Þriðjudagur 19. nóvember, 2024
-4.5 C
Reykjavik
Senda ábendingu
VefTv
Hlaðvörp

Setuverkfall hafið í utanríkisráðuneytinu: „Tími aðgerðaleysis er löngu liðinn!“

Setuverkfall

Setuverkfall stendur yfir í utanríkisráðuneytinu þar sem mótmælendur hafa komið sér fyrir í anddyri ráðuneytisins til að mótmæla aðgerðarleysi íslenskra stjórnvalda hvað varðar þjóðarmorðið á Gaza

Hér má sjá yfirlýsingu mótmælenda:

Nú þegar 234 dagar eru liðnir af stigmögnuðu þjóðarmorði gegn Palestínufólki sjást engin ummerki um aðgerðir íslenskra yfirvalda. Veikburða færslur á samfélagsmiðlum og fálmkennd fréttaviðtöl þar sem ráðamenn tönnlast á tveggja ríkja lausn, þar sem ábyrgð varpað á hin kúguðu í stað kúgaranna, eru ófullnægjandi viðbrögð við þjóðarmorði. Íslensk yfirvöld verða að grípa til raunverulegra aðgerða gegn ólöglegum árásum Ísraels á Palestínu. Með aðgerðaleysi sínu gera yfirvöld almenning samsekan í þjóðarmorði. Meirihluti almennings er á móti þjóðarmorðinu á Gaza og vilja að stjórnvöld beiti sér fyrir tafarlausu vopnahléi. Siðferðislegur brestur yfirvalda er algjör.

Þann 13. október sagði Þórdís Kolbrún R. Gylfadóttir, utanríkisráðherra Íslands, á miðlinum X: „Alþjóðalög kveða á um réttindi og skyldur. Bæði eru heilög.“ Hvað ber íslenskum yfirvöldum að gera þegar þessi heilögu réttindi og skyldur eru virt að vettugi?

Ísland á aðild að Alþjóðadómstólnum og Alþjóða sakamáladómstólnum, sem báðir hafa úrskurðað um að Ísrael beri að stöðva allar árásir í Palestínu, bæði á Gaza og á Vesturbakkanum, og hleypa tafarlaust inn mannúðaraðstoð í gegnum landamærin hjá Rafah. Þá hefur Alþjóðlegi sakamáladómstóllinn (ICC) gefið út handtökutilskipanir á hendur Benjamin Netanyahu, forsetisráðherra Ísraels og Yoav Gallant, varnarmálaráðherra Ísraels. En hvað gerir Ísrael eftir slík fyrirmæli?

Ísrael hefur ekki einungis hundsað tilskipanir dómstólanna heldur stóraukið á árásir í kjölfar þeirra, nú síðast með hryllilegri loftárás á tjaldbúðir flóttafólks í Rafah þann 26. maí. Árásin var gerð á svæði sem Ísrael lofaði að ætti að vera öruggt og voru þar fjöldi saklausra borgara, barna!, sem brennd voru lifandi. Enn er ekkert lát á árásum Ísraels á Rafah í sjónmáli. Í kjölfarið sagði utanríkisráðherra að íslensk yfirv öld kalli eftir því að skipanir Alþjóðadómstólsins séu virtar og að komið sé á tafarlausu vopnahléi. Í kvöldfréttum sama dag nefnir hún ekki eina einustu aðgerð sem íslensk stjórnvöld ætla að ráðast í til að þrýsta á um að svo verði, heldur ýjar eingöngu að því að ákveði Evrópusambandið að grípa til aðgerða gæti verið að Ísland styðji þær.

Ísland tók frumkvæði árið 2011 með því að verða fyrst vestur-evrópskra þjóða til að viðurkenna Palestínu sem sjálfstæða þjóð. Íslandi ber skylda til þess að framfylgja viðurkenningu okkar á Palestínu sem fullvalda ríki, annað er sýndarmennska og hræsni. Nýlega viðurkenndu Noregur, Írland og Spánn sjálfstæði Palestínu. Það er ekkert því til fyrirstöðu, annað en pólitískur vilji íslensku ríkisstjórnarinnar, að við höfum nú frumkvæði að samstarfi við þessar þjóðir og tökum til aðgerða til að knýja á um tafarlaust, varanlegt vopnahlé á Gaza, endalok hernáms Ísraels í Palestínu og að réttur palestínsks flóttafólks til að snúa aftur til heimkynna sinna og eigna sé tryggður, eins og samþykkt Sameinuðu þjóðanna nr. 194 gerir ráð fyrir.

Þar sem íslensk yfirvöld virðast ófær um að kortleggja sjálf slíkar aðgerðir, eru hér dæmi. Við krefjumst þess að:

  1. Settar verði viðskiptaþvinganir á Ísraelsríki.
  2. Ísland slíti stjórnmálasambandi við Ísraelsríki.
  3. Að Ísland styðja málsókn Suður-Afríku á hendur Ísraelsríkis við Alþjóðadómstólinn.
  4. Að utanríkisráðherra hafi frumkvæði að samtali við Norðurlöndin, Írland og Spán um að samhæfa aðgerðir.

Til að sýna fordæmi um stuðning við palestínsku þjóðina í verki skipuleggjum við setumótmæli í Utanríkisráðuneytinu. Lífið getur ekki gengið sinn vanagang á meðan þjóðarmorð á sér stað, þegar tugir þúsunda hafa verið myrt og særð með kerfisbundnum hætti. Tími aðgerðaleysis er löngu liðinn! Því munum við trufla eðlilegan gang yfirvalda þar til þau bregðast við í samræmi við siðferðislegar skyldur og lagalegar skuldbindingar gagnvart palestínsku þjóðinni. Þessi aðgerð er einn liður að því markmiði.

Lifi frjáls Palestína!

Hér má svo sjá myndskeið frá mótmælunum: Video (2)

 

Leikskóli í slæmum málum eftir að barn komst í kókaínpoka starfsmanns

Kókaín fannst í þvagi barns

Leikskólinn KinderCare í Oak Creek í Wisconsin í Bandaríkjunum er í vondum málum eftir að kókaín fannst í þvagi eins árs gamals drengs sem sækir leikskólann.

Fyrr í mánuðinum hringdi starfsmaður leikskólans í Kimberly Hopson, móður drengsins, og tilkynnti að hann væri orðinn mjög veikur og hún þyrfti að koma sækja son sinn. Þegar Hopson mætti var strákurinn þakinn marblettum og sárum. Í framhaldi af því fór hún með son sinn á sjúkrahús þar sem ýmsar rannsóknir voru framkvæmdar og fannst kókaíni í þvagi drengsins. Þá var haft samband við lögreglu bæjarsins og við leit á leikskólanum fann lögreglan poka af kókaíni sem starfsmaður hafði komið með og er talið að sonur Hopson hafi komst í pokann.

Leikskólinn hefur beðist afsökunar á atvikinu og sagst ætla að borga fyrir allan lækniskostnað en Hopson hefur gefið það út að hún muni fara í mál við leikskólann. Leikskólinn hefur ekki tjáð sig við fjölmiðla um málið.

Vinkona Johnny Wactor lýsir síðustu augnablikum hans: „Af okkur stafaði engin ógn“

Blessuð sé minning hans

Sagt var frá því á dögunum að General Hospital leikarinn Johnny Wactor hafi verið skotinn til bana í Los Angeles, eftir að hafa beðið menn sem voru að reyna að stela hvarfakúti úr bíl hans, að fara í burtu frá bílnum. Vinkona hans og samstarfskona lýsir nú síðustu augnablikum hans en hún var með honum þegar hinn hryllilegi atburður átti sér stað.

Anita Joy

Vinirnir unnu saman sem barþjónar og voru að koma af vakt þegar þau sáu nokkra karlmenn vesenast við bíl Johnny.

„Vinur minn til átta ára fór úr því að hlæja með mér, vinna hlið við hlið við mig, yfirgefa barþjónavaktina okkar með mér og ganga að bílunum okkar með mér,“ skrifaði vinkonan, Anita Joy á Instagram 29. maí, „yfir í það að deyja í fanginu á mér á götum miðborgar Los Angeles, klukkan 3 að morgni.“

Joy sagði atvikið hafa gerst „á einu augnabliki“ þegar hún og Wactor nálguðust menn sem voru að fikta í bíl hans.

„Við nálguðumst mennina varlega, spurðum hvað þeir væru að gera, í fyrstu héldum við að verið væri að draga bílinn,“ skrifaði hún. „Af okkur stafaði engin ógn og Johnny hélt ró sinni eins og hann gerði alltaf, sagði einfaldlega að þetta væri bíllinn hans og að þeir þyrftu að fara í burtu. Hendur opnar friðsamlega til hliðar.“

Hún tók fram að Wactor hafi staðið á milli hennar og mannsins sem skaut hann, sem verndaði hana fyrir ofbeldi.

„Þegar ég heyrði skotið óma inn í nóttina, féll hann kröftuglega aftur á bak í fangið á mér,“ rifjaði hún upp. „Þegar ég greip í hann, hrópaði ég „Elskan, er allt í lagi?“ Og hann svaraði bara: „Nei! Skotinn!“ Við veltumst út á götu þar sem ég ýtti fótunum undir hann og reyndi að halda líkama hans uppi á meðan ég öskraði á hjálp og öskraði á hann að vera áfram með mér.“

Einn öryggisvarðanna á vinnustaðnum þeirra hljóp til þeirra eftir að hafa hringt í neyðarlínuna. Vinnufélagarnir tveir reyndu að bjarga Wactor með því að framkvæma endurlífgun á meðan þeir biðu eftir að lögreglan kæmi.

„Við bundum gallaakkann minn utan um hann til að stöðva blæðingarnar,“ hélt hún áfram. „Þetta var of nálægt færi, of mikið sár til að hann gæti lifað það af en Guð minn góður, hann barðist fyrir að halda lífi. Ég er gjörsamlega miður mín og svo ótrúlega reið. Það eina sem veitir mér frið er að ég var með honum og hann lenti ekki einn í þessu. Það eina sem mun veita mér ró mun vera að sjá þessa hræðilegu menn dregna fyrir rétt.“

Joy hélt áfram að heiðra manneskjuna sem Wactor var, og hrósaði hversu „gegnheill“ Siberia-leikarinn var og hæfileika hans „til að láta hverjum og einum líða svo sérstökum í augum hans“.

Og hún hélt áfram:

„Orkan hans var segulmögnuð og dró þig svo áreynslulaust inn – þú varst öruggur hjá honum,“ sagði hún. „Hann kom fram við alla af ást, virðingu, samúð og hann „sá“ þig í raun. Hann var fallegur, aulalegur fyrir allan peninginn, fullur af vinnusiðferði og gildum.“

Joy rifjar upp hvernig hann kallaði hana ástúðlega „Aníta Bonita,“. „Ég vona að endurhljómun raddar hans, að segja þetta í hvert skipti sem ég sá hann, fari aldrei úr minni mínu. Johnny lét mann falla algjörlega fyrir sér um leið og maður leit í stóru, bláu augu hans, og fyrir neðan þau aulalegt glott. Algjörlega einn besti maður sem ég hef kynnst.“

Johnny Wacktor var aðeins 37 ára er hann lést.

Hógvær Freyr hrósar þjálfara Vals: „Óskar er kóngurinn“

Freyr Alexandersson segir þjálfara Vals vera kónginn

Mikil umræða hefur skapast undanfarnar vikur í fjölmiðlum og á samfélagsmiðlum um góðan árangur íslenskra íþróttaþjálfara á árinu og hefur árangur Freys Alexanderssonar, þjálfara knattspyrnuliðsins K.V. Kortrijk í belgísku úrvalsdeildinni, ekki farið framhjá neinum íþróttaaðdáanda en hann tók við liðinu í janúar þegar liðið var í neðsta sæti deildarinnar og hafði ekki unnið leik í þrjá mánuði en undir stjórn hans tókst honum að bjarga liðinu frá falli.

