Morgunblaðið birti dagana 24. nóv og 4. des sl. tvær greinar með fyrirsögninni „Tími uppgjörs – biskupar bæti tjón“, sem undirritaður ritaði með fullu samþykki og vitund ritstjóra og ábyrgðarmanna blaðsins. Vísa ég til þessarra greina, sem er auðvelt að „googla“. Mér fannst djarft af mogganum að birta greinarnar, en ég fékk fjölda jákvæðra viðbragða við efnisinnihaldi greinanna.
Nú þegar nýr biskup hefur verið kosinn er eðlilegt að þetta uppgjör hefjist og þeim prestum sem fjallað er um í greinunum verðið bættur skaði, miski og niðurlæging, sem þau urðu fyrir í tíð fv. biskupa. Ég skora hérmeð á nýja biskupinn að hefja „flórmoksturinn“, og sýna manndómsbrag á að gera málin upp og í framhaldinu að bæta ráð biskupanna.
Ekki þarf að hafa mörg orð um að biskupar eiga að ganga á undan með góðu fordæmi hvað varðar stjórnsýslu, manngæsku og sáttavilja. Mér fannst myndefni það sem á borð var borið eftir tilkynningu um hver vann biskupskjörið ekki benda til að mikil breyting verði á, er hér með skorað á nýja biskupinn að bæta ráð sitt hvað varðar val á viðhlæjendum. Svo má bótin byrja.