Mannlíf fékk tvo sérfræðinga, Kristjönu Arnarsdóttur, íþróttafréttakonu á RÚV, og Elvar Geir Magnússon, ritstjóra Fótbolti.net, til að spá fyrir um úrslit leiks Íslenska kvennalandsliðsins gegn Þýskalandi á morgun.

Dáist að íslensku stelpunum

„Ég spái því að við vinnum þetta 2-1 og að Sara Björk Gunnarsdóttir og Elín Metta Jensen skori mörkin. Ég er bjartsýn á að stelpurnar spili vel og ég veit hreinlega að þær eru alveg ofboðslega tilbúnar í þetta verkefni. Það sést á þeim langar leiðir,“segir Kristjana Arnarsdóttir, íþróttafréttakona á RÚV.

Kristjana var ein þeirra sem sá um umfjöllun um HM karla í Rússlandi í sumar og er nú nýbyrjuð í síðbúnu og langþráðu sumarfríi. Hún verður því erlendis og fjarri góðu gamni á morgun þegar flautað verður til leiksins mikilvæga gegn Þjóðverjum klukkan 15 á Laugardalsvelli.

„Það kemur hins vegar ekkert annað til greina en að sjá þennan leik og ég mun finna leiðir til þess, löglegar eða ólöglegar,“segir hún og skellir upp úr. Hún er ánægð með að miðarnir á leikinn hafi rokið út. „Að mínu mati er það sjálfsögð krafa að við fyllum Laugardalsvöllinn í fyrsta sinn á kvennalandsleik og í raun fáránlegt að þurfa að biðja fólk um að mæta. Það gerist varla stærra, að spila á móti stórliði Þýskalands í leik sem gæti tryggt okkur inn á HM í Frakklandi. Það er mikið rætt um karlaknattspyrnu annars vegar og kvennaknattspyrnu hins vegar og muninn á þessu tvennu varðandi umgjörð og fleira og við verðum bara að sýna það í verki að við styðjum stelpurnar og mæta á völlinn.“

Kristjana sér fyrir sér að það fari mikil orka hjá íslenska liðinu í stórleikinn gegn Þýskalandi og býst fastlega við breytingum á byrjunarliðinu milli hans og viðureignarinnar gegn Tékkum sem fram fer á þriðjudaginn. „Ég held að við komum til með að leika varfærnislega gegn Þjóðverjum og treysta á skyndisóknir og föst leikatriði, enda hafa föstu leikatriðin verið að skila sér í leik liðsins síðustu misseri. Ef þær eru þéttar aftast á vellinum og halda skipulagi hef ég trú á því að þetta falli með okkur,“segir hún og bætir við að fjarvera lykilleikmanna á borð við Hörpu Þorsteinsdóttur og Dagnýju Brynjarsdóttur sé vissulega áhyggjuefni en eigi þó líklega ekki eftir að ráða úrslitum.

„Þær hafa lagt svo mikið á sig og eiga svo innilega skilið að vera komnar í þessa stöðu sem þær eru í núna.“

„Auðvitað er alltaf slæmt að missa leikmenn úr hópnum, hvort sem þeir eru í byrjunarliðinu eða ekki, því það hefur áhrif á hópinn í heild sinni og getur hróflað við jafnvægi. Ég fékk bara í magann þegar ég sá að Harpa hafði slitið krossband, það var svo hræðilegt. En við erum með breiðan og góðan hóp og margar ungar stelpur sem hafa komið inn af miklum krafti svo ég hef litlar áhyggjur af þessu.“Íþróttafréttakonan lék lengi knattspyrnu sjálf, meðal annars í yngri flokkum með nokkrum af núverandi landsliðshetjunum. „Ég æfði til dæmis með Söru Björk Gunnarsdóttur, Fanndísi Friðriksdóttur og Berglindi Björgu Þorvaldsdóttur í Breiðabliki og hef fylgst með þessum gömlu liðsfélögum af aðdáun æ síðan. Ég er rosalega stolt af þeim. Þær hafa lagt svo mikið á sig og eiga svo innilega skilið að vera komnar í þessa stöðu sem þær eru í núna. Ég dáist að þessum stelpum,“ segir Kristjana.

Grjótharðir töffarar

„Það er nú þannig með mig að ég er nánast alltaf svartsýnn þegar liðin mín eru að spila, svo ég segi að Þýskaland vinni þennan leik 0-2. Ég vona hins vegar innilega að ég hafi rangt fyrir mér,“ segir Elvar Geir Magnússon, ritstjóri Fótbolti.net.

Elvar hefur fylgst vel með íslenska kvennalandsliðinu í gegnum árin og fylgdi liðinu meðal annars eftir á tvö síðustu stórmót þess, EM í Svíþjóð árið 2013 og EM í Hollandi árið 2017, þar sem hann vann að umfjöllun um liðið og var því í nokkru návígi við leikmenn, þjálfara og starfslið.

„Þegar maður fylgist svona vel með liðinu meðtekur maður betur móralinn í hópnum, hvernig leikmennirnir eru utan vallar og fleira í þeim dúr,“ segir Elvar Geir og hikar ekki þegar hann er spurður að því hvort eitthvert eitt atriði einkenni kvennalandsliðið öðrum fremur. „Það sem er mest einkennandi við íslenska kvennalandsliðið er hvað þetta eru hrikalega miklir töffarar. Þetta eru upp til hópa grjótharðar stelpur sem geisla af sjálfsöryggi og koma hreint fram. Mjög flottar fyrirmyndir sem eru ekkert að „feika það“. Þær eru einfaldlega náttúrulegir töffarar,“segir hann og tekur undir það að slíkir eiginleikar séu nánast lífsnauðsynlegir í fari knattspyrnukvenna þar sem þær hafi heldur betur þurft að hafa fyrir hlutunum í gegnum tíðina. „Það er enn langt í land hvað varðar muninn á umgjörð og fleira hjá körlum og konum í knattspyrnu, eins og ég hef séð á þessum stórmótum. Þróunin í kvennaknattspyrnunni hefur verið ör á undanförnum árum og gengið hratt, en nú finnst mér eins og aðeins sé farið að hægjast á því ferli aftur. En bilið fer þó minnkandi og þetta stefnir í rétta átt, sem er jákvætt.“

„Þetta eru upp til hópa grjótharðar stelpur sem geisla af sjálfsöryggi og koma hreint fram. Mjög flottar fyrirmyndir sem eru ekkert að „feika það“. Þær eru einfaldlega náttúrulegir töffarar.“

Eins og áður sagði var Elvar Geir staddur á EM í Frakklandi sumarið 2017 þar sem flest gekk á afturfótunum hjá íslenska liðinu og því mistókst að ná í stig. Bjóst hann við því þá að liðið yrði í þeirri stöðu að geta tryggt sig inn á HM einungis rúmu ári síðar?„Nei, ég get ekki sagt það, og ég bjóst alls ekki við því að þær myndu vinna Þýskaland á útivelli í fyrri leiknum í undankeppninni. En stelpurnar spila jafnan vel gegn erfiðum andstæðingum, eins og sýndi sig á EM þar sem besta frammistaðan kom gegn Frökkum. Sá leikur tapaðist í raun á einstaklingsmistökum en heildarframmistaðan var góð og uppleggið gekk fullkomlega upp.“

Ritstjórinn segir ekkert launungarmál að íslenska liðið eigi eftir að liggja í skotgröfunum í stórleiknum á morgun. „Freyr þjálfari hefur sjálfur talað um að jafntefli yrðu góð úrslit. Sóknarleikurinn hefur verið akkilesarhæll liðsins að undanförnu og ég gæti trúað því að Telma Hjaltalín Þrastardóttir úr Stjörnunni sem er nýliði í íslenska hópnum, gæti orðið óvænt vopn í þessum leik. Ég myndi ekki gapa þótt hún kæmi beint inn í byrjunarliðið, en ég get líka séð hana í stóru hlutverki af bekknum. Þær þýsku eru með bakið upp við vegg og þær eru meðvitaðar um að það yrði stórslys ef þær kæmust ekki á HM. Vonandi vinnur sú pressa með okkur,“ segir Elvar Geir.

LEIÐARI Í fyrsta skipti í sögu íslenska kvennalandsliðsins í fótbolta lítur út fyrir að uppselt verði á heimaleik þeirra á Laugardalsvelli, leik gegn Þýskalandi í undankeppni Heimsmeistaramótsins í knattspyrnu. Vinni íslensku stelpurnar leikinn eru þær búnar að tryggja sér þátttökurétt á HM sem fram fer í Frakklandi á næsta ári. Þegar íslenska karlalandsliðið var í sömu stöðu á síðasta ári og gat tryggt sér þátttökurétt á HM í leik á Laugardalsvelli gegn Kósóvó þá seldist upp á örfáum mínútum. Fyrir þann leik var þrenns konar miðaverð í boði eftir staðsetningu sætanna; 3000, 5000 og 7000 krónur og fimmtíu prósent afsláttur fyrir börn. Miðinn á leik kvennalandsliðsins og Þýskalands kostar 2000 krónur fyrir fullorðna og 500 krónur fyrir börn, sama hvar setið er.

