Tónlistar- og leikkonan Janelle Monáe frumsýndi myndband við nýja lagið sitt PYNK á YouTube í gær, en myndbandinu var leikstýrt af Emmu Westenberg.
Athygli vekur að Janelle, og nokkrir af dansurum hennar, klæðist buxum í myndbandinu sem líta út eins og píka. Í einu atriðinu liggur kona á milli fótleggja Janelle og er það mjög áhugavert sjónarspil.
„PYNK er blygðunarlaus fögnuður sköpunar, sjálfsástar, kynhneigðar og píkukrafts!“ stendur í lýsingu á myndbandinu á YouTube.
PYNK er lag af væntanlegri plötu Janelle, DIRTY COMPUTER. Það er hennar þriðja breiðskífa og kemur hún út þann 27. apríl næstkomandi.
„Hún vill ekki taka gleraugun af sér,“ segir Gretar Örn Bragason, faðir Elísabetar Evu sem kom í heiminn þann 18. desember árið 2016.
Gretar og kona hans, Eva Hrönn Jónsdóttir, birtu myndband á Facebook nú í morgunsárið þar sem Elísabet Eva sést setja á sig gleraugu í fyrsta sinn, en hún er með +8 á báðum augum. Gretar segir að Elísabet hafi fengið þessa greiningu fyrir mánuði síðan og í gær fékk hún loksins gleraugu.
Eins og sést í myndbandinu eru viðbrögð Elísabetar þegar hún sér fjölskyldu sína í fyrsta sinn algjörlega yndisleg. Eiginlega ólýsanleg, og segir myndbandið meira en mörg orð.
„Hún varð bara rosalega hissa og forvitin að sjá allt allt í rauninni í fyrsta sinn,“ segir stolti faðirinn.
En foreldrarnir, hvernig leið þeim á þessari stundu?
„Þetta var bara dásamleg stund. Ég hafði mestar áhyggjur af því að hún myndi kannski ekkert vilja með mann hafa eftir að hún sæi hvernig maður liti raunverulega út,“ segir Gretar og hlær.
Súludans hefur notið mikilla vinsælda síðustu misseri og margir sem hafa fallið fyrir íþróttinni.
Fyrirtækið og líkamsræktarstöðin Power Pole Sports hefur bryddað upp á skemmtilegum leik á Instagram, þar sem forsvarsmenn fyrirtækisins hvetja iðkendur súlusportsins að birta myndir og myndbönd af sér á súlunni að gera hversdagslega hluti.
Margar myndanna eru ansi hreint skemmtilegar, en þar sjást konur meðal annars sinna húsverkum, borða, leika á hljóðfæri og hjóla á súlunni. Við elskum þessar myndir og myndbönd!
Ný rannsókn sýnir fram á að fólk sem talar við hunda sína í háum tónum er í raun að hjálpa hvuttunum sínum að halda athygli. Þetta gæti einnig hjálpað til við að bæta samband á milli hundaeigenda og gæludýranna.
Rannsakendur við York háskóla í Bretlandi ákváðu að láta á það reyna hvort að hundatal hefði sömu jákvæðu áhrif á hundana og þegar fullorðnir tala við ungbörn.
„Auðvitað vitum við að hundar geta ekki lært að tala, þannig að við vildum vita hvort hundatal virkaði fyrir hunda, eða hvort það er bara eitthvað sem við notum á hundana okkar, þar sem við lítum á hunda sem hluta af fjölskyldunni, eins og feldi klædd börn,“ segir forsvarsmaður rannsóknarinnar, Alex Benjamin, í samtali við Huffington Post.
Mikil nánd myndast oft á milli hundaeigenda og hunda.
Samskipti manna við hunda hafa áður verið rannsökuð og þá hefur meðal annars komið fram að það að tala við hunda í háum tónum, líkt og við gerum við börn, hefur góð áhrif á hvolpa, en að það skipti ekki máli þegar talað er við gamla hunda. Niðurstöður Alex og teymis hennar sýna fram á að þetta samspil sé örlítið flóknara en áður hefur verið haldið fram.
Það er gott að tala við hunda.
Teymið framkvæmdi raddpróf á 69, fullorðnum hundum. Þau fóru þannig fram að hundarnir hlustuðu á eina manneskju sem talaði háum tónum og notaði frasa sem var beint að hundunum, eins og: Þú ert góður hundur, og Eigum við að fara í göngutúr? Önnur manneskja notaði mennska frasa sem tengdust hundunum ekki neitt, eins og Ég fór í bíó í gær. Rannsakendur fylgdust með hvert athygli hundanna leitaði á meðan manneskjurnar voru að tala og fylgdust með hvaða manneskju þeir drógust að.
Því næst blönduðu rannsakendur saman hundafrösum og mennskum frösum til að sjá hvort það væri tónn raddarinnar sem hundarnir löðuðust að, eða frasarnir sjálfir. Loks komust rannsakendur að því að hundarnir voru líklegri til að laðast að manneskjunni sem notaði frasa sem var beint að hundunum.
„Við höfum sýnt fram á að hundar skynja þessa týpu af tali og það gæti verið gagnlegt að nota hana þegar þú hittir hund í fyrsta sinn, eða ef þú ert að leika við hund vinar þíns til dæmis,“ segir Alex og bætir við orðum sem margir hafa eflaust þráð að heyra lengi:
„Og ef þú ert nú þegar að tala við þinn eiginn hund eins og barn geturðu notað þessa rannsókn til að réttlæta að þú ert ekki brjáluð hundamamma!“
Fyrsta stiklan úr stórmyndinni The Meg, úr smiðju Warner Bros. Pictures, er komin á netið, en meðal leikara í myndinni er Ólafur Darri Ólafsson.
Myndin fjallar um teymi sem berst við risahákarl, tegund sem allir héldu að væri útdauð. Eins og gefur að skilja er stiklan spennuþrungin og greinilegt að hér er um að ræða eina af stórmyndum þessa árs, en myndin verður frumsýnd vestan hafs þann 10. ágúst næstkomandi.
Meðal annarra leikara í myndinni eru Jason Statham, Li Bingbing, Cliff Curtis, Rainn Wilson og Ruby Rose. Leikstjóri myndarinnar er John Turteltaub, sem leikstýrði mörgum goðsagnakenndum myndum á tíunda áratug síðustu aldar, eins og Cool Runnings, While You Were Sleeping og Phenomenon. Handritið er byggt á metsölubókinni The Meg eftir Steve Alten.
Jeffrey Kendall, 26 ára gamall maður frá Connecticut, ákvað að deila sögu sinni á internetinu fyrir stuttu og hefur svo sannarlega vakið mikla athygli.
Svona leit Jeffrey út fyrir tæpum þremur árum.
Jeffrey bjó með móður sinni í Connecticut árið 2015 og hugsaði um hana eftir að hún fékk gúlp í heila.
„Hún var í dái og í endurhæfingu á sjúkrahúsi í sjö mánuði, þar til henni fór ekki lengur fram og var útskrifuð þar sem tryggingarnar vildu ekki lengur dekka kostnaðinn,“ segir Jeffrey í samtali við Love What Matters. Hann segist hafa glímt við lélega sjálfsmynd um langa hríð.
„Ég var of þungur sem ungmenni og var lagður í einelti í uppvextinum. Ég hef lifað lífinu með vandamál með líkamsímynd og sjálfstraust.“
Jeffrey var of þungur sem barn.
Setti allt í samhengi
Jeffrey segir að mikið hafi breyst þegar hann horfði upp á veika móður sína.
„Ég var búinn að sjá hana á sjúkrahúsinu þar sem hún gata varla talað, ég var búinn að sjá hana á gjörgæslu þar sem hún gat ekki andað. Ég var búinn að sjá hana á gólfinu þar sem hún gat ekki vaknað. Að sjá störu hennar án löngunar móður var niðurdrepandi. Það setti sjálfsvorkun og sársauka í samhengi,“ segir Jeffrey. Hann byrjaði að æfa með vini sínum, sem var líka á slæmum stað tilfinningarlega.
Svona lítur Jeffrey út í dag.
„Góður vinur minn átti líka erfitt eftir sambandsslit og þurfti hjálp við að koma sér í form. Þetta var fullkomin ástæða fyrir mig að byrja á einhverju nýju þar sem ég mat lífið betur eftir þetta sumar. Við byrjuðum hægt, á léttri lyftingaræfingu og ég samþykkti að gera armbeygjur á hverjum degi. Stuttu síðar vaknaði ég á morgnana og fór í göngutúra á meðan ég hlustaði á hressandi tónlist.“
Tíminn leið og Jeffrey byrjaði að setja sér fleiri og fleiri markmið í átt að betri lífsstíl.
„Ég byrjaði að skokka og taka spretti og ýtti sjálfum mér alltaf lengra og lengra. Ég fann nýjar leiðir til að æfa, ég fann YouTube-rásir eins og Yoga with Adriene til að hjálpa mér að æfa heima. Ég byrjaði að stunda jóga og æfa nánast á hverjum degi.“
Frábært hár.
Lítur út eins og Disney-prins
Nú hundrað vikum síðar hefur Jeffrey misst rúmlega þrjátíu kíló. Hann birti myndir af árangri sínum á samfélagsmiðlinum Reddit og létu viðbrögin ekki á sér standa. Margir Reddit-notendur velta fyrir sér hvort hann ætti ekki að leika í sjampóauglýsingum á meðan aðrir líktu honum við Disney-prins, þá sérstaklega þann úr Fríðu og dýrinu eftir að hann breytist í mann.
Líkindin eru sláandi.
„Ég gat varla sofið það kvöld, þetta var stórkostlegt. Athugasemdirnar voru allar svo hvetjandi,“ segir Jeffrey, en bætir við að móðir sín sé mesti innblásturinn í þessari vegferð sinni.
„Hún er seigasta manneskja sem ég þekki og kennir mér að vera þakklátur fyrir lífið.“
Íbúðin er 88 fermetrar og ásett verð er 52,5 milljónir króna. Íbúðin var öll tekin í gegn árið 2015 en hún er búin einu svefnherbergi og einu baðherbergi.
Skemmtilegt baðherbergi.
Auður er annáluð smekkmanneskja og því íbúðin öll hin glæsilegasta en henni fylgja einnig svalir með góðu útsýni, og gómsætri lykt eins og Auður segir sjálf í Facebook-færslu þar sem hún vekur athygli á fyrirhugaðri sölu.
Svefnherbergið er bjart og hlýlegt.
„Beint fyrir utan gluggann er að finna áræðanlegustu eldhúsklukku í allri Reykjavík í turni Hallgrímskirkju, og því ekki ástæða til að ofsjóða pasta, grænmeti eða annan mat. Auk þess er Eldsmiðjan á næsta horni og Snaps á því þar næsta, þannig að ef maður er ekki mikið fyrir að elda, þá er ekki hætta á að svelta. Úrvals útsýni til norðurs og suðurs. Á góðum sumardögum koma svalirnar að góðum notum, algjör stilla og oft á tíðum magnaður ilmur af eldbökuðum pizzum,“ skrifar Auður og bætir einnig við að opið hús sé í eigninni á morgun, 10. apríl, frá 17.15 til 17.45.
Hér er vel hægt að skapa minningar.
„Mín opna, bjarta og skemmtilega óhefðbunda íbúð er í sölu og á morgun er hægt að koma við og skoða. Ef að einhver veit um einverja opna, bjarta og óhefðbunda einstaklinga sem hefðu áhuga á að búa á besta stað í Þingholtunum, þá væri tilvalið að láta vita af Baldursgötunni.“
Íbúðin er á besta stað í Þingholtunum.
Þetta er ekki í fyrsta sinn sem Auður setur íbúðina á sölu, en samkvæmt frétt Smartlands í apríl í fyrra, fyrir næstum því sléttu ári, var íbúðin þá á markaðinum.
Geggjaður spegill.Nærliggjandi umhverfi íbúðarinnar er vægast sagt lifandi.
Washington-búanum Grace Goldstein brá heldur betur í brún þegar hún kom heim úr ferð í matvöruverslunina Trader Joe’s í síðustu viku. Þegar Grace tók upp úr pokunum sá hún dauða eðlu í grænkálspokanum sem hún keypti.
Í samtali við tímaritið People segir Grace að hún hafi fengið áfall þegar hún sá eðluna.
„Ég var ýmist í afneitun eða mig hryllti við þessu, sem varð til þess að ég bað kærastann minn í sífellu að skoða grænkálspokann og staðfesta að þetta væri eðla, og þá hrópaði ég og ýtti pokanum frá mér og neitaði að vera nálægt honum. Og síðan bað ég um að fá að sjá hana aftur,“ segir Grace.
