Föstudagur 15. nóvember, 2024
-2 C
Reykjavik
Senda ábendingu
VefTv
Hlaðvörp

Framandi og ferskur hönnuður

Norðmaðurinn Hallgeir Homstvedt er óhræddur við að fara nýjar leiðir í hönnun sinni.

Hinn norski Hallgeir Homstvedt lærði upphaflega margmiðlun í Ósló en lét draum sinn rætast ári síðar þegar hann söðlaði um og fluttist til Ástralíu til þess að stunda nám við Univeristy of Newcastle. Árið 2006 útskrifaðist hann sem iðnhönnuður með afbragðs árangri og hóf strax störf hjá norska frumkvöðlafyrirtækinu, Norway Says. Það var síðan þremur árum seinna eða árið 2009 sem Norðmaðurinn opnaði sína eigin hönnunarstofu, Hallgeir Homstvedt Design, sem sérhæfir sig í verkefnum á sviði innanhúss-, húsgagna- og vöruhönnunar.

Verkefni hönnuðarins eru fjölbreytt en með sköpun sinni vill Hallgeir Homstvedt ávallt ná fram áþreifanleika og gagnvirkni á sama tíma og hann skapar forvitni hjá áhorfandanum. Í gegnum tíðina hefur Norðmaðurinn tekið þátt í stórum hönnunarsýningum víðs vegar um heiminn en hann hefur meðal annars vakið verðskuldaða athygli á sýningum í stórborgunum London, Mílanó, New York og Tókýó.

„… með sköpun sinni vill Hallgeir Homstvedt ávallt ná fram áþreifanleika og gagnvirkni á sama tíma og hann skapar forvitni hjá áhorfandanum.“

MUUTO OG MEIRA

Hallgeir Homstvedt er óhræddur við að prófa nýja hluti. Hann hefur bæði starfað fyrir stór alþjóðleg fyrirtæki eins og Muuto, Hem, L.K. Hjella og Established & Sons en er þó óhræddur við að starfa með lítt þekktari hönnuðum. Það virðist engu skipta hvert verkefnið er, hugur Hallgeir Homstvedt virðist alltaf hafa ótal hugmyndir og í hvert sinn sem hann byrjar kemur eitthvað allt öðruvísi en hann hefur áður gert. Með fjölbreytni og hugmyndauðgi sinni hefur hann unnið til fjölda verðlauna á sviði hönnunar og hvergi nærri hættur.

Hjólabrettakappi, hefðardama og hippi

Sóley Kristjánsdóttir er þekkt fyrir flottan fatastíl.

Sóley Kristjánsdóttir þeytir skífum í hjáverkum en hún starfar sem vörumerkjastjóri hjá Ölgerðinni. Sóley hefur lengi vakið eftirtekt fyrir frumlegt og skemmtilegt fataval en hún segist alltaf hafa haft gaman af tísku. Svo er hún líka með hænur í bakgarðinum.

„Mér finnst mjög skemmtilegt að klæða mig en stíllinn minn er afar fjölbreyttur, vinnufélagarnir hafa haft orð á því. Stundum er maður klæddur þannig að það vantar bara hjólabrettið, stundum er ég eins og hefðarfrú og stundum tekur hippinn völdin. Það fer allt eftir veðri og vindum en það er sem betur fer frjálslegur klæðnaður leyfður í Ölgerðinni. Efst á óskalistanum þessa stundina eru skór en ég er ekki mikil skókona og er eiginlega alltaf í sömu skónum. Lágbotna að sjálfsögðu þar sem ég lít á mig sem 180 cm risa.

Sóley segir hettupeysu klárlega vera skyldueign.

Aðspurð hvað allar konur verði að eiga í fataskápnum segir Sóley flotta og þægilega hettupeysu klárlega vera skyldueign enda séu þær klassík. „Ég er hætt að gera stórinnkaup í lágvöruverðsverslunum. Ég vil hugsa um umhverfið og kjör fólksins sem framleiðir þessi ódýru föt. Svo á ég mjög mikið af fötum og reyni frekar að finna nýjar samsetningar. Ég versla helst í Aftur en þar er mikil fegurð í framleiðslunni og allir fá greitt fyrir sína vinnu. Aftur hefur verið með endurvinnslustefnu alveg frá upphafi, í sennilega 20 ár, og endurvinnur efni úr eldri fötum. Mjög flott föt sem eldast ótrúlega vel,“ segir Sóley.

Myndir / Heiðdís Guðbjörg Gunnarsdóttir

Tóku víkingaklappið á Ryder-bikarnum

Stemmningin var mikil á Ryder-bikarnum í Frakklandi.

Áhorfendur á Ryder-bikarnum í Frakklandi tóku víkingaklappið svokallaða. Golfmótið var haldið um helgina þar sem 12 bestu leikmenn Evrópu og 12 bestu leikmanna Bandaríkjanna kepptu um Ryder-bikarinn. Stemmningin var greinilega mikil á mótinu ef marka má myndbandið sem birtist á vef Daily Mail en þar má sjá áhorfendur taka víkingaklappið í fagnaðarlátum.

Meðfylgjandi er myndbandið sem birtist á vef Daily Mail.

Þess má geta að þetta er í 42 sinn sem Ryder-bikarinn fer fram og evrópska liðið hreppti bikarinn.

Primera Air er gjaldþrota

Flugfélagið Primera Air er gjaldþrota og hefur öllum ferðum félagsins frá og með morgundeginum verið aflýst. Þetta kemur fram í tilkynningu á vefsíðu flugfélagsins.

„Fyrir hönd Primera Air viljum við þakka ykkur fyrir hollustuna. Við kveðjum ykkur á þessum sorgardegi,“ segir í yfirlýsingu félagsins.

Farþegum sem áttu bókað flug með félaginu er ráðlagt að fylgjast með fréttum á heimasíðu félagsins næstu daga sem og að hafa samband við söluaðila. Jafnframt er tekið fram að hvorki símtölum né skriflegum fyrirspurnum verður svarað.

Primera Air hefur átt undir högg að sækja undanfarið. Félagið hefur komið illa út úr þjónustukönnunum og á dögnum samþykkti Flugfreyjufélag Íslands vinnustöðvun um borð í vélum félagsins vegna deilna um kjara flugliða.

Á vefnum aviation24.be segir að Airbus A321 flugvél félagsins hafi verið kyrrsett á Stanstead flugvelli í London vegna ógreiddra gjalda.

Elísabet nálgast markið í 400 kílómetra hlaupi

Hlauparinn Elísabet Margeirsdóttir er að nálgast markið í Ultra Gobi-hlaupinu en um 400 kílómetra hlaup í Gobi-eyðimörkinni er að ræða þar sem þátttakendur hafa 150 klukkustundur til að ljúka við vegalengdina. Elísabet á 20 kílómetra eftir.

„Hún er á svakalegri siglingu. Hún er í eyðimerkurlandslagi, sandur og rok. Það bítur ekkert á hana. Hún er þó komin með blöðru sem er að valda sársauka. En hún lætur það ekki á sig fá. Er ótrúlega einbeitt og er komin á tímastöð CP29/369km. Það styttist í markið en það getur margt gerst á næstu 30km. Hún þarf á öllum góðum straumum að halda og allar kveðjur hjálpa henni með hvert skref í átt að markinu. Klukkan í Gobi er 18:00 og það fer að koma myrkur. Hún var spurð hvaða lag ætti að spila í markinu. Einhverjar tillögur?“ segir í stöðuuppfærslu sem birtist á Facebook-síðu hennar.

Elísabet komst í símasamband fyrr í dag og birti nokkrar myndir á Facebook. Þar kom fram að henni líður vel og náði að hvílast vel fyrir lokasprettinn.

Mynd / Af Facebook-síðu Elísabetar

„Gáfulegasta sem ég hef gert í lífinu“

|
|

Telma Rut Einarsdóttir segir þátttökuna í björgunarsveitum hafa kennt sér mikið og gefið sér aukið sjálfstæði.

Flugneminn Telma Rut Einarsdóttir hefur starfað með Björgunarsveit Hafnarfjarðar í níu ár eða frá því hún byrjaði á nýliðanámskeiði aðeins 17 ára gömul. Hún mælir með þátttöku í björgunarsveitum fyrir alla sem hafa áhuga á útivist og góðum félagsskap.

„Þegar ég var yngri voru foreldrar mínir duglegir að fara með mig í útilegur og fjallaferðir. Það má næstum segja að ég hafi alist upp í útilegum og á fjöllum, ég er ekki nema sex vikna gömul á fyrstu myndinni sem var tekin af mér uppi á jökli. Þannig að þetta blundaði alltaf óbeint í mér,“ svarar Telma þegar hún er spurð hvers vegna hún ákvað að fara í björgunarsveitastarf.

„Mér var svakalega vel tekið þegar ég byrjaði en það er eitt af því sem mér finnst best við björgunarsveitirnar, öllum er tekið eins og þeir eru. Það er mjög breiður hópur af fólki sem starfar í björgunarsveitunum og allir geta unnið saman sem er alveg ótrúlega flott að sjá. Þetta bara virkar einhvern veginn þegar á reynir.

Nýliðanámskeiðið var að meðaltali aðra hverja helgi auk nýliðakvölda á miðvikudögum þar sem voru ýmis stutt námskeið, fjallgöngur, spottakvöld, klifur eða annað sem okkur datt í hug.“

Ómetanlegur félagsskapur

Telma segist á þessum tíma hafa lært mikið um útivist, hvernig eigi að haga sér á fjöllum, hvernig eigi að bjarga sér og öðrum og gera hlutina með lágmarksáhættu. „Þetta hefur einnig gefið mér aukið sjálfstæði, getu til að fara lengra og gera meira en ég hefði annars gert. Og svo ég verði nú aðeins væmin þá er félagsskapurinn ómetanlegur og ég hef kynnst mínum bestu og traustustu vinum í björgunarsveitinni. Fólkið þarna er alltaf til staðar, alltaf til í að hjálpa þegar eitthvað bjátar á og ég hef fundið mjög sterkt hvað allir standa þétt við bakið á manni. Þessi andlegi stuðningur og eining þurfa að vera til staðar til að skapa góða björgunarsveit, en eru alls ekki sjálfgefin.“

Félagsstarfið í björgunarsveitunum er fjölbreytt. Til dæmis eru björgunarleikarnir haldnir annað hvert ár samhliða landsþingi. „Þar er keppt í ýmsum greinum, eins og böruburði í gegnum þrautabraut, sigi, rústabjörgun, rötun, tappa í dekk og draga bíla, ökuleikni, pönnukökubakstri, björgunarsundi og fleira í þeim dúr. Í fyrra skiptið sem ég keppti settum við stelpurnar saman lið sem við kölluðum Team Barbie, svona upp á grínið, en svo vantaði okkur einn upp á til að fylla liðið og enduðum á að fá „Ken“ með okkur í lið. Svo tók ég síðast þátt með öðru liði sem endaði í þriðja sæti á leikunum, en það eru yfir tuttugu lið alls staðar af landinu sem keppa sín á milli. Mæli sérstaklega með þessu fyrir nýliða, að setja saman lið og sjá hvað þið getið,“ segir Telma.

Enginn fer í útkall nema treysta sér til

Verkefnin sem farið er í eru mismunandi og miserfið. „Við förum í hvert verkefni fyrir sig og leysum eins vel og við getum. Ef við gerum rétta hluti líður okkur yfirleitt vel þótt útkallið geti verið erfitt. Ég á vini í sveitinni sem hafa lent í erfiðum útköllum, til dæmis að sækja látið fólk og það tekur auðvitað á. En þar kemur liðsheildin inn og við pössum okkar fólk og höfum aðgang að sálfræðingi ef á þarf að halda til að vinna úr svona málum. Svo er líka vert að taka fram að við erum sjálfboðaliðar og þar af leiðandi ákveðum við sjálf hvort við förum í útkall eða ekki. Það er enginn settur í útkall nema hann treysti sér til og telji sig hafa getu og kunnáttu til að takast á við það. Í hvert skipti sem við fáum útkall með SMS-skilaboðum þarf fyrst að hugsa: Treysti ég mér í þetta verkefni og hef ég kunnáttu til að hjálpa í þessum aðstæðum? Ef svarið er já, er hægt að hlaupa af stað.“

„Ef við gerum rétta hluti líður okkur yfirleitt vel þótt útkallið geti verið erfitt.“

Björgunarsveitirnar um land allt hafa verið að halda kynningarfundi fyrir nýliða þar sem hægt er að fá frekari upplýsingar. „Ég mæli hiklaust með því að mæta og sjá hvort þetta sé eitthvað sem þú hefur áhuga á. Þetta er allavega eitthvað það gáfulegasta sem ég hef gert í lífinu.“

Myndir / Úr einkasafni

Hélt að það yrði meira átak að fara frá Eyjum

Elliði Vignisson. Mynd / Hákon Davíð Björnsson

„Ég hef aldrei upplifað þetta áður og þetta var mjög áhugaverður tími fyrir mig persónulega. Vissulega svolítið flókinn því ég hélt alltaf að ræturnar væru orðnar það djúpar að það yrði mikið átak að fara frá Vestmannaeyjum, það hefur ekki orðið enn þá,“ segir Elliði Vignisson sem nýverið tók við stöðu bæjarstjóra í Ölfusi eftir að hafa verið bæjarstjóri í Vestmannaeyjum í 12 ár. Elliði segir að vissulega hafi hann verið farinn að huga að breytingum enda kominn niður í fimmta sæti á lista eftir að hafa leitt hann til stærsta sigurs flokksins í bæjarfélögum af þessari stærð í sögu flokksins.   Flokkurinn fékk 73 prósent atkvæða og fimm af sjö bæjarfulltrúum í kosningunum 2014 og ekkert benti til annars en að Vestmannaeyjar yrðu áfram slíkt vígi Sjálfstæðisflokksins.

En háværar deilur innan flokksins um röðun á framboðslista urðu til þess að flokkurinn klofnaði. H-listinn spratt fram og náði ásamt E-listanum að fella meirihluta Sjálfstæðisflokksins, þótt ekki hafi munað nema fimm atkvæðum. Skyndilega stóð Elliði á krossgötum. Bæjarstjórastóllinn var farinn og í fyrsta skipti í 14 ár var hann ekki lengur bæjarfulltrúi í Vestmannaeyjum. Elliði var horfinn úr forystu Vestmannaeyjabæjar og fram undan voru stórar persónulegar ákvarðanir.

 

Uppsöfnuð óánægja finnur sér farveg

Þótt deilurnar innan flokksins hafi opinberlega snúist um hvaða leið ætti að fara við röðun á framboðslista telur Elliði að dýpri ástæður hafi legið þar að baki. „Það var enginn málefnalegur ágreiningur en á móti kemur að við vorum búin að vera við stjórnvölinn í tólf ár og höfðum gengið þannig fram að auðvitað höfum við valdið truflunum í viðtækjum einhverra á þessum tíma. Við fundum það mjög að ákveðnir hópar voru að leita sér að farvegi fyrir persónulega óánægju frekar en eitthvað annað. Það var kannski byggt hús of nálægt einum, aðrir töldu sig ekki hafa fengið nægileg verkefni í útboðum á vegum Vestmannaeyjabæjar, fólk hafði ekki fengið vinnu sem það sótti um hjá bænum eða jafnvel misst vinnuna og taldi sig þess vegna eiga eitthvað sökótt við bæjarfélagið og svo framvegis. Þessi óánægja fann sér farveg í þessum svokallaða H-lista sem náði því sem til þurfti. Þótt Sjálfstæðisflokkurinn sé eftir sem áður með eitt mesta fylgi á landinu í Eyjum þá dugði fylgi H-listans til að fella meirihlutann og það verður ekki af þeim tekið.“

Elliði segir að einmitt sá hópur sem talaði um að það skorti upp á lýðræðisleg vinnubrögð innan flokksins hafi sjálfur átt erfitt með að sætta sig við lýðræðislega niðurstöðu. Kosið hafi verið um þrjár mismunandi leiðir og fékk tillagan um uppstillingu meirihluta en féll eigi að síður þar sem tvo þriðju hluta þurfti til. Þá hafi verið kosið um prófkjör, sem þeir sem síðar stofnuðu H-listann studdu, og fékk sú tillaga minnihluta atkvæða. „Þá voru greidd atkvæði um svokallaða röðun og hún fékk langmesta fylgið. Þetta var bara lýðræðisleg niðurstaða og þessi hópur fór þá að gera því skóna að það hefði eitthvað verið að hræra með atkvæði og beita fólk þvingunum, það var alltaf fráleit umræða. En niðurstaðan var þessi, að innan fulltrúaráðs Sjálfstæðisflokksins sem stjórnar framboðsmálum flokksins, var ekki vilji fyrir prófkjöri. Ekki einu sinni einfaldur meirihluti. Á því féll sú hugmynd. Sjálfur talaði ég fyrir leiðtogaprófkjöri. Það fékk eitt atkvæði, bara mitt atkvæði. Þannig að ekki var vilji til að fara í það og svo greiddi fólk bara atkvæði samkvæmt sinni sannfæringu og það varð niðurstaðan.“

 

Talar ekki um Pál Magnússon

Deilurnar mögnuðust enn frekar eftir að niðurstaða kosninganna varð ljós og beindist reiði sjálfstæðismanna fyrst og fremst að Páli Magnússyni, þingmanni flokksins í kjördæminu. Hann var sakaður um að hafa stutt framboð H-listans á bakvið tjöldin og þannig unnið markvisst gegn eigin flokki í bænum. Fór svo að Páll var rekinn úr fulltrúaráði flokksins í Vestmanneyjum vegna „fordæmalausrar framgöngu“ hans í kosningunum, eins og það var orðað í ályktun. Elliði er fljótur til svara þegar hann er spurður út í framgöngu Páls. „Ég ætla ekki að tjá mig um Pál Magnússon í þessu viðtali. Ég ætla ekki að falla í þá gryfju að ræða þetta út frá einstökum persónum. Það er til sálfræðihugtak sem heitir stóra eignunarvillan og hún er kölluð það af því að hún er svo algeng. Hún felst í því að ætla persónum of stórt hlutverk. Oftast nær liggur skýringin í einhverju öðru en einstökum persónum. Við eignum einstökum persónum árangur og eignum einstökum persónum líka árangursleysi þegar allt aðrir þættir geta legið að baki. Þannig að mér finnst það hvorki sanngjarnt gagnvart mér né Páli Magnússyni að ég fari að ræða um meintar persónulegar deilur á milli okkar.“

Elliði bætir við: „Svo er það annað hvernig þingmenn ganga fram. Það er annað en persóna þingmannsins. Þetta er í eina skiptið, þótt ég sé búinn að vera á hátt í á annan áratug í pólitík og fylgst vel með þá man ég aldrei eftir því áður, að það léki vafi á því hvort að þingmaður myndi styðja framboð síns flokks. Það er ekkert óeðlilegt að fólk hafi velt vöngum yfir því.“

 

Var staðráðinn í að hætta í pólitík

Elliði er keppnismaður mikill og segist hann fyrst og fremst hafa orðið tapsár þegar niðurstaðan lá fyrir. „Alveg sama í hverju maður er, þá er maður í hlutunum til þess að vinna.“ Engu að síður var hann kominn í þá stöðu að vera atvinnulaus og þurfti, eftir 12 ár á bæjarstjórastóli, að taka ákvörðun um framtíðina. „Það kom mér svolítið á óvart að ég upplifði svona … mér liggur nærri að kalla það frelsi. Allt í einu fannst mér ég standa frammi fyrir gríðarlegum tækifærum. Fyrstu vikurnar var ég mjög einbeittur að skipta úr pólitíkinni, úr stjórnmálum, yfir í einkageirann. Hann togaði fast í mig.“

Elliði átti í ýmiskonar samtölum við fólk um starf og stöður í einkageiranum og var hann kominn að því að stökkva á áhugavert tækifæri þegar pólitíkin togaði aftur í hann. „Ég fór að fá áhugaverð símtöl frá fulltrúum víða um land um hvort ég hefði áhuga á að taka að mér bæjar- og sveitarstjórastöður. Þau voru af öllum stærðum og gerðum. Það varð til þess að ég fór að skoða þennan möguleika. Þrátt fyrir að vera hálfpartinn búinn að lofa mér að verða ekki fimmtugur án þess að hafa unnið að marki í einkageiranum, þá stend ég núna frammi fyrir því að verða fimmtugur á næsta ári og vera búinn að vera opinber starfsmaður nánast alla ævi. Það var ekki það sem ég ætlaði mér.“ Elliði er því, rétt eins og margir af helstu málsvörum einkaframtaksins á Íslandi, á mála hjá hinu opinbera. „Það vill nú oft verða að sumum okkar er fórnað handan víglínu til þess að reyna að hafa áhrif,“ segir hann og hlær.

Það kom Elliða þægilega á óvart hversu auðvelt það reyndist að flytja frá Eyjum. Það hjálpaði til að börnin eru uppkomin og því ekki jafnerfitt að rífa upp ræturnar. En það gætti þó innri togstreitu. „Það helltist yfir mig um tíma ákveðinn valkvíði. Skyndilega varð ég kvíðinn og andstuttur og hugsaði, hvað ef ég vel rangt? Ég er með öll þessi tækifæri fyrir framan mig, ég get farið inn í mjög spennandi tækifæri í einkageiranum, ég get valið um mjög ólík og mismunandi tækifæri innan sveitarfélagageirans. Hver verður líðan mín og hvaða stefnu tekur líf mitt ef ég vel rangt?“

 

Sestur að í Elliðahöfn

Ekki er að heyra á Elliða að hann hafi tekið ranga ákvörðun þegar hann þekktist boð um að gerast bæjarstjóri í Ölfusi, víðfemu tveggja þúsund manna sveitarfélagi á Suðurlandi þar sem Þorlákshöfn er stærsti þéttbýliskjarninn. Kannski viðeigandi í ljósi þess að Þorlákshöfn hét áður Elliðahöfn og gantast Elliði með að „leiðrétta þau mistök“ í framtíðinni. „Ég er með málfrelsi og tillögufrelsi í bæjarstjórn og aldrei að vita að ég mani mig upp í að flytja þá tillögu á ný.“

Það er margt við Ölfus sem heillar Elliða og nefnir hann sterkt samfélag með hátt þjónustustig og mikil tækifæri til atvinnuuppbyggingar. „Ég er líka landsbyggðarmaður í eðli mínu. Ég er mjög hrifinn af hugmyndum þeirra sem voru að taka hér við og treysti mér vel til að vinna með þeim. Ég treysti þeim líka mjög vel til að vinna með mér sem er oft flóknara heldur en fyrir mig að vinna með öðrum. Ég er orðinn nógu gamall til að vita hvernig ég er. Ég fer hratt yfir og get verið mjög fylginn mér og gengið hart fram.“

Aðlögunin hefur gengið vel. Fjölskyldan hefur komið sér fyrir í Ölfusinu er þó enn sem komið er með annan fótinn í Eyjum þar sem eiginkona hans, Bertha Ingibjörg Johansen, rekur fataverslun og dóttir þeirra, Bjartey Bríet, sækir nám í Framhaldsskólanum í Vestmannaeyjum. Sonur þeirra, Nökkvi Dan, spilar handbolta með norska úrvalsdeildarliðinu Arendal og stundar samhliða því nám í stærðfræði við Háskóla Íslands. „Það tekur einhvern tíma fyrir Berthu og Bjartey að losa sig fullkomlega frá sínum skuldbindingum þannig að þær eru dálítið á víxl hér í Ölfusinu og í Eyjum. Það gengur bara ljómandi vel að sníða þetta saman og þær eru sem betur fer strax orðið mikið hér enda líður okkur alveg ofsalega vel hérna enda þetta er gott samfélag og nóg um að vera. Ég reyni síðan að vera duglegur að heimsækja Eyjar, sérstaklega til þess að að rækta vini og heimsækja fjölskylduna.“

 

Stórhuga Ölfusingar

Elliði fer á flug þegar talið berst að atvinnuuppbyggingu í sveitarfélaginu. Mýgrútur hugmynda er á teikniborðinu og er bæjarstjórinn bjartsýnn fyrir hönd sveitarfélagsins. Fyrst nefnir hann orkuna en innan marka sveitarfélagsins er að finna stærsta jarðorkusvæði landsins sem og einhverjar mestu vatnsbirgðir landsins í jörðu. „Íbúar hér segja gjarnan að ef þú tekur stórt skrúfjárn og rekur ofan í jörðina, þá færðu upp heitt vatn. En ef þú rekur lífið skrúfjárn ofan í jörðina færðu kalt vatn. Það er algjörlega einstakt, jafnvel á heimsvísu, að hafa aðgang að öllu þessu kalda og heita vatni.“ Sér Elliði fyrir sér mikla framþróun í orkubúskap þar sem áhersla verður lögð í fullvinnslu orkunnar. „Ekki bara fullvinnslu orkunnar, heldur fullvinnslu þeirra efna sem fylgja varmanum. Það er til dæmis komnir upp mjög öflugir hátækniiðngarðar á Hellisheiði og þar ætla menn að nota ýmsar lofttegundir, til dæmis til þörungaræktar og ýmsar fleiri hugmyndir. Þar ætlum við okkur stóra hluti.“

