Jón Gunnarsson, aðstoðarmaður Bjarna Benediktssonar, er í vanda eftir að sonur hans, Gunnar Bergmann Jónsson fasteignasali, upplýsti svissneska tálbeitu um þau hrossakaup sem áttu sér stað þegar Jón féllst á að taka fimmta sætið á lista Sjálfstæðismanna í Kraganum eftir að Þórdís Kolbrún Reykfjörð Gylfadóttir rasskellti hann úr öðru sæti listans.Gunnar sagði að faðir hans hefði samið við Bjarna formann um að fá að fara í ráðuneyti sjávarútvegsmála til að föndra með hvalveiðileyfið. Blaðamenn Heimildarinnar, Aðalsteinn Kjartansson og Helgi Seljan opnuð málið.
Margir muna viðbrögðin þegar Wintris-mál Sigmundar Davíðs Gunnlaugssonar, þáverandi forsætisráðherra, kom upp og kostaði hann embættið. Í stað þess að bíða eftir því að málið kæmi fram þá ákvað Sigmundur að upplýsa sjálfur um þá hroðalegu gildru sem hann hafði verið lagður í af sænskum sjónvarpsmanni.
Jón Gunnarsson, sem er allajafna töffari, ákvað að fara sömu leið og grátstafir hans bárust landsmönnum í morgunsárið í gær. Hann upplýsti um upptökurnar leynilegu og talaði um aðför að fjölskyldu sinni og lýðræðinu og ýjaði að því að samsærið næði til frambjóðenda Samfylkingar.
Loksins bar hann son sinn þeim sökum að hann hefði spunnið upp söguna um baktjaldamakkið. Jón er einlægur hvalveiðisinni en málið hefur valdið honum og Kristjáni Loftssyni, forstjóra Hvals, miklum skaða og nánast útilokað að hvalveiðileyfi verði gefið úr fyrir kosningar. Þá er Sjálfstæðisflokkurinn enn dýpra sokkinn í fen fylgishruns.
Vælubíll Jóns var á fleygiferð um alla fjölmiðla í gær og syninum var hent undir vagninn í stað þess að viðurkenna það sem rétt er og satt …