Hafa einhverjir sófasérfræðingar sagt að Freyr muni án nokkurs vafa vera kosinn þjálfari ársins en sjálfur telur Freyr að Óskar Bjarni Óskarsson, þjálfari karlaliðs Vals í handbolta, standi honum framar þetta árið en Óskar gerði Val að Evrópubikarmeistarum og er það fyrsta sinn sem íslenskt lið vinnur Evrópukeppni í handbolta.

Í færslu á Twitter segir Freyr einfaldlega: „Óskar er kóngurinn. Ég og Finnur mætum bara í partyið“

May be an image of 3 people and text
Óskar Bjarni í faðmlögum

Boða mótmæli við ríkisstjórnarfund í fyrramálið: „Þjóðarmorðið stöðvast ekki án aðgerða!“

Frá samstöðufundi með Palestínu fyrr á árinu. Ljósmynd: Björgvin Gunnarsson

Samtökin Ísland-Palestína boða til mótmæla í fyrramálið.

Í fyrramálið eru fyrirhuguð mótmæli í Skuggasundi 3, þar sem fram fer ríkisstjórnarfundur. Mótmælin hefjast klukkan 8:30 en þar verður þess krafist að ríkisstjórnin setji viðskiptaþinganir á Ísrael vegna þjóðarmorðsins á Gaza.

Í tilkynningu frá samtökunum segir:

„Krefjumst þess að íslenska ríkið taki það hugrakka skref að setja viðskiptaþvinganir á Ísrael og slíti stjórnmálasambandi við þjóð sem fremur þjóðarmorð! Orð duga ekki lengur, þjóðarmorðið stöðvast ekki án aðgerða!“

 

Ég finn fyrir kvíða

Katrín Jakobsdóttir forsetaframbjóðandi - Myndin tengist pistlinum ekki beint

Yfirvofandi slys.

Ég finn fyrir kvíða. Í hvert sinn sem niðurstöður skoðanakannana birtast finn ég fyrir kvíða. Kvíða vegna þess að niðurstöður þeirra gefa vísbendingar um að í burðarliðnum sé slys í sögu Íslands.Það yfirvofandi slys, að Katrín Jakobsdóttir hljóti kosningu sem Forseti Íslands. Katrínu Jakobsdóttir skortir samúð og mannskilning. Hana skortir virðingu fyrir samlöndum sínum Ég sat í nefnd sem skipuð var af Katrínu Jakobsdóttir Forsætisráðherra. Hlutverk nefndarinnar var að fjalla um og leggja til breytingar á nýju frumvarpi hennar um sanngirnisbætur til handa fórnarlömbum stofnanaofbeldis sem framið var í skjóli íslenskra yfirvalda á bæði síðustu og núverandi öld. Innihald þessa frumvarps Katrínar var svo óréttlátt og löðrandi í mannfyrirlitningu að forsætisráðherra Katrín Jakobsdóttir var gerð afturreka með það í samráðsgátt. Nú datt Katrínu Jakobsdóttir í hug að nýta mætti þessa vesalinga (sem hún áður hafði misboðið með þessu frumvarpi) til gagns. Hún skipaði nefnd sem í sátu fulltrúar þeirra sem orðið höfðu fyrir misrétti á barnaheimilum rekin af íslenskum yfirvöldum. Verklýsinguna fengum við í nefndinni í hendur. Hlutverk okkar var að fjalla um og koma með tillögur um hvernig bæta mætti þessi frumvarpsdrög þannig að þolendum þætti frumvarpið líðandi. Við sem sátum í nefndinni hittumst reglulega frá vormánuðum 2023 og fram haust 2023. Við unnum að einlægni og tiltrú á að Forsætisráðherra Katrín Jakobsdóttir væri alvara. Við trúðum orðum hennar þess efnis að hún bæri þá einu ósk í brjósti að koma til móts við þolendur þess óréttlætis sem fram hafði verið á okkur sem börnum af hálfum íslenskra stjórnvalda. Við kynntum svo niðurstöður okkar í kaffiboði í ráðherrabústaðnum við Tjarnagötum. Katrín sat fyrir miðju og hlustaði áhugasöm á tillögurnar.

Svo kom frumvarpið Það var eins og blaut tuska framan í mig. Það er gersneytt öllum tillögum og öllum óskum sem við lögðum til og báðum um. Eina ályktunin sem við gátum dregið af því var að við höfðum eina ferðina enn verið svikin af íslenskum stjórnvöldum. Katrín Jakobsdóttir hafði haft okkur að fíflum.

Ég er ekki elíta og mun aldrei tilheyra elítu íslensks samfélags. Ég hef alla mína ævi barist í bökkum. Sem barn bjó ég við sára fátækt, sem fullorðin manneskja hef ég barist við að ná endum saman alla mína ævi. Katrín Jakobsdóttur hefur í sinni valdatíð gert okkur sem erum í þessari stöðu lífið enn erfiðara með stjórnvaldsákvörðunum sem hafa skert kjör fátækra fjölskyldna,einstæðra foreldra, öryrkja og ellilífeyrisþega enn frekar. Hún hefur dæmt okkur til að standa betlandi í bifröð við dyr hjálparstofnana fyrir jól ,fyrir páska þegar börnin byrja í skóla eða þurfa að fermast osfr.

Auðvaldsstéttin í íslensku samfélagi er greinileg en Katrín Jakobsdóttir kemur fram eins og úlfur í sauðagæru. Hún sagðist vera Vinstri græn svo maður hélt að hún fylgdi þeirri stefnu. Það hefur hún aldrei gert. Aldrei.Í þokkabót gagnrýnir hún harðlega morð á börnum í Palestínu en var sjálf tilbúin til að samþykkja þungunarrof fullburða barna í móðurkviði.Saklausra barna sem engan málsvara eiga.

Rósa Ólöf Ólafíudóttir

Hvalurinn eltir Katrínu

Mynd: Alþingi

Ríkisstjórnin er í klandri vegna þess sleifarlags sem hefur átt sér stað við að taka afstöðu til hvalveiða. Stjórnsýslan í málinu þykir vera til háborinnar skammar, hvað sem fólki kann að finnast um sjálfar veiðarnar. Hvalur hf. sótti um leyfi til veiðanna um áramót. Fimm mánuðum síðar hafa engin svör borist og fyrirtækið og 200 starfsmenn þess eru í algjörri óvissu.

Það flýgur fyrir að VG vilji tefja málið fram yfir forsetakosningar til að skaða ekki framboð Katrínar Jakobsdóttur sem ber hvað stærsta ábyrgð á þvík hvernig komið er. Katrín var matvælaráðherra í veikindaleyfi Svandísar Svavarsdóttur þegar umsóknin barst og var stungið ofan í skúffu. Þá studdi hún Svandísi í að banna hvalveiðar á síðasta ári. Bannið er að mati Umboðsmanns Alþingis afleit stjórnsýsla og alvarlegt brot gagnvart Hvali.

Bjarkey Gunnarsdóttir Olsen, núverandi matvælaráðherra hefur setið á málinu síðan hún tók við ráðherraembætti. Hún hefur þvertekið fyrir að vera að hjálpa Katrínu með því að láta umsóknina liggja fram yfir kosningar. Kristján Loftsson, framkvæmdastjóri Hvals, er þó ekki í neinum vafa og fordæmir stjórnsýslu Katrínar. Hvalurinn eltir hana svo sannarlega í kapphhlaupinu um Bessastaði …

 

Berfættur maður í Árbæjarhverfi – Blindfullur dólgur ógnaði fólki í miðborginni

Lögreglan, löggan
Mynd/Lára Garðarsdóttir

Laust eftir miðnætti barst lögreglu tilkynning um dólg sem hafði uppi ógnandi tilburði í miðborg Reykjavíkur. Hann hafði verið að hóta öðrum ofbeldi og var mjög ölvaður. Ofbeldisseggurinn var handtekinn og hann læstur inni í fangaklefa.

Um miðja nótt bars svo tilkynning um tvo menn með barefli á gangi á sömu slóðum. Mennirnir fundust skömmu síðar en voru þeir þá óvopnaðir. Ekki var talin þörf á frekari aðgerðum og héldu tvímenningarnir frjálsir inn í nóttina.

Ökumaður var stöðvaður í austurborginni, grunaður um akstur undir áhrifum áfengis. Hann var látinn laus eftir að honum hafði verið dregið blóð.

Lögreglan komst á snoðir um húsbrot í Múlahverfinu í gær. Tveir aðilar höfðu brotið sér leið inn autt húsnæði og fundust í værum svefni. Hústökumönnunum var vísað á brott.

Tveir ökumenn voru sektaðir fyrir óheimila notkun nagladekkja. Það er dýrt spaug þar sem sekt á hvert dekk er hininhá eða 20 þúsund krónur. Ef allur gangurinn er á nöglum ber ökumanni að greiða 80 þúsund krónur í ríkissjóð.

Tilkynnt um berfættan mann á gangi í Árbæjarhverfi. Lögregla hélt á vettvang en maðurinn fannst ekki.

Lögregla sinnti almennu og ölvunareftirliti þar sem um 50 ökutæki voru stöðvuð. Athugað var með ástand og réttindi ökumanna og reyndist allt vera til fyrirmyndar.

 

Stærðarinnar bruggstarfsemi stöðvuð af lögreglu – Ungur bóndi handtekinn með mikið magn af gambra

Jóladjamm fjöldi unglinga var eyðilagt í upphafi desembermánaðar árið 1990, þegar lögreglan kom upp um stærðarinnar bruggstarfssemi í Landeyjum.

Þann sjötta desember árið 1990 kom lögreglan upp um eina allra stærstu bruggverksmiðju sem fundist hafði á landinu í langan tíma. Ungur bóndi var þá handtekinn í Vestur Landeyjum en um 600 lítrar af gambra fannst í mjólkurhúsi hans og um 100 lítrar af hreinum landa. Ljóst var að brugginu var ætlað að selja til dreifingaraðila í Reykjavík sem ætluðu sér að selja unglingum það.

DV skrifaði um málið daginn eftir, þann 7. desember 1990 en hér má lesa fréttina:

Lögreglan kom upp um stórfellda bruggstarfsemi í gær:
Mikil bruggverksmiðja í mjólkurhúsi í Landeyjum

Lögreglan kom í gær upp um eina stærstu bruggverksmiðju sem fundist hefur á landinu í langan tíma. Ungur maður var handtekinn í V-Landeyjum en í mjólkurhúsi hans fundust um 600 lítrar af óeimuðu bruggi og um eitt hundrað litrar af hreínum landa. Maðurinn játaöi að hafa staðið að bruggstarfseminni og að hafa selt hundruð lítra af bruggi til dreifingaraðila á höfuðborgarsvæðinu að undanförnu. Lögreglan lagði meðal annars hald á vörubíl sem bruggarinn hafði keypt fyrir ágóðann af bruggstarfseminni. Þrír dreifingaraðilar á höfuðborgarsvæðinu tengjast þessari umfangsmiklu bruggstarfsemi.

Forsaga málsins er að lögreglan fékk sterkan grun á þriðjudag um að bruggsala væri stunduö í Reykjavík. Fljótlega bárust böndin að dreifingaraðila í Mosfellsbæ. Fór lögreglan á staðinn á miðvikudagskvöld og handtók ungan mann. Hjá honum fundust um eitt hundrað lítrar af landa í plastbrúsum – tilbúnum til sölu. Tveir menn úr Hafnarfirði voru einnig handteknir. Þremenningarnir hafa allir játað að hafa staðið að sölu og dreifingu á hundruðum lítra af landa á höfuðborgarsvæðinu. Yngsti maðurinn er tæplega tvítugur en sá elsti er um þrítugt.