Þrátt fyrir að miðar á þennan mikilvæga og einn stærsta leik kvennalandsliðsins séu á gjafverði sagði Klara Bjartmarz, framkvæmdastjóri KSÍ, í viðtali í morgunútvarpi Rásar 2 á þriðjudagsmorgun að fólk hefði í miklum mæli samband til að fá ókeypis miða, eða orðrétt: „Það verður að segjast eins og er, því miður, að fólk sækist meira í frímiða af því að þetta er kvennaleikur og ætlast til að fá frímiða. Við höfum fengið margar beiðnir um afslætti af barnaverði, fólk telur sig ekki eiga að borga inn á þennan leik því þetta er kvennaleikur.“

Hvernig gengur þessi jafna hins vegar upp í samfélagi þar sem fólk trú ir enn að konur séu minna virði en karlar?

Margir telja að á Íslandi ríki orðið fullkomið jafnrétti milli kynjanna, konur hafi öll sömu tækifæri og karlmenn, og sömu laun – sækist þær eftir þeim. Konur þurfa nefnilega bara að vera duglegri að biðja um kauphækkun, sækja um stjórnunarstöður og hætta að láta beita sig kynbundnu ofbeldi, svo dæmi séu tekin. Hvernig gengur þessi jafna hins vegar upp í samfélagi þar sem fólk trúir enn að konur séu minna virði en karlar? Að konur eigi að fá lægri laun en karlar eða jafnvel engin? Af hverju erum við tilbúin að láta konur spila fótbolta ókeypis meðan við borgum karlmönnum háar fjárhæðir fyrir það sama? Í fyrirlestri sem Þóra Helgadóttir, fyrrverandi landsliðskona í knattspyrnu, hélt á ráðstefnunni „Kyn og íþróttir“ lýsti hún muninum á aðbúnaði karla- og kvennalandsliðanna með skýrum hætti þegar hún sagði meðal annars: „Munurinn á kvennalandsliðinu og karlalandsliðinu var rosalegur. Þeir fengu að spila vináttuleiki og fengu dagpeninga. En það sem skipti mestu máli var að þeir fengu virðingu.“ Virðing. Er það kannski lykilorðið? Burtséð frá öllum launagreiðslum og peningamálum, erum við fær um að sýna konum þá virðingu að þær séu til jafns á við karla í þessu samfélagi? Getum við borgað þeim fullt verð fyrir þeirra vinnu? Getum við gert ráð fyrir þeim í stjórnunarstöðum? Getum við borið virðingu fyrir þeirra viðhorfum og vilja? Getum við hætt að beita þær ofbeldi? Getum við hætt að hlutgera þær? Getum við fyllt völlinn á landsleik kvennalandsliðsins í fótbolta og borgað uppsett verð?

Aðalheiður E. Ásmundsdóttir og Rúnar Gregory Muccio sem hafa fengist við áhugaljósmyndun um árabil opnuðu ljósmyndasýningu með blakmyndum í Smáralind 30. ágúst.

Á þeim degi voru nákvæmlega fjögur ár síðan þau hittust fyrir tilviljun í lyftunni í Perlunni. „Við vorum, hvort í sínu lagi, á leiðinni í kaffihitting á vegum Fókus, félags áhugaljósmyndara, þegar við lentum saman í lyftunni. Þar kviknaði strax einhver neisti á milli okkar sem hefur ekki slokknað síðan,“ segir þau og fagna þessum tímamótum með ljósmyndasýningunni HK blak – Gleði.

„Ljósmyndasýningin er einstök sinnar tegundar þar sem þetta er í fyrsta sinn á Íslandi sem haldin er sérstök ljósmyndasýning þar sem eingöngu eru myndir af íþróttafólki sem spilar blak. Blakíþróttin á sér ekki langa sögu á Íslandi og hefur verið stunduð hér í nokkra áratugi. Tilgangur sýningarinar er meðal annars að sýna hvernig hægt er að tvinna saman menningu og íþróttir í hinu listræna formi ljósmyndar, að kynna þá gleði sem ríkir í blakíþróttinni og jafnframt að sýna bæjarbúum, gestum og gangandi hversu magnað íþróttafólkið er sem stundar blak í HK,“ segja þau en ljósmyndasýningin samanstendur af myndum af leikmönnum HK í meistaraflokki karla og kvenna í blaki. Litirnir rauður og hvítur eru allsráðandi í myndunum ásamt bæði brosandi og einbeittu íþróttafólki.

Ljósmyndasýningin er á fyrstu hæð í Smáralindinni fyrir framan Lyfju og Zöru og stendur til 4. september.

Kamilla Ingibergsdóttir jógakennari hefur í tæp tvö ár boðið upp á hugleiðslu- og slökunarstundir með hreinu kakói frá Gvatemala. Þar býður hún fólki upp á að tengja sig inn á við, minnka áreitið í kringum sig og hávaðann frá hugsunum til að hlusta betur á það sem það virkilega vill og þarf.

„Þessar stundir hafa reynst fólki vel til að hvílast, losa um streitu og þreytu og gera eitthvað bara fyrir sig. Stundum gleymum við að hlúa að okkur sjálfum í amstri dagsins og þá sérstaklega andlegu hliðinni,“ segir Kamilla. „Innri vinna er einhver sú mesta erfiðisvinna sem til er og í mörgum tilfellum erum við frekar til í forðast hana til að þurfa ekki að mæta okkur sjálfum, horfa inn á við og gera eitthvað í því sem við sjáum eða finnum. Við forðumst okkur sjálf og deyfum með svo mörgum leiðum, til dæmis með áfengi, vímuefnum, kynlífi, símunum okkar, sjónvarpinu, mat, verslunarferðum og svo framvegis.“

Stundaránægja og blekking

Sjálf hefur hún verið að gera tilraunir á sjálfri sér síðustu ár og skoða hvað hún setur orkuna sína í og hvernig hún velur að verja tíma sínum. „Ég áttaði mig til dæmis á því fyrir rúmum tveimur árum að áfengi gerði ekki neitt fyrir mig heldur dró frekar úr mér þrótt, kjark og gleði og fékk mig til að efast um sjálfa mig. Þá þurfti ég að spyrja mig af hverju ég væri að þessu og þegar ég fann ekki gild svör ákvað ég að hætta að drekka.

„Ég áttaði mig til dæmis á því fyrir rúmum tveimur árum að áfengi gerði ekki neitt fyrir mig heldur dró frekar úr mér þrótt, kjark og gleði og fékk mig til að efast um sjálfa mig.“

Oft gerum við eitthvað bara vegna þess að allir aðrir gera það þrátt fyrir að það gefi okkur ekki neitt. Þá er gott að taka stöðuna. Það gerði ég og hef síðan yfirfært þetta á nánast öll svið lífs míns. Mér finnst mikilvægt að skoða reglulega hvað það er sem nærir mig og hvað dregur úr mér,“ segir hún og bætir við að það sem við gerum til að deyfa okkur eða fjarlægjast okkur sjálf veiti okkur oft stundaránægju. „En eins og orðið gefur til kynna varir hún stutt. Þetta er kannski leið til að láta okkur líða betur en svo virkar hún ekki, er bara blekking, og hvað þá? Þurfum við þá kannski meira eða þurfum við að skoða aðrar og varanlegri leiðir til að líða betur? Fyrir mig hefur það verið hugleiðsla, hollari lífsvenjur og gagnrýnin skoðun á það sem ég geri, bæði út á við og inn á við.“

Andleg hreinsun, hvíld og uppgötvun

Kamilla segir að kakóhugleiðslurnar hafi fljótlega undið upp á sig og núna býður hún upp á fjölbreytta tíma eins og kakó nidra- og kakó vinyasa-jógatíma. „Ég flyt líka inn kakó frá Gvatemala og skipulegg jóga- og kakóferðir þangað. Ég hef farið mjög mikið til Gvatemala undanfarin ár og varið tíma við Atitlan-vatnið en þar hefur myndast samfélag jógaiðkenda og andlega þenkjandi fólks alls staðar að. Ég fór með fyrsta hópinn í janúar og nú er ég farin að kynna næstu ferðir en síðast komust færri að en vildu. Ferðinar sem farnar verða í janúar og febrúar á næsta ári bjóða upp á jóga, hugleiðslu, andlega og líkamlega hreinsun með rými fyrir hvíld og uppgötvun. Þetta er ferð fyrir ævintýragjarnar manneskjur sem vilja líka líta inn á við og vinna í sér. Svo skemmir ekki að þetta er einn fallegasti staður sem ég hef komið á yfir ævina og ég hef ferðast mikið. Það er eitthvað svo töfrandi við Gvatemala og þess vegna fer ég þangað oft en þar hef ég líka gert miklar uppgötvanir um sjálfa mig sem hafa hjálpað mér að gera stærri breytingar í lífinu í hvert skipti sem ég kem aftur heim.“

Allar upplýsingar um Kamillu, viðburði og ferðina til Gvatemala má finna á kako.is.

Hildur Björnsdóttir, borgarfulltrúi Sjálfstæðisflokksins, vill að bólusetningar verði gerðar að skilyrði við inntöku í leikskóla Reykjavíkur. Ástæða þess er að mislingatilfellum hefur fjölgað í Evrópu á árinu, en 37 manns létust af völdum sjúkdómsins fyrstu sex mánuði ársins. Samkvæmt Þórólfi Guðnasyni sóttvarnarlækni er bólusetning á Íslandi ófullnægjandi, en hann leggst þó gegn þessari hugmynd Hildar.

Hildur vill sem sagt banna börnum sem ekki eru bólusett að fá inngöngu í leikskóla í höfuðborginni, nema um sérstakar undanþágur sé að ræða. Í viðtali við Stundina vegna málsins segist hún þó ekki vera hlynnt því að banna hluti. „Ég er almennt ekki fylgjandi boðum og bönnum, en ég tel ástæðu til að bregðast við hættunni,“ segir hún.

