Höfundur / Halldór Benjamín Þorbergsson, formaður Samtaka atvinnulífsins
Atvinnulífið er ekki eyland í íslensku samfélagi. Þvert á móti á atvinnulífið í virku samtali og samspili við samfélagið enda er það forsenda þess að við búum á þessari litlu eyju í sátt við góð lífskjör. Í virku samtali felast skoðanaskipti, gagnrýnin umræða, tillöguréttur og málfrelsi á báða bóga. Samtök atvinnulífsins hafa þannig tillögurétt þegar kemur að mörgum mikilvægum stoðum í íslensku samfélagi, s.s. menntamálum, heilbrigðismálum og samfélagsábyrgð. Á SA hvílir einnig sú ábyrgð að bregðast við þegar reynir á í samfélaginu, kalla eftir samtakamætti atvinnurekanda og ábyrgri afstöðu og aðgerðum.
Að ósk sóttvarnarlæknis hafa Samtök atvinnulífsins fundað með honum vegna óvissustigs sem lýst hefur verið yfir vegna faraldurs kórónaveiru (COVID-19). Samkvæmt viðbragðsáætlun almannavarna hafa SA hlutverki að gegna þegar heimsfaldrar verða. Það felst aðallega í að miðla upplýsingum til fyrirtækja. Það er mikilvægt að upplýsingar sem okkur berast um stöðu mála hverju sinni grundvalli ákvarðanir og viðbrögð.
Það getur valdið vonbrigðum að tímabundið þurfi að breyta áætlunum um ferðalög, mannamót og jafnvel það hvernig við heilsumst á förnum vegi. Það þýðir þó ekki að okkar daglega líf þurfi að kollvarpast. Tímabundið ástand sem krefur okkur um breytta háttsemi ætti að verða okkur ágætis áminning um gæði sem við búum við í okkar daglega lífi og teljum til sjálfsagðra mannréttinda fremur en lífsgæða.
Bæði fyrirbyggjandi ráðstafanir eins og sóttkví, sem þegar hefur verið gripið til, og möguleg útbreiðsla veirunnar hér á landi getur leitt til fjarvista starfsfólks frá vinnu. SA eru boðin og búin til að vinna með yfirvöldum í aðgerðum þeirra. Við hvetjum fyrirtæki til að gera það einnig og sýna starfsmönnum skilning sem þurfa hugsanlega að vera fjarri vinnu vegna sóttkvíar eða veikinda.
Við hvetjum fyrirtæki til að kynna sér upplýsingavef Landlæknis um kórónaveiruna þar sem m.a. má finna sérstakar upplýsingar fyrir atvinnulífið, m.a. leiðbeiningar til framlínu starfsmanna á íslensku, ensku, pólsku og spænsku.
Samtök atvinnulífsins hvetja til yfirvegunar í máli og gjörðum þegar kemur að umræðu um kórónaveiruna. Förum varlega og nálgumst verkefnið af ábyrgð en án upphrópana. Slíkt er vænlegt til árangurs.