Föstudagur 15. nóvember, 2024
-0.1 C
Reykjavik
Senda ábendingu
VefTv
Hlaðvörp

Nýjasta frá Apple – Apple Watch 4 – iPhone Xs og Xs MAX

|
Vonir standa til að samningar náist við kennara fyrir haustið svo ekki komi til verkfalla|Sigríður Björk Einarsdóttir

Ásgeir Jón Guðbjartsson hjá Epli.is segir frá nýjungum frá Apple.

Í september kynnti Apple nýjustu afurðir sínar, Apple Watch 4, iPhone Xs og iPhone Xs MAX, og iPhone XR, á árlegum við­burði sem fram fór í Steve Jobs Theater við nýju höf­uð­stöðvar Apple í Kaliforníu. Við hittum Ásgeir Jón Guðbjartsson, markaðsstjóra hjá Epli.is, og skoðuðum nýjustu afurðir Apple sem hafa litið dagsins ljós hjá versluninni og rjúka út eins og heitar lummur.

Áhersla Apple Watch 4 á heilsu og hreyfingu

Hvað hefur nýja útgáfan af Apple Watch 4-úrinu fram yfir eldri gerðina? „Nýja úrið er að miklu leyti end­ur­hannað en er í meg­in­dráttum með sama útlit. Skjárinn hefur stækkað um þriðj­ung og fyllir nú betur út í fram­hlið­ina. Úrin sjálf hafa stækkað örlít­ið, minni útgáfan fer úr 38 millimetrum í 40 millimetra og það stærra úr 42 millimetrum í 44 millimetra. Þetta gefur nýtt pláss fyrir nýjar og flókn­ari úrskífur með fleiri eig­in­leik­um. Frá því að Apple kynnti fyrsta úrið fyrir þremur árum hefur sýn fyrirtækisins á vör­una þró­ast mikið. Í stað þess að vera framleng­ing á sím­anum og leið til að eiga í sam­skiptum við vini og vandamenn þá er öll áhersla Apple nú á heilsu og hreyf­ingu,“ segir Ásgeir.

„Skjárinn hefur stækkað um þriðj­ung og fyllir nú betur út í fram­hlið­ina. Úrin sjálf hafa stækkað örlít­ið, minni útgáfan fer úr 38 millimetrum í 40 millimetra og það stærra úr 42 millimetrum í 44 millimetra.“

Hver myndir þú segja að væri stærsta breytingin? „Stærsta breyt­ingin í þessa átt er að nú er úrið með inn­byggðu hjarta­línu­riti (ECG) sem er bylt­ing fyrir þá sem þurfa að fylgj­ast náið með sínum hjartslætti og hefur ekki sést áður í neinu öðru snjallúri. Sá eiginleiki verður í fyrstu eingöngu aðgengilegur í Bandaríkjunum. Nýju úrin nema það ef not­and­inn dettur og geta hringt sjálf­krafa í Neyð­ar­lín­una ásamt því að senda skila­boð á ICE (In Case of Emergency)-tengiliði ef not­and­inn hefur verið hreyf­ing­ar­laus í mín­útu eftir fall­ið. Jafnframt getur úrið hjálpað til við að finna óreglu­legan hjart­slátt og aðrar hjartsláttartruflanir.“

Gylltur iPhone Xs og Xs Max

Apple er komið með nýjan arf­taka iPhone X sem kom í fyrra. Sá sími kall­ast iPhone Xs. iPhone Xs er hefð­bundin S-upp­færsla. Epli.is er þegar komið með arftakann í sölu og er mikil eftirspurn eftir símanum.

Hverjar eru helstu nýjungarnar í iPhone Xs? „Útlit sím­ans er nán­ast eins fyrir utan að hann fæst einnig í gylltum lit til við­bótar við svartan og hvít­an. Inn­volsið er aftur á móti mikið breytt. Nýr A12 Fusion-örgjörvi sem er mun öfl­ugri, ný mynda­vél með mögnuðum eiginleikum og upp­fært Face ID sem aflæsir sím­ann hraðar en áður.“

„Myndavélin tekur margar myndir sem í bakgrunninum púslar þeim saman og gerir eina mynd með ótrúlegri dýpt og magnaðri lýsingu sem kallast Smart HDR. Með þessu nást skýrari og bjartari myndir sem hafa ekki áður náðst á snjallsímum. Í fyrsta sinn er sími frá Apple með stuðn­ingi við tvö SIM-kort, annað hefð­bundið og hitt inn­byggt í sím­ann eða svo­kallað eSIM. Sú tækni er þó ekki kom­in hingað til lands og óvíst hvenær verður. Apple end­ur­tók leik­inn frá 2014 þegar fyrirtækið kynnti iPhone 6 í tveimur stærð­um. Xs Max er nákvæmlega eins og iPhone Xs, aðeins stærri.“

„Áður hétu stærri símar Apple Plus sem var þá tengt því að stærri sím­inn hefði eitt­hvað til við­bótar, til dæmis betri mynda­vél eða jafn­vel tvær í stað einn­ar. Svo er ekki með Xs Max, hann er bara stærri útgáfa af iPhone Xs. Skjár­inn á Xs er 6,5 tommu en ummál sím­ans er svipað og iPhone 8 Plus,“ segir Ásgeir og brosir.

Myndir/ Hákon Davíð Björnsson og úr einkasafni Epli.is

 

Mínimalískur nútímastíll í sérflokki

Línan býður upp á vandaða og stílhreina danska hönnun úr línu EDGE by Hammel. Þessi danska hönnun og framleiðsla í mínimalískum nútímastíl sem er einstaklega fágaður og möguleikarnir eru óþrjótandi fyrir öll rými heimilisins. Línan er draumur fyrir þá sem aðhyllast mínimalískan stíl og tímalausa hönnun.

Línan býður upp á Edge-hillueiningar frá Hammel. Einingarnar eru stílhreinar með fágað yfirbragð, innblásnar af stórborgarlífsstíl, sem fegra heimilið. Hægt er að raða einingunum upp á ýmsan máta og velja um hvort þær eru hengdar upp á vegg eða fætur settir undir þær.

Edge-línan býður einnig upp á hirslur sem nýtast í hin ýmsu rými heimilisins. Hvort sem er í borðstofuna, sjónvarpsherbergið, ganginn eða í stór alrými. Hugmyndafræðin að baki hönnuninni er sú að hver og einn geti skapað sína eigin útfærslu. Útkoman er undir þér komin með vali á einingum, uppröðun og litasamsetningu, hver og einn getur hannað sitt útlit og verið með sinn eigin stíl.

Edga-grunneiningarnar eru fáanlegar í hvítu, svörtu, garfit-gráu, cappuccion, svarbæsaðri eik og reyktri eik. Jafnframt eru hurðar og skúffuhliðar fáanlegar í sömu litum og gerðum.

OPNUNARTÍMI:
Mánudaga – föstudaga 11-18
Laugardaga 11-16
Bæjarlind 16
201 Kópavogi
Sími: 5537100
Netfang: [email protected]

 

Vandaður og fallegur íþrótta- og útivistarfatnaður – snið sem virka vel fyrir konur

Kari Traa er ein skærasta skíðahetja Norðmanna og margfaldur ólympíumeistari en þessi glæsilega lína, frá Kari Traa er nefnd eftir henni.  Kari Traa kemur sjálf að hönnun og stefnu fyrirtækisins og hefur náð að skapa merkinu vinsældir víða um lönd.

Kari Traa er einstaklega vandaður og fallegur fatnaður og íþróttalínan höfðar vel til kvenna. Sniðin eru kvenleg og litirnir fjölbreyttir. Hver er helsti kosturinn við íþróttafatnaðinn frá Kari Traa?  „Línan samanstendur af vörum sem hentar konum í hvers kyns íþróttum, útivist en líka á kaffihúsarölti.  Vönduð efni, flottir litir og snið sem virka fyrir konur – enda eru einkennisorð Kari Traa – For Girls by Girls,“ segir segir Sigrún Kristín Skúladóttir hjá Sportís.

Hér má sjá Ásu Steinarsdóttur, bloggara í Kari Traa ullarfötunum.

Þið bjóðið einnig upp á fallegan og vandaðan ullarfatnað frá Kari Traa. Fyrir hvað er ullarfatalínan helst rómuð?  „Kari Traa-ullarlínan er úr 100% merino-ull sem er ofin úr fíngerðum ullarþráðum sem ekki stinga. Ullin temprar og eykur vellíðan hvort sem er í hita eða kulda. Einnig er mikið úrval af mynstrum og litum, frísklegum sem lífga upp á tilveruna.“

Sportís
Mörkinni 6
108 Reykjavík
5201000
www.sportis.is

 

Listi yfir 40 tekjuhæstu Íslendingana

|
|

Einu sinni á ári birtir embætti ríkisskattstjóra lista yfir þá 40 einstaklinga sem greiða hæsta skatta hérlendis samkvæmt álagningaskrá. Á sama tíma eru þær skrár gerðar tímabundið aðgengilegar og nokkrir íslenskir fjölmiðlar ná í þær, búa til lista yfir tekjur einstaklinga eftir atvinnugreinum og selja forvitnum almenningi sem byggja á skránum.

Þær skattgreiðslur sem tilteknar eru í álagningarskrá gefa þó ekki alltaf raunsanna mynd af tekjum Íslendinga. Sumir sem greiða himinháa skatta hafa getað beðið þangað til eftir að álagningarskráin er birt og talið svo fram. Þannig hafa þeir sloppið við að lenda á útsendum lista ríkisskattstjóra, og að nöfn þeirra birtist í flestum fjölmiðlum landsins. Og í álagningaskránum kemur bara fram hverjar heildargreiðslur viðkomandi vegna opinberra gjalda voru. Þar er ekki hægt að sjá t.d. hversu mikið hver einstaklingar þénaði í launatekjur og hversu háar fjármagnstekjur þeirra voru. Það skiptir umtalsverðu máli í ljósi þess að staðgreiðsla skatta af launatekjum er á bilinu 36,94 til 46,24 prósent að útsvari meðtöldu en fjármagnstekjuskattur var 20 prósent þangað til um síðustu áramót þegar hann var hækkaður upp í 22 prósent.

Ef einstaklingur er með þorra tekna sinna í formi fjármagnstekna þá borgar hann mun minna hlutfall af tekjum sínum til ríkissjóðs en ef hann er með þær í formi launatekna.

Upplýsingar um það hvernig tekjur fólks skiptast, og tæmandi upplýsingar um hverjir borga hvað í skatta, er hins vegar hægt að finna í svokallaðri skattskrá. Þessum upplýsingum hefur vefurinn Tekjur.is safnað saman og gert aðgengilegar á stafrænu formi. Vefurinn fer í loftið í dag og hægt er að komast inn á hann á heimasíðu Kjarnans.

Þar birtast upplýsingar um tekjur allra Íslendinga á árinu 2016 sem eru 18 ára og eldri, og yngri en 100 ára, með sama hætti og þær birtast í skattskránni. Og þar kemur meðal annars fram að sex Íslendingar voru með fjármagnstekjur sem voru yfir einum milljarði króna á því ári.

Hægt er að lesa ítarlega fréttaskýringu um málið í nýjasta tölublaði Mannlífs sem kom út í morgun og á vef Kjarnans.

Hér er listi yfir 40 tekjuhæstu Íslendingana. Allar upplýsingar í töflunni eru úr skattskrá.

 

Tími til aðgerða er að renna út

Ef ekki verður gripið til róttækra aðgerða við draga úr hnattrænni hlýnun geta afleyðingar orðið alvarlegar samkvæmt skýrslu sem birtist á vegum Loftlagsnefndar Sameinuðu þjóðanna.

Osaka, Alexandría, Sjanghæ, Rio de Janeiro og Miami munu að fullu eða stórum hluta hverfa undir sæ. Kóralrifin deyja endanlega út. Svæsnar hitabylgjur og langvarandi þurrkar verða algengari sem og fellibylir sem verða bæði öflugri og bera með sér meiri úrkomu. Sjávarmál hækkar og Norðurskautið verður íslaust yfir sumartímann. Milljónir manna verða á flótta og fátækt stóreykst. Höfin halda áfram að súrna með tilheyrandi aflabresti. Þetta og meira til eru afleiðingarnar ef ekki verður gripið til róttækra aðgerða við draga úr hnattrænni hlýnun, samkvæmt skýrslu sem birtist á vegum Loftlagsnefndar Sameinuðu þjóðanna. Fram kemur í skýrslunni að þrátt fyrir kolsvart útlit sé enn tími til að bregðast við. Draga þarf úr kolefnaútblæstri um 45 prósent fyrir árið 2030 í stað 20 prósenta líkt og Parísarsáttmálinn segir til um. Það sé hægt með samhentu átaki ríkisstjórna, fyrirtækja og einstaklinga. Kostnaðurinn við aðgerðirnar sé verulegur en þó minni ef ekkert verður að gert.

Um hvað fjallar skýrslan?

Skýrslan er ein sú umfangsmesta sem gerð hefur verið um málefnið og er henni ætlað að verða leiðarvísir um loftlagsaðgerðir í náinni framtíð. Hún var tvö og hálft ár í smíðum og dregur saman niðurstöður yfir sex þúsund vísindalegra rannsókna. Í skýrslunni er dregin upp sviðsmynd af því hver áhrifin verða af hnattrænni hlýnun upp á 1,5 gráður (miðað við hitastig fyrir iðnbyltingu) og þau borin saman við áhrifin af 2 gráðu hlýnun eins og markmið Parísarsáttmálans kveða á um. Vert er að taka fram að ríki heims eru langt frá því að uppfylla ákvæði Parísarsáttmálans og að óbreyttu muni hitastigið hækka um 3 gráður áður en öldin er úti. Það myndi gjörbreyta núverandi heimsmynd.

Hver eru viðbrögðin?

Það er samhljóma niðurstaða vísindamanna að grípa þarf til mun róttækari aðgerða en Parísarsáttmálinn kveður á um ef ekki á illa að fara. Skýrslan er afdráttarlaus hvað það varðar. Hins vegar hefur verið gagnrýnt að orðalag samantektar skýrslunnar sem send var þjóðarleiðtogum hafi verið mildað vegna þrýstings frá Bandaríkjunum, Sádi-Arabíu og fleiri olíuframleiðsluríkjum. Skýrslan verður lögð til grundvallar í komandi loftlagsviðræðum í Katowice í Póllandi í desember en erfitt er að sjá að það takist að sannfæra stjórnmálamenn um að grípa til róttækari aðgerða en Parísarsáttmálinn kveður á um. Þannig hafa stjórnvöld í Ástralíu útilokað að hætta kolaframleiðslu líkt og lagt er til í skýrslunni.

Hvað með Ísland?