En vatnið verður ekki eingöngu notað til orkuöflunar því hvorki fleiri né færri en þrjú baðlón á stærð við Bláa lónið eru á teikniborðinu. Grey line og Heklubyggð ehf. stefna að því að hefja framkvæmdir við eitt slíkt við skíðaskálann í Hveradölum og þá eru tvö önnur baðlón í skipulagsferli hjá sveitarfélaginu en að þeim standa innlendir og erlendir fjárfestar. „Ferðaþjónustan er gríðarlega sterk hérna því nánast hver einasti útlendingur sem hingað kemur fer í gegnum sveitarfélagið í gegnum þjóðveg 1. Reykjadalurinn tekur við 250-300 þúsund ferðamönnum á ári og það eru uppi stórhuga áform um að nýta sérstöðu þessa svæðis.“

 

Hef aldrei minnst á Kínverja

Á undanförnum árum hafa verið uppi hugmyndir um að byggja upp stórskipahöfn í Þorlákshöfn og hafa þingmenn kjördæmisins reglulega lagt fram tillögur þess efnis. Á dögunum greindi Morgunblaðið svo frá því að forsvarsmenn sveitarfélagsins ættu í viðræðum við kínverska aðila um milljarða fjárfestingu á hafnarsvæðinu. Elliði segir áhuga vissulega fyrir hendi, bæði meðal innlendra og erlendra fjárfesta. „Ég hef aldrei minnst á Kínverja, það hafa blaðamenn gert og þeir gera það á eigin ábyrgð. Við höfum aldrei minnst á neitt þjóðerni í þessu samhengi enda skiptir það ekki öllu. Við finnum bara áhuga einkaaðila til að koma að þessu verkefni með okkur og við byrjum þar, á því að þreifa fyrir okkur hversu víðtækur þessi áhugi er og hverjir eru með hugmyndir sem að samrýmast best þessu samfélagi.“

Elliði telur að stórskipahöfn í Þorlákshöfn komi til með að gjörbreyta landslaginu í vöruflutningum til og frá landinu. Sú þróun sé nú þegar hafin eftir að vöruflutningaskipið Mykines hóf að sigla til hafnarinnar og styttir þar með siglingaleiðina frá höfuðborgarsvæðinu til Evrópu um allt að sólarhring. „Til dæmis fer stór hluti af öllum bílum sem koma inn til landsins í gegnum höfnina hérna, hér er líka mikill ferskflutningur og þetta er bara toppurinn á ísjakanum ef höfnin fær að þróast áfram.“

Elliði sér til dæmis fyrir sér að framkvæmdirnar gætu fylgt svipuðu rekstrarmódeli og Hvalfjarðargöngin, það er að fjárfestarnir standi straum af framkvæmdunum og eftir ákveðinn tíma, þegar fjárfestingin hefur borgað sig, eignast sveitarfélagið höfnina á ný. „Það er ekkert lögmál að sveitarfélög eða hið opinbera reki hafnir. Þetta er bara atvinnutæki. Er það eðlilegt fyrirkomulag að þegar sveitarfélög fara í að nýta atvinnutækifæri og styrkja innviði eins og hafnir, að þá sé í raun og veru verið að leggja rekstur grunnskóla og leikskóla undir? Ef það gengur illa með fjárfestingu við höfnina að þá þurfi að stytta opnunartíma á bókasafni eða hækka gjaldskrárnar í sundlaugunum?“

 

Oft verið hundósáttur við flokkinn

Talið berst nú að Sjálfstæðisflokknum þar sem Elliði hefur alið manninn frá því hann hóf afskipti af stjórnmálum. Hann hefur verið áberandi í starfi flokksins og ekki hikað við að segja sínar skoðanir umbúðalaust þótt þær kunni að stuða fólk, jafnvel eigin flokksmenn. „Ég hef mikinn áhuga á Sjálfstæðisflokknum og ég styð hann en ekki óháð því hvað hann gerir. Ég hef alla tíð haldið með ÍBV, Chelsea og Utah Jazz en það er alveg óháð því hvað þau gera. Þetta eru bara lið sem ég valdi mér að fylgja. Ég get kvartað yfir árangrinum og fundist að það eigi að skipta ákveðnum leikmanni inn á eða út af en ég held alltaf með mínu liði. Skuldbinding mín við Sjálfstæðisflokkinn er ekki þannig. Ég styð Sjálfstæðisflokkinn með ráðum og dáð og vinn fyrir hann á meðan ég hef þá trú að þetta sé það stjórnmálaafl sem er líklegast til að vinna hugsjónum mínum framgang. Að þessu sögðu, þá er ég tilbúinn til að vinna áfram með Sjálfstæðisflokknum eins og ég hef gert síðustu 20 árin og ekki séð eftir einni mínútu sem hefur farið í það. En oft hef ég orðið hundósáttur við flokkinn og finnst hann í sumum þáttum þurfa að fara að hugsa sinn gang.“

Þar horfir Elliði til hinna klassísku frelsismála þar sem honum finnst flokkurinn ekki ganga nægilega vasklega fram. „Það er lykilatriði fyrir Sjálfstæðisflokkinn í dag, að láta af forræðishyggju og ganga fastar fram í innleiðingu á hvers konar frelsi. Og frelsismálin þurfa ekki alltaf að vera stærstu efnahagslegu mál þjóðarinnar.

Eitt grundvallarmál er t.d. að ríkið dragi sig í hlé í af neytendamarkaði. Að það hætti afskiptum á sölu á vörum svo sem ilmvatni, Tobleron og saltpillum í nafni ISAVIA. Svo ekki sé nú minnst á hið sjálfsagða frelsi til að kaupa bjór og vín eins og hverja aðra neytendavöru. Af hverju er frelsi í rekstri fjölmiðla ekki meira? Af hverju þurfa einkareknir fjölmiðlar að glíma á hverjum einasta degi við ríkisbákn? Af hverju hagar ríkið málum sínum þannig að þeir eru búnir að taka sér leyfi að byrja að prenta dagblað og rukka alla sem eru með bréfalúgu, rétt eins og þeir senda út útvarp og rukka alla sem mögulega geta haft viðtæki í gegnum nefskatt. Það er ekkert frelsi í þessu. Ég vil geta valið hvort ég versla við fjölmiðil eða ekki. Á sama hátt þarf ríkið líka að láta sem mest af inngripum í atvinnulífið.  Í hvert skipti sem umræða sem þessi kemur upp þá hljómar alltaf eitthvert bergmál í samfélaginu: „Er þetta nú stærsta málið? Væri ekki nær að ræða fátækt?“ Hugtakið frelsi er svo mikilvægt fyrir okkur öll í okkar daglega lífi og þess vegna eigum við ekki að láta hrekja okkur út í horn í þessari umræðu.“

Elliði vill meina að þetta hafi ekkert að gera með þá staðreynd að Sjálfstæðisflokkurinn hafi verið í samstarfi við „ófrjálslyndari“ flokka. Sjálfstæðisflokkurinn hafi verið í samstarfi með öllum flokkum og ekkert í þessa átt hafi verið áorkað. „Því miður er það sem gerist að þegar þingmenn verða ráðherrar, þá verða þeir svo miklir embættismenn. Þetta á ekki við um einn flokk umfram aðra. Þeir fara að hugsa eins og framkvæmdastjórar sem er gott og blessað en þeir verða að standa fyrir eitthvað pólitískt. Ég er ekki að tala fyrir útópískri frjálshyggju, heldur þann sjálfsagða rétt að t.d. skíra barnið þitt því nafni sem þú telur best hæfa og eigir það ekki undir einhverri ríkisnefnd. Sjálfstæðisflokkurinn vill vera trúr þessu en honum hættir eins og öllum öðrum flokkum til þess að fara út úr þessu.“

 

Hefur ekki áhuga á þingmennsku

Fyrir hverjar þingkosningar sprettur nafn Elliða upp í tengslum við mögulegt framboð fyrir Sjálfstæðisflokkinn. Hann hefur hins vegar aldrei látið tilleiðast þrátt fyrir góða möguleika, enda Sjálfstæðisflokkurinn gríðarlega sterkur í kjördæminu og sjálfur á Elliði sterkt bakland í Eyjum og víðar í kjördæminu. Elliði segist einfaldlega ekki hafa haft áhuga á þingmennsku. „Ég hef aldrei útilokað það en áhugi minn hefur aldrei legið í þessa átt. Mér hefur fundist mörgum sveitarstjórnarmönnum sem fara inn á þing ekki líða neitt sérlega vel þar. Sérstaklega þegar menn hafa verið bæjar- og sveitarstjórar, að koma inn á þing og sjá hlutina gerast á þeim hraða sem þar er, það er svolítið erfitt fyrir fólk sem er kannski búið að vera í tugi ára í þannig umhverfi að ef þú vilt að eitthvað gerist á morgun, þá hefurðu raunhæfa möguleika á að það gerist á morgun. Þú getur strax byrjað að hafa áhrif.“

Fyrir þingmenn er þetta erfiðara, segir Elliði, og fólk er gjarnt á að gera ósanngjarnar kröfur til þeirra. Sjálfur segist Elliði hafa verið í þeim hópi. „Fólk vill að þingmennirnir reddi málum. Reddi hjúkrunardagheimili fyrir veika ömmu, reddi brú yfir fljót og reddi námsbókum fyrir þá sem hafa ekki efni á þeim og svo framvegis. Þingmenn eru löggjafinn, þeir hafa mjög takmörkuð úrræði þegar að þessu kemur. Við höfum langtum meiri úrræði hvað þetta varðar í sveitarstjórn. Þannig að ég hef hingað til ekki stefnt inn á Alþingi og geri það ekki í dag.

Myndir / Hákon Dagur

„Vakti með mér gleði, sorg og reiði“

Þær bækur sem höfðu mest áhrif á Steinunni Stefánsdóttur.

Steinunn Stefánsdóttir, þýðandi, blaðamaður og einn höfunda bókarinnar Þjáningarfrelsið – Óreiða hugsjóna og hagsmuna í heimi fjölmiðla, er mikill fagurkeri og unnandi góðra bókmennta. Mannlíf kom því ekki að tómum kofa þegar það fór þess á leit við Steinunni að hún nefndi bækurnar sem hafa haft mest áhrif á hana.

Sjálfstætt fólk

„Ég nefni þá bók vegna þess að ég hef lesið hana oftast af öllum bókum. Ég er alls ekki týpan sem les uppáhaldsbókina einu sinni á ári, þvert á móti finnst mér ég eiga svo margt ólesið að ég geti alls ekki eytt tíma í svoleiðis. Sjálfstætt fólk las ég oft vegna þess að ég kenndi hana í Kvennaskólanum tvo vetur fyrir mörgum árum og las bókina líklega fimm eða sex sinnum á því tímabili. Sagan vakti með mér gleði, sorg og reiði, til skiptis eða allt í senn, og alltaf átti ég jafnerfitt með að fara í gegnum kennslustundina með sögulokunum ógrátandi.“

Rigning í nóvember

„Auður Ava Ólafsdóttir er einn af mínum uppáhaldshöfundum. Rigning í nóvember og Afleggjarinn eru í mínum huga systurbækur og ég á erfitt með að gera upp á milli þeirra. Í báðum er bæði ytra og innra ferðalag sem fléttast saman og gengur upp í magnaðri lestrarupplifun en einhvern veginn situr Rigning í nóvember enn fastar í mér en Aflegggjarinn.“

de

„Þessi bók er eftir danska rithöfundinn Helle Helle og á það sameiginlegt með Auði Övu í mínu lífi að ég bíð eftir bókum þeirra. Þetta er nýjasta bók hennar og kom út á þessu ári. Helle Helle er afar mínímalískur höfundur, skrifar sögur sem eru hægar og fágaðar á yfirborðinu en undir niðri ólgar svo miklu meiri saga en sú sem sögð er. Bækur Helle Helle sem ég hef lesið fyrir mörgum árum eru enn lifandi hluti af lífi mínu en ég ætla samt að nefna þessa síðustu, de, því ég er ekki frá því að mér finnist að í henni gangi einhvern veginn allt upp.“

Flugliðar Icelandair á sjúkrahús eftir flug

Flugliðar, flugfreyjur og flugþjónar Icelandair flugvélar sem kom frá Edmonton í Kanada í gærmorgun fóru á sjúkrahús eftir flugið vegna óþæginda, höfuðverks og þreytueinkenna. Umrædd flugvél var send í ítarlega skoðun og eftir það fór hún í flug síðdegis í gær.

Skert loftflæði í flugvélinni er talin líklegasta ástæða fyrir því að flugliðar fundu fyrir óþægindum og fóru á sjúkrahús eftir að vélin lenti, samkvæmt samstali RÚV við Jens Þórðarson framkvæmdastjóra rekstrarsviðs Icelandair. Jens segir að farið hafi verið yfir loftræstikerfi vélarinnar og skipt um síur.

Dularfull veikindi rannsökuð

Mannlíf hefur í vikunni fjallað um dularfull veikindi sem hafa herjað á flugliða Icelandair, en að minnsta kosti þrjár flugfreyjur hjá Icelandair eru óvinnufærar eftir að hafa veikst í flugi í sumar. „Við höfum allar verið með svakalegan þrýsting í höfði, eins og það sé að springa,“ segir flugfreyja hjá Icelandair sem telur eiturgufur í farangursrými orsök alvarlegra veikinda hennar. Fleiri úr sömu áhöfn veiktust.

Þetta er ekki í fyrsta sinn sem umræða skapast um dularfull veikindi flugliða Icelandair. Sambærilegt mál kom upp árið 2016 þar sem flugliðar kvörtuðu undan veikindum eftir að hafa flogið í tilteknum félagsins. Rannsóknarnefnd flugslysa tók málið til rannsóknar og stendur sú rannsókn yfir.

Þegar loddarar banka

Mynd / Utanríkisráðuneytið

Leiðari Tvær samantektir voru birtar á vef stjórnarráðsins á miðvikudaginn. Önnur þeirra er skrifuð af háskólaprófessor sem kemst að þeirri niðurstöðu að allir bestu vinir hans (þó aðallega einn sem nefndur er 163 sinnum á nafn á 180 blaðsíðum) eru frábærir og flekklausir menn þrátt fyrir að nær öll opinber gögn hafi sýnt fram á annað. Hinir raunverulegu skúrkar voru ýmist útlendingar eða óvinir hins óskeikula. Fyrir þessa mjög svo fyrirsjáanlegu niðurstöðu borgaði ríkissjóður 10 milljónir.

Öllu athyglisverðari er samantekt Alþjóðagjaldeyrissjóðsins á stöðu íslensks efnahagslífs. Þar er sérstaklega varað við því að „[ó]vissa tengd samningaviðræðum um útgöngu Bretlands úr Evrópusambandinu eykur líkurnar á veikari útflutningseftirspurn frá einum af stærstu mörkuðum Íslands og gæti flækt frekar fiskveiðisamvinnu á Norður-Atlantshafi“.  Með öðrum orðum, Brexit er ekki bara meiri háttar vesen fyrir Bretland. Það er líka vesen fyrir Ísland þótt einstaka stjórnmálamenn hafi þóst sjá mikil tækifæri fyrir Ísland af því að það þjónaði þeirra pólitískum hagsmunum.

Brexit er nefnilega skólabókardæmi um hversu alvarlegar afleiðingar það getur haft þegar lýðskrumarar, drifnir áfram af eigin hagsmunum, fá að vaða uppi óáreittir. Kosningabarátta þeirra var rekin áfram af lygum og hræðsluáróðri ásamt handfylli af tærum rasisma. Allt frá því niðurstaðan lá fyrir hefur lygavefurinn verið rakinn og helstu riddarar Brexit-liða hafa ýmist látið sig hverfa eða eru önnum kafnir við að hagnast á öllu saman eða hella olíu á eldinn sem þeir kveiktu sjálfir á meðan þeirra eigið slökkvilið reynir að veikum mætti að slökkva eldinn.

Næst þegar loddarinn (oftar en ekki vel tanaður í dýrum jakkafötum) bankar upp á og reynir að sannfæra þig um að allt sem aflaga fer er vondum útlendingum eða ímynduðum óvinum að kenna, spurðu þig að því hvað hann hefur upp úr krafsinu.

Bretland mun ganga út úr ESB þann 29. mars á næsta ári. Breska ríkisstjórnin hefur gert þá kröfu að fá að halda áfram að njóta flestra þeirra kosta ESB-aðildar án þess þó að vera í sambandinu. Hún vill skilnað en eftir sem áður óheftan aðgang að heimilinu – heimtar að sofa í hjónarúminu, borða úr ísskápnum og horfa á sjónvarpið. Eðlilega er ESB ekki tilbúið að fallast á þessar kröfur.

Líkurnar á engum samningi aukast þess vegna með hverjum deginum. Alþjóðleg fyrirtæki í Bretlandi eru farin að gera áætlanir um að flytja sig á evrusvæðið, breska ríkisstjórnin er farin að hamstra lyf, flugsamgöngur gætu raskast verulega og enginn veit hvað verður um landamærin við Norður-Írland eða þær milljónir Evrópubúa sem búa í Bretlandi. Þeirra á meðal eru allnokkrir Íslendingar.

Eins og AGS bendir á gætu neikvæð áhrif á viðskipti við Ísland orðið umtalsverð og ekki má heldur gleyma því að mjög stór hluti þeirra erlendu ferðamanna sem heimsækja Ísland eru Bretar. Brexit er afleitt fyrir alla og þess vegna er mikilvægt að við drögum lærdóm af öllu þessu klúðri. Næst þegar loddarinn (oftar en ekki vel tanaður í dýrum jakkafötum) bankar upp á og reynir að sannfæra þig um að allt sem aflaga fer er vondum útlendingum eða ímynduðum óvinum að kenna, spurðu þig að því hvað hann hefur upp úr krafsinu. Oftast er svarið pólitískur frami eða vafasamir viðskiptagjörningar. Einstaka sinnum 10 milljónir.

Miklu meira en bara Eurovision

Hin goðsagnakennda pólska rokkhljómsveit Kult heldur stórtónleika í Eldborg í Hörpu á sunnudag.

„Það eru um 16.000 pólskir innflytjendur á Íslandi. Okkur fannst kominn tími til að þeir fengju að berja Kult augum á tónleikum í nýja heimalandinu og gætu um leið sýnt íslenskum vinum og ættingjum um hvað pólskt rokk snýst. Íslendingar þurfa að heyra alvörugæðarokk frá Póllandi. Pólsk tónlist er svo miklu meira en það sem þið heyrið í Eurovision,“ segir plötusnúðurinn og tónleikahaldarinn Pjøtr Wasylik, sem stendur fyrir tónleikum sveitarinnar Kult í Eldborg í Hörpu næstkomandi sunnudag.

Tónleikarnir eru þeir fyrstu sem Kult heldur á Íslandi en Pjøtr segir sveitina vera goðsögn í heimalandi sínu. „Kult er hornsteinninn í pólskri dægurmenningu og hefur blásið andagift í brjóst Pólverja í yfir þrjátíu ár. Lög og textar sveitarinnar hafa til dæmis hjálpað pólsku þjóðinni að takast á við róstusama tíma á 9. og 10. áratugnum og eiga því sinn sess í þjóðfélagssögu landsins. Forsprakki sveitarinnar, Kazik Staszewski, er eins konar páfi rokksins í Póllandi og hefur enn mikil áhrif á unga tónlistarmenn þrátt fyrir að yfir þrjátíu ár séu liðin frá því að hann steig fyrst fram á sjónarsviðið,“ útskýrir Pjøtr. „Og þar sem stór hópur Pólverja býr nú á Íslandi er mikil eftirvænting í loftinu fyrir því að fá þessar rokkgoðsagnir í heimsókn.“

Beðinn um að lýsa tónlistinni sem sveitin leikur segir Pjøtr að það sé svolítið erfitt að staðsetja hana nákvæmlega en hún sé einskonar sambland af rokki, jassi og pönki og undir vissum áhrifum frá Sex Pistols, Elvis Presley og tónlist frá Balkan-skaga. Hann segir að ef að líkum lætur megi búast við kraftmiklum tónleikum á sunnudag og hann er þess fullviss að íslenskir, ekki síður en pólskir, rokkaaðdáendur muni skemmta sér á þeim. „Það að textarnir eru á pólsku ætti ekki að skipta neinu máli því tónlist er alþjóðlegt tungumál, eins og sagt er,“ segir hann. Til marks um það sé hann sjálfur mikill aðdáandi íslensks rokks, sveita á borð við MAMMÚT, Fufanu, Vök, Árstíðir, Þey og Q4U og finnst í raun ótrúlegt hvað lítil þjóð eins og Ísland hefur alið af sér mikið af skapandi og hæfileikaríku tónlistarfólki.

„Og þar sem stór hópur Pólverja býr nú á Íslandi er mikil eftirvænting í loftinu fyrir því að fá þessar rokkgoðsagnir í heimsókn.“

Spurður hvort honum finnst vera gott framboð af pólskri tónlist á Íslandi, segir Pjøtr að það sé alls ekki slæmt en gæti verið betra. „Það eru nokkrir aðilar sem hafa verið að skipuleggja pólska tónlistarviðburði hérna á Íslandi og sumir þeirra hafa staðið fyrir íslenskum tónleikum í Póllandi líka, þannig að það er einhver menningarmiðlun í gangi á milli þjóðanna. Hins vegar er munur á þekkingu Pólverja á íslenskri tónlist og þekkingu Íslendinga á pólskri tónlist. Vonandi munu tónleikarnir á sunnudag bæta úr því. Vonandi verða þeir fyrstu pólsku tónleikarnir af mörgum. Sjáum til,“ segir hann hress í bragði.

Hulunni svipt af jólamatseðli Bryggjunnar brugghúss 

Bryggjan brugghús er rómaður staður fyrir frábæran mat, líflega stemningu og skemmtilega viðburði sem tengjast gjarnan árstíðum þar sem áhugaverðri dagskrá er parað saman við glæsilega matseðla og drykki sem eiga við hverju sinni. Við hittum Margréti Ríkharðsdóttur sem er yfirmatreiðslumeistari og Elvar Ingimarsson, eiganda og rekstrarstjóra, og fengum innsýn í hvað verður í boði á jólasmatseðli staðarins í vetur.

Þið eruð komin á fullt að undirbúa aðventuna og byrjuð á jólamatseðlinum. Getur þú gefið okkur forskot á sæluna og ljóstrað leyndarmálinum hvað verður í boði á jólamatseðlinum í ár?
„Eins og undanfarin ár byrjum við á jólaplattanum sem er blanda af forréttum. Við reyndum að koma bjórnum eins mikið og hægt var inn í seðilinn. Á plattanum erum við með síld, marineraða í bláberjum, og IPA-bjór, lax grafinn í Fagnaðarerindinu (innsk. jólabjór) með sinnepsdressingu, bjórgrafið lambainnralæri með hindberja- og basildressingu og að lokum rækjukokteil með mangó- og sítrussósu. Aðalrétturinn er svo hægeldað andalæri með beikonkartöflumús, döðlumauki, vorlauk, ostrusveppum og appelsínusoðsósu. Í eftirrétt erum við með Stout-ís, piparkökumulning, bakað hvítt súkkulaði og kirsuberjasósu,“ segir Margrét full tilhlökkunar. Byrjað verður að bjóða upp á jólaseðil Bryggjunnar brugghúss þann 23. nóvember næstkomandi.

Má segja að sjávarfang verði í forgrunni hjá ykkur í aðventunni?  
„Sjávarfang spilar stórt hlutverk á jólaplattanum og bjórinn einnig en hann er auðvitað allur bruggaður hér innanhúss,“ segir Margrét.

Margrét og Sigurður Hjartason matreiðslumaður eiga heiðurinn af samsetningu jólamatseðlisins í ár og hafa nostrað við hann af mikilli ástríðu.

