Nýjasta útspil þríeykisins er það að hver og ein fjölskylda búi sér til sína eigin jólakúlu og ákveði hverjir munu koma saman um hátíðarnar. Líklega er þetta eina raunhæfa leiðin til að pestin breiðist ekki aftur út með leifturhraða og ófyrirsjáanlegum afleiðingum. Þessa dagana er þjóðin á hengiflugi þess að veldisvöxtur verði.
Þríeykið þarf að gera sér grein fyrir því að þau eru fyrirmynd okkar hinna. Gestagangurinn á heimili Víðis Reynissonar yfirlögregluþjóns og smitin sem hlutust af eru vondar fréttir fyrir alla. Öllum má ljóst vera að þarna var óvarlega farið og afleiðingin er að sá sem segir okkur hinum fyrir verkum er orðinn veikur. Jafnframt eru örlög Víðis okkur hinum viðvörun um að veiran er í senn lævís og lipur. Ekki er annað í boði en að lágmarka heimsóknir og gæta varúðar í hvívetna. Jólakúla hvers og eins verður að vera með allt öðrum hætti. Nú skal tekið fram að ekki er ástæða til að fordæma framgöngu Víðis. Hann á allt annað og betra skilið fyrir að hafa stappað í okkur stálinu og hvatt til varfærni frá því fyrri bylgjan skall á. En svo bregðast krosstré sem önnur tré. Hann er nú að súpa seyðið af gestanauðinni.
Mörgum er tíðrætt um smitskömm. Við getum engan veginn leyft okkur að áfellast nokkurn mann fyrir að smita óviljandi. Öðru máli gegnir með þá sem svíkjast undan sóttkví eða einangrun og dreifa þannig smiti sem getur þýtt dauða. Það fólk ber að fordæma. Sömuleiðis köllum við eftir ábyrgð þeirra sem ekki tryggja lágmarksáhættu í umhverfi sínu og valda með því veikindum og dauða. Allir verða að fylgja reglum og varast að smita. Jólakúla þríeykisins er ágætis áminning um að setja sér reglur. Þessi jól verða eins og mest allt það ömurlega ár sem nú er að líða. Spritt, grímur og fámenni.
Gerum komandi jól að hátíð kjarnafjölskyldunnar og tryggjum okkur farsæla hátíð og bærilega. Notum tölvutæknina til að halda samskiptum við aðra vini og ættingja. Betri eru fámenn jól en faraldur í vexti. Og það er ljós við enda ganganna. Það styttist í lausnina. Mótefnið er handan við áramótin og fyrr en varir munum við taka upp eðlilegt líf og þetta ár hryllings verður að baki. Þríeykið hverfur af sviðinu með brothættar jólakúlur sínar og hefðbundið, daglegt líf tekur við. Á næsta ári mun renna upp betri tíð með blóm í haga. Sumarið 2021 verður stórkostlegt.