Sigríður Hrund Pétursdóttir, fyrrverandi formaður Félags kvenna í atvinnulífinu, hefur stigið fram og gefið kost á sér sem forseti Íslands. Sigríður fagnaði fimmtugsafmæli sínu og tilkynnti með stæl að hún félli einstaklega vel að þessu embætti. Óhætt er að segja að hún er lítt umdeild og gæti þess vegna fengið fljúgandi meðbyr á vængjum kvennabaráttu.
Hún lenti í fjölmiðlastormi eftir að hafa sett „læk“ við færslu fjölmiðlamannsins Loga Bergmanns Eiðssonar á Facebook sem varðist ásökunum Vítalíu Lazereva um að hann hefði farið yfir mörk hennar á hótelherbergi í Borgarfirði. Þumallinn og stuðningur Sigríðar Hrundar við Loga ollu fjaðrafoki í Facebook-hópi Félags kvenna í atvinnulífinu þar sem Sigríður var gagnrýnd fyrir stuðning við Loga.
Sigríður afturkallaði þumalinn fljótlega og útskýrði tilurð hans á Facebook.
„Merkingarbær þumall – mér varð það á í gær að setja like á færslu Loga Bergmann. Tók hann af um leið og mér var bent á hversu merkingarbær þumallinn getur verið. Þumall fyrir mér er ekki samþykki öllum stundum, heldur „ég heyri hvað þú segir“.“
Hún upplýsti jafnframt að hún væri sjálf þolandi kynferðisofbeldis og hugur og stuðningur hjá þolendum. Seinna dró Vítalía í land með ásakanir sínar á hendur sjónvarpsmanninum sem missti atvinnu sína eftir ásakanirnar. Þumallinn merkingabæri hefði í þessu ljósi mátt standa óhaggaður …