Í raun var eitt helsta stef Hildar í aðdraganda kosninga, og stuttu eftir þær, að Reykjavík ætti að vera frjálslynd borg þar sem íbúar hefðu val. Degi fyrir kosningar, þann 25. maí, skrifaði hún meðal annars í pistli í Fréttablaðinu: „Sjálfstæðisflokkurinn í Reykjavík er skýr valkostur fyrir þá sem vilja breytingar. Skýr valkostur fyrir þá sem vilja höfuðborg í forystu – samkeppnishæfa borg á innlenda sem alþjóðlega vísu. Leiðandi borg um grænar og vistvænar lausnir. Reykjavík í samkeppni um fólk og atgervi. Höfuðborg sem setur fólk og fjölskyldur í forgang. Borg sem tryggir frelsi og val. Umhverfi þar sem fólki líður vel. Reykjavík sem vinnur fyrir þig.“

Í júní skrifaði hún síðan í pistli í Fréttablaðinu: „Hvort heldur sem er – í stjórnarandstöðu eða meirihluta – stendur Sjálfstæðisflokkurinn alltaf fyrir frelsi og val. Einstaklingsfrelsi og atvinnufrelsi. Við viljum banna minna og leyfa meira.“

Þess má geta að Karen E. Halldórsdóttir, bæjarfulltrúi Sjálfstæðisflokksins í Kópavogi, hefur áður lagt fram svipaða hugmynd og Hildur, en þá var niðurstaða lögfræðideildar Kópavogsbæjar að bærinn mætti ekki upplýsa foreldra um þau börn á leikskólum sem ekki höfðu verið bólusett, með vísan í persónuverndarlög og þagnarskyldu á heilbrigðisstarfsfólk.

Nefnd um eftirlit með lögreglu (NEL) hefur ekki enn gefið út ársskýrslu fyrir árið 2017, en nefndin tók til starfa 1. janúar árið 2017.

Helgi Hrafn Gunnarsson, þingmaður Pírata, spurðist fyrir um skýrsluna þann 10. apríl síðastliðinn og fékk þau svör að hún væri væntanleg í lok apríl eða byrjun maí. Blaðamaður Mannlífs spurðist fyrir um skýrsluna þegar hún var enn ekki birt í byrjun sumars. Þann 19. júní fengust þau svör frá Drífu Kristínu Sigurðardóttur, lögfræðingi NEL, að skýrslan væri væntanleg á næstu vikum. Þann 28. ágúst, rúmum tveimur mánuðum síðar, spurði blaðamaður Mannlífs aftur um skýrsluna. Tveimur dögum síðar bárust þau svör frá Drífu að skýrslan væri væntanleg á næstu vikum. Ástæðan fyrir þessari töf segir Drífa vera annir við vinnu annarra verkefna. Helga Hrafni finnst leiðinlegt hve málið hefur tafist. Píratar höfðu lagt fram tillögu um sjálfstætt eftirlit með starfsemi og starfsháttum lögreglu sem hefði mjög víðfemt rannsóknarhlutverk. Píratar gagnrýndu nefndina á sínum tíma og töldu að slík nefnd þyrfti víðara verksvið en það sem NEL hefur, en nefndin fer ekki með ákæruvald í kærumálum.

„Nefndin hefur verið að störfum síðan í janúar 2017 og á þeim tíma höfum við þurft að halda að okkur höndum. Eina ástæðan fyrir því að við höfum ekki lagt aftur fram tillögu okkar er að við teljum mikilvægt að hún verði byggð á sem mestum og bestum gögnum og að fyrsta ársskýrsla nefndarinnar sé mjög mikilvægt gagn.“

Helgi Hrafn telur ólíklegt að NEL tryggi innra eftirlit með lögreglunni. „Ég vona auðvitað að hún komi mér algjörlega á óvart, en það er erfitt að fullyrða alveg blákalt um störf nefndar þegar engin gögn liggja enn þá fyrir um reynsluna af henni. Þó get ég sagt að ég skynja mjög litla trú á núverandi fyrirkomulagi af hálfu þeirra borgara sem ég hef talað við og telja á sér brotið af lögreglu, vegna þess einmitt að nefndin sinnir hvorki rannsóknar- né ákæruhlutverki. Fólk sem ég ræði þetta við sér ekki neina sérstaka von í því að kvartanir og kærur séu flokkaðar og áframsendar, væntanlega oftast til lögreglunnar sjálfrar. En eins og ég segi, ég vona auðvitað að vantrú mín og viðmælenda minna reynist tilefnislaus.“

Íslenskir ferðalangar hafa haft þann möguleika að greiða fyrir flugfargjöld hjá WOW air síðan árið 2015 og hjá Icelandair síðan snemma á þessu ári með Netgíró. Í ljósi frétta síðustu vikna um bága stöðu flugfélaganna hefur þeirri spurningu verið velt upp hver réttindi viðskiptavina eru sem greiða fyrir flugfargjöld með Netgíró ef allt fer á versta veg og flugfélögin fara í þrot.

Erfiður vetur framundan

Netgíró sendi frá sér fréttatilkynningu í gær þar sem kom fram að allar vörur og þjónusta sem greiddar eru með Netgíró falli undir lög um neytendavernd, sem þýðir að viðskiptavinir Netgíró fái endurgreitt ef flug falla niður, til dæmis vegna gjaldþrots flugfélags.

„Við vildum vera sannfærð og tryggja rétt okkar viðskiptavina og eyða öllum vafa um lagalega óvissu sem hefur ríkt í þessu máli. Við hjá Netgíró óskuðum því eftir fleiri en einu lögfræðiáliti og á meðan þessi álit lágu ekki fyrir vildum við ekki fullyrða neitt sem við gætum ekki staðið við, en nú hefur þessari óvissu verið eytt. Réttur neytenda er fullkomnlega tryggður með greiðslum með Netgíró,“ er haft eftir Helga Birni Kristinssyni, framkvæmdastjóra Netgíró, í fréttatilkynningunni.

Engin ferðatrygging fylgir

Mannlíf hafði samband við Guðjón Elmar Guðjónsson, þjónustustjóra Netgíró, og spurði hvort einhvers konar viðbragðsáætlun væri fyrir hendi hjá fyrirtækinu ef svo færi að flugfélögin færu í þrot.

„Við teljum ekki rétt að upplýsa um hvort og þá á hvaða sviði sérstakar viðbragðsáætlanir eru eða yrðu gerðar en Netgíró er að sjálfsögðu í stakk búið að bregðast við mismunandi aðstæðum á markaði,“ segir Guðjón og bætir við að engar fyrirætlanir séu uppi hjá Netgíró að hætta að bjóða ferðalöngum uppá að greiða fyrir flugfargjöld með Netgíró.

Guðjón gefur ekki upp hve margir hafa nýtt sér þennan möguleika síðan WOW air byrjaði að bjóða uppá hann árið 2015. Þá segir hann að þeir sem nýti sér þennan valkost þurfi að sjá sjálfir um að kaupa ferðatryggingu.

„Viðskiptavinir Netgíró greiða ekki nein árgjöld fyrir þjónustu fyrirtækisins og þar af leiðandi fylgir ekki ferðatrygging þegar keypt er flug.“

Hver verður næsti forstjóri Icelandair?

Íslenska A-landsliðið í kvennaknattspyrnunni leikur einn mikilvægasta leik sinn nokkru sinni á morgun þegar þær mæta þýska landsliðinu í undankeppni HM 2019 á Laugardalsvelli. Íslensku stelpurnar unnu fyrri leik liðanna í undankeppninni 3-2 og Sara Björk Gunnarsdóttir, fyrirliði liðsins, er hörð á því að þær eigi alla möguleika á að sigra þær aftur, þrátt fyrir að þýska liðið sé eitt það besta í heimi.

Sara Björk Gunnarsdóttir, fyrirliði íslenska kvennalandsliðsins sem mætir Þýskalandi á morgun, er baráttuglöð og vongóð og segir liðið mæta til leiks með því hugarfari að vinna og tryggja sér þar með sæti á HM á næsta ári. Liðið hafi sýnt það með sigri á þýska liðinu síðastliðið haust að það sé fullfært um að sigra í leiknum og í huga liðskvenna komi ekki annað til greina. Þær muni leggja allt undir.

