Sósialistar eru óðum að vígbúast meðan Vinsti-grænir glíma við vonleysi vegna fylgishruns og trúnaðarbrests við kjósendur. Sanna Magdalena Mörtudóttir, upplýsti í hlaðvarpi Mannlífs að samtökin væri í óða önn að undirbúa framboð til Alþingis. Sjálf gefur hún kost á sér í Reykjavík og þykir líklegt að hún nái kjöri.
Óvíst er hvort leiðtogi flokksins, Gunnar Smári Egilsson, ætli að taka slaginn. Hermt er að hann sé sáttur að tjaldabaki og vilji halda áfram að byggja Samstöðina upp.
Kvittur er uppi um að Steinunn Ólína Þorsteinsdóttir, leikkona og forsetaframbjóðandi, sé sjóðheit og þess albúin að krækja sér í þingsæti. Þá er hermt að Margrét Kristín Blöndal, Magga Stína, vilji setjast á Alþingi og fylgja þar eftir brennandi hugsjónum sínum. Að auki er nokkur fjöldi Vinstri-grænna sem horfa tárvotum augum á brúnna milli lífs og dauða og eru þess albúnir að taka stökkið ef pólitíska lífsvon verður að finna. Haustið geymir svörin …