Síðdegis í gær fór lögreglan í V-Landeyjar þegar grunur beindist að höfuðpaurnum sem býr þar í sveit. í mjólkurhúsi hans fundust á annan tug plasttunna, tvö eimingartæki, hundruð kílóa af sykri og fleira tengt bruggstarfsemi. Lögregla hellti niður um 600 lítrum af óeimuðu bruggi, svokölluðum gambra, og lagði hald á um 100 lítra af tilbúnum landa sem bruggarinn sagði vera um 45 prósent að styrkleika. Fyrir utan nokkrar kýr og hænsni virtist maðurinn eingöngu hafa stundað bruggstarfsemi í stórum stíl. Hann hafði meðal annars komið upp gríðarstórum en haganlega smíðuðum skáp með stóru loki yfir fyrir allt bruggið.

Lögreglan hefur því lagt hald á um tvö hundruð lítra af óeimuðum landa á síðustu dögum en játningar liggja fyrir um sölu á hundruðum lítra til viðbótar. Ljóst er að dreifingaraðilarnir hafa stundað að bjóða unglingum áfengi til sölu. Bruggarinn í V-Landeyjum seldi dreifingaraðilunum lítrann á 750-1000 krónur, allt eftir því hve mikið magn var keypt í einu, en sölumennirnir seldu viðskiptavinum sínum landann á 1.500 krónur lítrann. Mál þetta er talið full upplýst. Það var unnið í sameiningu af rannsóknardeild lögreglunnar í Reykjavík ásamt lögreglu í Hafnarfirði og á Hvolsvelli. 

Dómur kveðinn upp í máli Kolbeins á mánudaginn – Ákærður fyrir gróft kynferðisbrot gegn stúlkubarni

Kolbeinn Sigþórsson var sýknaður

Á mánudaginn mun héraðsdómur Reykjaness kveða upp dóm í máli Kolbeins Sigþórssonar, fyrrverandi landsliðsmanns í knattspyrnu. Er hann ákærður fyrir gróft kynferðisbrot gegn barnungri stúlku.

Sjá einnig: Mannlíf birtir ákæruna á hendur Kolbeini – Á yfir höfði sér eins til 16 ára fangelsisdóm

RÚV segir frá málinu.

Það var í lok janúar sem málið gegn Kolbeini var þingfest en aðalmeðferð þess tók einn dag. Fór hún fram um miðjan maímánuð en Kolbeinn tjáði sig um sakarefnið í gegnum fjarfundabúnað. Samkvæmt RÚV er ástæðan fyrir því að Kolbeinn hafi ekki mætt sjálfur í réttinn sú, að fjölmiðlar hafi komist á snoðir um ákæruna og þá hvenær aðalmeðferðin færi fram.

Í aðalmeðferðinni neitaði Kolbeinn sök.

Er fyrrverandi knattspyrnustjörnunni gefið að sök að hafa brotið gróflega á stúlkunni í júní 2022 en saksóknari sagði í ákærunni að hann hafi nýtt yfirburði sína yfir henni. Lágmarksrefsins fyrir samskonar brot er eins ár fangelsi en hámarksrefsins 16 ár. Móðir stúlkunnar krefst þess, fyrir hönd dóttur sinnar, að Kolbeinn greiði henni þrjár milljónir króna í miskabætur.

RÚV hefur heimildir fyrir því frá héraðsdómi um að dómurinn hafi verið fjölskypaður en slíkt er undantekning í samskonar málum. Var dómurinn skipaður tveimur embættisdómurum og sálfræðingi.

Rífur Bjarna og Ríkisútvarpið í sig: „Fyrr má nú vera meðvirknin með þjóðarmorði“

Bjarni Benediktsson Mynd: RÚV-skjáskot

Tónskáldið Þórður Magnússon rífur bæði Bjarna Benediktsson og Ríkisútvarpið í sig vegna umfjöllunar miðilsins um hina hrottalegu árás Ísraelshers sem gerð var á tjaldbúðir í flóttamannabúðum Rafah á Gaza í gær, á svokölluðu „öruggu svæði“, þar sem hátt í 50 manns voru drepnir, mest megis konur og börn, sum þeirra misstu höfuðið í árásinni.

Þórður Magnússon tónskáld skrifaði færslu á Facebook eftir að hann sá Bjarna Benediktsson forsætisráðherra verja árás Ísraelshers í fréttum RÚV.

„Þarna er um að ræða svona ákveðna stigmögnun átaka sem að byrjar með nýrri eldflaugaárás frá Rafah á Ísrael og því miður þá var ekki við öðru að búast en því yrði svarað”

Sagði Bjarni Ben í kvöldfréttum RÚV í gær.“ Færsla Þórðar byrjar á þessum orðum en svo heldur hún áfram:

„Hóprefsingar eru í alþjóðalögum skilgreindar sem alvarlegur stríðsglæpur, en Bjarna talar þarna um þetta sem sjálfsögð og eðlileg viðbrögð. Væri þá ekki hægt að segja það sama um árás Hamas, 7. október? Voru það ekki hin eðlilegustu viðbrögð við áralangri kúgun og morðum?“

Því næst gagnrýnir tónskáldið fréttamann RÚV harðlega fyrir að láta forsætisráðherrann komast upp með „þessa viðurstyggilegu mannfjandsamlegu greiningu“.

„Fréttamaður gerir enga athugasemd við þessa viðurstyggilegu mannfjandsamlegu greiningu Bjarna og gerir enga tilraun til að gaumgæfa þessi ummæli eitthvað frekar með sjálfstæðri gagnaöflun og eða gagnspurningum frekar en fyrri daginn. Greining Bjarna Ben á atburðarrásinni er lokaniðurstaða fréttarinnar. Fréttamaður RÚV er þarna eingöngu í hlutverki PR fulltrúa viðmælanda eins og svo oft áður.“

Og Þórður er ekki búinn að rífa RÚV í sig:

„Þess fyrir utan gerir RÚV síðan krókódílatár Ísraela yfir þessu svokallaða “slysi” að aðalfrétt og segir svo að líklegast hafi þetta ekki einu sinni verið þeim að kenna. Svona málar RÚV þetta á sama tíma og aðalfréttin í vönduðum fréttamiðlum er sú, að sterkar vísbendingar séu um að þarna hafi bandarísk vopn kveikt eldana.“

Að lokum kemur Þórður með annað dæmi um svipað:

„Einstaka sinnum má heyra vandaðan fréttaflutning á RÚV en oft er þetta svo illa unnið að um hreina upplýsingaóreiðu er að ræða. Stundum, eins og nú er tilfellið, hafa fréttir alveg gengið fram af mér. Önnur minnisstæð frétt var þegar RÚV birti athugasemdalaust og gerði að aðalfrétt, áróðursmyndband frá IDF sem sýndi “höfuðstöðvar Hamas” á bak við MRI skanna og dagatalið alræmda. Myndband sem var svo farsakennt að það var aðhlátursefni í öllum vönduðum fjölmiðlum.
Fyrr má nú vera meðvirknin með þjóðarmorði.“

Jón Gnarr auglýsir gefins nærbuxur: „Þær eru of stórar, eru L en ég nota M“

Nærbuxurnar fínu. Ljósmynd: Facebook

Jón Gnarr auglýsir ónotaðar nærbuxur á sölusíðu á Facebook.

Fáir eru jafn góðir í að koma sér á framfæri og Jón Gnarr. Sonur forsetaframbjóðandans keypti handa föður sínum nærbuxur í Ameríku en reyndust þær því miður of stórar. Brá þá Jón á það ráð að auglýsa nærbuxurnar á Brask og brall, sem er sölusíða á Facebook en brækurnar fást gefnar en hægt er að nálgast þær á kosningaskrifstofu Jóns í Aðalstræti 11.

Hér má lesa færslu Jóns:

„Sonur minn gaf mér nærbuxur sem hann keypti í Ameríku en þær eru of stórar, eru L en ég nota M. Mig langar því að gefa þær einhverjum sem getur notað þær. Þetta eru 6 stk ónotaðar nærbuxur. Áhugasamir geta sótt þær á kosningaskrifstofu mína á milli 3 og 6 í dag.“

Nærbuxurnar sex.
Ljósmynd: Facebook

Bragi Páll birtir þýðingu á ljóði skálds frá Palestínu: „Við verðskuldum betri dauða“

Mosab Abu Toha

Bragi Páll Sigurðarson rithöfundur þýddi ljóð eftir palestínska ljóðskáldið Mosab Abu Toha og birti á Facebook.

Rithöfundurinn Bragi Páll Sigurðarson gerði sér lítið fyrir og þýddi nýtt ljóð eftir ljóðskáldið Mosab Abu Toha, frá Palestínu, sem gengið hefur í gegnum algjört helvíti, eins og aðrir Gazabúar, frá því í október, þó svo að hræðileg meðferð á Palestínubúum hafi staðið yfir í áratugi. Bragi Páll segir frá raunum Mosab í nýrr Facebook-færslu og birtir þýðingu sína á nýlegu ljóði eftir skáldið. Með ljóðinu birti hann teiknaða mynd af karlmanni halda á höfuðlausu barni en myndin er teiknuð eftir hryllingsmyndskeiði sem birtist frá Rafah í gær, eftir enn eina hrottafengna árás Ísraelshers, sem skildi hátt í 50 manns eftir í valnum, flestir þeirra konur og börn. Á teiknuðu myndinni vex þó blóm úr hálsi barnsins.

Hér má lesa færsluna í heild sinni og ljóðið:

„Í október í fyrra, skömmu eftir að þjóðarmorðið í Palestínu hófst, flúði ljóðskáldið Mosab Abu Toha heimili sitt með fjölskyldu sinni, konu og börnum. Þau settust að í Jabaliya flóttamannabúðunum. Nokkrum dögum síðar var Mosab handtekinn ásamt nokkur hundruð öðrum saklausum borgurum, barinn, sveltur og niðurlægður dögum saman. Þegar honum var sleppt var svo búið að sprengja húsið hans. Nokkrum vikum seinna myrtu Zíonistar góðvin hans Refaat Alareer. Hann lét hafa eftir sér nýlega „Á Gaza er dauðinn öruggari en lífið.“

Hann hefur skrifað pistla og ljóð undanfarin ár, en ég henti í þýðingu á einu af hans nýjustu ljóðum „We deserve a better death“ sem mér finnst ramma ágætlega inn viðbjóðinn, firringuna og sinnuleysi alþjóða samfélagsins en jafnframt ótrúlega þrautseigju Palestínsku þjóðarinnar.
***
Við verðskuldum betri dauða
Við verðskuldum betri dauða.
Líkamar okkar eru afmyndaðir og undnir,
útsaumaðir með kúlum og sprengjubrotum.
Nöfnin okkar borin vitlaust fram
í útvarpi og sjónvarpi.
Myndirnar sem þekja veggi bygginganna okkar,
dofna og fölna.
Áletranirnar á legsteinunum okkar hverfa,
þaktar í skít fugla og skriðdýra.
Enginn vökvar tréin sem varpa skugga
á grafir okkar.
Logandi sólin hefur yfirbugað
rotnandi líkama okkar.

-Mosab Abu Toha“

Eldgos hafið og kvikugangur stefnir á Grindavíkurbæ: „Þetta opnaðist með krafti“

Eldgosi[. Mynd: RÚV-skjáskot

Eldgos er hafið við Sundhnjúksgíga. Kvikugangurinn færist nær Grindavíkurbæ.

Eldgos hófst fyrir stuttu við Sunhnjúksgíga en gossprungan er um kílómeter á lengd en gosstrókarnir ná mest um 50 metra upp í loftið, samkvæmt Kristínu Jónsdóttur, jarðeðlilsfræðingi á Veðurstofunni sem var í viðtali við Rás 2 fyrir stuttu.