Hún bætir við að hún hafi ekki vitað hvað hún ætti að gera við eðluna og því hafi hún ákveðið að setja hana inn í ísskáp til að varðveita hana.
„Við höfðum samband við Trader Joe’s og vorum ekki viss hvort við ættum að fara með hana aftur í hverfisbúðina okkar þar sem við keyptum pokann. Mig langaði ekki að hafa rotnandi eðlu í ísskápnum. Hún var aðeins of nálægt ísnum mínum.“
Vinkona Grace tísti mynd af pokanum og hefur fólk skrifað athugasemdir við myndina um sínar eigin hryllingssögur af Trader Joe’s. Talskona verslunarkeðjunnar segir í samtali við People að fyrirtækið sé að skoða kvörtun Grace.
Söngkonan Demi Lovato er ötul talskona jákvæðrar líkamsímyndar, en seint í síðustu viku birti hún myndir af sér á Instagram-sögu sinni sem hafa vakið talsverða athygli.
Á einni myndinni sést Demi grípa í hold sitt og sýna slitför sem hún er með um sig miðja:
Á annarri myndinni sýnir hún appelsínuhúðina fyrir neðan rassinn:
Og á þriðju myndinni sýnir hún að læri hennar snertast:
Demi hefur unnið mikið í að bæta sína eigin sjálfsmynd síðustu ár, en hún hefur barist við þunglyndi og fíkn, skaðað sjálfa sig og verið með átröskun. Um allt þetta og meira til tjáði hún sig um í heimildarmyndinni Simply Complicated sem var frumsýnd á YouTube í fyrra. Heimildarmyndina má horfa á hér fyrir neðan:
Knattspyrnukappinn Aron Einar Gunnarsson og eiginkona hans, fitness-drottningin Kristbjörg Jónasdóttir, eiga von á sínu öðru barni, en fyrir eiga þau soninn Óliver.
Þau birtu skemmtilegt myndband á Instagram til að tilkynna kynið á ófædda barninu, en það var Óliver sem fékk að leika stórt hlutverk í myndbandinu.
Í því sést Óliver sprengja stóra blöðru sem á stendur Boy or Girl?, eða Stelpa eða strákur? Þegar Óliver sprengir svo blöðruna koma fjölmargir bláir borðar úr henni og því ljóst að Aron og Kristbjörg eiga von á öðrum dreng.
Óliver var líka lykilmaður í því þegar hjónin opinberuðu óléttuna á samfélagsmiðlum. Þá birtu þau hjónin einfaldlega mynd af drengnum í bol sem á stóð: Ég er að verða stóribróðir.
Ari Eldjárn tekur þátt í Melbourne International Comedy Festival þessa dagana með uppistandssýninguna Pardon My Icelandic. Gagnrýnandinn Patricia Maunder hjá Artshub segir í nýlegri gagnrýni sinni að Ari hljóti að vera fyndnasti grínistinn á Norðurlöndunum, svo hrifin var hún af sýningu hans í Melbourne.
Patricia segir sýningu Ara vera einlæga og bætir jafnframt við að enskukunnátta hans sé mjög góð, þar með talið hinir ýmsu hreimar sem Ari gerir en hann er, eins og Íslendingar vita, afar góð eftirherma.
Patricia segir Ara túlka listilega vel þann ríg sem ríkir á milli Norðurlandanna og hvernig Íslendingar þoli ekki hvernig Danir, Svíar, Finnar og Norðmenn tali niður til Íslands, en að Íslendingar geri svo slíkt hið sama við frændur okkar í Færeyjum.
Þá er Patricia afar hrifin af gríninu sem Ari gerir um dóttur sína.
„Síðustu tíu mínúturnar af sýningunni snýr Ari sér að athugunum úr sínu eigin lífi, þá helst föðurhlutverkinu. Túlkun hans á þriggja ára dóttur sinni sem einræðisherra úr Game of Thrones, sem er fullkomnuð með hrokafullum, enskum hreim, lætur mann óska að sýningin sé í annan klukkutíma,“ skrifar Patricia og bætir við, um leið og hún gefur sýningunni fjórar stjörnur:
„Þetta er gríngull sem týnist klárlega ekki á milli tungumála.“
Heidi Montag gerði garðinn frægan um miðbik síðasta áratugar í sjónvarpsþáttunum The Hills. Í kjölfarið fór hún í ansi margar lýtaaðgerðir, þar á meðal brjóstastækkun og ýmsar aðgerðir á andliti sínu, en þessi umbreyting var vel skrásett af slúðurmiðlum um allan heim.
Í nýju viðtali við tímaritið Paper segist Heidi hafa verið hætt komin í einni af aðgerðunum.
„Spencer hélt að hann væri búinn að missa mig,“ segir Heidi, og vísar í eiginmann sinn Spencer Pratt, en þau gengu í það heilaga árið 2009.
„Ég dó í eina mínútu. Út af öllum þessum aðgerðum þurfti ég að vera undir eftirliti hjúkrunarfræðinga allan sólarhringinn og Spencer vildi ekki líta af mér. Ég var lögð inn á endurhæfingastöð og þurfti að fá Demerol til að lina sársaukann því hann var svo mikill,“ bætir hún við.
Heidi segir að litlu hafi munað að hún hafi farið yfir móðuna miklu í fyrrnefndri aðgerð þar sem hjarta hennar hætti að slá í eina mínútu.
„Öryggisverðirnir hringdu í Spencer og sögðu honum: Hjarta Heidi stoppaði. Hún hefur það ekki af. Og ég hefði auðveldlega geta dáið. Ég mæli ekki með því að láta skera sig upp og Demerol er ekki eitthvað til að leika sér með. Michael Jackson dó af því.“
Þessi lífsreynsla breytti lífi Heidi.
„Ég þurfti að horfa á sjálfa mig í spegli á hverjum degi í batanum og hugsa: Hvað var ég að gera við sjálfa mig? Hvernig komst ég hingað? Hvað er að gerast,“ segir Heidi og bætir við:
„Mér finnst ekkert svo stressandi að taka að mér að syngja þessi lög, þó þau séu svona vel þekkt og að vafalaust eigi flestir sína uppáhaldsflytjendur,” segir söngkonan Kristín Stefánsdóttir. Hún heldur tónleika til heiðurs Burt Bacharach í Salnum í Kópavogi þann 20. apríl, í tilefni af níræðisafmæli tónlistarmannsins þann 12. maí.
„Ég tengi mjög vel við þessi lög og skilaboðin í þeim og geri þau að mínum með því að mála myndina í huganum af sögunni sem verið er að segja. Þegar svona dásamleg tónsmíð rammar svo inn söguna er óhjákvæmilegt annað en að tengjast á sinn eigin hátt. Aðalgaldurinn er að þora að fara í hjarta sitt og opna það fyrir öðrum þannig að þeir geti tengst sínu hjarta í gegnum flutninginn,” segir Kristín, en meðal laga sem munu hljóma í Salnum eru The Look of Love, I Say a Little Prayer og What the World Needs Now.
Algjör suga á tónlist
„Mér finnst eins og lög Burt Bacharach séu svolítið samofin uppvexti mínum, á þann hátt á ég minningar af þessum lögum en ég var algjör suga á alls konar tónlist í uppvextinum. Lögin hans eiga það sameiginlegt að vera melódísk og þægileg fyrir eyrað en hafa einnig skýra sögu eða skilaboð sem ég held að sé líka galdurinn að vinsældunum. Maður á sterkar minningar af lögum eins og What the World Needs Now, That’s What Friends Are For, Close to You og Say a Little Prayer, svo fátt eitt sé nefnt. En það kom mér á óvart þegar ég fór að vinna þetta prógramm hvað hann á líka mörg ofboðslega falleg lög sem maður hafði sjaldan eða jafnvel aldrei heyrt. Þá gæti ég nefnt lög eins og Alfie, Who Will Speak for Love, Love’s the Answer og svona hádramatísk lög eins og This House is Empty Now. Lögin hans eru svo ljúf og fjalla flest öll á einn eða annan hátt um ástina og munum við kappkosta að koma þeim skilaboðum eins fallega og við getum til skila,” segir þessi hressa söngkona.
Fann kjólinn í útlöndum
Kristín er búin að leggja mikla vinnu í að skipleggja tónleikana og kom tónleikakjóllinn uppí hendurnar á henni fyrir utan landsteinana.
„Mér finnst stundum eins og ég sé að búa til listaverk þegar ég skipulegg svona tónleika. Öll smáatriði fæðast í huganum og verða svo að einni heild. Mikilvægur þáttur í þeirri mynd er auðvitað klæðnaðurinn. Mér fannst eins og klæðnaður minn þyrfti að vera í samræmi við orkuna í lögunum bæði í lit og mýkt. Þegar ég var svo í fríi í útlöndum í janúar kom rétti kjóllinn í fangið á mér. Mér fannst eins og þetta væri akkúrat kjóllinn sem hæfði lögunum; bæði rómantískur og mjúkur. Það skiptir miklu máli að líða vel í fötunum sem maður syngur í,” segir söngkonan og hlakkar mikið til tónleikanna, en auk grunnbands verða á sviðinu sex manna blásarateymi, fjögurra manna strengjasveit, þrjár bakraddir og Hreimur Örn Heimisson er gestasöngvari.
„Það hefur lengi blundað í mér að syngja lög eftir Burt Bacharach. Eftir að ég sá hann í Hörpu fyrir nokkrum árum fór myndin að taka á sig skýrara form og þegar ég svo flutti lagið The Look of Love á tónleikum í Noregi í fyrrasumar ákvað ég að nú myndi ég láta þennan draum rætast á nítugasta afmælisári tónlistarmannsins. Hlynur Þór Agnarsson píanóleikari, samþykkti að taka að sér útsetningar og hljómsveitarstjórn og við lögðumst í hugmyndavinnu. Það kom ekkert annað til greina en að gera þessum lögum góð skil og fá með okkur einvala lið tónlistarmanna,” segir Kristín og bætir við:
„Það sem ég held að muni koma áhorfendum mest á óvart er hvað þetta verður stór og flottur viðburður. Við verðum alls nítján manns að flytja tónlistina þar sem valinn maður er í hverju rúmi. Einnig munum við vera með ýmsan fróðleik um Burt Bacharach; ævi hans og lífshlaup og fjalla um þá sem sömdu með honum tónlistina og textana. Við söngvararnir fimm munum svo hjálpast að við syngja lögin eftir því sem okkur finnst hæfa hverju lagi fyrir sig. That´s what friends are for…”
„Dagurinn byrjaði voða rólega og við giftum okkur klukkan þrjú í gamalli kirkju í Innri Njarðvík,“ segir Ingibjörg Ósk Jóhannsdóttir. Hún gekk að eiga sinn heittelskaða, Þorstein Inga Hjálmarsson, á sjálfan þjóðhátíðardaginn 17. júní árið 2016.
Báðir foreldrar Ingibjargar eru látnir og því þurfti hún að velja einhvern annan til að leiða sig upp að altarinu á þessum stóra degi. Bæði Ingibjörg og Þorsteinn voru sammála um að það verðuga verkefni ætti að vera sett í hendur einkadóttur þeirra, Huldu Sigurlaugar, sem þá var níu ára gömul.
„Okkur fannst hún tilvalin. Ég var strax ákveðin að velja hana,“ segir Ingibjörg, en Huldu fannst þetta mikill heiður.
„Hún var svo stolt og ánægð og fannst þetta gaman.“
Fann fyrir nærveru foreldranna
Ingibjörg saknaði foreldra sinna á brúðkaupsdaginn, en var í staðinn umvafin stórum systkinahópi.
„Vissulega var skrýtið að hafa ekki foreldra sína með, en ég fann fyrir nærveru þeirra. Þetta var mitt fyrsta brúðkaup og ég kem úr stórum systkinahóp og þau komu öll,“ segir Ingibjörg og bætir við að hún hafi verið afskaplega ánægð með daginn.
„Dagurinn var yndislegur. Við héldum veisluna heima með okkar nánustu, fengum gott veður, þó það væri 17. júní,“ segir Ingibjörg og hlær. „Við erum með stórt hús og stóran pall þannig að þetta gekk vel og allt gekk upp, nema brúðartertan sem ég pantaði var mislukkuð. Ég varð fyrir vonbrigðum með hana.“
Punkta allt niður og vera tímanlega
Hvað með góð ráð fyrir stóra daginn, lumar Ingibjörg á nokkrum slíkum?
„Já, það er best að punkta allt niður sem maður ætlar að hafa og gera. Og vera tímanlega í öllu svo það verði ekki mikið stress á stóra daginn.“
Ingólfur Ágústsson og Sigríður Etna Marinósdóttir voru búin að vera saman í sjö ár þegar þau ákváðu að láta pússa sig saman þann 12. júlí árið 2014 á Tálknafirði. Helgina fyrir brúðkaupið var Ingólfur steggjaður af vinum og fjölskyldumeðlimum, steggjun sem átti svo sannarlega eftir að draga dilk á eftir sér.