Ísland er ekki undanskilið áhrifum hnattrænnar hlýnunar. Hitastig hlýnar og jöklar halda áfram að hopa og gangi sviðsmyndir um loftlagsbreytingar eftir gæti Langjökull tapað 85% af rúmmáli sínu. Samhliða því gæti tíðni eldgosa aukist. Súrnun í hafi mælist meiri umhverfis Ísland en annars staðar og haldi sú þróun áfram getur það haft veruleg áhrif á fiskistofna í efnahagslögsögunni. Vegna aukinna hlýinda er viðbúið að nýjar dýrategundir nemi land á sama tíma og aðrar hverfa.

Hvað getur þú gert?

Breytt neysluhegðun er lykilþáttur í baráttunni gegn hnattrænni hlýnun. Til að mynda með því að ganga eða hjóla þegar það er kostur, en að öðrum kosti notast við almenningssamgöngur. Ef nauðsynlegt þykir að nota bíl að velja þá rafmagnsbíl. Minni neysla skilar sér í minni úrgangi sem síðan er best að endurvinna eða endurnýta. Loks er hægt að ganga í þrýstihópa sem beita sér fyrir umbótum og kjósa þá flokka sem eru líklegir til að ráðast í þær.

Hringlandaháttur við Hringbraut

Upphaflega átti Nýi Landspítalinn (NLSH ohf.) að fá sjúkrahótelið afhent fullbúið á vormánuðum 2017 en fyrsta skóflustungan var tekin árið 2015. Síðan hefur verklokum ítrekað verið seinkað. Samkvæmt heimildum Mannlífs stóð til að afhenda húsið 15. september sl. en það hefur ekki gengið eftir.

Ein helsta ástæða tafanna er sú að steinklæðning sem nú er komin utan á húsið hefur verið flóknari og tímafrekari í útfærslu en fyrstu áætlanir gerðu ráð fyrir. Steinklæðningin sem er úr graníti og basalti er sömuleiðis listskreyting hússins og er hún hönnuð af Finnboga Péturssyni myndlistarmanni. Þrátt fyrir þessar tafir er frágangi að innan löngu lokið. Munck Íslandi er aðalverktaki framkvæmdanna en Jón Björnsson, aðstoðarframkvæmdastjóri fyrirtækisins, vildi ekki tjá sig um málið.

Ágreiningur um ábyrgð

Gunnar Svavarsson, framkvæmdastjóri NLSH ohf., segir í skriflegu svari að velferðarráðuneytið geri ráð fyrir að hótelið hefji starfsemi fljótlega eftir að byggingu þess er lokið. „Alþingi úthlutar fjárveitingum til reksturs ríkisstofnana ár hvert með fjárlögum. Rekstur ársins 2019 fellur því á afgreiðslu fjárlaga 2019 sem nú eru til meðferðar á Alþingi,“ segir hann.

Aðspurður hver beri ábyrgð á tjóni vegna tafanna segir Gunnar að NLSH og verktakann greini á um það. „Í samningum milli aðila koma fram tafabætur upp á 300.000 kr. pr. dag pr. verkhluta en verkhlutarnir eru þrír. Verkkaupi hefur þegar greint frá því að samningsgildi tafabóta sé óbreytt. Þar sem verkinu er ekki lokið og fullnaðaruppgjör ekki farið fram hafa verkkaupi og verktaki ekki lagt fram lokakröfur sínar. Hvorki verktaki né verkkaupi hafa því lýst yfir ábyrgð á tjóni sem orðið hefur vegna tafa, enda ekki venja í verkum sem standa yfir. NLSH hefur komið því á framfæri við verktaka að krafist verði tafabóta fyrir þær tafir sem eru á ábyrgð verktakans,“ segir Gunnar en tekur fram að verktaki hafi gert samskonar kröfur vegna tafa og að aðilar hafi verið í viðræðum um hvernig leysa megi ágreininginn. Þá sé ekki tímabært að verkkaupi sé með yfirlýsingar um hvaða aðgerðir séu mögulegar. „Þeir sem hafa hins vegar orðið fyrir mestum skaða eru þeir gestir sem áttu að gista í húsinu, sjúklingar og aðstandendur. Það er óbeinn skaði sem erfitt er að meta í krónum.“

Íhuga málsókn

Birgir Þórarinsson, fulltrúi Miðflokksins í fjárlaganefnd, sagði í samtali við Mannlíf að á fundi nefndarinnar með fulltrúum velferðarráðuneytisins nýverið; hafi verið fullyrt að umframkostnaður vegna byggingarinnar myndi ekki falla á ríkissjóð. „Hins vegar hafa orðið tafir á því að byggingin verði tekin í notkun og það er að sjálfsögðu tjón fyrir ríkið,“ segir hann og bætti við að komið hafi til tals á fundinum að fara í mál við verktakann vegna þess.

Þetta staðfestir Willum Þór Þórsson, formaður fjárlaganefndar. „Ekki hefur viðbótar-útlagður kostnaður fallið til og ráðuneytið telur að enginn viðbótarkostnaður muni falla á ríkissjóð. Hins vegar á eftir að reikna og útkljá tafakostnað, sem vissulega gæti endað sem dómsmál,“ segir Willum í skriflegu svari til Mannlífs.

Ekki fékk staðfest áður en blaðið fór í prentun hvort rekstur sjúkrahótelsins hefjist á þessu ári eða ekki.

Miðað við þriggja stjörnu hótel

Mannlíf hefur heimildir fyrir því að á meðal starfsmanna Landspítala gæti nokkurrar kergju vegna „óþarfa íburðar“ við nýja sjúkrahótelið, á sama tíma og rekstur spítalans sé skorinn við nögl. Þannig séu innréttingar, húsgögn og raftæki sem keypt hafa verið í háum verðflokki. Þá er gagnrýnt að ekki hafi verið samnýtt útboð með Landspítalanum til að ná fram hagstæðara verði. Gunnar svarar því til að NLSH ofh. hafi ekki heimildir til að nýta samninga við þriðja aðila. Hægt sé að nýta rammasamninga séu þeir fyrir hendi en engir slíkir hafi verið fyrir hendi við innkaup búnaðar í sjúkrahótelið. Þá staðfestir Gunnar að keypt hafi verið svokölluð hótelsjónvörp sem eru tæknilega frábrugðin hefðbundnum heimilissjónvarpstækjum. Þessum tækjum sé ætlað að vera í notkun í mörg ár og þau þurfi að vera tilbúin til að mæta væntanlegum framförum í útsendingu sjónvarps. „Öll hönnun tekur mið af sambærilegum verkefnum á Norðurlöndunum og hótelum almennt hér á landi, en hótelið er flokkað sem almennt þriggja stjörnu hótel á markaði þótt um sé að ræða sérhæfingu í nokkrum herbergjum,“ segir Gunnar.

 

 

Allar hundrað ferðirnar upp Esjuna voru skemmtilegar

Utanvegshlauparinn Hafdís Guðrún Hilmarsdóttir setti sér metnaðarfullt markmið í mars því hún ætlaði að hlaupa  Esjuna 100 sinnum á þessu ári. Um seinustu helgi náði hún markmiðinu og fór í hundraðasta sinn á þessu ári upp að Steini á Esjunni.

Hugmyndin um að fara 100 ferðir upp Esjuna á þessu ári kom til Hafdísar Guðrúnar Hilmarsdóttur þegar hún fór á Esjuna í annað sinn á þessu ári, þann 6. mars, í glampandi sól og snjó. „Það var svo rosaleg gott veður, sól og snjór. Þá datt mér þetta snjallræði í hug,“ segir Hafdís glöð í bragði. Hún deildi hugmyndinni með vinum á vandamönnum á Facebook. „Þegar ég setti þetta á Facebook þá var ekki aftur snúið.“

Spurð út í hvernig fólki í kringum hana hafi litist á markmiðið í upphafi segir Hafdís flesta hafa verið jákvæða fyrir því. „Sumum fannst þetta kannski frekar einhæft og voru með áhyggjur af því að ég yrði leið á þessu. Aðrir voru hræddir um að ég myndi ekki ná þessu, að ég yrði bara hlaupandi upp á Esjuna á jólunum,“ segir Hafdís kímin. „En annars voru flestir bara spenntir. Nokkrir vinnufélagar fylgdust t.d. með og komu svo með í fimmtugustu ferðina í lok maí.“

Hafdís segir ævintýrið hafa byrjað þegar hún skráði sig í 100 kílómetra hlaup í Frakklandi sem fór fram 25. ágúst. Hún skráði sig í byrjun febrúar og hugsaði með sér að Esjuferðir væri góður undirbúningur.

Hafdís er menntuð kennari en starfar sem verkefnastjóri hjá Menntamálastofnun ásamt því að vera í doktorsnámi. Spurð út í hvenær hún hafi fundið tíma til að fara allar þessar Esjuferðir svarar Hafdís: „Ég fór ýmist fyrir eða eftir vinnu eða þá um helgar. Ég held að ég hafi farið á Esjuna á öllum vikudögunum.“

Aðspurð hvort hún hafi einhvern tímann séð eftir að hafa sett sér svona metnaðarfullt markmið svarar Hafdís neitandi. „Nei, ég sá aldrei eftir þessu. Þetta var alltaf skemmtilegt. Þetta var oft erfitt veðursins vegna en alltaf skemmtilegt,“ útskýrir Hafdís sem ætlaði svo að fara beint á Esjuna eftir að blaðamaður náði tali af henni. Hún er því hvergi nærri hætt að hlaupa Esjuna þrátt fyrir að markmiðinu hafi verið náð.

Hafdís fann mikinn mun á líkamlegu formi þegar líða tók á árið. „Já, ég var farin að fara hraðar og hraðar upp og niður. Ég fór hraðast upp að Steini á 34 mínútum, hraðasta ferðin upp og niður var 53 mínútur. Hraðasta ferðin niður var svo 14,59 mínútur, það var hundraðasta ferðin og það er hraðasta skráða ferð sem kona hefur farið samkvæmt Strava.“

Hafdís fór ýmist ein eða með félagsskap góðra vina í Esjuferðirnar en hún náði að fá um 50 manns með sér í hundruðustu ferðina. Hún kveðst vera með mikið keppnisskap og það hafi örugglega verið til þess að hún fór ansi hratt niður fjallið í hundruðustu ferðinni og sló met í leiðinni. „Það voru þrír sterkir karlmenn sem hlupu með mér niður í hundruðustu ferðinni. Það er ekki oft sem ég hef einhvern með mér á leiðinni niður og það hjálpaði örugglega við að ná góðum tíma,“ segir Hafdís.

Hafdís hefur mjög gaman af því að hlaupa fjöll og hefur stundað það af kappi síðustu fimm ár. Á döfinni er svo að finna stórt hlaup erlendis til að taka þátt í. „Undanfarið hefur áhugi minn aukist mikið á að taka þátt í 100 mílna hlaupi einhvers staðar úti, þannig að ég er að skoða það núna.“

Frá ráðgjöf fyrir Sameinuðu þjóðirnar í skúringar

Libertad Venegas er með BA-próf í fjölmiðlafræði og meistaragráðu í félagsfræði. Í heimalandi sínu Mexíkó vann hún meðal annars sem blaðamaður, sjónvarpsfréttamaður og ráðgjafi hjá fjölþjóðlegri nefnd á vegum Sameinuðu þjóðanna. Þegar hún flutti til Íslands til að hefja búskap með íslenskum eiginmanni sínum var eina vinnan sem henni stóð til boða skúringar. Hún segist hafa sætt sig við það, enda vitað að til þess að fá betri vinnu þyrfti hún að læra tungumálið.

Síðan eru liðin sjö ár og Libertad er farin að tala ágæta íslensku, enda hefur hún lokið öllum námskeiðum í tungumálinu sem Málaskólinn Mímir býður upp á. Í dag vinnur hún sem leiðbeinandi á leikskóla, vinnu sem hún segir að sé vissulega gefandi og skemmtileg en kaupið er ekki hátt og þrátt fyrir að Libertad hafi fengið háskólagráður sínar metnar til launahækkunar í leikskólanum langar hana eðlilega til að fá starf sem tengist því sem hún menntaði sig til. Hún segist hafa sótt um allar stöður sem hún hafi séð auglýstar og tengist hennar menntun en aldrei fengið svar við nokkurri umsókn.

„Mig langar í íslenskunám í Háskóla Íslands til að bæta stöðu mína á vinnumarkaðnum,“ segir Libertad þegar hún er spurð hvað hún geti gert til að komast í vinnu sem hæfi menntun hennar. „En þar er eingöngu boðið upp á dagkennslu og ég hef ekki efni á að hætta að vinna til að fara í nám. Ég skil ekki hvers vegna það er ekki boðið upp á íslenskunám við Háskólann á kvöldin. Það þýðir eiginlega bara að námið stendur eingöngu þeim sem eru vel stæðir til boða og við sem ekki höfum efni á að hætta að vinna sitjum eftir. Það finnst mér ekki sanngjarnt. Mér finnst það þurfi að breyta því til að koma til móts við fólk af erlendum uppruna sem virkilega vill læra íslensku og komast inn á íslenskan vinnumarkað.“

Eftir að hafa unnið við skúringar um tíma fékk Libertad vinnu á frístundamiðstöð og síðan á leikskóla. Hún segist margoft áður hafa sótt um vinnu á leikskóla en ekki fengið svar, það hafi verið vinskapur sem kom henni loks í atvinnuviðtal við leikskólastjórann.

„Vinkona mín þekkir leikskólastjórann og í gegnum hana fékk ég atvinnuviðtal og var ráðin. Annars hefði ég ekki fengið þetta starf,“ segir hún ákveðin.

Háskólamenntaðir útlendingar vinna allir á leikskólum

Hvaða áhrif hefur það á sjálfsmyndina og sálarlífið að eiga ekki möguleika á að fá vinnu í samræmi við menntun þína?

„Það er mjög þreytandi til lengdar,“ viðurkennir Libertad. „Ég skil auðvitað að íslenskukunnáttan stendur mér fyrir þrifum en á hinn bóginn virðist það vera landlægt hér að erlent fólk með háskólamenntun fái ekki vinnu við sitt hæfi. Allir háskólamenntaðir útlendingar sem ég þekki vinna á leikskólum. Það er mikilsvert starf og okkur er boðið upp á alls konar námskeið í sambandi við vinnuna en það er vissulega skrýtið að það skuli vera eina starfið sem maður á möguleika á að fá. Ég er orðin fertug og sé ekki fram á að þetta ástand breytist neitt héðan af, svo ég er jafnvel að hugsa um að fara í leikskólakennaranám til að hafa möguleika á betri launum.“

Libertad segir það ekki hjálpa sér að komast inn á íslenskan vinnumarkað að vera gift Íslendingi.

„Hann hefur engin sambönd við fólk í mínum geira,“ segir hún og hlær. „Það virðist skipta miklu máli til að fá vinnu á Íslandi að þekkja rétta fólkið og við erum bara ekki rétt tengd, greinilega.“

Verður að koma til móts við útlendinga

Spurð hvort hún hafi upplifað það að Íslendingar hafi fordóma fyrir erlendu fólki á vinnumarkaði dregur Libertad við sig svarið.