Þið bruggið ykkar eigin bjór sjálf, verið þið með jólabjór í ár?
„Bryggjan brugghús ber út „Fagnaðarerindið“ í fljótandi formi um jólin. Bjórstíllinn er belgískur Dubbel. Þurrkaðir ávextir og sæta frá ristuðu byggi einkenna þennan myrka en notalega bjór. Dökkur eins og nóttin en ljúfur í munni. Hjálpið okkur að breiða út Fagnaðarerindið,“ segir Elvar og er mjög ánægður með nýjustu afurðina í brugginu.

Bjóðið þið upp á viðburði í tengslum við aðventuna, skemmtidagskrá samhliða því er gestir njóta matarins?
„Já, frá fimmtudegi til sunnudags verður lifandi jólajazz í boði fyrir gestina.“

Er mikið um að fyrirtæki og hópar haldi upp á aðventuna hjá ykkur og bóki langt fram í tímann?
„Það eru mjög margir hópar, bæði íslensk fyrirtæki og vinahópar, sem eru þegar byrjaðir að bóka bæði jólaseðilinn og jólahlaðborð. Við bjóðum upp á jólahlaðborð fyrir stærri hópa sé óskað eftir því,“ segir Elvar og er ávallt reiðubúinn að koma til móts við óskir viðskiptavina. „Síðan er aldrei að vita hvort við bregðum út af vananum og höldum þrettándagleði á nýju ári,“ segir Elvar og brosir breitt.

Jólaseðillinn – innihald

Jólaseðillinn (hægt að fá vegan-útgáfu) – 7.990 kr. (hægt að fá drykkjarpörun á 4.990 kr. aukalega)

Forréttir 
Marineruð síld í IPA-bjór og bláberjum á rúgbrauði
Grafinn lax í Fagnaðarerindinu (jólabjór) og sinnepssósa
Bjórgrafið lamb með epli og basil- og hindberjadressingu
Rækjukokteill með mangó- og sítrussósuAðalréttur 
Confit de Canard (andalæri) með beikon-kartöflumús, döðlumauki, vorlauk, ostrusveppum og appelsínusoðsósu

Eftirréttur 
Bjór-ís (stout) með piparkökumulning, bökuðu hvítu súkkulaði og kirsuberjasósu

Jólahlaðborð – 9.990 kr.

Forréttir 
Bláberja- & IPA-marineruð síld með rúgbrauði
Sinnepssíld með rúgbrauði
Lax, grafinn í Fagnaðarerindinu með sinnepssósu
Reyktur lax með piparrótarsósu
Reyktar rækjur í skel og chili-tartarsósa
Bjórgrafið lamb með hindberja- og basildressingu
Vegan-jólataco með döðlumauki & stökkri gulrót
Vegan-paté á rúgbrauði með bjórsýrðri gúrku & sætum lauk (inniheldur hnetur)
Jólasalat með eplum, hnetum & hindberjadressingu

Aðalréttir 
Andalæri – confit de canard
Purusteik af bjórgrís
Hnetusteik

Meðlæti 
Sykurbrúnaðar kartöflur
Rósakál
Gljáðar gulrætur
Appelsínugljái

Eftirréttir
Bjórís með kirsuberjasósu og piparkökumulning
Súkkulaðikaka Bryggjunnar og fersk ber
Kókostoppar

Bókunarnúmer 456-4040

eða [email protected]
Lágmarksfjöldi í jólahlaðborð eru 50 manns.

Stúdíó Birtíngur í samstarfi við Bryggjan brugghús.
Myndir / Hákon Davíð Björnsson

 

Suðræn upplifun þar sem ævintýrin gerast 

Á fallegum haustdegi lá leið okkar í hjarta miðborgarinnar, á Burro Tapas + Steaks veitingastaðinn og Pablo Discobar við Veltusund 1 fyrir framan Ingólfstorg. Burro er rómaður fyrir framandi matarupplifun þar sem bragðlaukarnir fá að njóta sín til fulls og fyrir suðræna og líflega stemningu. Við hittum Gunnstein Helga sem er einn eigenda staðana og spjölluðum um tilurð þeirra og hugmyndafræðina að baki.

Burro er staðsettur á annarri hæð en á þriðju hæð er kokteilbarinn Pablo Discobar og tengjast staðirnir saman. Litrík sjón blasti við okkur þegar inn kom, það var eins og við værum komin á suðrænar slóðir og í allt annað umhverfi og tónlistin ómaði. Staðirnir minntu óneitanlega á borgina Havana á Kúbu með mexíkósku ívafi og maður lifnar allur við. Hönnunin, litríkur stíllinn og munirnir gleðja augað og upplifunin er framandi. Okkur lék forvitni á að vita allt um hönnunina, innanstokksmuni og það sem fyrir augum bar.
Hjónin Róbert Óskar og Anna Marín eru einnig eigendur staðana ásamt Gunnsteini Helga. Gunnsteinn Helgi hefur verið viðloðandi veitingabransann síðan hann var í framhaldsskóla og hefur komið að opnun fjölmargra veitingastaða ásamt mörgu góðu fólki, mismunandi fólki eftir stöðum. Þeir staðir sem Gunnsteinn Helgi hefur tekið þátt í að hanna og opna á síðustu átta árum eru Íslenski barinn við Austurvöll, Uno, Sushi Samba, Apótekið, Public House Gastropub, sem var fyrsti gastro-barinn á Íslandi, Burro Tapas +Steaks & Pablo Discobar, Miami Bar og síðan eru fleiri staðir í bígerð.

Getur þú sagt okkur nánar frá tilurð og hönnun staðarins?
„Okkur eigendunum langaði að feta nýjar slóðir og vera með áherslu á mið- og suðurameríska matargerð. Við fengum til liðs við okkur nokkra framúrskarandi hönnuði, hvern á sínu sviði. Hálfdán Pedersen innanhússhönnuð og á hann heiðurinn af hönnuninni á útliti staðarins, Sigga Odds sem er grafískur hönnuður, til hanna lógó og alla grafík staðarins og Þórð Orra Pétursson, ljósahönnuð og forstöðumann ljósadeildar Borgarleikhússins, til að sjá um ljósahönnun og lýsingu. Bæði Siggi Odds og Þórður Orri voru tilnefndir til verðlauna fyrir þetta verkefni, hönnun staðarins,“ segir Gunnsteinn Helgi.  Gunnsteinn Helgi sagði að það hafi verið vel ígrundað hvað þau hefðu viljað sjá og þau hafi verið með ákveðna hugsjónir. „Þegar kom að hönnun Burro og Pablo Discobar varð hugsjón okkar um útlit staðanna að veruleika í gegnum verk Hálfdáns. Hálfdán lærði í Los Angelse og hefur ferðast mikið um Mexíkó og þær slóðir sem við sækjum okkar helsta innblástur til. Innsýn hans í samfélagið þar, sem nær meira að segja inn í fangaklefa í Mexíkó hefur reynst okkur ómetanleg. Það er fátt, ef eitthvað, sem Hálfdán hefur ekki hæfileika til en hann hefur meðal annars unnið að hönnun fjölda rýma og hannað sett fyrir ýmsar kvikmyndir, auglýsingar og tónlistarmyndbönd. Hugur Hálfdáns virkar á ótrúlegan hátt og virðist hann vera endalaus uppspretta hugmynda svo það varð fljótt ljóst sem varð að hönnun hans og hugmyndavinna tók okkur enn lengra en upphafleg hugsjón okkar hafði farið. Fyrir tilstilli Hálfdáns er því skemmtileg samblanda af gömlu og nýju bæði á Burro og Pablo Discobar og áhersla mun vera lögð á endurnýtingu, lifandi liti, mynstur og á einstaka suðræna upplifun.“

Rétt lýsing fullkomnar útlitið
Staðurinn er hannaður með útlit sem vitnar í suðræn áhrif en með nútímalegu partíívafi. „Til þess að fullkomna útlit Burro og Pablo Discobar, setja punktinn yfir i-ið og byggja upp hárrétta suðræna stemningu fengum við Þórð Orra til að hanna lýsinguna fyrir báða staðina. Hönnun Þórðar varpar ljósi á það að við erum skemmtileg, skrýtin, falleg, forvitnileg og það flott að þú vilt koma aftur og aftur til að skoða og upplifa meira.“

Suðuramerísk menningararfleið höfð að leiðarljósi
Lógó staðanna eru mjög töff og matseðlarnir eru frumlegir í útliti sem og heimasíður staðana sem ná að fanga augað.  „Siggi Odds sér um allt grafískt efni fyrir Burro og Pablo Discobar. Siggi hefur unnið sem grafískur hönnuður og teiknari með fyrirtækjum og einstaklingum alls staðar að úr heiminum og leggur áherslu á ímyndarsköpun vörumerkja í gegnum verk sín. Siggi hafði suðurameríska menningararfleið að leiðarljósi í vinnunni með okkur og dró fram fáguðu og fínu eiginleikana okkar, án þess þó að gleyma því að við erum mjög afslöppuð og skemmtileg líka,“ segir Gunnsteinn Helgi og brosir. „Latin-Ameríka býr yfir óteljandi mismunandi hefðum í myndskreytingu og handverki. Sumar eiga rætur að rekja til Inka-, Maya- og Aztec-þjóðfokkanna fornu. Flest eiga það sameiginlegt að vera sterk, lífleg og lifandi í formgerð og litadýrð og þaðan fékk Siggi Odds innblásturinn við hönnunina. Lógótýpan eða leturgerðin fyrir Burro og Pablo er dregin frá handgerðu leturhefðinni og er mjög undir áhrifum frá útskorna skiltinu sem var á vegi hans.  Lógótýpurnar eru mjög einkennandi og skemmtilega furðulegar og jafnframt gríðarlega eftirminnilegar.

Asninn síkáti og mannvera dansandi í kokteilglasi
Gaman er að geta þess að myndmerki Burro er asninn síkáti teiknaður með sterkum en lifandi formum sem tala við formgerð lógótýpunnar. Notkun á bara einum lit, gullbrúnum, og fín línan gefur merkinu ákveðna fágun. Myndmerki Pablo Discobar er mannvera dansandi í kokteilglasi, byggt á sama formheimi og í sömu lögun og asninn. Mótífð er fjörugt og dimmrauði liturinn vitnar í 70‘s tímabilið en heldur fáguðu yfirbragði. Saman mynda merkin skemmtilega tvennu sem tala vel saman og eru augljóslega tvær hliðar á sama peningi vegna einkennandi sérkenna.

Handverk og myndskreytingar frá Suður-Ameríku
Litirnir á veggjunum, þeir toppa staðinn, segðu okkur aðeins frá litavalinu og hugmyndafræðinni bak við það. „Litapalletta staðanna er nokkuð breið og fengin úr ýmsum áttum úr handverki og myndskreytingum Suður-Ameríku. Hún spannar nánast allan litahringinn en er í heildina mjög hlý og býður upp á marga möguleika.“

Boðið er upp á modern latino tapas-rétti og steikur
Réttirnir ykkar á matseðlinum eru bæði mjög frumlegir og nýstárlegir, getur þú lýst áherslum ykkar í matargerð og framreiðslu? „Á Burro er lögð áhersla á mið- og suðurameríska nútímamatseld og áhrifin eru sótt alla leið frá Argentínu og upp til Mexíkó. Boðið er upp á modern latino tapas-rétti og steikur sem lagt er til að fólk á borðum panti sér saman og deili og á seðlinum er einnig ágætt úrval rétta fyrir grænkera. Mikið er lagt upp úr því að skapa rétta stemningu á staðnum og blandast þar saman fjör og fagmennska með suðuramerískum áherslum.

Einnig erum við með kokteilbarinn á hæðinni fyrir ofan, Pablo Discobar eins og fram hefur komið og er Pablo, litli bróðir Burro, svolítið hallærislegur en alltaf í stuði. Hann sækir áhrif sín einnig til Suður-Ameríku en einnig til diskótímabilsins. Á Pablo færðu klikkaða kokteila og brjálað stuð og þú veist aldrei hvernig kvöldið mun enda. Þjónað er til borðs öll kvöld og hamingjustund er alla daga frá klukkan 16.00 til 18.00.“ Einnig er vert að minnast á það að nýr matseðill leit dagsins ljós í upphafi þessarar viku og nýir og spennandi réttir í boði.“

Ævintýralegar matarupplifanir fyrir alla
Hver er markhópurinn sem þið eruð að höfða til á Burro? „Allra nautnaseggja og sælkera landsins og þeirra sem elska góðan mat og frábæra kokteila í fallegu umhverfi. Það eru auðvitað allir velkomnir á Burro og við erum með stóran hóp fastakúnna en langflestir okkar gesta eru Íslendingar.“ Þið eruð að bjóða upp á skemmtilegar matarupplifanir, ævintýraferðir og stundum viðburði tengda þeim. Eru matarupplifanir vinsælar meðal hópa og fyrirtækja? „Samblanda Burro og Pablo er einstök er gerir staðinn ákjósanlegan kost fyrir smærri og stærri hópa.  Það er hægt að koma í Happy Hour á milli klukkan16.00 og 18.00 á Pablo Discobar, fara síðan með hópinn í matarævintýri á Burro og eftir matinn aftur upp á Pablo í kokteila og djamm fram á nótt, því er hægt að vera inni í sama húsinu frá opnun til lokunar og halda þannig öllum hópnum saman allan tímann frekar en að vera þvælast á milli staða með tilheyrandi veseni.“ Einnig er boðið upp á veisluþjónustu sem er gríðarlega vinsæl og hentar við öll tækifæri. Það er hægt að skoða úrvalið sem í boði er á eftirfarandi síðu: http://www.burro.is/wp-content/uploads/2018/09/burro-veisla-sept2018.pdf

Einn besti kokteilbar landsins
Segðu okkur aðeins frá kokteilunum sem þið eru fræg fyrir að bjóða upp á? „Pablo Discobar var einmitt valinn besti kokteilbar Íslands í fyrra og allir matargestir Burro geta pantað sé kokteila að eigin vali fyrir mat, með matnum eða eftir mat. Pablo er svo heppinn að eiga marga góða að og meðal annars að vera með úrvalslið barþjóna með sér í liði sem sjá um að gera bestu kokteila landsins, en staðurinn tekur sig ekki of alvarlega og snýst fyrst og fremst um skemmtun að allir skemmti sér vel og fái frábæra kokteila frá bestu barþjónum landsins. En eins og nafnið gefur til kynna, Pablo (mið- og suðuramerískt nafn) Discobar (70’s/80’s) þá eru kokteilarnir í sama þema, blanda af áhrifum frá Disco-tímabilinu og Mið- og Suður-Ameríku.“

Stúdíó Birtíngur í samstarfi við Burro Taps + Steaks.

Myndir / Hallur Karlson og Sigurjón Ragnar

 

Töldu veikindi flugfreyja ekki tengjast flugvélunum

Að minnsta kosti þrjár flugfreyjur hjá Icelandair eru óvinnufærar eftir að hafa veikst í flugi í sumar. „Við höfum allar verið með svakalegan þrýsting í höfði, eins og það sé að springa,“ segir flugfreyja hjá Icelandair sem telur eiturgufur í farangursrými orsök alvarlegra veikinda hennar. Fleiri úr sömu áhöfn veiktust.

Sambærilegt mál kom upp árið 2016 þar sem flugliðar kvörtuðu undan veikindum eftir að hafa flogið í tilteknum félagsins. Rannsóknarnefnd flugslysa tók málið til rannsóknar og stendur sú rannsókn yfir.

Ragnar Guðmundsson, rannsakandi hjá Rannsóknarnefnd samgönguslysa, staðfestir að rannsókn sé opin á þessum og fleiri flugatvikum.  Hann segir umrædd tilvik séu ekki skilgreind sem alvarleg flugatvik vegna þess að öryggi flugvélarinnar og flugsins hafi ekki verið stefnt í hættu þar sem ekkert þeirra átti sér stað í flugstjórnarklefanum. Hins vegar séu þetta endurtekin flugatvik sem ástæða þykir að skoða.

„Við höfum látið skoða flugvélar og ýmislegt hefur verið gert en að öðru leyti vil ég ekki tjá mig um opna rannsókn,“ segir Ragnar og bendir á að ekki sé hægt að styðjast við gögn úr flugritum sem gerir málið flóknara.

Töldu veikindin ekki tengjast flugvélunum

Ekki náðist í Guðjón Arngrímsson, upplýsingafulltrúa Icelandair, við vinnslu fréttarinnar en í samtali við Ríkisútvarpið árið 2016 sagði hann að litið væri á málið sem innanhússmál.

Í ágúst 2016 fékk starfsfólk Icelandair tilkynningu í tölvupósti þar sem farið var yfir flugatvikin og aðgerðir félagsins. „Á hverjum degi í sumar eru um 400 áhafnarmeðlimir á flugi hjá Icelandair og því ekki óeðlilegt að einhverjir af öllum þessum fjölda veikist eða finni fyrir vanlíðan,“ segir m.a. í tilkynningunni. Jafnframt er því haldið fram að atvikin séu misjöfn og tengist ekki einstökum flugvélum. Dregin er sú ályktun að tilvikin séu aðskilin fremur en að um sama orsakavald sé að ræða.

Þá eru aðgerðir tæknideildar vegna flugatvikanna útlistaðar en frá því tilkynningin var send út hefur fjöldi svipaðra mála litið dagsins ljós og dæmi er um flugfreyjur sem hafa enn ekki getað snúið aftur til fyrri starfa vegna veikinda í tengslum við umrædd atvik.

Tölvupóstinn í heild má lesa hér að neðan.

 

Vegna tilkynninga um veikindi áhafnarmeðlima um borð

Nýlega hefur orðið töluverð aukning í tilkynningum frá áhafnameðlimum vegna veikinda um borð í flugvélum Icelandair. Icelandair lítur þetta alvarlegum augum enda leggur félagið áherslu á að starfsumhverfi áhafna sé með sem bestum hætti. Þessu bréfi er ætlað að gefa upplýsingar um stöðu þessara mála.

Á hverjum degi í sumar eru um 400 áhafnameðlimir á flugi hjá Icelandair og því ekki óeðlilegt að einhverjir af öllum þessum fjölda veikist eða finni fyrir vanlíðan. Í kjölfar aukins fjölda tilkynninga hefur hvert tilfelli verið skoðað og greint. Haft hefur verið samband við áhafnarmeðlimi til að fá nánari og betri lýsingar. Trúnaðarlæknir Icelandair hefur stýrt leit okkar að heilsufræðilegum orsökum og metið hvert tilfelli fyrir sig.

Í stuttu máli eru atvikin misjöfn og eiga fátt sameiginlegt þegar nánar er skoðað. Þau hafa dreifst á flestar vélar í flugflotanum okkar, tengjast ekki einstökum flugvélum, og hafa komið upp á bæði B-757 og B-767. Oft hafa margar vikur liðið á milli tilkynninga á sömu flugvél.

Tilkynnt einkenni hafa einnig verið af ýmsum toga, en í einhverjum tilvikum virðast vera tengsl á milli einkenna og hreyfingar flugvélarinnar, hitastigs og jafnvel misjafnar hitadreifingar í farþegarými. Önnur tilvik virðast alls ótengd flugvélunum, en tengjast öðrum veikindum eða vanlíðan einstaklinga, þreytu og slíkum þáttum. Áberandi er að þessar veikindatilkynningar koma fremur frá yngra fólki með lágan starfsaldur en þeim sem eru eldri og reyndari.

Þessar breytur gera það að verkum að líklegra er að tilvikin séu aðskilin en að um sama orsakavald sé að ræða. Icelandair hefur samt sem áður lagt mikla vinnu í að greina mögulegar ástæður tilvikanna.

  • Tæknideild Icelandair hefur skoðað viðhald flugvélanna og hefur greining farið í gang eftir hvert atvik fyrir sig. Meðal aðgerða eru hreyflaskipti, parta- og olíuskipti, loftsíuskipti, skoðun á loftstokkum, þrif á loftræstikerfi og loftgæðamælingar á flugi.
  • Icelandair hefur rannsakað og mælt sérstaklega ákveðna þætti, bæði á jörðu niðri, í farþegaflugi og sérstökum mælingarflugum. Meðal annars hefur verið notast við rafrænt „nef“ eða loftgreiningatæki (Aerotracer) og hafa allar mælingar komið eðlilega út. Þeir þættir sem hafa verið mældir eru loftþrýstingur, súrefnishlutfall, rakastig, hitastig, hljóðstyrkur, lofthraði og dreifing ræstilofts, hröðun, örveru- og myglupróf, lyktarpróf (Aerotracer), og ýmis önnur efni, s.s. CO (Carbon Monoxide), CO2 (Carbon Dioxide), SO2 (Sulfur Dioxide), O3 (Ozone).
  • Trúnaðarlæknir Icelandair hefur farið yfir niðurstöður úr læknisskoðun og blóðprufum hjá þeim áhafnarmeðlimum sem farið hafa í slíka rannsókn strax eftir flug. Öll þau sýni hafa komið eðlilega út.
  • Þá hefur Rannsóknarnefnd Samgönguslysa (RNSA) verið fengin til liðs við okkur. Icelandair fagnar aðkomu RNSA og aðstoðar nefndina eftir fremsta megni. RNSA hefur heimild til ýmissa aðgerða og nefndin m.a. sent áhafnarmeðlimi í blóðprufur, læknisskoðanir og tekið flugritagögn til greiningar en RNSA vinnur sjálfstæða rannsókn á þeim atvikum sem hún hefur afskipti af.
  • Icelandair hefur undanfarið skoðað sérstakan loftsýnitökubúnað sem yrði staðsettur um borð og hægt væri að nota ef fleiri en einn áhafnarmeðlimur finnur fyrir vanlíðan.

Veikist áhafnarmeðlimur á flugi er mikilvægt að senda inn skýrslu um atvikið í gegnum SMS360. Ítarleg lýsing áhafnameðlima skiptir miklu máli þar sem þessar upplýsingar geta auðveldað greiningu á atvikum.

Uppsöfnuð óánægja finnur sér farveg

Mannlíf/Hákon

Háværar deilur innan Sjálfstæðisflokksins í Vestmannaeyjum um röðun á framboðslista urðu til þess að flokkurinn klofnaði skömmu fyrir kosningar. H-listinn spratt fram og náði ásamt E-listanum að fella meirihluta Sjálfstæðisflokksins, þótt ekki hafi munað nema fimm atkvæðum. Skyndilega stóð Elliði Vignisson á krossgötum. Bæjarstjórastóllinn var farinn og í fyrsta skipti í 14 ár var hann ekki lengur bæjarfulltrúi í Vestmannaeyjum. Elliði var horfinn úr forystu Vestmannaeyjabæjar og fram undan voru stórar persónulegar ákvarðanir.

Þótt deilurnar innan flokksins hafi opinberlega snúist um hvaða leið ætti að fara við röðun á framboðslista telur Elliði að dýpri ástæður hafi legið þar að baki. „Það var enginn málefnalegur ágreiningur en á móti kemur að við vorum búin að vera við stjórnvölinn í tólf ár og höfðum gengið þannig fram að auðvitað höfum við valdið truflunum í viðtækjum einhverra á þessum tíma. Við fundum það mjög að ákveðnir hópar voru að leita sér að farvegi fyrir persónulega óánægju frekar en eitthvað annað. Það var kannski byggt hús of nálægt einum, aðrir töldu sig ekki hafa fengið nægileg verkefni í útboðum á vegum Vestmannaeyjabæjar, fólk hafði ekki fengið vinnu sem það sótti um hjá bænum eða jafnvel misst vinnuna og taldi sig þess vegna eiga eitthvað sökótt við bæjarfélagið og svo framvegis. Þessi óánægja fann sér farveg í þessum svokallaða H-lista sem náði því sem til þurfti. Þótt Sjálfstæðisflokkurinn sé eftir sem áður með eitt mesta fylgi á landinu í Eyjum þá dugði fylgi H-listans til að fella meirihlutann og það verður ekki af þeim tekið.“

Deilurnar mögnuðust enn frekar eftir að niðurstaða kosninganna varð ljós og beindist reiði sjálfstæðismanna fyrst og fremst að Páli Magnússyni, þingmanni flokksins í kjördæminu. Hann var sakaður um að hafa stutt framboð H-listans á bakvið tjöldin og þannig unnið markvisst gegn eigin flokki í bænum. Fór svo að Páll var rekinn úr fulltrúaráði flokksins í Vestmanneyjum vegna „fordæmalausrar framgöngu“ hans í kosningunum, eins og það var orðað í ályktun. Elliði er fljótur til svara þegar hann er spurður út í framgöngu Páls. „Ég ætla ekki að tjá mig um Pál Magnússon í þessu viðtali. Ég ætla ekki að falla í þá gryfju að ræða þetta út frá einstökum persónum. Það er til sálfræðihugtak sem heitir stóra eignunarvillan og hún er kölluð það af því að hún er svo algeng. Hún felst í því að ætla persónum of stórt hlutverk. Oftast nær liggur skýringin í einhverju öðru en einstökum persónum. Við eignum einstökum persónum árangur og eignum einstökum persónum líka árangursleysi þegar allt aðrir þættir geta legið að baki. Þannig að mér finnst það hvorki sanngjarnt gagnvart mér né Páli Magnússyni að ég fari að ræða um meintar persónulegar deilur á milli okkar.“

Rætt er ítarlega við Elliða í Mannlífi sem kom út í gær.

