Föstudagur 20. september, 2024
9.7 C
Reykjavik
Senda ábendingu
VefTv
Hlaðvörp

Dreymir um lítinn fiskibát með stórri vél

Bárður Hreinn Tryggvason er sölustjóri hjá Gimli fasteignasölu og er tveggja barna faðir. Hann á þau Silju Rún sem er tvítug og er að ljúka stúdentsprófi um áramótin og Tryggva Snæ, fimmtán ára nemanda við Sjálandsskóla. Kærasta Bárðar er Lilja Hildur Hannesdóttir hjúkrunarfræðingur og er verkefnisstjóri á menntasviði Landspítalans. Hún er einnig með meistarapróf í mannauðsstjórnun. Hildur á þrjú börn, á aldrinum átta ára, sextán ára og tuttugu og fimm ára, og eitt barnabarn. Bárður og Hildur búa hvort í sínu lagi eins og er, bæði í Kópavogi.

Bárður Tryggvason, sölustjóri hjá Gimli fasteignasölu.

Hvað heillar þig mest við starfið? „Það sem mér finnst skemmtilegast við þessa vinnu eru samskipti við fólkið sem stendur í fasteignaviðskiptum á hverjum tíma. Í flestum tilvikum er um að ræða stærstu samninga þess á lífsleiðinni. Mestu skuldbindingarnar sem eru lánin sem það tekur og þá er í flestum tilvikum um að ræða lánagjörning í fjörutíu ár sem er um það bil hálf mannsævi, það segir allt sem segja þarf um hversu stór þessi ákvörðun er að að taka lán og kaupa íbúð. Það er svo gefandi þegar vel tekst til og allt gengur upp og allir ganga ánægðir og sáttir frá borði. Ég hef alla tíð tekið starfið mikið inn á mig, ef svo má að orði komast. Síðan eru það vinnufélagarnir og umhverfið, að geta nýtt keppnisskapið sem er mikið hjá mér, að ég ætla og veit að ég hef, þó að ég segi sjálfur frá. En mesta ánægjan eru ánægðir viðskiptavinir.“

Geturðu lýst hefðbundnum vinnudegi hjá þér? „Hefðbundinn vinnudagur hjá mér er frá klukkan 9.00 – 17.00 á daginn og oft lengur, en fyrstu tuttugu og fimm árin gæti ég trúað að þetta hafi verið ekki undir 60-70 tímum á viku. Í dag er þetta öðruvísi, ég fer þrisvar í viku í fótbolta í hádeginu í 1,5 klst, en það hef ég gert síðustu tíu árin og eru ómissandi fyrir mig, því að þetta útheimtir oft mikið álag.“

Hvað finnst þér gera heimili að heimili? „Fallega samsett húsgögn og hlutir sem passa saman og umfram allt eru þægileg. Svo ekki sé minnst á fallega myndlist á veggjum. Ég hef safnað að mér fallegri myndlist undanfarin ár og hef komið inn á glæsileg heimili en það er eitthvað sem vantar og það er eitthvað fallegt á veggina. En það er bara mín skoðun.“

Geturðu lýst þínum stíl? „Minn stíll er einfaldleikinn, ekki vera með of mikið af húsgögnum/hlutum og láta hlutina passa saman og mynda fallegt og notalegt heimili.“

Áttu þinn uppáhaldsarkitekt? „Pálmar Kristmundsson er minn uppáhalds, hann hefur teiknað falleg hús og byggingar sem ég hef hrifist af í gegnum tíðina.“

Áttu þinn uppáhaldshönnuð? „Gæti nefnt Alvar Aalto hinn finnska sem var bæði húsgagnahönnuður og arkitekt, svo ég nefni nú einhvern.“

Hvað hefur þig alltaf dreymt um að eignast en ekki eignast hingað til? „Það er lítill fiskibátur með stórri vél og kemst hratt, en það er draumurinn einhvern tímann. Ég er frá Hellissandi og uppalinn þar við sjóinn. Var á skaki þrjú sumur með mági mínum. En það sem skýrir það er að þegar að þú ert kominn út á sjó í góðu veðri, þá hverfur allt sem að heitir stress. Þú ferð að slaka á og gleymir þér.“

Uppáhaldsliturinn þinn? „Uppáhaldsliturinn minn er brúnn.“

Hvar líður þér best? „Ég held að ég geti sagt að mér líði best með fjölskyldunni og að atast með henni í einhverju. Síðan að fara vestur á Snæfellsnes á æskuslóðirnar í fallegu veðri. Fara í fótbolta með stákunum en ég spila með Luns United í hádeginu og Svíkingum vinum mínum á mánudögum. Það er svo margt sem að ég gæti talið upp.“

Hvað heillar þig mest við haustið? Er eitthvað sem þú vilt bæta við í garðinn eða inn á heimilið þegar haustið gengur í garð?
„Fallegur dagur að hausti, kaldur og sólin á lofti á sér engan sinn líka, síðan haustlitirnir þegar að þeir birtast í sínu fegursta formi. Vantar heita pottinn.“

Svalasti veitingastaðurinn á Íslandi í dag? „Veit ekki, en gæti nefnt Bautann á Akureyri, alltaf sérstök stemning að borða þar. Var á Akureyri í menntaskóla í fjóra vetur.“

Heillar einhver byggingarstíll þig meira en annar? „Já, það eru lítil falleg einbýlishús í grónum hverfum eins og hægt er að sjá til dæmis fyrir norðan á Akureyri. Hvaða stíll það er, veit ég ekki.“

Að lifa lífinu lifandi er að … „vera meðvitaður um stað og stund og láta ekkert fara í taugarnar á sér, lífið er svo stutt. Halda síðan vel utan um fjölskylduna og vinina, ekkert gefur lífinu meira gildi en það að hafa gott fólk í kringum sig.“

Mynd / Hákon Davíð Björnsson

 

Brautryðjendur á íslenskum netmarkaði

Skanva.is er nýleg netverslun í eigu Skanva Group sem er fyrirtæki í Danmörku sem á einnig netverslanir skanva.no í Noregi og Vinduesgrossisten.dk í Danmörku. Hanna G. Guðmundsdóttir Overby er svæðisstjóri á Íslandi fyrir Skanva.is og við heimsóttum hana á dögunum og fengum innsýn í hvað fyrirtækið hefur upp á að bjóða.

Hanna G. Guðmundsdóttir Overby er svæðisstjóri á Íslandi fyrir Skanva.is.

„Skanva.is er brautryðjandi á íslenskum markaði, þar sem við erum fyrsta fyrirtækið sem býður upp á netverslun fyrir glugga og hurðir. Það hefur aldrei verið auðveldara fyrir Íslendinga að kaupa glugga og hurðir, hvar og hvenær sem er. Verðið er líka óþekkt á Íslandi, en ástæðan er sú að við getum hagrætt mikið í rekstrinum þegar viðskiptavinirnir ganga frá pöntuninni sjálfir á Netinu og þar með skilar sparnaðurinn sér beint til viðskiptavinarins. Einnig er ástæðan fyrir því að við getum boðið lægra verð sú að viðskiptavinirnir kaupa beint af framleiðanda og sleppa því einum millilið í kaupferlinu. Við erum með sýningarsal úti á Granda í Reykjavík, þar sem hægt er að koma og sjá sýnishorn af vörunum okkar.“

Brynjar Valþórsson er sölumaður hjá Skanva.is í sýningarsalnum úti á Granda og með honum á myndinni er Jørgen Tranholm, einn af eigendum Skanva.is.

Hvar fer framleiðslan fram? „Við framleiðum okkar eigin glugga og hurðir í verksmiðjunni okkar í Hvíta-Rússlandi. Þar erum við með danskan framleiðslustjóra sem sér um að gæðin standist þær kröfur sem gerðar eru. Það er hægt að velja um tré, tré/ál og plast í glugga og hurðir. Allar vörur frá okkur eru með tíu ára ábyrgð. Við erum ekki með neinn lager heldur eru allar pantanir sérsmíðaðar og framleiddar eftir málum og óskum viðskiptavina okkar.“

Þjónusta og vörur Skanva hafa hlotið mjög góðar móttökur á Íslandi. „Við höfum fengið mjög jákvæðar móttökur á Íslandi, við höfum átt erfitt með að svara öllum fyrirspurnum innan þokkalegs tímaramma þar sem fyrirspurnirnar hafa verið svo margar. Við höfum líka fundið fyrir efasemdum um fyrirtækið, til dæmis á samfélagsmiðlum, þar sem fólki finnst verðið of gott til að vera satt. Við skiljum það vel þar sem við erum með áður óþekkt verð og það tekur alltaf tíma fyrir markaðinn að kynnast nýjum spilurum.“

Stúdíó Birtíngur í samstarfi við Skanva.

Fjölbreytt vöruúrval er af gluggum, hurðum og fylgihlutum í sýningarsal Skanva.is úti á Granda, eins og sjá má á myndunum hér fyrir neðan.

 

Hágæðavörur fyrir útivistina, líkamsræktina, fjallgöngur og ferðalög

Verslunin og heildsalan Sportís hefur haslað sér völl hér á landi og þykir hafa afar gott vöruúrval og sérlega góða þjónustu. Við heimsóttum Skúla J. Björnsson í Mörkina og kynntum okkur tilurð fyrirtækisins og það sem Sportís hefur upp á að bjóða. En Skúli annast daglegan rekstur fyrirtækins og hefur unnið í þessum bransa frá árinu 1983 en áður var hann meðal annars forstöðumaður félagsmiðstöðvar.

Skúli J. Björnsson og Anna S. Garðarsdóttir stofnuðu fyrirtækið Sportís árið 1983. Hér er Skúli með dóttur sinni Sigrúnu Kristínu sem er verkefnisstjóri hjá Sportís.

Segðu okkur aðeins frá tilurð verslunarinnar Sportís og helstu áherslum ykkar í vöruúrvali og þjónustu? „Sportís ehf var stofnað af mér og konu minni, Önnu S. Garðarsdóttur, í febrúar árið 1983 og markmiðið var að reka heildverslun með vandaðar vörur á sviði íþróttafatnaðar, eingöngu góð vörumerki. Við höfum byggt upp fjölda þekktra vörumerkja á þessum tíma.“

Getur þú sagt okkur meira um vöruúrvalið? „Í verslun okkar í Mörkinni 6 erum við með íþróttaskó og starfsfólk okkar er þrautþjálfað í að veita leiðbeiningar í vali á hvers kyns íþróttaskóm. Við bjóðum upp á mikið úrval af hlaupaskóm, utanvegaskóm og innanhússskóm fyrir alla. Einnig erum við með útivistar- og vetrarfatnað og margt fleira. Við erum með mikið af CASALL-æfingafatnaði fyrir konur, það er merki sem allar konur elska. Casall er þekkt fyrir gæði og endingu.
Kari Traa er nýtt norskt merki – heitir eftir skíðadrottningu og margföldum ólympíugullhafa. Það merki býður mjög öfluga línu af sportfatnaði fyrir konur og hefur vakið mikla athygli fyrir merino-ullarlínuna sem er litrík og flott. Ennfremur erum við með mikið úrval af REIMA-barnafatnaðnum sem er finnsk gæðavara með mikið úrval af vetrargöllum, lambhúshettum og öllum þeim fatnaði sem fær börnin til að vilja vera úti.“

Skúli nefnir einnig að þau séu með Canada Goose-merkið sem er þekkt um allan heim fyrir hlýju, vönduðu og fallegu vetrarúlpurnar. „Canada Goose er mjög vinsælt merki hjá Sportís og við erum með landsins mesta úrval af þessum frábæru úlpum. Nýjar og spennandi úlpur voru að koma og nú er hægt að fara að njóta vetrarins.“

Hvert er ykkar aðalsmerki í vörutegundum? „Öll okkar merki eru aðalsmerki – en til að nefna einhver má nefna Canada Goose sem er heimsfrægt og hefur verið framleitt frá árinu 1957 og nýtur mikilla vinsælda. Finnska barnafatamerkið Reima sem var stofnað árið 1944. Asics er toppurinn í hlaupaskóm og er fyrsta val alvöruhlaupara. Asics er japanskt fyrirtæki stofnað árið 1949. Við seljum öll þessi merki og fleiri einnig í heildsölu til valinna endursöluaðila um land allt.“

Leggið þið mikið upp úr að vera með hágæða útivistarfatnað og vörur fyrir þá sem stunda útivist? „Við seljum vörur fyrir útivist, göngur, ræktina, ferðalög og fleira.“

Mynd / Hallur Karlsson

Stúdíó Birtíngur í samstarfi við Sportís. 

 

Blóðappelsínu-spritz

|
|

Frískandi kokteill þar sem blandaður er saman nýkreistur blóðappelsínusafi, prosecco og kryddaður sætur vermouth. Ef blóðappelsínur eru ekki fáanlegur má nota bleikan greipaldinsafa í staðinn.

Blóðappelsínu-spritz
fyrir 1 glas
30 ml sætur vermouth
30 ml blóðappelsínusafi
Prosecco

Setjið klaka í glas eða belgmikið vínglas og hellið sætum vermouth og blóðappelsínusafa ofan í. Fyllið með Prosecco og skreytið með appelsínusneið.

Mynd / Aldís Pálsdóttir
Stílisti / Hanna Ingibjörg Arnarsdóttir

Þorskur í sítrónu- og smjörsósu

2. tbl. 2018
Mynd / Heiðdís Guðbjörg

Fljótlegur og bragðgóður réttur sem er tilvalinn fyrir önnum kafið fólk.

Við könnumst flest við þá tímapressu sem hlýst af því að koma sér heim eftir langan vinnudag og þurfa að koma mat á borðið fyrir svangt heimilisfólk á skikkanlegum tíma. Þá getur verið freistandi að kaupa skyndibita eða eitthvað annað fljótlegt sem fyllir magann en gerir kannski ekki mikið fyrir næringu og bragðlauka. Best er að eiga í handraðanum nokkrar uppskriftir að fljótlegum og bragðgóðum réttum sem ekki krefjast hálfa körfu af hráefni. Þessi réttur er tilvalinn í miðri viku fyrir önnum kafið fólk en hann er útgáfa af hinum klassíska franska rétti Sole Meunière. Hann er auðveldur, fljótlegur og einstaklega barnvænn.

Þorskur í sítrónu- og smjörsósu
fyrir 4
½ dl möndlur
1 1/2 dl hveiti
4 roðflettir sporðbitar af hvítum fiski (t.d. koli, ýsa eða þorskur)
salt og pipar
2 msk. olía
2 msk. ósaltað smjör

Hellið möndlunum á stóra pönnu. Hitið yfir meðalháum hita þar til möndlurnar fara að ilma og eru orðnar gylltar að lit, setjið til hliðar. Látið hveiti í fat og setjið til hliðar. Þerrið fiskinn með eldhúspappír og saltið og piprið fiskinn báðum megin. Veltið honum upp úr hveitinu og hristið bitana aðeins til að losa umfram hveiti af fiskinum. Hitið olíu á stórri pönnu yfir meðalháum hita. Bætið smjörinu á pönnuna þegar olían er orðin heit og dreifið úr því. Leggið fiskinn á pönnuna og steikið þar til fiskurinn er orðinn gylltur, 2-3 mín. Snúið fiskinum við og eldið þar til hann hefur eldast í gegn og er orðinn gylltur, 1-3 mínútur (fer eftir þykkt fiskbitans). Takið hann af pönnunni og hellið fitunni frá.

Sósa
4 msk. ósaltað smjör
2 msk. steinselja, söxuð
1 msk. ferskur sítrónusafi

Setjið pönnuna aftur yfir meðalháan hita og setjið smjörið út á. Eldið þar til smjörið fer að gyllast, u.þ.b. 2 mín. Hrærið steinseljuna og sítrónusafann saman við og hellið yfir fiskinn. Berið fram með steiktum kartöflum, sítrónubátum og grænu salati.

Umsjón / Nanna Teitsdóttir
Mynd / Heiðdís Guðbjörg Gunnarsdóttir

„Við eigum Ísland, það eina sem við eigum eftir að gera er að taka það“

Hávær krafa er um að lífeyrissjóðirnir verði virkari eigendur og nýti sér þau völd sem í því felast til að beita sér fyrir lífsgæðum sjóðsfélaga í nútíð ekki síður en í framtíð.