Ég byrja á að spyrja Söru Björk hvort liðið sé vel undirbúið fyrir leikinn. „Já, ég held það,“ svarar hún. „Við spilum margar erlendis, í Evrópu eða Bandaríkjunum, og höfum verið með hugann við að spila með okkar liðum þar í sumar, en það kemur í ljós á æfingunni á eftir hvernig liðið hristist saman. Ég á ekki von á öðru en að það gangi vel.“

Eruð þið stressaðar fyrir þessum leik?
„Nei, en spenntar,“ svarar Sara Björk hress. „Þetta verður einn stærsti leikur sem við höfum spilað, gegn einu besta liði í heimi, barátta um sæti á HM næsta sumar og væntanlega fyrir fullsetnum áhorfendastúkum þannig að þetta er mjög spennandi leikur fyrir okkur og við teljum okkur eiga góða möguleika á sigri, þannig að við erum ekkert stressaðar, bara einbeittar.“

Heldurðu að fjarvera lykilleikmanna, eins og Hörpu Þorsteinsdóttur og Dagnýjar Brynjarsdóttur, geti sett strik í reikninginn?
„Auðvitað er mikið högg fyrir liðið að missa svona reynslumikla leikmenn og það verður erfitt að vera án þeirra en það koma aðrir leikmenn í staðinn, ég vona að fjarvera þeirra geri ekki gæfumuninn. Við verðum bara að berjast aðeins harðar.“

„ … við munum gefa allt í hann og berjast eins og ljónynjur, þú mátt treysta því. Það verður ekkert gefið eftir.“

Liðinu gekk ekki vel á Evrópumeistaramótinu síðastliðið sumar, er það betur í stakk búið núna til að sigra jafnerfiða andstæðinga og Þýskaland?
„Nei, það lagðist ekkert með okkur á EM í fyrra, það er rétt,“ segir Sara Björk og það þykknar í henni við spurninguna. „En það var nú í þriðja sinn sem við tókum þátt í Evrópumeistaramóti, svo við erum vanar því að keppa við erfiða andstæðinga. Ég veit ekki hvort liðið núna er betra en þá, en við unnum þýska liðið síðastliðið haust svo ég held við séum búnar að sýna að við eigum alveg erindi í keppni með þeim bestu. Við erum ekki einhverjir byrjendur.“

Eins og kunnugt er, spilar þú með Wolfsburg í Þýskalandi og barst fyrirliðaband Wolfsburg þegar liðið vann 5-0 stórsigur á Werder Bremen í þýsku úrvalsdeildinni fyrr á árinu. Heldurðu að reynsla þín í Þýskalandi eigi eftir að koma að góðum notum í leiknum á laugardaginn?
„Ég veit það nú ekki,“ segir hún og hugsar sig um. „Ég get auðvitað lagt til einhverja punkta um ýmsa leikmenn og við höfum spilað við þetta lið áður og þekkjum þær býsna vel. Ég held samt að reynsla mín úr þýsku úrvalsdeildinni hjálpi heilmikið til.“

Þið eruð með marga unga leikmenn, heldurðu að það komi til með að nýtast vel?
„Já, ég held það. Líka mikilvægt upp á framtíðina að ungu stelpurnar stígi upp og öðlist reynslu í svona stórum leikjum. Þær bæta það sem vantar upp á reynsluna með leikgleði og baráttuvilja og eru mikill styrkur fyrir liðið. Ég held að það sé bara jákvætt að yngja liðið upp.“

Ertu sátt við hópinn?
„Já, ég er það,“ segir Sara Björk ákveðin. „Þetta er gott lið, með marga sterka leikmenn og góðan liðsanda. Og við höfum sýnt það á undanförnum árum að við eigum erindi í hóp þeirra bestu í heiminum.“

Þú segir að þið þekkið þýska liðið vel, hverjir eru helstu styrkleikar þess?
„Þetta er eitt besta lið í heimi, eins og ég sagði áðan,“ segir hún. „Þær eru með marga rosalega sterka leikmenn, spila vel saman og eru mjög skipulagðar og agaðar. Það er alltaf erfitt að mæta þeim, en við erum ekkert hræddar við þær og, eins og ég sagði líka áðan, þá unnum við þær 3-2 í fyrri leiknum í undankeppninni í október í fyrra, og það á útivelli, þannig að ég tel okkur eiga góða möguleika á að sigra í þessum leik.“

Miðarnir á leikinn hafa rokið út og allt bendir til að uppselt verði á leikinn á laugardaginn, hvernig er að finna fyrir þessum áhuga?
„Það er bara frábært og við höfum stefnt að því lengi. Það skiptir máli að hafa sterkan hóp stuðningsmanna á bak við okkur og mjög hvetjandi að finna fyrir auknum áhuga á liðinu og leikjum þess. Við höfum líka sýnt það og sannað að við erum gott lið og það er gleðilegt að áhorfendur séu farnir að sjá það og meta okkur að verðleikum.“

Með hvaða hugarfari farið þið inn í þennan mikilvæga leik?
„Auðvitað með því hugarfari að vinna. Við förum í alla leiki með því hugarfari. Og það er enn meira undir í þessum leik en nokkurn tímann áður þannig að við munum gefa allt í hann og berjast eins og ljónynjur, þú mátt treysta því. Það verður ekkert gefið eftir.“

________________________________________________________________________

„Þetta gerist ekki stærra“
„Stemningin fyrir leiknum er mjög góð og maður finnur hvað allir í kringum mann eru spenntir. Það eru mjög margir á leiðinni á völlinn og ég býst við því að stemningin verði frábær,“ segir Agla María Albertsdóttir, spurð að því hvernig leikurinn leggist í hana. „Það væri auðvitað ótrúlegt afrek fyrir okkur að komast á HM og kvennafótboltann í heild sinni þar sem íslenska kvennalandsliðið hefur aldrei komist á HM. Það væri frábært að komast á stærsta sviðið í fótboltanum. Þetta gerist ekki stærra.“

Reynslunni ríkari eftir EM
„Á EM fengum við tækifæri til að spila þrjá stórleiki á stórum völlum fyrir framan fullt af fólki og sú reynsla hefur nýst okkur,“ segir Glódís Perla Viggósdóttir, innt eftir því hvort hún telji að liðið komi til með að geta nýtt sér reynsluna af EM í leiknum á morgun. „Til dæmis kunnum við betur að undirbúa okkur fyrir leiki, aðallega andlega og líka að stýra betur fókusnum og orkunni. Núna erum við bara spenntar að fara út á völlinn okkar og gefa allt í þessa tvo seinustu leiki í riðlinum!“

Hlakkar til að berjast við Þjóðverja
„Það að komast á HM hefði gríðarlega þýðingu fyrir mig og fyrir kvennaboltann á Íslandi. Það myndi klárlega styrkja stöðu kvenna í knattspyrnu á Íslandi og hvetja yngri stelpur til að æfa fótbolta. Sjálfar erum við gríðarlega vel „mótiveraðar”, samheldnin er mjög góð og hópurinn góð blanda af reyndari leikmönnum sem hafa tekið vel á móti þeim yngri og óreyndari. Stemningin í hópnum er mjög góð. Við erum allar mjög spenntar fyrir komandi verkefni og hlökkum til að berjast fyrir sæti á HM,” segir Svava Rós Guðmundsdóttir.

Góður liðsandi
„Mórallinn í liðinu er góður. Við stefnum allar í sömu átt,” segir Sigríður Lára Garðarsdóttir þegar blaðamaður spyr að því hvernig mórallinn sé innan liðsins í aðdraganda leiksins. „Það er kominn spenningur í okkur og við hlökkum til. Við erum reynslunni ríkari eftir EM. Lærðum margt þar sem gæti nýst okkur á HM á næsta ári. Það væri því algjör draumur að komast þangað. Það væri stórt afrek fyrir íslenskan kvennabolta.“

Draumur að komast á HM
Ingibjörgu Sigurðardóttur hefur dreymt um að spila á HM frá því að hún var krakki. „Það hefur alltaf verið stór draumur. Ég hef unnið hörðum höndum að því að komast þangað síðan ég var lítil,“ segir hún og finnst alveg ótrúlegt að hugsa til þess hversu ótrúlega nálægt liðið er að ná takmarkinu. „Sem hvetur maður enn meira til að gera þetta með stæl.“ Hún telur að þátttökuréttur liðsins á HM hefði mikla þýðingu fyrir kvennaboltann á Íslandi. „Ég hugsa að það yrði ungum stelpum hvatning til að æfa vel og fengi fólk almennt til að að sýna kvennaboltanum meiri áhuga.“

Tónlistarmaðurinn Friðrik Dór Jónsson gekk að eiga sína heittelskuðu, Lísu Hafliðadóttur, við fallega athöfn í Toskana-héraðinu á Ítalíu í dag.

Fjölmargir vinir og vandamenn voru viðstaddir brúðkaupið, og hafa raunar notið veðurblíðunnar á Ítalíu síðustu daga. Meðal gesta eru að sjálfsögðu bróðir Friðriks, tónlistarmaðurinn Jón Jónsson, tónlistargúrúinn Ásgeir Orri, leikkonan Júlíana Sara Gunnarsdóttir og tónlistarmaðurinn Ari Bragi Kárason.

Gestir hafa verið duglegir að birta myndir úr ævintýrinu á Instagram undir myllumerkinu #friðlísing, og má sjá nokkrar þeirra hér fyrir neðan.

Mannlíf óskar brúðhjónunum innilega til hamingju með daginn.

A post shared by Thelma Smára (@thelmasmara) on Aug 30, 2018 at 11:40am PDT

A post shared by Atli Mar Sigurdsson (@atlimsigurdsson) on Aug 30, 2018 at 11:59am PDT

A post shared by Ásgeir Orri Ásgeirsson (@asgeirorri) on Aug 30, 2018 at 11:56am PDT

A post shared by Fanney Ingvarsdóttir (@fanneyingvars) on Aug 30, 2018 at 11:15am PDT

A post shared by Hafliði Halldórs (@haflidih) on Aug 30, 2018 at 10:42am PDT

A post shared by Ari Bragi Kárason (@bragginn) on Aug 30, 2018 at 12:13pm PDT

A post shared by Rósa María (@rosamariaa) on Aug 30, 2018 at 10:52am PDT

A post shared by Eyjólfur Óli Eyjólfsson (@eyjolfur_oli) on Aug 30, 2018 at 10:11am PDT

A post shared by Thelma Smára (@thelmasmara) on Aug 30, 2018 at 9:39am PDT

Ég og Jón Jónsson að syngja og spila á melódikkuna í brúðkaupinu hans Frikka Dórs. #friðlísing .