„Já, stundum,“ segir hún og þagnar svo. „Mér finnst vinnuveitendur dálítið tregir til að ráða fólk sem ekki talar fullkomna íslensku, meira að segja í störf sem ekki krefjast íslenskukunnáttu. En mér finnst mér ekki mismunað vegna uppruna míns, alls ekki. Mér finnst hins vegar að íslensk yfirvöld þurfi að koma betur til móts við útlendinga sem vilja læra íslensku og setjast að hér. Það eru voðalega fáir möguleikar í boði eins og staðan er núna.“

Libertad á fimm ára dóttur og meðal annars hennar vegna segir hún ekki koma til greina að flytja aftur heim til Mexíkó til að fá betra starf. Fjölskyldan sé íslensk og hafi byggt upp líf sitt hér, það sé ekki inni í myndinni að rífa hana upp með rótum.

„Mér hefur stundum dottið það í hug að flytja aftur til Mexíkó,“ segir hún. „En maðurinn minn talar ekki spænsku svo hann ætti erfitt með að fá vinnu þar og það gengi ekki. Dóttir mín talar auðvitað bæði spænsku og íslensku en hún er samt Íslendingur og á sínar rætur hér, svo ég held það yrði allt of erfitt að skipta algjörlega um umhverfi og byrja upp á nýtt í landi sem er framandi fyrir hana og manninn minn. Hann á líka yndislega fjölskyldu hér sem við erum mjög tengd þannig að við viljum vera hér áfram og byggja líf okkar upp hér. Ef það kostar að ég fái aldrei tækifæri til að nýta menntun mína og vinna við það sem ég hef mestan áhuga á, þá verð ég bara að sætta mig við það og finna aðrar leiðir. Ég vildi samt óska að það væri ekki svona flókið að komast inn í háskólanám í íslensku til að eiga möguleika á að komast inn á vinnumarkaðinn í krafti menntunar sinnar. Það er það sem helst þarf að breyta, held ég, til að gefa fólki af erlendum uppruna sömu möguleika og öðrum. Ég vona að það breytist sem fyrst.“

Fólk af erlendum uppruna sem flyst til Íslands til að setjast hér að og skapa sér líf á erfitt með að fá vinnu við sitt hæfi. Háskólamenntun annars staðar frá er ekki metin til jafns við íslenska háskólamenntun og gjarnan festist þetta fólk í láglaunastörfum.

Mannlíf ræddi við þrjá útlendinga sem hafa búið á Íslandi árum saman án þess að fá vinnu við sitt hæfi um reynslu þeirra af íslenskum vinnumarkaði og fékk innsýn í baráttuna sem það kostar að komast í vinnu sem hæfir menntun þeirra. Lesa má alla úttektina í nýjasta tölublaði Mannlífs sem kom út í morgun.

Myndir / Heiðdís Guðbjörg Gunnarsdóttir

Fólk er mjög forvitið um þessa þungun

||
Mynd / Heiða Helgadóttir|Mynd / Fasteignafélagið Trausti|Mynd / Fasteignafélagið Trausti

Anna Þóra Baldursdóttir lagði af stað í ævintýraferð fyrir fimm árum. Hún hélt til Kenía en starfaði stutt sem sjálfboðaliði því örlögin tóku fljótt í taumana.

 

Í dag er hún enn búsett þar og rekur barnaheimili fyrir ungar mæður. Hún þakkar Snapchat fyrir að hafa óvænt greitt götu sína þegar kom að fjármagni en ræðir hér um baráttuna við sjálfa sig hvað varðar „white savior“ sem og litlu stúlkuna sem er væntanleg í heiminn nú síðar í mánuðinum. Hún segist furða sig á áhuga fólks hvað meðgönguna varði en algengustu spurninguna vera hvernig barnið sé á litinn.

„Fólk er gríðarlega áhugasamt um þessa þungun sem kom mér svakalega á óvart.“

„Fólk sem hefur fylgt mér hvað lengst upplifir að það eigi örlítið í mér. Ég hef því fengið fjöldamargar fyrirspurnir um hvaðan pabbinn sé eða hvort ég hafi farið í tæknifrjóvgun. Ég hef líka verið spurð hvort ég sé staðgöngumóðir. Í grunninn finnst mér hálfhlægilegt að fólk sé að hugsa um þessa hluti hvað mig varðar en mér fannst hins vegar óþægilegt að heyra upplifanir vinkvenna minna sem lenda ósjaldan í því að vera spurðar skrítinna spurninga um mig og þessa meðgöngu.

Engu að síður fannst mér skynsamlegast að fæða barnið heima á Íslandi, aðallega upp á stuðningsnetið hér sem er gríðarlega sterkt. En þess utan hefði ég heldur aldrei fengið frí eða tíma til að sinna nýburanum heima í Kenía á barnaheimilinu. Það var samt ömurlega erfitt að fara í burtu í svona langan tíma sérstaklega þar sem ég veit ekki nákvæmlega hvenær ég mun snúa til baka. Ég ætla að láta það ráðast, en mig langar að hún verði í það minnsta orðin þriggja mánaða upp á bólusetningar og annað að gera. Annars fyndist mér best í stöðunni að hún yrði bólusett að mestu úti enda eru þau með allt þetta auka, sem við erum að borga sérstaklega fyrir hér heima, innifalið.“

„Ég veit líka að við munum alltaf hafa annan fótinn í Kenía þar sem það er hennar annað heimaland.“

„Þá er eflaust betra að hún sé bólusett eftir þeirra reglum. En þetta mun allt skýrast með tíð og tíma. Þungunin sjálf kom mér gríðarlega á óvart sérstaklega í ljósi þess að ég hafði nýverið kynnst pabba hennar og er í dag einhleyp. Hann er jú kenískur en ég hef alveg haldið honum frá sviðsljósinu og mun gera það áfram.“

Texti/ Íris Hauksdóttir.
Mynd / Hákon Davíð Björnsson.
Förðun / Björg Alfreðsdóttir.

Helmer hjónin hittast aftur

Brúðuheimili Hendriks Ibsen hefur lengi verið talið eitt af umdeildustu raunsæisverkum síðari ára. Í verkinu Dúkkuheimilið, annar hluti, hitta áhorfendur fyrir sömu persónur, fimmtán árum síðar, en verkið er sýnt um þessar mundir í Borgarleikhúsinu.

Ibsen skrifaði leikritið um Helmer-hjónin (e. A Doll´s House) árið 1897 en endir verksins var byltingarkenndur, svo ekki sé meira sagt. Eftir sat spurningin, hvað varð um Nóru eftir að hafa yfirgefið mann sinn og börn með þekktasta hurðaskelli bókmenntasögunnar.

Í nýju höfundarverki Lucas Hnath, Dúkkuheimilið, annar hluti, ber Nóra að sömu dyrum, fimmtán árum síðar, og það sem áhorfendur fá fljótt að vita er að hjónin eru enn gift.
Ár er síðan verkið var frumsýnt á Broadway og það var strax tilnefnt besta leikritið á Tony-verðlaunahátíðinni, enda er það skemmtilega skrifað, í anda Ibsens þar sem kjarnastefið um kraft konunnar er haft að leiðarljósi. Leikhúsgestir þurfa ekki að hafa lesið Ibsen eða séð Brúðuheimilið því forsagan kemst vel til skila í þýðingu Sölku Guðmundsdóttur.

Fjölbreytt listform héldu sýningunni á lofti en búningar Stefaníu Adolfsdóttur voru ákveðinn senuþjófur. Nóra sveiflaðist um sviðið líkt og nautabani og ögrar bæði eiginmanninum og úreltum viðhorfum.

Litavalið var jafnframt áhugavert og augljóst að gæði ríktu innan fjölskyldunnar sem þar til nú hafði sópaði vandamálum undir flauelsteppið.
Tónlistin átti sinn þátt í að skapa magnþrungna stemningu Nýja sviðsins þar sem Una Sveinbjargardóttir á heiður skilinn. Leikmynd Barkar Jónssonar birti ískalt og persónuleikalaust heimili sem minnti frekar á grafhýsi en glæsihöll. Lýsing Björns Bergsteins Guðmundssonar jók jafnframt dramatísk áhrif tónlistar og dansatriða sem römmuðu verkið listilega inn undir leikstjórn Unu Þorleifsdóttur.
Dansatriðin áttu stóran þátt í uppfærslunni undir stjórn Sveinbjargar Þórhallsdóttur. Verkið hefst með danshreyfingum sem verða að viðloðandi stefi. Danshreyfingarnar hefði á köflum mátt stytta þó að tilkomumikill tangó hjónanna síðar í verkinu hafi verið táknrænn þar sem Nóra kvaddi endanlega þá undirgefnu konu sem hún eitt sinn var.

Í uppgjöri hjónanna var jafnframt bráðsnjallt að sjá Nóru spegla líkamsstöðu Þorvaldar og beina sjónum að karllægum stellingum þegar kemur að yfirráðaorðræðu.

Margrét Helga Jóhannsdóttir fer með hlutverk barnfóstrunnar Önnu Maríu en viðhorf hennar kallaðist á við hjónin hvort um sig. Lágróma rödd Emmu, dóttur hjónanna, í meðförum Ebbu Katrínar Jónsdóttur, speglaði svo unga Nóru með viðhorf feðraveldisins að leiðarljósi. Textinn hefur nefnilega tvær hliðar svo áhorfendur halda á einhvern hátt með öllum karakterunum fjórum. Ólíkar hugmyndir um ástina, skuldbindingu hjónabandsins, samskipti kynjanna og stöðu konunnar á sannarlega við í samtíma leikhúsi.
Þótt umfjöllunarefnið sé þungt er alltaf stutt í húmorinn, þökk sé Hilmi Snæ Guðnasyni sem lífgerir hér kunnuglegan karakter. Þau Hilmir og Unnur Ösp Stefánsdóttir eru óumdeilanlega miklir þungavigtaleikarar. Ástríðan á milli Nóru og Þorvaldar er enn til staðar og á einhverjum tímapunkti glitti í von um að hjónaband þeirra hlyti farsælan endi. Lok verksins eru þó sterk því Nóra er hvergi nærri hætt í baráttu sinni fyrir frelsi konunnar. Það er vel hægt að mæla með Dúkkuheimili, öðrum hluta, fyrir alla sem vilja komast nær því að skilja hvað það felur í sér að vera manneskja.

Umfjöllunina má finna í 39 tbl. Vikunnar.

Texti/ Íris Hauksdóttir.

Mynd / Grímur Bjarnason.

Hafði ekki orðið drukkinn í 30 ár

Leikarinn Bob Odenkirk drekkur ekki áfengi en féllst á það að drekka sig fullan fyrir hlutverk sem hann fór með árið 2016.

Leikarinn Bob Odenkirk hafði ekki orðið drukkinn í 30 ár þegar hann ákvað að drekka sig fullan fyrir hlutverk sitt í þáttunum Drunk History.

Leikarinn, sem fór með hlutverk í þáttunum árið 2016, greindi nýverið frá því í viðtali við PaleyFest New York að honum hafi þótt afar óþægilegt að drekka sig fullan og að gjörningurinn hafi valdið honum miklum kvíða.

Kvíðinn var svo mikill að hann ákvað næstum því að hætta við að leika í þáttunum. „Það var óþægilegt að verða drukkinn. Ég á börn sem eru orðin unglingar og ég var svolítið hræddur um að verða blindfullur í sjónvarpinu, svona ælandi fullur,“ sagði Odenkirk sem er tveggja barna faðir.

Odenkirk er orðinn 55 ára og hafði ekki drukkið í heil þrjátíu ár áður en hann fór með hlutverk í umræddum þætti. Þess má geta að hann drakk tvo og hálfan gin og tónik og fjögur tekíla-skot. „Ég var klárlega fullur.“

Hann tekur fram að hann hafi ákveðið að taka hlutverkinu þegar hann sá að framleiðandi þáttanna passaði vel upp á hann.

Með meistaragráðu í félagsfræði en fékk bara vinnur við þrif

Mynd / Facebook / Heilbrigðisstofnun Vestfjarða

Libertad Venegas er með BA-próf í fjölmiðlafræði og meistaragráðu í félagsfræði en fær ekki menntun sína metna hér á landi. Fyrst þegar hún flutti til Íslands buðust henni bara vinnur við þrif. Í dag starfar hún á leikskóla.

Fólk af erlendum uppruna sem flyst til Íslands til að setjast hér að á erfitt með að fá menntun sína metna á Íslandi og vinnu við sitt hæfi.

Í nýjasta tölublaði Mannlífs sem kemur út á morgun segja þau Libertad, Harald og Sante Feaster sögu sína.

Libertad Venegas er með BA-próf í fjölmiðlafræði og meistaragráðu í félagsfræði. Í heimalandi sínu Mexíkó vann hún meðal annars sem blaðamaður, sjónvarpsfréttamaður og ráðgjafi hjá fjölþjóðlegri nefnd á vegum Sameinuðu þjóðanna. Fyrst fékk hún aðeins vinnu við skúringar en í dag starfar hún á leikskóla.

Mynd / Heiðdís Guðbjörg Gunnarsdóttir

Ljósmyndir úr ræktinni sagðar valda áhyggjum

Því hefur verið haldið fram að sjálfsmyndir sem teknar eru í miðri líkamsrækt og birtar á samfélagsmiðlum veiti fólki hvatningu. En niðurstöður nýrrar rannsóknar leiða annað í ljós.

Niðurstöður nýlegrar rannsóknar leiddu í ljós að sjálfsmyndir sem teknar eru í líkamsræktarstöð hafa gjarnan neikvæð áhrif á þá einstaklinga sem sjá myndirnar á samfélagsmiðlum. Niðurstöðurnar, sem birtust í læknaritinu Health Communications, sýna að það fólk sem tekur myndir af sér í ræktinni og birtir á samfélagsmiðlum vill oft meina að slíkar myndir veiti öðrum hvatningu. En rannsakendur, þau Tricia Burke og Stephen Rains, komust að því að slíkar myndir hafa oft öfug áhrif á fólk og valda því að það fær áhyggjur af útliti sínu og þyngd.

Rannsóknin leiddi einnig í ljós að þegar fólk sér ræktarmyndir af fólki sem er með svipaðan líkama og það sjálft þá eru meiri líkur á að myndirnar veki upp slæma tilfinningu hjá viðkomandi.

„Ég er með kúnna sem eyða meiri orku í símann sinn heldur en æfinguna, þeir spyrja oft hvort ég geti tekið myndir af þeim,“ segir Kenny Santucci sem rekur líkamsræktarstöðina Solace í New York þegar hann er spurður út í niðurstöður rannsóknarinnar.

Santucci furðar sig á þessu. „Ég hugsa oft með mér: „við erum hérna í miðri æfingu í kringum hóp fólks en þú villt að ég taki mynd af þér“,“ sagði hann í samtali við GQ.