Lífeyrissjóðir landsins eiga stóran hluta af íslensku atvinnulífi. Vegna fjármagnshafta, stækkunar þeirra og þátttöku í endurreisn íslenskra fyrirtækja áttu sjóðirnir tæplega helming allra skráðra hlutabréfa í lok árs 2016 og um 70 prósent skuldabréfa. Mörg þeirra félaga sem lífeyrissjóðirnir eru sameiginlega ráðandi eigendur selja vörur og þjónustu sem landsmenn nota á hverjum degi. Og mörg þeirra hafa hækkað laun stjórnenda sinna þannig að laun forstjóra skráðra fyrirtækja eru nú að meðaltali 16 sinnum lágmarkslaun. Auk þess er til staðar kaupaukakerfi innan margra félaga sem gerir þeim kleift að greiða æðstu stjórnendum sínum bónusa.
Hávær krafa er um að lífeyrissjóðirnir verði virkari eigendur og nýti sér þau völd sem í því felast til að beita sér fyrir lífsgæðum sjóðsfélaga í nútíð ekki síður en í framtíð. Sú krafa kemur fyrst og fremst frá fulltrúum launafólks, verkalýðshreyfingum landsins. En hana er líka að finna á meðal fulltrúa atvinnurekenda sem sitja í stjórnum sjóðanna.
Þessi krafa birtist ansi skýrt á fundi sem Efling stóð fyrir um liðna helgi með þeim tveimur sem sækjast eftir að verða næsti forseti Alþýðusambands Íslands, Sverri Mar Albertssyni og Drífu Snædal (sjá mynd). Á fundinum sagði Sverrir meðall annars að verkalyðsfélögin ættu Ísland. „Það eina sem við eigum eftir að gera er að taka það.“ Drífa sagðist sammála honum.

Ítarleg fréttaskýring er um baráttuna um íslenskt atvinnulíf í nýjasta tölublaði Mannlífs. Hægt er að lesa skýringuna í heild á vef Kjarnans.

Orkuveita Reykjavíkur: Endalaus uppspretta átaka

Fréttir af kynferðislegri áreitni innan Orkuveitu Reykjavíkur í liðinni viku er aðeins eitt af mörgum hitamálum sem hafa blossað upp í kringum starfsemi fyrirtækisins. Allt frá því Orkuveitan var sett á fót með sameiningu Hitaveitu Reykjavíkur og Rafmagnsveitu Reykjavíkur árið 1999 hafa deilur um reksturinn blossað upp með reglulegu millibili og þær jafnvel endað með falli borgarstjórnarmeirihluta. Mannlíf rifjar upp nokkur af helstu hitamálunum.

 

Rándýrar höfuðstöðvar

Bygging höfuðstöðva OR er um margt sorgarsaga sem enn sér ekki fyrir endann á. Kostnaður við bygginguna nam alls 5,8 milljörðum króna og fór hann 4 milljarða fram úr áætlun. Árið 2013 var ákveðið að selja húsnæðið til lífeyris- og fjárfestingasjóða til að grynnka á erfiðri skuldastöðu fyrirtækisins og leigja það af nýjum eigendum; 5,1 milljarður fékkst fyrir húsið. Síðan kemur í ljós að stór hluti vesturhússins er ónýtur vegna rakaskemmda og að kostnaður við viðgerðir geti numið allt að 7 ½ milljarði króna. Í fyrra kaupir Orkuveitan húsið aftur fyrir 5,5 milljarða, en kaupin voru forsenda þess að hægt væri að ráðast í nauðsynlegar breytingar á húsnæðinu vegna skemmda.

Eitt flottasta eldhús landsins

Árið 2010 beindist athygli landsmanna að stórglæsilegu eldhúsi höfuðstöðva OR eftir að kynningarmyndband fyrirtækisins fór í dreifingu á Netinu. Myndbandið, sem var tæpar 10 mínútur að lengd, var framleitt af kynningardeild fyrirtækisins árið 2004. Var ásókn fagaðila og rekstraraðila í að skoða eldhúsið svo mikil að ákveðið var að gera myndbandið til að draga úr slíkum heimsóknum. Alfreð Þorsteinsson, sem var stjórnarformaður OR á þeim tíma sem eldhúsið var byggt, þvertók fyrir að um of mikinn íburð hafi verið að ræða. „Það var ekkert bruðlað sérstaklega í uppbyggingu þessa eldhúss.“ Almenningur var á öðru máli.

Sértækar skuldaaðgerðir

Rekstur Orkuveitunnar fór afar illa út úr efnahagshruninu enda hafði íslenska krónan hríðfallið og stærstur hluti lána í erlendri mynt. Um mitt ár námu skuldir fyrirtækisins 227 milljörðum króna. Stjórn fyrirtækisins réðist í umfangsmiklar aðgerðir til að bjarga fyrirtækinu sem fólust meðal annars í niðurskurði, hækkun gjaldskráa og endurfjármögnun lána. Var aðgerðaáætlunin nefnd Planið. Áætlunin gekk eftir og gott betur og skilaði hún sér í 60 milljarða króna í bættri sjóðsstöðu, eða 10 milljörðum umfram það sem upphaflega var reiknað með.

Mislukkuð tilraun með risarækjur

Um aldamótin hóf Orkuveitan tilraunir í að koma á fót risarækjueldi. Fyrirtækið lagði fram stofnfé og var áformað að fleiri aðilar kæmu inn í verkefnið sem myndu á endanum taka yfir verkefnið og hefja risarækjueldi í stórum stíl. Þeir létu hins vegar aldrei sjá sig. Alfreð Þorsteinsson, þáverandi stjórnarformaður, sagði þetta hluti af lögboðinni skyldu Orkuveitunnar um að taka þátt í nýsköpun og þegar fyrsta risarækjan var boðin til átu árið 2004 sagði hann ljóst að tilraunin hafði heppnast. Voru menn á þessum tímapunkti á því að risarækjan ætti eftir að slá í gegn. En risarækjudraumarnir runnu út í sandinn og í september 2007 tók stjórn OR þá ákvörðun að hætta risarækjueldinu. Lét Haukur Leósson, þá stjórnarformaður, hafa eftir sér að tilraunastarfsemin hafi ekki skilað fyrirtækinu krónu.

Stórslys í Andakílsá

Starfsmenn Orku náttúrunnar urðu uppvísir að ólögmætri og saknæmri háttsemi við tæmingu á lóni um botnloku á stíflu Andakílsárvirkjunar í Borgarfirði í fyrravor. Gríðarlegt magn aurs flæddi út í Andakílsá með meðfylgjandi stórtjóni fyrir lífríki árinnar. Orkustofnun sektaði ON um eina milljón króna vegna atviksins, enda hafði tilskilinna leyfa fyrir tæmingunni ekki verið aflað. Áhrifanna gætir enn og var engin laxveiði stunduð í Andakílsá í sumar frekar en í fyrra.

REI sprengir borgarstjórn

Á haustmánuðum 2007, þegar sjálfstraust íslenskra viðskiptamanna náði hæstu hæðum, voru uppi stórar hugmyndir um að ráðast í orkuútrás. Til þess stofnaði OR dótturfyrirtækið Reykjavik Energy Invest – REI. Þegar fréttir bárust af því að til stæði að sameina REI og Geysi Green Energy, sem var í eigu FL Group og Glitnis banka, runnu hins vegar tvær grímur á borgarfulltrúa. Þær deilur mögnuðust þegar í ljós kom að útvaldir lykilstarfsmenn áttu að fá kaupréttarsamninga sem mögulega hefði fært þeim háar fjárhæðir. Ekkert varð þó að samrunanum þar sem borgarstjórnarmeirihluti Sjálfstæðisflokks og Framsóknarflokks sprakk vegna málsins.

Barist um Hitaveitu Suðurnesja

Síðsumars 2009 risu enn og aftur upp harðar deilur í borgarstjórn þegar Orkuveitan ákvað að ganga til viðræðna við kanadíska fyrirtækið Magma Energy um sölu á 32% hlut OR í Heitaveitu Suðurnesja. Var átakapunkturinn sá að verið væri að færa orkuauðlindir þjóðarinnar í hendur einkaaðila. Kaupin, sem voru reyndar aðeins hluti af harðri baráttu um eignarhald í HS, gengu engu að síður í gegn og á kanadíska félagið – í gegnum sænskt dótturfyrirtæki – enn meirihluta í HS.

Orkufyrirtæki á fjarskiptamarkaði

Á dögum R-listans varð fyrirtæki að nafni Lína.net að einu helsta deiluefninu milli meirihlutans og minnihlutans sem endurspeglaðist í stöðugum skeytasendingum milli Alfreðs Þorsteinssonar og Guðlaugs Þórs Þórðarsonar, sem þá var borgarfulltrúi Sjálfstæðisflokksins. Lína.net var fjarskiptafyrirtæki í eigu Orkuveitunnar sem átti að sjá um ljósleiðaravæðingu höfuðborgarsvæðisins en varð í augum sjálfstæðismanna, sem töldu fjarstæðu að fyrirtæki í eigu borgarinnar væri að standa í rekstri á samkeppnismarkaði, holdgervingur sóunar almannafjár. Lína.net rann síðar inn í Gagnaveitu Reykjavíkur sem er dótturfélag Orkuveitunnar.

„Aldrei litið á okkur sem poppstjörnur“

Bjarni Lárus Hall, söngvari hljómsveitarinnar Jeff Who? segir meðlimi sveitarinnar aldrei hafa ætlað sér að leggja Ísland að fótum sér, þrátt fyrir miklar vinsældir á sínum tíma, og að endurkomutónleikarnir um helgina séu alls ekki tilraun til að reyna að slá í gegn að nýju.

Hljómsveitin Jeff Who? var geysivinsæl fyrir áratug eða svo en hvarf síðan alfarið úr sviðsljósinu. Nú blása meðlimir hljómsveitarinnar til tvennra tónleika um helgina þar sem söngvarinn Bjarni Lárus Hall verður auðvitað í forgrunni. Hann segir þó markmiðið ekki vera að slá í gegn á ný. Þetta séu bara sex vinir að skemmta sér saman.
„Ekki spila, ég er í viðtali,“ er það fyrsta sem ég heyri Bjarna Lárus Hall segja þegar ég hringi í hann. Hann er sem sé staddur á æfingu með hljómsveitinni Jeff Who? þar sem verið er að fínpússa prógrammið fyrir tónleika helgarinnar.

Auk Bjarna skipa þeir Ásgeir Valur Flosason, Elís Pétursson, Valdimar Kristjónsson, Þormóður Dagsson og Þorbjörn Sigurðsson hljómsveitina en þeir hafa allir verið nánir vinir síðan á menntaskólaárunum í MR. Þeir slógu óvænt í gegn um miðjan síðasta áratug, gáfu út tvær plötur og áttu hittarann Barfly sem tröllreið útvarpsstöðvum mánuðum saman en síðan hvarf hljómsveitin nánast af yfirborði jarðar og hefur ekki heyrst síðan. Nú skella þeir á tvennum endurkomutónleikum, í kjölfar tónleika Írafárs og nýs lags frá Stjórninni. Hvað er í gangi, er endurkoma hljómsveita frá síðustu áratugum það heitasta í dag? „Ha, nei, við vorum nú ekkert að pæla í því,“ segir Bjarni gáttaður. „Mér hafði ekki dottið það í hug einu sinni að við fylgdum einhverju trendi.“
Er hugsunin kannski sú að nú eru þeir sem voru aðdáendur á sínum tíma orðnir miðaldra, stöndugt fólk sem hefur efni á að sækja tónleika? „Ja, það hjálpar auðvitað,“ svarar Bjarni og hlær. „Við erum samt alls ekki að þessu fyrir peninginn. Þetta var bara hugmynd sem kom upp hjá okkur Þorra trommara yfir bjórglasi þegar við fórum að ræða það að okkur langaði til að fara að spila aftur saman. Við drifum í því að tala við hina strákana og þeir voru allir til í slaginn, þannig að hér erum við í dag, sex vinir í góðum fíling að undirbúa tónleika.“

„Mér finnst að ef við viljum mótmæla framgöngu Ísraelsmanna eigi að banna þeim að taka þátt í keppninni, ekki sniðganga keppnina þótt hún sé haldin í þeirra landi. Það er einhver hræsni í því.“

Aldrei verið svona góðir
Spurður hvort meðlimir hljómsveitarinnar séu í jafngóðu formi og þeir voru á velmektardögunum fyrir rúmum áratug fullyrðir Bjarni að þeir séu ennþá betri. „Ég get svarið það,“ segir hann. „Ég held ég hafi aldrei heyrt okkur svona góða.“
Hafið þið allir verið í tónlistariðkun síðan þið hættuð? „Já, já, við höfum verið að gera alls konar hluti í tónlist,“ segir Bjarni. „Allir að spila hingað og þangað. Við höfum bara ekki spilað saman sem band undanfarin tíu ár. Ég og Valdimar höfum verið að spila dálítið saman og erum meira að segja búnir að taka upp plötu. En við höfum alltaf hist reglulega allir saman og rætt málin.“

Þannig að vináttan hefur haldist? Hvers vegna hættuð þið þá að spila saman á sínum tíma? „Eiginlega bara vegna þess að við vorum alltaf að spila fyrir sama fólkið og vorum orðnir svolítið leiðir á því,“ útskýrir Bjarni. „Við spiluðum bara saman af því að okkur þótti það svo ógeðslega gaman. Þannig að við hættum því bara þegar það hætti að vera gaman. Það var engin dramatík í kringum það.“

Sprenging í hlustendahópnum með Barfly
Voru það ekki svakaleg viðbrigði að fara úr því að vera hljómsveit skólafélaga í MR sem fannst bara gaman að spila saman í það að verða ein vinsælasta hljómsveit landsins? „Jú, þetta gerðist frekar hratt,“ viðurkennir Bjarni. „Við áttum tvö lög sem voru mikið spiluð á X-inu og svo þegar Barfly kom út varð sprenging í hlustendahópnum á nokkrum dögum.“
Bjarni vill alls ekki gangast við því að hinar skyndilegu vinsældir og nánast stöðugt tónleikahald hafi haft mikil áhrif á þá félaga. „Við ákváðum bara að gera þetta vel,“ segir hann. „Og ef einhver hringdi og bað okkur að spila sögðum við bara já. Við pældum ekki mikið í því að við værum vinsælir. Vorum bara band sem spilaði á tónleikum þegar við vorum beðnir um það. Við litum aldrei á okkur sem einhverjar poppstjörnur og það var aldrei markmiðið að leggja Ísland að fótum okkar. Lífið breyttist í rauninni voðalega lítið, nema bara að við spiluðum miklu oftar en við höfðum gert áður.“
Spurður hvort endurkomutónleikarnir um helgina séu upphafið á nýrri tilraun til að slá í gegn og hvort plata sé í undirbúningi segir Bjarni að þeir séu bara ekki farnir að hugsa svo langt. „Við erum ekkert að pæla langt fram í tímann,“ fullyrðir hann. „En það hefur verið ógeðslega gaman hjá okkur og gengið mjög vel, þannig að maður veit aldrei hvað gerist. Hins vegar er það alveg á hreinu að þetta er alls ekki meðvituð tilraun til að reyna að slá í gegn aftur, við ætlum bara að hafa gaman að þessu.“

Hræsni gagnvart Ísrael
Árið 2015 tók Bjarni þátt í undankeppni Eurovision með lag sitt Brotið gler og fékk tvo félaga sína úr Jeff Who? til að spila það með sér. Hann vill þó undirstrika að það sé mikill misskilningur að Jeff Who? hafi ætlað sér að taka þátt í Eurovision. Það myndi aldrei gerast. En hvað finnst honum um kröfuna um að sniðganga Eurovision í Ísrael á næsta ári vegna framgöngu Ísraela gagnvart Palestínumönnum? „Æ, ég veit það ekki,“ segir hann þreytulega. „Ég er ekki hlynntur því sem Ísrael er að gera gagnvart Palestínumönnum, en þetta er samt bara söngvakeppni og þeir taka þátt í henni. Mér finnst að ef við viljum mótmæla framgöngu Ísraelsmanna eigi að banna þeim að taka þátt í keppninni, ekki sniðganga keppnina þótt hún sé haldin í þeirra landi. Það er einhver hræsni í því.“
Ætlar þú að senda lag í undankeppnina fyrir næsta ár? „Ég bara veit það ekki,“ segir Bjarni hugsi. „Núna hugsa ég bara um æfinguna sem er að byrja og tónleikana um helgina. Ég fer ekkert að pæla í Eurovision fyrr en þessir tónleikarnir eru búnir. Þeir eru það sem skiptir máli núna. Allt annað kemur bara í ljós.“

Fyrri tónleikar Jeff Who? eru á Græna hattinum á Akureyri í kvöld, 21. september, og þeir seinni í Bæjarbíói í Hafnarfirði annað kvöld.

