Íslendingar eru í gríðarlegum vanda vegna offitu. Mælingar OECD á undanförnum árum hafa leitt í ljós að við erum feitasta þjóð í Evrópu. Þar með er okkur hættast við að veikjast af Covid 19 eða öðrum sjúkdómum.
Fyrir örfáum áratugum var það undantekning ef fólk var í þyngri kantinum. Nú hefur dæmið snúist við og það er algengara en ekki að fólk sé í yfirþyngd. Ástæðan er hreyfingarleysi og neysla á sykri, hveiti og annarri óhollustu. Velmegunin hefur orðið til þess að fólk hreyfir sig minna og liggur í óhollustu. Hluti af vandanum er svo tölvufíkn með tilheyrandi kyrrsetu sem nær upp allan aldursstigann. Haldi þessi þróun áfram blasir við þjóðinni gríðarlegt heilbrigðisvandamál á næstu áratugum. Velmegunarsjúkdómar, tengdir hjarta og æðum, munu leggjast af enn meiri þunga á heilbrigðiskerfi okkar sem þegar á í miklum vanda.
Vandinn vegna offitu má ekki snúast um fordóma
Offitusjúklingar hafa í gegnum tíðina verið ofsóttir af samborgurum sínum. Fólk hefur verið uppnefnt og það smánað vegna útlitsins. Einelti hefur verið algengt þar sem þessi hópur á í hlut. Smánun hins feita er ákveðinn skepnuskapur og má ekki líðast. Offita er afleiðing af sjúkdómi, rétt eins og annar fíknivandi. Sá sem borðar of mikið ræður ekki við sig. Hann er á valdi græðginnar rétt eins og fíknisjúklingurinn. Hinum feita líður oft illa. Hann þjáist af hreyfihömlun og oft fylgir offitunni þunglyndi.
Vandinn vegna offitu má ekki snúast um fordóma vegna útlits. Aftur á móti verður samfélagið að leggjast á eitt við að bjarga fólki frá sjálfu sér út frá heilsufarslegum sjónarmiðum. Þjóðin þarf að fara í stórátak til að auka hreyfingu fólks á öllum aldri og stuðla að vitundarvakningu varðandi mataræði og hollustu.
Hjartasjúkdómar eru algengir hjá þeim sem eru of þungir og lifa á fæði sem stíflar kransæðar. Slegið hefur verið á það að einn hjartasjúklingur sem þarf á stórri aðgerð að halda kosti samfélagið allt að 100 milljónir króna. Það sér hvert mannsbarn að ef hægt er með mótvægisaðgerðum að fækka þeim sem hljóta þau örlög, þá sparast gríðarlegt fé sem nota mætti til að auka lífsgæði þjóðarinnar.
Lýðheilsuátak sem felur í sér aukna hreyfingu og bætt mataræði er ávísun á betri heilsu. Hreyfingin stuðlar ekki aðeins að bættri líkamlegri heilsu heldur vinnur einnig gegn kvíða, þunglyndi og öðrum andlegum sjúkdómum. Eitt stærsta verkefni okkar Íslendinga felst í því að finna þá formúlu sem þarf til að losa fólk undan þjáningu offitunnar. Stjórnmálamenn verða að taka þessu alvarlega og finna leiðina til jafnvægis og aukinnar hamingju. Feita fólkið þarf hjálp til að léttast og þjóðin þarf á fyrirbyggjandi aðgerðum að halda.