Mynd / Hákon Davíð Björnsson

Þakkar guði fyrir að hafa fundið barnið sitt

Mýmörg dæmi eru um að börn yfirgefi frístundaheimili án þess að umsjónarfólk veiti því eftirtekt. Foreldrar segja að þjónustan veiti falskt öryggi.

Í síðustu viku var auglýst eftir tveimur drengjum, sjö og átta ára, sem ekkert hafði spurst til í nokkrar klukkustundir. Annar drengurinn hafði yfirgefið frístundaheimilið í skólanum sínum án leyfis og var foreldri gert viðvart þegar hvarfið uppgötvaðist. Drengirnir fundust, fimm klukkustundum síðar.
Helgi Grímsson, sviðsstjóri skóla- og frístundasviðs Reykjavíkur, segir að lögð sé áhersla á að hafa góða yfirsýn yfir barnahópinn. Byggðir hafi verið upp verkferlar í kringum skil skóladags og upphaf frístundastarfs, innan frístundatímans, frá frístund og á íþróttaæfingar og svo um heimferðir. „Vissulega koma upp tilvik þar sem barn skilar sér ekki í frístund og eru skýringarnar margvíslegar. Í þessum fáu tilvikum er sjaldgæft að barnið finnist ekki innan stundar. Í öllum tilvikum er staðan rýnd, hvað fór úrskeiðis og hvernig megi koma í veg fyrir að þetta endurtaki sig,“ segir Helgi þegar hann er spurður út í stöðu þessa mála hjá Reykjavíkurborg.

„Enginn af starfsmönnunum hafði gert sér grein fyrir hvarfi barnsins, hvað þá hversu langur tími hafði liðið frá því barnið fór.“

Sími um hálsinn öruggari en vistun
Miklar umræður spunnust um börn á frístundaheimilum í kjölfar þessarar fréttar og í ljós kom að foreldrar í Kópavogi eru síður en svo ánægðir með þjónustu bæjarfélagsins í frístundamálum. „Þegar dóttir mín var í fyrsta bekk og vistuð á frístundaheimili eftir skóla kom það margoft fyrir að ég fékk símtöl frá nágrannakonu minni sem var í fæðingarorlofi, þess efnis að dóttir mín væri heima hjá henni með dóttur hennar, hvort það væri með mínu leyfi,“ segir móðir í Kópavogi. „Mér brá auðvitað því ég taldi mig vera að borga fyrir þjónustu sem reyndist vera falskt öryggi. Ef þessi móðir hefði ekki verið heima veit ég ekki hvar barnið mitt hefði endað, síma- og lyklalaust og enginn starfsmaður sem veitti því neina eftirtekt hvort hún væri á staðnum eða ekki. Auk þess að fá endurtekin símtöl frá móðurinni í fæðingarorlofinu kom líka fyrir að ég mætti í skólann til að sækja dóttur mína sem var þá einfaldlega ekki á staðnum. Enginn af starfsmönnunum hafði gert sér grein fyrir hvarfi barnsins, hvað þá hversu langur tími hafði liðið frá því barnið fór. Þá höfðu vinkonurnar ýmist farið í ævintýraferðir, heimsótt vinkonur sem voru eftirlitslausar heima eða einfaldlega gleymt stað og stund í útivist og ekki verið sóttar inn af eftirlitsaðilum. Það sem olli mér hvað mestum vonbrigðum voru viðbrögð starfsfólksins sem reyndi ekki einu sinni að þykjast kannast við nafnið á barninu mínu. Það tekst illa að manna þessar stöður og því er hægt að ráða hvern sem er til þess að sinna því sem ætti að vera ábyrgðarhlutverk en er síður en svo litið slíkum augum.“

Konan segir að lítið hafi lagast þrátt fyrir ítrekaðar kvartanir og á endanum hafi hún skráð barnið úr frístundaheimilinu. „Í framhaldinu fékk barnið takkasíma og var skráð úr dægradvöl, ég áleit öryggi hennar vera meira heimafyrir en þarna. Sömu sögu er að segja af minnst sex vinkonum hennar sem ég veit um.“

Önnur móðir í Kópavogi sem Mannlíf ræddi við hafði svipaða sögu að segja. Eitt sinn hafi hún farið að sækja barn sitt á frístundaheimili en þá hafi það ekki verið á staðnum og enginn vitað hvar það var niðurkomið. Eftir smáspjall hafi komið í ljós að barnið hafi í nokkur skipti ekki mætt í frístund eftir skóla en enginn hafi haft fyrir því að láta foreldrana vita. „Ég varð svo hissa og svo reið. Svona myndi aldrei gerast í heimalandi mínu, Litháen, þar sem öryggi barna er alltaf í fyrsta sæti og faglært fólk sem hugsar um börnin. Ég þakka bara guði fyrir að hafa fundið barnið mitt heima hjá bekkjarsystkini eftir stutta leit,“ segir hún en vert er að taka fram að ekkert af foreldrunum sem Mannlíf ræddi við vildi koma fram undir nafni að ótta við að það kynni að bitna á börnum þeirra eða yngri systkinum sem ættu jafnvel eftir að þurfa á þjónustunni að halda.

„Við þekkjum dæmi þess að börn hafi farið heim án þess að láta vita af sér.“

Sigríður Björg Tómasdóttir, almannatengill Kópavogsbæjar, segist ekki vita til þess að börn hafi farið ítrekað úr frístundaheimilum bæjarins án þess að umsjónarfólk veitti því eftirtekt eða léti foreldra viðkomandi vita. „Við þekkjum dæmi þess að börn hafi farið heim án þess að láta vita af sér. En það er samkvæmt okkar vitneskju afar sjaldgæft og litið mjög alvarlegum augum. Frístundaheimili grunnskóla í Kópavogi starfa samkvæmt stefnumörkun sem samþykkt var fyrir nokkrum árum. Einnig hefur verið gefin út Handbók frístundastarfs sem er ætlað að vera leiðbeinandi og upplýsandi fyrir forstöðumenn og starfsfólk. Þá hafa öryggisferlar verið sérstaklega útfærðir en í þeim er sérstaklega fjallað um hvernig bregðast á við ef barn mætir ekki eða týnist,“ segir Sigríður Björg.

Leyndardómar súkkulaðiverksmiðjunnar OMNOM

Við litum inn í súkkulaðiverksmiðjuna OMNOM sem staðsett er við Hólmaslóð 2 í Reykjavík í glæsilegum húsakynnum. Þar hittum við stofnandann og einn af eigendunum súkkulaðiverksmiðjunnar, Kjartan Gíslason, sem bauð okkur í draumaferðina um verksmiðjuna þar sem leyndarmál súkkulaðsins eru geymd. Súkkulaðiilmurinn sem tók á móti okkur var ómótstæðilegur.

Hvernig kviknaði áhuginn á súkkulaðigerðinni?
„Omnom-ævintýrið byrjaði af einskærri forvitni um hvernig súkkulaði væri gert. Ég reifaði þessa hugmynd við æskuvin minn, Óskar Þórðarson, og saman fórum við að pæla í þessu. Við erum báðir miklir sælkerar og finnst gaman að fara út að borða og velta fyrir okkur mat. Við fórum í það að kanna mögleika á tólum og tækjum til súkkulaðigerðar og eftir nokkrar misgóðar tilraunir vorum við komnir með eitthvað sem hægt er að kalla súkkulaði. Þetta ferli var svo spennandi og skemmtilegt að við vildum fara í framleiðslu og fengum til liðs okkur hönnuð sem á heiðurinn af hönnun umbúðanna. Þegar það var tilbúið sáum við að við vorum með eitthvað sérstakt í höndunum.“

Getur þú sagt okkur aðeins frá tilurð súkkulaðigerðarinnar og framkvæmdinni?
„Við byrjuðum heima hjá mér að rista og mala baunir og búa til súkkulaði, þangað til við fundum yfirgefna bensínstöð á Seltjarnarnesi. Þar héldum við starfinu áfram þangað til fyrsta varan okkar var tilbúin. Það fóru margar næturvinnustundir og margar kaffikönnur í að koma framleiðslunni af stað. Í dag starfa yfir tuttugu manns hjá Omnom. Við verðum með okkar eigin verslun og bjóðum upp á súkkulaðitúr á hverjum einasta degi. Við finnum fyrir miklum áhuga á Omnom og súkkulaðinu okkar.“

Hvað er erfiðast við að framleiða gott súkkulaði?
„Að bíða eftir því að súkkulaðiblanda verði tilbúin. Súkkulaðigerð er tímafrek og stundum þurfum við að bíða í þrjá daga þar til að uppskrift er tilbúin.“

„Við bjóðum upp á súkkulaðitúra á hverjum einasta degi. Við finnum fyrir miklum áhuga á hvernig súkkulaði er búið til, eins og í víngerð og ostagerð.“

Hvernig fer vöruþróunin fram?
„Ég fæ að leika mér í tilraunaeldhúsinu eins og snarbrjálaður vísindamaður í kvikmyndunum. Nei, en að öllu gamni slepptu er það stundum þannig. Black n Burnt Barley varð til þannig. Það var upprunalega hvítt súkkulaði sem varð svart því við prófuðum að bæta brenndu byggi út í súkkulaðið. Fyrir jólin í fyrra efndum við til keppni innanhúss fyrir vetrarsúkkulaðið okkar. Það var mjög skemmtileg tilraun og allir fengu að leggja sitt af mörkum. Allir sem starfa hérna fá að búa til sitt eigið súkkulaði. Það hafa margar mjög góðar súkkulaðitegundir lent inn á borði hjá mér í þessum tilraunum – reyndar líka mjög sérstakt súkkulaði.“

Umbúðirnar eru einstaklega vel útfærðar og lógóið hefur vakið athygli, hver er hönnuðurinn og hvaðan kemur innblásturinn?
„André Visage hönnuður bjó til lógóið og hönnun umbúðanna. Við vildum að útlit umbúðanna væri í anda súkkulaðisins. Litríkt og skemmtilegt og útkoman var sú sem við þekkjum í dag. Í dag er Veronica Filippin hönnuðurinn okkar. Allt sem að hún gerir er gull.“

Bjóðið þið upp á heimsóknir og kynningar í súkkulaðiverksmiðjunni að hætti Kalla, það er segja að fyrirmynd „Charlie and the Chocolate Factory“ ?
„Heldur betur og erum með Oompa Loompas í fullu starfi,“ segir Kjartan hlæjandi. „Við bjóðum upp á súkkulaðitúra á hverjum einasta degi. Við finnum fyrir miklum áhuga á hvernig súkkulaði er búið til, eins og í víngerð og ostagerð. Við höldum einnig allskyns skemmtileg námskeið, eins og í til dæmis súkkulaði- og bjórpörun. Næsti viðburður okkar er haldinn í samstarfi við Reykjavík Roasters þar sem við ætlum að bjóða upp á súkkulaði- og kaffipörun. Það verður mjög skemmtileg stund sem haldin verður 6. október næstkomandi og ég hvet sem flesta til þess að skrá sig.“

Framtíðin er björt hjá fyrirtækinu og það blómstrar og dafnar vel. Eru einhver ný framtíðarplön?
„Helsta markmið okkar er að halda áfram að búa til hágæða súkkulaði og gera lífið skemmtilegra fyrir fólk.“

Stúdíó Birtíngur í samstarfi við Mini.

Mynd / Hákon Davíð Björnsson

 

Afslappaður og skemmtilegur staður í hjarta Hafnarfjarðar

Á dögunum heimsóttum við veitingaparið Kristjönu Þuru Bergþórsdóttur og Einar Hjaltason sem eiga og reka veitingahúsið VON mathús&bar í Hafnarfirði. Staðurinn hefur heillað gesti sína upp úr skónum fyrir ljúffenga rétti, hlýlegar móttökur og afslappað andrúmsloft og góða þjónustu. Okkur lék forvitni að fræðast frekar um tilurð staðarins og um lífsstíl þeirra hjóna.

Getið þið sagt okkur aðeins frá tilurð veitingastaðarins?
„Við erum bæði uppalin í miðborgarveitingageiranum og höfðum lengi pælt í því að opna okkar eigin rekstur. Árið 2015 vorum flutt aftur í Hafnarfjörð og komin með lítið barn, orðin þreytt á því að keyra í vinnu frá Hafnarfirði til Reykjavíkur á hverjum degi. Á svipuðum tíma á árinu vorum við að koma úr fæðingarorlofi og okkur fannst vanta meiri uppbyggingu á þessu svæði sem við bjuggum á, í Suðurbænum í Hafnarfirði. Við duttum inn á þetta húsnæði í gamla Drafnarhúsinu við Strandgötu og það var verið gera húsið upp og breyta því í nokkrar einingar. Það þurfti ekki mikla sannfæringu um að kýla á þetta verkefni.  Vissulega var þetta áhættusamt, þar sem enginn hafði opnað svona veitingahús í mjög langan tíma í bænum, en með góðri aðstoð frá fjölskyldunni ákváðum við að kýla á þetta.“

Hvaðan kemur hugmyndin að nafninu, það er einkar fallegt, VON mathús&bar?
„Við vildum hafa nafnið fallegt, stutt og hnitmiðað. Eins vildum við hafa akkeri í lógóinu líka, þannig kom nafnið VON upp í einum góðum bíltúr. Mathús og bar kom því okkur fannst það lýsa okkur persónulega og okkar rekstri best. Við vildum ekki hafa þetta of formlegt veitingahús, heldur frekar meira út í „gastropub“ eins og þekkist víða, meðal annars í London. Þar sem þú kemur inn í frekar afslappað og skemmtilegt umhverfi, en getur fengið vandaðan mat og drykki og skemmtilega þjónustu, án þess að stíga formlega inn á „fine dining“-stað.“

Starfsánægja og gæði fram yfir hraða nútímasamfélagsins
„Við erum með lokað á sunnudögum og mánudögum. Fyrir mörgum Íslendingum er það enn þá mjög óvenjulegt, en við gerum það einfaldega því það hentar okkur og okkar rekstri best. Þetta tíðkast víða erlendis og eru sífellt fleiri staðir í Reykjavík byrjaðir að hafa lokað á mánudögum. Ég er mjög ánægð með þessa þróun. Hraðinn í nútímasamfélagi er mikill og mín skoðun er sú, að það þarf ekkert alltaf allt að vera opið alltaf. Við erum lítill en góður vinnustaður og mikilvægt að allir fái áreitislausa hvíld. Við hugsum þetta meira til langtíma, heldur en að allir brenni út af álagi.“

Þið standið fyrir viðburðum í tengslum við matar- og drykkjarupplifun á VON mathús&bar, eru nýir viðburðir á döfinni?
„Við erum með sanngjarnan og breytilegan hádegisseðil þriðjudaga til föstudaga  frá klukkan 11.30 til 14.00. Fastur kvöldseðil frá klukkan 17.30, sem tekur reglulegum breytingum. Í október ætlum við að vinna samhliða Tommasi og verðum með villibráðarhelgi og ítalska helgi, með sérmatseðli og drykkjum. Við erum miklir aðdáendur Ítalíu og einnig finnst okkur gaman að þjónusta kúnnahópinn okkar með nýjum og skemmtilegum leiðum. Sem dæmi má nefna að helgina 19. til 20. október verðum við með ítalska matarveislu sem parað verður með sérvöldum Tommasi-vínum.

Við erum mjög virk á samfélagsmiðlum, Facebook og Instagram (vonmathus), og þar verður hægt að fylgjast með og öllu okkar daglega amstri.“

Heimasíða: www.vonmathus.is

https://www.facebook.com/vonmathus/

Stúdíó Birtíngur í samstarfi við VON mathús&bar.

Mynd / Heiðdís Guðbjörg Gunnarsdóttir

 

Burgerinn Bearnaise er hástökkvarinn

Okkur lék forvitni að vita nánar hvers konar veitingastaður Burger-inn í Hafnarfirði er og hvað hann hefur upp á að bjóða. Staðurinn er við Flatahraun 5a og við höfum heyrt að þarna sé að finna einn besta borgara bæjarins. Við hittum feðgana sem þar ráða ríkjum en Örn Arnarson og sonur hans, Brynjar Arnarson, eru eigendur staðarins og rekstraraðilar.

Getið þið sagt okkur aðeins frá veitingastaðnum Burger-inn, bæði umgjörð og þjónustu sem þið bjóðið upp á?
„Staðurinn opnaði árið 2011, þann 17. júní á þjóðhátíðardegi Íslendinga. Hann er innréttaður í sixties-stíl og myndskreyttur með eldri limósínum og fallegum hlutum frá gamla tímanum. Við getum tekið um sjötíu og fimm gesti í sæti og aðkoman að staðnum er mjög góð. Nóg er af fríum bílastæðum. Við erum einnig með tvær bílalúgur og má með sanni segja að flestar pantanir séu sóttar. Það er mjög vinsælt að panta matinn og taka með heim.“

Þið leggið metnað í að vera með gott hráefni í hamborgarana ykkar. Hvaðan kemur hráefnið og hver er hugmyndin að baki umgjörðinni og matseðlinum?
„Burger-inn notar aðeins fyrsta flokks hráefni frá birgjum á Stór-Reykjavíkursvæðinu. Við erum til dæmis með 20% fitusprengt nautahakk í hamborgurunum okkar frá Kjötsmiðjunni, frönskurnar Cavendish frá Ekran, beikon, skinku og pepperoni frá Ali og margt fleira frá ýmsum góðum aðilum.“

Hugið þið að umhverfinu í ykkar matargerð og rekstri?
„Við hugum eins vel að náttúrunni og okkur er unnt bæði í matargerð og umbúðum fyrir mat sem viðskiptavinurinn sækir til okkar. Einnig flokkum við sorpið og erum með sorteringu á úrkasti.“

Hverjar eru helstu áherslur ykkar og markmið með rekstrinum?
„Okkar áherslur og markmið er að hafa meira gaman í dag en í gær og fá öll fallegu brosin sem okkur eru send.“

Eru einhverjir réttir vinsælli en aðrir?
Matseðillinn allur fer ótrúlega jafnt. Við getum þó sagt að Burgerinn Bearnaise sé hástökkvarinn en með ekta smjörbearnaise-sósu sem er gríðarlega vinsæl. Af grillinu bjóðum við upp á sérmeðhöndlaðar lambakótilettur og bearnaise-sósu sem val í meðlæti. Við bjóðum bara upp á alvörubearnaise-sósu eins og Oddur H. Odds frændi vill hafa hana,“ segir Örn og brosir. Hægt er að skoða matseðlinn á heimasíðu staðarins: www.burgerinn.is. Frá opnun hefur verið boðið upp á fría súpu með öllum máltíðum í sal með birgðir endast, fyrstur kemur þá fær.

Burger-inn er vinsæll viðkomustaður

„Gaman er að segja frá því að viðskiptavinir okkar eru bæði úr nærsveit og úr dreifbýlinu, á öllum aldri. Stórfjölskyldur leggja gjarnan leið sína hingað inn í Burger-inn og njóta þess að eiga hér saman skemmtilega fjölskyldustund.“

Bjóðið þið oft upp á tilboð fyrir fjölskyldur og hópa?
„Við erum ávallt með ýmis tilboð fyrir hópa sem eru mjög vinsæl. Mikið er um að hingað komi viðskiptavinir og haldi upp á afmæli. Afmælishóparnir eru einstaklega skemmtilegir.“

Mynd / Heiðdís Guðbjörg Gunnarsdóttir
Stúdíó Birtíngur í samstarfi við Burger-inn.

 

Dreymir um að eignast jörð með lítilli lax- og silungaveiðiá

Ólafur Br. Finnbogason og er löggiltur fasteignasali á Mikluborg fasteignasölu. Hann er giftur Dögg Hjaltalín, bókaútgefanda og eiganda Sölku bókaútgáfu, og eiga þau þrjár dætur, Agnesi 19 ára, Freyju 8 ára og Rán 2 ára. Þau búa í tvílyftu timburhúsi á Bráðræðisholtinu í Reykjavík ásamt læðunni Regínu og fjórum hænum.

Hvað heillar þig mest við starfið?
„Það sem skemmtilegast er við starfið er að vera þátttakandi í einni stærstu fjárhagslegu ákvörðun fjölskyldna á lífsleiðinni sem fylgir oftast mikil gleði og spenningur hjá fólki. Einnig finnst mér gaman að tala og umgangast annað fólk og er það stór hluti af starfinu. Fjölbreytni er einnig mikil og situr maður blessunarlega ekki nema hluta úr deginum við tölvuna.“

Geturðu lýst hefðbundnum vinnudegi hjá þér?
„Ég mæti oftast um klukkan 8.30 á morgnana og erum við á Mikluborg með verðmatsfundi tvo morgna á viku. Síðan hefst dagurinn á að fylgja eftir fyrirspurnum dagsins á undan og bæði skoða nýjar eignir sem og sýna. Upp úr klukkan 16.00 fer ég af skrifstofunni og er með sýningar og skoðanir fram að kvöldmat. Eftir kvöldmat tekur tölvupóstur og gerð söluyfirlita og lýsinga á eignum. Dagurinn er oft langur og er lítið frí um helgar en starfið skemmtilegt í alla staði.“

Hvað er það sem þér finnst gera hús að heimili?
„Heimili mitt væri ekki spennandi ef ég væri ekki giftur svona glaðlyndri og fallegri konu og ætti ekki svona lífsglöð og fjörug börn. Einnig erum við heppin að vera vinarík svo að heimili mitt ef oft fullt af gestum sem gefa lífinu gleði og tilgang. Svo að heimili mitt er þar sem vinir og mínir nánustu eru í kringum mig.“

Geturðu líst þínum stíl?
„Minn stíll er nú ekki flókinn, geng oftast í því sem Dögg kaupir á mig.“

Áttu þinn uppáhaldsarkitekt?
„Er ekki mikið að spá í arkitektúr en auðvitað eru margir í gegnum vinnuna sem maður hefur kynnst á verkum þeirra og finnst mér til að mynda Valdimar Harðarson hjá Ask arkitektum vera sérlega „praktístur“ og þau fjölbýlishús sem ég hef selt fyrir hann hafa alltaf hitt í mark hjá þeim notendum sem þau eiga við hvort sem það er fyrir ungt fólk sem er að hefja búskap eða heldra fólk sem vill minnka við sig. Einnig hönnunin hans stílhrein og tímalaus.“

Áttu þinn uppáhaldshönnuð?
„Ólafur Ágúst Jensson, innanhússarkitekt og ljósahönnuður, ber af enda einn af mínum betri vinum og hefur lýst upp allt umhverfi sitt þegar hann er á svæðinu.“

Hvað hefur þig alltaf dreymt um að eignast en ekki eignast hingað til?
„Jörð með lítilli lax- og silungaveiðiá ásamt góðum rjúpna- og gæsalendum.“

Uppáhaldsliturinn þinn?
„Enginn.“

Hvar líður þér best?
„Mér líður alltaf best heima með fjölskyldunni og vinum og ekki skemmir ef það er á veiðilendum hvort sem það er skot- eða stangaveiði.“

Hvað heillar þig mest við haustið? Er eitthvað sem þú vilt bæta við í garðinn eða inn á heimilið þegar haustið gengur í garð?
„Þá hefst skotveiðitímabilið og ég legg veiðistönginni. Og ég vil helst bæta hangandi villibráð á pallinn og rjúpum í frystinn.“
Svalasti veitingastaðurinn á Íslandi í dag?

„Eldhúsborðið heima með góðum vinum og ekki skemmir ef Viktor Örn Andrésson eða Hinrik Lárusson ofurkokkar séu búnir að elda ofan í okkur og vini okkar.“

Er einhver byggingarstíll sem heillar þig meira en annar?
„Ég er hrifinn af gömlum húsum, hvort sem þau eru úr timbri eins og heimili mitt sem er gamall leikskóli sem var við Rauðhóla eða gamalt steinhús í sveitinni.“
„Að lifa lífinu lifandi er … að vera með vinum sínum og fjölskyldu og gera það sem mann dreymir um áður en maður missir heilsu eða getu til þess. Maður veit ekki hvað gerist á morgun.“

Mynd / Aldís Pálsdóttir

 

Framandi og ferskur hönnuður

Norðmaðurinn Hallgeir Homstvedt er óhræddur við að fara nýjar leiðir í hönnun sinni.