Mynd / Lilja Jóns

Sjálfsmorð móðurinnar stærsta áfallið

Jane Fonda rifjar upp móðurmissinn í nýrri heimildarmynd.

Í nýrri heimildarmynd frá HBO, Jane Fonda í fimm þáttum sem frumsýnd verður 24. september, opnar Jane Fonda sig um hvernig það hafi verið að alast upp hjá móður sem þjáðist af geðhvarfasýki og hvernig sjálfsmorð móðurinnar, þegar Jane var 12 ára, hafi átt stærstan þátt í því að móta sjálfsmynd hennar og upplifun af heiminum. Hún segist þó smátt og smátt hafa lært að skilja móður sína og fyrirgefa henni.

Móðir Jane hét Frances Ford Seymour og var kanadísk kona sem giftist Henry Fonda árið 1936. Saman eignuðust þau tvö börn, Jane og Peter. Fljótlega kom í ljós að Frances þjáðist að geðhvörfum og árið 1950, þegar Jane var 12 ára, framdi hún sjálfsmorð með því að skera sig á háls á geðsjúkrahúsinu þar sem hún dvaldi.

Dauði hennar var að sjálfsögðu mikið áfall fyrir Jane og ekki varð auðveldara að sætta sig við sjálfsmorð móðurinnar við það að rekast á umfjöllun um það í kvikmyndatímariti eftir að faðir hennar, Henry Fonda, hafði sagt Jane og bróður hennar að móðir þeirra hefði dáið eftir hjartaáfall.

„Sem barn kennir maður alltaf sjálfri sér um,“ útskýrði leikkonan í viðtali á people.com. „Vegna þess að barnið getur ekki ásakað fullorðnu manneskjuna sem það þarf á að halda til að komast af. Það tekur langan tíma að komast yfir sektarkenndina,“ sagði hún.

En eftir að hún varð fullorðin ákvað Jane að reyna að kynnast móður sinni, læra að skilja hana og tileinkaði henni sjálfsævisögu sína, My Life So Far sem kom út árið 2005. Hún segist hafa fengið aðgang að sjúkraskýrslum móður sinnar og loks fengið að kynnast henni og meta þessa konu.
„Ég þekkti hana aldrei,“ segir leikkonan í fyrrnefndu viðtali. „En ég er búin að fyrirgefa henni og mér.“

Hér fyrir neðan má skoða kynningarstikluna fyrir Jane Fonda í fimm þáttum, sem eins og áður sagði verður frumsýnd 24. september á HBO.

Kynntist eiginmanninum 14 ára gömul

Camilla Rut prýðir nýjustu forsíðu Vikunnar. Í einlægu viðtali dregur hún ekkert undan og talar um uppeldið í krossinum, óvænta athygli, taugaáfall sem hún fékk kjölfar brúðkaups síns og söngferilinn.

 

Camilla hefur með einlægni sinni og hispurslausri framkomu fangað huga og hjörtu fjölmargra Íslendinga. Á degi hverjum hleypir hún tugum þúsunda fylgjenda inn í líf sitt og sýnir bæði góðar og slæmar hliðar þess.

Í dag er Camilla í fullu starfi við það að sinna sínum miðlum, auk þess sem hún er að hefja feril í tónlist. „Dæmigerður dagur í mínu lífi er ekki til, ég er rosalega mikið út um allt að græja og gera,“ segir hún. „Ég sit á allskonar fundum og er stöðugt að vinna mig áfram. Það kemur aldrei sá dagur að ég sé ekki með neitt á dagskránni. Ég viðurkenni alveg að þetta hefur reynst mér frekar erfitt, þar sem ég er svo rosaleg rútínumanneskja. Ég vil helst hafa dagana mína eins, en þegar ég er ekki í fastri vinnu frá 9-5 gefur það augaleið að það gengur ekki alltaf upp. Svo á ég líka allskonar drauma sem ég er að vinna í að uppfylla og verkefni sem ég er að hrinda í framkvæmd, lífið kemur ekki til mín á silfurfati svo ég ætla að leggja hart að mér til þess að koma mér þangað sem ég vil fara.“

Kynntist eiginmanninum fjórtán ára

Camilla og eiginmaður hennar, Rafn Hlíðkvist, hafa verið saman í rúm tíu ár en hún var aðeins fjórtán ára þegar þau kynntust. „Við byrjuðum samband okkar mjög rólega, þar sem ég var svo ung. Rabbi er fimm árum eldri en ég og bar fullkomna virðingu fyrir því að ég væri að stíga mín fyrstu skref í þessu öllu saman. Við höfum gengið í gegnum svo margt saman á þessum tíu árum en einhvern veginn alltaf náð að halda okkar striki sem er nú aðallega honum og hans yfirvegun að þakka. Ég telst seint vera yfirveguð og róleg því eins og ég segi þá stjórnast ég af tilfinningum en hann hefur tök á mér sem enginn annar hefur,“ segir Camilla og bætir við að þau hafi verið óaðskiljanleg frá fyrstu kynnum. „Við smullum saman eins og flís við rass. Á meðan ég er algjört fiðrildi og tilfinningavera þá er hann rólegur og jarðbundinn, svo það má segja að hann dragi mig niður á jörðina á meðan ég dreg hann upp með mér, svo við hittumst oftast á miðri leið. Samband okkar hefur verið ferðalag og mikill lærdómur fyrir okkur bæði en í gegnum allt er þessi skilyrðislausa ást sem stendur svo sterk. Við trúlofuðum okkur um verslunarmannahelgina árið 2014 en vissum ekki þá að laumufarþegi var um borð. Sléttri viku eftir að við trúlofuðum okkur komumst við að því að ég væri ólétt af litla stráknum okkar – og þvílík hamingja.“

Sonur þeirra, Gabríel, kom svo í heiminn fyrir rúmum þremur árum. Camilla segir að eins klisjukennt og það hljómi, hafi sonurinn komið inn í líf þeirra á hárréttum tíma og breytt öllu til hins betra.

„Meðgangan og fæðingin var hryllingur en þetta litla barn hefur verið draumur síðan við fengum hann í hendurnar. Ég fékk rosalegt fæðingarþunglyndi og átti mjög erfitt fyrstu mánuðina. Í orlofinu hafði ég gaman af því að fylgjast með öðrum á samfélagsmiðlum og fljótlega kviknaði sú hugmynd að kannski hefði fólk áhuga á því sem ég hefði að segja. Ég opnaði aðganginn minn og var ekki með neitt sérstakt markmið. Ég einblíndi ekki á neitt afmarkað málefni, heldur var ég bara að spjalla um lífið og tilveruna. Meðal þess sem ég ræddi opinskátt var fæðingarþunglyndið. Markmið mitt var samt ekki beint að peppa aðra, heldur var ég að þessu aðallega til að peppa sjálfa mig og ég fann fljótt að þetta var hvati til þess að laga mitt eigið hugarfari. En boltinn fór fljótt að rúlla og fylgjendatalan jókst með hverjum degi. Að mörgu leyti var ég heppin, varðandi tímasetningu og annað en á þessum tíma var ekki mikið um það að fólk væri að opna sig og segja frá persónulegri lífsreynslu fyrir framan ókunnugt fólk á Snapchat.“

Þetta er aðeins brot úr ítarlegu viðtali við Camillu. Lestu viðtalið í heild sinni í nýjasta tölublaði Vikunnar.

/Texti: Margrét Björk Jónsdóttir
/Myndir: Aldís Pálsdóttir
/Förðun: Sara Dögg Johansen með YSL

Ed Sheeran hlakkar til að spila fyrir Íslendinga

Tónlistarmaðurinn heldur tónleika á Laugardalsvelli næsta sumar.

Ed Sheeran mun halda sína fyrstu tónleika á Íslandi þann 10. ágúst 2019. Í myndbandi sem kappinn birti á YouTube sendir hann Íslendingum kveðju og segist hlakka til að spila fyrir þá. Hann hafi reyndar komið til Íslands áður en aldrei spilað þar og hann sé mjög spenntur.

Tónleikarnir á Íslandi eru hluti af Evróputúr stjörnunnar sem mun standa yfir frá maí til ágúst 2019 og auk þess að spila fyrir okkur mun Ed halda tónleika í Frakklandi, Portúgal, Spáni, Ítalíu, Þýskalandi, Austurríki, Rúmeníu, Tékklandi, Lettlandi, Rússlandi, Finnlandi, Danmörku og Ungverjalandi og svo að sjálfsögðu í heimalandi sínu Bretlandi þar sem síðustu tónleikar túrsins verða.

Miðasala á tónleikana hefst klukkan 9 fimmtudaginn 27. september á TIX.is/Ed og í boði eru 30.000 miðar á mismunandi og misdýrum svæðum svallarins.

Í myndbandinu hér fyrir neðan er Ed brosandi út að eyrum á meðan hann sendir Íslendingum kveðju sína og ekki annað að sjá en að hann meini hvert orð.

Reyna að ná sambandi við Michelle Obama með myndbandi

|
|

Rúna Magnúsdóttir og Nick Haines gripu til nýstárlegra aðgerða við að ná sambandi við forsetafrúna fyrrverandi.

Rúna og Nick póstuðu myndbandinu á þriðjudaginn

„Við þurftum alveg að taka hugrekkispillu til að þora að gera þetta,“ segir Rúna Magnúsdóttir sem ásamt Nick Haines, félaga sínum í samtökunum The Change Makers, hefur póstað myndbandi þar sem þau freista þess að ná sambandi við Michelle Obama, fyrrverandi forsetafrú Bandaríkjanna, til að fá hana til að skrifa inngang að bók sem þau hafa skrifað.

„Okkur leið eins og við værum að afhjúpa okkur með því að gera þetta myndband,“ segir Rúna. „En um leið vorum við að stíga út fyrir boxið. Við höfðum ekki hugmynd um hvernig við ættum að ná sambandi við Michelle en svo fórum við að hugsa um kenninguna um að við séum öll tengd, það sem kallast á ensku „Six degrees of separation“, og samkvæmt henni ætti að vera einhver sem þekkir okkur sem þekkir einhvern sem þekkir Michelle svo við ákváðum að gefa þessu séns og láta reyna á þessa kenningu.“

Rúna og Nick póstuðu myndbandinu á þriðjudaginn, en hafa enn ekki fengið viðbrögð frá Michelle. Rúna segist þó ekki vera búin að gefa upp vonina. „Það má alveg segja að í hvert sinn sem einhver deilir myndbandinu á samfélagsmiðlum þá opnist ný leið til að ná til hennar. Svo við sjáum bara til. Kannski svarar hún, kannski ekki.“

Spurð hvaða félagsskapur The Change Makers sé segir Rúna það vera hóp af fólki víðsvegar um heim sem hafi sameinast um það að hvetja fólk til að stíga út fyrir boxin sem samfélagið setji fólk stöðugt í. Bókin sem hún og Nick voru að skrifa fjalli einmitt um það hvernig þessi box hamli okkur sem manneskjum.
„No more Boxes hreyfingin sprettur af því að við í The Change Makers vorum beðin um að taka þátt í pallborðsumræðum hjá Sameinuðu þjóðunum í mars síðastliðnum. Þar var okkar hlutverk að ræða hvað hægt væri að gera til að ná þessum 17 heimsmarkmiðum Sameinuðu þjóðanna fyrir 2030. Þessi markmið lúta að sjálfbærni, jafnrétti kynjanna og þar fram eftir götunum. Niðurstaða okkar var sú að það sem fyrst og fremst hamlaði allri þróun væri þessi eilífa árátta okkar mannfólksins að setja okkur sjálf og alla aðra í fyrirframákveðin box, hvort sem það snýr að kyni, kynþætti, bakgrunni, trúarbrögðum eða einhverju öðru. Það er alltaf verið að troða fólki í einhver box og afleiðingin er sú að við nýtum einungis brotabrot af þeim hæfileikum, möguleikum og eiginleikum sem hver manneskja kemur með á þessa jörð. Það bara gengur ekki lengur. Þannig að við ákváðum að vekja fólk til umhugsunar um þessar hömlur sem við setjum á okkur og hvert annað og vekja fólk til vitundar um það hvað það getur gert til þess að sú breyting sem við viljum sjá í heiminum í dag geti átt sér stað,“ segir Rúna og það er ljóst að þetta málefni er henni hjartans mál.

Þú getur lagt þitt að mörkum við að hjálpa Rúnu og Nick að ná sambandi við forsetafrúna með því að kíkja á myndbandið og ekki sakar að endurpósta því á samfélagsmiðlunum. Því eins og Rúna segir; það er aldrei að vita nema athygli Michelle vakni ef nógu margir pósta því.

Þeir sem vilja fylgjast með því hvernig Rúnu og Nick gengur að ná sambandi við frúna, eða bara kynna sér hvað þau eru að gera geta svo kíkt á síðuna þeirra.

https://www.nomoreboxesmovement.com/

Karlar sem finnst þeim ógnað beita kynferðislegri áreitni

Í nýju tölublaði Mannlífs er fjallað um veggina sem konur lenda á þegar þær kvarta undan kynferðislegu áreiti á vinnustað.

 

Margrét Erla Maack, sem hefur starfað sem plötusnúður og skemmtikraftur árum saman, hefur ekki farið varhluta af þeirri kynferðislegu áreitni sem viðgengst í þeim bransa. Sonja Ýr Þorbergsdóttir, lögfræðingur BSRB, segir mjög algengt að ekki sé brugðist við kvörtunum um kynferðislega áreitni innan vinnustaða, eða að það sé brugðist við með röngum hætti.

Margréti og Sonju kemur ekki á óvart hvernig stjórnendur Orkuveitu Reykjavíkur hafa tekið á kynferðislegri áreitni innan fyrirtæksins. Þær segja að í kjölfar #metoo byltingarinnar séu þess dæmi að ástandið hafi sums staðar versnað og áreitnin aukist. Á sumum vinnustöðum nýti tilteknir karlar umræðuna til að gera enn minna úr konum með niðrandi athugasemdum og hegðun til þess að ná aftur sinni valdastöðu og tryggja hana. Margrét Erla og Sonja Ýr eru í viðtali í nýjasta tölublaði Mannlífs sem kemur út á morgun.

Opnað fyrir innsendingar á lögum í Söngvakeppnina

Leita til reyndra lagahöfunda til að semja helming laganna.

RÚV hefur nú opnað fyrir innsendingar á lögum í Söngvakeppnina 2019. Sú breyting verður á vali laga í keppnina að leitað verður til reyndra og vinsælla lagahöfunda til að semja hluta laganna en auk þess verður valið úr innsendum lögum eins og síðustu ár. Alls munu tíu lög taka þátt í keppninni sem haldin verður í febrúar og mars á næsta ári.

Danshöfundurinn Lee Proud hefur verið ráðinn sem listrænn stjórnandi keppninnar en Samúel J. Samúelsson verður tónlistarstjóri eins og síðast.

Á vef RÚV er haft eftir Ragnhildi Steinunni Jónsdóttur, aðstoðardagskrárstjóra RÚV sem situr í framkvæmdastjórn keppninnar, að hún bindi vonir við að með nýju fyrirkomulagi verði lögin í keppninni fjölbreyttari og sterkari. „Keppnin stækkar frá ári til árs og við höfum verið gríðarlega ánægð með þróun hennar. Í ár ákváðum við að breyta fyrirkomulaginu og við teljum að það skili fjölbreyttari, skemmtilegri og enn betri lögum,” segir hún.

