Smekklaus Björg iðraðist

Sjónvarpskonan vinsæla, Björg Magnúsdóttir, vakti undrun og hneykslan í Söngvakeppni sjónvarpsins þegar hún var með söngkonuna Kötlu í beinni útsendingu. Katla sagði frá því að hún væri ekki síst að syngja í minningu föður síns sem lést árið 2018. Katla hafði búið til hálsmen úr giftingarhring föðurins, sem hún bar í gærkvöld: „Þetta er giftingarhringurinn hans þannig hann er alltaf með,“ sagði hún. Björg var snögg til svars: „Hún er að reyna að fá atkvæði út á þetta, nei ég segi svona.“ Þessi ummæli fóru illa í áhorfendur og netverja sem fóru sumir hverjir hamförum yfir smekkleysunni.  Björg iðraðist sárlega ummæla sinna og skömmu síðar bað hún Kötlu innilega afsökunar í beinni útsendingu með þeim orðum að brandarinn hefði verið óviðeigandi og allt gæti gerst í beinni útsendingu …