Hinn norski Hallgeir Homstvedt lærði upphaflega margmiðlun í Ósló en lét draum sinn rætast ári síðar þegar hann söðlaði um og fluttist til Ástralíu til þess að stunda nám við Univeristy of Newcastle. Árið 2006 útskrifaðist hann sem iðnhönnuður með afbragðs árangri og hóf strax störf hjá norska frumkvöðlafyrirtækinu, Norway Says. Það var síðan þremur árum seinna eða árið 2009 sem Norðmaðurinn opnaði sína eigin hönnunarstofu, Hallgeir Homstvedt Design, sem sérhæfir sig í verkefnum á sviði innanhúss-, húsgagna- og vöruhönnunar.

Verkefni hönnuðarins eru fjölbreytt en með sköpun sinni vill Hallgeir Homstvedt ávallt ná fram áþreifanleika og gagnvirkni á sama tíma og hann skapar forvitni hjá áhorfandanum. Í gegnum tíðina hefur Norðmaðurinn tekið þátt í stórum hönnunarsýningum víðs vegar um heiminn en hann hefur meðal annars vakið verðskuldaða athygli á sýningum í stórborgunum London, Mílanó, New York og Tókýó.

„… með sköpun sinni vill Hallgeir Homstvedt ávallt ná fram áþreifanleika og gagnvirkni á sama tíma og hann skapar forvitni hjá áhorfandanum.“

MUUTO OG MEIRA

Hallgeir Homstvedt er óhræddur við að prófa nýja hluti. Hann hefur bæði starfað fyrir stór alþjóðleg fyrirtæki eins og Muuto, Hem, L.K. Hjella og Established & Sons en er þó óhræddur við að starfa með lítt þekktari hönnuðum. Það virðist engu skipta hvert verkefnið er, hugur Hallgeir Homstvedt virðist alltaf hafa ótal hugmyndir og í hvert sinn sem hann byrjar kemur eitthvað allt öðruvísi en hann hefur áður gert. Með fjölbreytni og hugmyndauðgi sinni hefur hann unnið til fjölda verðlauna á sviði hönnunar og hvergi nærri hættur.

Hjólabrettakappi, hefðardama og hippi

Sóley Kristjánsdóttir er þekkt fyrir flottan fatastíl.

Sóley Kristjánsdóttir þeytir skífum í hjáverkum en hún starfar sem vörumerkjastjóri hjá Ölgerðinni. Sóley hefur lengi vakið eftirtekt fyrir frumlegt og skemmtilegt fataval en hún segist alltaf hafa haft gaman af tísku. Svo er hún líka með hænur í bakgarðinum.

„Mér finnst mjög skemmtilegt að klæða mig en stíllinn minn er afar fjölbreyttur, vinnufélagarnir hafa haft orð á því. Stundum er maður klæddur þannig að það vantar bara hjólabrettið, stundum er ég eins og hefðarfrú og stundum tekur hippinn völdin. Það fer allt eftir veðri og vindum en það er sem betur fer frjálslegur klæðnaður leyfður í Ölgerðinni. Efst á óskalistanum þessa stundina eru skór en ég er ekki mikil skókona og er eiginlega alltaf í sömu skónum. Lágbotna að sjálfsögðu þar sem ég lít á mig sem 180 cm risa.

Sóley segir hettupeysu klárlega vera skyldueign.

Aðspurð hvað allar konur verði að eiga í fataskápnum segir Sóley flotta og þægilega hettupeysu klárlega vera skyldueign enda séu þær klassík. „Ég er hætt að gera stórinnkaup í lágvöruverðsverslunum. Ég vil hugsa um umhverfið og kjör fólksins sem framleiðir þessi ódýru föt. Svo á ég mjög mikið af fötum og reyni frekar að finna nýjar samsetningar. Ég versla helst í Aftur en þar er mikil fegurð í framleiðslunni og allir fá greitt fyrir sína vinnu. Aftur hefur verið með endurvinnslustefnu alveg frá upphafi, í sennilega 20 ár, og endurvinnur efni úr eldri fötum. Mjög flott föt sem eldast ótrúlega vel,“ segir Sóley.

Myndir / Heiðdís Guðbjörg Gunnarsdóttir

Tóku víkingaklappið á Ryder-bikarnum

Stemmningin var mikil á Ryder-bikarnum í Frakklandi.

Áhorfendur á Ryder-bikarnum í Frakklandi tóku víkingaklappið svokallaða. Golfmótið var haldið um helgina þar sem 12 bestu leikmenn Evrópu og 12 bestu leikmanna Bandaríkjanna kepptu um Ryder-bikarinn. Stemmningin var greinilega mikil á mótinu ef marka má myndbandið sem birtist á vef Daily Mail en þar má sjá áhorfendur taka víkingaklappið í fagnaðarlátum.

Meðfylgjandi er myndbandið sem birtist á vef Daily Mail.

Þess má geta að þetta er í 42 sinn sem Ryder-bikarinn fer fram og evrópska liðið hreppti bikarinn.

Primera Air er gjaldþrota

Flugfélagið Primera Air er gjaldþrota og hefur öllum ferðum félagsins frá og með morgundeginum verið aflýst. Þetta kemur fram í tilkynningu á vefsíðu flugfélagsins.

„Fyrir hönd Primera Air viljum við þakka ykkur fyrir hollustuna. Við kveðjum ykkur á þessum sorgardegi,“ segir í yfirlýsingu félagsins.

Farþegum sem áttu bókað flug með félaginu er ráðlagt að fylgjast með fréttum á heimasíðu félagsins næstu daga sem og að hafa samband við söluaðila. Jafnframt er tekið fram að hvorki símtölum né skriflegum fyrirspurnum verður svarað.

Primera Air hefur átt undir högg að sækja undanfarið. Félagið hefur komið illa út úr þjónustukönnunum og á dögnum samþykkti Flugfreyjufélag Íslands vinnustöðvun um borð í vélum félagsins vegna deilna um kjara flugliða.

Á vefnum aviation24.be segir að Airbus A321 flugvél félagsins hafi verið kyrrsett á Stanstead flugvelli í London vegna ógreiddra gjalda.

Elísabet nálgast markið í 400 kílómetra hlaupi

Hlauparinn Elísabet Margeirsdóttir er að nálgast markið í Ultra Gobi-hlaupinu en um 400 kílómetra hlaup í Gobi-eyðimörkinni er að ræða þar sem þátttakendur hafa 150 klukkustundur til að ljúka við vegalengdina. Elísabet á 20 kílómetra eftir.

„Hún er á svakalegri siglingu. Hún er í eyðimerkurlandslagi, sandur og rok. Það bítur ekkert á hana. Hún er þó komin með blöðru sem er að valda sársauka. En hún lætur það ekki á sig fá. Er ótrúlega einbeitt og er komin á tímastöð CP29/369km. Það styttist í markið en það getur margt gerst á næstu 30km. Hún þarf á öllum góðum straumum að halda og allar kveðjur hjálpa henni með hvert skref í átt að markinu. Klukkan í Gobi er 18:00 og það fer að koma myrkur. Hún var spurð hvaða lag ætti að spila í markinu. Einhverjar tillögur?“ segir í stöðuuppfærslu sem birtist á Facebook-síðu hennar.

Elísabet komst í símasamband fyrr í dag og birti nokkrar myndir á Facebook. Þar kom fram að henni líður vel og náði að hvílast vel fyrir lokasprettinn.

Mynd / Af Facebook-síðu Elísabetar

„Gáfulegasta sem ég hef gert í lífinu“

|
|

Telma Rut Einarsdóttir segir þátttökuna í björgunarsveitum hafa kennt sér mikið og gefið sér aukið sjálfstæði.

Flugneminn Telma Rut Einarsdóttir hefur starfað með Björgunarsveit Hafnarfjarðar í níu ár eða frá því hún byrjaði á nýliðanámskeiði aðeins 17 ára gömul. Hún mælir með þátttöku í björgunarsveitum fyrir alla sem hafa áhuga á útivist og góðum félagsskap.

„Þegar ég var yngri voru foreldrar mínir duglegir að fara með mig í útilegur og fjallaferðir. Það má næstum segja að ég hafi alist upp í útilegum og á fjöllum, ég er ekki nema sex vikna gömul á fyrstu myndinni sem var tekin af mér uppi á jökli. Þannig að þetta blundaði alltaf óbeint í mér,“ svarar Telma þegar hún er spurð hvers vegna hún ákvað að fara í björgunarsveitastarf.

„Mér var svakalega vel tekið þegar ég byrjaði en það er eitt af því sem mér finnst best við björgunarsveitirnar, öllum er tekið eins og þeir eru. Það er mjög breiður hópur af fólki sem starfar í björgunarsveitunum og allir geta unnið saman sem er alveg ótrúlega flott að sjá. Þetta bara virkar einhvern veginn þegar á reynir.

Nýliðanámskeiðið var að meðaltali aðra hverja helgi auk nýliðakvölda á miðvikudögum þar sem voru ýmis stutt námskeið, fjallgöngur, spottakvöld, klifur eða annað sem okkur datt í hug.“

Ómetanlegur félagsskapur

Telma segist á þessum tíma hafa lært mikið um útivist, hvernig eigi að haga sér á fjöllum, hvernig eigi að bjarga sér og öðrum og gera hlutina með lágmarksáhættu. „Þetta hefur einnig gefið mér aukið sjálfstæði, getu til að fara lengra og gera meira en ég hefði annars gert. Og svo ég verði nú aðeins væmin þá er félagsskapurinn ómetanlegur og ég hef kynnst mínum bestu og traustustu vinum í björgunarsveitinni. Fólkið þarna er alltaf til staðar, alltaf til í að hjálpa þegar eitthvað bjátar á og ég hef fundið mjög sterkt hvað allir standa þétt við bakið á manni. Þessi andlegi stuðningur og eining þurfa að vera til staðar til að skapa góða björgunarsveit, en eru alls ekki sjálfgefin.“

Félagsstarfið í björgunarsveitunum er fjölbreytt. Til dæmis eru björgunarleikarnir haldnir annað hvert ár samhliða landsþingi. „Þar er keppt í ýmsum greinum, eins og böruburði í gegnum þrautabraut, sigi, rústabjörgun, rötun, tappa í dekk og draga bíla, ökuleikni, pönnukökubakstri, björgunarsundi og fleira í þeim dúr. Í fyrra skiptið sem ég keppti settum við stelpurnar saman lið sem við kölluðum Team Barbie, svona upp á grínið, en svo vantaði okkur einn upp á til að fylla liðið og enduðum á að fá „Ken“ með okkur í lið. Svo tók ég síðast þátt með öðru liði sem endaði í þriðja sæti á leikunum, en það eru yfir tuttugu lið alls staðar af landinu sem keppa sín á milli. Mæli sérstaklega með þessu fyrir nýliða, að setja saman lið og sjá hvað þið getið,“ segir Telma.

Enginn fer í útkall nema treysta sér til

Verkefnin sem farið er í eru mismunandi og miserfið. „Við förum í hvert verkefni fyrir sig og leysum eins vel og við getum. Ef við gerum rétta hluti líður okkur yfirleitt vel þótt útkallið geti verið erfitt. Ég á vini í sveitinni sem hafa lent í erfiðum útköllum, til dæmis að sækja látið fólk og það tekur auðvitað á. En þar kemur liðsheildin inn og við pössum okkar fólk og höfum aðgang að sálfræðingi ef á þarf að halda til að vinna úr svona málum. Svo er líka vert að taka fram að við erum sjálfboðaliðar og þar af leiðandi ákveðum við sjálf hvort við förum í útkall eða ekki. Það er enginn settur í útkall nema hann treysti sér til og telji sig hafa getu og kunnáttu til að takast á við það. Í hvert skipti sem við fáum útkall með SMS-skilaboðum þarf fyrst að hugsa: Treysti ég mér í þetta verkefni og hef ég kunnáttu til að hjálpa í þessum aðstæðum? Ef svarið er já, er hægt að hlaupa af stað.“

„Ef við gerum rétta hluti líður okkur yfirleitt vel þótt útkallið geti verið erfitt.“

Björgunarsveitirnar um land allt hafa verið að halda kynningarfundi fyrir nýliða þar sem hægt er að fá frekari upplýsingar. „Ég mæli hiklaust með því að mæta og sjá hvort þetta sé eitthvað sem þú hefur áhuga á. Þetta er allavega eitthvað það gáfulegasta sem ég hef gert í lífinu.“

Myndir / Úr einkasafni

Hélt að það yrði meira átak að fara frá Eyjum

Elliði Vignisson. Mynd / Hákon Davíð Björnsson

„Ég hef aldrei upplifað þetta áður og þetta var mjög áhugaverður tími fyrir mig persónulega. Vissulega svolítið flókinn því ég hélt alltaf að ræturnar væru orðnar það djúpar að það yrði mikið átak að fara frá Vestmannaeyjum, það hefur ekki orðið enn þá,“ segir Elliði Vignisson sem nýverið tók við stöðu bæjarstjóra í Ölfusi eftir að hafa verið bæjarstjóri í Vestmannaeyjum í 12 ár. Elliði segir að vissulega hafi hann verið farinn að huga að breytingum enda kominn niður í fimmta sæti á lista eftir að hafa leitt hann til stærsta sigurs flokksins í bæjarfélögum af þessari stærð í sögu flokksins.   Flokkurinn fékk 73 prósent atkvæða og fimm af sjö bæjarfulltrúum í kosningunum 2014 og ekkert benti til annars en að Vestmannaeyjar yrðu áfram slíkt vígi Sjálfstæðisflokksins.

En háværar deilur innan flokksins um röðun á framboðslista urðu til þess að flokkurinn klofnaði. H-listinn spratt fram og náði ásamt E-listanum að fella meirihluta Sjálfstæðisflokksins, þótt ekki hafi munað nema fimm atkvæðum. Skyndilega stóð Elliði á krossgötum. Bæjarstjórastóllinn var farinn og í fyrsta skipti í 14 ár var hann ekki lengur bæjarfulltrúi í Vestmannaeyjum. Elliði var horfinn úr forystu Vestmannaeyjabæjar og fram undan voru stórar persónulegar ákvarðanir.

 

Uppsöfnuð óánægja finnur sér farveg

Þótt deilurnar innan flokksins hafi opinberlega snúist um hvaða leið ætti að fara við röðun á framboðslista telur Elliði að dýpri ástæður hafi legið þar að baki. „Það var enginn málefnalegur ágreiningur en á móti kemur að við vorum búin að vera við stjórnvölinn í tólf ár og höfðum gengið þannig fram að auðvitað höfum við valdið truflunum í viðtækjum einhverra á þessum tíma. Við fundum það mjög að ákveðnir hópar voru að leita sér að farvegi fyrir persónulega óánægju frekar en eitthvað annað. Það var kannski byggt hús of nálægt einum, aðrir töldu sig ekki hafa fengið nægileg verkefni í útboðum á vegum Vestmannaeyjabæjar, fólk hafði ekki fengið vinnu sem það sótti um hjá bænum eða jafnvel misst vinnuna og taldi sig þess vegna eiga eitthvað sökótt við bæjarfélagið og svo framvegis. Þessi óánægja fann sér farveg í þessum svokallaða H-lista sem náði því sem til þurfti. Þótt Sjálfstæðisflokkurinn sé eftir sem áður með eitt mesta fylgi á landinu í Eyjum þá dugði fylgi H-listans til að fella meirihlutann og það verður ekki af þeim tekið.“

Elliði segir að einmitt sá hópur sem talaði um að það skorti upp á lýðræðisleg vinnubrögð innan flokksins hafi sjálfur átt erfitt með að sætta sig við lýðræðislega niðurstöðu. Kosið hafi verið um þrjár mismunandi leiðir og fékk tillagan um uppstillingu meirihluta en féll eigi að síður þar sem tvo þriðju hluta þurfti til. Þá hafi verið kosið um prófkjör, sem þeir sem síðar stofnuðu H-listann studdu, og fékk sú tillaga minnihluta atkvæða. „Þá voru greidd atkvæði um svokallaða röðun og hún fékk langmesta fylgið. Þetta var bara lýðræðisleg niðurstaða og þessi hópur fór þá að gera því skóna að það hefði eitthvað verið að hræra með atkvæði og beita fólk þvingunum, það var alltaf fráleit umræða. En niðurstaðan var þessi, að innan fulltrúaráðs Sjálfstæðisflokksins sem stjórnar framboðsmálum flokksins, var ekki vilji fyrir prófkjöri. Ekki einu sinni einfaldur meirihluti. Á því féll sú hugmynd. Sjálfur talaði ég fyrir leiðtogaprófkjöri. Það fékk eitt atkvæði, bara mitt atkvæði. Þannig að ekki var vilji til að fara í það og svo greiddi fólk bara atkvæði samkvæmt sinni sannfæringu og það varð niðurstaðan.“

 

Talar ekki um Pál Magnússon

Deilurnar mögnuðust enn frekar eftir að niðurstaða kosninganna varð ljós og beindist reiði sjálfstæðismanna fyrst og fremst að Páli Magnússyni, þingmanni flokksins í kjördæminu. Hann var sakaður um að hafa stutt framboð H-listans á bakvið tjöldin og þannig unnið markvisst gegn eigin flokki í bænum. Fór svo að Páll var rekinn úr fulltrúaráði flokksins í Vestmanneyjum vegna „fordæmalausrar framgöngu“ hans í kosningunum, eins og það var orðað í ályktun. Elliði er fljótur til svara þegar hann er spurður út í framgöngu Páls. „Ég ætla ekki að tjá mig um Pál Magnússon í þessu viðtali. Ég ætla ekki að falla í þá gryfju að ræða þetta út frá einstökum persónum. Það er til sálfræðihugtak sem heitir stóra eignunarvillan og hún er kölluð það af því að hún er svo algeng. Hún felst í því að ætla persónum of stórt hlutverk. Oftast nær liggur skýringin í einhverju öðru en einstökum persónum. Við eignum einstökum persónum árangur og eignum einstökum persónum líka árangursleysi þegar allt aðrir þættir geta legið að baki. Þannig að mér finnst það hvorki sanngjarnt gagnvart mér né Páli Magnússyni að ég fari að ræða um meintar persónulegar deilur á milli okkar.“

Elliði bætir við: „Svo er það annað hvernig þingmenn ganga fram. Það er annað en persóna þingmannsins. Þetta er í eina skiptið, þótt ég sé búinn að vera á hátt í á annan áratug í pólitík og fylgst vel með þá man ég aldrei eftir því áður, að það léki vafi á því hvort að þingmaður myndi styðja framboð síns flokks. Það er ekkert óeðlilegt að fólk hafi velt vöngum yfir því.“

 

Var staðráðinn í að hætta í pólitík

Elliði er keppnismaður mikill og segist hann fyrst og fremst hafa orðið tapsár þegar niðurstaðan lá fyrir. „Alveg sama í hverju maður er, þá er maður í hlutunum til þess að vinna.“ Engu að síður var hann kominn í þá stöðu að vera atvinnulaus og þurfti, eftir 12 ár á bæjarstjórastóli, að taka ákvörðun um framtíðina. „Það kom mér svolítið á óvart að ég upplifði svona … mér liggur nærri að kalla það frelsi. Allt í einu fannst mér ég standa frammi fyrir gríðarlegum tækifærum. Fyrstu vikurnar var ég mjög einbeittur að skipta úr pólitíkinni, úr stjórnmálum, yfir í einkageirann. Hann togaði fast í mig.“

Elliði átti í ýmiskonar samtölum við fólk um starf og stöður í einkageiranum og var hann kominn að því að stökkva á áhugavert tækifæri þegar pólitíkin togaði aftur í hann. „Ég fór að fá áhugaverð símtöl frá fulltrúum víða um land um hvort ég hefði áhuga á að taka að mér bæjar- og sveitarstjórastöður. Þau voru af öllum stærðum og gerðum. Það varð til þess að ég fór að skoða þennan möguleika. Þrátt fyrir að vera hálfpartinn búinn að lofa mér að verða ekki fimmtugur án þess að hafa unnið að marki í einkageiranum, þá stend ég núna frammi fyrir því að verða fimmtugur á næsta ári og vera búinn að vera opinber starfsmaður nánast alla ævi. Það var ekki það sem ég ætlaði mér.“ Elliði er því, rétt eins og margir af helstu málsvörum einkaframtaksins á Íslandi, á mála hjá hinu opinbera. „Það vill nú oft verða að sumum okkar er fórnað handan víglínu til þess að reyna að hafa áhrif,“ segir hann og hlær.

Það kom Elliða þægilega á óvart hversu auðvelt það reyndist að flytja frá Eyjum. Það hjálpaði til að börnin eru uppkomin og því ekki jafnerfitt að rífa upp ræturnar. En það gætti þó innri togstreitu. „Það helltist yfir mig um tíma ákveðinn valkvíði. Skyndilega varð ég kvíðinn og andstuttur og hugsaði, hvað ef ég vel rangt? Ég er með öll þessi tækifæri fyrir framan mig, ég get farið inn í mjög spennandi tækifæri í einkageiranum, ég get valið um mjög ólík og mismunandi tækifæri innan sveitarfélagageirans. Hver verður líðan mín og hvaða stefnu tekur líf mitt ef ég vel rangt?“

 

Sestur að í Elliðahöfn

Ekki er að heyra á Elliða að hann hafi tekið ranga ákvörðun þegar hann þekktist boð um að gerast bæjarstjóri í Ölfusi, víðfemu tveggja þúsund manna sveitarfélagi á Suðurlandi þar sem Þorlákshöfn er stærsti þéttbýliskjarninn. Kannski viðeigandi í ljósi þess að Þorlákshöfn hét áður Elliðahöfn og gantast Elliði með að „leiðrétta þau mistök“ í framtíðinni. „Ég er með málfrelsi og tillögufrelsi í bæjarstjórn og aldrei að vita að ég mani mig upp í að flytja þá tillögu á ný.“

Það er margt við Ölfus sem heillar Elliða og nefnir hann sterkt samfélag með hátt þjónustustig og mikil tækifæri til atvinnuuppbyggingar. „Ég er líka landsbyggðarmaður í eðli mínu. Ég er mjög hrifinn af hugmyndum þeirra sem voru að taka hér við og treysti mér vel til að vinna með þeim. Ég treysti þeim líka mjög vel til að vinna með mér sem er oft flóknara heldur en fyrir mig að vinna með öðrum. Ég er orðinn nógu gamall til að vita hvernig ég er. Ég fer hratt yfir og get verið mjög fylginn mér og gengið hart fram.“

Aðlögunin hefur gengið vel. Fjölskyldan hefur komið sér fyrir í Ölfusinu er þó enn sem komið er með annan fótinn í Eyjum þar sem eiginkona hans, Bertha Ingibjörg Johansen, rekur fataverslun og dóttir þeirra, Bjartey Bríet, sækir nám í Framhaldsskólanum í Vestmannaeyjum. Sonur þeirra, Nökkvi Dan, spilar handbolta með norska úrvalsdeildarliðinu Arendal og stundar samhliða því nám í stærðfræði við Háskóla Íslands. „Það tekur einhvern tíma fyrir Berthu og Bjartey að losa sig fullkomlega frá sínum skuldbindingum þannig að þær eru dálítið á víxl hér í Ölfusinu og í Eyjum. Það gengur bara ljómandi vel að sníða þetta saman og þær eru sem betur fer strax orðið mikið hér enda líður okkur alveg ofsalega vel hérna enda þetta er gott samfélag og nóg um að vera. Ég reyni síðan að vera duglegur að heimsækja Eyjar, sérstaklega til þess að að rækta vini og heimsækja fjölskylduna.“

 

Stórhuga Ölfusingar

Elliði fer á flug þegar talið berst að atvinnuuppbyggingu í sveitarfélaginu. Mýgrútur hugmynda er á teikniborðinu og er bæjarstjórinn bjartsýnn fyrir hönd sveitarfélagsins. Fyrst nefnir hann orkuna en innan marka sveitarfélagsins er að finna stærsta jarðorkusvæði landsins sem og einhverjar mestu vatnsbirgðir landsins í jörðu. „Íbúar hér segja gjarnan að ef þú tekur stórt skrúfjárn og rekur ofan í jörðina, þá færðu upp heitt vatn. En ef þú rekur lífið skrúfjárn ofan í jörðina færðu kalt vatn. Það er algjörlega einstakt, jafnvel á heimsvísu, að hafa aðgang að öllu þessu kalda og heita vatni.“ Sér Elliði fyrir sér mikla framþróun í orkubúskap þar sem áhersla verður lögð í fullvinnslu orkunnar. „Ekki bara fullvinnslu orkunnar, heldur fullvinnslu þeirra efna sem fylgja varmanum. Það er til dæmis komnir upp mjög öflugir hátækniiðngarðar á Hellisheiði og þar ætla menn að nota ýmsar lofttegundir, til dæmis til þörungaræktar og ýmsar fleiri hugmyndir. Þar ætlum við okkur stóra hluti.“