Lagahöfundar geta sent lög í Söngvakeppnina 2019 á vefinn, songvakeppnin.is. Umsóknarfrestur rennur út mánudaginn 22. október. Í byrjun janúar verður tilkynnt hvaða lög taka þátt í þessum stærsta sjónvarpsviðburði ársins. Í tilkynningu frá RÚV eru allir laga- og textahöfunda, sem vilja hvattir til að taka þátt í Söngvakeppninni 2019 og halda áfram að móta tónlistarsögu Íslands með því að senda inn sitt lag. Höfundum er sérstaklega bent á að Söngvakeppnin snýst um fjölbreytni. Allar tegundir tónlistar eru boðnar velkomnar.

Keppnin er, eins og allir vita, forkeppni Íslands fyrir Eurovision og mun sigurvegarinn verða fulltrúi Íslands á sviðinu í Tel Aviv næsta vor.

Fagurfræðilega fullkomin samsuða í 100 ára timburhúsi

Inga Elín myndlistarmaður og Þórarinn gítarleikari heimsótt.

Það eru ansi mörg ár síðan því var fyrst hvíslað að blaðakonu Húsa og híbýla að hönnuðurinn og myndlistamaðurinn Inga Elín Kristinsdóttir hefði einstaklega næmt auga fyrir fallegri hönnun og sérstakt lag á að hnjóta um heimsþekktar hönnunarperlur á nytjamörkuðum hér heima sem og erlendis. Heimili Ingu Elínar og eiginmanns hennar, Þórarins Sigurbergssonar gítarleikara og leiðsögumanns, við Laufásveginn í Reykjavík, er sannkallaður ævintýraheimur og einstaklega vel heppnað dæmi um hvernig heimili sem nostrað er við af ástúð getur fangað fullkomnlega persónuleika þeirra sem þar búa.

Hannar verðlaunagripi
Inga Elín lagði stund á myndlist við Myndlistaskóla Reykjavíkur og var aðeins tvítug farin að kenna myndlist að loknu kennaranámi frá Myndlista- og handíðaskóla Íslands. Þremur árum síðar lá leið hennar í framhaldsnám til Kaupmannahafnar í Skolen for Brugskunst (í dag Danmarks Designskole), þaðan sem hún útskrifaðist fimm árum síðar frá tveimur deildum skólans, keramík- og glerlistadeild. Inga Elín hefur verið áberandi í íslensku listalífi allar götur síðan og skipað sér sess meðal okkar fremstu listamanna. Í um áratug rak hún á Skólavörðustíg 5

09. tbl. 2018, HH1808082010, Inga Elín Kristinsdóttir, Innlit, Laufásvegur 43

sitt eigið gallerí en er í dag í hópi átta listakvenna sem samanstanda að keramíkgalleríinu Kaolín sem er til húsa á sama stað. Fyrir utan fjölmargar einkasýningar innan lands og utan hefur Inga Elín tekið þátt í ótal samsýningum víða um heim, meðal annars í Bretlandi og Skandinavíu og hlotið hinar ýmsu viðurkenningar í gegnum tíðina. Inga Elín hefur hannað ýmsa muni fyrir Kokkalandslið Íslands og allt frá árinu 2001 Ístóninn, verðlaunagrip Íslensku tónlistarverðlaunanna. Þá er borðbúnað úr hennar smiðju að finna á nokkrum af rómuðustu veitingahúsum landsins og athygli vakti á sínum tíma þegar breski glysrokkarinn og listaverkasafnarinn Elton John festi kaup á tveimur verkum hennar í frægri heimsókn til landsins árið 2007.

„Ég daðraði eitthvað við naumhyggjuna á tímabili en var fljót að finna að hún var ekki alveg minn tebolli.“

Smávinir í postulíni og steinsteypu
Líkt og margir aðrir íslenskir hönnuðir og listamenn í gegnum tíðina, hefur Inga Elín sótt sinn helsta innblástur til íslenskrar náttúru. Í verkum sínum hefur hún stundum fléttað saman ólíkum og óvæntu hráefni en gott dæmi um það er sería skúlptúrverka sem hún kallar Smávinir fagrir en þar mætast fíngert og brothætt postulínið og gróf steinsteypan. Þessi styrkleiki Ingu Elínar sem listamanns skín einstaklega vel í gegn á heimilinu.

Eltist ekki við tískubylgjur
Dásamlega litrík kaótík einkennir heimili þeirra Ingu Elínar og Þórarins, hér sér varla í auðan blett og endalaust eitthvað áhugavert sem fangar augað. Inga Elín byrjaði að safna list og hönnun markvisst strax sem unglingur og var þá þegar búin að móta sér þann persónulega stíl sem fylgt hefur henni allar götur síðan. „Ég hef alltaf verið safnari í mér og hef í gegnum tíðina safnað málverkum, glerlist, keramíki og skúlptúrum og þá iðulega verkum íslenskra listamanna,“ segir Inga Elín þar sem hún lóðsar okkur um litríkt heimilið.

„Ég hef alltaf leitast við að fjárfesta í góðri og vandaðri hönnun og eiga þá hluti ævina út í stað þess að elta einhverjar tímabundnar tískubylgur. Dönsk og ítölsk hönnun frá tímabilinu 1950-´70 hefur alltaf höfðað sérstaklega til mín. Ég daðraði eitthvað við naumhyggjuna á tímabili en var fljót að finna að hún var ekki alveg minn tebolli. Ég hef alltaf haft einstaklega gaman af því að fara á nytjamarkaði, meðal annars í Kaupmannahöfn og Berlín en þar eru margir góðir antíkmarkaðir og hægt að finna mikið úrval fallegra og áhugaverðra muna fyrir heimilið,“ segir Inga Elín sem er einmitt ein þeirra sem standa á bak við Portið, eina áhugaverðustu verslun landsins en þar er jafnan að finna mýgrút af sérvöldum antík- og vintage-munum, húsgögnum og fatnaði.

Fleiri myndir af þessu fallega heimili má sjá í septemberblaði Húsa og híbýla sem fæst á sölustöðum til 20. september.

Texti / Gerður Harðardóttir
Ljósmyndari / Hákon Davíð Björnsson

Typpi óskast!

Sigga Dögg auglýsir eftir typpi í fræðslumyndband.

Sigga Dögg kynfræðingur auglýsir á Facebook-síðu sinni eftir sjálfboðaliða sem vill taka þátt í gerð fræðslumyndbands um smokkanotkun. Nánar tiltekið er það einungis typpi viðkomandi sem hún hefur áhuga á að nota í myndbandinu og hún tekur fram að ekki muni sjást í andlitið, heldur einungis svæðið frá nafla að lærum og svo hendurnar.

Ekki verður greitt fyrir þátttöku í myndbandinu heldur fer ágóðinn til UNICEF og UN Women.

Kynfræðingurinn lýkur auglýsingunni með því að ítreka – í upphafsstöfum – að hún sé ekki að biðja um að henni séu sendar typpamyndir.

Auglýsingu Siggu Daggar má skoða hér að neðan.

https://www.facebook.com/siggadogg.is/

Mynd / Saga Sig

Justin Bieber og Hailey Baldwin eru víst gift

Alec Baldwin staðfestir orðróminn um leynilegt brúðkaup poppstjörnunnar.

Óstaðfestar fregnir af því að poppstjarnan Justin Bieber hafi kvænst fyrirsætunni Hailey Baldwin í laumi síðastliðinn fimmtudag hafa verið staðfestar. Það var enginn annar en föðurbróðir brúðarinnar, stórleikarinn Alec Baldwin, sem staðfesti þetta í viðtali á rauða dreglinum á Emmy-verðlaunahátíðinni á mánudagskvöldið.

„Þau laumuðust bara í burtu og giftu sig,“ sagði leikarinn í stuttu spjalli við sjónvarpsfólk á rauða dreglinum. Hann sagðist reyndar bara hafa hitt Justin einu sinni en að hann og Hailey, bróðurdóttir hans, skiptust á sms-um annað slagið, og að hann vissi fyrir víst að fréttirnar af giftingu þeirra væru sannar.

People Magazine birti fyrstu fréttina af hjónavígslunni á föstudaginn, eftir að skötuhjúin sáust fara inn í dómshús þar sem giftingar fara fram. Síðan hafa fjölmiðlar dregið fréttina í efa, ekki síst eftir að Hailey tísti því á Twitter að hún væri ekki gift enn. Fyrirsætan eyddi síðan færslunni og vinur brúðhjónanna sagði í samtali við People Magazine að það sem Hailey hefði meint væri að borgaraleg hjónavígsla væri ekki brúðkaup. „Þau eru gift samkvæmt lögum,“ sagði heimildarmaðurinn. „En brúðkaup er þegar tvær manneskjur sverja eið fyrir framan Guð og fólkið sitt.“ Hann klikkti síðan út með því að Justin og Hailey ætluðu að halda veglegt kirkjubrúðkaup á næstunni til að vinir og fjölskylda gætu fagnað með þeim. Við bíðum spennt.

Óásættanlegt að karlar áreiti konur án refsingar

Kvenréttindafélag Íslands hefur sent frá sér ályktun í ljósi frétta liðinnar viku af kynferðislegri áreitni yfirmanna hjá Orkuveitunni.

„Það er óásættanlegt að konur séu ekki óhultar, hvorki inni á heimilum né á vinnustöðum. Það er óásættanlegt að konur hrökklist úr starfi vegna áreitni og ofbeldis sem þær eru beittar á opinberum vettvangi. Það er óásættanlegt að karlar geti áreitt konur og beitt þær ofbeldi, án hindrana, eftirmála og án refsingar,“ segir í ályktun sem Kvenréttindafélag Íslands hefur sent frá sér í ljósi frétta liðinnar viku af kynferðislegri áreitni yfirmanna hjá Orkuveitunni.

Fréttaflutningurinn hefur meðal annars snúist um það að framkvæmdastjóranum Bjarna Má Júlíussyni var í liðinni viku vikið úr starfi vegna kynferðislegrar áreitni gagnvart starfsfólki og tveir aðrir hátt settir starfsmenn fyrirtækisins hafa verið sakaðir um áreitni í starfi eða kynferðisbrot áður en störf hófust.

Kvenréttindafélagið ítrekar í ályktuninni að ekki sé nóg að vinnustaðir samþykki metnaðarfullar jafnréttisáætlanir og innleiði staðla og gæðavottanir heldur sé nauðsynlegt að fylgja áætlunum með virkum hætti.

„Fyrirtækin hafa þótt vera í fararbroddi í jafnréttismálum á Íslandi og forsvarsmenn þeirra oft verið talsmenn þess mikla árangurs sem náðst hefur í jafnréttismálum á Íslandi. Árið 2015 var OR veitt Hvatningarverðlaun jafnréttismála og við það tilefni sagði forstjórinn að það væri “ekki nóg að aðhyllast jafnrétti, heldur þarf að fremja það”. Nú ríður á að fyrirtækin bregðist ekki háleitum hugsjónum sínum heldur vinni markvisst að því að uppræta kynferðislega áreitni og ofbeldi á vinnustað og gæti þess að starfsfólk allt taki fullan þátt í því starfi,“ segir í ályktuninni.

Ályktuninni lýkur á hvatningu til stjórnenda fyrirtækja um að axla ábyrgð og skapa starfsumhverfi þar sem fólk sé óhult í vinnu. „Við verðum að gera grundvallarbyltingu á samfélagi okkar, þessu samfélagi þar sem ofbeldi og áreitni hefur þrifist í allskonar myndum. Það á ekki að veita neina afslætti í þessum málum.“ segir Kvenréttindafélag Íslands.

Bláskel í stuttu máli

Bláskel er einnig þekkt undir heitunum krákuskel eða kræklingur. Vitað er að maðurinn hefur borðað bláskel í þúsundir ára.

Bláskel er sælindýr í fallegri svarblárri samlokuskel sem festir sig oft með spunaþráðum við steina og reipi. Elsta aðferðin við ræktun á bláskel eru staurar sem festir voru í grunnu sjávarvatni og þar óx kræklingurinn en víða er hann ræktaður á reipum sem hanga niður úr stórum flekum. Kræklingur er hluti af stórri ætt sælindýra og fyrirfinnast bæði í ferskvatni og sjávarvatni en þó er kræklingur sem kemur úr sjávarvatni notaður til manneldis þar sem hinn þykir ekki lystugur.

Belgar, Hollendingar og Frakkar borða mikið af bláskel og þar er hún oft borin fram elduð í soði með frönskum kartöflum og þekkist sem rétturinn moules frites. Einnig er bláskelin borin fram með góðu brauði sem notað er til að klára allt soðið. Hollendingar eru einnig þekktir fyrir að djúpsteikja bláskelina og selja sem skyndibita.

Margir veigra sér við að elda bláskel en sé ákveðnum reglum fylgt eftir við verkun og eldun þá er hún leikur einn. Bláskel er léttur og skemmtilegur sumarmatur og afar mikilvægt er að nostra svolítið við soðið sem skelfiskurinn er eldaður upp úr. Oft er hvítvín eða bjór notað í soðið og því betra að vera með gæðavín og bjór til að tryggja að soðið verði sem allra best.

Margar fiskbúðir selja ferska bláskel sem ræktuð er á Íslandi. Gott er að vera í sambandi við sína fiskbúð til að athuga hvenær bláskelin er keyrð út því best er að fá hana sem ferskasta og svo selst hún yfirleitt mjög hratt og því betra að vera undirbúinn frekar en að koma að tómu borðinu.

Áður en bláskelin er elduð þarf að verka hana. Gott er að nota lítinn bursta og skrúbba kræklingana undir rennandi köldu vatni til að losa þá við hreistur og önnur óhreinindi sem setjast utan á skeljarnar. Stundum finnast lítil skegg á skeljunum sem hægt er að tosa af með fingrunum eða skrapa af með litlum hníf.
Brotnum skeljum skal henda og ef bláskelin er opin skal banka henni ákveðið við eldhúsbekkinn og sjá hvort hún loki sér. Loki hún sér ekki er kræklingurinn líklegast dáinn og því best að fleygja skelinni.
Mjög mikilvægt er að láta bláskelina ekki liggja í bleyti þar sem þeir lifa í saltvatni og kafna í hreinu kranavatninu.

Þegar bláskelin er elduð þarf að nota góðan pott með loki því hún þarf að gufusjóða í soðinu í nokkrar mín. Gott er að taka pottinn og hrista hann til einu sinni til tvisvar í eldunarferlinu til að hann eldist jafnt. Ef potturinn er þungur er líka hægt að taka lokið af og hræra með trésleif í staðinn.
Kræklingurinn er tilbúinn þegar langflestar skeljarnar hafa opnast. Þær skeljar sem enn eru harðlokaðar er best að henda.

Mynd / Heiðdís Guðbjörg Gunnarsdóttir

 

Victoria Beckham tók Spice Girls dans í tískuvikunni í London

Sýndi að Snobbkryddið hefur engu gleymt.

Victoria Beckham brast í dans í samkvæmi sem haldið var henni til heiðurs eftir sýningu hennar á tískuvikunni í London í gær. Victoria, sem bar viðurnefnið Snobbkryddið á mektarárum Spice Girls, skellti sér í dansinn sem þær stöllur notuðu í myndbandinu við lagið geysivinsæla Spice Up Your Life árið 1997, við gríðarleg fagnaðarlæti viðstaddra.

Victoria hefur nú rekið eigið framleiðslufyrirtæki þar sem hún hannar allan klæðnað sjálf í tíu ár og fagnaði afmælinu með því að taka í fyrsta sinn þátt í tískuvikunni í heimaborg sinni London. Eftir sýninguna, sem hlaut góðar undirtektir, var haldið samkvæmi henni til heiðurs og þar gerði hún sér, eins og áður sagði, lítið fyrir, og dansaði fyrir viðstadda.