„Þetta opnaðist með krafti,“ sagði Kristín við Ragnhildi Thorlacius á Rás 2. Bætti hún við að gosið sé á svipuðum stað og síðast, á Sundhnjúksgígaröðinni. „Gosstrókarnir ná að minnsta kosti 50 metra hæð og lengdin á sprungunni er rúmlega 1 kílómetri, 1,5 eitthvað slíkt.“

Almannavarnir tilkynntu rétt í þessu að kvikugangurinn sé að færast nær Grindavíkurbæ en að búið sé að rýma bæinn. Viðbragðaðilar og aðrir sem eru í bænum eru beðnir um að vera tilbúnir að yfirgefa bæinn í miklu flýti.

Grindavík rýmd vegna mögulegs kvikuhlaups: „Órói fór að rísa líka“

Grindavík fyrir eldgosi og jarðskjálfta

Búið er að fyrirskipa rýmingu bæði í Grindavík og í Bláa lóninu vegna mögulegs kvikuhlaups við Sundhnjúksgíga.

Almannvarnir ríkislögreglustjóra fyrirskipuðu rýmingu í Grindavík og á nærliggjandi svæðum, þar á meðal Bláa lóninu fyrir um klukkustund. Í frétt RÚV um málið segir upplýsingafulltrúi Almannavarna, Hjördís Guðmundsdóttir, að næstu skref séu að fylgjast með hver atburðarásin verður. Samhæfingarstöð Almannavarna í Skógarhlíð hefur verið virkjuð.

Samkvæmt náttúruvársérfræðingi á Veðurstofunni, Lovísu Mjöll Guðmundsdóttur, hefur skjálftavirkni aukist upp úr klukkan hálf 11 í morgun, aðallega austur af Sýlingarfelli.

„Órói fór að rísa líka og það bendir til þess að það sé kvikuhlaup í gangi,“ segir hún í samtali við RÚV. Þó hefur gerst nokkrum sinnum að orðið hafi lítið kvikuhlaup án goss. „Það er spurning hvort það sé nægur þrýstingur fyrir kvikuna til að troða sér í gegn eða ekki.“

Samkvæmt RÚV eru skjálftarnir enn á þriggja til fimm kílómetra dýpi. „Kvikan er að reyna að troða sér, það er aðeins farið að hægja á skjálftavirkninnni en þetta getur breyst mjög hratt.“

Búið er að rýma Bláa lónið en um 700 til 800 gestir voru í lóninu þegar rýming hófst. Rauði krossinn biður Grindvíkinga að hafa samband í síma 1717 svo það sé hægt að skrá fólk. Þá er hægt að koma við á aðalskrifstofu Rauða krossins í Efstaleiti 9 og skrá sig í móttökunni, henti það fólki betur.

Skorar á Arnar og Jón að draga framboð sín til baka: „Svo gerið þjóðinni gagn. Hættið“

Arnar Þór Jónsson er formaður Lýðræðisflokksins

Glúmur Baldvinsson skorar á Arnar Þór Jónsson og Jón Gnarr að draga framboð sitt til forseta til baka.

Alþjóðastjórnmálafræðingurinn Glúmur Baldvinsson segist vera með samviskubit gagnvart frænda sínum, forsetaframbjóðandanum Arnari Þór Jónssyni.

„Ég er með smá samviskubit. Ég hef verið fremur andstyggilegur við frænda minn Arnar Þór. Hann á það ekki skilið enda afar frambærilegur og rökfastur maður. Hann kemur vel fyrir. Bara með skoðanir sem samrýmast ekki mínum.“ Þannig hefst Facebook-færsla Glúms en í næstu orðum útskýrir hann að gagnrýni hans hafi ekki beinst að Arnari sjálfum, heldur stuðningsmönnum hans.

„En þegar ég hugsa upphátt hefur gagnrýni mín ekki beinst að honum helst heldur öllu skítkastinu og bullinu sem kemur frá hans hörðustu stuðningsmönnum sem drulla yfir mig og allt og alla með orðum einsog skíthæll, drullusokkur, viðbjóður og öðru eins. Ég er maður til að taka skítkasti enda ólst ég upp við það. Ergo sum, ég met frænda minn mikils en ekki kjaftfora vitgranna stuðningsmenn hans. Arnar er einn frambærilegasti frambjóðandinn enda af Schram ætt. En með kolvitlausar skoðanir og ranghugmyndir um eðli embætti Forseta lýðveldisins.“

Að lokum skorar Glúmur á þá Arnar Þór og Jón Gnarr að draga framboð sín til baka, svo atkvæðin sem hefðu farið til þeirra, fari frekar á einhvern sem á meiri von gegn Katrínu Jakobsdóttur.

„Og í ljósi lítils fylgis hans skora ég á hann að draga framboð sitt tilbaka. Hann á framtíð í pólitík og þar skulum við tala saman. Að sama skapi skora ég á hinn mæta mann Jón Gnarr að draga sig í hlé. Af hverju? Af því þeir eiga úr þessu engan sjens og vita það báðir. Og stuðningsmenn beggja munu aldrei kjósa Katrínu Jakobsdóttur. Þar liggur hundurinn grafinn. Svo gerið þjóðinni gagn. Hættið.“

Glænýtt Sjóarablað Mannlífs komið út – Ókeypis fyrir alla landsmenn

Mannlíf hefur nú gefið út glænýtt blað: Sjóarinn en í því má finna fjölda viðtala, Sjómannadagskveðjur, greinar og pistla og það sem betra er, það er algjörlega ókeypis!

Blaðið er nú í dreifingu en hægt er að finna það í Bónusverslunum víðsvegar um landið. Á föstudaginn verður svo hægt að sjá blaðið í vefútgáfu hér á síðu okkar.

Sólveig fagnaði 100 ára afmæli sínu: „Hann er svo ungur, ekki nema 93 ára“

Bæjarstjórinn og afmælisbarnið. Ljósmynd: Akureyri.is

Sólveig Elvina Sigurðardóttir fagnaði 100 ára afmæli sínu á sunnudaginn, á Akureyri en þar hefur hún búið frá 18 ára aldri. Af tilefni af þessu merku tímamótum heimsótti bæjarstjóri Akureyrar, Ásthildur Sturludóttir, afmælisbarnið og færði henni fagrann blómvönd frá bæjarstjórn Akureyrar, líkt og hefð er fyrir þegar bæjarbúi nær 100 ára aldrinum.

Á vef Akureyrarbæjar segir eftirfarandi:

Sólveig fæddist 26. maí 1924 í Ólafsfirði og ól þar manninn til 18 ára aldurs þegar hún flutti til Akureyrar. Þar giftist hún Ottó Aríusi Snæbjörnssyni (1920-2012) og saman eignuðust þau soninn Magnús Aríus sem lést árið 2011 en lét eftir sig þrjú mannvænleg börn sem eiga orðið marga afkomendur.

Sólveig vann 32 ár í Sambandsverksmiðjunum á Gleráreyrum, fyrst í fataverksmiðjunni Heklu en síðan í skógerðinni Iðunni. Í spjalli við Ásthildi Sturludóttur bæjarstjóra lýsti hún því hvílíkt reiðarslag það var þegar verksmiðjunum var lokað og um 800 manns misstu vinnuna.

Sólveig er lífsglöð og mjög ern. Hún segist taka því sem að höndum ber með jafnaðargeði, eldar sjálf sinn mat og nýtur þess að búa á 4. hæð á fallegum stað með útsýni út Eyjafjörðinn.

Afmælisveislan var haldin með pompi og prakt á sunnudaginn og þá kom meðal annars einn af nágrönnum Sólveigar færandi hendi með afmælisgjöf frá öðrum íbúum fjölbýlishússins. „En hann er nú svo ungur,“ segir Sólveig. „Held að hann sé ekki nema 93ja ára.“

Bubbi birtir skjáskot af ógeðslegum skilaboðum – Sendandinn kann ekki að skammast sín

Bubbi Morthens Ljósmynd: Instagram-skjáskot

Tónlistarmaðurinn Bubbi Morthens birti í gærkvöldi dæmi um þær viðurstyggilegu skilaboð sem honum hefur borist frá því að hann lýsti opinberlega yfir stuðningi sínum við Katrínu Jakobsdóttur sem nú býður sig fram til embættis forseta.

Sagt var frá frásögn Bubba í fjölmiðlum í gær, af hótunum og viðbjóðslegum skilaboðum sem fólk hefur verið að senda á hann á samfélagsmiðlunum en fólkið virðist afar ósátt við stuðning hans við Katrínu Jakobsdóttur forsetaframbjóðanda. „Hvað fær fólk til að senda ljót skilaboð, krefja mann um skýringar, hóta manni, ógna manni? Fara inn á heimasíðu manns með dólg, viðhafa orðbragð sem viðkomandi myndi aldrei nota heima hjá sér? Dæmi: Hvað fékkstu borgað fyrir að sleikja hóruna? Ertu að borga fyrir listamannalaunin? Söngstu ekki um hommana, viðbjóðurinn þinn? Ertu að móti þeim núna? Og margt fleira sem er ekki hafandi eftir. Þetta er stöðugt áreiti frá því að ég lýsti yfir stuðningi við framboð Katrínar.“ Þetta er meðal þess sem Bubbi skrifaði í Facebook-færslu þar sem hann segir frá áreitinu.

Í gærkvöldi bætti hann svo um betur og birti dæmi um slík skilaboð en í þeim stendur einfaldlega: „Hengdu þig bubbi“.


Fjölmargir tjá sig um skjáskot Bubba og eru á einu máli um að þetta sé rangt og að sendandinn þurfi hjálp. Sendandinn, Eiríkur Björnsson er einn af þeim sem skrifar athugasemd en virðist ekki kunna að skammast sín en hann skrifaði: „Bubbi er Bjáni.“

Bubbi kjökrar

Katrín Jakobsdóttir.

Tónlistamaðurinn magnaði, Bubbi Morthens, lætur sér fátt mannlegt óviðkomandi. Bubbi tók sér stöðu við hlið Hannesar Hólmsteins Gissurarsonar, prófessors á eftirlaunum, og Kristjáns Þórs Júlíussonar, fyrrverandi sjávarútvegsráðherra, og lýsti stuðningi við Katrínu Jakobsdóttur sem forseta Íslands.

Bubbi steig skrefinu lengra en Sjálfstæðismennirnir og ljáir auglýsingum Katrínar rödd sína þar sem hann mærir forsætisráðherrann fyrrverandi. Bubbi varð svo fyrir nokkru áfalli þegar nettröll veittust að honum fyrir að styðja Katrínu. Hann barmar sér undan árásunum á Facebook og tiltekur nokkur dæmi.

„Hvað fær fólk til að senda ljót skila­boð, krefja mann um skýr­ing­ar, hóta manni, ógna manni? Fara inn á heimasíðu manns með dólg, viðhafa orðbragð sem viðkom­andi myndi aldrei nota heima hjá sér? Dæmi: Hvað fékkstu borgað fyr­ir að sleikja hór­una? Ertu að borga fyr­ir lista­manna­laun­in? Söngstu ekki um homm­ana, viðbjóður­inn þinn?“ Ertu á móti þeim núna? Og margt fleira sem er ekki haf­andi eft­ir. Þetta er stöðugt áreiti frá því að ég lýsti yfir stuðningi við fram­boð Katrín­ar,“ skrif­ar Bubbi í færslu á Face­book.

Bubbi er sjálfur þekktur fyrir vægan dólgshátt og að kalla ekki allt ömmu sína í deilum á Netinu. Hann segist þó aldrei myndu hegða sér með þessum hætti.