Leigja hús á 11,7 milljónir króna á mánuði

Justin Bieber og Hailey Baldwin eru komin á leigumarkaðinn.

Nýbökuðu hjónin Justin Bieber og Hailey Baldwin eru farin að leigja íbúð saman. Íbúðin er ekkert slor en um 650 fermetra glæsihöll í Toluca Lake-hverfinu í Los Angeles er að ræða.

Húsið sem skötuhjúin leigja var á sölu fyrir tæpan milljarð króna en samkvæmt heimildarmanni PEOPLE samdi Bieber um mánaðarleigu í stað þess að festa kaup á eigninni.

Eignin sem um ræðir var tekin í gegn fyrir tveimur árum. Hún hefur að geyma fimm svefnherbergi og sjö baðherbergi. Í húsinu er upptökuver, líkamsræktarstöð, risastór bílskúr og sundlaug svo eitthvað sé nefnt.

Heimildarmaður PEOPLE segir þá að húsið sé tilvalið undir veisluhöld því í því er fullbúið eldhús sem hentar vel fyrir meistarakokka.

Justin Bieber og Hailey Baldwin eru víst gift

Innlit inn til ofurfyrirsætunnar Alessöndru Ambrosio

Heimili fyrirsætunnar Alessöndru Ambrosio er afar glæsilegt og undir áhrifum frá heimalandi hennar.

Ofurfyrirsætan Alessandra Ambrosio býr í glæsilegu húsi í Kaliforníu en hún fékk hönnuðinn Martyn Lawrence Bullard til að hjálpa sér við að innrétta og útkoman er afar flott. Hönnunartímaritið Architectural Digest kíkti í heimsókn til hennar á dögunum.

„Ég ferðast stanslaust vegna vinnunnar en þegar ég er ekki að ferðast þá vil ég bara vera heima með börnunum,“ sagði fyrirsætan í samtali við Architectural Digest. Ambrosio lagði mikla áherslu á að heimilið yrði barnvænt og skemmtilegt fyrir börnin hennar tvö sem eru tíu og sex ára. Að sögn Ambrosio fengu börnin miklu ráðið þegar kom að herbergjum þeirra.

Ambrosio kemur frá Brasilíu og í samvinnu við hönnuðinn Bullard færði hún brasilísk áhrif inn á heimilið.

Myndirnar úr innlitinu til Ambrosio má sjá á vef Architectural Digest.

Klassísku Biggie-sólgleraugun í nýrri útgáfu

Ný útgáfa af Versace-sólgleraugum sem voru í uppáhaldi hjá Notorious B.I.G. hafa verið sett í sölu, þau koma í takmörkuðu upplagi.

Hönnuðurinn Donatella Versace hefur heiðrað minningu vinar síns, rapparans Notorious B.I.G., með því að setja á markað nýja og endurbætta útgáfu af klassískum Versace-sólgleraugum sem voru í uppáhaldi hjá Notorius B.I.G..

Notorious B.I.G., oft kallaður Biggie Smalls, var meðal annars með umrædd sólgleraugu í myndbandinu við lagið Hypnotize. Þess má geta að rúmt 21 ár er frá því að Notorious B.I.G. lést.

Donatella og Notorious B.I.G. voru góðir félgar og á sínum tíma. „Mér þótti Biggie alltaf frábær. Hann kom margoft á sýningarnar mína í París og við hittumst reglulega. Hann talaði alltaf svo vel um mig og fjölskyldu mína. Mér þótti hann svo gáfaður, svo vel gefinn,“ sagði Donatella árið 2011 í viðtali við tímaritið Fader. Hún sagði einnig að hún tryði því margt fólk hafi kynnst vörumerki Versace vegna Notorious B.I.G. þar sem hann var mikill aðdáandi Versace.

Nýja útgáfa sólgleraugnanna kemur í takmörkuðu upplagi og kostar upphæð sem nemur um 35.000 krónum. Þau eru til sölu í Barneys-verslunum.

„Að klúðra fyrstu skiptunum sínum er fullkomlega eðlilegt“

Leikarar og höfundar leikverksins Fyrsta skiptið segja að í upphafi hafi verið erfitt að deila vandræðalegum reynslusögum með mótleikurum sínum.

Á sunnudaginn verður fyrsta verk ársins í Gaflaraleikhúsinu frumsýnt, grínleikritið Fyrsta skiptið. Höfundar eru fimm, þau Berglind Alda Ástþórsdóttir, Inga Steinunn Henningsdóttir, Arnór Björnsson, Mikael Emil Kaaber og Óli Gunnar Gunnarsson og leika þau sjálf í verkinu. Leikstjóri er Björk Jakobsdóttir.

„Fyrsta skiptið er fyrst og fremst grínleikrit. Við segjum frá fyndnum reynslusögum ásamt því að hoppa inn á milli í leiknar senur. Við notumst mikið við myndlíkingar og tæklum þar af leiðandi umræðuefnið á hlægilegan hátt. Við túlkum til dæmis fyrsta kynlífið sem íþrótt og fyrsta sleikinn túlkum við í dans,“ útskýra þær Berglind og Inga þegar þær eru beðnar um að lýsa verkinu.

„Við túlkum til dæmis fyrsta kynlífið sem íþrótt og fyrsta sleikinn túlkum við í dans.“

„Verkið fjallar fyrst og fremst um alls konar vandræðaleg fyrstu skipti sem allir ættu að kannast við. Til dæmis fyrsta kossinn, fyrstu kynlífsreynsluna, fyrstu sjálfsfróunina og fyrstu sambandsslit. Við fjöllum síðan um þessi fyrstu skipti á skemmtilegan og snyrtilegan máta þar sem við gerum mikið grín af hugmyndinni um þessi týpísku fullkomnu fyrstu skipti. Þessi snilldarhugmynd kom upprunalega frá leikstjóranum okkar,“ segir Berglind.

Höfundar verksins byggja verkið á sinni eigin reynslu og sögum frá vinum. „Leikritið er fyrst og fremst byggt á sönnum sögum og þá aðallega frá okkur sjálfum og góðum vinum. Okkur finnst mikilvægt að sögurnar sem við segjum frá í verkinu séu sannar því markmið okkar er einmitt að sýna áhorfendum að ekkert fyrsta skipti er í raun og veru fullkomið, lífið er ekki Hollywood-bíósena þar sem er alltaf rómantísk rigning og dúfur út um allt! Við vonum líka að fólk sjái að þetta þarf alls ekki að vera svona mikið feimnismál…að klúðra fyrstu skiptunum sínum er fullkomlega eðlilegt og í staðinn fyrir að skammast sín þá ætti maður frekar að hlæja að þessu,“ útskýrir Inga.

„Leikritið er fyrst og fremst byggt á sönnum sögum og þá aðallega frá okkur sjálfum og góðum vinum.“

Berglind og Inga viðurkenna að það hafi verið erfitt að deila reynslusögum sínum í upphafi ferlisins. „Þegar við byrjuðum að skrifa leikritið var fyrsta skrefið að deila okkar eigin sögum og það var örugglega erfiðasti hlutinn af ferlinu. Maður þurfti einhvern veginn að opna sig algerlega og drita út vandræðalegum reynslusögum. En okkur tókst svo sannarlega að tækla þetta vel því við tókum þessar vandræðalegu sögur og gerðum úr þeim sprenghlægilegar senur. Maður lærði því fljótlega að hafa húmor fyrir sjálfum sér og það skemmtilegasta sem leikhópurinn gerir núna er að liggja í hláturskasti yfir þessum sögum okkar.“

Þess má geta að sýningin er ætluð fyrir 12 ára og eldri.

Ráðgátan leysist smátt og smátt

Ráðgátan á bak við ljósmyndirnar á sýningunni Hver er á myndinni? leysist smátt og smátt.

Undanfarið hefur Þjóðminjasafn Íslands óskað eftir viðbrögðum við ljósmyndum eftir Alfreð D. Jónsson á sýningunni Hver er á myndinni?. Alfreð var portrettljósmyndari í Reykjavík og rak ljósmyndastofu frá árinu 1931 til ársins 1952.

Filmusafn Alfreðs var afhent Ljósmyndasafni Íslands til varðveislu fyrir nokkrum árum en ekki er vitað hvaða fólk er á myndum Alfreðs. „Gildi myndar eykst mikið ef vitað er hvern hún sýnir. Þekkir þú eitthvert andlit? Ef svo vill til, er um að gera að koma þeim upplýsingum á framfæri,“ segir í tilkynningu frá safninu.

„Sýningin hefur skilað þónokkuð af svörum,“ segir sýningarstjórinn Kristín Halla Baldvinsdóttir þegar hún er spurð út í viðbrögð við sýningunni. Hún hefur ekki nákvæmar tölur um þau svör sem hafa borist en áætlar að það sé búið að leysa ráðgátuna á bak við um 20% myndanna á sýningunni.

„Sýningin hefur skilað þónokkuð af svörum.“

„Ég myndi giska á að við værum búin að greina hátt í 20% þeirra mynda sem eru á sýningunni, síðast þegar ég taldi fyrir um tveimur vikum vorum við að ná 10%. En það eru um 1240 myndir á sýningunni. Þetta er náttúrulega mjög misjafnt, sumir koma inn og þekkja ekki neinn, aðrir kannski einn og einn og aðrir þekkja marga. Og það er náttúrulega frekar fólk af eldri kynslóðinni sem þekkir fólkið á myndunum,“ segir Kristín.

Kristín bendir áhugasömum á að sýninguna er hægt að skoða á vefsíðunni sarpur.is. „Þar eru allar myndirnar sem eru í Myndasalnum, en einnig aðrar myndir sem ekki komust upp á veggina, samtals um 2300 myndir af óþekktu fólki.“

Mynd / Sýnishorn af ljósmyndum Alfreðs

Ráð til að einfalda lífið

Eflaust kannast margir hverjir við þá stöðu að finnast öðru hvoru eins og veruleikinn sé yfirþyrmandi, allt of mikið að gera og álag sé ástand sem komið sé til að vera. Í stað þess að sætta sig við það og leita á náðir hrukkukrema og orkudrykkja er ekki úr vegi að byrja á því að líta aðeins inn á við. Það er ótrúlegt hvað smávægilegar breytingar á hugarfari og venjum geta breytt miklu. Við tókum saman nokkur góð ráð sem eiga það sameiginlegt að gera lífið örlítið einfaldara.

Taktu til í lífinu

Losaðu þig við óþarfa drasl af heimili þínu og úr lífinu almennt. Hér er ekki aðeins átt við veraldlega hluti. Hugaðu að öllum þeim þáttum í lífi þínu sem valda á einhvern hátt streitu eða vanlíðan, því það er ekki síður mikilvægt að taka til á þeim sviðum. Við mælum með að taka tíma í smávegis sjálfskoðun og skrifa niður hver stærsti stressfaktorinn í þínu lífi er. Hvað er það sem þú vildir gera minna af og hvað viltu gera meira af?

Verslaðu meira á Netinu

Eftir langan vinnudag er búðarferð með þreytt og svöng börn í eftirdragi ekki tilhugsun sem heillar marga. Netverslun færist sífellt í aukana og nú eru komnir ýmsir möguleikar til að kaupa inn fyrir heimilið í gegnum veraldarvefinn og fá allt sent heim upp að dyrum. Fyrir þessa extra skipulögðu og framtakssömu er jafnvel ekki úr vegi að fara að huga að jólagjafainnkaupum.

Settu takmörk

Þetta er þitt líf, þín hamingja, þínar ákvarðanir. Ertu í kringum fólk sem dregur þig niður á einhvern hátt? Finnst þér stundum eins og þú verðir að gera eitthvað eða fara eitthvað til að bregðast ekki einhverjum öðrum þrátt fyrir að þú vildir helst bara vera heima? Þegar þú tekur að þér aukavinnu sem krefst þess að vinna á kvöldin, ertu þá að fórna mikilvægum tíma með börnunum þínum? Leggjum okkur fram um að taka ákvarðanir sem koma sér best fyrir okkur sjálf og okkar nánustu og forgangsröðum eftir því.

Hafðu alltaf eitthvað til að hlakka til

Í amstri dagsins og hröðu samfélagi er auðvelt að festast í því mynstri að vera alltaf að flýta sér og sjá ekki fram á að geta nokkurn tíma slakað á. Það er gott að vera alltaf með eitthvert skemmtilegt skipulagt aðeins fram í tímann. Ferðalög, dekur, eða jafnvel bara kósíkvöld heima. Þannig veistu, að þrátt fyrir álagstíma og að bugast á köflum er aldrei of langt í gæðastundina þína.

Skrifaðu það niður

Í stað þess að reyna halda utan um allt sem tengist daglegu lífi í huganum, í sambandi við fundi, læknistíma, máltíðir, verkefni og hugmyndir, markmið og annað – skrifaðu það niður. Fjárfestu í fallegri dagbók eða náðu þér í skipulags „app“ í símann og komdu því inn í rútínuna að skrifa mikilvæga hluti niður jafnóðum. Með því hreinsarðu hugann og hefur betri yfirsýn yfir allt saman.

 Lifðu í núinu

Í stað þess að festast í eftirsjá yfir fortíðinni eða kvíða fyrir framtíðinni, hvernig væri að einbeita sér að því að lifa í núinu? Í stað þess að telja niður mínúturnar þar til er kominn háttatími, njótum þá þess að vera með börnunum. Í staðinn fyrir að flýta sér inn úr göngutúr þegar byrjar að rigna, leyfum þeim að hoppa í pollunum. Það er mikið frelsi sem fæst með því að hætta alltaf að vera að flýta sér.

Greinin birtist upphaflega í Vikunni

Busy Philipps segir James Franco hafa verið hræðilegan

|
|

Leikkonan Busy Philipps segir leikarann James Franco hafa gert sér lífið leitt á tökustað á árunum 1999 og 2000.

Leikkonan Busy Philipps segir leikarann James Franco hafa veist að sér á tökustað við gerð þáttanna Freaks and Geeks á árunum 1999 og 2000. Hún hefur áður greint frá meintri árás en lýsir atvikum nánar í nýrri bók sinni, This Will Only Hurt a Little.

„Mér líður eins og hann hafi lesið Easy Riders, Raging Bull eða eitthvað álíka yfir sumarið og þá ákveðið að eina leiðin fyrir hann til að vera tekinn alvarlega væri að láta eins og helvítis asni.“

Philipps segir Franco hafa verið óvenjulega árásargjarnan gagnvart sér á meðan á tökum stóð og að það hafi alltaf verið ákveðin spenna á milli þeirra. Við tökur á einu atriðinu mun Franco að hafa öskrað á hana og hent henni í gólfið fyrir framan viðstadda. Hún segir þá árás hafa valdið sér mikilli vanlíðan.