Victoria póstaði sjálf myndbandi af uppákomunni á Instagram-reikningi sínum og eins og sjá má þá hefur þessi 44 ára fyrrum poppstjarna nákvæmlega engu gleymt. Er jafnvel betri dansari en hún var fyrir tuttugu árum. Kíkið á myndbandið og hrífist með í gleðinni.

https://www.youtube.com/watch?v=BhH8d84aaPw&feature=youtu.be

Dreymir um lítinn fiskibát með stórri vél

Bárður Hreinn Tryggvason er sölustjóri hjá Gimli fasteignasölu og er tveggja barna faðir. Hann á þau Silju Rún sem er tvítug og er að ljúka stúdentsprófi um áramótin og Tryggva Snæ, fimmtán ára nemanda við Sjálandsskóla. Kærasta Bárðar er Lilja Hildur Hannesdóttir hjúkrunarfræðingur og er verkefnisstjóri á menntasviði Landspítalans. Hún er einnig með meistarapróf í mannauðsstjórnun. Hildur á þrjú börn, á aldrinum átta ára, sextán ára og tuttugu og fimm ára, og eitt barnabarn. Bárður og Hildur búa hvort í sínu lagi eins og er, bæði í Kópavogi.

Bárður Tryggvason, sölustjóri hjá Gimli fasteignasölu.

Hvað heillar þig mest við starfið? „Það sem mér finnst skemmtilegast við þessa vinnu eru samskipti við fólkið sem stendur í fasteignaviðskiptum á hverjum tíma. Í flestum tilvikum er um að ræða stærstu samninga þess á lífsleiðinni. Mestu skuldbindingarnar sem eru lánin sem það tekur og þá er í flestum tilvikum um að ræða lánagjörning í fjörutíu ár sem er um það bil hálf mannsævi, það segir allt sem segja þarf um hversu stór þessi ákvörðun er að að taka lán og kaupa íbúð. Það er svo gefandi þegar vel tekst til og allt gengur upp og allir ganga ánægðir og sáttir frá borði. Ég hef alla tíð tekið starfið mikið inn á mig, ef svo má að orði komast. Síðan eru það vinnufélagarnir og umhverfið, að geta nýtt keppnisskapið sem er mikið hjá mér, að ég ætla og veit að ég hef, þó að ég segi sjálfur frá. En mesta ánægjan eru ánægðir viðskiptavinir.“

Geturðu lýst hefðbundnum vinnudegi hjá þér? „Hefðbundinn vinnudagur hjá mér er frá klukkan 9.00 – 17.00 á daginn og oft lengur, en fyrstu tuttugu og fimm árin gæti ég trúað að þetta hafi verið ekki undir 60-70 tímum á viku. Í dag er þetta öðruvísi, ég fer þrisvar í viku í fótbolta í hádeginu í 1,5 klst, en það hef ég gert síðustu tíu árin og eru ómissandi fyrir mig, því að þetta útheimtir oft mikið álag.“

Hvað finnst þér gera heimili að heimili? „Fallega samsett húsgögn og hlutir sem passa saman og umfram allt eru þægileg. Svo ekki sé minnst á fallega myndlist á veggjum. Ég hef safnað að mér fallegri myndlist undanfarin ár og hef komið inn á glæsileg heimili en það er eitthvað sem vantar og það er eitthvað fallegt á veggina. En það er bara mín skoðun.“

Geturðu lýst þínum stíl? „Minn stíll er einfaldleikinn, ekki vera með of mikið af húsgögnum/hlutum og láta hlutina passa saman og mynda fallegt og notalegt heimili.“

Áttu þinn uppáhaldsarkitekt? „Pálmar Kristmundsson er minn uppáhalds, hann hefur teiknað falleg hús og byggingar sem ég hef hrifist af í gegnum tíðina.“

Áttu þinn uppáhaldshönnuð? „Gæti nefnt Alvar Aalto hinn finnska sem var bæði húsgagnahönnuður og arkitekt, svo ég nefni nú einhvern.“

Hvað hefur þig alltaf dreymt um að eignast en ekki eignast hingað til? „Það er lítill fiskibátur með stórri vél og kemst hratt, en það er draumurinn einhvern tímann. Ég er frá Hellissandi og uppalinn þar við sjóinn. Var á skaki þrjú sumur með mági mínum. En það sem skýrir það er að þegar að þú ert kominn út á sjó í góðu veðri, þá hverfur allt sem að heitir stress. Þú ferð að slaka á og gleymir þér.“

Uppáhaldsliturinn þinn? „Uppáhaldsliturinn minn er brúnn.“

Hvar líður þér best? „Ég held að ég geti sagt að mér líði best með fjölskyldunni og að atast með henni í einhverju. Síðan að fara vestur á Snæfellsnes á æskuslóðirnar í fallegu veðri. Fara í fótbolta með stákunum en ég spila með Luns United í hádeginu og Svíkingum vinum mínum á mánudögum. Það er svo margt sem að ég gæti talið upp.“

Hvað heillar þig mest við haustið? Er eitthvað sem þú vilt bæta við í garðinn eða inn á heimilið þegar haustið gengur í garð?
„Fallegur dagur að hausti, kaldur og sólin á lofti á sér engan sinn líka, síðan haustlitirnir þegar að þeir birtast í sínu fegursta formi. Vantar heita pottinn.“

Svalasti veitingastaðurinn á Íslandi í dag? „Veit ekki, en gæti nefnt Bautann á Akureyri, alltaf sérstök stemning að borða þar. Var á Akureyri í menntaskóla í fjóra vetur.“

Heillar einhver byggingarstíll þig meira en annar? „Já, það eru lítil falleg einbýlishús í grónum hverfum eins og hægt er að sjá til dæmis fyrir norðan á Akureyri. Hvaða stíll það er, veit ég ekki.“

Að lifa lífinu lifandi er að … „vera meðvitaður um stað og stund og láta ekkert fara í taugarnar á sér, lífið er svo stutt. Halda síðan vel utan um fjölskylduna og vinina, ekkert gefur lífinu meira gildi en það að hafa gott fólk í kringum sig.“

Mynd / Hákon Davíð Björnsson

 

Brautryðjendur á íslenskum netmarkaði

Skanva.is er nýleg netverslun í eigu Skanva Group sem er fyrirtæki í Danmörku sem á einnig netverslanir skanva.no í Noregi og Vinduesgrossisten.dk í Danmörku. Hanna G. Guðmundsdóttir Overby er svæðisstjóri á Íslandi fyrir Skanva.is og við heimsóttum hana á dögunum og fengum innsýn í hvað fyrirtækið hefur upp á að bjóða.

Hanna G. Guðmundsdóttir Overby er svæðisstjóri á Íslandi fyrir Skanva.is.

„Skanva.is er brautryðjandi á íslenskum markaði, þar sem við erum fyrsta fyrirtækið sem býður upp á netverslun fyrir glugga og hurðir. Það hefur aldrei verið auðveldara fyrir Íslendinga að kaupa glugga og hurðir, hvar og hvenær sem er. Verðið er líka óþekkt á Íslandi, en ástæðan er sú að við getum hagrætt mikið í rekstrinum þegar viðskiptavinirnir ganga frá pöntuninni sjálfir á Netinu og þar með skilar sparnaðurinn sér beint til viðskiptavinarins. Einnig er ástæðan fyrir því að við getum boðið lægra verð sú að viðskiptavinirnir kaupa beint af framleiðanda og sleppa því einum millilið í kaupferlinu. Við erum með sýningarsal úti á Granda í Reykjavík, þar sem hægt er að koma og sjá sýnishorn af vörunum okkar.“

Brynjar Valþórsson er sölumaður hjá Skanva.is í sýningarsalnum úti á Granda og með honum á myndinni er Jørgen Tranholm, einn af eigendum Skanva.is.

Hvar fer framleiðslan fram? „Við framleiðum okkar eigin glugga og hurðir í verksmiðjunni okkar í Hvíta-Rússlandi. Þar erum við með danskan framleiðslustjóra sem sér um að gæðin standist þær kröfur sem gerðar eru. Það er hægt að velja um tré, tré/ál og plast í glugga og hurðir. Allar vörur frá okkur eru með tíu ára ábyrgð. Við erum ekki með neinn lager heldur eru allar pantanir sérsmíðaðar og framleiddar eftir málum og óskum viðskiptavina okkar.“

Þjónusta og vörur Skanva hafa hlotið mjög góðar móttökur á Íslandi. „Við höfum fengið mjög jákvæðar móttökur á Íslandi, við höfum átt erfitt með að svara öllum fyrirspurnum innan þokkalegs tímaramma þar sem fyrirspurnirnar hafa verið svo margar. Við höfum líka fundið fyrir efasemdum um fyrirtækið, til dæmis á samfélagsmiðlum, þar sem fólki finnst verðið of gott til að vera satt. Við skiljum það vel þar sem við erum með áður óþekkt verð og það tekur alltaf tíma fyrir markaðinn að kynnast nýjum spilurum.“

Stúdíó Birtíngur í samstarfi við Skanva.

Fjölbreytt vöruúrval er af gluggum, hurðum og fylgihlutum í sýningarsal Skanva.is úti á Granda, eins og sjá má á myndunum hér fyrir neðan.

 

Hágæðavörur fyrir útivistina, líkamsræktina, fjallgöngur og ferðalög

Verslunin og heildsalan Sportís hefur haslað sér völl hér á landi og þykir hafa afar gott vöruúrval og sérlega góða þjónustu. Við heimsóttum Skúla J. Björnsson í Mörkina og kynntum okkur tilurð fyrirtækisins og það sem Sportís hefur upp á að bjóða. En Skúli annast daglegan rekstur fyrirtækins og hefur unnið í þessum bransa frá árinu 1983 en áður var hann meðal annars forstöðumaður félagsmiðstöðvar.

Skúli J. Björnsson og Anna S. Garðarsdóttir stofnuðu fyrirtækið Sportís árið 1983. Hér er Skúli með dóttur sinni Sigrúnu Kristínu sem er verkefnisstjóri hjá Sportís.

Segðu okkur aðeins frá tilurð verslunarinnar Sportís og helstu áherslum ykkar í vöruúrvali og þjónustu? „Sportís ehf var stofnað af mér og konu minni, Önnu S. Garðarsdóttur, í febrúar árið 1983 og markmiðið var að reka heildverslun með vandaðar vörur á sviði íþróttafatnaðar, eingöngu góð vörumerki. Við höfum byggt upp fjölda þekktra vörumerkja á þessum tíma.“

Getur þú sagt okkur meira um vöruúrvalið? „Í verslun okkar í Mörkinni 6 erum við með íþróttaskó og starfsfólk okkar er þrautþjálfað í að veita leiðbeiningar í vali á hvers kyns íþróttaskóm. Við bjóðum upp á mikið úrval af hlaupaskóm, utanvegaskóm og innanhússskóm fyrir alla. Einnig erum við með útivistar- og vetrarfatnað og margt fleira. Við erum með mikið af CASALL-æfingafatnaði fyrir konur, það er merki sem allar konur elska. Casall er þekkt fyrir gæði og endingu.
Kari Traa er nýtt norskt merki – heitir eftir skíðadrottningu og margföldum ólympíugullhafa. Það merki býður mjög öfluga línu af sportfatnaði fyrir konur og hefur vakið mikla athygli fyrir merino-ullarlínuna sem er litrík og flott. Ennfremur erum við með mikið úrval af REIMA-barnafatnaðnum sem er finnsk gæðavara með mikið úrval af vetrargöllum, lambhúshettum og öllum þeim fatnaði sem fær börnin til að vilja vera úti.“

Skúli nefnir einnig að þau séu með Canada Goose-merkið sem er þekkt um allan heim fyrir hlýju, vönduðu og fallegu vetrarúlpurnar. „Canada Goose er mjög vinsælt merki hjá Sportís og við erum með landsins mesta úrval af þessum frábæru úlpum. Nýjar og spennandi úlpur voru að koma og nú er hægt að fara að njóta vetrarins.“

Hvert er ykkar aðalsmerki í vörutegundum? „Öll okkar merki eru aðalsmerki – en til að nefna einhver má nefna Canada Goose sem er heimsfrægt og hefur verið framleitt frá árinu 1957 og nýtur mikilla vinsælda. Finnska barnafatamerkið Reima sem var stofnað árið 1944. Asics er toppurinn í hlaupaskóm og er fyrsta val alvöruhlaupara. Asics er japanskt fyrirtæki stofnað árið 1949. Við seljum öll þessi merki og fleiri einnig í heildsölu til valinna endursöluaðila um land allt.“

Leggið þið mikið upp úr að vera með hágæða útivistarfatnað og vörur fyrir þá sem stunda útivist? „Við seljum vörur fyrir útivist, göngur, ræktina, ferðalög og fleira.“

Mynd / Hallur Karlsson

Stúdíó Birtíngur í samstarfi við Sportís. 

 

Blóðappelsínu-spritz

|
|

Frískandi kokteill þar sem blandaður er saman nýkreistur blóðappelsínusafi, prosecco og kryddaður sætur vermouth. Ef blóðappelsínur eru ekki fáanlegur má nota bleikan greipaldinsafa í staðinn.

Blóðappelsínu-spritz
fyrir 1 glas
30 ml sætur vermouth
30 ml blóðappelsínusafi
Prosecco

Setjið klaka í glas eða belgmikið vínglas og hellið sætum vermouth og blóðappelsínusafa ofan í. Fyllið með Prosecco og skreytið með appelsínusneið.

Mynd / Aldís Pálsdóttir
Stílisti / Hanna Ingibjörg Arnarsdóttir

Þorskur í sítrónu- og smjörsósu

2. tbl. 2018
Mynd / Heiðdís Guðbjörg

Fljótlegur og bragðgóður réttur sem er tilvalinn fyrir önnum kafið fólk.

Við könnumst flest við þá tímapressu sem hlýst af því að koma sér heim eftir langan vinnudag og þurfa að koma mat á borðið fyrir svangt heimilisfólk á skikkanlegum tíma. Þá getur verið freistandi að kaupa skyndibita eða eitthvað annað fljótlegt sem fyllir magann en gerir kannski ekki mikið fyrir næringu og bragðlauka. Best er að eiga í handraðanum nokkrar uppskriftir að fljótlegum og bragðgóðum réttum sem ekki krefjast hálfa körfu af hráefni. Þessi réttur er tilvalinn í miðri viku fyrir önnum kafið fólk en hann er útgáfa af hinum klassíska franska rétti Sole Meunière. Hann er auðveldur, fljótlegur og einstaklega barnvænn.

Þorskur í sítrónu- og smjörsósu
fyrir 4
½ dl möndlur
1 1/2 dl hveiti
4 roðflettir sporðbitar af hvítum fiski (t.d. koli, ýsa eða þorskur)
salt og pipar
2 msk. olía
2 msk. ósaltað smjör

Hellið möndlunum á stóra pönnu. Hitið yfir meðalháum hita þar til möndlurnar fara að ilma og eru orðnar gylltar að lit, setjið til hliðar. Látið hveiti í fat og setjið til hliðar. Þerrið fiskinn með eldhúspappír og saltið og piprið fiskinn báðum megin. Veltið honum upp úr hveitinu og hristið bitana aðeins til að losa umfram hveiti af fiskinum. Hitið olíu á stórri pönnu yfir meðalháum hita. Bætið smjörinu á pönnuna þegar olían er orðin heit og dreifið úr því. Leggið fiskinn á pönnuna og steikið þar til fiskurinn er orðinn gylltur, 2-3 mín. Snúið fiskinum við og eldið þar til hann hefur eldast í gegn og er orðinn gylltur, 1-3 mínútur (fer eftir þykkt fiskbitans). Takið hann af pönnunni og hellið fitunni frá.

Sósa
4 msk. ósaltað smjör
2 msk. steinselja, söxuð
1 msk. ferskur sítrónusafi

Setjið pönnuna aftur yfir meðalháan hita og setjið smjörið út á. Eldið þar til smjörið fer að gyllast, u.þ.b. 2 mín. Hrærið steinseljuna og sítrónusafann saman við og hellið yfir fiskinn. Berið fram með steiktum kartöflum, sítrónubátum og grænu salati.

Umsjón / Nanna Teitsdóttir
Mynd / Heiðdís Guðbjörg Gunnarsdóttir

„Við eigum Ísland, það eina sem við eigum eftir að gera er að taka það“

Hávær krafa er um að lífeyrissjóðirnir verði virkari eigendur og nýti sér þau völd sem í því felast til að beita sér fyrir lífsgæðum sjóðsfélaga í nútíð ekki síður en í framtíð.

