Eitt af stærri fréttamálum undanfarinna ára er meint áreiti pottverjanna frægu í garð Vítalíu Lazereva. Atvikið átti sér stað í svallveislu í sumarbústað þar sem fólkið fór saman nakið í heitan pott og Vítalía staðhæfði að hún hefði verið áreitt og brotið gegn blygðunarsemi hennar. Þrátt fyrir kæru ungu konunnar vegna atviksins var ekki talið að framkoman við Vítalíu yrði til sakfellingar og málið var fellt niður.
Vítalía og ástmaður hennar, Arnar Grant voru í hita leiksins kærð til lögreglu fyrir að hafa reynt að kúga fé úr úr Ara Edwald, Þórði Jóhannessyni og Hreggviði Jónssyni sem fullyrtu að parið hefði krafist himinhárrar greiðslu fyrir að hverfa frá málssókn. Nú hefur rannsókn þess máls verið felld niður og parið getur andað léttar. Málið hefur haft gríðarlegar afleiðingar fyrir Ara Edwald sem var rekinn frá Mjólkursamsölunni vegna þess. Þá hefur Arnar einnig misst lifibrauð sitt eftir að samningum um sölu á orkudrykkjum var sagt upp. Skaðinn fyrir Þórð og Hreggvið er helst ímyndarlegs eðlis. Logi Bergmann Eiðsson sjónvarpsmaður missti einnig vinnuna vegna frásagnar af samskiptum við parið á hótelherbergi í Borgarfirði.
Með frávísuninni er málum pottverjanna lokið. Enn er þó óútkljáð mál á hendur Vítalíu um að hún hafi sem starfsmaður farið í óleyfi inn á lyfjaskrá til að forvitnast um viðskiptavini Lyfju. Málið er talið tengjast pottamálinu. Hún missti vinnuna í apótekinu og málið vofir enn yfir henni. Samband Vítalíu og Arnars hefur haldið með hléum í gegnum öll þessi ósköp …