Ljósmyndarinn Curtis Wiklund hefur síðustu ár teiknað mikilvægar stundir í lífi sínu með eiginkonu sinni, Jordin og börnunum þeirra, Casen og Hayden.
Í samtali við fréttaveituna Buzzfeed segist Curtis hafa byrjað að teikna þegar hann var ungur drengur en að listin hafi vikið fyrir tónlist um langa hríð þar til hann kynntist Jordin. Hún hvatti eiginmann sinn til að teikna á hverjum degi og fyrr en varði gerði Curtis sér grein fyrir að uppáhaldsiðja hans var að teikna stundirnar sem hann eyddi með konu sinni.
Fjölskyldan uppí rúmi að lesa bók.
Teikningarnar eiga það sameiginlegt að vera einlægar og hugljúfar og teiknar hann stundir sem margir foreldrar kannast við.
„Mig langaði að teikna allar þessar stundir svo ég myndi aldrei gleyma þeim. Jordin hefur alltaf verið driffjöðurin í þessum stundum þar sem ég finn fyrir alls kyns tilfinningum. Það er eins og ég sé meira í tengslum við raunveruleikann í gegnum hana. Krakkarnir mínir eru farnir að hafa þessi áhrif á mig líka, að láta mig finna djúpar tilfinningar,“ segir Curtis.
Smá aðstoð á salerninu.
Teikningarnar af fjölskyldunni kallar han einfaldlega Us, eða Við, og gaf þær út í bók í desember síðastliðnum. Hann hefur unnið að þessum teikningum síðan árið 2011 en árið 2016 fengu teikningarnar meira vægi þegar hann og Jordin misstu fóstur.
„Fyrsta fósturlátið okkar var svo óvænt að ég vissi ekki hvernig ég ætti að vinna úr því. Þegar ég kom heim gat ég ekki hugsað um annað en að teikna það. Mér fannst það ekki raunverulegt fyrr en ég teiknaði okkur. Síðan starði ég á teikninguna og grét. Já, það var heilandi,“ segir Curtis, en teikningin sem um ræðir er hér fyrir neðan:
Átakanleg stund.
Hann túlkaði einnig tímann sem þau eyddu í að reyna að vinna úr sorginni í gegnum teikningarnar og á endanum kom að glaðari stundum hjá fjölskyldunni. Þessi teikning hér fyrir neðan sýnir þegar Curtis og Jordin komust að því að þau ættu von á barni á ný, en barnið, stúlka, er væntanlegt í mars á þessu ári.
Æðislegar fréttir.
Hér fyrir neðan má sjá nokkrar teikningar eftir Curtis en fleiri af verkum hans má sjá á heimasíðu hans.
Líf fræga fólksins er stundum úti um allt, á öllum miðlum og verða hinir minnstu atburðir að stórum fréttum.
Það eru samt sem áður nokkur stjörnupör sem hafa náð að halda einum af mikilvægustu dögunum í lífinu leyndum, sjálfum brúðkaupsdeginum.
1. Brúðkaupið tilkynnt á Instagram
Spéfuglinn Amy Schumer kom aðdáendum sínum á óvart fyrir stuttu þegar hún tilkynnti það á Instagram að hún hefði gengið að eiga kærasta sinn, kokkinn Chris Fischer. Amy birti fullt af myndum af athöfninni og skrifaði við þær einfaldlega: Jebb.
Leikaraparið Blake Lively og Ryan Reynolds giftu sig í laumi í Charleston árið 2012, en þau byrjuðu saman árið 2011. Blake og Ryan hafa ekki mikið opnað sig um brúðkaupið en brúðurin ku hafa ljómað í kjól frá Marchesa og hælum frá Christian Louboutin. Ryan klæddist jakkafötum frá Burberry. Þau deildu hins vegar nokkrum myndum úr veislunni á vefsíðunni Martha Stewart Weddings, þó mestmegnis af matnum og skreytingum.
Leikkonan Ellen Page birti mynd af höndum sínum og eiginkonu sinnar, Emmu Porter, á Instagram í byrjun janúar á þessu ári og tilkynnti þar með að þær hefðu látið pússa sig saman, enda báðar með giftingarhring á fingri.
„Ég trúi því ekki að ég geti kallað þessa undursamlegu konu eiginkonu mína,“ skrifar Ellen við myndina.
Leikarinn Ashton Kutcher gekk að eiga leikkonuna Milu Kunis árið 2015 og náðu þau að halda því leyndu fyrir umheiminum.
Ashton sagði seinna í samtali við spjallþáttadrottninguna Ellen DeGeneres að hann hefði skipulega verið að birta myndir af sér á samfélagsmiðlum til að rugla fjölmiðla í ríminu því parið vildi ekki mikil læti við athöfnina. Þau vildu ekki öskra heitin sín á þessum stóra degi. Mila sagði síðar í samtali við Conan O’Brien að giftingarhringarnir hefðu verið keyptir á Etsy.