„Ég var nánast allsber allan daginn og meðal annars hent ofan í sjóinn í Reykjavík tvisvar sinnum. Strax eftir helgi fór ég að finna fyrir eymslum í hálsinum en var ekkert að spá mikið í það enda nóg að gera bæði í vinnu og að undirbúa brúðkaup sem átti að halda í um fimm hundruð kílómetra fjarlægð,“ segir Ingólfur, sem varð þó örlítið áhyggjufullur þegar nær dró stóra deginum.
„Á fimmtudagsmorgni byrjuðum við að græja brúðkaupssalinn og ég fann að mér leið ekki vel. Ég var að reyna að láta lítið fyrir því fara til að gera brúðina ekki áhyggjufulla. Svo var ég að sækja eitthvað inn í áhaldageymslu og var alveg bugaður og lagðist á dýnu og sofnaði. Eftir einhvern tíma skildi konan mín ekkert í hvar ég gæti verið. Svo var henni tilkynnt að ég væri sofandi inn í áhaldageymslu. Hún kom og vakti mig og botnaði ekkert í þessari hegðun hjá mér. Þá sagði ég henni að ég væri orðinn slappur og að ég héldi að ég væri kominn með streptókokka, en ég hafði fengið þá áður,“ segir Ingólfur sem fór til læknis á Patreksfirði í kjölfarið.
„Læknirinn var fljótur að greina mig og skrifaði upp á sterk sýklalyf og lét mig taka þrefaldan skammt. Hann sagði mér að ég ætti að hvíla mig fram að brúðkaupi, reyna að vera sem minnst með konunni, til að smita hana ekki, og alls ekki kyssa hana.“
Ingólfur tók ekki eftir miklum óþægindum á brúðkaupsdaginn, nema hann var með litla matarlyst.
Í móki nóttina fyrir brúðkaup
Daginn eftir, á föstudeginum, streymdu fjölskyldumeðlimir og vinir á Tálknafjörð, en Ingólfur neyddist til að láta lítið fyrir sér fara. „Ég gat ekki tekið á móti þeim eða aðstoðað við að gera brúðkaupið klárt, lá bara hundveikur uppi í rúmi og hálfvankaður af lyfjunum. Nóttina fyrir brúðkaupið var ég víst bara í einhverju móki, svitnaði svakalega og konan gat ekki sofið af áhyggjum. Hún var svo smeyk um að það þyrfti að fresta brúðkaupinu og allir hefðu þá komið í fýluferð vestur. Gaman að segja frá því að hún svaf á milli hjá foreldrum sínum þessa nótt. Þau reyndu að fullvissa óléttu, stressuðu stelpuna sína um að allt yrði í lagi og að brúðkaupsdagurinn yrði góður,“ segir Ingólfur og brosir þegar hann rifjar upp þessa daga.
Þegar sjálfur brúðkaupsdagurinn rann svo upp var Ingólfur enn slappur, en eins og fyrir örlög breyttist eitthvað í athöfninni sem var töfrum líkast.
„Við hjónin komum síðust í kirkjuna og gengum saman inn kirkjugólfið. Eins væmið og það hljómar þá losnaði um allt í hálsinum á sama andartaki og dyrnar inn í kirkjuna opnuðust og við hjónin gengum inn gólfið. Dagurinn var skemmtilegur og góður svo ég tók ekki eftir neinum óþægindum, nema ég var ekki með mikla matarlyst,“ segir Ingólfur, sem er enn leiður yfir því að hafa ekki getað tekið virkan þátt í þessum mikilvæga degi sökum veikindanna.
Leiðinlegt að taka ekki þátt í undirbúningnum
„Brúðkaupsdagurinn heppnaðist vel þrátt fyrir veikindin og ég er þakklátur fyrir það. En mér finnst enn þá leiðinlegt að hafa ekki geta tekið þátt í undirbúningnum. Salurinn var orðinn alveg klár snemma á föstudegi, því við hjónin ætluðum að eyða restinni af föstudeginum í að taka á móti fjölskyldu og vinum. En við gerðum það ekki og það var pínu súrt. Það voru margir duglegir að taka Snapchat og senda okkur og fannst okkur það mjög skemmtilegt. Að sjá vini okkar sem þekktust ekki fyrir brúðkaupið vera að hittast á tjaldstæðinu og þess háttar,“ segir hann. Það stendur svo ekki á svörunum þegar hann er beðinn um ráð fyrir tilvonandi brúðhjón.
„Númer eitt, tvö og þrjú ráðlegg ég fólki að steggja og gæsa ekki brúðhjón viku fyrir brúðkaup. Númer fjögur, ef þið eruð eitthvað slöpp, kíkið strax til læknis! Númer fimm, reynið að vera skipulögð og tímalega í undirbúningnum, það var mjög gott að vera búinn að gera allt klárt snemma á föstudeginum. Númer sex, hafið daginn ykkar nákvæmlega eins og þið viljið hafa hann. Ekki efast um ákvarðanir sem þið takið tengdar brúðkaupinu. Bjóðið bara þeim sem þið viljið, óháð því sem „búist er við af manni“. Það er æðisleg tilfinning að ganga inn kirkjugólfið og vera umkringdur fólki sem manni þykir vænt um. Veljið matinn, drykkina, tónlistina og fleira nákvæmlega eins og þið viljið hafa það. Þetta er ykkar dagur.“
Teikningar eftir förðunarfræðinginn Ísak Frey vekja athygli.
Fyrirsætan Carzon Zehner, sem er meðal annarra nýja andlit Mulberry, förðuð af Ísak og mynduð af Sögu Sig. Tengingin við teikningar Ísaks er augljós.
„Þetta eru teikningar sem ég hef verið að skapa allt frá árinu 2013 en hef ekkert verið að flagga þeim. Þær komu í raun ekki fyrir sjónir almennings fyrr en seint á síðasta ári í íslenska tímaritinu Blæti,“ segir förðunarfræðingurinn Ísak Freyr um umræddar teikningar en þær hafa verið að vekja athygli erlendis að undanförnu og eru orðnar eftirsóttar af viðskiptavinum hans, stórum nöfnum innan tísku-heimsins.
„Þetta var frekar fyndið en þegar ég fór að tala um myndirnar við kúnna sem ég var að farða þá vildu þeir endilega fá að sjá þær og í framhaldinu hafa margir þeirra hafa óskað eftir myndum eftir mig.“
Ísak segist hafa byrjað að teikna myndirnar þegar hann bjó í listakommúnu í Camberwell Green í London 2013, en á þeim tíma hafi hann verið að reyna finna sjálfan sig og haft óstjórnlega þörf á að skapa. „Það var eins og þessi sköpunartilfinning kæmi frá einhverjum innri kjarna í líkamanum sem ég átti erfitt með að nálgast,“ segir hann. „Það var eins og eitthvað væri að reyna að brjótast út.“ Það hafi hins vegar ekki verið fyrr en amma hans hvatti hann til dáða sem hann ákvað að láta slag standa. „Henni fannst agalegt að ég skyldi ekki vera að teikna eins og ég hafði gert þegar ég var yngri og hvatti mig áfram. Þetta kveikti á einhverju hjá mér og í framhaldinu keypti ég liti og blöð og fór að teikna.“
Myndir eftir Ísak Frey eru farnar að vekja athygli.
Á þeim tíma segist hann hafa átt erfitt með að koma hugsunum sínum í orð, „hausinn hafi verið að springa“ eins og hann orðar það en hann hafi náð að tjá sig í gegnum myndirnar og oft teiknað þær undir áhrifum áfengis, það geri hann hins vegar ekki lengur. Gaman sé að sjá hvað þær hafi breyst mikið á þessum fimm árum.
„Í dag líður mér betur, ég er á allt öðrum stað sem er bjartari og betri og teikningarnar endurspegla það,“ segir hann.
Spurður hvort hann sé mögulega farinn að velta fyrir sér að skipta um starfsvettvang, þvertekur hann fyrir það. „Nei, ég vill alls ekki hætta að farða því mér finnst svo gaman að vinna með fólki. En, ég er farinn að velja vandlega verkefni sem ég tek mér fyrir hendur svo ég geti teiknað meira. Að því sögðu lít ég svo á að það sé beintenging á milli þessara listforma og ef eitthvað er þá hef ég óhikað nýtt myndlistina í förðuninni í gegnum tíðina. Þetta tvennt helst í hendur.“
Símanotkun Íslendinga er eitthvað sem kemst reglulega í umræðuna og virðast margir eiga við það vandamál að stríða að vera of mikið í símanum. Grunnskólar eru farnir að banna síma á kennslutíma og Barnaheill hefur lagt sín lóð á vogarskálarnar með símalausum sunnudögum.
Mikil umræða hefur verið um að börn og unglingar noti snjalltæki of mikið síðustu misseri, en foreldrarnir hafa oft gleymst í þessari umræðu. Rannsóknir hafa sýnt að ef foreldri er mikið í símanum, jafnvel marga klukkutíma í dag, geti það valdið því að það tengist börnum sínum ekki nægilega vel, sé fjarlægt, eigi erfitt með svefn og geti þróað með sér kvíða.
Við ákváðum því að spyrja æðstu foreldra og fyrirmyndir þjóðarinnar, sjálfa ráðherra í ríkisstjórn, um þeirra símanotkun.
———
Forsætisráðherraístuði
Katrín Jakobsdóttir forsætisráðherra.
Hvernig síma áttu?
„Ég á iPhone 6. Held ég.“
Hvað telur þú að þú eyðir miklum tíma á degi hverjum í símanum?
„Ætli ég sé ekki í símanum að tala eða svara póstum ef ég er ekki á fundum. Á kvöldin legg ég þó símann til hliðar.“
Í hvað notarðu símann annað en að svara tölvupóstum, símtölum og smáskilaboðum?
„Bíddu ertu ekki að elta mig á Snapchat? Ég er með forsætisráðherraístuði. Djók.“
Hvaða smáforrit í símanum þínum notarðu mest?
„Er SMS-smáforrit? Nei annars, ég hef mikið notað strætó-appið sem mér finnst frábært.“
Hvað heldur þú að þú gætir verið lengi án símans?
„Ég vil trúa því að ég gæti verið án hans alla ævi en líklega í raun ekki nema í svona 4 mínútur í mesta lagi.“
———
Messenger mest notað
Svandís Svavarsdóttir heilbrigðisráðherra.
Hvernig síma áttu?
„iPhone 7.“
Hvað telur þú að þú eyðir miklum tíma á degi hverjum í símanum?
„1 til 2 tímum.“
Í hvað notarðu símann annað en að svara tölvupóstum, símtölum og smáskilaboðum?
„Hlusta á podcast, Spotify og útvarp.“
Hvaða smáforrit í símanum þínum notarðu mest?
„Messenger.“
Hvað heldur þú að þú gætir verið lengi án símans?
„Ótakmarkað.“
———
Minni tími fyrir framan tölvuna
Kolbrún Þórdís Reykfjörð Gylfadóttir, ferðamála-, iðnaðar- og nýsköpunarráðherra.
Hvernig síma áttu?
„Ég á iPhone.“
Hvað telur þú að þú eyðir miklum tíma á degi hverjum í símanum?
„Það er misjafnt eftir dagskránni og til dæmis minna um helgar en á virkum dögum. Líklega of miklum þó. En í staðinn eyði ég minni tíma fyrir framan tölvuna.“
Í hvað notarðu símann annað en að svara tölvupóstum, símtölum og smáskilaboðum?
„Samfélagsmiðla, les fréttir, tek myndir og hlusta á Spotify.“
Hvaða smáforrit í símanum þínum notarðu mest?
„Tölvupóstinn, Facebook og Spotify.“
Hvað heldur þú að þú gætir verið lengi án símans?
„Vonandi lengi en ég þyrfti þá að tryggja með öðrum hætti að fólk gæti náð í mig.“
———
Gæti verið án síma í innan við mínútu
Ásmundur Einar Daðason, félags- og jafnréttismálaráðherra.
Hvernig síma áttu?
„iPhone.“
Hvað telur þú að þú eyðir miklum tíma á degi hverjum í símanum?
„Allt of miklum.“
Í hvað notarðu símann annað en að svara tölvupóstum, símtölum og smáskilaboðum?
„Skoða fréttir á Netinu.“
Hvaða smáforrit í símanum þínum notarðu mest?
„Smáforrit fyrir tölvupóst og svo netvafrann (Chrome).“
Hvað heldur þú að þú gætir verið lengi án símans?
