Háttalag Þórdísar Kolbrúnar Reykfjörð Gylfadóttir, ráðherra ferðamála, er gríðarlega ámælisvert. Ráðherrann þverbraut þau viðmið og mörk sem ríkisstjórn hennar og sóttvarnaryfirvöld hafa sett varðandi umgengni og nánd í Krónafaraldrinum. Hún fór á djammið ásamt stórum hópi kvenna. Mikil nánd var innan hópsins og myndum dreift af þeim, kinn við kinn. Ráðherrann réttlætti djammið í fyrstu en sagði að um væri að ræða vinkvennahóp og skilja mátti að hún hefði þurft á þessu að halda. Hún baðst ekki afsökunar á framferði sínu en viðurkenndi að uppákoman kostaða væri óheppileg. Það er engin leið að fyrirgefa þeim sem ekki biðst afsökunar.
Þórdís Kolbrún er í framvarðasveit Sjálfstæðisfllokksins og framferði hennar ætti að vera til fyrirmyndar í flestu. Hún hefur brugðist þeim sem völdu hana til áhrifa. Ekki er aðeins um að ráða áhættuhegðun varðandi smit á lífshættulegum sjúkdómi. Eva Laufey Hermannsdóttir áhrifavaldur staðfesti við Stundina að skemmtun kvennahópsins var niðurgreidd af Icelandair hotels og hugsanlega fleirum. Ráðherra ferðamála var á randi sínu þennan dag í ferð sem var niðurgreidd af fyrirtæki sem hún er nánast með í kjöltunni sem stjórnmálamaður. Hún heldur á lyklunum að fjárhirslum ríkisins. Brot hennar er því tvöfalt og hún iðrast einskis og talar um að málið sér óheppilegt. Hún biðst ekki afsökunar á neinu, þrátt fyrir augljóst tilefni. Sá þáttur sem snýr að hlunnindum djammfólksins er einn og sér tilefni til að staldra við og gera upp við ráðherrann. Það er hættulegt samband sem myndast þegar ráðamenn þiggja sporstlur eða gjafir af þeim sem standa í skjóli þeirra. Með slíkum gjöfum er fólk komið nærri hugtakinu mútur. Ráðherrann þarf að sýna fram á í smáatriðum þau útgjöld sem áttu sér stað á djammdeginum með áhrifavaldinum og öllum hinum.
Kollegar Þórdísar Kolbrúnar í ríkisstjórn gera lítið úr þessu máli og jafnvel réttlæta hegðun hennar varðandi smitþáttinn. Meðvirknin er ríkjandi í málinu, jafnvel hjá sóttvarnarlækni og þríeykinu sem á umfram allt að halda uppi ákveðinni reglu á óvissutímum. Vísað er í loðnar reglur. Hægt er að ímynda sér þá sviðsmynd að smit hefði borist á milli kvennanna og áfram um samfélagið. Við skulum átta okkur á því að allur almenningur býr við gríðarlega skert frelsi og fólk er sektað fyrir brot á sóttvarnarreglum. Svo sveigir ráðherrann reglurnar og beygir.
Vandinn er sá að ráðherrann á að vera réttum megin við strikið. Enginn vafi má ríkja í þeim efnum. Siðferðisviðmið okkar varðandi æðstu ráðamenn ættu að vera með þeim hætti að ráðherra í þessari stöðu segði af sér. Þórdís Kolbrún hefur brugðist kjósendum sínum og þjóðinni allri. Hún verður að axla ábyrgð.