Tónlistarhjónin Beyoncé og Jay-Z giftu sig við leynilega athöfn árið 2008 og hafa lítið sem ekkert tjáð sig um stóra daginn í fjölmiðlum síðan. Gestalistinn var styttri en gengur og gerist í stjörnuheimum og lögðu hjónin mikið upp úr því að skapa nánd, bæði við athöfnina og í veislunni sjálfri.
Leikkonan Margot Robbie játaðist Tom Ackerley í Ástralíu árið 2016. Sögusagnir fóru af stað um brúðkaupið eftir að Margot sást klædd bol sem á stóð Say I Do Down Under, eða Segðu Já í Ástralíu. Margot svaraði þessum sögusögnum með því að birta mynd af giftingarhringnum á Instagram.
Leikkonan Zoe Saldana giftist ítalska listamanninum Marco Pergo árið 2013 en í viðtali við The Hollywood Reporter stuttu síðar sagði Zoe að brúðkaupið hefði verið ákveðið með aðeins þriggja vikna fyrirvara.
Fyrirsætan Hunter McGrady er ein af þeim sem prýðir síður nýjasta heftis tímaritsins Sports Illustrated. Hunter er það sem kallað er fyrirsæta í yfirstærð en í viðtali við tímaritið Women’s Health segist hún vera mjög ósátt við að fólk setji samasemmerki milli holdafars hennar og að hún lifi óheilbrigðum lífsstíl.
„Það er kjaftæði. 100 prósent. Ég gæti gefið fólkinu í kringum mig upplýsingar um kólestórólið mitt, hjartað, allt og ég er fullkomin,“ segir Hunter.
Ólst upp á setti
Hunter steig fyrst af alvöru inní fyrirsætubransann þegar hún var sextán ára. Þá var hún í amerískri stærð 2, sem er evrópsk stærð 34. Hún segir að hún hafi ekki notið velgengni í bransanum eða fundið fyrir hamingju fyrr en hún tók þá ákvörðun að hætta að reyna að passa inní ákveðna stærð og taka líkamanum sem hún fæddist í fagnandi.
„Móðir mín var fyrirsæta, amma mín var fyrirsæta, frænka mín var fyrirsæta, faðir minn var leikari. Ég er fædd og uppalin í Los Angeles. Ég var alltaf á setti, ég var alltaf með myndavélar í kringum mig, ég var alltaf í tökum og það var eitthvað sem mig langaði alltaf að gera. Ég horfði upp til móður minnar og mér fannst hún vera (og finnst hún enn vera) glæsilegasta manneskjan í heiminum. Mig langaði að vera eins og hún,“ segir Hunter þegar hún rifjar upp barnæskuna.
„Fyrsta myndatakan mín var þegar ég var þriggja eða fjögurra ára gömul en ég byrjaði að gera þetta að aðalstarfi þegar ég var sextán ára,“ segir Hunter og bætir við að hún hafi verið rétt um fimmtíu kíló á þeim tíma.
„Núna er ég í stærð 16 og ég lít allt öðruvísi út. Þið getið ímyndað ykkur hve grönn ég var. Ég lifði svakalega óheilbrigðu lífi þegar ég var stærð 2. Ég var ekki mjó, ég var að svelta mig. Ég var í ræktinni í marga klukkutíma á dag. Hefðbundin máltíð hjá mér var salat með engri sósu og það var morgunmatur, hádegismatur og kvöldmatur – og jafnvel þá fékk ég samviskubit. Af því að mér fannst ég vera eyðileggja möguleika mína á að verða ofurfyrirsæta,“ segir Hunter.
Hún segist hafa fengið mjög mannskemmandi leiðbeiningar frá umboðsskrifstofum sem voru aldrei sáttar við útlit hennar.
„Maður er svampur þegar maður er sextán ára. Mér var sagt að ég væri of stór, að ég gæti ekki gert þetta, að ég þyrfti að léttast, að ég þyrfti að laga húðina mína. Þeir segja í raun og veru að maður þurfi að breyta öllu við sig sjálfan og koma aftur. Það er það sem er sagt við stúlkur og ég trúði því. Ég varð alvarlega þunglynd, eins og allir yrðu. Ég ákvað að þetta væri eitthvað sem ég gæti ekki gert. Það var ekkert meira sem ég gat gert. Ég hafði gefið mig alla í þetta og þetta var bara ekki í spilunum fyrir mig.“
„Við vissum ekki hve stór þú værir“
Það var ein stund sem breytti öllu fyrir Hunter og þá ákvað hún að taka sér frí frá fyrirsætustörfum og klára skóla.