Lífeyrissjóðir landsins eiga stóran hluta af íslensku atvinnulífi. Vegna fjármagnshafta, stækkunar þeirra og þátttöku í endurreisn íslenskra fyrirtækja áttu sjóðirnir tæplega helming allra skráðra hlutabréfa í lok árs 2016 og um 70 prósent skuldabréfa. Mörg þeirra félaga sem lífeyrissjóðirnir eru sameiginlega ráðandi eigendur selja vörur og þjónustu sem landsmenn nota á hverjum degi. Og mörg þeirra hafa hækkað laun stjórnenda sinna þannig að laun forstjóra skráðra fyrirtækja eru nú að meðaltali 16 sinnum lágmarkslaun. Auk þess er til staðar kaupaukakerfi innan margra félaga sem gerir þeim kleift að greiða æðstu stjórnendum sínum bónusa.
Hávær krafa er um að lífeyrissjóðirnir verði virkari eigendur og nýti sér þau völd sem í því felast til að beita sér fyrir lífsgæðum sjóðsfélaga í nútíð ekki síður en í framtíð. Sú krafa kemur fyrst og fremst frá fulltrúum launafólks, verkalýðshreyfingum landsins. En hana er líka að finna á meðal fulltrúa atvinnurekenda sem sitja í stjórnum sjóðanna.
Þessi krafa birtist ansi skýrt á fundi sem Efling stóð fyrir um liðna helgi með þeim tveimur sem sækjast eftir að verða næsti forseti Alþýðusambands Íslands, Sverri Mar Albertssyni og Drífu Snædal (sjá mynd). Á fundinum sagði Sverrir meðall annars að verkalyðsfélögin ættu Ísland. „Það eina sem við eigum eftir að gera er að taka það.“ Drífa sagðist sammála honum.

Ítarleg fréttaskýring er um baráttuna um íslenskt atvinnulíf í nýjasta tölublaði Mannlífs. Hægt er að lesa skýringuna í heild á vef Kjarnans.

Orkuveita Reykjavíkur: Endalaus uppspretta átaka

Fréttir af kynferðislegri áreitni innan Orkuveitu Reykjavíkur í liðinni viku er aðeins eitt af mörgum hitamálum sem hafa blossað upp í kringum starfsemi fyrirtækisins. Allt frá því Orkuveitan var sett á fót með sameiningu Hitaveitu Reykjavíkur og Rafmagnsveitu Reykjavíkur árið 1999 hafa deilur um reksturinn blossað upp með reglulegu millibili og þær jafnvel endað með falli borgarstjórnarmeirihluta. Mannlíf rifjar upp nokkur af helstu hitamálunum.

 

Rándýrar höfuðstöðvar

Bygging höfuðstöðva OR er um margt sorgarsaga sem enn sér ekki fyrir endann á. Kostnaður við bygginguna nam alls 5,8 milljörðum króna og fór hann 4 milljarða fram úr áætlun. Árið 2013 var ákveðið að selja húsnæðið til lífeyris- og fjárfestingasjóða til að grynnka á erfiðri skuldastöðu fyrirtækisins og leigja það af nýjum eigendum; 5,1 milljarður fékkst fyrir húsið. Síðan kemur í ljós að stór hluti vesturhússins er ónýtur vegna rakaskemmda og að kostnaður við viðgerðir geti numið allt að 7 ½ milljarði króna. Í fyrra kaupir Orkuveitan húsið aftur fyrir 5,5 milljarða, en kaupin voru forsenda þess að hægt væri að ráðast í nauðsynlegar breytingar á húsnæðinu vegna skemmda.

Eitt flottasta eldhús landsins

Árið 2010 beindist athygli landsmanna að stórglæsilegu eldhúsi höfuðstöðva OR eftir að kynningarmyndband fyrirtækisins fór í dreifingu á Netinu. Myndbandið, sem var tæpar 10 mínútur að lengd, var framleitt af kynningardeild fyrirtækisins árið 2004. Var ásókn fagaðila og rekstraraðila í að skoða eldhúsið svo mikil að ákveðið var að gera myndbandið til að draga úr slíkum heimsóknum. Alfreð Þorsteinsson, sem var stjórnarformaður OR á þeim tíma sem eldhúsið var byggt, þvertók fyrir að um of mikinn íburð hafi verið að ræða. „Það var ekkert bruðlað sérstaklega í uppbyggingu þessa eldhúss.“ Almenningur var á öðru máli.

Sértækar skuldaaðgerðir

Rekstur Orkuveitunnar fór afar illa út úr efnahagshruninu enda hafði íslenska krónan hríðfallið og stærstur hluti lána í erlendri mynt. Um mitt ár námu skuldir fyrirtækisins 227 milljörðum króna. Stjórn fyrirtækisins réðist í umfangsmiklar aðgerðir til að bjarga fyrirtækinu sem fólust meðal annars í niðurskurði, hækkun gjaldskráa og endurfjármögnun lána. Var aðgerðaáætlunin nefnd Planið. Áætlunin gekk eftir og gott betur og skilaði hún sér í 60 milljarða króna í bættri sjóðsstöðu, eða 10 milljörðum umfram það sem upphaflega var reiknað með.

Mislukkuð tilraun með risarækjur

Um aldamótin hóf Orkuveitan tilraunir í að koma á fót risarækjueldi. Fyrirtækið lagði fram stofnfé og var áformað að fleiri aðilar kæmu inn í verkefnið sem myndu á endanum taka yfir verkefnið og hefja risarækjueldi í stórum stíl. Þeir létu hins vegar aldrei sjá sig. Alfreð Þorsteinsson, þáverandi stjórnarformaður, sagði þetta hluti af lögboðinni skyldu Orkuveitunnar um að taka þátt í nýsköpun og þegar fyrsta risarækjan var boðin til átu árið 2004 sagði hann ljóst að tilraunin hafði heppnast. Voru menn á þessum tímapunkti á því að risarækjan ætti eftir að slá í gegn. En risarækjudraumarnir runnu út í sandinn og í september 2007 tók stjórn OR þá ákvörðun að hætta risarækjueldinu. Lét Haukur Leósson, þá stjórnarformaður, hafa eftir sér að tilraunastarfsemin hafi ekki skilað fyrirtækinu krónu.

Stórslys í Andakílsá

Starfsmenn Orku náttúrunnar urðu uppvísir að ólögmætri og saknæmri háttsemi við tæmingu á lóni um botnloku á stíflu Andakílsárvirkjunar í Borgarfirði í fyrravor. Gríðarlegt magn aurs flæddi út í Andakílsá með meðfylgjandi stórtjóni fyrir lífríki árinnar. Orkustofnun sektaði ON um eina milljón króna vegna atviksins, enda hafði tilskilinna leyfa fyrir tæmingunni ekki verið aflað. Áhrifanna gætir enn og var engin laxveiði stunduð í Andakílsá í sumar frekar en í fyrra.

REI sprengir borgarstjórn

Á haustmánuðum 2007, þegar sjálfstraust íslenskra viðskiptamanna náði hæstu hæðum, voru uppi stórar hugmyndir um að ráðast í orkuútrás. Til þess stofnaði OR dótturfyrirtækið Reykjavik Energy Invest – REI. Þegar fréttir bárust af því að til stæði að sameina REI og Geysi Green Energy, sem var í eigu FL Group og Glitnis banka, runnu hins vegar tvær grímur á borgarfulltrúa. Þær deilur mögnuðust þegar í ljós kom að útvaldir lykilstarfsmenn áttu að fá kaupréttarsamninga sem mögulega hefði fært þeim háar fjárhæðir. Ekkert varð þó að samrunanum þar sem borgarstjórnarmeirihluti Sjálfstæðisflokks og Framsóknarflokks sprakk vegna málsins.

Barist um Hitaveitu Suðurnesja

Síðsumars 2009 risu enn og aftur upp harðar deilur í borgarstjórn þegar Orkuveitan ákvað að ganga til viðræðna við kanadíska fyrirtækið Magma Energy um sölu á 32% hlut OR í Heitaveitu Suðurnesja. Var átakapunkturinn sá að verið væri að færa orkuauðlindir þjóðarinnar í hendur einkaaðila. Kaupin, sem voru reyndar aðeins hluti af harðri baráttu um eignarhald í HS, gengu engu að síður í gegn og á kanadíska félagið – í gegnum sænskt dótturfyrirtæki – enn meirihluta í HS.

Orkufyrirtæki á fjarskiptamarkaði

Á dögum R-listans varð fyrirtæki að nafni Lína.net að einu helsta deiluefninu milli meirihlutans og minnihlutans sem endurspeglaðist í stöðugum skeytasendingum milli Alfreðs Þorsteinssonar og Guðlaugs Þórs Þórðarsonar, sem þá var borgarfulltrúi Sjálfstæðisflokksins. Lína.net var fjarskiptafyrirtæki í eigu Orkuveitunnar sem átti að sjá um ljósleiðaravæðingu höfuðborgarsvæðisins en varð í augum sjálfstæðismanna, sem töldu fjarstæðu að fyrirtæki í eigu borgarinnar væri að standa í rekstri á samkeppnismarkaði, holdgervingur sóunar almannafjár. Lína.net rann síðar inn í Gagnaveitu Reykjavíkur sem er dótturfélag Orkuveitunnar.

„Aldrei litið á okkur sem poppstjörnur“

Bjarni Lárus Hall, söngvari hljómsveitarinnar Jeff Who? segir meðlimi sveitarinnar aldrei hafa ætlað sér að leggja Ísland að fótum sér, þrátt fyrir miklar vinsældir á sínum tíma, og að endurkomutónleikarnir um helgina séu alls ekki tilraun til að reyna að slá í gegn að nýju.

Hljómsveitin Jeff Who? var geysivinsæl fyrir áratug eða svo en hvarf síðan alfarið úr sviðsljósinu. Nú blása meðlimir hljómsveitarinnar til tvennra tónleika um helgina þar sem söngvarinn Bjarni Lárus Hall verður auðvitað í forgrunni. Hann segir þó markmiðið ekki vera að slá í gegn á ný. Þetta séu bara sex vinir að skemmta sér saman.
„Ekki spila, ég er í viðtali,“ er það fyrsta sem ég heyri Bjarna Lárus Hall segja þegar ég hringi í hann. Hann er sem sé staddur á æfingu með hljómsveitinni Jeff Who? þar sem verið er að fínpússa prógrammið fyrir tónleika helgarinnar.

Auk Bjarna skipa þeir Ásgeir Valur Flosason, Elís Pétursson, Valdimar Kristjónsson, Þormóður Dagsson og Þorbjörn Sigurðsson hljómsveitina en þeir hafa allir verið nánir vinir síðan á menntaskólaárunum í MR. Þeir slógu óvænt í gegn um miðjan síðasta áratug, gáfu út tvær plötur og áttu hittarann Barfly sem tröllreið útvarpsstöðvum mánuðum saman en síðan hvarf hljómsveitin nánast af yfirborði jarðar og hefur ekki heyrst síðan. Nú skella þeir á tvennum endurkomutónleikum, í kjölfar tónleika Írafárs og nýs lags frá Stjórninni. Hvað er í gangi, er endurkoma hljómsveita frá síðustu áratugum það heitasta í dag? „Ha, nei, við vorum nú ekkert að pæla í því,“ segir Bjarni gáttaður. „Mér hafði ekki dottið það í hug einu sinni að við fylgdum einhverju trendi.“
Er hugsunin kannski sú að nú eru þeir sem voru aðdáendur á sínum tíma orðnir miðaldra, stöndugt fólk sem hefur efni á að sækja tónleika? „Ja, það hjálpar auðvitað,“ svarar Bjarni og hlær. „Við erum samt alls ekki að þessu fyrir peninginn. Þetta var bara hugmynd sem kom upp hjá okkur Þorra trommara yfir bjórglasi þegar við fórum að ræða það að okkur langaði til að fara að spila aftur saman. Við drifum í því að tala við hina strákana og þeir voru allir til í slaginn, þannig að hér erum við í dag, sex vinir í góðum fíling að undirbúa tónleika.“

„Mér finnst að ef við viljum mótmæla framgöngu Ísraelsmanna eigi að banna þeim að taka þátt í keppninni, ekki sniðganga keppnina þótt hún sé haldin í þeirra landi. Það er einhver hræsni í því.“

Aldrei verið svona góðir
Spurður hvort meðlimir hljómsveitarinnar séu í jafngóðu formi og þeir voru á velmektardögunum fyrir rúmum áratug fullyrðir Bjarni að þeir séu ennþá betri. „Ég get svarið það,“ segir hann. „Ég held ég hafi aldrei heyrt okkur svona góða.“
Hafið þið allir verið í tónlistariðkun síðan þið hættuð? „Já, já, við höfum verið að gera alls konar hluti í tónlist,“ segir Bjarni. „Allir að spila hingað og þangað. Við höfum bara ekki spilað saman sem band undanfarin tíu ár. Ég og Valdimar höfum verið að spila dálítið saman og erum meira að segja búnir að taka upp plötu. En við höfum alltaf hist reglulega allir saman og rætt málin.“

Þannig að vináttan hefur haldist? Hvers vegna hættuð þið þá að spila saman á sínum tíma? „Eiginlega bara vegna þess að við vorum alltaf að spila fyrir sama fólkið og vorum orðnir svolítið leiðir á því,“ útskýrir Bjarni. „Við spiluðum bara saman af því að okkur þótti það svo ógeðslega gaman. Þannig að við hættum því bara þegar það hætti að vera gaman. Það var engin dramatík í kringum það.“

Sprenging í hlustendahópnum með Barfly
Voru það ekki svakaleg viðbrigði að fara úr því að vera hljómsveit skólafélaga í MR sem fannst bara gaman að spila saman í það að verða ein vinsælasta hljómsveit landsins? „Jú, þetta gerðist frekar hratt,“ viðurkennir Bjarni. „Við áttum tvö lög sem voru mikið spiluð á X-inu og svo þegar Barfly kom út varð sprenging í hlustendahópnum á nokkrum dögum.“
Bjarni vill alls ekki gangast við því að hinar skyndilegu vinsældir og nánast stöðugt tónleikahald hafi haft mikil áhrif á þá félaga. „Við ákváðum bara að gera þetta vel,“ segir hann. „Og ef einhver hringdi og bað okkur að spila sögðum við bara já. Við pældum ekki mikið í því að við værum vinsælir. Vorum bara band sem spilaði á tónleikum þegar við vorum beðnir um það. Við litum aldrei á okkur sem einhverjar poppstjörnur og það var aldrei markmiðið að leggja Ísland að fótum okkar. Lífið breyttist í rauninni voðalega lítið, nema bara að við spiluðum miklu oftar en við höfðum gert áður.“
Spurður hvort endurkomutónleikarnir um helgina séu upphafið á nýrri tilraun til að slá í gegn og hvort plata sé í undirbúningi segir Bjarni að þeir séu bara ekki farnir að hugsa svo langt. „Við erum ekkert að pæla langt fram í tímann,“ fullyrðir hann. „En það hefur verið ógeðslega gaman hjá okkur og gengið mjög vel, þannig að maður veit aldrei hvað gerist. Hins vegar er það alveg á hreinu að þetta er alls ekki meðvituð tilraun til að reyna að slá í gegn aftur, við ætlum bara að hafa gaman að þessu.“

Hræsni gagnvart Ísrael
Árið 2015 tók Bjarni þátt í undankeppni Eurovision með lag sitt Brotið gler og fékk tvo félaga sína úr Jeff Who? til að spila það með sér. Hann vill þó undirstrika að það sé mikill misskilningur að Jeff Who? hafi ætlað sér að taka þátt í Eurovision. Það myndi aldrei gerast. En hvað finnst honum um kröfuna um að sniðganga Eurovision í Ísrael á næsta ári vegna framgöngu Ísraela gagnvart Palestínumönnum? „Æ, ég veit það ekki,“ segir hann þreytulega. „Ég er ekki hlynntur því sem Ísrael er að gera gagnvart Palestínumönnum, en þetta er samt bara söngvakeppni og þeir taka þátt í henni. Mér finnst að ef við viljum mótmæla framgöngu Ísraelsmanna eigi að banna þeim að taka þátt í keppninni, ekki sniðganga keppnina þótt hún sé haldin í þeirra landi. Það er einhver hræsni í því.“
Ætlar þú að senda lag í undankeppnina fyrir næsta ár? „Ég bara veit það ekki,“ segir Bjarni hugsi. „Núna hugsa ég bara um æfinguna sem er að byrja og tónleikana um helgina. Ég fer ekkert að pæla í Eurovision fyrr en þessir tónleikarnir eru búnir. Þeir eru það sem skiptir máli núna. Allt annað kemur bara í ljós.“

Fyrri tónleikar Jeff Who? eru á Græna hattinum á Akureyri í kvöld, 21. september, og þeir seinni í Bæjarbíói í Hafnarfirði annað kvöld.