Philipps segir Franco hafa beðið sig afsökunar daginn eftir og þannig náð að blekkja fólk. „Hann var hræðilegur við mig.“

Nýjasta frá Apple – Apple Watch 4 – iPhone Xs og Xs MAX

|
Vonir standa til að samningar náist við kennara fyrir haustið svo ekki komi til verkfalla|Sigríður Björk Einarsdóttir

Ásgeir Jón Guðbjartsson hjá Epli.is segir frá nýjungum frá Apple.

Í september kynnti Apple nýjustu afurðir sínar, Apple Watch 4, iPhone Xs og iPhone Xs MAX, og iPhone XR, á árlegum við­burði sem fram fór í Steve Jobs Theater við nýju höf­uð­stöðvar Apple í Kaliforníu. Við hittum Ásgeir Jón Guðbjartsson, markaðsstjóra hjá Epli.is, og skoðuðum nýjustu afurðir Apple sem hafa litið dagsins ljós hjá versluninni og rjúka út eins og heitar lummur.

Áhersla Apple Watch 4 á heilsu og hreyfingu

Hvað hefur nýja útgáfan af Apple Watch 4-úrinu fram yfir eldri gerðina? „Nýja úrið er að miklu leyti end­ur­hannað en er í meg­in­dráttum með sama útlit. Skjárinn hefur stækkað um þriðj­ung og fyllir nú betur út í fram­hlið­ina. Úrin sjálf hafa stækkað örlít­ið, minni útgáfan fer úr 38 millimetrum í 40 millimetra og það stærra úr 42 millimetrum í 44 millimetra. Þetta gefur nýtt pláss fyrir nýjar og flókn­ari úrskífur með fleiri eig­in­leik­um. Frá því að Apple kynnti fyrsta úrið fyrir þremur árum hefur sýn fyrirtækisins á vör­una þró­ast mikið. Í stað þess að vera framleng­ing á sím­anum og leið til að eiga í sam­skiptum við vini og vandamenn þá er öll áhersla Apple nú á heilsu og hreyf­ingu,“ segir Ásgeir.

„Skjárinn hefur stækkað um þriðj­ung og fyllir nú betur út í fram­hlið­ina. Úrin sjálf hafa stækkað örlít­ið, minni útgáfan fer úr 38 millimetrum í 40 millimetra og það stærra úr 42 millimetrum í 44 millimetra.“

Hver myndir þú segja að væri stærsta breytingin? „Stærsta breyt­ingin í þessa átt er að nú er úrið með inn­byggðu hjarta­línu­riti (ECG) sem er bylt­ing fyrir þá sem þurfa að fylgj­ast náið með sínum hjartslætti og hefur ekki sést áður í neinu öðru snjallúri. Sá eiginleiki verður í fyrstu eingöngu aðgengilegur í Bandaríkjunum. Nýju úrin nema það ef not­and­inn dettur og geta hringt sjálf­krafa í Neyð­ar­lín­una ásamt því að senda skila­boð á ICE (In Case of Emergency)-tengiliði ef not­and­inn hefur verið hreyf­ing­ar­laus í mín­útu eftir fall­ið. Jafnframt getur úrið hjálpað til við að finna óreglu­legan hjart­slátt og aðrar hjartsláttartruflanir.“

Gylltur iPhone Xs og Xs Max

Apple er komið með nýjan arf­taka iPhone X sem kom í fyrra. Sá sími kall­ast iPhone Xs. iPhone Xs er hefð­bundin S-upp­færsla. Epli.is er þegar komið með arftakann í sölu og er mikil eftirspurn eftir símanum.

Hverjar eru helstu nýjungarnar í iPhone Xs? „Útlit sím­ans er nán­ast eins fyrir utan að hann fæst einnig í gylltum lit til við­bótar við svartan og hvít­an. Inn­volsið er aftur á móti mikið breytt. Nýr A12 Fusion-örgjörvi sem er mun öfl­ugri, ný mynda­vél með mögnuðum eiginleikum og upp­fært Face ID sem aflæsir sím­ann hraðar en áður.“

„Myndavélin tekur margar myndir sem í bakgrunninum púslar þeim saman og gerir eina mynd með ótrúlegri dýpt og magnaðri lýsingu sem kallast Smart HDR. Með þessu nást skýrari og bjartari myndir sem hafa ekki áður náðst á snjallsímum. Í fyrsta sinn er sími frá Apple með stuðn­ingi við tvö SIM-kort, annað hefð­bundið og hitt inn­byggt í sím­ann eða svo­kallað eSIM. Sú tækni er þó ekki kom­in hingað til lands og óvíst hvenær verður. Apple end­ur­tók leik­inn frá 2014 þegar fyrirtækið kynnti iPhone 6 í tveimur stærð­um. Xs Max er nákvæmlega eins og iPhone Xs, aðeins stærri.“

„Áður hétu stærri símar Apple Plus sem var þá tengt því að stærri sím­inn hefði eitt­hvað til við­bótar, til dæmis betri mynda­vél eða jafn­vel tvær í stað einn­ar. Svo er ekki með Xs Max, hann er bara stærri útgáfa af iPhone Xs. Skjár­inn á Xs er 6,5 tommu en ummál sím­ans er svipað og iPhone 8 Plus,“ segir Ásgeir og brosir.

Myndir/ Hákon Davíð Björnsson og úr einkasafni Epli.is

 

Mínimalískur nútímastíll í sérflokki

Línan býður upp á vandaða og stílhreina danska hönnun úr línu EDGE by Hammel. Þessi danska hönnun og framleiðsla í mínimalískum nútímastíl sem er einstaklega fágaður og möguleikarnir eru óþrjótandi fyrir öll rými heimilisins. Línan er draumur fyrir þá sem aðhyllast mínimalískan stíl og tímalausa hönnun.

Línan býður upp á Edge-hillueiningar frá Hammel. Einingarnar eru stílhreinar með fágað yfirbragð, innblásnar af stórborgarlífsstíl, sem fegra heimilið. Hægt er að raða einingunum upp á ýmsan máta og velja um hvort þær eru hengdar upp á vegg eða fætur settir undir þær.

Edge-línan býður einnig upp á hirslur sem nýtast í hin ýmsu rými heimilisins. Hvort sem er í borðstofuna, sjónvarpsherbergið, ganginn eða í stór alrými. Hugmyndafræðin að baki hönnuninni er sú að hver og einn geti skapað sína eigin útfærslu. Útkoman er undir þér komin með vali á einingum, uppröðun og litasamsetningu, hver og einn getur hannað sitt útlit og verið með sinn eigin stíl.

Edga-grunneiningarnar eru fáanlegar í hvítu, svörtu, garfit-gráu, cappuccion, svarbæsaðri eik og reyktri eik. Jafnframt eru hurðar og skúffuhliðar fáanlegar í sömu litum og gerðum.

OPNUNARTÍMI:
Mánudaga – föstudaga 11-18
Laugardaga 11-16
Bæjarlind 16
201 Kópavogi
Sími: 5537100
Netfang: [email protected]

 

Vandaður og fallegur íþrótta- og útivistarfatnaður – snið sem virka vel fyrir konur

Kari Traa er ein skærasta skíðahetja Norðmanna og margfaldur ólympíumeistari en þessi glæsilega lína, frá Kari Traa er nefnd eftir henni.  Kari Traa kemur sjálf að hönnun og stefnu fyrirtækisins og hefur náð að skapa merkinu vinsældir víða um lönd.

Kari Traa er einstaklega vandaður og fallegur fatnaður og íþróttalínan höfðar vel til kvenna. Sniðin eru kvenleg og litirnir fjölbreyttir. Hver er helsti kosturinn við íþróttafatnaðinn frá Kari Traa?  „Línan samanstendur af vörum sem hentar konum í hvers kyns íþróttum, útivist en líka á kaffihúsarölti.  Vönduð efni, flottir litir og snið sem virka fyrir konur – enda eru einkennisorð Kari Traa – For Girls by Girls,“ segir segir Sigrún Kristín Skúladóttir hjá Sportís.

Hér má sjá Ásu Steinarsdóttur, bloggara í Kari Traa ullarfötunum.

Þið bjóðið einnig upp á fallegan og vandaðan ullarfatnað frá Kari Traa. Fyrir hvað er ullarfatalínan helst rómuð?  „Kari Traa-ullarlínan er úr 100% merino-ull sem er ofin úr fíngerðum ullarþráðum sem ekki stinga. Ullin temprar og eykur vellíðan hvort sem er í hita eða kulda. Einnig er mikið úrval af mynstrum og litum, frísklegum sem lífga upp á tilveruna.“

Sportís
Mörkinni 6
108 Reykjavík
5201000
www.sportis.is

 

Listi yfir 40 tekjuhæstu Íslendingana

|
|

Einu sinni á ári birtir embætti ríkisskattstjóra lista yfir þá 40 einstaklinga sem greiða hæsta skatta hérlendis samkvæmt álagningaskrá. Á sama tíma eru þær skrár gerðar tímabundið aðgengilegar og nokkrir íslenskir fjölmiðlar ná í þær, búa til lista yfir tekjur einstaklinga eftir atvinnugreinum og selja forvitnum almenningi sem byggja á skránum.

Þær skattgreiðslur sem tilteknar eru í álagningarskrá gefa þó ekki alltaf raunsanna mynd af tekjum Íslendinga. Sumir sem greiða himinháa skatta hafa getað beðið þangað til eftir að álagningarskráin er birt og talið svo fram. Þannig hafa þeir sloppið við að lenda á útsendum lista ríkisskattstjóra, og að nöfn þeirra birtist í flestum fjölmiðlum landsins. Og í álagningaskránum kemur bara fram hverjar heildargreiðslur viðkomandi vegna opinberra gjalda voru. Þar er ekki hægt að sjá t.d. hversu mikið hver einstaklingar þénaði í launatekjur og hversu háar fjármagnstekjur þeirra voru. Það skiptir umtalsverðu máli í ljósi þess að staðgreiðsla skatta af launatekjum er á bilinu 36,94 til 46,24 prósent að útsvari meðtöldu en fjármagnstekjuskattur var 20 prósent þangað til um síðustu áramót þegar hann var hækkaður upp í 22 prósent.

Ef einstaklingur er með þorra tekna sinna í formi fjármagnstekna þá borgar hann mun minna hlutfall af tekjum sínum til ríkissjóðs en ef hann er með þær í formi launatekna.

Upplýsingar um það hvernig tekjur fólks skiptast, og tæmandi upplýsingar um hverjir borga hvað í skatta, er hins vegar hægt að finna í svokallaðri skattskrá. Þessum upplýsingum hefur vefurinn Tekjur.is safnað saman og gert aðgengilegar á stafrænu formi. Vefurinn fer í loftið í dag og hægt er að komast inn á hann á heimasíðu Kjarnans.

Þar birtast upplýsingar um tekjur allra Íslendinga á árinu 2016 sem eru 18 ára og eldri, og yngri en 100 ára, með sama hætti og þær birtast í skattskránni. Og þar kemur meðal annars fram að sex Íslendingar voru með fjármagnstekjur sem voru yfir einum milljarði króna á því ári.

Hægt er að lesa ítarlega fréttaskýringu um málið í nýjasta tölublaði Mannlífs sem kom út í morgun og á vef Kjarnans.

Hér er listi yfir 40 tekjuhæstu Íslendingana. Allar upplýsingar í töflunni eru úr skattskrá.

 

Tími til aðgerða er að renna út

Ef ekki verður gripið til róttækra aðgerða við draga úr hnattrænni hlýnun geta afleyðingar orðið alvarlegar samkvæmt skýrslu sem birtist á vegum Loftlagsnefndar Sameinuðu þjóðanna.

Osaka, Alexandría, Sjanghæ, Rio de Janeiro og Miami munu að fullu eða stórum hluta hverfa undir sæ. Kóralrifin deyja endanlega út. Svæsnar hitabylgjur og langvarandi þurrkar verða algengari sem og fellibylir sem verða bæði öflugri og bera með sér meiri úrkomu. Sjávarmál hækkar og Norðurskautið verður íslaust yfir sumartímann. Milljónir manna verða á flótta og fátækt stóreykst. Höfin halda áfram að súrna með tilheyrandi aflabresti. Þetta og meira til eru afleiðingarnar ef ekki verður gripið til róttækra aðgerða við draga úr hnattrænni hlýnun, samkvæmt skýrslu sem birtist á vegum Loftlagsnefndar Sameinuðu þjóðanna. Fram kemur í skýrslunni að þrátt fyrir kolsvart útlit sé enn tími til að bregðast við. Draga þarf úr kolefnaútblæstri um 45 prósent fyrir árið 2030 í stað 20 prósenta líkt og Parísarsáttmálinn segir til um. Það sé hægt með samhentu átaki ríkisstjórna, fyrirtækja og einstaklinga. Kostnaðurinn við aðgerðirnar sé verulegur en þó minni ef ekkert verður að gert.

Um hvað fjallar skýrslan?

Skýrslan er ein sú umfangsmesta sem gerð hefur verið um málefnið og er henni ætlað að verða leiðarvísir um loftlagsaðgerðir í náinni framtíð. Hún var tvö og hálft ár í smíðum og dregur saman niðurstöður yfir sex þúsund vísindalegra rannsókna. Í skýrslunni er dregin upp sviðsmynd af því hver áhrifin verða af hnattrænni hlýnun upp á 1,5 gráður (miðað við hitastig fyrir iðnbyltingu) og þau borin saman við áhrifin af 2 gráðu hlýnun eins og markmið Parísarsáttmálans kveða á um. Vert er að taka fram að ríki heims eru langt frá því að uppfylla ákvæði Parísarsáttmálans og að óbreyttu muni hitastigið hækka um 3 gráður áður en öldin er úti. Það myndi gjörbreyta núverandi heimsmynd.

Hver eru viðbrögðin?

Það er samhljóma niðurstaða vísindamanna að grípa þarf til mun róttækari aðgerða en Parísarsáttmálinn kveður á um ef ekki á illa að fara. Skýrslan er afdráttarlaus hvað það varðar. Hins vegar hefur verið gagnrýnt að orðalag samantektar skýrslunnar sem send var þjóðarleiðtogum hafi verið mildað vegna þrýstings frá Bandaríkjunum, Sádi-Arabíu og fleiri olíuframleiðsluríkjum. Skýrslan verður lögð til grundvallar í komandi loftlagsviðræðum í Katowice í Póllandi í desember en erfitt er að sjá að það takist að sannfæra stjórnmálamenn um að grípa til róttækari aðgerða en Parísarsáttmálinn kveður á um. Þannig hafa stjórnvöld í Ástralíu útilokað að hætta kolaframleiðslu líkt og lagt er til í skýrslunni.

Hvað með Ísland?

Ísland er ekki undanskilið áhrifum hnattrænnar hlýnunar. Hitastig hlýnar og jöklar halda áfram að hopa og gangi sviðsmyndir um loftlagsbreytingar eftir gæti Langjökull tapað 85% af rúmmáli sínu. Samhliða því gæti tíðni eldgosa aukist. Súrnun í hafi mælist meiri umhverfis Ísland en annars staðar og haldi sú þróun áfram getur það haft veruleg áhrif á fiskistofna í efnahagslögsögunni. Vegna aukinna hlýinda er viðbúið að nýjar dýrategundir nemi land á sama tíma og aðrar hverfa.