„Ég var ráðin í myndatöku. Það var bolafyrirtæki í Los Angeles. Ég var ráðin og ég var svo spennandi. Ég hugsaði: Guð minn góður, loksins! Nú er komið að því! Ég bað móður mína um að keyra mig því ég var ekki komin með bílpróf og ég var svo spennt. Þetta var mín stoltasta stund. Við gengum inn og það var svo svalt að sjá ljósin og myndavélarnar og allt sem því fylgir. Allir að ganga um og þetta var eins og í kvikmynd. En allt í einu byrjuðu allir að stara á mig. Ég fann fyrir skrýtnum straumum á settinu. Framleiðandinn dró mig til hliðar og talaði við okkur móður mína og sagði:
„Jiminn, ég veit ekki hvernig ég á að segja þetta. Okkur finnst þetta leiðinlegt en við vissum ekki hve stór þú værir.“
Á þessari stundu var ég búin að upplifa svo mikið af vonbrigðum að ég hugsaði: Ég vil ekki stunda fyrirsætustörf ef þetta verður alltaf svona. Þetta var ekki þess virði.“
Eins og áður segir tók Hunter sér frí frá fyrirsætustörfum til að klára skóla og segir að sá tími hafi verið mjög góður.
„Ég hugsaði: Guð gaf mér þennan eina líkama, sjáum hvernig hann breytist. Ég varð þykkari, og ég var með slitför og appelsínuhúð og ég var farin að lifa heilbrigðara lífi. Mér leið betur og loksins var ég hamingjusamari. Ég naut lífsins og ég naut þess aftur að vera með fjölskyldu og vinum. Ég grét ekki kvölds og morgna,“ segir Hunter, sem kynntist fyrst fyrirsætum í yfirstærð þegar hún var nítján ára gömul.
„Þá var ég í stærð 14 og ég sagði: Mig langar að prófa þetta. Þetta er leið fyrir mig að prófa að vinna í fyrirsætuheiminum aftur. Mig langar að prófa. Ég gekk inn á Wilhelmina-umboðsskrifstofuna og fékk samning sama dag. Og ég er ekki að grínast, á einni viku bókaði ég þrjú mismunandi verkefni.“
Þú ert falleg. Þú ert þess virði
Í dag segist Hunter vinna í því á hverjum degi að hugsa jákvætt um líkama sinn.
„Lykilorðið er ferli. Þetta er eitthvað sem þarf að gera á hverjum degi. Ég held að aðalatriðið fyrir mig séu jákvæðar staðhæfingar. Og ég veit að þetta hljómar eins og klisja. Ég vakna á morgnana, spyrjið bara unnusta minn, og horfi í spegil og segi við sjálfa mig: Þú ert falleg. Þú ert þess virði. Dagurinn í dag verður góður dagur. Já, þú ert með bólu en hún er flott á þér. Ég segi þessa hluti við mig áður en ég fer út því ég þarf á þessu að halda. Vegna þess að heimurinn er þannig staddur á samfélagsmiðlum að allir eiga eftir að segja þér eitthvað annað. Af því að við lifum í heimi þar sem verið er að segja okkur að líta öðruvísi út. Að hafa öðruvísi hárgreiðslu. Að þú verðir falleg/ur ef þú missir nokkur kíló. Ef þú segir þessi orð ekki við þig sjálfa/n þá mun enginn gera það.“
Átta ára dóttir mín er búin að suða um að fá að búa til slím stanslaust síðustu mánuði. Af hverju? Jú, ALLAR YouTube-stjörnurnar eru að gera þetta!
Ég er búin að humma þetta af mér, því ég var búin að kanna þetta aðeins og fannst þetta svo fáránlega flókið. Svo var ég líka viss um að þetta myndi skapa svo mikla ringulreið á heimilinu að ég yrði fjögur ár að þrífa slím á bak við ofnana, úr hverjum krók og kima, úr nærbuxunum mínum. Ég sem sagt miklaði þetta svakalega fyrir mér.
Loksins fékk hún að búa til slím!
Við skyldum búa til slím
En svo kom vetrarfrí. Og eins og allir foreldrar vita þarf að vera vel skipulagður í svona fríi, þó aðeins um tvo daga sé að ræða. Maður þarf að vera með stíft prógramm frá morgni til kvölds til að þessi blessuðu börn fatti ekki að mamma og pabbi eru ekkert sérstaklega skemmtileg. Þannig að ég ákvað að nú væri komið að stóru stundi. Við skyldum búa til slím. Er ég lagðist á koddann kvöldið fyrir stóra slímdaginn fór um mig hrollur. Annað hvort yrði ég besta mamma í heimi eða algjörlega ömurlegur pappír. Eina sem ég get gert var að krossa fingur að ég myndi á einhvern undraverðan hátt aula mig út úr þessu með hjálp fyrrnefndra YouTube-stjarna og fullt af lími og raksápu.