En vatnið verður ekki eingöngu notað til orkuöflunar því hvorki fleiri né færri en þrjú baðlón á stærð við Bláa lónið eru á teikniborðinu. Grey line og Heklubyggð ehf. stefna að því að hefja framkvæmdir við eitt slíkt við skíðaskálann í Hveradölum og þá eru tvö önnur baðlón í skipulagsferli hjá sveitarfélaginu en að þeim standa innlendir og erlendir fjárfestar. „Ferðaþjónustan er gríðarlega sterk hérna því nánast hver einasti útlendingur sem hingað kemur fer í gegnum sveitarfélagið í gegnum þjóðveg 1. Reykjadalurinn tekur við 250-300 þúsund ferðamönnum á ári og það eru uppi stórhuga áform um að nýta sérstöðu þessa svæðis.“

 

Hef aldrei minnst á Kínverja

Á undanförnum árum hafa verið uppi hugmyndir um að byggja upp stórskipahöfn í Þorlákshöfn og hafa þingmenn kjördæmisins reglulega lagt fram tillögur þess efnis. Á dögunum greindi Morgunblaðið svo frá því að forsvarsmenn sveitarfélagsins ættu í viðræðum við kínverska aðila um milljarða fjárfestingu á hafnarsvæðinu. Elliði segir áhuga vissulega fyrir hendi, bæði meðal innlendra og erlendra fjárfesta. „Ég hef aldrei minnst á Kínverja, það hafa blaðamenn gert og þeir gera það á eigin ábyrgð. Við höfum aldrei minnst á neitt þjóðerni í þessu samhengi enda skiptir það ekki öllu. Við finnum bara áhuga einkaaðila til að koma að þessu verkefni með okkur og við byrjum þar, á því að þreifa fyrir okkur hversu víðtækur þessi áhugi er og hverjir eru með hugmyndir sem að samrýmast best þessu samfélagi.“

Elliði telur að stórskipahöfn í Þorlákshöfn komi til með að gjörbreyta landslaginu í vöruflutningum til og frá landinu. Sú þróun sé nú þegar hafin eftir að vöruflutningaskipið Mykines hóf að sigla til hafnarinnar og styttir þar með siglingaleiðina frá höfuðborgarsvæðinu til Evrópu um allt að sólarhring. „Til dæmis fer stór hluti af öllum bílum sem koma inn til landsins í gegnum höfnina hérna, hér er líka mikill ferskflutningur og þetta er bara toppurinn á ísjakanum ef höfnin fær að þróast áfram.“

Elliði sér til dæmis fyrir sér að framkvæmdirnar gætu fylgt svipuðu rekstrarmódeli og Hvalfjarðargöngin, það er að fjárfestarnir standi straum af framkvæmdunum og eftir ákveðinn tíma, þegar fjárfestingin hefur borgað sig, eignast sveitarfélagið höfnina á ný. „Það er ekkert lögmál að sveitarfélög eða hið opinbera reki hafnir. Þetta er bara atvinnutæki. Er það eðlilegt fyrirkomulag að þegar sveitarfélög fara í að nýta atvinnutækifæri og styrkja innviði eins og hafnir, að þá sé í raun og veru verið að leggja rekstur grunnskóla og leikskóla undir? Ef það gengur illa með fjárfestingu við höfnina að þá þurfi að stytta opnunartíma á bókasafni eða hækka gjaldskrárnar í sundlaugunum?“

 

Oft verið hundósáttur við flokkinn

Talið berst nú að Sjálfstæðisflokknum þar sem Elliði hefur alið manninn frá því hann hóf afskipti af stjórnmálum. Hann hefur verið áberandi í starfi flokksins og ekki hikað við að segja sínar skoðanir umbúðalaust þótt þær kunni að stuða fólk, jafnvel eigin flokksmenn. „Ég hef mikinn áhuga á Sjálfstæðisflokknum og ég styð hann en ekki óháð því hvað hann gerir. Ég hef alla tíð haldið með ÍBV, Chelsea og Utah Jazz en það er alveg óháð því hvað þau gera. Þetta eru bara lið sem ég valdi mér að fylgja. Ég get kvartað yfir árangrinum og fundist að það eigi að skipta ákveðnum leikmanni inn á eða út af en ég held alltaf með mínu liði. Skuldbinding mín við Sjálfstæðisflokkinn er ekki þannig. Ég styð Sjálfstæðisflokkinn með ráðum og dáð og vinn fyrir hann á meðan ég hef þá trú að þetta sé það stjórnmálaafl sem er líklegast til að vinna hugsjónum mínum framgang. Að þessu sögðu, þá er ég tilbúinn til að vinna áfram með Sjálfstæðisflokknum eins og ég hef gert síðustu 20 árin og ekki séð eftir einni mínútu sem hefur farið í það. En oft hef ég orðið hundósáttur við flokkinn og finnst hann í sumum þáttum þurfa að fara að hugsa sinn gang.“

Þar horfir Elliði til hinna klassísku frelsismála þar sem honum finnst flokkurinn ekki ganga nægilega vasklega fram. „Það er lykilatriði fyrir Sjálfstæðisflokkinn í dag, að láta af forræðishyggju og ganga fastar fram í innleiðingu á hvers konar frelsi. Og frelsismálin þurfa ekki alltaf að vera stærstu efnahagslegu mál þjóðarinnar.

Eitt grundvallarmál er t.d. að ríkið dragi sig í hlé í af neytendamarkaði. Að það hætti afskiptum á sölu á vörum svo sem ilmvatni, Tobleron og saltpillum í nafni ISAVIA. Svo ekki sé nú minnst á hið sjálfsagða frelsi til að kaupa bjór og vín eins og hverja aðra neytendavöru. Af hverju er frelsi í rekstri fjölmiðla ekki meira? Af hverju þurfa einkareknir fjölmiðlar að glíma á hverjum einasta degi við ríkisbákn? Af hverju hagar ríkið málum sínum þannig að þeir eru búnir að taka sér leyfi að byrja að prenta dagblað og rukka alla sem eru með bréfalúgu, rétt eins og þeir senda út útvarp og rukka alla sem mögulega geta haft viðtæki í gegnum nefskatt. Það er ekkert frelsi í þessu. Ég vil geta valið hvort ég versla við fjölmiðil eða ekki. Á sama hátt þarf ríkið líka að láta sem mest af inngripum í atvinnulífið.  Í hvert skipti sem umræða sem þessi kemur upp þá hljómar alltaf eitthvert bergmál í samfélaginu: „Er þetta nú stærsta málið? Væri ekki nær að ræða fátækt?“ Hugtakið frelsi er svo mikilvægt fyrir okkur öll í okkar daglega lífi og þess vegna eigum við ekki að láta hrekja okkur út í horn í þessari umræðu.“

Elliði vill meina að þetta hafi ekkert að gera með þá staðreynd að Sjálfstæðisflokkurinn hafi verið í samstarfi við „ófrjálslyndari“ flokka. Sjálfstæðisflokkurinn hafi verið í samstarfi með öllum flokkum og ekkert í þessa átt hafi verið áorkað. „Því miður er það sem gerist að þegar þingmenn verða ráðherrar, þá verða þeir svo miklir embættismenn. Þetta á ekki við um einn flokk umfram aðra. Þeir fara að hugsa eins og framkvæmdastjórar sem er gott og blessað en þeir verða að standa fyrir eitthvað pólitískt. Ég er ekki að tala fyrir útópískri frjálshyggju, heldur þann sjálfsagða rétt að t.d. skíra barnið þitt því nafni sem þú telur best hæfa og eigir það ekki undir einhverri ríkisnefnd. Sjálfstæðisflokkurinn vill vera trúr þessu en honum hættir eins og öllum öðrum flokkum til þess að fara út úr þessu.“

 

Hefur ekki áhuga á þingmennsku

Fyrir hverjar þingkosningar sprettur nafn Elliða upp í tengslum við mögulegt framboð fyrir Sjálfstæðisflokkinn. Hann hefur hins vegar aldrei látið tilleiðast þrátt fyrir góða möguleika, enda Sjálfstæðisflokkurinn gríðarlega sterkur í kjördæminu og sjálfur á Elliði sterkt bakland í Eyjum og víðar í kjördæminu. Elliði segist einfaldlega ekki hafa haft áhuga á þingmennsku. „Ég hef aldrei útilokað það en áhugi minn hefur aldrei legið í þessa átt. Mér hefur fundist mörgum sveitarstjórnarmönnum sem fara inn á þing ekki líða neitt sérlega vel þar. Sérstaklega þegar menn hafa verið bæjar- og sveitarstjórar, að koma inn á þing og sjá hlutina gerast á þeim hraða sem þar er, það er svolítið erfitt fyrir fólk sem er kannski búið að vera í tugi ára í þannig umhverfi að ef þú vilt að eitthvað gerist á morgun, þá hefurðu raunhæfa möguleika á að það gerist á morgun. Þú getur strax byrjað að hafa áhrif.“

Fyrir þingmenn er þetta erfiðara, segir Elliði, og fólk er gjarnt á að gera ósanngjarnar kröfur til þeirra. Sjálfur segist Elliði hafa verið í þeim hópi. „Fólk vill að þingmennirnir reddi málum. Reddi hjúkrunardagheimili fyrir veika ömmu, reddi brú yfir fljót og reddi námsbókum fyrir þá sem hafa ekki efni á þeim og svo framvegis. Þingmenn eru löggjafinn, þeir hafa mjög takmörkuð úrræði þegar að þessu kemur. Við höfum langtum meiri úrræði hvað þetta varðar í sveitarstjórn. Þannig að ég hef hingað til ekki stefnt inn á Alþingi og geri það ekki í dag.

Myndir / Hákon Dagur

„Vakti með mér gleði, sorg og reiði“

Þær bækur sem höfðu mest áhrif á Steinunni Stefánsdóttur.

Steinunn Stefánsdóttir, þýðandi, blaðamaður og einn höfunda bókarinnar Þjáningarfrelsið – Óreiða hugsjóna og hagsmuna í heimi fjölmiðla, er mikill fagurkeri og unnandi góðra bókmennta. Mannlíf kom því ekki að tómum kofa þegar það fór þess á leit við Steinunni að hún nefndi bækurnar sem hafa haft mest áhrif á hana.

Sjálfstætt fólk

„Ég nefni þá bók vegna þess að ég hef lesið hana oftast af öllum bókum. Ég er alls ekki týpan sem les uppáhaldsbókina einu sinni á ári, þvert á móti finnst mér ég eiga svo margt ólesið að ég geti alls ekki eytt tíma í svoleiðis. Sjálfstætt fólk las ég oft vegna þess að ég kenndi hana í Kvennaskólanum tvo vetur fyrir mörgum árum og las bókina líklega fimm eða sex sinnum á því tímabili. Sagan vakti með mér gleði, sorg og reiði, til skiptis eða allt í senn, og alltaf átti ég jafnerfitt með að fara í gegnum kennslustundina með sögulokunum ógrátandi.“

Rigning í nóvember

„Auður Ava Ólafsdóttir er einn af mínum uppáhaldshöfundum. Rigning í nóvember og Afleggjarinn eru í mínum huga systurbækur og ég á erfitt með að gera upp á milli þeirra. Í báðum er bæði ytra og innra ferðalag sem fléttast saman og gengur upp í magnaðri lestrarupplifun en einhvern veginn situr Rigning í nóvember enn fastar í mér en Aflegggjarinn.“

de

„Þessi bók er eftir danska rithöfundinn Helle Helle og á það sameiginlegt með Auði Övu í mínu lífi að ég bíð eftir bókum þeirra. Þetta er nýjasta bók hennar og kom út á þessu ári. Helle Helle er afar mínímalískur höfundur, skrifar sögur sem eru hægar og fágaðar á yfirborðinu en undir niðri ólgar svo miklu meiri saga en sú sem sögð er. Bækur Helle Helle sem ég hef lesið fyrir mörgum árum eru enn lifandi hluti af lífi mínu en ég ætla samt að nefna þessa síðustu, de, því ég er ekki frá því að mér finnist að í henni gangi einhvern veginn allt upp.“

Flugliðar Icelandair á sjúkrahús eftir flug

Flugliðar, flugfreyjur og flugþjónar Icelandair flugvélar sem kom frá Edmonton í Kanada í gærmorgun fóru á sjúkrahús eftir flugið vegna óþæginda, höfuðverks og þreytueinkenna. Umrædd flugvél var send í ítarlega skoðun og eftir það fór hún í flug síðdegis í gær.

Skert loftflæði í flugvélinni er talin líklegasta ástæða fyrir því að flugliðar fundu fyrir óþægindum og fóru á sjúkrahús eftir að vélin lenti, samkvæmt samstali RÚV við Jens Þórðarson framkvæmdastjóra rekstrarsviðs Icelandair. Jens segir að farið hafi verið yfir loftræstikerfi vélarinnar og skipt um síur.

Dularfull veikindi rannsökuð

Mannlíf hefur í vikunni fjallað um dularfull veikindi sem hafa herjað á flugliða Icelandair, en að minnsta kosti þrjár flugfreyjur hjá Icelandair eru óvinnufærar eftir að hafa veikst í flugi í sumar. „Við höfum allar verið með svakalegan þrýsting í höfði, eins og það sé að springa,“ segir flugfreyja hjá Icelandair sem telur eiturgufur í farangursrými orsök alvarlegra veikinda hennar. Fleiri úr sömu áhöfn veiktust.

Þetta er ekki í fyrsta sinn sem umræða skapast um dularfull veikindi flugliða Icelandair. Sambærilegt mál kom upp árið 2016 þar sem flugliðar kvörtuðu undan veikindum eftir að hafa flogið í tilteknum félagsins. Rannsóknarnefnd flugslysa tók málið til rannsóknar og stendur sú rannsókn yfir.

Þegar loddarar banka

Mynd / Utanríkisráðuneytið

Leiðari Tvær samantektir voru birtar á vef stjórnarráðsins á miðvikudaginn. Önnur þeirra er skrifuð af háskólaprófessor sem kemst að þeirri niðurstöðu að allir bestu vinir hans (þó aðallega einn sem nefndur er 163 sinnum á nafn á 180 blaðsíðum) eru frábærir og flekklausir menn þrátt fyrir að nær öll opinber gögn hafi sýnt fram á annað. Hinir raunverulegu skúrkar voru ýmist útlendingar eða óvinir hins óskeikula. Fyrir þessa mjög svo fyrirsjáanlegu niðurstöðu borgaði ríkissjóður 10 milljónir.

Öllu athyglisverðari er samantekt Alþjóðagjaldeyrissjóðsins á stöðu íslensks efnahagslífs. Þar er sérstaklega varað við því að „[ó]vissa tengd samningaviðræðum um útgöngu Bretlands úr Evrópusambandinu eykur líkurnar á veikari útflutningseftirspurn frá einum af stærstu mörkuðum Íslands og gæti flækt frekar fiskveiðisamvinnu á Norður-Atlantshafi“.  Með öðrum orðum, Brexit er ekki bara meiri háttar vesen fyrir Bretland. Það er líka vesen fyrir Ísland þótt einstaka stjórnmálamenn hafi þóst sjá mikil tækifæri fyrir Ísland af því að það þjónaði þeirra pólitískum hagsmunum.

Brexit er nefnilega skólabókardæmi um hversu alvarlegar afleiðingar það getur haft þegar lýðskrumarar, drifnir áfram af eigin hagsmunum, fá að vaða uppi óáreittir. Kosningabarátta þeirra var rekin áfram af lygum og hræðsluáróðri ásamt handfylli af tærum rasisma. Allt frá því niðurstaðan lá fyrir hefur lygavefurinn verið rakinn og helstu riddarar Brexit-liða hafa ýmist látið sig hverfa eða eru önnum kafnir við að hagnast á öllu saman eða hella olíu á eldinn sem þeir kveiktu sjálfir á meðan þeirra eigið slökkvilið reynir að veikum mætti að slökkva eldinn.

Næst þegar loddarinn (oftar en ekki vel tanaður í dýrum jakkafötum) bankar upp á og reynir að sannfæra þig um að allt sem aflaga fer er vondum útlendingum eða ímynduðum óvinum að kenna, spurðu þig að því hvað hann hefur upp úr krafsinu.

Bretland mun ganga út úr ESB þann 29. mars á næsta ári. Breska ríkisstjórnin hefur gert þá kröfu að fá að halda áfram að njóta flestra þeirra kosta ESB-aðildar án þess þó að vera í sambandinu. Hún vill skilnað en eftir sem áður óheftan aðgang að heimilinu – heimtar að sofa í hjónarúminu, borða úr ísskápnum og horfa á sjónvarpið. Eðlilega er ESB ekki tilbúið að fallast á þessar kröfur.

Líkurnar á engum samningi aukast þess vegna með hverjum deginum. Alþjóðleg fyrirtæki í Bretlandi eru farin að gera áætlanir um að flytja sig á evrusvæðið, breska ríkisstjórnin er farin að hamstra lyf, flugsamgöngur gætu raskast verulega og enginn veit hvað verður um landamærin við Norður-Írland eða þær milljónir Evrópubúa sem búa í Bretlandi. Þeirra á meðal eru allnokkrir Íslendingar.

Eins og AGS bendir á gætu neikvæð áhrif á viðskipti við Ísland orðið umtalsverð og ekki má heldur gleyma því að mjög stór hluti þeirra erlendu ferðamanna sem heimsækja Ísland eru Bretar. Brexit er afleitt fyrir alla og þess vegna er mikilvægt að við drögum lærdóm af öllu þessu klúðri. Næst þegar loddarinn (oftar en ekki vel tanaður í dýrum jakkafötum) bankar upp á og reynir að sannfæra þig um að allt sem aflaga fer er vondum útlendingum eða ímynduðum óvinum að kenna, spurðu þig að því hvað hann hefur upp úr krafsinu. Oftast er svarið pólitískur frami eða vafasamir viðskiptagjörningar. Einstaka sinnum 10 milljónir.

Miklu meira en bara Eurovision

Hin goðsagnakennda pólska rokkhljómsveit Kult heldur stórtónleika í Eldborg í Hörpu á sunnudag.

„Það eru um 16.000 pólskir innflytjendur á Íslandi. Okkur fannst kominn tími til að þeir fengju að berja Kult augum á tónleikum í nýja heimalandinu og gætu um leið sýnt íslenskum vinum og ættingjum um hvað pólskt rokk snýst. Íslendingar þurfa að heyra alvörugæðarokk frá Póllandi. Pólsk tónlist er svo miklu meira en það sem þið heyrið í Eurovision,“ segir plötusnúðurinn og tónleikahaldarinn Pjøtr Wasylik, sem stendur fyrir tónleikum sveitarinnar Kult í Eldborg í Hörpu næstkomandi sunnudag.

Tónleikarnir eru þeir fyrstu sem Kult heldur á Íslandi en Pjøtr segir sveitina vera goðsögn í heimalandi sínu. „Kult er hornsteinninn í pólskri dægurmenningu og hefur blásið andagift í brjóst Pólverja í yfir þrjátíu ár. Lög og textar sveitarinnar hafa til dæmis hjálpað pólsku þjóðinni að takast á við róstusama tíma á 9. og 10. áratugnum og eiga því sinn sess í þjóðfélagssögu landsins. Forsprakki sveitarinnar, Kazik Staszewski, er eins konar páfi rokksins í Póllandi og hefur enn mikil áhrif á unga tónlistarmenn þrátt fyrir að yfir þrjátíu ár séu liðin frá því að hann steig fyrst fram á sjónarsviðið,“ útskýrir Pjøtr. „Og þar sem stór hópur Pólverja býr nú á Íslandi er mikil eftirvænting í loftinu fyrir því að fá þessar rokkgoðsagnir í heimsókn.“

Beðinn um að lýsa tónlistinni sem sveitin leikur segir Pjøtr að það sé svolítið erfitt að staðsetja hana nákvæmlega en hún sé einskonar sambland af rokki, jassi og pönki og undir vissum áhrifum frá Sex Pistols, Elvis Presley og tónlist frá Balkan-skaga. Hann segir að ef að líkum lætur megi búast við kraftmiklum tónleikum á sunnudag og hann er þess fullviss að íslenskir, ekki síður en pólskir, rokkaaðdáendur muni skemmta sér á þeim. „Það að textarnir eru á pólsku ætti ekki að skipta neinu máli því tónlist er alþjóðlegt tungumál, eins og sagt er,“ segir hann. Til marks um það sé hann sjálfur mikill aðdáandi íslensks rokks, sveita á borð við MAMMÚT, Fufanu, Vök, Árstíðir, Þey og Q4U og finnst í raun ótrúlegt hvað lítil þjóð eins og Ísland hefur alið af sér mikið af skapandi og hæfileikaríku tónlistarfólki.

„Og þar sem stór hópur Pólverja býr nú á Íslandi er mikil eftirvænting í loftinu fyrir því að fá þessar rokkgoðsagnir í heimsókn.“

Spurður hvort honum finnst vera gott framboð af pólskri tónlist á Íslandi, segir Pjøtr að það sé alls ekki slæmt en gæti verið betra. „Það eru nokkrir aðilar sem hafa verið að skipuleggja pólska tónlistarviðburði hérna á Íslandi og sumir þeirra hafa staðið fyrir íslenskum tónleikum í Póllandi líka, þannig að það er einhver menningarmiðlun í gangi á milli þjóðanna. Hins vegar er munur á þekkingu Pólverja á íslenskri tónlist og þekkingu Íslendinga á pólskri tónlist. Vonandi munu tónleikarnir á sunnudag bæta úr því. Vonandi verða þeir fyrstu pólsku tónleikarnir af mörgum. Sjáum til,“ segir hann hress í bragði.

Hulunni svipt af jólamatseðli Bryggjunnar brugghúss 

Bryggjan brugghús er rómaður staður fyrir frábæran mat, líflega stemningu og skemmtilega viðburði sem tengjast gjarnan árstíðum þar sem áhugaverðri dagskrá er parað saman við glæsilega matseðla og drykki sem eiga við hverju sinni. Við hittum Margréti Ríkharðsdóttur sem er yfirmatreiðslumeistari og Elvar Ingimarsson, eiganda og rekstrarstjóra, og fengum innsýn í hvað verður í boði á jólasmatseðli staðarins í vetur.

Þið eruð komin á fullt að undirbúa aðventuna og byrjuð á jólamatseðlinum. Getur þú gefið okkur forskot á sæluna og ljóstrað leyndarmálinum hvað verður í boði á jólamatseðlinum í ár?
„Eins og undanfarin ár byrjum við á jólaplattanum sem er blanda af forréttum. Við reyndum að koma bjórnum eins mikið og hægt var inn í seðilinn. Á plattanum erum við með síld, marineraða í bláberjum, og IPA-bjór, lax grafinn í Fagnaðarerindinu (innsk. jólabjór) með sinnepsdressingu, bjórgrafið lambainnralæri með hindberja- og basildressingu og að lokum rækjukokteil með mangó- og sítrussósu. Aðalrétturinn er svo hægeldað andalæri með beikonkartöflumús, döðlumauki, vorlauk, ostrusveppum og appelsínusoðsósu. Í eftirrétt erum við með Stout-ís, piparkökumulning, bakað hvítt súkkulaði og kirsuberjasósu,“ segir Margrét full tilhlökkunar. Byrjað verður að bjóða upp á jólaseðil Bryggjunnar brugghúss þann 23. nóvember næstkomandi.

Má segja að sjávarfang verði í forgrunni hjá ykkur í aðventunni?  
„Sjávarfang spilar stórt hlutverk á jólaplattanum og bjórinn einnig en hann er auðvitað allur bruggaður hér innanhúss,“ segir Margrét.

Margrét og Sigurður Hjartason matreiðslumaður eiga heiðurinn af samsetningu jólamatseðlisins í ár og hafa nostrað við hann af mikilli ástríðu.

Þið bruggið ykkar eigin bjór sjálf, verið þið með jólabjór í ár?
„Bryggjan brugghús ber út „Fagnaðarerindið“ í fljótandi formi um jólin. Bjórstíllinn er belgískur Dubbel. Þurrkaðir ávextir og sæta frá ristuðu byggi einkenna þennan myrka en notalega bjór. Dökkur eins og nóttin en ljúfur í munni. Hjálpið okkur að breiða út Fagnaðarerindið,“ segir Elvar og er mjög ánægður með nýjustu afurðina í brugginu.