Hvað getur þú gert?

Breytt neysluhegðun er lykilþáttur í baráttunni gegn hnattrænni hlýnun. Til að mynda með því að ganga eða hjóla þegar það er kostur, en að öðrum kosti notast við almenningssamgöngur. Ef nauðsynlegt þykir að nota bíl að velja þá rafmagnsbíl. Minni neysla skilar sér í minni úrgangi sem síðan er best að endurvinna eða endurnýta. Loks er hægt að ganga í þrýstihópa sem beita sér fyrir umbótum og kjósa þá flokka sem eru líklegir til að ráðast í þær.

Hringlandaháttur við Hringbraut

Upphaflega átti Nýi Landspítalinn (NLSH ohf.) að fá sjúkrahótelið afhent fullbúið á vormánuðum 2017 en fyrsta skóflustungan var tekin árið 2015. Síðan hefur verklokum ítrekað verið seinkað. Samkvæmt heimildum Mannlífs stóð til að afhenda húsið 15. september sl. en það hefur ekki gengið eftir.

Ein helsta ástæða tafanna er sú að steinklæðning sem nú er komin utan á húsið hefur verið flóknari og tímafrekari í útfærslu en fyrstu áætlanir gerðu ráð fyrir. Steinklæðningin sem er úr graníti og basalti er sömuleiðis listskreyting hússins og er hún hönnuð af Finnboga Péturssyni myndlistarmanni. Þrátt fyrir þessar tafir er frágangi að innan löngu lokið. Munck Íslandi er aðalverktaki framkvæmdanna en Jón Björnsson, aðstoðarframkvæmdastjóri fyrirtækisins, vildi ekki tjá sig um málið.

Ágreiningur um ábyrgð

Gunnar Svavarsson, framkvæmdastjóri NLSH ohf., segir í skriflegu svari að velferðarráðuneytið geri ráð fyrir að hótelið hefji starfsemi fljótlega eftir að byggingu þess er lokið. „Alþingi úthlutar fjárveitingum til reksturs ríkisstofnana ár hvert með fjárlögum. Rekstur ársins 2019 fellur því á afgreiðslu fjárlaga 2019 sem nú eru til meðferðar á Alþingi,“ segir hann.

Aðspurður hver beri ábyrgð á tjóni vegna tafanna segir Gunnar að NLSH og verktakann greini á um það. „Í samningum milli aðila koma fram tafabætur upp á 300.000 kr. pr. dag pr. verkhluta en verkhlutarnir eru þrír. Verkkaupi hefur þegar greint frá því að samningsgildi tafabóta sé óbreytt. Þar sem verkinu er ekki lokið og fullnaðaruppgjör ekki farið fram hafa verkkaupi og verktaki ekki lagt fram lokakröfur sínar. Hvorki verktaki né verkkaupi hafa því lýst yfir ábyrgð á tjóni sem orðið hefur vegna tafa, enda ekki venja í verkum sem standa yfir. NLSH hefur komið því á framfæri við verktaka að krafist verði tafabóta fyrir þær tafir sem eru á ábyrgð verktakans,“ segir Gunnar en tekur fram að verktaki hafi gert samskonar kröfur vegna tafa og að aðilar hafi verið í viðræðum um hvernig leysa megi ágreininginn. Þá sé ekki tímabært að verkkaupi sé með yfirlýsingar um hvaða aðgerðir séu mögulegar. „Þeir sem hafa hins vegar orðið fyrir mestum skaða eru þeir gestir sem áttu að gista í húsinu, sjúklingar og aðstandendur. Það er óbeinn skaði sem erfitt er að meta í krónum.“

Íhuga málsókn

Birgir Þórarinsson, fulltrúi Miðflokksins í fjárlaganefnd, sagði í samtali við Mannlíf að á fundi nefndarinnar með fulltrúum velferðarráðuneytisins nýverið; hafi verið fullyrt að umframkostnaður vegna byggingarinnar myndi ekki falla á ríkissjóð. „Hins vegar hafa orðið tafir á því að byggingin verði tekin í notkun og það er að sjálfsögðu tjón fyrir ríkið,“ segir hann og bætti við að komið hafi til tals á fundinum að fara í mál við verktakann vegna þess.

Þetta staðfestir Willum Þór Þórsson, formaður fjárlaganefndar. „Ekki hefur viðbótar-útlagður kostnaður fallið til og ráðuneytið telur að enginn viðbótarkostnaður muni falla á ríkissjóð. Hins vegar á eftir að reikna og útkljá tafakostnað, sem vissulega gæti endað sem dómsmál,“ segir Willum í skriflegu svari til Mannlífs.

Ekki fékk staðfest áður en blaðið fór í prentun hvort rekstur sjúkrahótelsins hefjist á þessu ári eða ekki.

Miðað við þriggja stjörnu hótel

Mannlíf hefur heimildir fyrir því að á meðal starfsmanna Landspítala gæti nokkurrar kergju vegna „óþarfa íburðar“ við nýja sjúkrahótelið, á sama tíma og rekstur spítalans sé skorinn við nögl. Þannig séu innréttingar, húsgögn og raftæki sem keypt hafa verið í háum verðflokki. Þá er gagnrýnt að ekki hafi verið samnýtt útboð með Landspítalanum til að ná fram hagstæðara verði. Gunnar svarar því til að NLSH ofh. hafi ekki heimildir til að nýta samninga við þriðja aðila. Hægt sé að nýta rammasamninga séu þeir fyrir hendi en engir slíkir hafi verið fyrir hendi við innkaup búnaðar í sjúkrahótelið. Þá staðfestir Gunnar að keypt hafi verið svokölluð hótelsjónvörp sem eru tæknilega frábrugðin hefðbundnum heimilissjónvarpstækjum. Þessum tækjum sé ætlað að vera í notkun í mörg ár og þau þurfi að vera tilbúin til að mæta væntanlegum framförum í útsendingu sjónvarps. „Öll hönnun tekur mið af sambærilegum verkefnum á Norðurlöndunum og hótelum almennt hér á landi, en hótelið er flokkað sem almennt þriggja stjörnu hótel á markaði þótt um sé að ræða sérhæfingu í nokkrum herbergjum,“ segir Gunnar.

 

 

Allar hundrað ferðirnar upp Esjuna voru skemmtilegar

Utanvegshlauparinn Hafdís Guðrún Hilmarsdóttir setti sér metnaðarfullt markmið í mars því hún ætlaði að hlaupa  Esjuna 100 sinnum á þessu ári. Um seinustu helgi náði hún markmiðinu og fór í hundraðasta sinn á þessu ári upp að Steini á Esjunni.

Hugmyndin um að fara 100 ferðir upp Esjuna á þessu ári kom til Hafdísar Guðrúnar Hilmarsdóttur þegar hún fór á Esjuna í annað sinn á þessu ári, þann 6. mars, í glampandi sól og snjó. „Það var svo rosaleg gott veður, sól og snjór. Þá datt mér þetta snjallræði í hug,“ segir Hafdís glöð í bragði. Hún deildi hugmyndinni með vinum á vandamönnum á Facebook. „Þegar ég setti þetta á Facebook þá var ekki aftur snúið.“

Spurð út í hvernig fólki í kringum hana hafi litist á markmiðið í upphafi segir Hafdís flesta hafa verið jákvæða fyrir því. „Sumum fannst þetta kannski frekar einhæft og voru með áhyggjur af því að ég yrði leið á þessu. Aðrir voru hræddir um að ég myndi ekki ná þessu, að ég yrði bara hlaupandi upp á Esjuna á jólunum,“ segir Hafdís kímin. „En annars voru flestir bara spenntir. Nokkrir vinnufélagar fylgdust t.d. með og komu svo með í fimmtugustu ferðina í lok maí.“

Hafdís segir ævintýrið hafa byrjað þegar hún skráði sig í 100 kílómetra hlaup í Frakklandi sem fór fram 25. ágúst. Hún skráði sig í byrjun febrúar og hugsaði með sér að Esjuferðir væri góður undirbúningur.

Hafdís er menntuð kennari en starfar sem verkefnastjóri hjá Menntamálastofnun ásamt því að vera í doktorsnámi. Spurð út í hvenær hún hafi fundið tíma til að fara allar þessar Esjuferðir svarar Hafdís: „Ég fór ýmist fyrir eða eftir vinnu eða þá um helgar. Ég held að ég hafi farið á Esjuna á öllum vikudögunum.“

Aðspurð hvort hún hafi einhvern tímann séð eftir að hafa sett sér svona metnaðarfullt markmið svarar Hafdís neitandi. „Nei, ég sá aldrei eftir þessu. Þetta var alltaf skemmtilegt. Þetta var oft erfitt veðursins vegna en alltaf skemmtilegt,“ útskýrir Hafdís sem ætlaði svo að fara beint á Esjuna eftir að blaðamaður náði tali af henni. Hún er því hvergi nærri hætt að hlaupa Esjuna þrátt fyrir að markmiðinu hafi verið náð.

Hafdís fann mikinn mun á líkamlegu formi þegar líða tók á árið. „Já, ég var farin að fara hraðar og hraðar upp og niður. Ég fór hraðast upp að Steini á 34 mínútum, hraðasta ferðin upp og niður var 53 mínútur. Hraðasta ferðin niður var svo 14,59 mínútur, það var hundraðasta ferðin og það er hraðasta skráða ferð sem kona hefur farið samkvæmt Strava.“

Hafdís fór ýmist ein eða með félagsskap góðra vina í Esjuferðirnar en hún náði að fá um 50 manns með sér í hundruðustu ferðina. Hún kveðst vera með mikið keppnisskap og það hafi örugglega verið til þess að hún fór ansi hratt niður fjallið í hundruðustu ferðinni og sló met í leiðinni. „Það voru þrír sterkir karlmenn sem hlupu með mér niður í hundruðustu ferðinni. Það er ekki oft sem ég hef einhvern með mér á leiðinni niður og það hjálpaði örugglega við að ná góðum tíma,“ segir Hafdís.

Hafdís hefur mjög gaman af því að hlaupa fjöll og hefur stundað það af kappi síðustu fimm ár. Á döfinni er svo að finna stórt hlaup erlendis til að taka þátt í. „Undanfarið hefur áhugi minn aukist mikið á að taka þátt í 100 mílna hlaupi einhvers staðar úti, þannig að ég er að skoða það núna.“

Frá ráðgjöf fyrir Sameinuðu þjóðirnar í skúringar

Libertad Venegas er með BA-próf í fjölmiðlafræði og meistaragráðu í félagsfræði. Í heimalandi sínu Mexíkó vann hún meðal annars sem blaðamaður, sjónvarpsfréttamaður og ráðgjafi hjá fjölþjóðlegri nefnd á vegum Sameinuðu þjóðanna. Þegar hún flutti til Íslands til að hefja búskap með íslenskum eiginmanni sínum var eina vinnan sem henni stóð til boða skúringar. Hún segist hafa sætt sig við það, enda vitað að til þess að fá betri vinnu þyrfti hún að læra tungumálið.

Síðan eru liðin sjö ár og Libertad er farin að tala ágæta íslensku, enda hefur hún lokið öllum námskeiðum í tungumálinu sem Málaskólinn Mímir býður upp á. Í dag vinnur hún sem leiðbeinandi á leikskóla, vinnu sem hún segir að sé vissulega gefandi og skemmtileg en kaupið er ekki hátt og þrátt fyrir að Libertad hafi fengið háskólagráður sínar metnar til launahækkunar í leikskólanum langar hana eðlilega til að fá starf sem tengist því sem hún menntaði sig til. Hún segist hafa sótt um allar stöður sem hún hafi séð auglýstar og tengist hennar menntun en aldrei fengið svar við nokkurri umsókn.

„Mig langar í íslenskunám í Háskóla Íslands til að bæta stöðu mína á vinnumarkaðnum,“ segir Libertad þegar hún er spurð hvað hún geti gert til að komast í vinnu sem hæfi menntun hennar. „En þar er eingöngu boðið upp á dagkennslu og ég hef ekki efni á að hætta að vinna til að fara í nám. Ég skil ekki hvers vegna það er ekki boðið upp á íslenskunám við Háskólann á kvöldin. Það þýðir eiginlega bara að námið stendur eingöngu þeim sem eru vel stæðir til boða og við sem ekki höfum efni á að hætta að vinna sitjum eftir. Það finnst mér ekki sanngjarnt. Mér finnst það þurfi að breyta því til að koma til móts við fólk af erlendum uppruna sem virkilega vill læra íslensku og komast inn á íslenskan vinnumarkað.“

Eftir að hafa unnið við skúringar um tíma fékk Libertad vinnu á frístundamiðstöð og síðan á leikskóla. Hún segist margoft áður hafa sótt um vinnu á leikskóla en ekki fengið svar, það hafi verið vinskapur sem kom henni loks í atvinnuviðtal við leikskólastjórann.

„Vinkona mín þekkir leikskólastjórann og í gegnum hana fékk ég atvinnuviðtal og var ráðin. Annars hefði ég ekki fengið þetta starf,“ segir hún ákveðin.

Háskólamenntaðir útlendingar vinna allir á leikskólum

Hvaða áhrif hefur það á sjálfsmyndina og sálarlífið að eiga ekki möguleika á að fá vinnu í samræmi við menntun þína?

„Það er mjög þreytandi til lengdar,“ viðurkennir Libertad. „Ég skil auðvitað að íslenskukunnáttan stendur mér fyrir þrifum en á hinn bóginn virðist það vera landlægt hér að erlent fólk með háskólamenntun fái ekki vinnu við sitt hæfi. Allir háskólamenntaðir útlendingar sem ég þekki vinna á leikskólum. Það er mikilsvert starf og okkur er boðið upp á alls konar námskeið í sambandi við vinnuna en það er vissulega skrýtið að það skuli vera eina starfið sem maður á möguleika á að fá. Ég er orðin fertug og sé ekki fram á að þetta ástand breytist neitt héðan af, svo ég er jafnvel að hugsa um að fara í leikskólakennaranám til að hafa möguleika á betri launum.“

Libertad segir það ekki hjálpa sér að komast inn á íslenskan vinnumarkað að vera gift Íslendingi.

„Hann hefur engin sambönd við fólk í mínum geira,“ segir hún og hlær. „Það virðist skipta miklu máli til að fá vinnu á Íslandi að þekkja rétta fólkið og við erum bara ekki rétt tengd, greinilega.“

Verður að koma til móts við útlendinga

Spurð hvort hún hafi upplifað það að Íslendingar hafi fordóma fyrir erlendu fólki á vinnumarkaði dregur Libertad við sig svarið.