Hneyksluð í Smáralind
Fyrstu skrefin.
Við byrjuðum daginn á að fara í verslunarferð. Ég var búin að lesa mér til um að það væri svakalega sniðugt að nota Borax í svona slímgerð. Ég hafði reyndar ekki hugmynd um hvað þetta Borax var en vissi að ég gat fengið það í verslun nokkurri í Kópavogi. Ég tilkynnti dóttur minni sigri hrósandi að ég væri búin að finna Borax! En henni virtist vera alveg sama. Var slímáhuginn að hverfa?
Næsta stopp var matvöruverslun þar sem við keyptum raksápu. Sko, það er mjög mikilvægt að kaupa froðu, ekki gel. Nei sko, ég var bara alveg með’etta! Svo fórum við í föndurbúð og keyptum stóra túbu af hvítu, rándýru hobbílími. Hér er mjög mikilvægt að kaupa lím sem er annað hvort glært eða hvítt og fljótandi.
Á þessum tímapunkti hélt ég að ég væri komin með það sem þyrfti. En þá stoppaði dóttir mín, yfir sig hneyksluð á miðju gólfinu í Smáralind og sagði hátt og skýrt:
„Mamma! Okkur vantar saline solution!“
Ókei, hún er átta ára! Hvernig vissi hún hvað saline solution var? Ég hefði ekki samþykkt þennan útúrdúr, því ég var handviss um að við þyrftum ekkert saltlausnina, nema mig vantaði linsuvökva hvort sem er. Þannig að saline solution, eða bara linsuvökvi, var keyptur í næsta apóteki.
Er við keyrðum heim, skalf ég af ótta. Þetta var bara að fara að gerast. Og mér fannst ég ekki vera undirbúin!
Hún ætlaði ekki að klúðra þessu
Þvílík einbeiting.
Við komum heim og í taugaveiklun minni tók ég til skál og skeið og byrjaði að gúggla af kappi í símanum mínum um hvernig við ættum að byrja herlegheitin. En viti menn, þegar ég leit upp frá símanum var dóttir mín búin að hræra í eitt stykki fullkomið slím. Án uppskriftar, án leiðbeiningar, án YouTube-stjarnanna sér við hlið. Svo hélt hún bara áfram. Hún gerði hvern slímskammtinn á fætur öðrum og var meira að segja byrjuð að leika sér með hitt og þetta til að sjá útkomuna.
Hvernig gat þetta hafa farið framhjá mér? Eftir að hafa horft á átrúnaðargoðin sín gera slím, í þeirri veiku von að hún myndi einhvern tímann fá að gera slím, hafði hún verið að læra, taka heilanótur og spá og spekúlera í slímgerð svo hún yrði vel undirbúin. Hún ætlaði greinilega ekki að klúðra þessu þegar dagurinn kæmi.
Linsuvökvi er málið
Og vitiði, við prófuðum í eitt skipti að nota þetta Borax sem hvorugt okkar vissi hvað var og komumst fljótt að því að linsuvökvi var algjörlega málið. Svo lékum við okkur með liti og höfðum svo fáránlega gaman. Þetta var æðisleg stund í eldhúsinu og ég held að mér hafi fundist skemmtilegast að sjá hvað dóttir mín var búin að mastera þetta, án þess að hafa nokkurn tímann gert þetta sjálf.
Vá, hvað þetta var gaman!
Og gleðin, maður minn. Hún var svo hamingjusöm. Kallaði mig heimsins bestu mömmu allavega tíu sinnum og var einhvers staðar langt uppí skýjunum yfir því að fá að búa til slím. Það var líka svo gaman að horfa uppá barnið mitt svona óstjórnlega einbeitt í leik og sköpun. Við erum að tala um að slímgerðin hófst rúmlega tólf á hádegi og leiknum lauk ekki fyrr en að verða fimm. Það kalla ég vel gert!
Þannig að ég mæli með slímgerð. Ég er ekki með neina heilaga uppskrift en hér kemur slumpið okkar.
Hráefni:
Slím er magnað!
Glært eða hvítt fljótandi lím Raksápa í froðuformi Linsuvökvi Matarlitur eða glimmer að eitthvað annað sniðugt
Aðferð:
Byrjið á því að sprauta lími í skál, sirka einn bolla. Sprautið síðan raksápu ofan í skálina og það má alveg vera slatti. Því meiri froða, því mýkra verður slímið. Hrærið þetta vel saman. Sprautið síðan smá linsuvökva saman við, bara hálfri eða einni teskeið í einu. Hrærið alltaf á milli. Þegar slímið er hætt að límast við skálina þá er það tilbúið. Síðan er matarlitnum bætt út í og hnoðað og hnoðað og hnoðað. Síðan má bara leika sér að vild og teygja og toga. Ef slímið er of klístrað er bætt smá linsuvökva við, en bara smá.