„Púff … Dætur mínar segja eflaust að það sé innan við 1 mínútu …“
———
Eyðir þremur klukkustundum í símanum
Guðmundur Ingi Guðbrandsson, umhverfis- og auðlindaráðherra.
Hvernig síma áttu?
„iPhone SE (2016).“
Hvað telur þú að þú eyðir miklum tíma á degi hverjum í símanum?
„Um þremur klukkustundum.“
Í hvað notarðu símann annað en að svara tölvupóstum, símtölum og smáskilaboðum?
„Skoða Netið, aðallega fréttir.“
Hvaða smáforrit í símanum þínum notarðu mest?
„Facebook og Messenger.“
Hvað heldur þú að þú gætir verið lengi án símans?
„Í mjög skamman tíma!“
———
Vildi óska að hann gæti verið án símans
Sigurður Ingi Jóhannsson, samgöngu- og sveitastjórnarráðherra.
Hvernig síma áttu?
„iPhone.“
Hvað telur þú að þú eyðir miklum tíma á degi hverjum í símanum?
„Starf mitt er einfaldlega þess eðlis að það krefst mikilla samskipta og því er ég mikið í símanum. Einhverjir myndu segja of mikið.“
Í hvað notarðu símann annað en að svara tölvupóstum, símtölum og smáskilaboðum?
„Ég nota hann til að skoða fréttir, lesa og taka myndir.“
Hvaða smáforrit í símanum þínum notarðu mest?
„Ætli það sé ekki tölvupósturinn.“
Hvað heldur þú að þú gætir verið lengi án símans?
„Stundum vildi ég óska þess að ég gæti verið án hans og hefði líklega komist upp með það fyrir mörgum árum síðan. Margt hefur breyst og ég efast um að ég gæti verið lengi án hans í dag.“
———
Það er líf án síma
Bjarni Benediktsson fjármálaráðherra
Hvernig síma áttu?
„Ég er með Apple 6s+.“
Hvað telur þú að þú eyðir miklum tíma á degi hverjum í símanum?
„Ég nota símann minn meira með hverju árinu. Að grípa í símann jafnast á við að setjast við skrifborðið þar sem tölvan mín stendur. Mér er ómögulegt að áætla hvað ég eyði miklum tíma í símanum en ég gæti trúað að það væru um tvær til þrjár klukkustundir á dag sem fara í að tala í símann, lesa skilaboð, skrifa tölvupósta og skeyti fyrir utan að fygljast með fréttum, lesa skýrslur og annað efni.“
Í hvað notarðu símann annað en að svara tölvupóstum, símtölum og smáskilaboðum?
„Það eru samfélagsmiðlarnir, Facebook og Messenger, Twitter af og til, Snapchat til að hafa gaman, Spotify til að hafa enn meira gaman. Myndavélin er líka mikið notuð.“
Hvaða smáforrit í símanum þínum notarðu mest?
„Ætli það sé ekki Messenger.“
Hvað heldur þú að þú gætir verið lengi án símans?
„Ég myndi byrja að anda stutt eftir 4-6 tíma en á öðrum degi myndi renna upp fyrir mér að lífið heldur áfram. Það er líf án síma.“
Sigríður Á. Andersen, dómsmálaráðherra baðst undan því að svara spurningum blaðamanns. Þá svöruðu Guðlaugur Þór Þórðarson, utanríkisráðherra, Kristján Þór Júlíusson, sjávarútvegs- og landbúnaðarráðherra og Lilja Alfreðsdóttir, mennta- og menningarmálaráðherra ekki.
Þú ert of mikið í símanum ef …
… þú ert alltaf í símanum þegar þú ert ein/n.
… þú kíkir á símann rétt áður en þú ferð að sofa og um leið og þú vaknar.
… þú kíkir hvort eitthvað nýtt sé að frétta á samfélagsmiðlum á rauðu ljósi.
… þú færð kvíða í flugvél þegar þú þarft að svissa yfir á flugvélarstillinguna.
… maki þinn og börn segja að þú sért meira í símanum en með þeim.
… þú hefur meiri áhuga á símanum en að tala við vini þína þegar þið hittist.
… öll samskipti þín eru í formi skrifaðra skilaboða í gegnum Netið.
… þú fríkar út þegar þú finnur ekki símann.
… lífið þitt er orðið frekar litlaust.
Síminn getur verið mikill tímaþjófur.
Nærri fimm klukkutímar í símanum á dag
Fyrirtækið Statista kannaði símanotkun fólks eftir löndum og birti niðurstöður sínar í fyrra. Þar kom í ljós að Brasilíubúar eyða mestum tíma í símanum á dag, eða 4 klukkustundum og 48 mínútum. Það er næstum því heil vinnuvika.
Þá eyða Kínverjar rúmum þremur tímum á dag í símann og Bandaríkjamenn ríflega tveimur og hálfri klukkustund.
Helmingur eyðir tveimur til þremur tímum í símanum á dag
Mannlíf lagði könnun fyrir 118 Íslendinga um þeirra símanotkun. Þar kom fram að rúmlega fimmtíu prósent, eða 61, sagðist vera í tvo til þrjá tíma í símanum á dag. Þá sögðust 28 manns, eða tæplega 24 prósent, eyða fimm til sjö klukkustundum í símanum daglega. Rétt rúmlega 20 prósent sögðust eyða núll til einni klukkustund í símanum á degi hverjum á meðan 3,4 prósent eyddu átta klukkustundum eða meira í símanum.
Flestir nota símann til að skoða samfélagsmiðla, eða rétt rúmlega 94 prósent. Þá sögðust rétt rúmlega 92 prósent nota símann til að svara símtölum og smáskilaboðum. Þegar spurt var hvaða smáforrit í símanum væru mest notuð voru það Facebook, Instagram og Snapchat sem höfðu vinninginn.
Kate Middleton, hertogynjan af Cambridge, gekk að eiga Vilhjálm Bretaprins í apríl árið 2011 og vakti kjóll hennar verðskuldaða athygli.
Vilhjálmur og Kate geisluðu á brúðkaupsdaginn.
Kjóllinn var sérsaumaður af hönnuðinum Alexander McQueen og er metinn á tuttugu til fjörutíu milljónir króna. Það er því ekki á færi almúgans að festa kaup á slíkum brúðarkjól. En nú hefur fatarisinn H&M framleitt kjól sem er um margt líkur kjól Kate. Sá kostar aðeins þrjú hundruð dollara, eða tæplega þrjátíu þúsund krónur.
Eins og kjóll Kate, er kjóllinn úr smiðju H&M með fallegri blúndu að ofan og yfir langar ermarnar. Hann er beinhvítur og afskaplega fallega sniðinn, en auðvitað ekki nærri því jafn fallegur og mikið í hann lagt og kjólinn sem Kate klæddist.
Kjóllinn frá H&M.
Mesti munurinn á upprunalega kjólnum og þeim fjöldaframleidda er líklegast sá að langa og tignarlega slóðann vantar á kjólinn frá H&M, en það var systir Kate, Pippa, sem sá um að halda honum í lagi á stóra daginn, eins og frægt er orðið.
„Ég er algjört jólabarn, enda fædd 24. desember og þess vegna kom eiginlega aldrei neitt annað til greina en jólabrúðkaup,“ segir Aðalbjörg Aðalbjörnsdóttir. Hún játaðist Guðmundi Frey Hallgrímssyni þann 30. desember árið 2017. Athöfnin var haldin í Akraneskirkju og veislan í Hafnarfirði, en á leiðinni í veisluna gerðist svolítið óvænt.
„Á leiðinni í veisluna stoppuðum við fyrir myndatöku og planið var svo að koma við heima hjá mömmu í Reykjavík til að skipta um kjól sem ég hafði keypt fyrir veisluna. Það gekk ekki betur en svo að rennilásinn festist og í átökunum eyðilagðist hann alveg. Ég varð frekar stressuð þar sem þarna hefðum við átt að vera mætt í eigin veislu en sem betur fer tók frænka mín til sinna ráða og sagði að hún myndi bara sauma mig í kjólinn,“ segir Aðalbjörg og bætir við sposk á svip:
„Um kvöldið fékk svo eiginmaðurinn að rífa kjólinn af mér.“
Aðalbjörg gekk að eiga Guðmund í fyrra.
Ekki gleyma ykkur í smáatriðum
Aðalbjörg hugsar hlýtt til þessa atviks í dag, þó að henni hafi alls ekki verið sama á þessu augnabliki.
„Í dag finnst mér þetta voðalega fyndið og eitthvað sem gerir daginn bara enn þá eftirminnilegri,“ segir hún og bætir við að besta ráðið á brúðkaupsdaginn sé einmitt að stressa sig ekki um of á einhverju sem skiptir litlu máli.
„Besta ráðið sem ég get gefið er að gleyma sér ekki í smáatriðum og passa sig á að njóta dagsins til fulls, því hann líður allt of hratt.“
Vala Dögg Petrudóttir gekk að eiga Trausta Má þann 13. ágúst árið 2016 á Ísafirði, en umgjörð brúðkaupsins var afskaplega rómantísk.
„Okkur langaði í síðsumarbrúðkaup þegar aðeins væri farið að dimma og extra kósí. Brúðkaupið var haldið úti undir berum himni í miðbæ Ísafjarðar, á stað sem kallast Blómagarðurinn, afskaplega fallegum og gróðursælum stað. Ég var auðvitað búin að panta rjómablíðu, eða að minnsta kosti logn. Óskin um lognið rættist en ég fékk á móti rigningarúða. En þar sem þetta var ísfirska lognið eins og það kallast þá kom það ekki að sök, afskaplega ljúft veður,“ segir Vala.
Hún Agnes sem fór úr lið.
Þau Trausti eiga þrjú börn saman en á sjálfan brúðkaupsdaginn þurfti að bruna með það yngsta, tveggja ára stúlku, á bráðamóttökuna. „Þeirri yngstu fannst mikið sport að hitta stóru frænkur sínar, önnur var komin með bílpróf og fékk hún því að fara með þeim aðeins í bæinn að kíkja í búðir. Þær voru báðar að leiða hana þegar hún ákvað að róla sér á milli þeirra, hangandi á handleggjunum þegar eitthvað gerðist og greyið fór að hágráta. Þær komu strax með hana heim og hafði hún sofnað á leiðinni hálfgrátandi. Þegar hún kom heim og vaknaði var hún enn alveg ómöguleg og vildi alls ekki rétta úr vinstri handleggnum. Hún hágrét ef eitthvað var reynt að rétta úr eða bara snerta handlegginn. Þarna var mér alls ekki farið að lítast á blikuna. Maðurinn minn var farinn til foreldra sinna með son okkar og hárgreiðslukonan mín var að detta í hús,“ segir Vala, sem fékk góðan og þarfan stuðning frá systur sinni.
„Systir mín sem er hjúkrunarfræðingur ákvað að taka málin í sínar hendur og fór ásamt hinni systur minni upp á bráðamóttöku til að láta kíkja á elsku barnið,“ segir hún, sem sjálf hafði engan tíma til að fara með.
Íhugaði að fresta brúðkaupinu
Skemmtileg brúðkaupsmynd.
„Ég var bara heima í hárgreiðslu því við máttum engan tíma missa. Klukkan var þarna um það bil þrjú og brúðkaupið átti að byrja klukkan fimm. Ég var vægast sagt orðin stressuð því þetta hafði aldrei gerst áður og ég vissi ekki hvað var að, hvort hún var brotin eða eitthvað annað. Sem betur fer var þetta „bara“ það að hún fór úr olnbogalið og eftir þetta atvik þá hefur það gerst tvisvar sinnum svo við erum heldur betur reynslunni ríkari. En ég íhugaði í alvöru í smástund hvort við þyrftum að fresta brúðkaupinu. Mamma bauð sig strax fram til að vera heima með stelpuna ef það þyrfti en sem betur fer fór það ekki svo.“
Litla stúlkan jafnaði sig fljótt og gat sem betur fer tekið virkan þátt í athöfninni og veislunni. „Um leið og læknirinn náði að smella henni í liðinn var hún eins og ný og fann ekkert til lengur. Þannig að þegar hún kom heim frá bráðamóttökunni var hún svo glöð því læknirinn var búinn að „laga höndina“ eins og hún sagði sjálf. Hún fór því beint í hárgreiðslu afskaplega spennt og glöð,“ segir Vala og bætir við að fjölskyldan geti hlegið dátt að þessu atviki núna.
„Já heldur betur. Þetta er bara ansi stór minning í minningabankann,“ segir hún og hlær.
Tónlistar- og leikkonan Janelle Monáe frumsýndi myndband við nýja lagið sitt PYNK á YouTube í gær, en myndbandinu var leikstýrt af Emmu Westenberg.