Mynd / Lilja Jóns

Sjálfsmorð móðurinnar stærsta áfallið

Jane Fonda rifjar upp móðurmissinn í nýrri heimildarmynd.

Í nýrri heimildarmynd frá HBO, Jane Fonda í fimm þáttum sem frumsýnd verður 24. september, opnar Jane Fonda sig um hvernig það hafi verið að alast upp hjá móður sem þjáðist af geðhvarfasýki og hvernig sjálfsmorð móðurinnar, þegar Jane var 12 ára, hafi átt stærstan þátt í því að móta sjálfsmynd hennar og upplifun af heiminum. Hún segist þó smátt og smátt hafa lært að skilja móður sína og fyrirgefa henni.

Móðir Jane hét Frances Ford Seymour og var kanadísk kona sem giftist Henry Fonda árið 1936. Saman eignuðust þau tvö börn, Jane og Peter. Fljótlega kom í ljós að Frances þjáðist að geðhvörfum og árið 1950, þegar Jane var 12 ára, framdi hún sjálfsmorð með því að skera sig á háls á geðsjúkrahúsinu þar sem hún dvaldi.

Dauði hennar var að sjálfsögðu mikið áfall fyrir Jane og ekki varð auðveldara að sætta sig við sjálfsmorð móðurinnar við það að rekast á umfjöllun um það í kvikmyndatímariti eftir að faðir hennar, Henry Fonda, hafði sagt Jane og bróður hennar að móðir þeirra hefði dáið eftir hjartaáfall.

„Sem barn kennir maður alltaf sjálfri sér um,“ útskýrði leikkonan í viðtali á people.com. „Vegna þess að barnið getur ekki ásakað fullorðnu manneskjuna sem það þarf á að halda til að komast af. Það tekur langan tíma að komast yfir sektarkenndina,“ sagði hún.

En eftir að hún varð fullorðin ákvað Jane að reyna að kynnast móður sinni, læra að skilja hana og tileinkaði henni sjálfsævisögu sína, My Life So Far sem kom út árið 2005. Hún segist hafa fengið aðgang að sjúkraskýrslum móður sinnar og loks fengið að kynnast henni og meta þessa konu.
„Ég þekkti hana aldrei,“ segir leikkonan í fyrrnefndu viðtali. „En ég er búin að fyrirgefa henni og mér.“

Hér fyrir neðan má skoða kynningarstikluna fyrir Jane Fonda í fimm þáttum, sem eins og áður sagði verður frumsýnd 24. september á HBO.

Kynntist eiginmanninum 14 ára gömul

Camilla Rut prýðir nýjustu forsíðu Vikunnar. Í einlægu viðtali dregur hún ekkert undan og talar um uppeldið í krossinum, óvænta athygli, taugaáfall sem hún fékk kjölfar brúðkaups síns og söngferilinn.

 

Camilla hefur með einlægni sinni og hispurslausri framkomu fangað huga og hjörtu fjölmargra Íslendinga. Á degi hverjum hleypir hún tugum þúsunda fylgjenda inn í líf sitt og sýnir bæði góðar og slæmar hliðar þess.

Í dag er Camilla í fullu starfi við það að sinna sínum miðlum, auk þess sem hún er að hefja feril í tónlist. „Dæmigerður dagur í mínu lífi er ekki til, ég er rosalega mikið út um allt að græja og gera,“ segir hún. „Ég sit á allskonar fundum og er stöðugt að vinna mig áfram. Það kemur aldrei sá dagur að ég sé ekki með neitt á dagskránni. Ég viðurkenni alveg að þetta hefur reynst mér frekar erfitt, þar sem ég er svo rosaleg rútínumanneskja. Ég vil helst hafa dagana mína eins, en þegar ég er ekki í fastri vinnu frá 9-5 gefur það augaleið að það gengur ekki alltaf upp. Svo á ég líka allskonar drauma sem ég er að vinna í að uppfylla og verkefni sem ég er að hrinda í framkvæmd, lífið kemur ekki til mín á silfurfati svo ég ætla að leggja hart að mér til þess að koma mér þangað sem ég vil fara.“

Kynntist eiginmanninum fjórtán ára

Camilla og eiginmaður hennar, Rafn Hlíðkvist, hafa verið saman í rúm tíu ár en hún var aðeins fjórtán ára þegar þau kynntust. „Við byrjuðum samband okkar mjög rólega, þar sem ég var svo ung. Rabbi er fimm árum eldri en ég og bar fullkomna virðingu fyrir því að ég væri að stíga mín fyrstu skref í þessu öllu saman. Við höfum gengið í gegnum svo margt saman á þessum tíu árum en einhvern veginn alltaf náð að halda okkar striki sem er nú aðallega honum og hans yfirvegun að þakka. Ég telst seint vera yfirveguð og róleg því eins og ég segi þá stjórnast ég af tilfinningum en hann hefur tök á mér sem enginn annar hefur,“ segir Camilla og bætir við að þau hafi verið óaðskiljanleg frá fyrstu kynnum. „Við smullum saman eins og flís við rass. Á meðan ég er algjört fiðrildi og tilfinningavera þá er hann rólegur og jarðbundinn, svo það má segja að hann dragi mig niður á jörðina á meðan ég dreg hann upp með mér, svo við hittumst oftast á miðri leið. Samband okkar hefur verið ferðalag og mikill lærdómur fyrir okkur bæði en í gegnum allt er þessi skilyrðislausa ást sem stendur svo sterk. Við trúlofuðum okkur um verslunarmannahelgina árið 2014 en vissum ekki þá að laumufarþegi var um borð. Sléttri viku eftir að við trúlofuðum okkur komumst við að því að ég væri ólétt af litla stráknum okkar – og þvílík hamingja.“

Sonur þeirra, Gabríel, kom svo í heiminn fyrir rúmum þremur árum. Camilla segir að eins klisjukennt og það hljómi, hafi sonurinn komið inn í líf þeirra á hárréttum tíma og breytt öllu til hins betra.

„Meðgangan og fæðingin var hryllingur en þetta litla barn hefur verið draumur síðan við fengum hann í hendurnar. Ég fékk rosalegt fæðingarþunglyndi og átti mjög erfitt fyrstu mánuðina. Í orlofinu hafði ég gaman af því að fylgjast með öðrum á samfélagsmiðlum og fljótlega kviknaði sú hugmynd að kannski hefði fólk áhuga á því sem ég hefði að segja. Ég opnaði aðganginn minn og var ekki með neitt sérstakt markmið. Ég einblíndi ekki á neitt afmarkað málefni, heldur var ég bara að spjalla um lífið og tilveruna. Meðal þess sem ég ræddi opinskátt var fæðingarþunglyndið. Markmið mitt var samt ekki beint að peppa aðra, heldur var ég að þessu aðallega til að peppa sjálfa mig og ég fann fljótt að þetta var hvati til þess að laga mitt eigið hugarfari. En boltinn fór fljótt að rúlla og fylgjendatalan jókst með hverjum degi. Að mörgu leyti var ég heppin, varðandi tímasetningu og annað en á þessum tíma var ekki mikið um það að fólk væri að opna sig og segja frá persónulegri lífsreynslu fyrir framan ókunnugt fólk á Snapchat.“

Þetta er aðeins brot úr ítarlegu viðtali við Camillu. Lestu viðtalið í heild sinni í nýjasta tölublaði Vikunnar.

/Texti: Margrét Björk Jónsdóttir
/Myndir: Aldís Pálsdóttir
/Förðun: Sara Dögg Johansen með YSL

Ed Sheeran hlakkar til að spila fyrir Íslendinga

Tónlistarmaðurinn heldur tónleika á Laugardalsvelli næsta sumar.

Ed Sheeran mun halda sína fyrstu tónleika á Íslandi þann 10. ágúst 2019. Í myndbandi sem kappinn birti á YouTube sendir hann Íslendingum kveðju og segist hlakka til að spila fyrir þá. Hann hafi reyndar komið til Íslands áður en aldrei spilað þar og hann sé mjög spenntur.

Tónleikarnir á Íslandi eru hluti af Evróputúr stjörnunnar sem mun standa yfir frá maí til ágúst 2019 og auk þess að spila fyrir okkur mun Ed halda tónleika í Frakklandi, Portúgal, Spáni, Ítalíu, Þýskalandi, Austurríki, Rúmeníu, Tékklandi, Lettlandi, Rússlandi, Finnlandi, Danmörku og Ungverjalandi og svo að sjálfsögðu í heimalandi sínu Bretlandi þar sem síðustu tónleikar túrsins verða.

Miðasala á tónleikana hefst klukkan 9 fimmtudaginn 27. september á TIX.is/Ed og í boði eru 30.000 miðar á mismunandi og misdýrum svæðum svallarins.

Í myndbandinu hér fyrir neðan er Ed brosandi út að eyrum á meðan hann sendir Íslendingum kveðju sína og ekki annað að sjá en að hann meini hvert orð.

Reyna að ná sambandi við Michelle Obama með myndbandi

|
|

Rúna Magnúsdóttir og Nick Haines gripu til nýstárlegra aðgerða við að ná sambandi við forsetafrúna fyrrverandi.

Rúna og Nick póstuðu myndbandinu á þriðjudaginn

„Við þurftum alveg að taka hugrekkispillu til að þora að gera þetta,“ segir Rúna Magnúsdóttir sem ásamt Nick Haines, félaga sínum í samtökunum The Change Makers, hefur póstað myndbandi þar sem þau freista þess að ná sambandi við Michelle Obama, fyrrverandi forsetafrú Bandaríkjanna, til að fá hana til að skrifa inngang að bók sem þau hafa skrifað.

„Okkur leið eins og við værum að afhjúpa okkur með því að gera þetta myndband,“ segir Rúna. „En um leið vorum við að stíga út fyrir boxið. Við höfðum ekki hugmynd um hvernig við ættum að ná sambandi við Michelle en svo fórum við að hugsa um kenninguna um að við séum öll tengd, það sem kallast á ensku „Six degrees of separation“, og samkvæmt henni ætti að vera einhver sem þekkir okkur sem þekkir einhvern sem þekkir Michelle svo við ákváðum að gefa þessu séns og láta reyna á þessa kenningu.“

Rúna og Nick póstuðu myndbandinu á þriðjudaginn, en hafa enn ekki fengið viðbrögð frá Michelle. Rúna segist þó ekki vera búin að gefa upp vonina. „Það má alveg segja að í hvert sinn sem einhver deilir myndbandinu á samfélagsmiðlum þá opnist ný leið til að ná til hennar. Svo við sjáum bara til. Kannski svarar hún, kannski ekki.“

Spurð hvaða félagsskapur The Change Makers sé segir Rúna það vera hóp af fólki víðsvegar um heim sem hafi sameinast um það að hvetja fólk til að stíga út fyrir boxin sem samfélagið setji fólk stöðugt í. Bókin sem hún og Nick voru að skrifa fjalli einmitt um það hvernig þessi box hamli okkur sem manneskjum.
„No more Boxes hreyfingin sprettur af því að við í The Change Makers vorum beðin um að taka þátt í pallborðsumræðum hjá Sameinuðu þjóðunum í mars síðastliðnum. Þar var okkar hlutverk að ræða hvað hægt væri að gera til að ná þessum 17 heimsmarkmiðum Sameinuðu þjóðanna fyrir 2030. Þessi markmið lúta að sjálfbærni, jafnrétti kynjanna og þar fram eftir götunum. Niðurstaða okkar var sú að það sem fyrst og fremst hamlaði allri þróun væri þessi eilífa árátta okkar mannfólksins að setja okkur sjálf og alla aðra í fyrirframákveðin box, hvort sem það snýr að kyni, kynþætti, bakgrunni, trúarbrögðum eða einhverju öðru. Það er alltaf verið að troða fólki í einhver box og afleiðingin er sú að við nýtum einungis brotabrot af þeim hæfileikum, möguleikum og eiginleikum sem hver manneskja kemur með á þessa jörð. Það bara gengur ekki lengur. Þannig að við ákváðum að vekja fólk til umhugsunar um þessar hömlur sem við setjum á okkur og hvert annað og vekja fólk til vitundar um það hvað það getur gert til þess að sú breyting sem við viljum sjá í heiminum í dag geti átt sér stað,“ segir Rúna og það er ljóst að þetta málefni er henni hjartans mál.

Þú getur lagt þitt að mörkum við að hjálpa Rúnu og Nick að ná sambandi við forsetafrúna með því að kíkja á myndbandið og ekki sakar að endurpósta því á samfélagsmiðlunum. Því eins og Rúna segir; það er aldrei að vita nema athygli Michelle vakni ef nógu margir pósta því.

Þeir sem vilja fylgjast með því hvernig Rúnu og Nick gengur að ná sambandi við frúna, eða bara kynna sér hvað þau eru að gera geta svo kíkt á síðuna þeirra.

https://www.nomoreboxesmovement.com/

Karlar sem finnst þeim ógnað beita kynferðislegri áreitni

Í nýju tölublaði Mannlífs er fjallað um veggina sem konur lenda á þegar þær kvarta undan kynferðislegu áreiti á vinnustað.

 

Margrét Erla Maack, sem hefur starfað sem plötusnúður og skemmtikraftur árum saman, hefur ekki farið varhluta af þeirri kynferðislegu áreitni sem viðgengst í þeim bransa. Sonja Ýr Þorbergsdóttir, lögfræðingur BSRB, segir mjög algengt að ekki sé brugðist við kvörtunum um kynferðislega áreitni innan vinnustaða, eða að það sé brugðist við með röngum hætti.

Margréti og Sonju kemur ekki á óvart hvernig stjórnendur Orkuveitu Reykjavíkur hafa tekið á kynferðislegri áreitni innan fyrirtæksins. Þær segja að í kjölfar #metoo byltingarinnar séu þess dæmi að ástandið hafi sums staðar versnað og áreitnin aukist. Á sumum vinnustöðum nýti tilteknir karlar umræðuna til að gera enn minna úr konum með niðrandi athugasemdum og hegðun til þess að ná aftur sinni valdastöðu og tryggja hana. Margrét Erla og Sonja Ýr eru í viðtali í nýjasta tölublaði Mannlífs sem kemur út á morgun.

Opnað fyrir innsendingar á lögum í Söngvakeppnina

Leita til reyndra lagahöfunda til að semja helming laganna.

RÚV hefur nú opnað fyrir innsendingar á lögum í Söngvakeppnina 2019. Sú breyting verður á vali laga í keppnina að leitað verður til reyndra og vinsælla lagahöfunda til að semja hluta laganna en auk þess verður valið úr innsendum lögum eins og síðustu ár. Alls munu tíu lög taka þátt í keppninni sem haldin verður í febrúar og mars á næsta ári.

Danshöfundurinn Lee Proud hefur verið ráðinn sem listrænn stjórnandi keppninnar en Samúel J. Samúelsson verður tónlistarstjóri eins og síðast.

Á vef RÚV er haft eftir Ragnhildi Steinunni Jónsdóttur, aðstoðardagskrárstjóra RÚV sem situr í framkvæmdastjórn keppninnar, að hún bindi vonir við að með nýju fyrirkomulagi verði lögin í keppninni fjölbreyttari og sterkari. „Keppnin stækkar frá ári til árs og við höfum verið gríðarlega ánægð með þróun hennar. Í ár ákváðum við að breyta fyrirkomulaginu og við teljum að það skili fjölbreyttari, skemmtilegri og enn betri lögum,” segir hún.