Best er að geyma slímið í loftþéttum umbúðum inni í ísskáp en við vitum ekki enn hve lengi það dugar. Þegar slímið er nýkomið úr ísskápnum þarf að hnoða það til svo það hitni aðeins og þá er það teygjanlegra og meðfærilegra. Góða skemmtun!
Seventeen perished and more than a dozen were wounded in the hail of bullets at Marjory Stoneman Douglas High School in Parkland
Sautján nemendur létust og að minnsta kosti fjórtán slösuðust þegar hinn nítján ára Nikolas Cruz hóf skothríð í skólanum Marjory Stoneman Douglas í Flórída fyrir stuttu.
Þessi harmleikur hefur enn og aftur vakið upp margar spurningar varðandi byssulöggjöf í Bandaríkjunum og var til dæmis haldinn mótmælafundur í Fort Lauderdale um helgina þar sem löggjöfinni var mótmælt. Emma Gonzales lifði af skotárásina og hélt áhrifamikla ræðu á fundinum en ræða hennar hefur farið eins og eldur um sinu á internetinu.
„Hver einasta manneskja hér í dag ætti að vera heima að syrgja. En í staðinn erum við hér saman því ef ríkisstjórnin okkar og forseti geta bara sent góðar hugsanir og beðið fyrir fórnarlömbunum þá er kominn tími til að fórnarlömbin breyti því sem þarf að breyta,“ sagði Emma á fundinum og uppskar mikið lófatak.
Hún hélt áfram og sagðist vera fullviss um að hún og skólafélagar hennar yrðu tekin fyrir í sögubókunum. En ekki bara í tölfræði um skotárásir í Bandaríkjunum heldur út af þeirri von hennar að þau yrðu fórnarlömb síðustu skotárásarinnar þar vestan hafs. Svo hafði hún sterk skilaboð til forseta Bandaríkjanna, Donalds Trump, og annarra stjórnmálamanna sem þiggja greiðslur frá Landssambandi byssueiganda (NRA):
„Skammist ykkar!“
Emma er orðin eins konar hetja á samfélagsmiðlum og hafa fjölmargir deilt ræðu hennar í von um að breyta lögunum. Hér fyrir neðan má sjá nokkur tíst um hina hugrökku Emmu:
If you told me that there would be a day when a high school student could beat the US President in a debate, I would have called you crazy.
Snjóbrettakonan Brenna Huckaby tók sér smá frí frá æfingum fyrir Vetrarólympíuleikana í PyeongChang og sat fyrir á síðum tímaritsins Sports Illustrated fyrir stuttu. Það væri svo sem ekki í frásögur færandi nema fyrir þær að sakir að Brenna er fyrsta konan sem misst hefur útlim sem hefur setið fyrir í tímaritinu.
Brenna var grein með osteosarcoma, sem er tegund af krabbameinsæxli í beini, árið 2010 og þurfti að taka af henni hægri fótlegginn. Í samtali við Cosmopolitan segir hún að þessi tími hafi verið afar erfiður en að hún hafi fljótlega ákveðið að umkringja sig jákvæðni.
Brenna situr fyrir í nýjasta hefti tímaritsins Sports Illustrated.
„Ég byrjaði að fara í ræktina og það byggði sjálfstraustið mitt upp hægt og bítandi, af því að ég gat gengið með hjálp gervifóts. Þetta hljómar ekki eins og mikið en ég reyndi að finna eitthvað sem ég hafði gaman að. Ég umkringdi mig fólki sem lét mér líða vel. Það var ekki auðvelt en manni verður að líða vel til að finna annað fólk sem lætur manni líða vel,“ segir Brenna.
Hún segir að viðbrögðin við myndunum í Sports Illustrated hafi verið mjög góð.
„Áður en ég fór í tökur hugsaði ég: Ég er að opna mig fyrir alls konar góðum hlutum en hugsanlega líka mikið af slæmum hlutum. Mig langaði að þetta yrði gert rétt. Mig langaði að vera fulltrúi kvenna með fötlun á réttan hátt.“
En hvaða ráð hefur hún til annarra kvenna með fötlun?
„Þú ert afl. Reyndu að láta aflimunina stöðva líf þitt – þú bara getur það ekki. Ráð mitt væri að muna hver þú ert að innan og að líkami þinn er tól. Ekki vera hrædd við að ýta við þér sjálfri og koma þér út.“
Við fallega strönd
Paradísin Maya Tulum í Mexíkó er vinsæl á meðal jógaunnenda. Ýmsar spa-meðferðir og heilbrigt mataræði eru í boði í fallegu umhverfi en Maya Tulum er við fallega ljósa strönd og því um að gera að panta herbergi með útsýni yfir hafið.
