Samfélagið hefur undanfarna mánuði logað af reiði vegna gerenda í kynferðisbrotamálum. Ömurleg mál sem snúa að konum sem sannarlega var nauðgað eða brotið á kynferðislega hafa komið upp á yfirborðið. Önnur mál, þar sem skortir sannanir, hafa líka komið upp. Dæmi eru um að menn hafi nánast verið teknir af lífi á samfélagsmiðlum án dóms og laga. Skipulögð hefur verið aðför að mönnum á samfélagsmiðlum og þeir afgreiddir án þess að óyggjandi sannanir hafi komið fram um brot þeirra eða alvarleika þess sem um er að ræða.
Mannlíf hefur undanfarið birt fréttir um þær ásakanir sem hafa komið fram í myrkviðum samfélagsmiðlanna. Frægðarmenni á borð við Sölva Tryggvason, Ingólf Þórarinsson, Kolbein Sigþórsson, Auð og Kolbein Óttarson Proppé hafa verið afgreidd með því að þau hafa misst vinnuna. Fyrir liggur að Kolbeinn Sigþórsson greiddi milljónir til fórnarlamba sinna til að tryggja þögn. Aðrir úr þessum hópi bera óljósari sakir. Engir dómar hafa fallið nema sá sem kenndur er við dómstól götunnar. En í dag eru allir þessir menn atvinnulausir og sæta sniðgöngu.
Sakleysingi á ekki að þurfa að ganga þau svipugöng
Það ber að dæma gerendur í kynferðisbrotamálum hart og láta þá sæta þyngstu refsingu. Við eigum að hlúa að fórnarlömbum slíkra brota og milda harm þeirra eins og kostur er. Þar má engan afslátt gefa. Jafnframt má engan afslátt gefa á sönnunum þegar um er að ræða ásakanir á meinta gerendur. Saklaus maður má ekki missa æru sína og lifibrauð vegna falskra ásakana. Rétt eins og fórnarlamb nauðgunar gengur í gegnum helvíti þá er sá sem úthrópaður fyrir kynferðisbrot á dimmum stað í lífinu. Sakleysingi á ekki að þurfa að ganga þau svipugöng.
Á dögunum fékk sá sem þetta ritar símtal frá baráttukonunni Eddu Falak, sem ég bar virðingu fyrir á þeim tíma og taldi að hún hefði kjark, þor og heiðarleika að leiðarljósi. Hún var kurteis í einkasamtalinu. Erindið að óska þess að fréttir á Mannlífi yrðu fjarlægðar. Önnur fréttin var um ásakanir um nauðgun sem hún bar á ónefndan aðila á samfélagsmiðlum. Því var kurteislega hafnað. Þá byrjaði rottugangurinn. Edda birti frásögn sína af samtalinu á Twitter og fullyrðir að hún hafi fengið þau viðbrögð að þetta væri allt henni að kenna. „…Eftir að ég hringi í Reyni Trausta og grátbyð hann um að taka það út og hann segir þetta vera mér að kenna?“
Þessi áburður lýsir einstaklingi sem einskis svífst. Við skulum halda því til haga og hafa það alveg skýrt að ég hef aldrei sýnt fórnarlambi nauðgunar miskunnarleysi eða skilningsleysi. Þvert á móti á fólk í þeirri stöðu alla mína samúð. Falskar ásakanir um annað eru rógur. Edda átti þess kost á að koma í viðtal við mig um þessi mál og önnur sem hún hefur haldið á lofti en hún afþakkaði.
Íslenskt samfélag verður að taka samtal um það hvar mörkin liggja í samskiptum við fólk. Villta vestrið má ekki ráða för. Við hengjum ekki fólk í næsta tré. Við verðum að virða réttarkerfið og finna leiðina til þess að vernda fólk fyrir hvert öðru svo sleggjudómar ráði för. Fórnarlömb nauðgara verða að fá allan mögulegan skilning og lagaramma sem tryggir þeim sem best réttlæti. En það er ekki ásættanlegt að menn séu sakaðir að ósekju um nauðgun og látnir bera þann kross, saklausir til æviloka, að þeir séu slík ómenni. Það má aldrei gerast.
Lestu allt um málið og meira til í brakandi fersku helgarblaði Mannlífs hér eða flettu blaðinu hér fyrir neðan: