Eitt stærsta fjölmiðlafyrirtæki landsins er Árvakur sem heldur úti Morgunblaðinu, elsta dagblaði landsins. Árvakur er jafnframt eitt spilltasta fyrirbæri íslenskrar fjölmiðlasögu. Fjölmiðlar Árvakurs hafa grímulaust gengið erinda stórútgerðarinnar og sérstaklega þess hluta hennar sem er að finna í Vestmannaeyjum. Ástæðan er auðvitað sú að Guðbjörg Matthíasdóttir, auðkona og eigandi Ísfélagsins, hefur dælt peningum í fjölmiðilinn og verið líflína hans og bjarghringur um langt árabil. Þakklætisvottinn má sjá í brenglaðri umfjöllun miðilsins um kvótakerfið og mál tengd sjávarauðlindinni. Varðhundar spillingarinnar standa sína vakt.
Óhróður sögukennarans í Garðabæ
Samherjamálið, sem snýst um mútur og spillingu eins stærsta sjávarútvegsfyrirtækis Íslands, hefur fengið sérlega meðferð hjá Mogganum. Um langa hríð voru Samherjamenn aðaleigendur blaðsins þar til þeir komu hlut sínum fyrir kattarnef. Umfjöllun Moggans og meðreiðarsveina hans, einkennist af samúð með með meintum spillingaröflum. Stöðugar árásir eru gerðar á Ríkisútvarpið og starfsmenn þess. Auðvelt er að rekja það til þess að RÚV hefur, með skarpri umfjöllun, dregið Samherjamenn inn í dagsljósið með meint brot sín í Namibíu, Færeyjum og víðar. Mogginn vill hefna fyrir þann gjörning.
Einn helsti penni Moggans er Páll Vilhjálmsson, sögukennari við Fjölbrautaskólann í Garðabæ. Páll heldur úti bloggi sínu undir regnhlíf Moggans og er fastagestur í Staksteinum, sem sumir kalla rógsdálk Morgunblaðsins. Óhróður sögukennarans í Garðabæ er með eindæmum. Hann hefur básúnað að Helgi Seljan, einn virtasti rannsóknarblaðamaður landsins, sé geðveikur og honum því ekki sjálfrátt. Helgi hefur sjálfur sagt frá glímu sinni við þunglyndi og kvíða sem hrjáir stóran hluta þjóðarinnar og þykir alla jafna ekki fréttnæmt eða tilefni fordæmingar. Páll hefur í pistlum sínum hamrað á þessu og gefið í skyn að blaðamaðurinn sé ekki marktækur. Þá hefur hann dylgjað um að annað starfsfólk Ríkisútvarpsins sé að glíma við geðveilu og því ekki treystandi. Fjölmargir hafa fordæmt skrif Páls sem fara fram í skjóli Moggans. Þeirra á meðal er Guðmundur Andri Thorsson, fyrrverandi alþingismaður.
„Mér finnst Páll þó vera í senn eins og sjúkdómsmerki og fórnarlamb vissra siða í opinberri umræðu,“ segir hann.
Líklegt er að lögreglan hafi þegar upplýst málið
Páll hefur verið heltekinn af svonefndu símamáli Samherja. Nafni hans, Páll Steingrímsson skipstjóri, lá á sjúkrabeði þegar náinn aðstandandi hans gaf honum svefnlyf, rændi síma hans og lét afrita. Þetta leiddi til þeirra uppljóstrana að Páll hafði, ásamt félögum sínum, staðið að óhróðursherferð á hendur þeim sem taldir voru óvinir Samherja. Samnefni hópsins var Skæruliðar Samherja og verkefnið var að grafa undan blaðamönnum og fleirum sem Samherjamenn vildu höggva til. Samskipti sem upplýstu um þetta var að finna í síma hins veika skipstjóra. Sögukennarinn í Garðabæ, hefur ítrekað haldið því fram að tilgreindir starfsmenn RÚV hafi byrlað skipstóranum ólyfjan og skipulagt þjófnað á símanum og afritun hans. Þetta er rakalaus ásökun um morðtilraun. Eftirtektarvert er að Páll nefnir ekki á nafn þann sem gaf skipstjóranum svefnlyfið en nafngreinir starfsmenn RÚV sem hann segir bera ábyrgð. Líklegt er að lögreglan hafi þegar upplýst málið og fengið fram játningu aðstandandans sem tók símann. Ekkert hefur komið fram sem bendir til þess að þjófnum hafi verið fjarstýrt við glæpinn.
Morgunblaðið er hýsill Páls og ber þá ábyrgð rétt eins og Kristinn Þorsteinsson, skólameistari Fjölbrautaskólans í Garðabæ, sem leggur sögukennslu ungmenna skólans í hendur manns sem lætur sig litlu skipta hvað sé rétt eða hvað sé rangt. Guðbjörg, auðkona í Vestmannaeyjum, ber svo sína ábyrgð á því að halda úti fjölmiðli af þeim toga sem raun ber vitni. Mikil er skömm þessara aðila.