Grísk sveitastemning
Ertu í leit að afskekktum og friðsælum stað? Þá gæti Victor van Kooten´s Yoga Hall hugsanlega verið málið. Staðurinn er í friðsælli grískri sveit, í rólegum ólífulundi í Eftalou Valley, og skammt frá er að finna fallega og notalega strönd. Á hverjum morgni er boðið upp á jógakennslu og hugleiðsla býðst á kvöldin.
Kyrrðarstund með höfrungum
Það er líklega fátt betra til að endurhlaða batteríin en að stunda jóga, hugleiðslu og læra öndunaræfingar í sjónum. Á eyjunni Bimini á Bahamas er hægt að stunda óhefðbundið jóga og um leið njóta stundar í sjónum með höfrungum.
Sólarmegin í lífinu
Boðið er upp á ýmsar samsetningar spa-meðferða og einnig opna jógatíma á Como Shambhala Retreat á Maldíveyjum. Jógasetrið er sólarmegin á eyjunni með útsýni yfir sjóinn. Þeir sem kjósa sveigjaleika geta leigt sumarhús og útbúið eigin stundaskrá.
Krefjandi reynsla
Þeir sem kjósa krefjandi jóga gætu haft ánægju af Hatha-jóganámskeiðum sem kennd eru á Sivananda Yoga Vedanta Dhanwantari Ashram, nálægt Neyyar Dam Tiger Reserve í Kerala á Vestur-Indlandi. Þátttakendur iðka hugleiðslu, jóga og söng.
Kári Sverrisson ljósmyndari myndar vor- og sumarlínur Marinu Rinaldi og Chanel.
Kári Sverrisson hefur í nógu að snúast. Hann segir ýmislegt spennandi vera á döfinni en þó ekkert sem hann er tilbúinn til að ræða að sinni.
Óhætt er að segja að Kári Sverrisson hafi haft í nógu að snúast frá því að hann útskrifaðist með masters-gráðu í tískuljósmyndun frá London College of Fashion árið 2014, fyrstur Íslendinga. Nýverið var hann fenginn til að mynda vor- og sumarlínu Marinu Rinaldi, sem er stærsta og þekktasta „yfirstærðar“ fatamerkið í heiminum í dag og jafnframt í eigu ítalska tískurisans Max Mara.
„Listrænn stjórnandi Marina Rinaldi hafði samband við mig seint á síðasta ári og lýsti yfir áhuga á samstarfi. Hann var búinn að fylgjast með mér á Instagram í smátíma og sagðist vilja fá mig til að skjóta vor- og sumarlínu fyrirtæksins,“ segir Kári sem sló til og flaug mánuði seinna á vegum fyrirtækisins til Mílanó á Ítalíu þar sem myndatakan fór fram.
Var þetta stórt verkefni? „Við vorum um 15 manns á setti og þarna voru nokkrir sem flugu sérstakleg til Mílanó til að vinna að því, þar á meðal förðunarfræðingur annars staðar frá á Ítalíu, stílisti frá New York, hárstílisti frá London og módel frá London að nafni Ali Tate sem er fyrirsæta í yfirstærð og frekar þekkt nafn innan tískuheimsins. Þannig að já, ég myndi segja það.“
Mannlíf fékk leyfi til að birta myndir úr tískuþættinum sem Kári tók fyrir Marinu Rinaldi, en að hans sögn koma myndirnar til með að birtast í tískutímatímaritum og -blöðum á næstu dögum.
„Hann var búinn að fylgjast með mér á Instagram í smátíma og sagðist vilja fá mig til að skjóta vor- og sumarlínu fyrirtæksins.“
Spurður hvernig tilfinning hafi verið að vinna með svona stóru fyrirtæki viðurkennir Kári að það hafi verið svolítið stressandi til að byrja með. „Þemað í þættinum var safarí þannig að myndirnar áttu að líta út eins og þær væru teknar á heitri sólarströnd og fyrirtækið vildi nota flókna ljósauppstillingu til að fanga það. Lýsingu sem ég er ekki vanur að nota. Í ofanálag mættu háttsettir aðilar frá Marinu Rinaldi mættu á staðinn til að tryggja að allt gengi fyrir sig eins og til var ætlast. Ég fékk því kannski ekki alveg sama frelsi og yfirleitt þegar ég hef verið að mynda tískuþætti fyrir blöð eins og ELLE, Glamour og L’Officiel. En þetta var gaman og sem betur fer gekk allt upp. Þannig að þegar tökum lauk voru allir ánægðir.“
Þetta er ekki eina umfangsmikla verkefnið sem Kári hefur fengist við að undanföru. Nýverið vann hann fyrir Chanel. „Ég tók tvo tískuþætti á tveimur dögum, hvorn á sínum staðnum í London, á þekktum veitingastað og í rosalega flottu húsi í Notting Hill,“ lýsir hann. „Annar þátturinn var samstarfsverkefni með Dior og hinn með Chanel og bæði verkefni mjög skemmtileg enda er allt lagt í tökurnar þegar maður er að vinna með svona vönduð og dýr merki.“
Verkefni af þessu tagi, opna þau ekki alls konar dyr? „Algjörlega og þar að auki lærir maður heilmikið af því sem þeim, hvort sem maður er að mynda föt, fólk, mat og svo framvegis. Þetta er allt saman dýrmæt reynsla.“
Leysir kvenlega orku úr læðingi í vestfirskri náttúrufegurð.