Lagahöfundar geta sent lög í Söngvakeppnina 2019 á vefinn, songvakeppnin.is. Umsóknarfrestur rennur út mánudaginn 22. október. Í byrjun janúar verður tilkynnt hvaða lög taka þátt í þessum stærsta sjónvarpsviðburði ársins. Í tilkynningu frá RÚV eru allir laga- og textahöfunda, sem vilja hvattir til að taka þátt í Söngvakeppninni 2019 og halda áfram að móta tónlistarsögu Íslands með því að senda inn sitt lag. Höfundum er sérstaklega bent á að Söngvakeppnin snýst um fjölbreytni. Allar tegundir tónlistar eru boðnar velkomnar.

Keppnin er, eins og allir vita, forkeppni Íslands fyrir Eurovision og mun sigurvegarinn verða fulltrúi Íslands á sviðinu í Tel Aviv næsta vor.

Fagurfræðilega fullkomin samsuða í 100 ára timburhúsi

Inga Elín myndlistarmaður og Þórarinn gítarleikari heimsótt.

Það eru ansi mörg ár síðan því var fyrst hvíslað að blaðakonu Húsa og híbýla að hönnuðurinn og myndlistamaðurinn Inga Elín Kristinsdóttir hefði einstaklega næmt auga fyrir fallegri hönnun og sérstakt lag á að hnjóta um heimsþekktar hönnunarperlur á nytjamörkuðum hér heima sem og erlendis. Heimili Ingu Elínar og eiginmanns hennar, Þórarins Sigurbergssonar gítarleikara og leiðsögumanns, við Laufásveginn í Reykjavík, er sannkallaður ævintýraheimur og einstaklega vel heppnað dæmi um hvernig heimili sem nostrað er við af ástúð getur fangað fullkomnlega persónuleika þeirra sem þar búa.

Hannar verðlaunagripi
Inga Elín lagði stund á myndlist við Myndlistaskóla Reykjavíkur og var aðeins tvítug farin að kenna myndlist að loknu kennaranámi frá Myndlista- og handíðaskóla Íslands. Þremur árum síðar lá leið hennar í framhaldsnám til Kaupmannahafnar í Skolen for Brugskunst (í dag Danmarks Designskole), þaðan sem hún útskrifaðist fimm árum síðar frá tveimur deildum skólans, keramík- og glerlistadeild. Inga Elín hefur verið áberandi í íslensku listalífi allar götur síðan og skipað sér sess meðal okkar fremstu listamanna. Í um áratug rak hún á Skólavörðustíg 5

09. tbl. 2018, HH1808082010, Inga Elín Kristinsdóttir, Innlit, Laufásvegur 43

sitt eigið gallerí en er í dag í hópi átta listakvenna sem samanstanda að keramíkgalleríinu Kaolín sem er til húsa á sama stað. Fyrir utan fjölmargar einkasýningar innan lands og utan hefur Inga Elín tekið þátt í ótal samsýningum víða um heim, meðal annars í Bretlandi og Skandinavíu og hlotið hinar ýmsu viðurkenningar í gegnum tíðina. Inga Elín hefur hannað ýmsa muni fyrir Kokkalandslið Íslands og allt frá árinu 2001 Ístóninn, verðlaunagrip Íslensku tónlistarverðlaunanna. Þá er borðbúnað úr hennar smiðju að finna á nokkrum af rómuðustu veitingahúsum landsins og athygli vakti á sínum tíma þegar breski glysrokkarinn og listaverkasafnarinn Elton John festi kaup á tveimur verkum hennar í frægri heimsókn til landsins árið 2007.

„Ég daðraði eitthvað við naumhyggjuna á tímabili en var fljót að finna að hún var ekki alveg minn tebolli.“

Smávinir í postulíni og steinsteypu
Líkt og margir aðrir íslenskir hönnuðir og listamenn í gegnum tíðina, hefur Inga Elín sótt sinn helsta innblástur til íslenskrar náttúru. Í verkum sínum hefur hún stundum fléttað saman ólíkum og óvæntu hráefni en gott dæmi um það er sería skúlptúrverka sem hún kallar Smávinir fagrir en þar mætast fíngert og brothætt postulínið og gróf steinsteypan. Þessi styrkleiki Ingu Elínar sem listamanns skín einstaklega vel í gegn á heimilinu.

Eltist ekki við tískubylgjur
Dásamlega litrík kaótík einkennir heimili þeirra Ingu Elínar og Þórarins, hér sér varla í auðan blett og endalaust eitthvað áhugavert sem fangar augað. Inga Elín byrjaði að safna list og hönnun markvisst strax sem unglingur og var þá þegar búin að móta sér þann persónulega stíl sem fylgt hefur henni allar götur síðan. „Ég hef alltaf verið safnari í mér og hef í gegnum tíðina safnað málverkum, glerlist, keramíki og skúlptúrum og þá iðulega verkum íslenskra listamanna,“ segir Inga Elín þar sem hún lóðsar okkur um litríkt heimilið.

„Ég hef alltaf leitast við að fjárfesta í góðri og vandaðri hönnun og eiga þá hluti ævina út í stað þess að elta einhverjar tímabundnar tískubylgur. Dönsk og ítölsk hönnun frá tímabilinu 1950-´70 hefur alltaf höfðað sérstaklega til mín. Ég daðraði eitthvað við naumhyggjuna á tímabili en var fljót að finna að hún var ekki alveg minn tebolli. Ég hef alltaf haft einstaklega gaman af því að fara á nytjamarkaði, meðal annars í Kaupmannahöfn og Berlín en þar eru margir góðir antíkmarkaðir og hægt að finna mikið úrval fallegra og áhugaverðra muna fyrir heimilið,“ segir Inga Elín sem er einmitt ein þeirra sem standa á bak við Portið, eina áhugaverðustu verslun landsins en þar er jafnan að finna mýgrút af sérvöldum antík- og vintage-munum, húsgögnum og fatnaði.

Fleiri myndir af þessu fallega heimili má sjá í septemberblaði Húsa og híbýla sem fæst á sölustöðum til 20. september.

Texti / Gerður Harðardóttir
Ljósmyndari / Hákon Davíð Björnsson

Typpi óskast!

Sigga Dögg auglýsir eftir typpi í fræðslumyndband.

Sigga Dögg kynfræðingur auglýsir á Facebook-síðu sinni eftir sjálfboðaliða sem vill taka þátt í gerð fræðslumyndbands um smokkanotkun. Nánar tiltekið er það einungis typpi viðkomandi sem hún hefur áhuga á að nota í myndbandinu og hún tekur fram að ekki muni sjást í andlitið, heldur einungis svæðið frá nafla að lærum og svo hendurnar.

Ekki verður greitt fyrir þátttöku í myndbandinu heldur fer ágóðinn til UNICEF og UN Women.

Kynfræðingurinn lýkur auglýsingunni með því að ítreka – í upphafsstöfum – að hún sé ekki að biðja um að henni séu sendar typpamyndir.

Auglýsingu Siggu Daggar má skoða hér að neðan.

https://www.facebook.com/siggadogg.is/

Mynd / Saga Sig

Justin Bieber og Hailey Baldwin eru víst gift

Alec Baldwin staðfestir orðróminn um leynilegt brúðkaup poppstjörnunnar.

Óstaðfestar fregnir af því að poppstjarnan Justin Bieber hafi kvænst fyrirsætunni Hailey Baldwin í laumi síðastliðinn fimmtudag hafa verið staðfestar. Það var enginn annar en föðurbróðir brúðarinnar, stórleikarinn Alec Baldwin, sem staðfesti þetta í viðtali á rauða dreglinum á Emmy-verðlaunahátíðinni á mánudagskvöldið.

„Þau laumuðust bara í burtu og giftu sig,“ sagði leikarinn í stuttu spjalli við sjónvarpsfólk á rauða dreglinum. Hann sagðist reyndar bara hafa hitt Justin einu sinni en að hann og Hailey, bróðurdóttir hans, skiptust á sms-um annað slagið, og að hann vissi fyrir víst að fréttirnar af giftingu þeirra væru sannar.

People Magazine birti fyrstu fréttina af hjónavígslunni á föstudaginn, eftir að skötuhjúin sáust fara inn í dómshús þar sem giftingar fara fram. Síðan hafa fjölmiðlar dregið fréttina í efa, ekki síst eftir að Hailey tísti því á Twitter að hún væri ekki gift enn. Fyrirsætan eyddi síðan færslunni og vinur brúðhjónanna sagði í samtali við People Magazine að það sem Hailey hefði meint væri að borgaraleg hjónavígsla væri ekki brúðkaup. „Þau eru gift samkvæmt lögum,“ sagði heimildarmaðurinn. „En brúðkaup er þegar tvær manneskjur sverja eið fyrir framan Guð og fólkið sitt.“ Hann klikkti síðan út með því að Justin og Hailey ætluðu að halda veglegt kirkjubrúðkaup á næstunni til að vinir og fjölskylda gætu fagnað með þeim. Við bíðum spennt.

Óásættanlegt að karlar áreiti konur án refsingar

Kvenréttindafélag Íslands hefur sent frá sér ályktun í ljósi frétta liðinnar viku af kynferðislegri áreitni yfirmanna hjá Orkuveitunni.

„Það er óásættanlegt að konur séu ekki óhultar, hvorki inni á heimilum né á vinnustöðum. Það er óásættanlegt að konur hrökklist úr starfi vegna áreitni og ofbeldis sem þær eru beittar á opinberum vettvangi. Það er óásættanlegt að karlar geti áreitt konur og beitt þær ofbeldi, án hindrana, eftirmála og án refsingar,“ segir í ályktun sem Kvenréttindafélag Íslands hefur sent frá sér í ljósi frétta liðinnar viku af kynferðislegri áreitni yfirmanna hjá Orkuveitunni.

Fréttaflutningurinn hefur meðal annars snúist um það að framkvæmdastjóranum Bjarna Má Júlíussyni var í liðinni viku vikið úr starfi vegna kynferðislegrar áreitni gagnvart starfsfólki og tveir aðrir hátt settir starfsmenn fyrirtækisins hafa verið sakaðir um áreitni í starfi eða kynferðisbrot áður en störf hófust.

Kvenréttindafélagið ítrekar í ályktuninni að ekki sé nóg að vinnustaðir samþykki metnaðarfullar jafnréttisáætlanir og innleiði staðla og gæðavottanir heldur sé nauðsynlegt að fylgja áætlunum með virkum hætti.

„Fyrirtækin hafa þótt vera í fararbroddi í jafnréttismálum á Íslandi og forsvarsmenn þeirra oft verið talsmenn þess mikla árangurs sem náðst hefur í jafnréttismálum á Íslandi. Árið 2015 var OR veitt Hvatningarverðlaun jafnréttismála og við það tilefni sagði forstjórinn að það væri “ekki nóg að aðhyllast jafnrétti, heldur þarf að fremja það”. Nú ríður á að fyrirtækin bregðist ekki háleitum hugsjónum sínum heldur vinni markvisst að því að uppræta kynferðislega áreitni og ofbeldi á vinnustað og gæti þess að starfsfólk allt taki fullan þátt í því starfi,“ segir í ályktuninni.

Ályktuninni lýkur á hvatningu til stjórnenda fyrirtækja um að axla ábyrgð og skapa starfsumhverfi þar sem fólk sé óhult í vinnu. „Við verðum að gera grundvallarbyltingu á samfélagi okkar, þessu samfélagi þar sem ofbeldi og áreitni hefur þrifist í allskonar myndum. Það á ekki að veita neina afslætti í þessum málum.“ segir Kvenréttindafélag Íslands.

Bláskel í stuttu máli

Bláskel er einnig þekkt undir heitunum krákuskel eða kræklingur. Vitað er að maðurinn hefur borðað bláskel í þúsundir ára.

Bláskel er sælindýr í fallegri svarblárri samlokuskel sem festir sig oft með spunaþráðum við steina og reipi. Elsta aðferðin við ræktun á bláskel eru staurar sem festir voru í grunnu sjávarvatni og þar óx kræklingurinn en víða er hann ræktaður á reipum sem hanga niður úr stórum flekum. Kræklingur er hluti af stórri ætt sælindýra og fyrirfinnast bæði í ferskvatni og sjávarvatni en þó er kræklingur sem kemur úr sjávarvatni notaður til manneldis þar sem hinn þykir ekki lystugur.

Belgar, Hollendingar og Frakkar borða mikið af bláskel og þar er hún oft borin fram elduð í soði með frönskum kartöflum og þekkist sem rétturinn moules frites. Einnig er bláskelin borin fram með góðu brauði sem notað er til að klára allt soðið. Hollendingar eru einnig þekktir fyrir að djúpsteikja bláskelina og selja sem skyndibita.

Margir veigra sér við að elda bláskel en sé ákveðnum reglum fylgt eftir við verkun og eldun þá er hún leikur einn. Bláskel er léttur og skemmtilegur sumarmatur og afar mikilvægt er að nostra svolítið við soðið sem skelfiskurinn er eldaður upp úr. Oft er hvítvín eða bjór notað í soðið og því betra að vera með gæðavín og bjór til að tryggja að soðið verði sem allra best.

Margar fiskbúðir selja ferska bláskel sem ræktuð er á Íslandi. Gott er að vera í sambandi við sína fiskbúð til að athuga hvenær bláskelin er keyrð út því best er að fá hana sem ferskasta og svo selst hún yfirleitt mjög hratt og því betra að vera undirbúinn frekar en að koma að tómu borðinu.

Áður en bláskelin er elduð þarf að verka hana. Gott er að nota lítinn bursta og skrúbba kræklingana undir rennandi köldu vatni til að losa þá við hreistur og önnur óhreinindi sem setjast utan á skeljarnar. Stundum finnast lítil skegg á skeljunum sem hægt er að tosa af með fingrunum eða skrapa af með litlum hníf.
Brotnum skeljum skal henda og ef bláskelin er opin skal banka henni ákveðið við eldhúsbekkinn og sjá hvort hún loki sér. Loki hún sér ekki er kræklingurinn líklegast dáinn og því best að fleygja skelinni.
Mjög mikilvægt er að láta bláskelina ekki liggja í bleyti þar sem þeir lifa í saltvatni og kafna í hreinu kranavatninu.

Þegar bláskelin er elduð þarf að nota góðan pott með loki því hún þarf að gufusjóða í soðinu í nokkrar mín. Gott er að taka pottinn og hrista hann til einu sinni til tvisvar í eldunarferlinu til að hann eldist jafnt. Ef potturinn er þungur er líka hægt að taka lokið af og hræra með trésleif í staðinn.
Kræklingurinn er tilbúinn þegar langflestar skeljarnar hafa opnast. Þær skeljar sem enn eru harðlokaðar er best að henda.

Mynd / Heiðdís Guðbjörg Gunnarsdóttir

 

Victoria Beckham tók Spice Girls dans í tískuvikunni í London

Sýndi að Snobbkryddið hefur engu gleymt.

Victoria Beckham brast í dans í samkvæmi sem haldið var henni til heiðurs eftir sýningu hennar á tískuvikunni í London í gær. Victoria, sem bar viðurnefnið Snobbkryddið á mektarárum Spice Girls, skellti sér í dansinn sem þær stöllur notuðu í myndbandinu við lagið geysivinsæla Spice Up Your Life árið 1997, við gríðarleg fagnaðarlæti viðstaddra.

Victoria hefur nú rekið eigið framleiðslufyrirtæki þar sem hún hannar allan klæðnað sjálf í tíu ár og fagnaði afmælinu með því að taka í fyrsta sinn þátt í tískuvikunni í heimaborg sinni London. Eftir sýninguna, sem hlaut góðar undirtektir, var haldið samkvæmi henni til heiðurs og þar gerði hún sér, eins og áður sagði, lítið fyrir, og dansaði fyrir viðstadda.

Victoria póstaði sjálf myndbandi af uppákomunni á Instagram-reikningi sínum og eins og sjá má þá hefur þessi 44 ára fyrrum poppstjarna nákvæmlega engu gleymt. Er jafnvel betri dansari en hún var fyrir tuttugu árum. Kíkið á myndbandið og hrífist með í gleðinni.

https://www.youtube.com/watch?v=BhH8d84aaPw&feature=youtu.be

1...1.4991.5001.501...1.559Síðu 1.500 af 1.559

Raddir

© 2023 Mannlíf.is. Allur réttur áskilinn. Notkun á efni miðilsins er óheimil án samþykkis.