„Aldrei dytti mér í hug að fara inná síður hjá öðrum með dólg líkt og fólk ger­ir hjá mér. Ég skulda eng­um neitt, hvað þá skýr­ing­ar. Það kveður svo rammt að þessu að fólk veigr­ar sér við því að lýsa yfir stuðningi við fram­boð Katrín­ar op­in­ber­lega því það er ráðist á það um leið,“ skrifar Bubbi með grátstafinn í lyklaborðinu …

Setuverkfall hafið í utanríkisráðuneytinu: „Tími aðgerðaleysis er löngu liðinn!“

Setuverkfall

Setuverkfall stendur yfir í utanríkisráðuneytinu þar sem mótmælendur hafa komið sér fyrir í anddyri ráðuneytisins til að mótmæla aðgerðarleysi íslenskra stjórnvalda hvað varðar þjóðarmorðið á Gaza

Hér má sjá yfirlýsingu mótmælenda:

Nú þegar 234 dagar eru liðnir af stigmögnuðu þjóðarmorði gegn Palestínufólki sjást engin ummerki um aðgerðir íslenskra yfirvalda. Veikburða færslur á samfélagsmiðlum og fálmkennd fréttaviðtöl þar sem ráðamenn tönnlast á tveggja ríkja lausn, þar sem ábyrgð varpað á hin kúguðu í stað kúgaranna, eru ófullnægjandi viðbrögð við þjóðarmorði. Íslensk yfirvöld verða að grípa til raunverulegra aðgerða gegn ólöglegum árásum Ísraels á Palestínu. Með aðgerðaleysi sínu gera yfirvöld almenning samsekan í þjóðarmorði. Meirihluti almennings er á móti þjóðarmorðinu á Gaza og vilja að stjórnvöld beiti sér fyrir tafarlausu vopnahléi. Siðferðislegur brestur yfirvalda er algjör.

Þann 13. október sagði Þórdís Kolbrún R. Gylfadóttir, utanríkisráðherra Íslands, á miðlinum X: „Alþjóðalög kveða á um réttindi og skyldur. Bæði eru heilög.“ Hvað ber íslenskum yfirvöldum að gera þegar þessi heilögu réttindi og skyldur eru virt að vettugi?

Ísland á aðild að Alþjóðadómstólnum og Alþjóða sakamáladómstólnum, sem báðir hafa úrskurðað um að Ísrael beri að stöðva allar árásir í Palestínu, bæði á Gaza og á Vesturbakkanum, og hleypa tafarlaust inn mannúðaraðstoð í gegnum landamærin hjá Rafah. Þá hefur Alþjóðlegi sakamáladómstóllinn (ICC) gefið út handtökutilskipanir á hendur Benjamin Netanyahu, forsetisráðherra Ísraels og Yoav Gallant, varnarmálaráðherra Ísraels. En hvað gerir Ísrael eftir slík fyrirmæli?

Ísrael hefur ekki einungis hundsað tilskipanir dómstólanna heldur stóraukið á árásir í kjölfar þeirra, nú síðast með hryllilegri loftárás á tjaldbúðir flóttafólks í Rafah þann 26. maí. Árásin var gerð á svæði sem Ísrael lofaði að ætti að vera öruggt og voru þar fjöldi saklausra borgara, barna!, sem brennd voru lifandi. Enn er ekkert lát á árásum Ísraels á Rafah í sjónmáli. Í kjölfarið sagði utanríkisráðherra að íslensk yfirv öld kalli eftir því að skipanir Alþjóðadómstólsins séu virtar og að komið sé á tafarlausu vopnahléi. Í kvöldfréttum sama dag nefnir hún ekki eina einustu aðgerð sem íslensk stjórnvöld ætla að ráðast í til að þrýsta á um að svo verði, heldur ýjar eingöngu að því að ákveði Evrópusambandið að grípa til aðgerða gæti verið að Ísland styðji þær.

Ísland tók frumkvæði árið 2011 með því að verða fyrst vestur-evrópskra þjóða til að viðurkenna Palestínu sem sjálfstæða þjóð. Íslandi ber skylda til þess að framfylgja viðurkenningu okkar á Palestínu sem fullvalda ríki, annað er sýndarmennska og hræsni. Nýlega viðurkenndu Noregur, Írland og Spánn sjálfstæði Palestínu. Það er ekkert því til fyrirstöðu, annað en pólitískur vilji íslensku ríkisstjórnarinnar, að við höfum nú frumkvæði að samstarfi við þessar þjóðir og tökum til aðgerða til að knýja á um tafarlaust, varanlegt vopnahlé á Gaza, endalok hernáms Ísraels í Palestínu og að réttur palestínsks flóttafólks til að snúa aftur til heimkynna sinna og eigna sé tryggður, eins og samþykkt Sameinuðu þjóðanna nr. 194 gerir ráð fyrir.

Þar sem íslensk yfirvöld virðast ófær um að kortleggja sjálf slíkar aðgerðir, eru hér dæmi. Við krefjumst þess að:

  1. Settar verði viðskiptaþvinganir á Ísraelsríki.
  2. Ísland slíti stjórnmálasambandi við Ísraelsríki.
  3. Að Ísland styðja málsókn Suður-Afríku á hendur Ísraelsríkis við Alþjóðadómstólinn.
  4. Að utanríkisráðherra hafi frumkvæði að samtali við Norðurlöndin, Írland og Spán um að samhæfa aðgerðir.

Til að sýna fordæmi um stuðning við palestínsku þjóðina í verki skipuleggjum við setumótmæli í Utanríkisráðuneytinu. Lífið getur ekki gengið sinn vanagang á meðan þjóðarmorð á sér stað, þegar tugir þúsunda hafa verið myrt og særð með kerfisbundnum hætti. Tími aðgerðaleysis er löngu liðinn! Því munum við trufla eðlilegan gang yfirvalda þar til þau bregðast við í samræmi við siðferðislegar skyldur og lagalegar skuldbindingar gagnvart palestínsku þjóðinni. Þessi aðgerð er einn liður að því markmiði.

Lifi frjáls Palestína!

Hér má svo sjá myndskeið frá mótmælunum: Video (2)

 

Leikskóli í slæmum málum eftir að barn komst í kókaínpoka starfsmanns

Kókaín fannst í þvagi barns

Leikskólinn KinderCare í Oak Creek í Wisconsin í Bandaríkjunum er í vondum málum eftir að kókaín fannst í þvagi eins árs gamals drengs sem sækir leikskólann.

Fyrr í mánuðinum hringdi starfsmaður leikskólans í Kimberly Hopson, móður drengsins, og tilkynnti að hann væri orðinn mjög veikur og hún þyrfti að koma sækja son sinn. Þegar Hopson mætti var strákurinn þakinn marblettum og sárum. Í framhaldi af því fór hún með son sinn á sjúkrahús þar sem ýmsar rannsóknir voru framkvæmdar og fannst kókaíni í þvagi drengsins. Þá var haft samband við lögreglu bæjarsins og við leit á leikskólanum fann lögreglan poka af kókaíni sem starfsmaður hafði komið með og er talið að sonur Hopson hafi komst í pokann.

Leikskólinn hefur beðist afsökunar á atvikinu og sagst ætla að borga fyrir allan lækniskostnað en Hopson hefur gefið það út að hún muni fara í mál við leikskólann. Leikskólinn hefur ekki tjáð sig við fjölmiðla um málið.

Vinkona Johnny Wactor lýsir síðustu augnablikum hans: „Af okkur stafaði engin ógn“

Blessuð sé minning hans

Sagt var frá því á dögunum að General Hospital leikarinn Johnny Wactor hafi verið skotinn til bana í Los Angeles, eftir að hafa beðið menn sem voru að reyna að stela hvarfakúti úr bíl hans, að fara í burtu frá bílnum. Vinkona hans og samstarfskona lýsir nú síðustu augnablikum hans en hún var með honum þegar hinn hryllilegi atburður átti sér stað.

Anita Joy

Vinirnir unnu saman sem barþjónar og voru að koma af vakt þegar þau sáu nokkra karlmenn vesenast við bíl Johnny.

„Vinur minn til átta ára fór úr því að hlæja með mér, vinna hlið við hlið við mig, yfirgefa barþjónavaktina okkar með mér og ganga að bílunum okkar með mér,“ skrifaði vinkonan, Anita Joy á Instagram 29. maí, „yfir í það að deyja í fanginu á mér á götum miðborgar Los Angeles, klukkan 3 að morgni.“

Joy sagði atvikið hafa gerst „á einu augnabliki“ þegar hún og Wactor nálguðust menn sem voru að fikta í bíl hans.

„Við nálguðumst mennina varlega, spurðum hvað þeir væru að gera, í fyrstu héldum við að verið væri að draga bílinn,“ skrifaði hún. „Af okkur stafaði engin ógn og Johnny hélt ró sinni eins og hann gerði alltaf, sagði einfaldlega að þetta væri bíllinn hans og að þeir þyrftu að fara í burtu. Hendur opnar friðsamlega til hliðar.“

Hún tók fram að Wactor hafi staðið á milli hennar og mannsins sem skaut hann, sem verndaði hana fyrir ofbeldi.

„Þegar ég heyrði skotið óma inn í nóttina, féll hann kröftuglega aftur á bak í fangið á mér,“ rifjaði hún upp. „Þegar ég greip í hann, hrópaði ég „Elskan, er allt í lagi?“ Og hann svaraði bara: „Nei! Skotinn!“ Við veltumst út á götu þar sem ég ýtti fótunum undir hann og reyndi að halda líkama hans uppi á meðan ég öskraði á hjálp og öskraði á hann að vera áfram með mér.“

Einn öryggisvarðanna á vinnustaðnum þeirra hljóp til þeirra eftir að hafa hringt í neyðarlínuna. Vinnufélagarnir tveir reyndu að bjarga Wactor með því að framkvæma endurlífgun á meðan þeir biðu eftir að lögreglan kæmi.

„Við bundum gallaakkann minn utan um hann til að stöðva blæðingarnar,“ hélt hún áfram. „Þetta var of nálægt færi, of mikið sár til að hann gæti lifað það af en Guð minn góður, hann barðist fyrir að halda lífi. Ég er gjörsamlega miður mín og svo ótrúlega reið. Það eina sem veitir mér frið er að ég var með honum og hann lenti ekki einn í þessu. Það eina sem mun veita mér ró mun vera að sjá þessa hræðilegu menn dregna fyrir rétt.“

Joy hélt áfram að heiðra manneskjuna sem Wactor var, og hrósaði hversu „gegnheill“ Siberia-leikarinn var og hæfileika hans „til að láta hverjum og einum líða svo sérstökum í augum hans“.

Og hún hélt áfram:

„Orkan hans var segulmögnuð og dró þig svo áreynslulaust inn – þú varst öruggur hjá honum,“ sagði hún. „Hann kom fram við alla af ást, virðingu, samúð og hann „sá“ þig í raun. Hann var fallegur, aulalegur fyrir allan peninginn, fullur af vinnusiðferði og gildum.“

Joy rifjar upp hvernig hann kallaði hana ástúðlega „Aníta Bonita,“. „Ég vona að endurhljómun raddar hans, að segja þetta í hvert skipti sem ég sá hann, fari aldrei úr minni mínu. Johnny lét mann falla algjörlega fyrir sér um leið og maður leit í stóru, bláu augu hans, og fyrir neðan þau aulalegt glott. Algjörlega einn besti maður sem ég hef kynnst.“

Johnny Wacktor var aðeins 37 ára er hann lést.

Hógvær Freyr hrósar þjálfara Vals: „Óskar er kóngurinn“

Freyr Alexandersson segir þjálfara Vals vera kónginn

Mikil umræða hefur skapast undanfarnar vikur í fjölmiðlum og á samfélagsmiðlum um góðan árangur íslenskra íþróttaþjálfara á árinu og hefur árangur Freys Alexanderssonar, þjálfara knattspyrnuliðsins K.V. Kortrijk í belgísku úrvalsdeildinni, ekki farið framhjá neinum íþróttaaðdáanda en hann tók við liðinu í janúar þegar liðið var í neðsta sæti deildarinnar og hafði ekki unnið leik í þrjá mánuði en undir stjórn hans tókst honum að bjarga liðinu frá falli.