Athygli vekur að Janelle, og nokkrir af dansurum hennar, klæðist buxum í myndbandinu sem líta út eins og píka. Í einu atriðinu liggur kona á milli fótleggja Janelle og er það mjög áhugavert sjónarspil.
„PYNK er blygðunarlaus fögnuður sköpunar, sjálfsástar, kynhneigðar og píkukrafts!“ stendur í lýsingu á myndbandinu á YouTube.
PYNK er lag af væntanlegri plötu Janelle, DIRTY COMPUTER. Það er hennar þriðja breiðskífa og kemur hún út þann 27. apríl næstkomandi.
„Hún vill ekki taka gleraugun af sér,“ segir Gretar Örn Bragason, faðir Elísabetar Evu sem kom í heiminn þann 18. desember árið 2016.
Gretar og kona hans, Eva Hrönn Jónsdóttir, birtu myndband á Facebook nú í morgunsárið þar sem Elísabet Eva sést setja á sig gleraugu í fyrsta sinn, en hún er með +8 á báðum augum. Gretar segir að Elísabet hafi fengið þessa greiningu fyrir mánuði síðan og í gær fékk hún loksins gleraugu.
Eins og sést í myndbandinu eru viðbrögð Elísabetar þegar hún sér fjölskyldu sína í fyrsta sinn algjörlega yndisleg. Eiginlega ólýsanleg, og segir myndbandið meira en mörg orð.
„Hún varð bara rosalega hissa og forvitin að sjá allt allt í rauninni í fyrsta sinn,“ segir stolti faðirinn.
En foreldrarnir, hvernig leið þeim á þessari stundu?
„Þetta var bara dásamleg stund. Ég hafði mestar áhyggjur af því að hún myndi kannski ekkert vilja með mann hafa eftir að hún sæi hvernig maður liti raunverulega út,“ segir Gretar og hlær.
Súludans hefur notið mikilla vinsælda síðustu misseri og margir sem hafa fallið fyrir íþróttinni.
Fyrirtækið og líkamsræktarstöðin Power Pole Sports hefur bryddað upp á skemmtilegum leik á Instagram, þar sem forsvarsmenn fyrirtækisins hvetja iðkendur súlusportsins að birta myndir og myndbönd af sér á súlunni að gera hversdagslega hluti.
Margar myndanna eru ansi hreint skemmtilegar, en þar sjást konur meðal annars sinna húsverkum, borða, leika á hljóðfæri og hjóla á súlunni. Við elskum þessar myndir og myndbönd!
Ný rannsókn sýnir fram á að fólk sem talar við hunda sína í háum tónum er í raun að hjálpa hvuttunum sínum að halda athygli. Þetta gæti einnig hjálpað til við að bæta samband á milli hundaeigenda og gæludýranna.
Rannsakendur við York háskóla í Bretlandi ákváðu að láta á það reyna hvort að hundatal hefði sömu jákvæðu áhrif á hundana og þegar fullorðnir tala við ungbörn.
„Auðvitað vitum við að hundar geta ekki lært að tala, þannig að við vildum vita hvort hundatal virkaði fyrir hunda, eða hvort það er bara eitthvað sem við notum á hundana okkar, þar sem við lítum á hunda sem hluta af fjölskyldunni, eins og feldi klædd börn,“ segir forsvarsmaður rannsóknarinnar, Alex Benjamin, í samtali við Huffington Post.
Mikil nánd myndast oft á milli hundaeigenda og hunda.
Samskipti manna við hunda hafa áður verið rannsökuð og þá hefur meðal annars komið fram að það að tala við hunda í háum tónum, líkt og við gerum við börn, hefur góð áhrif á hvolpa, en að það skipti ekki máli þegar talað er við gamla hunda. Niðurstöður Alex og teymis hennar sýna fram á að þetta samspil sé örlítið flóknara en áður hefur verið haldið fram.
Það er gott að tala við hunda.
Teymið framkvæmdi raddpróf á 69, fullorðnum hundum. Þau fóru þannig fram að hundarnir hlustuðu á eina manneskju sem talaði háum tónum og notaði frasa sem var beint að hundunum, eins og: Þú ert góður hundur, og Eigum við að fara í göngutúr? Önnur manneskja notaði mennska frasa sem tengdust hundunum ekki neitt, eins og Ég fór í bíó í gær. Rannsakendur fylgdust með hvert athygli hundanna leitaði á meðan manneskjurnar voru að tala og fylgdust með hvaða manneskju þeir drógust að.
Því næst blönduðu rannsakendur saman hundafrösum og mennskum frösum til að sjá hvort það væri tónn raddarinnar sem hundarnir löðuðust að, eða frasarnir sjálfir. Loks komust rannsakendur að því að hundarnir voru líklegri til að laðast að manneskjunni sem notaði frasa sem var beint að hundunum.
„Við höfum sýnt fram á að hundar skynja þessa týpu af tali og það gæti verið gagnlegt að nota hana þegar þú hittir hund í fyrsta sinn, eða ef þú ert að leika við hund vinar þíns til dæmis,“ segir Alex og bætir við orðum sem margir hafa eflaust þráð að heyra lengi:
„Og ef þú ert nú þegar að tala við þinn eiginn hund eins og barn geturðu notað þessa rannsókn til að réttlæta að þú ert ekki brjáluð hundamamma!“
Fyrsta stiklan úr stórmyndinni The Meg, úr smiðju Warner Bros. Pictures, er komin á netið, en meðal leikara í myndinni er Ólafur Darri Ólafsson.
Myndin fjallar um teymi sem berst við risahákarl, tegund sem allir héldu að væri útdauð. Eins og gefur að skilja er stiklan spennuþrungin og greinilegt að hér er um að ræða eina af stórmyndum þessa árs, en myndin verður frumsýnd vestan hafs þann 10. ágúst næstkomandi.
Meðal annarra leikara í myndinni eru Jason Statham, Li Bingbing, Cliff Curtis, Rainn Wilson og Ruby Rose. Leikstjóri myndarinnar er John Turteltaub, sem leikstýrði mörgum goðsagnakenndum myndum á tíunda áratug síðustu aldar, eins og Cool Runnings, While You Were Sleeping og Phenomenon. Handritið er byggt á metsölubókinni The Meg eftir Steve Alten.
Jeffrey Kendall, 26 ára gamall maður frá Connecticut, ákvað að deila sögu sinni á internetinu fyrir stuttu og hefur svo sannarlega vakið mikla athygli.
Svona leit Jeffrey út fyrir tæpum þremur árum.
Jeffrey bjó með móður sinni í Connecticut árið 2015 og hugsaði um hana eftir að hún fékk gúlp í heila.
„Hún var í dái og í endurhæfingu á sjúkrahúsi í sjö mánuði, þar til henni fór ekki lengur fram og var útskrifuð þar sem tryggingarnar vildu ekki lengur dekka kostnaðinn,“ segir Jeffrey í samtali við Love What Matters. Hann segist hafa glímt við lélega sjálfsmynd um langa hríð.
„Ég var of þungur sem ungmenni og var lagður í einelti í uppvextinum. Ég hef lifað lífinu með vandamál með líkamsímynd og sjálfstraust.“
Jeffrey var of þungur sem barn.
Setti allt í samhengi
Jeffrey segir að mikið hafi breyst þegar hann horfði upp á veika móður sína.
„Ég var búinn að sjá hana á sjúkrahúsinu þar sem hún gata varla talað, ég var búinn að sjá hana á gjörgæslu þar sem hún gat ekki andað. Ég var búinn að sjá hana á gólfinu þar sem hún gat ekki vaknað. Að sjá störu hennar án löngunar móður var niðurdrepandi. Það setti sjálfsvorkun og sársauka í samhengi,“ segir Jeffrey. Hann byrjaði að æfa með vini sínum, sem var líka á slæmum stað tilfinningarlega.
Svona lítur Jeffrey út í dag.
„Góður vinur minn átti líka erfitt eftir sambandsslit og þurfti hjálp við að koma sér í form. Þetta var fullkomin ástæða fyrir mig að byrja á einhverju nýju þar sem ég mat lífið betur eftir þetta sumar. Við byrjuðum hægt, á léttri lyftingaræfingu og ég samþykkti að gera armbeygjur á hverjum degi. Stuttu síðar vaknaði ég á morgnana og fór í göngutúra á meðan ég hlustaði á hressandi tónlist.“
Tíminn leið og Jeffrey byrjaði að setja sér fleiri og fleiri markmið í átt að betri lífsstíl.
„Ég byrjaði að skokka og taka spretti og ýtti sjálfum mér alltaf lengra og lengra. Ég fann nýjar leiðir til að æfa, ég fann YouTube-rásir eins og Yoga with Adriene til að hjálpa mér að æfa heima. Ég byrjaði að stunda jóga og æfa nánast á hverjum degi.“
Frábært hár.
Lítur út eins og Disney-prins
Nú hundrað vikum síðar hefur Jeffrey misst rúmlega þrjátíu kíló. Hann birti myndir af árangri sínum á samfélagsmiðlinum Reddit og létu viðbrögin ekki á sér standa. Margir Reddit-notendur velta fyrir sér hvort hann ætti ekki að leika í sjampóauglýsingum á meðan aðrir líktu honum við Disney-prins, þá sérstaklega þann úr Fríðu og dýrinu eftir að hann breytist í mann.
Líkindin eru sláandi.
„Ég gat varla sofið það kvöld, þetta var stórkostlegt. Athugasemdirnar voru allar svo hvetjandi,“ segir Jeffrey, en bætir við að móðir sín sé mesti innblásturinn í þessari vegferð sinni.
„Hún er seigasta manneskja sem ég þekki og kennir mér að vera þakklátur fyrir lífið.“
Íbúðin er 88 fermetrar og ásett verð er 52,5 milljónir króna. Íbúðin var öll tekin í gegn árið 2015 en hún er búin einu svefnherbergi og einu baðherbergi.
Skemmtilegt baðherbergi.
Auður er annáluð smekkmanneskja og því íbúðin öll hin glæsilegasta en henni fylgja einnig svalir með góðu útsýni, og gómsætri lykt eins og Auður segir sjálf í Facebook-færslu þar sem hún vekur athygli á fyrirhugaðri sölu.
Svefnherbergið er bjart og hlýlegt.
„Beint fyrir utan gluggann er að finna áræðanlegustu eldhúsklukku í allri Reykjavík í turni Hallgrímskirkju, og því ekki ástæða til að ofsjóða pasta, grænmeti eða annan mat. Auk þess er Eldsmiðjan á næsta horni og Snaps á því þar næsta, þannig að ef maður er ekki mikið fyrir að elda, þá er ekki hætta á að svelta. Úrvals útsýni til norðurs og suðurs. Á góðum sumardögum koma svalirnar að góðum notum, algjör stilla og oft á tíðum magnaður ilmur af eldbökuðum pizzum,“ skrifar Auður og bætir einnig við að opið hús sé í eigninni á morgun, 10. apríl, frá 17.15 til 17.45.
Hér er vel hægt að skapa minningar.
„Mín opna, bjarta og skemmtilega óhefðbunda íbúð er í sölu og á morgun er hægt að koma við og skoða. Ef að einhver veit um einverja opna, bjarta og óhefðbunda einstaklinga sem hefðu áhuga á að búa á besta stað í Þingholtunum, þá væri tilvalið að láta vita af Baldursgötunni.“
Íbúðin er á besta stað í Þingholtunum.
Þetta er ekki í fyrsta sinn sem Auður setur íbúðina á sölu, en samkvæmt frétt Smartlands í apríl í fyrra, fyrir næstum því sléttu ári, var íbúðin þá á markaðinum.
Geggjaður spegill.Nærliggjandi umhverfi íbúðarinnar er vægast sagt lifandi.
Washington-búanum Grace Goldstein brá heldur betur í brún þegar hún kom heim úr ferð í matvöruverslunina Trader Joe’s í síðustu viku. Þegar Grace tók upp úr pokunum sá hún dauða eðlu í grænkálspokanum sem hún keypti.
Í samtali við tímaritið People segir Grace að hún hafi fengið áfall þegar hún sá eðluna.
„Ég var ýmist í afneitun eða mig hryllti við þessu, sem varð til þess að ég bað kærastann minn í sífellu að skoða grænkálspokann og staðfesta að þetta væri eðla, og þá hrópaði ég og ýtti pokanum frá mér og neitaði að vera nálægt honum. Og síðan bað ég um að fá að sjá hana aftur,“ segir Grace.
Hún bætir við að hún hafi ekki vitað hvað hún ætti að gera við eðluna og því hafi hún ákveðið að setja hana inn í ísskáp til að varðveita hana.