Bjóðið þið upp á viðburði í tengslum við aðventuna, skemmtidagskrá samhliða því er gestir njóta matarins?
„Já, frá fimmtudegi til sunnudags verður lifandi jólajazz í boði fyrir gestina.“

Er mikið um að fyrirtæki og hópar haldi upp á aðventuna hjá ykkur og bóki langt fram í tímann?
„Það eru mjög margir hópar, bæði íslensk fyrirtæki og vinahópar, sem eru þegar byrjaðir að bóka bæði jólaseðilinn og jólahlaðborð. Við bjóðum upp á jólahlaðborð fyrir stærri hópa sé óskað eftir því,“ segir Elvar og er ávallt reiðubúinn að koma til móts við óskir viðskiptavina. „Síðan er aldrei að vita hvort við bregðum út af vananum og höldum þrettándagleði á nýju ári,“ segir Elvar og brosir breitt.

Jólaseðillinn – innihald

Jólaseðillinn (hægt að fá vegan-útgáfu) – 7.990 kr. (hægt að fá drykkjarpörun á 4.990 kr. aukalega)

Forréttir 
Marineruð síld í IPA-bjór og bláberjum á rúgbrauði
Grafinn lax í Fagnaðarerindinu (jólabjór) og sinnepssósa
Bjórgrafið lamb með epli og basil- og hindberjadressingu
Rækjukokteill með mangó- og sítrussósuAðalréttur 
Confit de Canard (andalæri) með beikon-kartöflumús, döðlumauki, vorlauk, ostrusveppum og appelsínusoðsósu

Eftirréttur 
Bjór-ís (stout) með piparkökumulning, bökuðu hvítu súkkulaði og kirsuberjasósu

Jólahlaðborð – 9.990 kr.

Forréttir 
Bláberja- & IPA-marineruð síld með rúgbrauði
Sinnepssíld með rúgbrauði
Lax, grafinn í Fagnaðarerindinu með sinnepssósu
Reyktur lax með piparrótarsósu
Reyktar rækjur í skel og chili-tartarsósa
Bjórgrafið lamb með hindberja- og basildressingu
Vegan-jólataco með döðlumauki & stökkri gulrót
Vegan-paté á rúgbrauði með bjórsýrðri gúrku & sætum lauk (inniheldur hnetur)
Jólasalat með eplum, hnetum & hindberjadressingu

Aðalréttir 
Andalæri – confit de canard
Purusteik af bjórgrís
Hnetusteik

Meðlæti 
Sykurbrúnaðar kartöflur
Rósakál
Gljáðar gulrætur
Appelsínugljái

Eftirréttir
Bjórís með kirsuberjasósu og piparkökumulning
Súkkulaðikaka Bryggjunnar og fersk ber
Kókostoppar

Bókunarnúmer 456-4040

eða [email protected]
Lágmarksfjöldi í jólahlaðborð eru 50 manns.

Stúdíó Birtíngur í samstarfi við Bryggjan brugghús.
Myndir / Hákon Davíð Björnsson

 

Suðræn upplifun þar sem ævintýrin gerast 

Á fallegum haustdegi lá leið okkar í hjarta miðborgarinnar, á Burro Tapas + Steaks veitingastaðinn og Pablo Discobar við Veltusund 1 fyrir framan Ingólfstorg. Burro er rómaður fyrir framandi matarupplifun þar sem bragðlaukarnir fá að njóta sín til fulls og fyrir suðræna og líflega stemningu. Við hittum Gunnstein Helga sem er einn eigenda staðana og spjölluðum um tilurð þeirra og hugmyndafræðina að baki.

Burro er staðsettur á annarri hæð en á þriðju hæð er kokteilbarinn Pablo Discobar og tengjast staðirnir saman. Litrík sjón blasti við okkur þegar inn kom, það var eins og við værum komin á suðrænar slóðir og í allt annað umhverfi og tónlistin ómaði. Staðirnir minntu óneitanlega á borgina Havana á Kúbu með mexíkósku ívafi og maður lifnar allur við. Hönnunin, litríkur stíllinn og munirnir gleðja augað og upplifunin er framandi. Okkur lék forvitni á að vita allt um hönnunina, innanstokksmuni og það sem fyrir augum bar.
Hjónin Róbert Óskar og Anna Marín eru einnig eigendur staðana ásamt Gunnsteini Helga. Gunnsteinn Helgi hefur verið viðloðandi veitingabransann síðan hann var í framhaldsskóla og hefur komið að opnun fjölmargra veitingastaða ásamt mörgu góðu fólki, mismunandi fólki eftir stöðum. Þeir staðir sem Gunnsteinn Helgi hefur tekið þátt í að hanna og opna á síðustu átta árum eru Íslenski barinn við Austurvöll, Uno, Sushi Samba, Apótekið, Public House Gastropub, sem var fyrsti gastro-barinn á Íslandi, Burro Tapas +Steaks & Pablo Discobar, Miami Bar og síðan eru fleiri staðir í bígerð.

Getur þú sagt okkur nánar frá tilurð og hönnun staðarins?
„Okkur eigendunum langaði að feta nýjar slóðir og vera með áherslu á mið- og suðurameríska matargerð. Við fengum til liðs við okkur nokkra framúrskarandi hönnuði, hvern á sínu sviði. Hálfdán Pedersen innanhússhönnuð og á hann heiðurinn af hönnuninni á útliti staðarins, Sigga Odds sem er grafískur hönnuður, til hanna lógó og alla grafík staðarins og Þórð Orra Pétursson, ljósahönnuð og forstöðumann ljósadeildar Borgarleikhússins, til að sjá um ljósahönnun og lýsingu. Bæði Siggi Odds og Þórður Orri voru tilnefndir til verðlauna fyrir þetta verkefni, hönnun staðarins,“ segir Gunnsteinn Helgi.  Gunnsteinn Helgi sagði að það hafi verið vel ígrundað hvað þau hefðu viljað sjá og þau hafi verið með ákveðna hugsjónir. „Þegar kom að hönnun Burro og Pablo Discobar varð hugsjón okkar um útlit staðanna að veruleika í gegnum verk Hálfdáns. Hálfdán lærði í Los Angelse og hefur ferðast mikið um Mexíkó og þær slóðir sem við sækjum okkar helsta innblástur til. Innsýn hans í samfélagið þar, sem nær meira að segja inn í fangaklefa í Mexíkó hefur reynst okkur ómetanleg. Það er fátt, ef eitthvað, sem Hálfdán hefur ekki hæfileika til en hann hefur meðal annars unnið að hönnun fjölda rýma og hannað sett fyrir ýmsar kvikmyndir, auglýsingar og tónlistarmyndbönd. Hugur Hálfdáns virkar á ótrúlegan hátt og virðist hann vera endalaus uppspretta hugmynda svo það varð fljótt ljóst sem varð að hönnun hans og hugmyndavinna tók okkur enn lengra en upphafleg hugsjón okkar hafði farið. Fyrir tilstilli Hálfdáns er því skemmtileg samblanda af gömlu og nýju bæði á Burro og Pablo Discobar og áhersla mun vera lögð á endurnýtingu, lifandi liti, mynstur og á einstaka suðræna upplifun.“

Rétt lýsing fullkomnar útlitið
Staðurinn er hannaður með útlit sem vitnar í suðræn áhrif en með nútímalegu partíívafi. „Til þess að fullkomna útlit Burro og Pablo Discobar, setja punktinn yfir i-ið og byggja upp hárrétta suðræna stemningu fengum við Þórð Orra til að hanna lýsinguna fyrir báða staðina. Hönnun Þórðar varpar ljósi á það að við erum skemmtileg, skrýtin, falleg, forvitnileg og það flott að þú vilt koma aftur og aftur til að skoða og upplifa meira.“

Suðuramerísk menningararfleið höfð að leiðarljósi
Lógó staðanna eru mjög töff og matseðlarnir eru frumlegir í útliti sem og heimasíður staðana sem ná að fanga augað.  „Siggi Odds sér um allt grafískt efni fyrir Burro og Pablo Discobar. Siggi hefur unnið sem grafískur hönnuður og teiknari með fyrirtækjum og einstaklingum alls staðar að úr heiminum og leggur áherslu á ímyndarsköpun vörumerkja í gegnum verk sín. Siggi hafði suðurameríska menningararfleið að leiðarljósi í vinnunni með okkur og dró fram fáguðu og fínu eiginleikana okkar, án þess þó að gleyma því að við erum mjög afslöppuð og skemmtileg líka,“ segir Gunnsteinn Helgi og brosir. „Latin-Ameríka býr yfir óteljandi mismunandi hefðum í myndskreytingu og handverki. Sumar eiga rætur að rekja til Inka-, Maya- og Aztec-þjóðfokkanna fornu. Flest eiga það sameiginlegt að vera sterk, lífleg og lifandi í formgerð og litadýrð og þaðan fékk Siggi Odds innblásturinn við hönnunina. Lógótýpan eða leturgerðin fyrir Burro og Pablo er dregin frá handgerðu leturhefðinni og er mjög undir áhrifum frá útskorna skiltinu sem var á vegi hans.  Lógótýpurnar eru mjög einkennandi og skemmtilega furðulegar og jafnframt gríðarlega eftirminnilegar.

Asninn síkáti og mannvera dansandi í kokteilglasi
Gaman er að geta þess að myndmerki Burro er asninn síkáti teiknaður með sterkum en lifandi formum sem tala við formgerð lógótýpunnar. Notkun á bara einum lit, gullbrúnum, og fín línan gefur merkinu ákveðna fágun. Myndmerki Pablo Discobar er mannvera dansandi í kokteilglasi, byggt á sama formheimi og í sömu lögun og asninn. Mótífð er fjörugt og dimmrauði liturinn vitnar í 70‘s tímabilið en heldur fáguðu yfirbragði. Saman mynda merkin skemmtilega tvennu sem tala vel saman og eru augljóslega tvær hliðar á sama peningi vegna einkennandi sérkenna.

Handverk og myndskreytingar frá Suður-Ameríku
Litirnir á veggjunum, þeir toppa staðinn, segðu okkur aðeins frá litavalinu og hugmyndafræðinni bak við það. „Litapalletta staðanna er nokkuð breið og fengin úr ýmsum áttum úr handverki og myndskreytingum Suður-Ameríku. Hún spannar nánast allan litahringinn en er í heildina mjög hlý og býður upp á marga möguleika.“

Boðið er upp á modern latino tapas-rétti og steikur
Réttirnir ykkar á matseðlinum eru bæði mjög frumlegir og nýstárlegir, getur þú lýst áherslum ykkar í matargerð og framreiðslu? „Á Burro er lögð áhersla á mið- og suðurameríska nútímamatseld og áhrifin eru sótt alla leið frá Argentínu og upp til Mexíkó. Boðið er upp á modern latino tapas-rétti og steikur sem lagt er til að fólk á borðum panti sér saman og deili og á seðlinum er einnig ágætt úrval rétta fyrir grænkera. Mikið er lagt upp úr því að skapa rétta stemningu á staðnum og blandast þar saman fjör og fagmennska með suðuramerískum áherslum.

Einnig erum við með kokteilbarinn á hæðinni fyrir ofan, Pablo Discobar eins og fram hefur komið og er Pablo, litli bróðir Burro, svolítið hallærislegur en alltaf í stuði. Hann sækir áhrif sín einnig til Suður-Ameríku en einnig til diskótímabilsins. Á Pablo færðu klikkaða kokteila og brjálað stuð og þú veist aldrei hvernig kvöldið mun enda. Þjónað er til borðs öll kvöld og hamingjustund er alla daga frá klukkan 16.00 til 18.00.“ Einnig er vert að minnast á það að nýr matseðill leit dagsins ljós í upphafi þessarar viku og nýir og spennandi réttir í boði.“

Ævintýralegar matarupplifanir fyrir alla
Hver er markhópurinn sem þið eruð að höfða til á Burro? „Allra nautnaseggja og sælkera landsins og þeirra sem elska góðan mat og frábæra kokteila í fallegu umhverfi. Það eru auðvitað allir velkomnir á Burro og við erum með stóran hóp fastakúnna en langflestir okkar gesta eru Íslendingar.“ Þið eruð að bjóða upp á skemmtilegar matarupplifanir, ævintýraferðir og stundum viðburði tengda þeim. Eru matarupplifanir vinsælar meðal hópa og fyrirtækja? „Samblanda Burro og Pablo er einstök er gerir staðinn ákjósanlegan kost fyrir smærri og stærri hópa.  Það er hægt að koma í Happy Hour á milli klukkan16.00 og 18.00 á Pablo Discobar, fara síðan með hópinn í matarævintýri á Burro og eftir matinn aftur upp á Pablo í kokteila og djamm fram á nótt, því er hægt að vera inni í sama húsinu frá opnun til lokunar og halda þannig öllum hópnum saman allan tímann frekar en að vera þvælast á milli staða með tilheyrandi veseni.“ Einnig er boðið upp á veisluþjónustu sem er gríðarlega vinsæl og hentar við öll tækifæri. Það er hægt að skoða úrvalið sem í boði er á eftirfarandi síðu: http://www.burro.is/wp-content/uploads/2018/09/burro-veisla-sept2018.pdf

Einn besti kokteilbar landsins
Segðu okkur aðeins frá kokteilunum sem þið eru fræg fyrir að bjóða upp á? „Pablo Discobar var einmitt valinn besti kokteilbar Íslands í fyrra og allir matargestir Burro geta pantað sé kokteila að eigin vali fyrir mat, með matnum eða eftir mat. Pablo er svo heppinn að eiga marga góða að og meðal annars að vera með úrvalslið barþjóna með sér í liði sem sjá um að gera bestu kokteila landsins, en staðurinn tekur sig ekki of alvarlega og snýst fyrst og fremst um skemmtun að allir skemmti sér vel og fái frábæra kokteila frá bestu barþjónum landsins. En eins og nafnið gefur til kynna, Pablo (mið- og suðuramerískt nafn) Discobar (70’s/80’s) þá eru kokteilarnir í sama þema, blanda af áhrifum frá Disco-tímabilinu og Mið- og Suður-Ameríku.“

Stúdíó Birtíngur í samstarfi við Burro Taps + Steaks.

Myndir / Hallur Karlson og Sigurjón Ragnar

 

Töldu veikindi flugfreyja ekki tengjast flugvélunum

Að minnsta kosti þrjár flugfreyjur hjá Icelandair eru óvinnufærar eftir að hafa veikst í flugi í sumar. „Við höfum allar verið með svakalegan þrýsting í höfði, eins og það sé að springa,“ segir flugfreyja hjá Icelandair sem telur eiturgufur í farangursrými orsök alvarlegra veikinda hennar. Fleiri úr sömu áhöfn veiktust.

Sambærilegt mál kom upp árið 2016 þar sem flugliðar kvörtuðu undan veikindum eftir að hafa flogið í tilteknum félagsins. Rannsóknarnefnd flugslysa tók málið til rannsóknar og stendur sú rannsókn yfir.

Ragnar Guðmundsson, rannsakandi hjá Rannsóknarnefnd samgönguslysa, staðfestir að rannsókn sé opin á þessum og fleiri flugatvikum.  Hann segir umrædd tilvik séu ekki skilgreind sem alvarleg flugatvik vegna þess að öryggi flugvélarinnar og flugsins hafi ekki verið stefnt í hættu þar sem ekkert þeirra átti sér stað í flugstjórnarklefanum. Hins vegar séu þetta endurtekin flugatvik sem ástæða þykir að skoða.

„Við höfum látið skoða flugvélar og ýmislegt hefur verið gert en að öðru leyti vil ég ekki tjá mig um opna rannsókn,“ segir Ragnar og bendir á að ekki sé hægt að styðjast við gögn úr flugritum sem gerir málið flóknara.

Töldu veikindin ekki tengjast flugvélunum

Ekki náðist í Guðjón Arngrímsson, upplýsingafulltrúa Icelandair, við vinnslu fréttarinnar en í samtali við Ríkisútvarpið árið 2016 sagði hann að litið væri á málið sem innanhússmál.

Í ágúst 2016 fékk starfsfólk Icelandair tilkynningu í tölvupósti þar sem farið var yfir flugatvikin og aðgerðir félagsins. „Á hverjum degi í sumar eru um 400 áhafnarmeðlimir á flugi hjá Icelandair og því ekki óeðlilegt að einhverjir af öllum þessum fjölda veikist eða finni fyrir vanlíðan,“ segir m.a. í tilkynningunni. Jafnframt er því haldið fram að atvikin séu misjöfn og tengist ekki einstökum flugvélum. Dregin er sú ályktun að tilvikin séu aðskilin fremur en að um sama orsakavald sé að ræða.

Þá eru aðgerðir tæknideildar vegna flugatvikanna útlistaðar en frá því tilkynningin var send út hefur fjöldi svipaðra mála litið dagsins ljós og dæmi er um flugfreyjur sem hafa enn ekki getað snúið aftur til fyrri starfa vegna veikinda í tengslum við umrædd atvik.

Tölvupóstinn í heild má lesa hér að neðan.

 

Vegna tilkynninga um veikindi áhafnarmeðlima um borð

Nýlega hefur orðið töluverð aukning í tilkynningum frá áhafnameðlimum vegna veikinda um borð í flugvélum Icelandair. Icelandair lítur þetta alvarlegum augum enda leggur félagið áherslu á að starfsumhverfi áhafna sé með sem bestum hætti. Þessu bréfi er ætlað að gefa upplýsingar um stöðu þessara mála.

Á hverjum degi í sumar eru um 400 áhafnameðlimir á flugi hjá Icelandair og því ekki óeðlilegt að einhverjir af öllum þessum fjölda veikist eða finni fyrir vanlíðan. Í kjölfar aukins fjölda tilkynninga hefur hvert tilfelli verið skoðað og greint. Haft hefur verið samband við áhafnarmeðlimi til að fá nánari og betri lýsingar. Trúnaðarlæknir Icelandair hefur stýrt leit okkar að heilsufræðilegum orsökum og metið hvert tilfelli fyrir sig.

Í stuttu máli eru atvikin misjöfn og eiga fátt sameiginlegt þegar nánar er skoðað. Þau hafa dreifst á flestar vélar í flugflotanum okkar, tengjast ekki einstökum flugvélum, og hafa komið upp á bæði B-757 og B-767. Oft hafa margar vikur liðið á milli tilkynninga á sömu flugvél.

Tilkynnt einkenni hafa einnig verið af ýmsum toga, en í einhverjum tilvikum virðast vera tengsl á milli einkenna og hreyfingar flugvélarinnar, hitastigs og jafnvel misjafnar hitadreifingar í farþegarými. Önnur tilvik virðast alls ótengd flugvélunum, en tengjast öðrum veikindum eða vanlíðan einstaklinga, þreytu og slíkum þáttum. Áberandi er að þessar veikindatilkynningar koma fremur frá yngra fólki með lágan starfsaldur en þeim sem eru eldri og reyndari.

Þessar breytur gera það að verkum að líklegra er að tilvikin séu aðskilin en að um sama orsakavald sé að ræða. Icelandair hefur samt sem áður lagt mikla vinnu í að greina mögulegar ástæður tilvikanna.

  • Tæknideild Icelandair hefur skoðað viðhald flugvélanna og hefur greining farið í gang eftir hvert atvik fyrir sig. Meðal aðgerða eru hreyflaskipti, parta- og olíuskipti, loftsíuskipti, skoðun á loftstokkum, þrif á loftræstikerfi og loftgæðamælingar á flugi.
  • Icelandair hefur rannsakað og mælt sérstaklega ákveðna þætti, bæði á jörðu niðri, í farþegaflugi og sérstökum mælingarflugum. Meðal annars hefur verið notast við rafrænt „nef“ eða loftgreiningatæki (Aerotracer) og hafa allar mælingar komið eðlilega út. Þeir þættir sem hafa verið mældir eru loftþrýstingur, súrefnishlutfall, rakastig, hitastig, hljóðstyrkur, lofthraði og dreifing ræstilofts, hröðun, örveru- og myglupróf, lyktarpróf (Aerotracer), og ýmis önnur efni, s.s. CO (Carbon Monoxide), CO2 (Carbon Dioxide), SO2 (Sulfur Dioxide), O3 (Ozone).
  • Trúnaðarlæknir Icelandair hefur farið yfir niðurstöður úr læknisskoðun og blóðprufum hjá þeim áhafnarmeðlimum sem farið hafa í slíka rannsókn strax eftir flug. Öll þau sýni hafa komið eðlilega út.
  • Þá hefur Rannsóknarnefnd Samgönguslysa (RNSA) verið fengin til liðs við okkur. Icelandair fagnar aðkomu RNSA og aðstoðar nefndina eftir fremsta megni. RNSA hefur heimild til ýmissa aðgerða og nefndin m.a. sent áhafnarmeðlimi í blóðprufur, læknisskoðanir og tekið flugritagögn til greiningar en RNSA vinnur sjálfstæða rannsókn á þeim atvikum sem hún hefur afskipti af.
  • Icelandair hefur undanfarið skoðað sérstakan loftsýnitökubúnað sem yrði staðsettur um borð og hægt væri að nota ef fleiri en einn áhafnarmeðlimur finnur fyrir vanlíðan.

Veikist áhafnarmeðlimur á flugi er mikilvægt að senda inn skýrslu um atvikið í gegnum SMS360. Ítarleg lýsing áhafnameðlima skiptir miklu máli þar sem þessar upplýsingar geta auðveldað greiningu á atvikum.

Uppsöfnuð óánægja finnur sér farveg

Mannlíf/Hákon

Háværar deilur innan Sjálfstæðisflokksins í Vestmannaeyjum um röðun á framboðslista urðu til þess að flokkurinn klofnaði skömmu fyrir kosningar. H-listinn spratt fram og náði ásamt E-listanum að fella meirihluta Sjálfstæðisflokksins, þótt ekki hafi munað nema fimm atkvæðum. Skyndilega stóð Elliði Vignisson á krossgötum. Bæjarstjórastóllinn var farinn og í fyrsta skipti í 14 ár var hann ekki lengur bæjarfulltrúi í Vestmannaeyjum. Elliði var horfinn úr forystu Vestmannaeyjabæjar og fram undan voru stórar persónulegar ákvarðanir.

Þótt deilurnar innan flokksins hafi opinberlega snúist um hvaða leið ætti að fara við röðun á framboðslista telur Elliði að dýpri ástæður hafi legið þar að baki. „Það var enginn málefnalegur ágreiningur en á móti kemur að við vorum búin að vera við stjórnvölinn í tólf ár og höfðum gengið þannig fram að auðvitað höfum við valdið truflunum í viðtækjum einhverra á þessum tíma. Við fundum það mjög að ákveðnir hópar voru að leita sér að farvegi fyrir persónulega óánægju frekar en eitthvað annað. Það var kannski byggt hús of nálægt einum, aðrir töldu sig ekki hafa fengið nægileg verkefni í útboðum á vegum Vestmannaeyjabæjar, fólk hafði ekki fengið vinnu sem það sótti um hjá bænum eða jafnvel misst vinnuna og taldi sig þess vegna eiga eitthvað sökótt við bæjarfélagið og svo framvegis. Þessi óánægja fann sér farveg í þessum svokallaða H-lista sem náði því sem til þurfti. Þótt Sjálfstæðisflokkurinn sé eftir sem áður með eitt mesta fylgi á landinu í Eyjum þá dugði fylgi H-listans til að fella meirihlutann og það verður ekki af þeim tekið.“

Deilurnar mögnuðust enn frekar eftir að niðurstaða kosninganna varð ljós og beindist reiði sjálfstæðismanna fyrst og fremst að Páli Magnússyni, þingmanni flokksins í kjördæminu. Hann var sakaður um að hafa stutt framboð H-listans á bakvið tjöldin og þannig unnið markvisst gegn eigin flokki í bænum. Fór svo að Páll var rekinn úr fulltrúaráði flokksins í Vestmanneyjum vegna „fordæmalausrar framgöngu“ hans í kosningunum, eins og það var orðað í ályktun. Elliði er fljótur til svara þegar hann er spurður út í framgöngu Páls. „Ég ætla ekki að tjá mig um Pál Magnússon í þessu viðtali. Ég ætla ekki að falla í þá gryfju að ræða þetta út frá einstökum persónum. Það er til sálfræðihugtak sem heitir stóra eignunarvillan og hún er kölluð það af því að hún er svo algeng. Hún felst í því að ætla persónum of stórt hlutverk. Oftast nær liggur skýringin í einhverju öðru en einstökum persónum. Við eignum einstökum persónum árangur og eignum einstökum persónum líka árangursleysi þegar allt aðrir þættir geta legið að baki. Þannig að mér finnst það hvorki sanngjarnt gagnvart mér né Páli Magnússyni að ég fari að ræða um meintar persónulegar deilur á milli okkar.“

Rætt er ítarlega við Elliða í Mannlífi sem kom út í gær.

