Uppnám er innan Blaðamannafélagsins eftir að Sigríður Dögg Auðunsdóttir, formaður félagsins, stóð fyrir því að reka Hjálmar Jónsson, formann og framkvæmdastjóra, á grundvelli skipulagsbreytinga. Hún hefur nú tekið við starfi Hjálmars og þiggur full laun af félaginu í stað hálfra launa áður.
Hjálmar, sem nýtur virðingar innan stéttarinnar fyrir lipurð gagnvart félagsmönnum, hefur átt í útistöðum við formanninn. Deilurnar snúast að einhverju leyti um óþol Hjálmars vegna skattasniðgöngu Sigríðar Daggar sem gaf ekki upp tekjur sínar af útleigu á nokkrum íbúðum. Fæstir fjölmiðlar hafa snert á því máli og má væntanlega rekja þögn þeirra til innmúraðrar samstöðu ákveðinna afla innan stéttarinnar. Mannlíf hefur ítekað spurt formanninn sem hefur hundsað spurningarnar þrátt fyrir ábendingar Hjálmars og fleiri um að eðlilegt sé að hún svari spurningunum. Sama var uppi á teningnum í gær þegar Sigríður lét ekki ná í sig.
Ástandið undanfarna mánuði hefur verið þannig að Hjálmari var úthýst af stjórnarfundum. Þá hafa fundargerðir ekki verið birtar á netinu svo sem áður var og leyndarhjúpur yfir starfi stjórnarinnar.
Aðalfundur félagsins verður í vor. Urgur er í mörgum vegna ástandsins og flestir eru á þeirri skoðun að Sigríður og bandamenn hennar eigi að víkja. Líklegt er að hún gefi kost á sér áfram. Meðal þeirra möguleika sem eru í spilunum er að Hjálmar gefi kost á sér að nýju sem formaður. Ekki er þó talið að hann sé ginnkeyptur fyrir því og finna þarf því hugsanlega annan arftaka til að koma skikk á rekstur félagsins …