„Við höfðum samband við Trader Joe’s og vorum ekki viss hvort við ættum að fara með hana aftur í hverfisbúðina okkar þar sem við keyptum pokann. Mig langaði ekki að hafa rotnandi eðlu í ísskápnum. Hún var aðeins of nálægt ísnum mínum.“
Vinkona Grace tísti mynd af pokanum og hefur fólk skrifað athugasemdir við myndina um sínar eigin hryllingssögur af Trader Joe’s. Talskona verslunarkeðjunnar segir í samtali við People að fyrirtækið sé að skoða kvörtun Grace.
Söngkonan Demi Lovato er ötul talskona jákvæðrar líkamsímyndar, en seint í síðustu viku birti hún myndir af sér á Instagram-sögu sinni sem hafa vakið talsverða athygli.
Á einni myndinni sést Demi grípa í hold sitt og sýna slitför sem hún er með um sig miðja:
Á annarri myndinni sýnir hún appelsínuhúðina fyrir neðan rassinn:
Og á þriðju myndinni sýnir hún að læri hennar snertast:
Demi hefur unnið mikið í að bæta sína eigin sjálfsmynd síðustu ár, en hún hefur barist við þunglyndi og fíkn, skaðað sjálfa sig og verið með átröskun. Um allt þetta og meira til tjáði hún sig um í heimildarmyndinni Simply Complicated sem var frumsýnd á YouTube í fyrra. Heimildarmyndina má horfa á hér fyrir neðan:
Knattspyrnukappinn Aron Einar Gunnarsson og eiginkona hans, fitness-drottningin Kristbjörg Jónasdóttir, eiga von á sínu öðru barni, en fyrir eiga þau soninn Óliver.
Þau birtu skemmtilegt myndband á Instagram til að tilkynna kynið á ófædda barninu, en það var Óliver sem fékk að leika stórt hlutverk í myndbandinu.
Í því sést Óliver sprengja stóra blöðru sem á stendur Boy or Girl?, eða Stelpa eða strákur? Þegar Óliver sprengir svo blöðruna koma fjölmargir bláir borðar úr henni og því ljóst að Aron og Kristbjörg eiga von á öðrum dreng.
Óliver var líka lykilmaður í því þegar hjónin opinberuðu óléttuna á samfélagsmiðlum. Þá birtu þau hjónin einfaldlega mynd af drengnum í bol sem á stóð: Ég er að verða stóribróðir.
Ari Eldjárn tekur þátt í Melbourne International Comedy Festival þessa dagana með uppistandssýninguna Pardon My Icelandic. Gagnrýnandinn Patricia Maunder hjá Artshub segir í nýlegri gagnrýni sinni að Ari hljóti að vera fyndnasti grínistinn á Norðurlöndunum, svo hrifin var hún af sýningu hans í Melbourne.
Patricia segir sýningu Ara vera einlæga og bætir jafnframt við að enskukunnátta hans sé mjög góð, þar með talið hinir ýmsu hreimar sem Ari gerir en hann er, eins og Íslendingar vita, afar góð eftirherma.
Patricia segir Ara túlka listilega vel þann ríg sem ríkir á milli Norðurlandanna og hvernig Íslendingar þoli ekki hvernig Danir, Svíar, Finnar og Norðmenn tali niður til Íslands, en að Íslendingar geri svo slíkt hið sama við frændur okkar í Færeyjum.
Þá er Patricia afar hrifin af gríninu sem Ari gerir um dóttur sína.
„Síðustu tíu mínúturnar af sýningunni snýr Ari sér að athugunum úr sínu eigin lífi, þá helst föðurhlutverkinu. Túlkun hans á þriggja ára dóttur sinni sem einræðisherra úr Game of Thrones, sem er fullkomnuð með hrokafullum, enskum hreim, lætur mann óska að sýningin sé í annan klukkutíma,“ skrifar Patricia og bætir við, um leið og hún gefur sýningunni fjórar stjörnur:
„Þetta er gríngull sem týnist klárlega ekki á milli tungumála.“
Heidi Montag gerði garðinn frægan um miðbik síðasta áratugar í sjónvarpsþáttunum The Hills. Í kjölfarið fór hún í ansi margar lýtaaðgerðir, þar á meðal brjóstastækkun og ýmsar aðgerðir á andliti sínu, en þessi umbreyting var vel skrásett af slúðurmiðlum um allan heim.
Í nýju viðtali við tímaritið Paper segist Heidi hafa verið hætt komin í einni af aðgerðunum.
„Spencer hélt að hann væri búinn að missa mig,“ segir Heidi, og vísar í eiginmann sinn Spencer Pratt, en þau gengu í það heilaga árið 2009.
„Ég dó í eina mínútu. Út af öllum þessum aðgerðum þurfti ég að vera undir eftirliti hjúkrunarfræðinga allan sólarhringinn og Spencer vildi ekki líta af mér. Ég var lögð inn á endurhæfingastöð og þurfti að fá Demerol til að lina sársaukann því hann var svo mikill,“ bætir hún við.
Heidi segir að litlu hafi munað að hún hafi farið yfir móðuna miklu í fyrrnefndri aðgerð þar sem hjarta hennar hætti að slá í eina mínútu.
„Öryggisverðirnir hringdu í Spencer og sögðu honum: Hjarta Heidi stoppaði. Hún hefur það ekki af. Og ég hefði auðveldlega geta dáið. Ég mæli ekki með því að láta skera sig upp og Demerol er ekki eitthvað til að leika sér með. Michael Jackson dó af því.“
Þessi lífsreynsla breytti lífi Heidi.
„Ég þurfti að horfa á sjálfa mig í spegli á hverjum degi í batanum og hugsa: Hvað var ég að gera við sjálfa mig? Hvernig komst ég hingað? Hvað er að gerast,“ segir Heidi og bætir við:
„Mér finnst ekkert svo stressandi að taka að mér að syngja þessi lög, þó þau séu svona vel þekkt og að vafalaust eigi flestir sína uppáhaldsflytjendur,” segir söngkonan Kristín Stefánsdóttir. Hún heldur tónleika til heiðurs Burt Bacharach í Salnum í Kópavogi þann 20. apríl, í tilefni af níræðisafmæli tónlistarmannsins þann 12. maí.
„Ég tengi mjög vel við þessi lög og skilaboðin í þeim og geri þau að mínum með því að mála myndina í huganum af sögunni sem verið er að segja. Þegar svona dásamleg tónsmíð rammar svo inn söguna er óhjákvæmilegt annað en að tengjast á sinn eigin hátt. Aðalgaldurinn er að þora að fara í hjarta sitt og opna það fyrir öðrum þannig að þeir geti tengst sínu hjarta í gegnum flutninginn,” segir Kristín, en meðal laga sem munu hljóma í Salnum eru The Look of Love, I Say a Little Prayer og What the World Needs Now.
Algjör suga á tónlist
„Mér finnst eins og lög Burt Bacharach séu svolítið samofin uppvexti mínum, á þann hátt á ég minningar af þessum lögum en ég var algjör suga á alls konar tónlist í uppvextinum. Lögin hans eiga það sameiginlegt að vera melódísk og þægileg fyrir eyrað en hafa einnig skýra sögu eða skilaboð sem ég held að sé líka galdurinn að vinsældunum. Maður á sterkar minningar af lögum eins og What the World Needs Now, That’s What Friends Are For, Close to You og Say a Little Prayer, svo fátt eitt sé nefnt. En það kom mér á óvart þegar ég fór að vinna þetta prógramm hvað hann á líka mörg ofboðslega falleg lög sem maður hafði sjaldan eða jafnvel aldrei heyrt. Þá gæti ég nefnt lög eins og Alfie, Who Will Speak for Love, Love’s the Answer og svona hádramatísk lög eins og This House is Empty Now. Lögin hans eru svo ljúf og fjalla flest öll á einn eða annan hátt um ástina og munum við kappkosta að koma þeim skilaboðum eins fallega og við getum til skila,” segir þessi hressa söngkona.
Fann kjólinn í útlöndum
Kristín er búin að leggja mikla vinnu í að skipleggja tónleikana og kom tónleikakjóllinn uppí hendurnar á henni fyrir utan landsteinana.
„Mér finnst stundum eins og ég sé að búa til listaverk þegar ég skipulegg svona tónleika. Öll smáatriði fæðast í huganum og verða svo að einni heild. Mikilvægur þáttur í þeirri mynd er auðvitað klæðnaðurinn. Mér fannst eins og klæðnaður minn þyrfti að vera í samræmi við orkuna í lögunum bæði í lit og mýkt. Þegar ég var svo í fríi í útlöndum í janúar kom rétti kjóllinn í fangið á mér. Mér fannst eins og þetta væri akkúrat kjóllinn sem hæfði lögunum; bæði rómantískur og mjúkur. Það skiptir miklu máli að líða vel í fötunum sem maður syngur í,” segir söngkonan og hlakkar mikið til tónleikanna, en auk grunnbands verða á sviðinu sex manna blásarateymi, fjögurra manna strengjasveit, þrjár bakraddir og Hreimur Örn Heimisson er gestasöngvari.
„Það hefur lengi blundað í mér að syngja lög eftir Burt Bacharach. Eftir að ég sá hann í Hörpu fyrir nokkrum árum fór myndin að taka á sig skýrara form og þegar ég svo flutti lagið The Look of Love á tónleikum í Noregi í fyrrasumar ákvað ég að nú myndi ég láta þennan draum rætast á nítugasta afmælisári tónlistarmannsins. Hlynur Þór Agnarsson píanóleikari, samþykkti að taka að sér útsetningar og hljómsveitarstjórn og við lögðumst í hugmyndavinnu. Það kom ekkert annað til greina en að gera þessum lögum góð skil og fá með okkur einvala lið tónlistarmanna,” segir Kristín og bætir við:
„Það sem ég held að muni koma áhorfendum mest á óvart er hvað þetta verður stór og flottur viðburður. Við verðum alls nítján manns að flytja tónlistina þar sem valinn maður er í hverju rúmi. Einnig munum við vera með ýmsan fróðleik um Burt Bacharach; ævi hans og lífshlaup og fjalla um þá sem sömdu með honum tónlistina og textana. Við söngvararnir fimm munum svo hjálpast að við syngja lögin eftir því sem okkur finnst hæfa hverju lagi fyrir sig. That´s what friends are for…”
„Dagurinn byrjaði voða rólega og við giftum okkur klukkan þrjú í gamalli kirkju í Innri Njarðvík,“ segir Ingibjörg Ósk Jóhannsdóttir. Hún gekk að eiga sinn heittelskaða, Þorstein Inga Hjálmarsson, á sjálfan þjóðhátíðardaginn 17. júní árið 2016.
Báðir foreldrar Ingibjargar eru látnir og því þurfti hún að velja einhvern annan til að leiða sig upp að altarinu á þessum stóra degi. Bæði Ingibjörg og Þorsteinn voru sammála um að það verðuga verkefni ætti að vera sett í hendur einkadóttur þeirra, Huldu Sigurlaugar, sem þá var níu ára gömul.
„Okkur fannst hún tilvalin. Ég var strax ákveðin að velja hana,“ segir Ingibjörg, en Huldu fannst þetta mikill heiður.
„Hún var svo stolt og ánægð og fannst þetta gaman.“
Fann fyrir nærveru foreldranna
Ingibjörg saknaði foreldra sinna á brúðkaupsdaginn, en var í staðinn umvafin stórum systkinahópi.
„Vissulega var skrýtið að hafa ekki foreldra sína með, en ég fann fyrir nærveru þeirra. Þetta var mitt fyrsta brúðkaup og ég kem úr stórum systkinahóp og þau komu öll,“ segir Ingibjörg og bætir við að hún hafi verið afskaplega ánægð með daginn.
„Dagurinn var yndislegur. Við héldum veisluna heima með okkar nánustu, fengum gott veður, þó það væri 17. júní,“ segir Ingibjörg og hlær. „Við erum með stórt hús og stóran pall þannig að þetta gekk vel og allt gekk upp, nema brúðartertan sem ég pantaði var mislukkuð. Ég varð fyrir vonbrigðum með hana.“
Punkta allt niður og vera tímanlega
Hvað með góð ráð fyrir stóra daginn, lumar Ingibjörg á nokkrum slíkum?
„Já, það er best að punkta allt niður sem maður ætlar að hafa og gera. Og vera tímanlega í öllu svo það verði ekki mikið stress á stóra daginn.“
Ingólfur Ágústsson og Sigríður Etna Marinósdóttir voru búin að vera saman í sjö ár þegar þau ákváðu að láta pússa sig saman þann 12. júlí árið 2014 á Tálknafirði. Helgina fyrir brúðkaupið var Ingólfur steggjaður af vinum og fjölskyldumeðlimum, steggjun sem átti svo sannarlega eftir að draga dilk á eftir sér.