„Já, stundum,“ segir hún og þagnar svo. „Mér finnst vinnuveitendur dálítið tregir til að ráða fólk sem ekki talar fullkomna íslensku, meira að segja í störf sem ekki krefjast íslenskukunnáttu. En mér finnst mér ekki mismunað vegna uppruna míns, alls ekki. Mér finnst hins vegar að íslensk yfirvöld þurfi að koma betur til móts við útlendinga sem vilja læra íslensku og setjast að hér. Það eru voðalega fáir möguleikar í boði eins og staðan er núna.“

Libertad á fimm ára dóttur og meðal annars hennar vegna segir hún ekki koma til greina að flytja aftur heim til Mexíkó til að fá betra starf. Fjölskyldan sé íslensk og hafi byggt upp líf sitt hér, það sé ekki inni í myndinni að rífa hana upp með rótum.

„Mér hefur stundum dottið það í hug að flytja aftur til Mexíkó,“ segir hún. „En maðurinn minn talar ekki spænsku svo hann ætti erfitt með að fá vinnu þar og það gengi ekki. Dóttir mín talar auðvitað bæði spænsku og íslensku en hún er samt Íslendingur og á sínar rætur hér, svo ég held það yrði allt of erfitt að skipta algjörlega um umhverfi og byrja upp á nýtt í landi sem er framandi fyrir hana og manninn minn. Hann á líka yndislega fjölskyldu hér sem við erum mjög tengd þannig að við viljum vera hér áfram og byggja líf okkar upp hér. Ef það kostar að ég fái aldrei tækifæri til að nýta menntun mína og vinna við það sem ég hef mestan áhuga á, þá verð ég bara að sætta mig við það og finna aðrar leiðir. Ég vildi samt óska að það væri ekki svona flókið að komast inn í háskólanám í íslensku til að eiga möguleika á að komast inn á vinnumarkaðinn í krafti menntunar sinnar. Það er það sem helst þarf að breyta, held ég, til að gefa fólki af erlendum uppruna sömu möguleika og öðrum. Ég vona að það breytist sem fyrst.“

Fólk af erlendum uppruna sem flyst til Íslands til að setjast hér að og skapa sér líf á erfitt með að fá vinnu við sitt hæfi. Háskólamenntun annars staðar frá er ekki metin til jafns við íslenska háskólamenntun og gjarnan festist þetta fólk í láglaunastörfum.

Mannlíf ræddi við þrjá útlendinga sem hafa búið á Íslandi árum saman án þess að fá vinnu við sitt hæfi um reynslu þeirra af íslenskum vinnumarkaði og fékk innsýn í baráttuna sem það kostar að komast í vinnu sem hæfir menntun þeirra. Lesa má alla úttektina í nýjasta tölublaði Mannlífs sem kom út í morgun.

Myndir / Heiðdís Guðbjörg Gunnarsdóttir

Fólk er mjög forvitið um þessa þungun

||
Mynd / Heiða Helgadóttir|Mynd / Fasteignafélagið Trausti|Mynd / Fasteignafélagið Trausti

Anna Þóra Baldursdóttir lagði af stað í ævintýraferð fyrir fimm árum. Hún hélt til Kenía en starfaði stutt sem sjálfboðaliði því örlögin tóku fljótt í taumana.

 

Í dag er hún enn búsett þar og rekur barnaheimili fyrir ungar mæður. Hún þakkar Snapchat fyrir að hafa óvænt greitt götu sína þegar kom að fjármagni en ræðir hér um baráttuna við sjálfa sig hvað varðar „white savior“ sem og litlu stúlkuna sem er væntanleg í heiminn nú síðar í mánuðinum. Hún segist furða sig á áhuga fólks hvað meðgönguna varði en algengustu spurninguna vera hvernig barnið sé á litinn.

„Fólk er gríðarlega áhugasamt um þessa þungun sem kom mér svakalega á óvart.“

„Fólk sem hefur fylgt mér hvað lengst upplifir að það eigi örlítið í mér. Ég hef því fengið fjöldamargar fyrirspurnir um hvaðan pabbinn sé eða hvort ég hafi farið í tæknifrjóvgun. Ég hef líka verið spurð hvort ég sé staðgöngumóðir. Í grunninn finnst mér hálfhlægilegt að fólk sé að hugsa um þessa hluti hvað mig varðar en mér fannst hins vegar óþægilegt að heyra upplifanir vinkvenna minna sem lenda ósjaldan í því að vera spurðar skrítinna spurninga um mig og þessa meðgöngu.

Engu að síður fannst mér skynsamlegast að fæða barnið heima á Íslandi, aðallega upp á stuðningsnetið hér sem er gríðarlega sterkt. En þess utan hefði ég heldur aldrei fengið frí eða tíma til að sinna nýburanum heima í Kenía á barnaheimilinu. Það var samt ömurlega erfitt að fara í burtu í svona langan tíma sérstaklega þar sem ég veit ekki nákvæmlega hvenær ég mun snúa til baka. Ég ætla að láta það ráðast, en mig langar að hún verði í það minnsta orðin þriggja mánaða upp á bólusetningar og annað að gera. Annars fyndist mér best í stöðunni að hún yrði bólusett að mestu úti enda eru þau með allt þetta auka, sem við erum að borga sérstaklega fyrir hér heima, innifalið.“

„Ég veit líka að við munum alltaf hafa annan fótinn í Kenía þar sem það er hennar annað heimaland.“

„Þá er eflaust betra að hún sé bólusett eftir þeirra reglum. En þetta mun allt skýrast með tíð og tíma. Þungunin sjálf kom mér gríðarlega á óvart sérstaklega í ljósi þess að ég hafði nýverið kynnst pabba hennar og er í dag einhleyp. Hann er jú kenískur en ég hef alveg haldið honum frá sviðsljósinu og mun gera það áfram.“

Texti/ Íris Hauksdóttir.
Mynd / Hákon Davíð Björnsson.
Förðun / Björg Alfreðsdóttir.

Helmer hjónin hittast aftur

Brúðuheimili Hendriks Ibsen hefur lengi verið talið eitt af umdeildustu raunsæisverkum síðari ára. Í verkinu Dúkkuheimilið, annar hluti, hitta áhorfendur fyrir sömu persónur, fimmtán árum síðar, en verkið er sýnt um þessar mundir í Borgarleikhúsinu.

Ibsen skrifaði leikritið um Helmer-hjónin (e. A Doll´s House) árið 1897 en endir verksins var byltingarkenndur, svo ekki sé meira sagt. Eftir sat spurningin, hvað varð um Nóru eftir að hafa yfirgefið mann sinn og börn með þekktasta hurðaskelli bókmenntasögunnar.

Í nýju höfundarverki Lucas Hnath, Dúkkuheimilið, annar hluti, ber Nóra að sömu dyrum, fimmtán árum síðar, og það sem áhorfendur fá fljótt að vita er að hjónin eru enn gift.
Ár er síðan verkið var frumsýnt á Broadway og það var strax tilnefnt besta leikritið á Tony-verðlaunahátíðinni, enda er það skemmtilega skrifað, í anda Ibsens þar sem kjarnastefið um kraft konunnar er haft að leiðarljósi. Leikhúsgestir þurfa ekki að hafa lesið Ibsen eða séð Brúðuheimilið því forsagan kemst vel til skila í þýðingu Sölku Guðmundsdóttur.

Fjölbreytt listform héldu sýningunni á lofti en búningar Stefaníu Adolfsdóttur voru ákveðinn senuþjófur. Nóra sveiflaðist um sviðið líkt og nautabani og ögrar bæði eiginmanninum og úreltum viðhorfum.

Litavalið var jafnframt áhugavert og augljóst að gæði ríktu innan fjölskyldunnar sem þar til nú hafði sópaði vandamálum undir flauelsteppið.
Tónlistin átti sinn þátt í að skapa magnþrungna stemningu Nýja sviðsins þar sem Una Sveinbjargardóttir á heiður skilinn. Leikmynd Barkar Jónssonar birti ískalt og persónuleikalaust heimili sem minnti frekar á grafhýsi en glæsihöll. Lýsing Björns Bergsteins Guðmundssonar jók jafnframt dramatísk áhrif tónlistar og dansatriða sem römmuðu verkið listilega inn undir leikstjórn Unu Þorleifsdóttur.
Dansatriðin áttu stóran þátt í uppfærslunni undir stjórn Sveinbjargar Þórhallsdóttur. Verkið hefst með danshreyfingum sem verða að viðloðandi stefi. Danshreyfingarnar hefði á köflum mátt stytta þó að tilkomumikill tangó hjónanna síðar í verkinu hafi verið táknrænn þar sem Nóra kvaddi endanlega þá undirgefnu konu sem hún eitt sinn var.

Í uppgjöri hjónanna var jafnframt bráðsnjallt að sjá Nóru spegla líkamsstöðu Þorvaldar og beina sjónum að karllægum stellingum þegar kemur að yfirráðaorðræðu.

Margrét Helga Jóhannsdóttir fer með hlutverk barnfóstrunnar Önnu Maríu en viðhorf hennar kallaðist á við hjónin hvort um sig. Lágróma rödd Emmu, dóttur hjónanna, í meðförum Ebbu Katrínar Jónsdóttur, speglaði svo unga Nóru með viðhorf feðraveldisins að leiðarljósi. Textinn hefur nefnilega tvær hliðar svo áhorfendur halda á einhvern hátt með öllum karakterunum fjórum. Ólíkar hugmyndir um ástina, skuldbindingu hjónabandsins, samskipti kynjanna og stöðu konunnar á sannarlega við í samtíma leikhúsi.
Þótt umfjöllunarefnið sé þungt er alltaf stutt í húmorinn, þökk sé Hilmi Snæ Guðnasyni sem lífgerir hér kunnuglegan karakter. Þau Hilmir og Unnur Ösp Stefánsdóttir eru óumdeilanlega miklir þungavigtaleikarar. Ástríðan á milli Nóru og Þorvaldar er enn til staðar og á einhverjum tímapunkti glitti í von um að hjónaband þeirra hlyti farsælan endi. Lok verksins eru þó sterk því Nóra er hvergi nærri hætt í baráttu sinni fyrir frelsi konunnar. Það er vel hægt að mæla með Dúkkuheimili, öðrum hluta, fyrir alla sem vilja komast nær því að skilja hvað það felur í sér að vera manneskja.

Umfjöllunina má finna í 39 tbl. Vikunnar.

Texti/ Íris Hauksdóttir.

Mynd / Grímur Bjarnason.

Hafði ekki orðið drukkinn í 30 ár

Leikarinn Bob Odenkirk drekkur ekki áfengi en féllst á það að drekka sig fullan fyrir hlutverk sem hann fór með árið 2016.

Leikarinn Bob Odenkirk hafði ekki orðið drukkinn í 30 ár þegar hann ákvað að drekka sig fullan fyrir hlutverk sitt í þáttunum Drunk History.

Leikarinn, sem fór með hlutverk í þáttunum árið 2016, greindi nýverið frá því í viðtali við PaleyFest New York að honum hafi þótt afar óþægilegt að drekka sig fullan og að gjörningurinn hafi valdið honum miklum kvíða.

Kvíðinn var svo mikill að hann ákvað næstum því að hætta við að leika í þáttunum. „Það var óþægilegt að verða drukkinn. Ég á börn sem eru orðin unglingar og ég var svolítið hræddur um að verða blindfullur í sjónvarpinu, svona ælandi fullur,“ sagði Odenkirk sem er tveggja barna faðir.

Odenkirk er orðinn 55 ára og hafði ekki drukkið í heil þrjátíu ár áður en hann fór með hlutverk í umræddum þætti. Þess má geta að hann drakk tvo og hálfan gin og tónik og fjögur tekíla-skot. „Ég var klárlega fullur.“

Hann tekur fram að hann hafi ákveðið að taka hlutverkinu þegar hann sá að framleiðandi þáttanna passaði vel upp á hann.

Með meistaragráðu í félagsfræði en fékk bara vinnur við þrif

Mynd / Facebook / Heilbrigðisstofnun Vestfjarða

Libertad Venegas er með BA-próf í fjölmiðlafræði og meistaragráðu í félagsfræði en fær ekki menntun sína metna hér á landi. Fyrst þegar hún flutti til Íslands buðust henni bara vinnur við þrif. Í dag starfar hún á leikskóla.

Fólk af erlendum uppruna sem flyst til Íslands til að setjast hér að á erfitt með að fá menntun sína metna á Íslandi og vinnu við sitt hæfi.

Í nýjasta tölublaði Mannlífs sem kemur út á morgun segja þau Libertad, Harald og Sante Feaster sögu sína.

Libertad Venegas er með BA-próf í fjölmiðlafræði og meistaragráðu í félagsfræði. Í heimalandi sínu Mexíkó vann hún meðal annars sem blaðamaður, sjónvarpsfréttamaður og ráðgjafi hjá fjölþjóðlegri nefnd á vegum Sameinuðu þjóðanna. Fyrst fékk hún aðeins vinnu við skúringar en í dag starfar hún á leikskóla.

Mynd / Heiðdís Guðbjörg Gunnarsdóttir

Ljósmyndir úr ræktinni sagðar valda áhyggjum

Því hefur verið haldið fram að sjálfsmyndir sem teknar eru í miðri líkamsrækt og birtar á samfélagsmiðlum veiti fólki hvatningu. En niðurstöður nýrrar rannsóknar leiða annað í ljós.

Niðurstöður nýlegrar rannsóknar leiddu í ljós að sjálfsmyndir sem teknar eru í líkamsræktarstöð hafa gjarnan neikvæð áhrif á þá einstaklinga sem sjá myndirnar á samfélagsmiðlum. Niðurstöðurnar, sem birtust í læknaritinu Health Communications, sýna að það fólk sem tekur myndir af sér í ræktinni og birtir á samfélagsmiðlum vill oft meina að slíkar myndir veiti öðrum hvatningu. En rannsakendur, þau Tricia Burke og Stephen Rains, komust að því að slíkar myndir hafa oft öfug áhrif á fólk og valda því að það fær áhyggjur af útliti sínu og þyngd.

Rannsóknin leiddi einnig í ljós að þegar fólk sér ræktarmyndir af fólki sem er með svipaðan líkama og það sjálft þá eru meiri líkur á að myndirnar veki upp slæma tilfinningu hjá viðkomandi.

„Ég er með kúnna sem eyða meiri orku í símann sinn heldur en æfinguna, þeir spyrja oft hvort ég geti tekið myndir af þeim,“ segir Kenny Santucci sem rekur líkamsræktarstöðina Solace í New York þegar hann er spurður út í niðurstöður rannsóknarinnar.

Santucci furðar sig á þessu. „Ég hugsa oft með mér: „við erum hérna í miðri æfingu í kringum hóp fólks en þú villt að ég taki mynd af þér“,“ sagði hann í samtali við GQ.

Leigja hús á 11,7 milljónir króna á mánuði

Justin Bieber og Hailey Baldwin eru komin á leigumarkaðinn.