Hafa einhverjir sófasérfræðingar sagt að Freyr muni án nokkurs vafa vera kosinn þjálfari ársins en sjálfur telur Freyr að Óskar Bjarni Óskarsson, þjálfari karlaliðs Vals í handbolta, standi honum framar þetta árið en Óskar gerði Val að Evrópubikarmeistarum og er það fyrsta sinn sem íslenskt lið vinnur Evrópukeppni í handbolta.

Í færslu á Twitter segir Freyr einfaldlega: „Óskar er kóngurinn. Ég og Finnur mætum bara í partyið“

May be an image of 3 people and text
Óskar Bjarni í faðmlögum

Boða mótmæli við ríkisstjórnarfund í fyrramálið: „Þjóðarmorðið stöðvast ekki án aðgerða!“

Frá samstöðufundi með Palestínu fyrr á árinu. Ljósmynd: Björgvin Gunnarsson

Samtökin Ísland-Palestína boða til mótmæla í fyrramálið.

Í fyrramálið eru fyrirhuguð mótmæli í Skuggasundi 3, þar sem fram fer ríkisstjórnarfundur. Mótmælin hefjast klukkan 8:30 en þar verður þess krafist að ríkisstjórnin setji viðskiptaþinganir á Ísrael vegna þjóðarmorðsins á Gaza.

Í tilkynningu frá samtökunum segir:

„Krefjumst þess að íslenska ríkið taki það hugrakka skref að setja viðskiptaþvinganir á Ísrael og slíti stjórnmálasambandi við þjóð sem fremur þjóðarmorð! Orð duga ekki lengur, þjóðarmorðið stöðvast ekki án aðgerða!“

 

Ég finn fyrir kvíða

Katrín Jakobsdóttir forsetaframbjóðandi - Myndin tengist pistlinum ekki beint

Yfirvofandi slys.

Ég finn fyrir kvíða. Í hvert sinn sem niðurstöður skoðanakannana birtast finn ég fyrir kvíða. Kvíða vegna þess að niðurstöður þeirra gefa vísbendingar um að í burðarliðnum sé slys í sögu Íslands.Það yfirvofandi slys, að Katrín Jakobsdóttir hljóti kosningu sem Forseti Íslands. Katrínu Jakobsdóttir skortir samúð og mannskilning. Hana skortir virðingu fyrir samlöndum sínum Ég sat í nefnd sem skipuð var af Katrínu Jakobsdóttir Forsætisráðherra. Hlutverk nefndarinnar var að fjalla um og leggja til breytingar á nýju frumvarpi hennar um sanngirnisbætur til handa fórnarlömbum stofnanaofbeldis sem framið var í skjóli íslenskra yfirvalda á bæði síðustu og núverandi öld. Innihald þessa frumvarps Katrínar var svo óréttlátt og löðrandi í mannfyrirlitningu að forsætisráðherra Katrín Jakobsdóttir var gerð afturreka með það í samráðsgátt. Nú datt Katrínu Jakobsdóttir í hug að nýta mætti þessa vesalinga (sem hún áður hafði misboðið með þessu frumvarpi) til gagns. Hún skipaði nefnd sem í sátu fulltrúar þeirra sem orðið höfðu fyrir misrétti á barnaheimilum rekin af íslenskum yfirvöldum. Verklýsinguna fengum við í nefndinni í hendur. Hlutverk okkar var að fjalla um og koma með tillögur um hvernig bæta mætti þessi frumvarpsdrög þannig að þolendum þætti frumvarpið líðandi. Við sem sátum í nefndinni hittumst reglulega frá vormánuðum 2023 og fram haust 2023. Við unnum að einlægni og tiltrú á að Forsætisráðherra Katrín Jakobsdóttir væri alvara. Við trúðum orðum hennar þess efnis að hún bæri þá einu ósk í brjósti að koma til móts við þolendur þess óréttlætis sem fram hafði verið á okkur sem börnum af hálfum íslenskra stjórnvalda. Við kynntum svo niðurstöður okkar í kaffiboði í ráðherrabústaðnum við Tjarnagötum. Katrín sat fyrir miðju og hlustaði áhugasöm á tillögurnar.

Svo kom frumvarpið Það var eins og blaut tuska framan í mig. Það er gersneytt öllum tillögum og öllum óskum sem við lögðum til og báðum um. Eina ályktunin sem við gátum dregið af því var að við höfðum eina ferðina enn verið svikin af íslenskum stjórnvöldum. Katrín Jakobsdóttir hafði haft okkur að fíflum.

Ég er ekki elíta og mun aldrei tilheyra elítu íslensks samfélags. Ég hef alla mína ævi barist í bökkum. Sem barn bjó ég við sára fátækt, sem fullorðin manneskja hef ég barist við að ná endum saman alla mína ævi. Katrín Jakobsdóttur hefur í sinni valdatíð gert okkur sem erum í þessari stöðu lífið enn erfiðara með stjórnvaldsákvörðunum sem hafa skert kjör fátækra fjölskyldna,einstæðra foreldra, öryrkja og ellilífeyrisþega enn frekar. Hún hefur dæmt okkur til að standa betlandi í bifröð við dyr hjálparstofnana fyrir jól ,fyrir páska þegar börnin byrja í skóla eða þurfa að fermast osfr.

Auðvaldsstéttin í íslensku samfélagi er greinileg en Katrín Jakobsdóttir kemur fram eins og úlfur í sauðagæru. Hún sagðist vera Vinstri græn svo maður hélt að hún fylgdi þeirri stefnu. Það hefur hún aldrei gert. Aldrei.Í þokkabót gagnrýnir hún harðlega morð á börnum í Palestínu en var sjálf tilbúin til að samþykkja þungunarrof fullburða barna í móðurkviði.Saklausra barna sem engan málsvara eiga.

Rósa Ólöf Ólafíudóttir

Hvalurinn eltir Katrínu

Mynd: Alþingi

Ríkisstjórnin er í klandri vegna þess sleifarlags sem hefur átt sér stað við að taka afstöðu til hvalveiða. Stjórnsýslan í málinu þykir vera til háborinnar skammar, hvað sem fólki kann að finnast um sjálfar veiðarnar. Hvalur hf. sótti um leyfi til veiðanna um áramót. Fimm mánuðum síðar hafa engin svör borist og fyrirtækið og 200 starfsmenn þess eru í algjörri óvissu.

Það flýgur fyrir að VG vilji tefja málið fram yfir forsetakosningar til að skaða ekki framboð Katrínar Jakobsdóttur sem ber hvað stærsta ábyrgð á þvík hvernig komið er. Katrín var matvælaráðherra í veikindaleyfi Svandísar Svavarsdóttur þegar umsóknin barst og var stungið ofan í skúffu. Þá studdi hún Svandísi í að banna hvalveiðar á síðasta ári. Bannið er að mati Umboðsmanns Alþingis afleit stjórnsýsla og alvarlegt brot gagnvart Hvali.

Bjarkey Gunnarsdóttir Olsen, núverandi matvælaráðherra hefur setið á málinu síðan hún tók við ráðherraembætti. Hún hefur þvertekið fyrir að vera að hjálpa Katrínu með því að láta umsóknina liggja fram yfir kosningar. Kristján Loftsson, framkvæmdastjóri Hvals, er þó ekki í neinum vafa og fordæmir stjórnsýslu Katrínar. Hvalurinn eltir hana svo sannarlega í kapphhlaupinu um Bessastaði …

 

Berfættur maður í Árbæjarhverfi – Blindfullur dólgur ógnaði fólki í miðborginni

Lögreglan, löggan
Mynd/Lára Garðarsdóttir

Laust eftir miðnætti barst lögreglu tilkynning um dólg sem hafði uppi ógnandi tilburði í miðborg Reykjavíkur. Hann hafði verið að hóta öðrum ofbeldi og var mjög ölvaður. Ofbeldisseggurinn var handtekinn og hann læstur inni í fangaklefa.

Um miðja nótt bars svo tilkynning um tvo menn með barefli á gangi á sömu slóðum. Mennirnir fundust skömmu síðar en voru þeir þá óvopnaðir. Ekki var talin þörf á frekari aðgerðum og héldu tvímenningarnir frjálsir inn í nóttina.

Ökumaður var stöðvaður í austurborginni, grunaður um akstur undir áhrifum áfengis. Hann var látinn laus eftir að honum hafði verið dregið blóð.

Lögreglan komst á snoðir um húsbrot í Múlahverfinu í gær. Tveir aðilar höfðu brotið sér leið inn autt húsnæði og fundust í værum svefni. Hústökumönnunum var vísað á brott.

Tveir ökumenn voru sektaðir fyrir óheimila notkun nagladekkja. Það er dýrt spaug þar sem sekt á hvert dekk er hininhá eða 20 þúsund krónur. Ef allur gangurinn er á nöglum ber ökumanni að greiða 80 þúsund krónur í ríkissjóð.

Tilkynnt um berfættan mann á gangi í Árbæjarhverfi. Lögregla hélt á vettvang en maðurinn fannst ekki.

Lögregla sinnti almennu og ölvunareftirliti þar sem um 50 ökutæki voru stöðvuð. Athugað var með ástand og réttindi ökumanna og reyndist allt vera til fyrirmyndar.

 

Stærðarinnar bruggstarfsemi stöðvuð af lögreglu – Ungur bóndi handtekinn með mikið magn af gambra

Jóladjamm fjöldi unglinga var eyðilagt í upphafi desembermánaðar árið 1990, þegar lögreglan kom upp um stærðarinnar bruggstarfssemi í Landeyjum.

Þann sjötta desember árið 1990 kom lögreglan upp um eina allra stærstu bruggverksmiðju sem fundist hafði á landinu í langan tíma. Ungur bóndi var þá handtekinn í Vestur Landeyjum en um 600 lítrar af gambra fannst í mjólkurhúsi hans og um 100 lítrar af hreinum landa. Ljóst var að brugginu var ætlað að selja til dreifingaraðila í Reykjavík sem ætluðu sér að selja unglingum það.

DV skrifaði um málið daginn eftir, þann 7. desember 1990 en hér má lesa fréttina:

Lögreglan kom upp um stórfellda bruggstarfsemi í gær:
Mikil bruggverksmiðja í mjólkurhúsi í Landeyjum

Lögreglan kom í gær upp um eina stærstu bruggverksmiðju sem fundist hefur á landinu í langan tíma. Ungur maður var handtekinn í V-Landeyjum en í mjólkurhúsi hans fundust um 600 lítrar af óeimuðu bruggi og um eitt hundrað litrar af hreínum landa. Maðurinn játaöi að hafa staðið að bruggstarfseminni og að hafa selt hundruð lítra af bruggi til dreifingaraðila á höfuðborgarsvæðinu að undanförnu. Lögreglan lagði meðal annars hald á vörubíl sem bruggarinn hafði keypt fyrir ágóðann af bruggstarfseminni. Þrír dreifingaraðilar á höfuðborgarsvæðinu tengjast þessari umfangsmiklu bruggstarfsemi.

Forsaga málsins er að lögreglan fékk sterkan grun á þriðjudag um að bruggsala væri stunduö í Reykjavík. Fljótlega bárust böndin að dreifingaraðila í Mosfellsbæ. Fór lögreglan á staðinn á miðvikudagskvöld og handtók ungan mann. Hjá honum fundust um eitt hundrað lítrar af landa í plastbrúsum – tilbúnum til sölu. Tveir menn úr Hafnarfirði voru einnig handteknir. Þremenningarnir hafa allir játað að hafa staðið að sölu og dreifingu á hundruðum lítra af landa á höfuðborgarsvæðinu. Yngsti maðurinn er tæplega tvítugur en sá elsti er um þrítugt.