A post shared by Olgalilja (@olgalilja) on Aug 30, 2018 at 9:21am PDT

Mannlíf fékk tvo sérfræðinga, Kristjönu Arnarsdóttur, íþróttafréttakonu á RÚV, og Elvar Geir Magnússon, ritstjóra Fótbolti.net, til að spá fyrir um úrslit leiks Íslenska kvennalandsliðsins gegn Þýskalandi á morgun.

Dáist að íslensku stelpunum

„Ég spái því að við vinnum þetta 2-1 og að Sara Björk Gunnarsdóttir og Elín Metta Jensen skori mörkin. Ég er bjartsýn á að stelpurnar spili vel og ég veit hreinlega að þær eru alveg ofboðslega tilbúnar í þetta verkefni. Það sést á þeim langar leiðir,“segir Kristjana Arnarsdóttir, íþróttafréttakona á RÚV.

Kristjana var ein þeirra sem sá um umfjöllun um HM karla í Rússlandi í sumar og er nú nýbyrjuð í síðbúnu og langþráðu sumarfríi. Hún verður því erlendis og fjarri góðu gamni á morgun þegar flautað verður til leiksins mikilvæga gegn Þjóðverjum klukkan 15 á Laugardalsvelli.

„Það kemur hins vegar ekkert annað til greina en að sjá þennan leik og ég mun finna leiðir til þess, löglegar eða ólöglegar,“segir hún og skellir upp úr. Hún er ánægð með að miðarnir á leikinn hafi rokið út. „Að mínu mati er það sjálfsögð krafa að við fyllum Laugardalsvöllinn í fyrsta sinn á kvennalandsleik og í raun fáránlegt að þurfa að biðja fólk um að mæta. Það gerist varla stærra, að spila á móti stórliði Þýskalands í leik sem gæti tryggt okkur inn á HM í Frakklandi. Það er mikið rætt um karlaknattspyrnu annars vegar og kvennaknattspyrnu hins vegar og muninn á þessu tvennu varðandi umgjörð og fleira og við verðum bara að sýna það í verki að við styðjum stelpurnar og mæta á völlinn.“

Kristjana sér fyrir sér að það fari mikil orka hjá íslenska liðinu í stórleikinn gegn Þýskalandi og býst fastlega við breytingum á byrjunarliðinu milli hans og viðureignarinnar gegn Tékkum sem fram fer á þriðjudaginn. „Ég held að við komum til með að leika varfærnislega gegn Þjóðverjum og treysta á skyndisóknir og föst leikatriði, enda hafa föstu leikatriðin verið að skila sér í leik liðsins síðustu misseri. Ef þær eru þéttar aftast á vellinum og halda skipulagi hef ég trú á því að þetta falli með okkur,“segir hún og bætir við að fjarvera lykilleikmanna á borð við Hörpu Þorsteinsdóttur og Dagnýju Brynjarsdóttur sé vissulega áhyggjuefni en eigi þó líklega ekki eftir að ráða úrslitum.

„Þær hafa lagt svo mikið á sig og eiga svo innilega skilið að vera komnar í þessa stöðu sem þær eru í núna.“

„Auðvitað er alltaf slæmt að missa leikmenn úr hópnum, hvort sem þeir eru í byrjunarliðinu eða ekki, því það hefur áhrif á hópinn í heild sinni og getur hróflað við jafnvægi. Ég fékk bara í magann þegar ég sá að Harpa hafði slitið krossband, það var svo hræðilegt. En við erum með breiðan og góðan hóp og margar ungar stelpur sem hafa komið inn af miklum krafti svo ég hef litlar áhyggjur af þessu.“Íþróttafréttakonan lék lengi knattspyrnu sjálf, meðal annars í yngri flokkum með nokkrum af núverandi landsliðshetjunum. „Ég æfði til dæmis með Söru Björk Gunnarsdóttur, Fanndísi Friðriksdóttur og Berglindi Björgu Þorvaldsdóttur í Breiðabliki og hef fylgst með þessum gömlu liðsfélögum af aðdáun æ síðan. Ég er rosalega stolt af þeim. Þær hafa lagt svo mikið á sig og eiga svo innilega skilið að vera komnar í þessa stöðu sem þær eru í núna. Ég dáist að þessum stelpum,“ segir Kristjana.

Grjótharðir töffarar

„Það er nú þannig með mig að ég er nánast alltaf svartsýnn þegar liðin mín eru að spila, svo ég segi að Þýskaland vinni þennan leik 0-2. Ég vona hins vegar innilega að ég hafi rangt fyrir mér,“ segir Elvar Geir Magnússon, ritstjóri Fótbolti.net.

Elvar hefur fylgst vel með íslenska kvennalandsliðinu í gegnum árin og fylgdi liðinu meðal annars eftir á tvö síðustu stórmót þess, EM í Svíþjóð árið 2013 og EM í Hollandi árið 2017, þar sem hann vann að umfjöllun um liðið og var því í nokkru návígi við leikmenn, þjálfara og starfslið.

„Þegar maður fylgist svona vel með liðinu meðtekur maður betur móralinn í hópnum, hvernig leikmennirnir eru utan vallar og fleira í þeim dúr,“ segir Elvar Geir og hikar ekki þegar hann er spurður að því hvort eitthvert eitt atriði einkenni kvennalandsliðið öðrum fremur. „Það sem er mest einkennandi við íslenska kvennalandsliðið er hvað þetta eru hrikalega miklir töffarar. Þetta eru upp til hópa grjótharðar stelpur sem geisla af sjálfsöryggi og koma hreint fram. Mjög flottar fyrirmyndir sem eru ekkert að „feika það“. Þær eru einfaldlega náttúrulegir töffarar,“segir hann og tekur undir það að slíkir eiginleikar séu nánast lífsnauðsynlegir í fari knattspyrnukvenna þar sem þær hafi heldur betur þurft að hafa fyrir hlutunum í gegnum tíðina. „Það er enn langt í land hvað varðar muninn á umgjörð og fleira hjá körlum og konum í knattspyrnu, eins og ég hef séð á þessum stórmótum. Þróunin í kvennaknattspyrnunni hefur verið ör á undanförnum árum og gengið hratt, en nú finnst mér eins og aðeins sé farið að hægjast á því ferli aftur. En bilið fer þó minnkandi og þetta stefnir í rétta átt, sem er jákvætt.“

„Þetta eru upp til hópa grjótharðar stelpur sem geisla af sjálfsöryggi og koma hreint fram. Mjög flottar fyrirmyndir sem eru ekkert að „feika það“. Þær eru einfaldlega náttúrulegir töffarar.“

Eins og áður sagði var Elvar Geir staddur á EM í Frakklandi sumarið 2017 þar sem flest gekk á afturfótunum hjá íslenska liðinu og því mistókst að ná í stig. Bjóst hann við því þá að liðið yrði í þeirri stöðu að geta tryggt sig inn á HM einungis rúmu ári síðar?„Nei, ég get ekki sagt það, og ég bjóst alls ekki við því að þær myndu vinna Þýskaland á útivelli í fyrri leiknum í undankeppninni. En stelpurnar spila jafnan vel gegn erfiðum andstæðingum, eins og sýndi sig á EM þar sem besta frammistaðan kom gegn Frökkum. Sá leikur tapaðist í raun á einstaklingsmistökum en heildarframmistaðan var góð og uppleggið gekk fullkomlega upp.“

Ritstjórinn segir ekkert launungarmál að íslenska liðið eigi eftir að liggja í skotgröfunum í stórleiknum á morgun. „Freyr þjálfari hefur sjálfur talað um að jafntefli yrðu góð úrslit. Sóknarleikurinn hefur verið akkilesarhæll liðsins að undanförnu og ég gæti trúað því að Telma Hjaltalín Þrastardóttir úr Stjörnunni sem er nýliði í íslenska hópnum, gæti orðið óvænt vopn í þessum leik. Ég myndi ekki gapa þótt hún kæmi beint inn í byrjunarliðið, en ég get líka séð hana í stóru hlutverki af bekknum. Þær þýsku eru með bakið upp við vegg og þær eru meðvitaðar um að það yrði stórslys ef þær kæmust ekki á HM. Vonandi vinnur sú pressa með okkur,“ segir Elvar Geir.

LEIÐARI Í fyrsta skipti í sögu íslenska kvennalandsliðsins í fótbolta lítur út fyrir að uppselt verði á heimaleik þeirra á Laugardalsvelli, leik gegn Þýskalandi í undankeppni Heimsmeistaramótsins í knattspyrnu. Vinni íslensku stelpurnar leikinn eru þær búnar að tryggja sér þátttökurétt á HM sem fram fer í Frakklandi á næsta ári. Þegar íslenska karlalandsliðið var í sömu stöðu á síðasta ári og gat tryggt sér þátttökurétt á HM í leik á Laugardalsvelli gegn Kósóvó þá seldist upp á örfáum mínútum. Fyrir þann leik var þrenns konar miðaverð í boði eftir staðsetningu sætanna; 3000, 5000 og 7000 krónur og fimmtíu prósent afsláttur fyrir börn. Miðinn á leik kvennalandsliðsins og Þýskalands kostar 2000 krónur fyrir fullorðna og 500 krónur fyrir börn, sama hvar setið er.