Listakonan Kitty Von-Sometime, sem er hvað þekktust fyrir myndbandsþætti sína The Weird Girls Project þar sem konur eru í forgrunni, hefur tekið að sér að stýra sjálfsstyrkingarferð fyrir konur til Vestfjarða í haust.
„Ég ætla að aðstoða konur við að sleppa fram af sér beislinu, hjálpa þeim að finna sjálfar sig og hæfileika sína og leyfa þeim að njóta sín. Þetta er í raun sama hugmyndafræði og liggur til grundvallar The Weird Girls Project-myndbandsþáttunum sem ganga út á að efla sjálfstraust og líkamsmynd kvenna.“
Að sögn Kittyar gengur sú hugmyndafræði jafnframt út á viðbrögð við hinu óþekkta og óvænta. Þannig fái konurnar sem hún boðar í tökur aldrei að vita hvað sé í vændum. Að vissu leyti verði sami háttur hafður á í haust þar sem ákveðnum upplýsingum um ferðina verði haldið leyndum fram á síðustu stundu.
„Það sem ég get sagt á þessu stigi málsins er að þarna verða gestafyrirlesarar og kennarar og uppbyggilegar umræður. Þetta verður þriggja daga vinnustofa og gisting og matur eru innifalin. Að því loknu verður skotinn nýr myndaþáttur sem þátttakendum og konum á svæðinu gefst kostur að taka þátt í,“ segir hún full tilhlökkunar.
Það er Samfélagsmiðstöðin Blábankinn á Þingeyri sem stendur fyrir viðburðinum í samstarfi við Kitty, en frekari upplýsingar um verkefnið má nálgast á vefsíðunni www.theweirdgirlsproject.com/
VINSÆLU STARLUX-GÆÐADÝNURNAR FYRIR FERMINGARBARNIÐ
Hjá VOGUE FYRIR HEIMILIÐ er gríðalega mikið úrval af rúmum og rúmdýnum. Fyrir fermingarnar eru Starlux-gæðadýnur vinsælastar en þær eru hannaðar af okkar fagfólki og framleiddar erlendis. Þær eru með tvo stífleika, mjúkan og stífan, og því er hægt að snúa þeim við. Hver dýna er með sérstyrktum kanti, þannig að þegar unglingarnir sitja í rúminu heldur hún sínu lagi.
ANTÍKBLEIKT OG DÖKKGRÁR ERU MÓÐINS Í DAG – FLOTT Í UNGLINGAHERBERGIÐ
Antíkbleiki liturinn er mjög vinsæll og kemur mjög vel út með dökkgráa litnum.
Eins og sjá má á myndinni (hér að ofan) þá eru þessi fallegu nettu sófar fáanlegir hjá VOGUE FYRIR HEIMILIÐ, mjög smart inni í unglingaherbergi. Svo er frábært að geta valið gluggtjöld sem passa vel inni í umhverfið.
FJÖLBREYTTIR FYLGIHLUTIR OG LITAGLEÐIN Í FYRIRRÚMI
Einnig eru fáanlegir fallegir fylgihlutir, má þar meðal annars nefna skápúðana sem eru frábærir til að hafa þegar unglingurinn er að lesa eða er í tölvunni. Það getur verið gaman að velja áklæði í stíl fyrir dívaninn og höfuðgaflinn. Einnig er hægt að velja hrúgald sem er hægt poppa upp í skemmtilegum gulum lit eins og sjá má á myndinni. Þessi grái litur á rúminu er mjög vinsæll hjá ungu kynslóðinni. Tauið nýtur sífellt meiri vinsælda þegar rúm er valið.
SVEFNSTÓLLINN LOKI
Svefnstóllinn Loki er hönnun frá Snæland en hann nýtur gríðarlegrar vinsældar bæði í unglinga-herbergið og sem aukasvefnstæði hjá ömmum og öfum. Hægt er að velja áklæði úr fjölmörgum litum og hægt að fá hann í nokkrum breiddum.