Nýbökuðu hjónin Justin Bieber og Hailey Baldwin eru farin að leigja íbúð saman. Íbúðin er ekkert slor en um 650 fermetra glæsihöll í Toluca Lake-hverfinu í Los Angeles er að ræða.

Húsið sem skötuhjúin leigja var á sölu fyrir tæpan milljarð króna en samkvæmt heimildarmanni PEOPLE samdi Bieber um mánaðarleigu í stað þess að festa kaup á eigninni.

Eignin sem um ræðir var tekin í gegn fyrir tveimur árum. Hún hefur að geyma fimm svefnherbergi og sjö baðherbergi. Í húsinu er upptökuver, líkamsræktarstöð, risastór bílskúr og sundlaug svo eitthvað sé nefnt.

Heimildarmaður PEOPLE segir þá að húsið sé tilvalið undir veisluhöld því í því er fullbúið eldhús sem hentar vel fyrir meistarakokka.

Justin Bieber og Hailey Baldwin eru víst gift

Innlit inn til ofurfyrirsætunnar Alessöndru Ambrosio

Heimili fyrirsætunnar Alessöndru Ambrosio er afar glæsilegt og undir áhrifum frá heimalandi hennar.

Ofurfyrirsætan Alessandra Ambrosio býr í glæsilegu húsi í Kaliforníu en hún fékk hönnuðinn Martyn Lawrence Bullard til að hjálpa sér við að innrétta og útkoman er afar flott. Hönnunartímaritið Architectural Digest kíkti í heimsókn til hennar á dögunum.

„Ég ferðast stanslaust vegna vinnunnar en þegar ég er ekki að ferðast þá vil ég bara vera heima með börnunum,“ sagði fyrirsætan í samtali við Architectural Digest. Ambrosio lagði mikla áherslu á að heimilið yrði barnvænt og skemmtilegt fyrir börnin hennar tvö sem eru tíu og sex ára. Að sögn Ambrosio fengu börnin miklu ráðið þegar kom að herbergjum þeirra.

Ambrosio kemur frá Brasilíu og í samvinnu við hönnuðinn Bullard færði hún brasilísk áhrif inn á heimilið.

Myndirnar úr innlitinu til Ambrosio má sjá á vef Architectural Digest.

Klassísku Biggie-sólgleraugun í nýrri útgáfu

Ný útgáfa af Versace-sólgleraugum sem voru í uppáhaldi hjá Notorious B.I.G. hafa verið sett í sölu, þau koma í takmörkuðu upplagi.

Hönnuðurinn Donatella Versace hefur heiðrað minningu vinar síns, rapparans Notorious B.I.G., með því að setja á markað nýja og endurbætta útgáfu af klassískum Versace-sólgleraugum sem voru í uppáhaldi hjá Notorius B.I.G..

Notorious B.I.G., oft kallaður Biggie Smalls, var meðal annars með umrædd sólgleraugu í myndbandinu við lagið Hypnotize. Þess má geta að rúmt 21 ár er frá því að Notorious B.I.G. lést.

Donatella og Notorious B.I.G. voru góðir félgar og á sínum tíma. „Mér þótti Biggie alltaf frábær. Hann kom margoft á sýningarnar mína í París og við hittumst reglulega. Hann talaði alltaf svo vel um mig og fjölskyldu mína. Mér þótti hann svo gáfaður, svo vel gefinn,“ sagði Donatella árið 2011 í viðtali við tímaritið Fader. Hún sagði einnig að hún tryði því margt fólk hafi kynnst vörumerki Versace vegna Notorious B.I.G. þar sem hann var mikill aðdáandi Versace.

Nýja útgáfa sólgleraugnanna kemur í takmörkuðu upplagi og kostar upphæð sem nemur um 35.000 krónum. Þau eru til sölu í Barneys-verslunum.

„Að klúðra fyrstu skiptunum sínum er fullkomlega eðlilegt“

Leikarar og höfundar leikverksins Fyrsta skiptið segja að í upphafi hafi verið erfitt að deila vandræðalegum reynslusögum með mótleikurum sínum.

Á sunnudaginn verður fyrsta verk ársins í Gaflaraleikhúsinu frumsýnt, grínleikritið Fyrsta skiptið. Höfundar eru fimm, þau Berglind Alda Ástþórsdóttir, Inga Steinunn Henningsdóttir, Arnór Björnsson, Mikael Emil Kaaber og Óli Gunnar Gunnarsson og leika þau sjálf í verkinu. Leikstjóri er Björk Jakobsdóttir.

„Fyrsta skiptið er fyrst og fremst grínleikrit. Við segjum frá fyndnum reynslusögum ásamt því að hoppa inn á milli í leiknar senur. Við notumst mikið við myndlíkingar og tæklum þar af leiðandi umræðuefnið á hlægilegan hátt. Við túlkum til dæmis fyrsta kynlífið sem íþrótt og fyrsta sleikinn túlkum við í dans,“ útskýra þær Berglind og Inga þegar þær eru beðnar um að lýsa verkinu.

„Við túlkum til dæmis fyrsta kynlífið sem íþrótt og fyrsta sleikinn túlkum við í dans.“

„Verkið fjallar fyrst og fremst um alls konar vandræðaleg fyrstu skipti sem allir ættu að kannast við. Til dæmis fyrsta kossinn, fyrstu kynlífsreynsluna, fyrstu sjálfsfróunina og fyrstu sambandsslit. Við fjöllum síðan um þessi fyrstu skipti á skemmtilegan og snyrtilegan máta þar sem við gerum mikið grín af hugmyndinni um þessi týpísku fullkomnu fyrstu skipti. Þessi snilldarhugmynd kom upprunalega frá leikstjóranum okkar,“ segir Berglind.

Höfundar verksins byggja verkið á sinni eigin reynslu og sögum frá vinum. „Leikritið er fyrst og fremst byggt á sönnum sögum og þá aðallega frá okkur sjálfum og góðum vinum. Okkur finnst mikilvægt að sögurnar sem við segjum frá í verkinu séu sannar því markmið okkar er einmitt að sýna áhorfendum að ekkert fyrsta skipti er í raun og veru fullkomið, lífið er ekki Hollywood-bíósena þar sem er alltaf rómantísk rigning og dúfur út um allt! Við vonum líka að fólk sjái að þetta þarf alls ekki að vera svona mikið feimnismál…að klúðra fyrstu skiptunum sínum er fullkomlega eðlilegt og í staðinn fyrir að skammast sín þá ætti maður frekar að hlæja að þessu,“ útskýrir Inga.

„Leikritið er fyrst og fremst byggt á sönnum sögum og þá aðallega frá okkur sjálfum og góðum vinum.“

Berglind og Inga viðurkenna að það hafi verið erfitt að deila reynslusögum sínum í upphafi ferlisins. „Þegar við byrjuðum að skrifa leikritið var fyrsta skrefið að deila okkar eigin sögum og það var örugglega erfiðasti hlutinn af ferlinu. Maður þurfti einhvern veginn að opna sig algerlega og drita út vandræðalegum reynslusögum. En okkur tókst svo sannarlega að tækla þetta vel því við tókum þessar vandræðalegu sögur og gerðum úr þeim sprenghlægilegar senur. Maður lærði því fljótlega að hafa húmor fyrir sjálfum sér og það skemmtilegasta sem leikhópurinn gerir núna er að liggja í hláturskasti yfir þessum sögum okkar.“

Þess má geta að sýningin er ætluð fyrir 12 ára og eldri.

Ráðgátan leysist smátt og smátt

Ráðgátan á bak við ljósmyndirnar á sýningunni Hver er á myndinni? leysist smátt og smátt.

Undanfarið hefur Þjóðminjasafn Íslands óskað eftir viðbrögðum við ljósmyndum eftir Alfreð D. Jónsson á sýningunni Hver er á myndinni?. Alfreð var portrettljósmyndari í Reykjavík og rak ljósmyndastofu frá árinu 1931 til ársins 1952.

Filmusafn Alfreðs var afhent Ljósmyndasafni Íslands til varðveislu fyrir nokkrum árum en ekki er vitað hvaða fólk er á myndum Alfreðs. „Gildi myndar eykst mikið ef vitað er hvern hún sýnir. Þekkir þú eitthvert andlit? Ef svo vill til, er um að gera að koma þeim upplýsingum á framfæri,“ segir í tilkynningu frá safninu.

„Sýningin hefur skilað þónokkuð af svörum,“ segir sýningarstjórinn Kristín Halla Baldvinsdóttir þegar hún er spurð út í viðbrögð við sýningunni. Hún hefur ekki nákvæmar tölur um þau svör sem hafa borist en áætlar að það sé búið að leysa ráðgátuna á bak við um 20% myndanna á sýningunni.

„Sýningin hefur skilað þónokkuð af svörum.“

„Ég myndi giska á að við værum búin að greina hátt í 20% þeirra mynda sem eru á sýningunni, síðast þegar ég taldi fyrir um tveimur vikum vorum við að ná 10%. En það eru um 1240 myndir á sýningunni. Þetta er náttúrulega mjög misjafnt, sumir koma inn og þekkja ekki neinn, aðrir kannski einn og einn og aðrir þekkja marga. Og það er náttúrulega frekar fólk af eldri kynslóðinni sem þekkir fólkið á myndunum,“ segir Kristín.

Kristín bendir áhugasömum á að sýninguna er hægt að skoða á vefsíðunni sarpur.is. „Þar eru allar myndirnar sem eru í Myndasalnum, en einnig aðrar myndir sem ekki komust upp á veggina, samtals um 2300 myndir af óþekktu fólki.“

Mynd / Sýnishorn af ljósmyndum Alfreðs

Ráð til að einfalda lífið

Eflaust kannast margir hverjir við þá stöðu að finnast öðru hvoru eins og veruleikinn sé yfirþyrmandi, allt of mikið að gera og álag sé ástand sem komið sé til að vera. Í stað þess að sætta sig við það og leita á náðir hrukkukrema og orkudrykkja er ekki úr vegi að byrja á því að líta aðeins inn á við. Það er ótrúlegt hvað smávægilegar breytingar á hugarfari og venjum geta breytt miklu. Við tókum saman nokkur góð ráð sem eiga það sameiginlegt að gera lífið örlítið einfaldara.

Taktu til í lífinu

Losaðu þig við óþarfa drasl af heimili þínu og úr lífinu almennt. Hér er ekki aðeins átt við veraldlega hluti. Hugaðu að öllum þeim þáttum í lífi þínu sem valda á einhvern hátt streitu eða vanlíðan, því það er ekki síður mikilvægt að taka til á þeim sviðum. Við mælum með að taka tíma í smávegis sjálfskoðun og skrifa niður hver stærsti stressfaktorinn í þínu lífi er. Hvað er það sem þú vildir gera minna af og hvað viltu gera meira af?

Verslaðu meira á Netinu

Eftir langan vinnudag er búðarferð með þreytt og svöng börn í eftirdragi ekki tilhugsun sem heillar marga. Netverslun færist sífellt í aukana og nú eru komnir ýmsir möguleikar til að kaupa inn fyrir heimilið í gegnum veraldarvefinn og fá allt sent heim upp að dyrum. Fyrir þessa extra skipulögðu og framtakssömu er jafnvel ekki úr vegi að fara að huga að jólagjafainnkaupum.

Settu takmörk

Þetta er þitt líf, þín hamingja, þínar ákvarðanir. Ertu í kringum fólk sem dregur þig niður á einhvern hátt? Finnst þér stundum eins og þú verðir að gera eitthvað eða fara eitthvað til að bregðast ekki einhverjum öðrum þrátt fyrir að þú vildir helst bara vera heima? Þegar þú tekur að þér aukavinnu sem krefst þess að vinna á kvöldin, ertu þá að fórna mikilvægum tíma með börnunum þínum? Leggjum okkur fram um að taka ákvarðanir sem koma sér best fyrir okkur sjálf og okkar nánustu og forgangsröðum eftir því.

Hafðu alltaf eitthvað til að hlakka til

Í amstri dagsins og hröðu samfélagi er auðvelt að festast í því mynstri að vera alltaf að flýta sér og sjá ekki fram á að geta nokkurn tíma slakað á. Það er gott að vera alltaf með eitthvert skemmtilegt skipulagt aðeins fram í tímann. Ferðalög, dekur, eða jafnvel bara kósíkvöld heima. Þannig veistu, að þrátt fyrir álagstíma og að bugast á köflum er aldrei of langt í gæðastundina þína.

Skrifaðu það niður

Í stað þess að reyna halda utan um allt sem tengist daglegu lífi í huganum, í sambandi við fundi, læknistíma, máltíðir, verkefni og hugmyndir, markmið og annað – skrifaðu það niður. Fjárfestu í fallegri dagbók eða náðu þér í skipulags „app“ í símann og komdu því inn í rútínuna að skrifa mikilvæga hluti niður jafnóðum. Með því hreinsarðu hugann og hefur betri yfirsýn yfir allt saman.

 Lifðu í núinu

Í stað þess að festast í eftirsjá yfir fortíðinni eða kvíða fyrir framtíðinni, hvernig væri að einbeita sér að því að lifa í núinu? Í stað þess að telja niður mínúturnar þar til er kominn háttatími, njótum þá þess að vera með börnunum. Í staðinn fyrir að flýta sér inn úr göngutúr þegar byrjar að rigna, leyfum þeim að hoppa í pollunum. Það er mikið frelsi sem fæst með því að hætta alltaf að vera að flýta sér.

Greinin birtist upphaflega í Vikunni

Busy Philipps segir James Franco hafa verið hræðilegan

|
|

Leikkonan Busy Philipps segir leikarann James Franco hafa gert sér lífið leitt á tökustað á árunum 1999 og 2000.

Leikkonan Busy Philipps segir leikarann James Franco hafa veist að sér á tökustað við gerð þáttanna Freaks and Geeks á árunum 1999 og 2000. Hún hefur áður greint frá meintri árás en lýsir atvikum nánar í nýrri bók sinni, This Will Only Hurt a Little.

„Mér líður eins og hann hafi lesið Easy Riders, Raging Bull eða eitthvað álíka yfir sumarið og þá ákveðið að eina leiðin fyrir hann til að vera tekinn alvarlega væri að láta eins og helvítis asni.“

Philipps segir Franco hafa verið óvenjulega árásargjarnan gagnvart sér á meðan á tökum stóð og að það hafi alltaf verið ákveðin spenna á milli þeirra. Við tökur á einu atriðinu mun Franco að hafa öskrað á hana og hent henni í gólfið fyrir framan viðstadda. Hún segir þá árás hafa valdið sér mikilli vanlíðan.

Philipps segir Franco hafa beðið sig afsökunar daginn eftir og þannig náð að blekkja fólk. „Hann var hræðilegur við mig.“

1...1.5331.5341.535...1.600Síðu 1.534 af 1.600

Raddir

© 2023 Mannlíf.is. Allur réttur áskilinn. Notkun á efni miðilsins er óheimil án samþykkis.