Þrátt fyrir að miðar á þennan mikilvæga og einn stærsta leik kvennalandsliðsins séu á gjafverði sagði Klara Bjartmarz, framkvæmdastjóri KSÍ, í viðtali í morgunútvarpi Rásar 2 á þriðjudagsmorgun að fólk hefði í miklum mæli samband til að fá ókeypis miða, eða orðrétt: „Það verður að segjast eins og er, því miður, að fólk sækist meira í frímiða af því að þetta er kvennaleikur og ætlast til að fá frímiða. Við höfum fengið margar beiðnir um afslætti af barnaverði, fólk telur sig ekki eiga að borga inn á þennan leik því þetta er kvennaleikur.“

Hvernig gengur þessi jafna hins vegar upp í samfélagi þar sem fólk trú ir enn að konur séu minna virði en karlar?

Margir telja að á Íslandi ríki orðið fullkomið jafnrétti milli kynjanna, konur hafi öll sömu tækifæri og karlmenn, og sömu laun – sækist þær eftir þeim. Konur þurfa nefnilega bara að vera duglegri að biðja um kauphækkun, sækja um stjórnunarstöður og hætta að láta beita sig kynbundnu ofbeldi, svo dæmi séu tekin. Hvernig gengur þessi jafna hins vegar upp í samfélagi þar sem fólk trúir enn að konur séu minna virði en karlar? Að konur eigi að fá lægri laun en karlar eða jafnvel engin? Af hverju erum við tilbúin að láta konur spila fótbolta ókeypis meðan við borgum karlmönnum háar fjárhæðir fyrir það sama? Í fyrirlestri sem Þóra Helgadóttir, fyrrverandi landsliðskona í knattspyrnu, hélt á ráðstefnunni „Kyn og íþróttir“ lýsti hún muninum á aðbúnaði karla- og kvennalandsliðanna með skýrum hætti þegar hún sagði meðal annars: „Munurinn á kvennalandsliðinu og karlalandsliðinu var rosalegur. Þeir fengu að spila vináttuleiki og fengu dagpeninga. En það sem skipti mestu máli var að þeir fengu virðingu.“ Virðing. Er það kannski lykilorðið? Burtséð frá öllum launagreiðslum og peningamálum, erum við fær um að sýna konum þá virðingu að þær séu til jafns á við karla í þessu samfélagi? Getum við borgað þeim fullt verð fyrir þeirra vinnu? Getum við gert ráð fyrir þeim í stjórnunarstöðum? Getum við borið virðingu fyrir þeirra viðhorfum og vilja? Getum við hætt að beita þær ofbeldi? Getum við hætt að hlutgera þær? Getum við fyllt völlinn á landsleik kvennalandsliðsins í fótbolta og borgað uppsett verð?

Aðalheiður E. Ásmundsdóttir og Rúnar Gregory Muccio sem hafa fengist við áhugaljósmyndun um árabil opnuðu ljósmyndasýningu með blakmyndum í Smáralind 30. ágúst.

Á þeim degi voru nákvæmlega fjögur ár síðan þau hittust fyrir tilviljun í lyftunni í Perlunni. „Við vorum, hvort í sínu lagi, á leiðinni í kaffihitting á vegum Fókus, félags áhugaljósmyndara, þegar við lentum saman í lyftunni. Þar kviknaði strax einhver neisti á milli okkar sem hefur ekki slokknað síðan,“ segir þau og fagna þessum tímamótum með ljósmyndasýningunni HK blak – Gleði.

„Ljósmyndasýningin er einstök sinnar tegundar þar sem þetta er í fyrsta sinn á Íslandi sem haldin er sérstök ljósmyndasýning þar sem eingöngu eru myndir af íþróttafólki sem spilar blak. Blakíþróttin á sér ekki langa sögu á Íslandi og hefur verið stunduð hér í nokkra áratugi. Tilgangur sýningarinar er meðal annars að sýna hvernig hægt er að tvinna saman menningu og íþróttir í hinu listræna formi ljósmyndar, að kynna þá gleði sem ríkir í blakíþróttinni og jafnframt að sýna bæjarbúum, gestum og gangandi hversu magnað íþróttafólkið er sem stundar blak í HK,“ segja þau en ljósmyndasýningin samanstendur af myndum af leikmönnum HK í meistaraflokki karla og kvenna í blaki. Litirnir rauður og hvítur eru allsráðandi í myndunum ásamt bæði brosandi og einbeittu íþróttafólki.

Ljósmyndasýningin er á fyrstu hæð í Smáralindinni fyrir framan Lyfju og Zöru og stendur til 4. september.

Kamilla Ingibergsdóttir jógakennari hefur í tæp tvö ár boðið upp á hugleiðslu- og slökunarstundir með hreinu kakói frá Gvatemala. Þar býður hún fólki upp á að tengja sig inn á við, minnka áreitið í kringum sig og hávaðann frá hugsunum til að hlusta betur á það sem það virkilega vill og þarf.

„Þessar stundir hafa reynst fólki vel til að hvílast, losa um streitu og þreytu og gera eitthvað bara fyrir sig. Stundum gleymum við að hlúa að okkur sjálfum í amstri dagsins og þá sérstaklega andlegu hliðinni,“ segir Kamilla. „Innri vinna er einhver sú mesta erfiðisvinna sem til er og í mörgum tilfellum erum við frekar til í forðast hana til að þurfa ekki að mæta okkur sjálfum, horfa inn á við og gera eitthvað í því sem við sjáum eða finnum. Við forðumst okkur sjálf og deyfum með svo mörgum leiðum, til dæmis með áfengi, vímuefnum, kynlífi, símunum okkar, sjónvarpinu, mat, verslunarferðum og svo framvegis.“

Stundaránægja og blekking

Sjálf hefur hún verið að gera tilraunir á sjálfri sér síðustu ár og skoða hvað hún setur orkuna sína í og hvernig hún velur að verja tíma sínum. „Ég áttaði mig til dæmis á því fyrir rúmum tveimur árum að áfengi gerði ekki neitt fyrir mig heldur dró frekar úr mér þrótt, kjark og gleði og fékk mig til að efast um sjálfa mig. Þá þurfti ég að spyrja mig af hverju ég væri að þessu og þegar ég fann ekki gild svör ákvað ég að hætta að drekka.

„Ég áttaði mig til dæmis á því fyrir rúmum tveimur árum að áfengi gerði ekki neitt fyrir mig heldur dró frekar úr mér þrótt, kjark og gleði og fékk mig til að efast um sjálfa mig.“

Oft gerum við eitthvað bara vegna þess að allir aðrir gera það þrátt fyrir að það gefi okkur ekki neitt. Þá er gott að taka stöðuna. Það gerði ég og hef síðan yfirfært þetta á nánast öll svið lífs míns. Mér finnst mikilvægt að skoða reglulega hvað það er sem nærir mig og hvað dregur úr mér,“ segir hún og bætir við að það sem við gerum til að deyfa okkur eða fjarlægjast okkur sjálf veiti okkur oft stundaránægju. „En eins og orðið gefur til kynna varir hún stutt. Þetta er kannski leið til að láta okkur líða betur en svo virkar hún ekki, er bara blekking, og hvað þá? Þurfum við þá kannski meira eða þurfum við að skoða aðrar og varanlegri leiðir til að líða betur? Fyrir mig hefur það verið hugleiðsla, hollari lífsvenjur og gagnrýnin skoðun á það sem ég geri, bæði út á við og inn á við.“

Andleg hreinsun, hvíld og uppgötvun

Kamilla segir að kakóhugleiðslurnar hafi fljótlega undið upp á sig og núna býður hún upp á fjölbreytta tíma eins og kakó nidra- og kakó vinyasa-jógatíma. „Ég flyt líka inn kakó frá Gvatemala og skipulegg jóga- og kakóferðir þangað. Ég hef farið mjög mikið til Gvatemala undanfarin ár og varið tíma við Atitlan-vatnið en þar hefur myndast samfélag jógaiðkenda og andlega þenkjandi fólks alls staðar að. Ég fór með fyrsta hópinn í janúar og nú er ég farin að kynna næstu ferðir en síðast komust færri að en vildu. Ferðinar sem farnar verða í janúar og febrúar á næsta ári bjóða upp á jóga, hugleiðslu, andlega og líkamlega hreinsun með rými fyrir hvíld og uppgötvun. Þetta er ferð fyrir ævintýragjarnar manneskjur sem vilja líka líta inn á við og vinna í sér. Svo skemmir ekki að þetta er einn fallegasti staður sem ég hef komið á yfir ævina og ég hef ferðast mikið. Það er eitthvað svo töfrandi við Gvatemala og þess vegna fer ég þangað oft en þar hef ég líka gert miklar uppgötvanir um sjálfa mig sem hafa hjálpað mér að gera stærri breytingar í lífinu í hvert skipti sem ég kem aftur heim.“

Allar upplýsingar um Kamillu, viðburði og ferðina til Gvatemala má finna á kako.is.

Hildur Björnsdóttir, borgarfulltrúi Sjálfstæðisflokksins, vill að bólusetningar verði gerðar að skilyrði við inntöku í leikskóla Reykjavíkur. Ástæða þess er að mislingatilfellum hefur fjölgað í Evrópu á árinu, en 37 manns létust af völdum sjúkdómsins fyrstu sex mánuði ársins. Samkvæmt Þórólfi Guðnasyni sóttvarnarlækni er bólusetning á Íslandi ófullnægjandi, en hann leggst þó gegn þessari hugmynd Hildar.

Hildur vill sem sagt banna börnum sem ekki eru bólusett að fá inngöngu í leikskóla í höfuðborginni, nema um sérstakar undanþágur sé að ræða. Í viðtali við Stundina vegna málsins segist hún þó ekki vera hlynnt því að banna hluti. „Ég er almennt ekki fylgjandi boðum og bönnum, en ég tel ástæðu til að bregðast við hættunni,“ segir hún.