„Ég var nánast allsber allan daginn og meðal annars hent ofan í sjóinn í Reykjavík tvisvar sinnum. Strax eftir helgi fór ég að finna fyrir eymslum í hálsinum en var ekkert að spá mikið í það enda nóg að gera bæði í vinnu og að undirbúa brúðkaup sem átti að halda í um fimm hundruð kílómetra fjarlægð,“ segir Ingólfur, sem varð þó örlítið áhyggjufullur þegar nær dró stóra deginum.
„Á fimmtudagsmorgni byrjuðum við að græja brúðkaupssalinn og ég fann að mér leið ekki vel. Ég var að reyna að láta lítið fyrir því fara til að gera brúðina ekki áhyggjufulla. Svo var ég að sækja eitthvað inn í áhaldageymslu og var alveg bugaður og lagðist á dýnu og sofnaði. Eftir einhvern tíma skildi konan mín ekkert í hvar ég gæti verið. Svo var henni tilkynnt að ég væri sofandi inn í áhaldageymslu. Hún kom og vakti mig og botnaði ekkert í þessari hegðun hjá mér. Þá sagði ég henni að ég væri orðinn slappur og að ég héldi að ég væri kominn með streptókokka, en ég hafði fengið þá áður,“ segir Ingólfur sem fór til læknis á Patreksfirði í kjölfarið.
„Læknirinn var fljótur að greina mig og skrifaði upp á sterk sýklalyf og lét mig taka þrefaldan skammt. Hann sagði mér að ég ætti að hvíla mig fram að brúðkaupi, reyna að vera sem minnst með konunni, til að smita hana ekki, og alls ekki kyssa hana.“
Ingólfur tók ekki eftir miklum óþægindum á brúðkaupsdaginn, nema hann var með litla matarlyst.
Í móki nóttina fyrir brúðkaup
Daginn eftir, á föstudeginum, streymdu fjölskyldumeðlimir og vinir á Tálknafjörð, en Ingólfur neyddist til að láta lítið fyrir sér fara. „Ég gat ekki tekið á móti þeim eða aðstoðað við að gera brúðkaupið klárt, lá bara hundveikur uppi í rúmi og hálfvankaður af lyfjunum. Nóttina fyrir brúðkaupið var ég víst bara í einhverju móki, svitnaði svakalega og konan gat ekki sofið af áhyggjum. Hún var svo smeyk um að það þyrfti að fresta brúðkaupinu og allir hefðu þá komið í fýluferð vestur. Gaman að segja frá því að hún svaf á milli hjá foreldrum sínum þessa nótt. Þau reyndu að fullvissa óléttu, stressuðu stelpuna sína um að allt yrði í lagi og að brúðkaupsdagurinn yrði góður,“ segir Ingólfur og brosir þegar hann rifjar upp þessa daga.
Þegar sjálfur brúðkaupsdagurinn rann svo upp var Ingólfur enn slappur, en eins og fyrir örlög breyttist eitthvað í athöfninni sem var töfrum líkast.
„Við hjónin komum síðust í kirkjuna og gengum saman inn kirkjugólfið. Eins væmið og það hljómar þá losnaði um allt í hálsinum á sama andartaki og dyrnar inn í kirkjuna opnuðust og við hjónin gengum inn gólfið. Dagurinn var skemmtilegur og góður svo ég tók ekki eftir neinum óþægindum, nema ég var ekki með mikla matarlyst,“ segir Ingólfur, sem er enn leiður yfir því að hafa ekki getað tekið virkan þátt í þessum mikilvæga degi sökum veikindanna.
Leiðinlegt að taka ekki þátt í undirbúningnum
„Brúðkaupsdagurinn heppnaðist vel þrátt fyrir veikindin og ég er þakklátur fyrir það. En mér finnst enn þá leiðinlegt að hafa ekki geta tekið þátt í undirbúningnum. Salurinn var orðinn alveg klár snemma á föstudegi, því við hjónin ætluðum að eyða restinni af föstudeginum í að taka á móti fjölskyldu og vinum. En við gerðum það ekki og það var pínu súrt. Það voru margir duglegir að taka Snapchat og senda okkur og fannst okkur það mjög skemmtilegt. Að sjá vini okkar sem þekktust ekki fyrir brúðkaupið vera að hittast á tjaldstæðinu og þess háttar,“ segir hann. Það stendur svo ekki á svörunum þegar hann er beðinn um ráð fyrir tilvonandi brúðhjón.
„Númer eitt, tvö og þrjú ráðlegg ég fólki að steggja og gæsa ekki brúðhjón viku fyrir brúðkaup. Númer fjögur, ef þið eruð eitthvað slöpp, kíkið strax til læknis! Númer fimm, reynið að vera skipulögð og tímalega í undirbúningnum, það var mjög gott að vera búinn að gera allt klárt snemma á föstudeginum. Númer sex, hafið daginn ykkar nákvæmlega eins og þið viljið hafa hann. Ekki efast um ákvarðanir sem þið takið tengdar brúðkaupinu. Bjóðið bara þeim sem þið viljið, óháð því sem „búist er við af manni“. Það er æðisleg tilfinning að ganga inn kirkjugólfið og vera umkringdur fólki sem manni þykir vænt um. Veljið matinn, drykkina, tónlistina og fleira nákvæmlega eins og þið viljið hafa það. Þetta er ykkar dagur.“
Teikningar eftir förðunarfræðinginn Ísak Frey vekja athygli.
Fyrirsætan Carzon Zehner, sem er meðal annarra nýja andlit Mulberry, förðuð af Ísak og mynduð af Sögu Sig. Tengingin við teikningar Ísaks er augljós.
„Þetta eru teikningar sem ég hef verið að skapa allt frá árinu 2013 en hef ekkert verið að flagga þeim. Þær komu í raun ekki fyrir sjónir almennings fyrr en seint á síðasta ári í íslenska tímaritinu Blæti,“ segir förðunarfræðingurinn Ísak Freyr um umræddar teikningar en þær hafa verið að vekja athygli erlendis að undanförnu og eru orðnar eftirsóttar af viðskiptavinum hans, stórum nöfnum innan tísku-heimsins.
„Þetta var frekar fyndið en þegar ég fór að tala um myndirnar við kúnna sem ég var að farða þá vildu þeir endilega fá að sjá þær og í framhaldinu hafa margir þeirra hafa óskað eftir myndum eftir mig.“
Ísak segist hafa byrjað að teikna myndirnar þegar hann bjó í listakommúnu í Camberwell Green í London 2013, en á þeim tíma hafi hann verið að reyna finna sjálfan sig og haft óstjórnlega þörf á að skapa. „Það var eins og þessi sköpunartilfinning kæmi frá einhverjum innri kjarna í líkamanum sem ég átti erfitt með að nálgast,“ segir hann. „Það var eins og eitthvað væri að reyna að brjótast út.“ Það hafi hins vegar ekki verið fyrr en amma hans hvatti hann til dáða sem hann ákvað að láta slag standa. „Henni fannst agalegt að ég skyldi ekki vera að teikna eins og ég hafði gert þegar ég var yngri og hvatti mig áfram. Þetta kveikti á einhverju hjá mér og í framhaldinu keypti ég liti og blöð og fór að teikna.“
Myndir eftir Ísak Frey eru farnar að vekja athygli.
Á þeim tíma segist hann hafa átt erfitt með að koma hugsunum sínum í orð, „hausinn hafi verið að springa“ eins og hann orðar það en hann hafi náð að tjá sig í gegnum myndirnar og oft teiknað þær undir áhrifum áfengis, það geri hann hins vegar ekki lengur. Gaman sé að sjá hvað þær hafi breyst mikið á þessum fimm árum.
„Í dag líður mér betur, ég er á allt öðrum stað sem er bjartari og betri og teikningarnar endurspegla það,“ segir hann.
Spurður hvort hann sé mögulega farinn að velta fyrir sér að skipta um starfsvettvang, þvertekur hann fyrir það. „Nei, ég vill alls ekki hætta að farða því mér finnst svo gaman að vinna með fólki. En, ég er farinn að velja vandlega verkefni sem ég tek mér fyrir hendur svo ég geti teiknað meira. Að því sögðu lít ég svo á að það sé beintenging á milli þessara listforma og ef eitthvað er þá hef ég óhikað nýtt myndlistina í förðuninni í gegnum tíðina. Þetta tvennt helst í hendur.“
Símanotkun Íslendinga er eitthvað sem kemst reglulega í umræðuna og virðast margir eiga við það vandamál að stríða að vera of mikið í símanum. Grunnskólar eru farnir að banna síma á kennslutíma og Barnaheill hefur lagt sín lóð á vogarskálarnar með símalausum sunnudögum.
Mikil umræða hefur verið um að börn og unglingar noti snjalltæki of mikið síðustu misseri, en foreldrarnir hafa oft gleymst í þessari umræðu. Rannsóknir hafa sýnt að ef foreldri er mikið í símanum, jafnvel marga klukkutíma í dag, geti það valdið því að það tengist börnum sínum ekki nægilega vel, sé fjarlægt, eigi erfitt með svefn og geti þróað með sér kvíða.
Við ákváðum því að spyrja æðstu foreldra og fyrirmyndir þjóðarinnar, sjálfa ráðherra í ríkisstjórn, um þeirra símanotkun.
———
Forsætisráðherraístuði
Katrín Jakobsdóttir forsætisráðherra.
Hvernig síma áttu?
„Ég á iPhone 6. Held ég.“
Hvað telur þú að þú eyðir miklum tíma á degi hverjum í símanum?
„Ætli ég sé ekki í símanum að tala eða svara póstum ef ég er ekki á fundum. Á kvöldin legg ég þó símann til hliðar.“
Í hvað notarðu símann annað en að svara tölvupóstum, símtölum og smáskilaboðum?
„Bíddu ertu ekki að elta mig á Snapchat? Ég er með forsætisráðherraístuði. Djók.“
Hvaða smáforrit í símanum þínum notarðu mest?
„Er SMS-smáforrit? Nei annars, ég hef mikið notað strætó-appið sem mér finnst frábært.“
Hvað heldur þú að þú gætir verið lengi án símans?
„Ég vil trúa því að ég gæti verið án hans alla ævi en líklega í raun ekki nema í svona 4 mínútur í mesta lagi.“
———
Messenger mest notað
Svandís Svavarsdóttir heilbrigðisráðherra.
Hvernig síma áttu?
„iPhone 7.“
Hvað telur þú að þú eyðir miklum tíma á degi hverjum í símanum?
„1 til 2 tímum.“
Í hvað notarðu símann annað en að svara tölvupóstum, símtölum og smáskilaboðum?
„Hlusta á podcast, Spotify og útvarp.“
Hvaða smáforrit í símanum þínum notarðu mest?
„Messenger.“
Hvað heldur þú að þú gætir verið lengi án símans?
„Ótakmarkað.“
———
Minni tími fyrir framan tölvuna
Kolbrún Þórdís Reykfjörð Gylfadóttir, ferðamála-, iðnaðar- og nýsköpunarráðherra.
Hvernig síma áttu?
„Ég á iPhone.“
Hvað telur þú að þú eyðir miklum tíma á degi hverjum í símanum?
„Það er misjafnt eftir dagskránni og til dæmis minna um helgar en á virkum dögum. Líklega of miklum þó. En í staðinn eyði ég minni tíma fyrir framan tölvuna.“
Í hvað notarðu símann annað en að svara tölvupóstum, símtölum og smáskilaboðum?
„Samfélagsmiðla, les fréttir, tek myndir og hlusta á Spotify.“
Hvaða smáforrit í símanum þínum notarðu mest?
„Tölvupóstinn, Facebook og Spotify.“
Hvað heldur þú að þú gætir verið lengi án símans?
„Vonandi lengi en ég þyrfti þá að tryggja með öðrum hætti að fólk gæti náð í mig.“
———
Gæti verið án síma í innan við mínútu
Ásmundur Einar Daðason, félags- og jafnréttismálaráðherra.
Hvernig síma áttu?
„iPhone.“
Hvað telur þú að þú eyðir miklum tíma á degi hverjum í símanum?
„Allt of miklum.“
Í hvað notarðu símann annað en að svara tölvupóstum, símtölum og smáskilaboðum?
„Skoða fréttir á Netinu.“
Hvaða smáforrit í símanum þínum notarðu mest?
„Smáforrit fyrir tölvupóst og svo netvafrann (Chrome).“
Hvað heldur þú að þú gætir verið lengi án símans?
„Púff … Dætur mínar segja eflaust að það sé innan við 1 mínútu …“
———
Eyðir þremur klukkustundum í símanum
Guðmundur Ingi Guðbrandsson, umhverfis- og auðlindaráðherra.
Hvernig síma áttu?
„iPhone SE (2016).“
Hvað telur þú að þú eyðir miklum tíma á degi hverjum í símanum?
