefni þess að Rásin er 40 ára. Víst er að margir supu hveljur þegar hann tók fyrir afskipti forystumanna Sjálfstæðisflokksins af stofnuninni. Hann lýsti því að Davíð Odddssyni, Þáverandi formanni, hefði alla tíð verið í nöp við Rás 2 og hann hefði neitað að mæta í viðtöl nema að hann fengi að vera einn í viðtalinu. Þá hafi verið tímabil þar sem Davíð hafnaði alfarið að mæta á Rás 2 sem í þá daga var þekkt fyrir krefjandi spurningar og ágenga fréttamennsku.
Sjálfur segist hann hafa átt undir högg að sækja sem dagskrárstjóri. Það hafi endað með því að hann var rekinn að tilstuðlan flokksins. Í framhaldinu segist hann hafa veikst af sykursýki og misst sjónina alfarið. Rakti hann veikindin til brottrekstursins.
Ólafur Páll Gunnarsson, stjórnandi þáttarins, saup hveljur undir yfirlýsingum Sigurðar og skipti tvisvar yfir í tónlist þegar viðmælandinn fór með himinskautum í yfirlýsingum um Sjálfstæðisflokkinn. Ólafur Páll má eiga von á ákúrum ef menn ná til hans …