Mynd / Hákon Davíð Björnsson

Þakkar guði fyrir að hafa fundið barnið sitt

Mýmörg dæmi eru um að börn yfirgefi frístundaheimili án þess að umsjónarfólk veiti því eftirtekt. Foreldrar segja að þjónustan veiti falskt öryggi.

Í síðustu viku var auglýst eftir tveimur drengjum, sjö og átta ára, sem ekkert hafði spurst til í nokkrar klukkustundir. Annar drengurinn hafði yfirgefið frístundaheimilið í skólanum sínum án leyfis og var foreldri gert viðvart þegar hvarfið uppgötvaðist. Drengirnir fundust, fimm klukkustundum síðar.
Helgi Grímsson, sviðsstjóri skóla- og frístundasviðs Reykjavíkur, segir að lögð sé áhersla á að hafa góða yfirsýn yfir barnahópinn. Byggðir hafi verið upp verkferlar í kringum skil skóladags og upphaf frístundastarfs, innan frístundatímans, frá frístund og á íþróttaæfingar og svo um heimferðir. „Vissulega koma upp tilvik þar sem barn skilar sér ekki í frístund og eru skýringarnar margvíslegar. Í þessum fáu tilvikum er sjaldgæft að barnið finnist ekki innan stundar. Í öllum tilvikum er staðan rýnd, hvað fór úrskeiðis og hvernig megi koma í veg fyrir að þetta endurtaki sig,“ segir Helgi þegar hann er spurður út í stöðu þessa mála hjá Reykjavíkurborg.

„Enginn af starfsmönnunum hafði gert sér grein fyrir hvarfi barnsins, hvað þá hversu langur tími hafði liðið frá því barnið fór.“

Sími um hálsinn öruggari en vistun
Miklar umræður spunnust um börn á frístundaheimilum í kjölfar þessarar fréttar og í ljós kom að foreldrar í Kópavogi eru síður en svo ánægðir með þjónustu bæjarfélagsins í frístundamálum. „Þegar dóttir mín var í fyrsta bekk og vistuð á frístundaheimili eftir skóla kom það margoft fyrir að ég fékk símtöl frá nágrannakonu minni sem var í fæðingarorlofi, þess efnis að dóttir mín væri heima hjá henni með dóttur hennar, hvort það væri með mínu leyfi,“ segir móðir í Kópavogi. „Mér brá auðvitað því ég taldi mig vera að borga fyrir þjónustu sem reyndist vera falskt öryggi. Ef þessi móðir hefði ekki verið heima veit ég ekki hvar barnið mitt hefði endað, síma- og lyklalaust og enginn starfsmaður sem veitti því neina eftirtekt hvort hún væri á staðnum eða ekki. Auk þess að fá endurtekin símtöl frá móðurinni í fæðingarorlofinu kom líka fyrir að ég mætti í skólann til að sækja dóttur mína sem var þá einfaldlega ekki á staðnum. Enginn af starfsmönnunum hafði gert sér grein fyrir hvarfi barnsins, hvað þá hversu langur tími hafði liðið frá því barnið fór. Þá höfðu vinkonurnar ýmist farið í ævintýraferðir, heimsótt vinkonur sem voru eftirlitslausar heima eða einfaldlega gleymt stað og stund í útivist og ekki verið sóttar inn af eftirlitsaðilum. Það sem olli mér hvað mestum vonbrigðum voru viðbrögð starfsfólksins sem reyndi ekki einu sinni að þykjast kannast við nafnið á barninu mínu. Það tekst illa að manna þessar stöður og því er hægt að ráða hvern sem er til þess að sinna því sem ætti að vera ábyrgðarhlutverk en er síður en svo litið slíkum augum.“

Konan segir að lítið hafi lagast þrátt fyrir ítrekaðar kvartanir og á endanum hafi hún skráð barnið úr frístundaheimilinu. „Í framhaldinu fékk barnið takkasíma og var skráð úr dægradvöl, ég áleit öryggi hennar vera meira heimafyrir en þarna. Sömu sögu er að segja af minnst sex vinkonum hennar sem ég veit um.“

Önnur móðir í Kópavogi sem Mannlíf ræddi við hafði svipaða sögu að segja. Eitt sinn hafi hún farið að sækja barn sitt á frístundaheimili en þá hafi það ekki verið á staðnum og enginn vitað hvar það var niðurkomið. Eftir smáspjall hafi komið í ljós að barnið hafi í nokkur skipti ekki mætt í frístund eftir skóla en enginn hafi haft fyrir því að láta foreldrana vita. „Ég varð svo hissa og svo reið. Svona myndi aldrei gerast í heimalandi mínu, Litháen, þar sem öryggi barna er alltaf í fyrsta sæti og faglært fólk sem hugsar um börnin. Ég þakka bara guði fyrir að hafa fundið barnið mitt heima hjá bekkjarsystkini eftir stutta leit,“ segir hún en vert er að taka fram að ekkert af foreldrunum sem Mannlíf ræddi við vildi koma fram undir nafni að ótta við að það kynni að bitna á börnum þeirra eða yngri systkinum sem ættu jafnvel eftir að þurfa á þjónustunni að halda.

„Við þekkjum dæmi þess að börn hafi farið heim án þess að láta vita af sér.“

Sigríður Björg Tómasdóttir, almannatengill Kópavogsbæjar, segist ekki vita til þess að börn hafi farið ítrekað úr frístundaheimilum bæjarins án þess að umsjónarfólk veitti því eftirtekt eða léti foreldra viðkomandi vita. „Við þekkjum dæmi þess að börn hafi farið heim án þess að láta vita af sér. En það er samkvæmt okkar vitneskju afar sjaldgæft og litið mjög alvarlegum augum. Frístundaheimili grunnskóla í Kópavogi starfa samkvæmt stefnumörkun sem samþykkt var fyrir nokkrum árum. Einnig hefur verið gefin út Handbók frístundastarfs sem er ætlað að vera leiðbeinandi og upplýsandi fyrir forstöðumenn og starfsfólk. Þá hafa öryggisferlar verið sérstaklega útfærðir en í þeim er sérstaklega fjallað um hvernig bregðast á við ef barn mætir ekki eða týnist,“ segir Sigríður Björg.

Leyndardómar súkkulaðiverksmiðjunnar OMNOM

Við litum inn í súkkulaðiverksmiðjuna OMNOM sem staðsett er við Hólmaslóð 2 í Reykjavík í glæsilegum húsakynnum. Þar hittum við stofnandann og einn af eigendunum súkkulaðiverksmiðjunnar, Kjartan Gíslason, sem bauð okkur í draumaferðina um verksmiðjuna þar sem leyndarmál súkkulaðsins eru geymd. Súkkulaðiilmurinn sem tók á móti okkur var ómótstæðilegur.

Hvernig kviknaði áhuginn á súkkulaðigerðinni?
„Omnom-ævintýrið byrjaði af einskærri forvitni um hvernig súkkulaði væri gert. Ég reifaði þessa hugmynd við æskuvin minn, Óskar Þórðarson, og saman fórum við að pæla í þessu. Við erum báðir miklir sælkerar og finnst gaman að fara út að borða og velta fyrir okkur mat. Við fórum í það að kanna mögleika á tólum og tækjum til súkkulaðigerðar og eftir nokkrar misgóðar tilraunir vorum við komnir með eitthvað sem hægt er að kalla súkkulaði. Þetta ferli var svo spennandi og skemmtilegt að við vildum fara í framleiðslu og fengum til liðs okkur hönnuð sem á heiðurinn af hönnun umbúðanna. Þegar það var tilbúið sáum við að við vorum með eitthvað sérstakt í höndunum.“

Getur þú sagt okkur aðeins frá tilurð súkkulaðigerðarinnar og framkvæmdinni?
„Við byrjuðum heima hjá mér að rista og mala baunir og búa til súkkulaði, þangað til við fundum yfirgefna bensínstöð á Seltjarnarnesi. Þar héldum við starfinu áfram þangað til fyrsta varan okkar var tilbúin. Það fóru margar næturvinnustundir og margar kaffikönnur í að koma framleiðslunni af stað. Í dag starfa yfir tuttugu manns hjá Omnom. Við verðum með okkar eigin verslun og bjóðum upp á súkkulaðitúr á hverjum einasta degi. Við finnum fyrir miklum áhuga á Omnom og súkkulaðinu okkar.“

Hvað er erfiðast við að framleiða gott súkkulaði?
„Að bíða eftir því að súkkulaðiblanda verði tilbúin. Súkkulaðigerð er tímafrek og stundum þurfum við að bíða í þrjá daga þar til að uppskrift er tilbúin.“

„Við bjóðum upp á súkkulaðitúra á hverjum einasta degi. Við finnum fyrir miklum áhuga á hvernig súkkulaði er búið til, eins og í víngerð og ostagerð.“

Hvernig fer vöruþróunin fram?
„Ég fæ að leika mér í tilraunaeldhúsinu eins og snarbrjálaður vísindamaður í kvikmyndunum. Nei, en að öllu gamni slepptu er það stundum þannig. Black n Burnt Barley varð til þannig. Það var upprunalega hvítt súkkulaði sem varð svart því við prófuðum að bæta brenndu byggi út í súkkulaðið. Fyrir jólin í fyrra efndum við til keppni innanhúss fyrir vetrarsúkkulaðið okkar. Það var mjög skemmtileg tilraun og allir fengu að leggja sitt af mörkum. Allir sem starfa hérna fá að búa til sitt eigið súkkulaði. Það hafa margar mjög góðar súkkulaðitegundir lent inn á borði hjá mér í þessum tilraunum – reyndar líka mjög sérstakt súkkulaði.“

Umbúðirnar eru einstaklega vel útfærðar og lógóið hefur vakið athygli, hver er hönnuðurinn og hvaðan kemur innblásturinn?
„André Visage hönnuður bjó til lógóið og hönnun umbúðanna. Við vildum að útlit umbúðanna væri í anda súkkulaðisins. Litríkt og skemmtilegt og útkoman var sú sem við þekkjum í dag. Í dag er Veronica Filippin hönnuðurinn okkar. Allt sem að hún gerir er gull.“

Bjóðið þið upp á heimsóknir og kynningar í súkkulaðiverksmiðjunni að hætti Kalla, það er segja að fyrirmynd „Charlie and the Chocolate Factory“ ?
„Heldur betur og erum með Oompa Loompas í fullu starfi,“ segir Kjartan hlæjandi. „Við bjóðum upp á súkkulaðitúra á hverjum einasta degi. Við finnum fyrir miklum áhuga á hvernig súkkulaði er búið til, eins og í víngerð og ostagerð. Við höldum einnig allskyns skemmtileg námskeið, eins og í til dæmis súkkulaði- og bjórpörun. Næsti viðburður okkar er haldinn í samstarfi við Reykjavík Roasters þar sem við ætlum að bjóða upp á súkkulaði- og kaffipörun. Það verður mjög skemmtileg stund sem haldin verður 6. október næstkomandi og ég hvet sem flesta til þess að skrá sig.“

Framtíðin er björt hjá fyrirtækinu og það blómstrar og dafnar vel. Eru einhver ný framtíðarplön?
„Helsta markmið okkar er að halda áfram að búa til hágæða súkkulaði og gera lífið skemmtilegra fyrir fólk.“

Stúdíó Birtíngur í samstarfi við Mini.

Mynd / Hákon Davíð Björnsson

 

Afslappaður og skemmtilegur staður í hjarta Hafnarfjarðar

Á dögunum heimsóttum við veitingaparið Kristjönu Þuru Bergþórsdóttur og Einar Hjaltason sem eiga og reka veitingahúsið VON mathús&bar í Hafnarfirði. Staðurinn hefur heillað gesti sína upp úr skónum fyrir ljúffenga rétti, hlýlegar móttökur og afslappað andrúmsloft og góða þjónustu. Okkur lék forvitni að fræðast frekar um tilurð staðarins og um lífsstíl þeirra hjóna.

Getið þið sagt okkur aðeins frá tilurð veitingastaðarins?
„Við erum bæði uppalin í miðborgarveitingageiranum og höfðum lengi pælt í því að opna okkar eigin rekstur. Árið 2015 vorum flutt aftur í Hafnarfjörð og komin með lítið barn, orðin þreytt á því að keyra í vinnu frá Hafnarfirði til Reykjavíkur á hverjum degi. Á svipuðum tíma á árinu vorum við að koma úr fæðingarorlofi og okkur fannst vanta meiri uppbyggingu á þessu svæði sem við bjuggum á, í Suðurbænum í Hafnarfirði. Við duttum inn á þetta húsnæði í gamla Drafnarhúsinu við Strandgötu og það var verið gera húsið upp og breyta því í nokkrar einingar. Það þurfti ekki mikla sannfæringu um að kýla á þetta verkefni.  Vissulega var þetta áhættusamt, þar sem enginn hafði opnað svona veitingahús í mjög langan tíma í bænum, en með góðri aðstoð frá fjölskyldunni ákváðum við að kýla á þetta.“

Hvaðan kemur hugmyndin að nafninu, það er einkar fallegt, VON mathús&bar?
„Við vildum hafa nafnið fallegt, stutt og hnitmiðað. Eins vildum við hafa akkeri í lógóinu líka, þannig kom nafnið VON upp í einum góðum bíltúr. Mathús og bar kom því okkur fannst það lýsa okkur persónulega og okkar rekstri best. Við vildum ekki hafa þetta of formlegt veitingahús, heldur frekar meira út í „gastropub“ eins og þekkist víða, meðal annars í London. Þar sem þú kemur inn í frekar afslappað og skemmtilegt umhverfi, en getur fengið vandaðan mat og drykki og skemmtilega þjónustu, án þess að stíga formlega inn á „fine dining“-stað.“

Starfsánægja og gæði fram yfir hraða nútímasamfélagsins
„Við erum með lokað á sunnudögum og mánudögum. Fyrir mörgum Íslendingum er það enn þá mjög óvenjulegt, en við gerum það einfaldega því það hentar okkur og okkar rekstri best. Þetta tíðkast víða erlendis og eru sífellt fleiri staðir í Reykjavík byrjaðir að hafa lokað á mánudögum. Ég er mjög ánægð með þessa þróun. Hraðinn í nútímasamfélagi er mikill og mín skoðun er sú, að það þarf ekkert alltaf allt að vera opið alltaf. Við erum lítill en góður vinnustaður og mikilvægt að allir fái áreitislausa hvíld. Við hugsum þetta meira til langtíma, heldur en að allir brenni út af álagi.“

Þið standið fyrir viðburðum í tengslum við matar- og drykkjarupplifun á VON mathús&bar, eru nýir viðburðir á döfinni?
„Við erum með sanngjarnan og breytilegan hádegisseðil þriðjudaga til föstudaga  frá klukkan 11.30 til 14.00. Fastur kvöldseðil frá klukkan 17.30, sem tekur reglulegum breytingum. Í október ætlum við að vinna samhliða Tommasi og verðum með villibráðarhelgi og ítalska helgi, með sérmatseðli og drykkjum. Við erum miklir aðdáendur Ítalíu og einnig finnst okkur gaman að þjónusta kúnnahópinn okkar með nýjum og skemmtilegum leiðum. Sem dæmi má nefna að helgina 19. til 20. október verðum við með ítalska matarveislu sem parað verður með sérvöldum Tommasi-vínum.

Við erum mjög virk á samfélagsmiðlum, Facebook og Instagram (vonmathus), og þar verður hægt að fylgjast með og öllu okkar daglega amstri.“

Heimasíða: www.vonmathus.is

https://www.facebook.com/vonmathus/

Stúdíó Birtíngur í samstarfi við VON mathús&bar.

Mynd / Heiðdís Guðbjörg Gunnarsdóttir

 

Burgerinn Bearnaise er hástökkvarinn

Okkur lék forvitni að vita nánar hvers konar veitingastaður Burger-inn í Hafnarfirði er og hvað hann hefur upp á að bjóða. Staðurinn er við Flatahraun 5a og við höfum heyrt að þarna sé að finna einn besta borgara bæjarins. Við hittum feðgana sem þar ráða ríkjum en Örn Arnarson og sonur hans, Brynjar Arnarson, eru eigendur staðarins og rekstraraðilar.

Getið þið sagt okkur aðeins frá veitingastaðnum Burger-inn, bæði umgjörð og þjónustu sem þið bjóðið upp á?
„Staðurinn opnaði árið 2011, þann 17. júní á þjóðhátíðardegi Íslendinga. Hann er innréttaður í sixties-stíl og myndskreyttur með eldri limósínum og fallegum hlutum frá gamla tímanum. Við getum tekið um sjötíu og fimm gesti í sæti og aðkoman að staðnum er mjög góð. Nóg er af fríum bílastæðum. Við erum einnig með tvær bílalúgur og má með sanni segja að flestar pantanir séu sóttar. Það er mjög vinsælt að panta matinn og taka með heim.“

Þið leggið metnað í að vera með gott hráefni í hamborgarana ykkar. Hvaðan kemur hráefnið og hver er hugmyndin að baki umgjörðinni og matseðlinum?
„Burger-inn notar aðeins fyrsta flokks hráefni frá birgjum á Stór-Reykjavíkursvæðinu. Við erum til dæmis með 20% fitusprengt nautahakk í hamborgurunum okkar frá Kjötsmiðjunni, frönskurnar Cavendish frá Ekran, beikon, skinku og pepperoni frá Ali og margt fleira frá ýmsum góðum aðilum.“

Hugið þið að umhverfinu í ykkar matargerð og rekstri?
„Við hugum eins vel að náttúrunni og okkur er unnt bæði í matargerð og umbúðum fyrir mat sem viðskiptavinurinn sækir til okkar. Einnig flokkum við sorpið og erum með sorteringu á úrkasti.“

Hverjar eru helstu áherslur ykkar og markmið með rekstrinum?
„Okkar áherslur og markmið er að hafa meira gaman í dag en í gær og fá öll fallegu brosin sem okkur eru send.“

Eru einhverjir réttir vinsælli en aðrir?
Matseðillinn allur fer ótrúlega jafnt. Við getum þó sagt að Burgerinn Bearnaise sé hástökkvarinn en með ekta smjörbearnaise-sósu sem er gríðarlega vinsæl. Af grillinu bjóðum við upp á sérmeðhöndlaðar lambakótilettur og bearnaise-sósu sem val í meðlæti. Við bjóðum bara upp á alvörubearnaise-sósu eins og Oddur H. Odds frændi vill hafa hana,“ segir Örn og brosir. Hægt er að skoða matseðlinn á heimasíðu staðarins: www.burgerinn.is. Frá opnun hefur verið boðið upp á fría súpu með öllum máltíðum í sal með birgðir endast, fyrstur kemur þá fær.

Burger-inn er vinsæll viðkomustaður

„Gaman er að segja frá því að viðskiptavinir okkar eru bæði úr nærsveit og úr dreifbýlinu, á öllum aldri. Stórfjölskyldur leggja gjarnan leið sína hingað inn í Burger-inn og njóta þess að eiga hér saman skemmtilega fjölskyldustund.“

Bjóðið þið oft upp á tilboð fyrir fjölskyldur og hópa?
„Við erum ávallt með ýmis tilboð fyrir hópa sem eru mjög vinsæl. Mikið er um að hingað komi viðskiptavinir og haldi upp á afmæli. Afmælishóparnir eru einstaklega skemmtilegir.“

Mynd / Heiðdís Guðbjörg Gunnarsdóttir
Stúdíó Birtíngur í samstarfi við Burger-inn.

 

Dreymir um að eignast jörð með lítilli lax- og silungaveiðiá

Ólafur Br. Finnbogason og er löggiltur fasteignasali á Mikluborg fasteignasölu. Hann er giftur Dögg Hjaltalín, bókaútgefanda og eiganda Sölku bókaútgáfu, og eiga þau þrjár dætur, Agnesi 19 ára, Freyju 8 ára og Rán 2 ára. Þau búa í tvílyftu timburhúsi á Bráðræðisholtinu í Reykjavík ásamt læðunni Regínu og fjórum hænum.

Hvað heillar þig mest við starfið?
„Það sem skemmtilegast er við starfið er að vera þátttakandi í einni stærstu fjárhagslegu ákvörðun fjölskyldna á lífsleiðinni sem fylgir oftast mikil gleði og spenningur hjá fólki. Einnig finnst mér gaman að tala og umgangast annað fólk og er það stór hluti af starfinu. Fjölbreytni er einnig mikil og situr maður blessunarlega ekki nema hluta úr deginum við tölvuna.“

Geturðu lýst hefðbundnum vinnudegi hjá þér?
„Ég mæti oftast um klukkan 8.30 á morgnana og erum við á Mikluborg með verðmatsfundi tvo morgna á viku. Síðan hefst dagurinn á að fylgja eftir fyrirspurnum dagsins á undan og bæði skoða nýjar eignir sem og sýna. Upp úr klukkan 16.00 fer ég af skrifstofunni og er með sýningar og skoðanir fram að kvöldmat. Eftir kvöldmat tekur tölvupóstur og gerð söluyfirlita og lýsinga á eignum. Dagurinn er oft langur og er lítið frí um helgar en starfið skemmtilegt í alla staði.“

Hvað er það sem þér finnst gera hús að heimili?
„Heimili mitt væri ekki spennandi ef ég væri ekki giftur svona glaðlyndri og fallegri konu og ætti ekki svona lífsglöð og fjörug börn. Einnig erum við heppin að vera vinarík svo að heimili mitt ef oft fullt af gestum sem gefa lífinu gleði og tilgang. Svo að heimili mitt er þar sem vinir og mínir nánustu eru í kringum mig.“

Geturðu líst þínum stíl?
„Minn stíll er nú ekki flókinn, geng oftast í því sem Dögg kaupir á mig.“

Áttu þinn uppáhaldsarkitekt?
„Er ekki mikið að spá í arkitektúr en auðvitað eru margir í gegnum vinnuna sem maður hefur kynnst á verkum þeirra og finnst mér til að mynda Valdimar Harðarson hjá Ask arkitektum vera sérlega „praktístur“ og þau fjölbýlishús sem ég hef selt fyrir hann hafa alltaf hitt í mark hjá þeim notendum sem þau eiga við hvort sem það er fyrir ungt fólk sem er að hefja búskap eða heldra fólk sem vill minnka við sig. Einnig hönnunin hans stílhrein og tímalaus.“

Áttu þinn uppáhaldshönnuð?
„Ólafur Ágúst Jensson, innanhússarkitekt og ljósahönnuður, ber af enda einn af mínum betri vinum og hefur lýst upp allt umhverfi sitt þegar hann er á svæðinu.“

Hvað hefur þig alltaf dreymt um að eignast en ekki eignast hingað til?
„Jörð með lítilli lax- og silungaveiðiá ásamt góðum rjúpna- og gæsalendum.“

Uppáhaldsliturinn þinn?
„Enginn.“

Hvar líður þér best?
„Mér líður alltaf best heima með fjölskyldunni og vinum og ekki skemmir ef það er á veiðilendum hvort sem það er skot- eða stangaveiði.“

Hvað heillar þig mest við haustið? Er eitthvað sem þú vilt bæta við í garðinn eða inn á heimilið þegar haustið gengur í garð?
„Þá hefst skotveiðitímabilið og ég legg veiðistönginni. Og ég vil helst bæta hangandi villibráð á pallinn og rjúpum í frystinn.“
Svalasti veitingastaðurinn á Íslandi í dag?

„Eldhúsborðið heima með góðum vinum og ekki skemmir ef Viktor Örn Andrésson eða Hinrik Lárusson ofurkokkar séu búnir að elda ofan í okkur og vini okkar.“

Er einhver byggingarstíll sem heillar þig meira en annar?
„Ég er hrifinn af gömlum húsum, hvort sem þau eru úr timbri eins og heimili mitt sem er gamall leikskóli sem var við Rauðhóla eða gamalt steinhús í sveitinni.“
„Að lifa lífinu lifandi er … að vera með vinum sínum og fjölskyldu og gera það sem mann dreymir um áður en maður missir heilsu eða getu til þess. Maður veit ekki hvað gerist á morgun.“

Mynd / Aldís Pálsdóttir

 

1...1.5361.5371.538...1.600Síðu 1.537 af 1.600

Raddir

© 2023 Mannlíf.is. Allur réttur áskilinn. Notkun á efni miðilsins er óheimil án samþykkis.