„Um þremur klukkustundum.“
Í hvað notarðu símann annað en að svara tölvupóstum, símtölum og smáskilaboðum?
„Skoða Netið, aðallega fréttir.“
Hvaða smáforrit í símanum þínum notarðu mest?
„Facebook og Messenger.“
Hvað heldur þú að þú gætir verið lengi án símans?
„Í mjög skamman tíma!“
———
Vildi óska að hann gæti verið án símans
Sigurður Ingi Jóhannsson, samgöngu- og sveitastjórnarráðherra.
Hvernig síma áttu?
„iPhone.“
Hvað telur þú að þú eyðir miklum tíma á degi hverjum í símanum?
„Starf mitt er einfaldlega þess eðlis að það krefst mikilla samskipta og því er ég mikið í símanum. Einhverjir myndu segja of mikið.“
Í hvað notarðu símann annað en að svara tölvupóstum, símtölum og smáskilaboðum?
„Ég nota hann til að skoða fréttir, lesa og taka myndir.“
Hvaða smáforrit í símanum þínum notarðu mest?
„Ætli það sé ekki tölvupósturinn.“
Hvað heldur þú að þú gætir verið lengi án símans?
„Stundum vildi ég óska þess að ég gæti verið án hans og hefði líklega komist upp með það fyrir mörgum árum síðan. Margt hefur breyst og ég efast um að ég gæti verið lengi án hans í dag.“
———
Það er líf án síma
Bjarni Benediktsson fjármálaráðherra
Hvernig síma áttu?
„Ég er með Apple 6s+.“
Hvað telur þú að þú eyðir miklum tíma á degi hverjum í símanum?
„Ég nota símann minn meira með hverju árinu. Að grípa í símann jafnast á við að setjast við skrifborðið þar sem tölvan mín stendur. Mér er ómögulegt að áætla hvað ég eyði miklum tíma í símanum en ég gæti trúað að það væru um tvær til þrjár klukkustundir á dag sem fara í að tala í símann, lesa skilaboð, skrifa tölvupósta og skeyti fyrir utan að fygljast með fréttum, lesa skýrslur og annað efni.“
Í hvað notarðu símann annað en að svara tölvupóstum, símtölum og smáskilaboðum?
„Það eru samfélagsmiðlarnir, Facebook og Messenger, Twitter af og til, Snapchat til að hafa gaman, Spotify til að hafa enn meira gaman. Myndavélin er líka mikið notuð.“
Hvaða smáforrit í símanum þínum notarðu mest?
„Ætli það sé ekki Messenger.“
Hvað heldur þú að þú gætir verið lengi án símans?
„Ég myndi byrja að anda stutt eftir 4-6 tíma en á öðrum degi myndi renna upp fyrir mér að lífið heldur áfram. Það er líf án síma.“
Sigríður Á. Andersen, dómsmálaráðherra baðst undan því að svara spurningum blaðamanns. Þá svöruðu Guðlaugur Þór Þórðarson, utanríkisráðherra, Kristján Þór Júlíusson, sjávarútvegs- og landbúnaðarráðherra og Lilja Alfreðsdóttir, mennta- og menningarmálaráðherra ekki.
Þú ert of mikið í símanum ef …
… þú ert alltaf í símanum þegar þú ert ein/n.
… þú kíkir á símann rétt áður en þú ferð að sofa og um leið og þú vaknar.
… þú kíkir hvort eitthvað nýtt sé að frétta á samfélagsmiðlum á rauðu ljósi.
… þú færð kvíða í flugvél þegar þú þarft að svissa yfir á flugvélarstillinguna.
… maki þinn og börn segja að þú sért meira í símanum en með þeim.
… þú hefur meiri áhuga á símanum en að tala við vini þína þegar þið hittist.
… öll samskipti þín eru í formi skrifaðra skilaboða í gegnum Netið.
… þú fríkar út þegar þú finnur ekki símann.
… lífið þitt er orðið frekar litlaust.
Síminn getur verið mikill tímaþjófur.
Nærri fimm klukkutímar í símanum á dag
Fyrirtækið Statista kannaði símanotkun fólks eftir löndum og birti niðurstöður sínar í fyrra. Þar kom í ljós að Brasilíubúar eyða mestum tíma í símanum á dag, eða 4 klukkustundum og 48 mínútum. Það er næstum því heil vinnuvika.
Þá eyða Kínverjar rúmum þremur tímum á dag í símann og Bandaríkjamenn ríflega tveimur og hálfri klukkustund.
Helmingur eyðir tveimur til þremur tímum í símanum á dag
Mannlíf lagði könnun fyrir 118 Íslendinga um þeirra símanotkun. Þar kom fram að rúmlega fimmtíu prósent, eða 61, sagðist vera í tvo til þrjá tíma í símanum á dag. Þá sögðust 28 manns, eða tæplega 24 prósent, eyða fimm til sjö klukkustundum í símanum daglega. Rétt rúmlega 20 prósent sögðust eyða núll til einni klukkustund í símanum á degi hverjum á meðan 3,4 prósent eyddu átta klukkustundum eða meira í símanum.
Flestir nota símann til að skoða samfélagsmiðla, eða rétt rúmlega 94 prósent. Þá sögðust rétt rúmlega 92 prósent nota símann til að svara símtölum og smáskilaboðum. Þegar spurt var hvaða smáforrit í símanum væru mest notuð voru það Facebook, Instagram og Snapchat sem höfðu vinninginn.
Kate Middleton, hertogynjan af Cambridge, gekk að eiga Vilhjálm Bretaprins í apríl árið 2011 og vakti kjóll hennar verðskuldaða athygli.
Vilhjálmur og Kate geisluðu á brúðkaupsdaginn.
Kjóllinn var sérsaumaður af hönnuðinum Alexander McQueen og er metinn á tuttugu til fjörutíu milljónir króna. Það er því ekki á færi almúgans að festa kaup á slíkum brúðarkjól. En nú hefur fatarisinn H&M framleitt kjól sem er um margt líkur kjól Kate. Sá kostar aðeins þrjú hundruð dollara, eða tæplega þrjátíu þúsund krónur.
Eins og kjóll Kate, er kjóllinn úr smiðju H&M með fallegri blúndu að ofan og yfir langar ermarnar. Hann er beinhvítur og afskaplega fallega sniðinn, en auðvitað ekki nærri því jafn fallegur og mikið í hann lagt og kjólinn sem Kate klæddist.
Kjóllinn frá H&M.
Mesti munurinn á upprunalega kjólnum og þeim fjöldaframleidda er líklegast sá að langa og tignarlega slóðann vantar á kjólinn frá H&M, en það var systir Kate, Pippa, sem sá um að halda honum í lagi á stóra daginn, eins og frægt er orðið.
„Ég er algjört jólabarn, enda fædd 24. desember og þess vegna kom eiginlega aldrei neitt annað til greina en jólabrúðkaup,“ segir Aðalbjörg Aðalbjörnsdóttir. Hún játaðist Guðmundi Frey Hallgrímssyni þann 30. desember árið 2017. Athöfnin var haldin í Akraneskirkju og veislan í Hafnarfirði, en á leiðinni í veisluna gerðist svolítið óvænt.
„Á leiðinni í veisluna stoppuðum við fyrir myndatöku og planið var svo að koma við heima hjá mömmu í Reykjavík til að skipta um kjól sem ég hafði keypt fyrir veisluna. Það gekk ekki betur en svo að rennilásinn festist og í átökunum eyðilagðist hann alveg. Ég varð frekar stressuð þar sem þarna hefðum við átt að vera mætt í eigin veislu en sem betur fer tók frænka mín til sinna ráða og sagði að hún myndi bara sauma mig í kjólinn,“ segir Aðalbjörg og bætir við sposk á svip:
„Um kvöldið fékk svo eiginmaðurinn að rífa kjólinn af mér.“
Aðalbjörg gekk að eiga Guðmund í fyrra.
Ekki gleyma ykkur í smáatriðum
Aðalbjörg hugsar hlýtt til þessa atviks í dag, þó að henni hafi alls ekki verið sama á þessu augnabliki.
„Í dag finnst mér þetta voðalega fyndið og eitthvað sem gerir daginn bara enn þá eftirminnilegri,“ segir hún og bætir við að besta ráðið á brúðkaupsdaginn sé einmitt að stressa sig ekki um of á einhverju sem skiptir litlu máli.
„Besta ráðið sem ég get gefið er að gleyma sér ekki í smáatriðum og passa sig á að njóta dagsins til fulls, því hann líður allt of hratt.“
Vala Dögg Petrudóttir gekk að eiga Trausta Má þann 13. ágúst árið 2016 á Ísafirði, en umgjörð brúðkaupsins var afskaplega rómantísk.
„Okkur langaði í síðsumarbrúðkaup þegar aðeins væri farið að dimma og extra kósí. Brúðkaupið var haldið úti undir berum himni í miðbæ Ísafjarðar, á stað sem kallast Blómagarðurinn, afskaplega fallegum og gróðursælum stað. Ég var auðvitað búin að panta rjómablíðu, eða að minnsta kosti logn. Óskin um lognið rættist en ég fékk á móti rigningarúða. En þar sem þetta var ísfirska lognið eins og það kallast þá kom það ekki að sök, afskaplega ljúft veður,“ segir Vala.
Hún Agnes sem fór úr lið.
Þau Trausti eiga þrjú börn saman en á sjálfan brúðkaupsdaginn þurfti að bruna með það yngsta, tveggja ára stúlku, á bráðamóttökuna. „Þeirri yngstu fannst mikið sport að hitta stóru frænkur sínar, önnur var komin með bílpróf og fékk hún því að fara með þeim aðeins í bæinn að kíkja í búðir. Þær voru báðar að leiða hana þegar hún ákvað að róla sér á milli þeirra, hangandi á handleggjunum þegar eitthvað gerðist og greyið fór að hágráta. Þær komu strax með hana heim og hafði hún sofnað á leiðinni hálfgrátandi. Þegar hún kom heim og vaknaði var hún enn alveg ómöguleg og vildi alls ekki rétta úr vinstri handleggnum. Hún hágrét ef eitthvað var reynt að rétta úr eða bara snerta handlegginn. Þarna var mér alls ekki farið að lítast á blikuna. Maðurinn minn var farinn til foreldra sinna með son okkar og hárgreiðslukonan mín var að detta í hús,“ segir Vala, sem fékk góðan og þarfan stuðning frá systur sinni.
„Systir mín sem er hjúkrunarfræðingur ákvað að taka málin í sínar hendur og fór ásamt hinni systur minni upp á bráðamóttöku til að láta kíkja á elsku barnið,“ segir hún, sem sjálf hafði engan tíma til að fara með.
Íhugaði að fresta brúðkaupinu
Skemmtileg brúðkaupsmynd.
„Ég var bara heima í hárgreiðslu því við máttum engan tíma missa. Klukkan var þarna um það bil þrjú og brúðkaupið átti að byrja klukkan fimm. Ég var vægast sagt orðin stressuð því þetta hafði aldrei gerst áður og ég vissi ekki hvað var að, hvort hún var brotin eða eitthvað annað. Sem betur fer var þetta „bara“ það að hún fór úr olnbogalið og eftir þetta atvik þá hefur það gerst tvisvar sinnum svo við erum heldur betur reynslunni ríkari. En ég íhugaði í alvöru í smástund hvort við þyrftum að fresta brúðkaupinu. Mamma bauð sig strax fram til að vera heima með stelpuna ef það þyrfti en sem betur fer fór það ekki svo.“
Litla stúlkan jafnaði sig fljótt og gat sem betur fer tekið virkan þátt í athöfninni og veislunni. „Um leið og læknirinn náði að smella henni í liðinn var hún eins og ný og fann ekkert til lengur. Þannig að þegar hún kom heim frá bráðamóttökunni var hún svo glöð því læknirinn var búinn að „laga höndina“ eins og hún sagði sjálf. Hún fór því beint í hárgreiðslu afskaplega spennt og glöð,“ segir Vala og bætir við að fjölskyldan geti hlegið dátt að þessu atviki núna.
„Já heldur betur. Þetta er bara ansi stór minning í minningabankann,“ segir hún og hlær.
Katrín Jakobsdóttir forsætisráðherra.
Svandís Svavarsdóttir heilbrigðisráðherra.
Kolbrún Þórdís Reykfjörð Gylfadóttir, ferðamála-, iðnaðar- og nýsköpunarráðherra.
Ásmundur Einar Daðason, félags- og jafnréttismálaráðherra.
Guðmundur Ingi Guðbrandsson, umhverfis- og auðlindaráðherra.
Sigurður Ingi Jóhannsson, samgöngu- og sveitastjórnarráðherra.
Bjarni Benediktsson fjármálaráðherra