Síðdegis í gær fór lögreglan í V-Landeyjar þegar grunur beindist að höfuðpaurnum sem býr þar í sveit. í mjólkurhúsi hans fundust á annan tug plasttunna, tvö eimingartæki, hundruð kílóa af sykri og fleira tengt bruggstarfsemi. Lögregla hellti niður um 600 lítrum af óeimuðu bruggi, svokölluðum gambra, og lagði hald á um 100 lítra af tilbúnum landa sem bruggarinn sagði vera um 45 prósent að styrkleika. Fyrir utan nokkrar kýr og hænsni virtist maðurinn eingöngu hafa stundað bruggstarfsemi í stórum stíl. Hann hafði meðal annars komið upp gríðarstórum en haganlega smíðuðum skáp með stóru loki yfir fyrir allt bruggið.

Lögreglan hefur því lagt hald á um tvö hundruð lítra af óeimuðum landa á síðustu dögum en játningar liggja fyrir um sölu á hundruðum lítra til viðbótar. Ljóst er að dreifingaraðilarnir hafa stundað að bjóða unglingum áfengi til sölu. Bruggarinn í V-Landeyjum seldi dreifingaraðilunum lítrann á 750-1000 krónur, allt eftir því hve mikið magn var keypt í einu, en sölumennirnir seldu viðskiptavinum sínum landann á 1.500 krónur lítrann. Mál þetta er talið full upplýst. Það var unnið í sameiningu af rannsóknardeild lögreglunnar í Reykjavík ásamt lögreglu í Hafnarfirði og á Hvolsvelli. 

Dómur kveðinn upp í máli Kolbeins á mánudaginn – Ákærður fyrir gróft kynferðisbrot gegn stúlkubarni

Kolbeinn Sigþórsson var sýknaður

Á mánudaginn mun héraðsdómur Reykjaness kveða upp dóm í máli Kolbeins Sigþórssonar, fyrrverandi landsliðsmanns í knattspyrnu. Er hann ákærður fyrir gróft kynferðisbrot gegn barnungri stúlku.

Sjá einnig: Mannlíf birtir ákæruna á hendur Kolbeini – Á yfir höfði sér eins til 16 ára fangelsisdóm

RÚV segir frá málinu.

Það var í lok janúar sem málið gegn Kolbeini var þingfest en aðalmeðferð þess tók einn dag. Fór hún fram um miðjan maímánuð en Kolbeinn tjáði sig um sakarefnið í gegnum fjarfundabúnað. Samkvæmt RÚV er ástæðan fyrir því að Kolbeinn hafi ekki mætt sjálfur í réttinn sú, að fjölmiðlar hafi komist á snoðir um ákæruna og þá hvenær aðalmeðferðin færi fram.

Í aðalmeðferðinni neitaði Kolbeinn sök.

Er fyrrverandi knattspyrnustjörnunni gefið að sök að hafa brotið gróflega á stúlkunni í júní 2022 en saksóknari sagði í ákærunni að hann hafi nýtt yfirburði sína yfir henni. Lágmarksrefsins fyrir samskonar brot er eins ár fangelsi en hámarksrefsins 16 ár. Móðir stúlkunnar krefst þess, fyrir hönd dóttur sinnar, að Kolbeinn greiði henni þrjár milljónir króna í miskabætur.

RÚV hefur heimildir fyrir því frá héraðsdómi um að dómurinn hafi verið fjölskypaður en slíkt er undantekning í samskonar málum. Var dómurinn skipaður tveimur embættisdómurum og sálfræðingi.

Rífur Bjarna og Ríkisútvarpið í sig: „Fyrr má nú vera meðvirknin með þjóðarmorði“

Bjarni Benediktsson Mynd: RÚV-skjáskot

Tónskáldið Þórður Magnússon rífur bæði Bjarna Benediktsson og Ríkisútvarpið í sig vegna umfjöllunar miðilsins um hina hrottalegu árás Ísraelshers sem gerð var á tjaldbúðir í flóttamannabúðum Rafah á Gaza í gær, á svokölluðu „öruggu svæði“, þar sem hátt í 50 manns voru drepnir, mest megis konur og börn, sum þeirra misstu höfuðið í árásinni.

Þórður Magnússon tónskáld skrifaði færslu á Facebook eftir að hann sá Bjarna Benediktsson forsætisráðherra verja árás Ísraelshers í fréttum RÚV.

„Þarna er um að ræða svona ákveðna stigmögnun átaka sem að byrjar með nýrri eldflaugaárás frá Rafah á Ísrael og því miður þá var ekki við öðru að búast en því yrði svarað”

Sagði Bjarni Ben í kvöldfréttum RÚV í gær.“ Færsla Þórðar byrjar á þessum orðum en svo heldur hún áfram:

„Hóprefsingar eru í alþjóðalögum skilgreindar sem alvarlegur stríðsglæpur, en Bjarna talar þarna um þetta sem sjálfsögð og eðlileg viðbrögð. Væri þá ekki hægt að segja það sama um árás Hamas, 7. október? Voru það ekki hin eðlilegustu viðbrögð við áralangri kúgun og morðum?“

Því næst gagnrýnir tónskáldið fréttamann RÚV harðlega fyrir að láta forsætisráðherrann komast upp með „þessa viðurstyggilegu mannfjandsamlegu greiningu“.

„Fréttamaður gerir enga athugasemd við þessa viðurstyggilegu mannfjandsamlegu greiningu Bjarna og gerir enga tilraun til að gaumgæfa þessi ummæli eitthvað frekar með sjálfstæðri gagnaöflun og eða gagnspurningum frekar en fyrri daginn. Greining Bjarna Ben á atburðarrásinni er lokaniðurstaða fréttarinnar. Fréttamaður RÚV er þarna eingöngu í hlutverki PR fulltrúa viðmælanda eins og svo oft áður.“

Og Þórður er ekki búinn að rífa RÚV í sig:

„Þess fyrir utan gerir RÚV síðan krókódílatár Ísraela yfir þessu svokallaða “slysi” að aðalfrétt og segir svo að líklegast hafi þetta ekki einu sinni verið þeim að kenna. Svona málar RÚV þetta á sama tíma og aðalfréttin í vönduðum fréttamiðlum er sú, að sterkar vísbendingar séu um að þarna hafi bandarísk vopn kveikt eldana.“

Að lokum kemur Þórður með annað dæmi um svipað:

„Einstaka sinnum má heyra vandaðan fréttaflutning á RÚV en oft er þetta svo illa unnið að um hreina upplýsingaóreiðu er að ræða. Stundum, eins og nú er tilfellið, hafa fréttir alveg gengið fram af mér. Önnur minnisstæð frétt var þegar RÚV birti athugasemdalaust og gerði að aðalfrétt, áróðursmyndband frá IDF sem sýndi “höfuðstöðvar Hamas” á bak við MRI skanna og dagatalið alræmda. Myndband sem var svo farsakennt að það var aðhlátursefni í öllum vönduðum fjölmiðlum.
Fyrr má nú vera meðvirknin með þjóðarmorði.“

Jón Gnarr auglýsir gefins nærbuxur: „Þær eru of stórar, eru L en ég nota M“

Nærbuxurnar fínu. Ljósmynd: Facebook

Jón Gnarr auglýsir ónotaðar nærbuxur á sölusíðu á Facebook.

Fáir eru jafn góðir í að koma sér á framfæri og Jón Gnarr. Sonur forsetaframbjóðandans keypti handa föður sínum nærbuxur í Ameríku en reyndust þær því miður of stórar. Brá þá Jón á það ráð að auglýsa nærbuxurnar á Brask og brall, sem er sölusíða á Facebook en brækurnar fást gefnar en hægt er að nálgast þær á kosningaskrifstofu Jóns í Aðalstræti 11.

Hér má lesa færslu Jóns:

„Sonur minn gaf mér nærbuxur sem hann keypti í Ameríku en þær eru of stórar, eru L en ég nota M. Mig langar því að gefa þær einhverjum sem getur notað þær. Þetta eru 6 stk ónotaðar nærbuxur. Áhugasamir geta sótt þær á kosningaskrifstofu mína á milli 3 og 6 í dag.“

Nærbuxurnar sex.
Ljósmynd: Facebook

Bragi Páll birtir þýðingu á ljóði skálds frá Palestínu: „Við verðskuldum betri dauða“

Mosab Abu Toha

Bragi Páll Sigurðarson rithöfundur þýddi ljóð eftir palestínska ljóðskáldið Mosab Abu Toha og birti á Facebook.

Rithöfundurinn Bragi Páll Sigurðarson gerði sér lítið fyrir og þýddi nýtt ljóð eftir ljóðskáldið Mosab Abu Toha, frá Palestínu, sem gengið hefur í gegnum algjört helvíti, eins og aðrir Gazabúar, frá því í október, þó svo að hræðileg meðferð á Palestínubúum hafi staðið yfir í áratugi. Bragi Páll segir frá raunum Mosab í nýrr Facebook-færslu og birtir þýðingu sína á nýlegu ljóði eftir skáldið. Með ljóðinu birti hann teiknaða mynd af karlmanni halda á höfuðlausu barni en myndin er teiknuð eftir hryllingsmyndskeiði sem birtist frá Rafah í gær, eftir enn eina hrottafengna árás Ísraelshers, sem skildi hátt í 50 manns eftir í valnum, flestir þeirra konur og börn. Á teiknuðu myndinni vex þó blóm úr hálsi barnsins.

Hér má lesa færsluna í heild sinni og ljóðið:

„Í október í fyrra, skömmu eftir að þjóðarmorðið í Palestínu hófst, flúði ljóðskáldið Mosab Abu Toha heimili sitt með fjölskyldu sinni, konu og börnum. Þau settust að í Jabaliya flóttamannabúðunum. Nokkrum dögum síðar var Mosab handtekinn ásamt nokkur hundruð öðrum saklausum borgurum, barinn, sveltur og niðurlægður dögum saman. Þegar honum var sleppt var svo búið að sprengja húsið hans. Nokkrum vikum seinna myrtu Zíonistar góðvin hans Refaat Alareer. Hann lét hafa eftir sér nýlega „Á Gaza er dauðinn öruggari en lífið.“

Hann hefur skrifað pistla og ljóð undanfarin ár, en ég henti í þýðingu á einu af hans nýjustu ljóðum „We deserve a better death“ sem mér finnst ramma ágætlega inn viðbjóðinn, firringuna og sinnuleysi alþjóða samfélagsins en jafnframt ótrúlega þrautseigju Palestínsku þjóðarinnar.
***
Við verðskuldum betri dauða
Við verðskuldum betri dauða.
Líkamar okkar eru afmyndaðir og undnir,
útsaumaðir með kúlum og sprengjubrotum.
Nöfnin okkar borin vitlaust fram
í útvarpi og sjónvarpi.
Myndirnar sem þekja veggi bygginganna okkar,
dofna og fölna.
Áletranirnar á legsteinunum okkar hverfa,
þaktar í skít fugla og skriðdýra.
Enginn vökvar tréin sem varpa skugga
á grafir okkar.
Logandi sólin hefur yfirbugað
rotnandi líkama okkar.

-Mosab Abu Toha“

Eldgos hafið og kvikugangur stefnir á Grindavíkurbæ: „Þetta opnaðist með krafti“

Eldgosi[. Mynd: RÚV-skjáskot

Eldgos er hafið við Sundhnjúksgíga. Kvikugangurinn færist nær Grindavíkurbæ.

Eldgos hófst fyrir stuttu við Sunhnjúksgíga en gossprungan er um kílómeter á lengd en gosstrókarnir ná mest um 50 metra upp í loftið, samkvæmt Kristínu Jónsdóttur, jarðeðlilsfræðingi á Veðurstofunni sem var í viðtali við Rás 2 fyrir stuttu.

„Þetta opnaðist með krafti,“ sagði Kristín við Ragnhildi Thorlacius á Rás 2. Bætti hún við að gosið sé á svipuðum stað og síðast, á Sundhnjúksgígaröðinni. „Gosstrókarnir ná að minnsta kosti 50 metra hæð og lengdin á sprungunni er rúmlega 1 kílómetri, 1,5 eitthvað slíkt.“

Almannavarnir tilkynntu rétt í þessu að kvikugangurinn sé að færast nær Grindavíkurbæ en að búið sé að rýma bæinn. Viðbragðaðilar og aðrir sem eru í bænum eru beðnir um að vera tilbúnir að yfirgefa bæinn í miklu flýti.