Í raun var eitt helsta stef Hildar í aðdraganda kosninga, og stuttu eftir þær, að Reykjavík ætti að vera frjálslynd borg þar sem íbúar hefðu val. Degi fyrir kosningar, þann 25. maí, skrifaði hún meðal annars í pistli í Fréttablaðinu: „Sjálfstæðisflokkurinn í Reykjavík er skýr valkostur fyrir þá sem vilja breytingar. Skýr valkostur fyrir þá sem vilja höfuðborg í forystu – samkeppnishæfa borg á innlenda sem alþjóðlega vísu. Leiðandi borg um grænar og vistvænar lausnir. Reykjavík í samkeppni um fólk og atgervi. Höfuðborg sem setur fólk og fjölskyldur í forgang. Borg sem tryggir frelsi og val. Umhverfi þar sem fólki líður vel. Reykjavík sem vinnur fyrir þig.“

Í júní skrifaði hún síðan í pistli í Fréttablaðinu: „Hvort heldur sem er – í stjórnarandstöðu eða meirihluta – stendur Sjálfstæðisflokkurinn alltaf fyrir frelsi og val. Einstaklingsfrelsi og atvinnufrelsi. Við viljum banna minna og leyfa meira.“

Þess má geta að Karen E. Halldórsdóttir, bæjarfulltrúi Sjálfstæðisflokksins í Kópavogi, hefur áður lagt fram svipaða hugmynd og Hildur, en þá var niðurstaða lögfræðideildar Kópavogsbæjar að bærinn mætti ekki upplýsa foreldra um þau börn á leikskólum sem ekki höfðu verið bólusett, með vísan í persónuverndarlög og þagnarskyldu á heilbrigðisstarfsfólk.

Nefnd um eftirlit með lögreglu (NEL) hefur ekki enn gefið út ársskýrslu fyrir árið 2017, en nefndin tók til starfa 1. janúar árið 2017.

Helgi Hrafn Gunnarsson, þingmaður Pírata, spurðist fyrir um skýrsluna þann 10. apríl síðastliðinn og fékk þau svör að hún væri væntanleg í lok apríl eða byrjun maí. Blaðamaður Mannlífs spurðist fyrir um skýrsluna þegar hún var enn ekki birt í byrjun sumars. Þann 19. júní fengust þau svör frá Drífu Kristínu Sigurðardóttur, lögfræðingi NEL, að skýrslan væri væntanleg á næstu vikum. Þann 28. ágúst, rúmum tveimur mánuðum síðar, spurði blaðamaður Mannlífs aftur um skýrsluna. Tveimur dögum síðar bárust þau svör frá Drífu að skýrslan væri væntanleg á næstu vikum. Ástæðan fyrir þessari töf segir Drífa vera annir við vinnu annarra verkefna. Helga Hrafni finnst leiðinlegt hve málið hefur tafist. Píratar höfðu lagt fram tillögu um sjálfstætt eftirlit með starfsemi og starfsháttum lögreglu sem hefði mjög víðfemt rannsóknarhlutverk. Píratar gagnrýndu nefndina á sínum tíma og töldu að slík nefnd þyrfti víðara verksvið en það sem NEL hefur, en nefndin fer ekki með ákæruvald í kærumálum.

„Nefndin hefur verið að störfum síðan í janúar 2017 og á þeim tíma höfum við þurft að halda að okkur höndum. Eina ástæðan fyrir því að við höfum ekki lagt aftur fram tillögu okkar er að við teljum mikilvægt að hún verði byggð á sem mestum og bestum gögnum og að fyrsta ársskýrsla nefndarinnar sé mjög mikilvægt gagn.“

Helgi Hrafn telur ólíklegt að NEL tryggi innra eftirlit með lögreglunni. „Ég vona auðvitað að hún komi mér algjörlega á óvart, en það er erfitt að fullyrða alveg blákalt um störf nefndar þegar engin gögn liggja enn þá fyrir um reynsluna af henni. Þó get ég sagt að ég skynja mjög litla trú á núverandi fyrirkomulagi af hálfu þeirra borgara sem ég hef talað við og telja á sér brotið af lögreglu, vegna þess einmitt að nefndin sinnir hvorki rannsóknar- né ákæruhlutverki. Fólk sem ég ræði þetta við sér ekki neina sérstaka von í því að kvartanir og kærur séu flokkaðar og áframsendar, væntanlega oftast til lögreglunnar sjálfrar. En eins og ég segi, ég vona auðvitað að vantrú mín og viðmælenda minna reynist tilefnislaus.“

Íslenskir ferðalangar hafa haft þann möguleika að greiða fyrir flugfargjöld hjá WOW air síðan árið 2015 og hjá Icelandair síðan snemma á þessu ári með Netgíró. Í ljósi frétta síðustu vikna um bága stöðu flugfélaganna hefur þeirri spurningu verið velt upp hver réttindi viðskiptavina eru sem greiða fyrir flugfargjöld með Netgíró ef allt fer á versta veg og flugfélögin fara í þrot.

Erfiður vetur framundan

Netgíró sendi frá sér fréttatilkynningu í gær þar sem kom fram að allar vörur og þjónusta sem greiddar eru með Netgíró falli undir lög um neytendavernd, sem þýðir að viðskiptavinir Netgíró fái endurgreitt ef flug falla niður, til dæmis vegna gjaldþrots flugfélags.

„Við vildum vera sannfærð og tryggja rétt okkar viðskiptavina og eyða öllum vafa um lagalega óvissu sem hefur ríkt í þessu máli. Við hjá Netgíró óskuðum því eftir fleiri en einu lögfræðiáliti og á meðan þessi álit lágu ekki fyrir vildum við ekki fullyrða neitt sem við gætum ekki staðið við, en nú hefur þessari óvissu verið eytt. Réttur neytenda er fullkomnlega tryggður með greiðslum með Netgíró,“ er haft eftir Helga Birni Kristinssyni, framkvæmdastjóra Netgíró, í fréttatilkynningunni.

Engin ferðatrygging fylgir

Mannlíf hafði samband við Guðjón Elmar Guðjónsson, þjónustustjóra Netgíró, og spurði hvort einhvers konar viðbragðsáætlun væri fyrir hendi hjá fyrirtækinu ef svo færi að flugfélögin færu í þrot.

„Við teljum ekki rétt að upplýsa um hvort og þá á hvaða sviði sérstakar viðbragðsáætlanir eru eða yrðu gerðar en Netgíró er að sjálfsögðu í stakk búið að bregðast við mismunandi aðstæðum á markaði,“ segir Guðjón og bætir við að engar fyrirætlanir séu uppi hjá Netgíró að hætta að bjóða ferðalöngum uppá að greiða fyrir flugfargjöld með Netgíró.

Guðjón gefur ekki upp hve margir hafa nýtt sér þennan möguleika síðan WOW air byrjaði að bjóða uppá hann árið 2015. Þá segir hann að þeir sem nýti sér þennan valkost þurfi að sjá sjálfir um að kaupa ferðatryggingu.

„Viðskiptavinir Netgíró greiða ekki nein árgjöld fyrir þjónustu fyrirtækisins og þar af leiðandi fylgir ekki ferðatrygging þegar keypt er flug.“

Hver verður næsti forstjóri Icelandair?

Íslenska A-landsliðið í kvennaknattspyrnunni leikur einn mikilvægasta leik sinn nokkru sinni á morgun þegar þær mæta þýska landsliðinu í undankeppni HM 2019 á Laugardalsvelli. Íslensku stelpurnar unnu fyrri leik liðanna í undankeppninni 3-2 og Sara Björk Gunnarsdóttir, fyrirliði liðsins, er hörð á því að þær eigi alla möguleika á að sigra þær aftur, þrátt fyrir að þýska liðið sé eitt það besta í heimi.

Sara Björk Gunnarsdóttir, fyrirliði íslenska kvennalandsliðsins sem mætir Þýskalandi á morgun, er baráttuglöð og vongóð og segir liðið mæta til leiks með því hugarfari að vinna og tryggja sér þar með sæti á HM á næsta ári. Liðið hafi sýnt það með sigri á þýska liðinu síðastliðið haust að það sé fullfært um að sigra í leiknum og í huga liðskvenna komi ekki annað til greina. Þær muni leggja allt undir.