Grindavík rýmd vegna mögulegs kvikuhlaups: „Órói fór að rísa líka“

Grindavík fyrir eldgosi og jarðskjálfta

Búið er að fyrirskipa rýmingu bæði í Grindavík og í Bláa lóninu vegna mögulegs kvikuhlaups við Sundhnjúksgíga.

Almannvarnir ríkislögreglustjóra fyrirskipuðu rýmingu í Grindavík og á nærliggjandi svæðum, þar á meðal Bláa lóninu fyrir um klukkustund. Í frétt RÚV um málið segir upplýsingafulltrúi Almannavarna, Hjördís Guðmundsdóttir, að næstu skref séu að fylgjast með hver atburðarásin verður. Samhæfingarstöð Almannavarna í Skógarhlíð hefur verið virkjuð.

Samkvæmt náttúruvársérfræðingi á Veðurstofunni, Lovísu Mjöll Guðmundsdóttur, hefur skjálftavirkni aukist upp úr klukkan hálf 11 í morgun, aðallega austur af Sýlingarfelli.

„Órói fór að rísa líka og það bendir til þess að það sé kvikuhlaup í gangi,“ segir hún í samtali við RÚV. Þó hefur gerst nokkrum sinnum að orðið hafi lítið kvikuhlaup án goss. „Það er spurning hvort það sé nægur þrýstingur fyrir kvikuna til að troða sér í gegn eða ekki.“

Samkvæmt RÚV eru skjálftarnir enn á þriggja til fimm kílómetra dýpi. „Kvikan er að reyna að troða sér, það er aðeins farið að hægja á skjálftavirkninnni en þetta getur breyst mjög hratt.“

Búið er að rýma Bláa lónið en um 700 til 800 gestir voru í lóninu þegar rýming hófst. Rauði krossinn biður Grindvíkinga að hafa samband í síma 1717 svo það sé hægt að skrá fólk. Þá er hægt að koma við á aðalskrifstofu Rauða krossins í Efstaleiti 9 og skrá sig í móttökunni, henti það fólki betur.

Skorar á Arnar og Jón að draga framboð sín til baka: „Svo gerið þjóðinni gagn. Hættið“

Arnar Þór Jónsson er formaður Lýðræðisflokksins

Glúmur Baldvinsson skorar á Arnar Þór Jónsson og Jón Gnarr að draga framboð sitt til forseta til baka.

Alþjóðastjórnmálafræðingurinn Glúmur Baldvinsson segist vera með samviskubit gagnvart frænda sínum, forsetaframbjóðandanum Arnari Þór Jónssyni.

„Ég er með smá samviskubit. Ég hef verið fremur andstyggilegur við frænda minn Arnar Þór. Hann á það ekki skilið enda afar frambærilegur og rökfastur maður. Hann kemur vel fyrir. Bara með skoðanir sem samrýmast ekki mínum.“ Þannig hefst Facebook-færsla Glúms en í næstu orðum útskýrir hann að gagnrýni hans hafi ekki beinst að Arnari sjálfum, heldur stuðningsmönnum hans.

„En þegar ég hugsa upphátt hefur gagnrýni mín ekki beinst að honum helst heldur öllu skítkastinu og bullinu sem kemur frá hans hörðustu stuðningsmönnum sem drulla yfir mig og allt og alla með orðum einsog skíthæll, drullusokkur, viðbjóður og öðru eins. Ég er maður til að taka skítkasti enda ólst ég upp við það. Ergo sum, ég met frænda minn mikils en ekki kjaftfora vitgranna stuðningsmenn hans. Arnar er einn frambærilegasti frambjóðandinn enda af Schram ætt. En með kolvitlausar skoðanir og ranghugmyndir um eðli embætti Forseta lýðveldisins.“

Að lokum skorar Glúmur á þá Arnar Þór og Jón Gnarr að draga framboð sín til baka, svo atkvæðin sem hefðu farið til þeirra, fari frekar á einhvern sem á meiri von gegn Katrínu Jakobsdóttur.

„Og í ljósi lítils fylgis hans skora ég á hann að draga framboð sitt tilbaka. Hann á framtíð í pólitík og þar skulum við tala saman. Að sama skapi skora ég á hinn mæta mann Jón Gnarr að draga sig í hlé. Af hverju? Af því þeir eiga úr þessu engan sjens og vita það báðir. Og stuðningsmenn beggja munu aldrei kjósa Katrínu Jakobsdóttur. Þar liggur hundurinn grafinn. Svo gerið þjóðinni gagn. Hættið.“

Glænýtt Sjóarablað Mannlífs komið út – Ókeypis fyrir alla landsmenn

Mannlíf hefur nú gefið út glænýtt blað: Sjóarinn en í því má finna fjölda viðtala, Sjómannadagskveðjur, greinar og pistla og það sem betra er, það er algjörlega ókeypis!

Blaðið er nú í dreifingu en hægt er að finna það í Bónusverslunum víðsvegar um landið. Á föstudaginn verður svo hægt að sjá blaðið í vefútgáfu hér á síðu okkar.

Sólveig fagnaði 100 ára afmæli sínu: „Hann er svo ungur, ekki nema 93 ára“

Bæjarstjórinn og afmælisbarnið. Ljósmynd: Akureyri.is

Sólveig Elvina Sigurðardóttir fagnaði 100 ára afmæli sínu á sunnudaginn, á Akureyri en þar hefur hún búið frá 18 ára aldri. Af tilefni af þessu merku tímamótum heimsótti bæjarstjóri Akureyrar, Ásthildur Sturludóttir, afmælisbarnið og færði henni fagrann blómvönd frá bæjarstjórn Akureyrar, líkt og hefð er fyrir þegar bæjarbúi nær 100 ára aldrinum.

Á vef Akureyrarbæjar segir eftirfarandi:

Sólveig fæddist 26. maí 1924 í Ólafsfirði og ól þar manninn til 18 ára aldurs þegar hún flutti til Akureyrar. Þar giftist hún Ottó Aríusi Snæbjörnssyni (1920-2012) og saman eignuðust þau soninn Magnús Aríus sem lést árið 2011 en lét eftir sig þrjú mannvænleg börn sem eiga orðið marga afkomendur.

Sólveig vann 32 ár í Sambandsverksmiðjunum á Gleráreyrum, fyrst í fataverksmiðjunni Heklu en síðan í skógerðinni Iðunni. Í spjalli við Ásthildi Sturludóttur bæjarstjóra lýsti hún því hvílíkt reiðarslag það var þegar verksmiðjunum var lokað og um 800 manns misstu vinnuna.

Sólveig er lífsglöð og mjög ern. Hún segist taka því sem að höndum ber með jafnaðargeði, eldar sjálf sinn mat og nýtur þess að búa á 4. hæð á fallegum stað með útsýni út Eyjafjörðinn.

Afmælisveislan var haldin með pompi og prakt á sunnudaginn og þá kom meðal annars einn af nágrönnum Sólveigar færandi hendi með afmælisgjöf frá öðrum íbúum fjölbýlishússins. „En hann er nú svo ungur,“ segir Sólveig. „Held að hann sé ekki nema 93ja ára.“

Bubbi birtir skjáskot af ógeðslegum skilaboðum – Sendandinn kann ekki að skammast sín

Bubbi Morthens Ljósmynd: Instagram-skjáskot

Tónlistarmaðurinn Bubbi Morthens birti í gærkvöldi dæmi um þær viðurstyggilegu skilaboð sem honum hefur borist frá því að hann lýsti opinberlega yfir stuðningi sínum við Katrínu Jakobsdóttur sem nú býður sig fram til embættis forseta.

Sagt var frá frásögn Bubba í fjölmiðlum í gær, af hótunum og viðbjóðslegum skilaboðum sem fólk hefur verið að senda á hann á samfélagsmiðlunum en fólkið virðist afar ósátt við stuðning hans við Katrínu Jakobsdóttur forsetaframbjóðanda. „Hvað fær fólk til að senda ljót skilaboð, krefja mann um skýringar, hóta manni, ógna manni? Fara inn á heimasíðu manns með dólg, viðhafa orðbragð sem viðkomandi myndi aldrei nota heima hjá sér? Dæmi: Hvað fékkstu borgað fyrir að sleikja hóruna? Ertu að borga fyrir listamannalaunin? Söngstu ekki um hommana, viðbjóðurinn þinn? Ertu að móti þeim núna? Og margt fleira sem er ekki hafandi eftir. Þetta er stöðugt áreiti frá því að ég lýsti yfir stuðningi við framboð Katrínar.“ Þetta er meðal þess sem Bubbi skrifaði í Facebook-færslu þar sem hann segir frá áreitinu.

Í gærkvöldi bætti hann svo um betur og birti dæmi um slík skilaboð en í þeim stendur einfaldlega: „Hengdu þig bubbi“.


Fjölmargir tjá sig um skjáskot Bubba og eru á einu máli um að þetta sé rangt og að sendandinn þurfi hjálp. Sendandinn, Eiríkur Björnsson er einn af þeim sem skrifar athugasemd en virðist ekki kunna að skammast sín en hann skrifaði: „Bubbi er Bjáni.“

Bubbi kjökrar

Katrín Jakobsdóttir.

Tónlistamaðurinn magnaði, Bubbi Morthens, lætur sér fátt mannlegt óviðkomandi. Bubbi tók sér stöðu við hlið Hannesar Hólmsteins Gissurarsonar, prófessors á eftirlaunum, og Kristjáns Þórs Júlíussonar, fyrrverandi sjávarútvegsráðherra, og lýsti stuðningi við Katrínu Jakobsdóttur sem forseta Íslands.

Bubbi steig skrefinu lengra en Sjálfstæðismennirnir og ljáir auglýsingum Katrínar rödd sína þar sem hann mærir forsætisráðherrann fyrrverandi. Bubbi varð svo fyrir nokkru áfalli þegar nettröll veittust að honum fyrir að styðja Katrínu. Hann barmar sér undan árásunum á Facebook og tiltekur nokkur dæmi.

„Hvað fær fólk til að senda ljót skila­boð, krefja mann um skýr­ing­ar, hóta manni, ógna manni? Fara inn á heimasíðu manns með dólg, viðhafa orðbragð sem viðkom­andi myndi aldrei nota heima hjá sér? Dæmi: Hvað fékkstu borgað fyr­ir að sleikja hór­una? Ertu að borga fyr­ir lista­manna­laun­in? Söngstu ekki um homm­ana, viðbjóður­inn þinn?“ Ertu á móti þeim núna? Og margt fleira sem er ekki haf­andi eft­ir. Þetta er stöðugt áreiti frá því að ég lýsti yfir stuðningi við fram­boð Katrín­ar,“ skrif­ar Bubbi í færslu á Face­book.

Bubbi er sjálfur þekktur fyrir vægan dólgshátt og að kalla ekki allt ömmu sína í deilum á Netinu. Hann segist þó aldrei myndu hegða sér með þessum hætti.

„Aldrei dytti mér í hug að fara inná síður hjá öðrum með dólg líkt og fólk ger­ir hjá mér. Ég skulda eng­um neitt, hvað þá skýr­ing­ar. Það kveður svo rammt að þessu að fólk veigr­ar sér við því að lýsa yfir stuðningi við fram­boð Katrín­ar op­in­ber­lega því það er ráðist á það um leið,“ skrifar Bubbi með grátstafinn í lyklaborðinu …

1...116117118...1.602Síðu 117 af 1.602

Raddir

© 2023 Mannlíf.is. Allur réttur áskilinn. Notkun á efni miðilsins er óheimil án samþykkis.