Ég byrja á að spyrja Söru Björk hvort liðið sé vel undirbúið fyrir leikinn. „Já, ég held það,“ svarar hún. „Við spilum margar erlendis, í Evrópu eða Bandaríkjunum, og höfum verið með hugann við að spila með okkar liðum þar í sumar, en það kemur í ljós á æfingunni á eftir hvernig liðið hristist saman. Ég á ekki von á öðru en að það gangi vel.“

Eruð þið stressaðar fyrir þessum leik?
„Nei, en spenntar,“ svarar Sara Björk hress. „Þetta verður einn stærsti leikur sem við höfum spilað, gegn einu besta liði í heimi, barátta um sæti á HM næsta sumar og væntanlega fyrir fullsetnum áhorfendastúkum þannig að þetta er mjög spennandi leikur fyrir okkur og við teljum okkur eiga góða möguleika á sigri, þannig að við erum ekkert stressaðar, bara einbeittar.“

Heldurðu að fjarvera lykilleikmanna, eins og Hörpu Þorsteinsdóttur og Dagnýjar Brynjarsdóttur, geti sett strik í reikninginn?
„Auðvitað er mikið högg fyrir liðið að missa svona reynslumikla leikmenn og það verður erfitt að vera án þeirra en það koma aðrir leikmenn í staðinn, ég vona að fjarvera þeirra geri ekki gæfumuninn. Við verðum bara að berjast aðeins harðar.“

„ … við munum gefa allt í hann og berjast eins og ljónynjur, þú mátt treysta því. Það verður ekkert gefið eftir.“

Liðinu gekk ekki vel á Evrópumeistaramótinu síðastliðið sumar, er það betur í stakk búið núna til að sigra jafnerfiða andstæðinga og Þýskaland?
„Nei, það lagðist ekkert með okkur á EM í fyrra, það er rétt,“ segir Sara Björk og það þykknar í henni við spurninguna. „En það var nú í þriðja sinn sem við tókum þátt í Evrópumeistaramóti, svo við erum vanar því að keppa við erfiða andstæðinga. Ég veit ekki hvort liðið núna er betra en þá, en við unnum þýska liðið síðastliðið haust svo ég held við séum búnar að sýna að við eigum alveg erindi í keppni með þeim bestu. Við erum ekki einhverjir byrjendur.“

Eins og kunnugt er, spilar þú með Wolfsburg í Þýskalandi og barst fyrirliðaband Wolfsburg þegar liðið vann 5-0 stórsigur á Werder Bremen í þýsku úrvalsdeildinni fyrr á árinu. Heldurðu að reynsla þín í Þýskalandi eigi eftir að koma að góðum notum í leiknum á laugardaginn?
„Ég veit það nú ekki,“ segir hún og hugsar sig um. „Ég get auðvitað lagt til einhverja punkta um ýmsa leikmenn og við höfum spilað við þetta lið áður og þekkjum þær býsna vel. Ég held samt að reynsla mín úr þýsku úrvalsdeildinni hjálpi heilmikið til.“

Þið eruð með marga unga leikmenn, heldurðu að það komi til með að nýtast vel?
„Já, ég held það. Líka mikilvægt upp á framtíðina að ungu stelpurnar stígi upp og öðlist reynslu í svona stórum leikjum. Þær bæta það sem vantar upp á reynsluna með leikgleði og baráttuvilja og eru mikill styrkur fyrir liðið. Ég held að það sé bara jákvætt að yngja liðið upp.“

Ertu sátt við hópinn?
„Já, ég er það,“ segir Sara Björk ákveðin. „Þetta er gott lið, með marga sterka leikmenn og góðan liðsanda. Og við höfum sýnt það á undanförnum árum að við eigum erindi í hóp þeirra bestu í heiminum.“

Þú segir að þið þekkið þýska liðið vel, hverjir eru helstu styrkleikar þess?
„Þetta er eitt besta lið í heimi, eins og ég sagði áðan,“ segir hún. „Þær eru með marga rosalega sterka leikmenn, spila vel saman og eru mjög skipulagðar og agaðar. Það er alltaf erfitt að mæta þeim, en við erum ekkert hræddar við þær og, eins og ég sagði líka áðan, þá unnum við þær 3-2 í fyrri leiknum í undankeppninni í október í fyrra, og það á útivelli, þannig að ég tel okkur eiga góða möguleika á að sigra í þessum leik.“

Miðarnir á leikinn hafa rokið út og allt bendir til að uppselt verði á leikinn á laugardaginn, hvernig er að finna fyrir þessum áhuga?
„Það er bara frábært og við höfum stefnt að því lengi. Það skiptir máli að hafa sterkan hóp stuðningsmanna á bak við okkur og mjög hvetjandi að finna fyrir auknum áhuga á liðinu og leikjum þess. Við höfum líka sýnt það og sannað að við erum gott lið og það er gleðilegt að áhorfendur séu farnir að sjá það og meta okkur að verðleikum.“

Með hvaða hugarfari farið þið inn í þennan mikilvæga leik?
„Auðvitað með því hugarfari að vinna. Við förum í alla leiki með því hugarfari. Og það er enn meira undir í þessum leik en nokkurn tímann áður þannig að við munum gefa allt í hann og berjast eins og ljónynjur, þú mátt treysta því. Það verður ekkert gefið eftir.“

________________________________________________________________________

„Þetta gerist ekki stærra“
„Stemningin fyrir leiknum er mjög góð og maður finnur hvað allir í kringum mann eru spenntir. Það eru mjög margir á leiðinni á völlinn og ég býst við því að stemningin verði frábær,“ segir Agla María Albertsdóttir, spurð að því hvernig leikurinn leggist í hana. „Það væri auðvitað ótrúlegt afrek fyrir okkur að komast á HM og kvennafótboltann í heild sinni þar sem íslenska kvennalandsliðið hefur aldrei komist á HM. Það væri frábært að komast á stærsta sviðið í fótboltanum. Þetta gerist ekki stærra.“

Reynslunni ríkari eftir EM
„Á EM fengum við tækifæri til að spila þrjá stórleiki á stórum völlum fyrir framan fullt af fólki og sú reynsla hefur nýst okkur,“ segir Glódís Perla Viggósdóttir, innt eftir því hvort hún telji að liðið komi til með að geta nýtt sér reynsluna af EM í leiknum á morgun. „Til dæmis kunnum við betur að undirbúa okkur fyrir leiki, aðallega andlega og líka að stýra betur fókusnum og orkunni. Núna erum við bara spenntar að fara út á völlinn okkar og gefa allt í þessa tvo seinustu leiki í riðlinum!“

Hlakkar til að berjast við Þjóðverja
„Það að komast á HM hefði gríðarlega þýðingu fyrir mig og fyrir kvennaboltann á Íslandi. Það myndi klárlega styrkja stöðu kvenna í knattspyrnu á Íslandi og hvetja yngri stelpur til að æfa fótbolta. Sjálfar erum við gríðarlega vel „mótiveraðar”, samheldnin er mjög góð og hópurinn góð blanda af reyndari leikmönnum sem hafa tekið vel á móti þeim yngri og óreyndari. Stemningin í hópnum er mjög góð. Við erum allar mjög spenntar fyrir komandi verkefni og hlökkum til að berjast fyrir sæti á HM,” segir Svava Rós Guðmundsdóttir.

Góður liðsandi
„Mórallinn í liðinu er góður. Við stefnum allar í sömu átt,” segir Sigríður Lára Garðarsdóttir þegar blaðamaður spyr að því hvernig mórallinn sé innan liðsins í aðdraganda leiksins. „Það er kominn spenningur í okkur og við hlökkum til. Við erum reynslunni ríkari eftir EM. Lærðum margt þar sem gæti nýst okkur á HM á næsta ári. Það væri því algjör draumur að komast þangað. Það væri stórt afrek fyrir íslenskan kvennabolta.“

Draumur að komast á HM
Ingibjörgu Sigurðardóttur hefur dreymt um að spila á HM frá því að hún var krakki. „Það hefur alltaf verið stór draumur. Ég hef unnið hörðum höndum að því að komast þangað síðan ég var lítil,“ segir hún og finnst alveg ótrúlegt að hugsa til þess hversu ótrúlega nálægt liðið er að ná takmarkinu. „Sem hvetur maður enn meira til að gera þetta með stæl.“ Hún telur að þátttökuréttur liðsins á HM hefði mikla þýðingu fyrir kvennaboltann á Íslandi. „Ég hugsa að það yrði ungum stelpum hvatning til að æfa vel og fengi fólk almennt til að að sýna kvennaboltanum meiri áhuga.“

Tónlistarmaðurinn Friðrik Dór Jónsson gekk að eiga sína heittelskuðu, Lísu Hafliðadóttur, við fallega athöfn í Toskana-héraðinu á Ítalíu í dag.

Fjölmargir vinir og vandamenn voru viðstaddir brúðkaupið, og hafa raunar notið veðurblíðunnar á Ítalíu síðustu daga. Meðal gesta eru að sjálfsögðu bróðir Friðriks, tónlistarmaðurinn Jón Jónsson, tónlistargúrúinn Ásgeir Orri, leikkonan Júlíana Sara Gunnarsdóttir og tónlistarmaðurinn Ari Bragi Kárason.

Gestir hafa verið duglegir að birta myndir úr ævintýrinu á Instagram undir myllumerkinu #friðlísing, og má sjá nokkrar þeirra hér fyrir neðan.

Mannlíf óskar brúðhjónunum innilega til hamingju með daginn.

A post shared by Thelma Smára (@thelmasmara) on Aug 30, 2018 at 11:40am PDT

A post shared by Atli Mar Sigurdsson (@atlimsigurdsson) on Aug 30, 2018 at 11:59am PDT

A post shared by Ásgeir Orri Ásgeirsson (@asgeirorri) on Aug 30, 2018 at 11:56am PDT

A post shared by Fanney Ingvarsdóttir (@fanneyingvars) on Aug 30, 2018 at 11:15am PDT

A post shared by Hafliði Halldórs (@haflidih) on Aug 30, 2018 at 10:42am PDT

A post shared by Ari Bragi Kárason (@bragginn) on Aug 30, 2018 at 12:13pm PDT

A post shared by Rósa María (@rosamariaa) on Aug 30, 2018 at 10:52am PDT

A post shared by Eyjólfur Óli Eyjólfsson (@eyjolfur_oli) on Aug 30, 2018 at 10:11am PDT

A post shared by Thelma Smára (@thelmasmara) on Aug 30, 2018 at 9:39am PDT

Ég og Jón Jónsson að syngja og spila á melódikkuna í brúðkaupinu hans Frikka Dórs. #friðlísing .

A post shared by Olgalilja (@olgalilja) on Aug 30, 2018 at 9:21am PDT