VOGUE FYRIR HEIMILIÐ
Síðmúla 30
108 Reykjavík
Sími: 533-3500
WWW.VOGUE.IS
VOGUE FYRIR HEIMILIÐ
Hofsbót 4
600 Akureyri
Sími: 462-3504
WWW.VOGUE.IS
Skekkt líkamsímynd og óraunhæfar væntingar stóðu í veginum.
Hrafnhildur Ýr Víglundsdóttir er komin áfram í Söngvakeppninni 2018 ásamt sönghópnum Fókus.
Hrafnhildur Ýr Víglundsdóttir tekur þátt í Söngvakeppninni 2018 ásamt sönghópnum Fókus. Lagið þeirra, Aldrei gefast upp, komst áfram í úrslitakeppnina.
„Meðlimir Fókushópsins kynntust við gerð raunveruleikaþáttanna The Voice Ísland veturinn 2016-2017. Þegar þáttunum lauk höfðum við öll mikinn áhuga á að vinna meira saman og höfum verið að koma fram hér og þar síðan þá,“ segir Hrafnhildur sem ólst upp á bóndabæ í Húnavatnssýslu frá fimm ára aldri. „Þar græddi ég stjúppabba og tvo bræður og ólst upp á yndislegum stað í kringum húsdýr, fallega náttúru, álfa og huldufólk. Eldri bóndinn, sem varð afi minn, var mjög andlegur maður. Á sjötugsaldri breiddi hann alltaf ullarpeysuna sína á gólfið í stofunni, gerði jógaæfingar og setti fæturna aftur fyrir haus. Ég bað fljótlega um mína eigin lopapeysu svo ég gæti gert æfingar með honum.“
Þótt Hrafnhildur hafi lengi stundað söng og víða komið fram síðastliðin 23 ár var það ekki fyrr en nýlega sem hún varð þekkt nafn. „Ég held að ástæðan hafi verið sambland af lélegu sjálfstrausti, skekktri líkamsímynd og óraunhæfum væntingum bæði til sjálfrar mín og annarra. Þegar sjálfsmyndin er brotin þarf oft mikla vinnu og langan tíma til að trúa því að maður geti haft eitthvað eftirsóknarvert að bjóða. Ég fór að vinna mikið í sjálfri mér fyrir 10 árum og hef mest stuðst við óhefðbundnar aðferðir því þær hefðbundnu hentuðu mér illa. Ég hef mikla trú á að maður geti læknað svo margt sjálfur með því að hugsa vel um sálina sína og læra að elska sig. Þótt sjálfsvinnu sé aldrei alveg lokið get ég samt sagt núna að ég sé ástfangin af sjálfri mér og standi sterk í því sem ég geri,“ segir Hrafnhildur.
Ýtarlegt viðtal er við Hrafnhildi í 7. tbl. Vikunnar.
Runólfur ásamt tveimur yngstu dætrum sínum, þeim Sigrúnu Erlu Runólfsdóttur og Lönu Sóeyju Magnúsdóttur.
Runólfur Ágústsson, framkvæmdastjóri, er 54 ára og á sex börn og stjúpbörn á aldrinum þriggja ára til þrítugs. Hann er kvæntur Áslaugu Guðrúnardóttur, markaðs- og kynningarstjóra Listasafns Reykjavíkur. Runólfur er í Félagi eldri feðra og er viðtali í nýjasta tölublaði Mannlífs ásamt þremur öðrum félögum.
„Ég var 24 ára þegar frumburðinn minn hann Skarphéðinn fæddist. Það var um hábjarta sumarnótt á sjúkrahúsinu á Akranesi. Eftir fæðinguna keyrði ég heim upp í Borgarfjörð og tók upp í einmana erlendan puttaling þarna um 2 leytið um nóttina. Sá maður man væntanlega enn eftir þessum hálftíma upp í Borgarnes enda fékk hann ítarlega lýsingu á bæði fæðingu, dásemd barnsins og tilfinningum hins nýbakaða föður,“ segir Runólfur þegar hann er spurður um fæðingu frumburðarins.
„Á þessum tíma tíðkaðist ekki að feður tækju fæðingarorlof og er það líklega stærsta breytingin á því að verða pabbi í dag og þá. Þegar Sigrún Erla, sem við köllum reyndar oftast Lukku, fæddist fyrir þremur árum tók ég að sjálfsögðu fæðingarorlof og ég verð líka að játa það að ég er líklegast mun betri faðir í dag en þá. Það gerir þroskinn. Sem eldri faðir forgangsraða ég öðruvísi og ver mun meiri tíma með yngri börnunum mínu en ég gerði fyrir 20-30 árum með þeim eldri, þegar ég var enn þá með þann metnað að sigra heiminn og taldi störf mín að þeim málum mikilvægari en að vera til staðar fyrir börnin mín og fjölskyldu.“
Hann segir að önnur jákvæð breyting sé gæðin á leikskólunum. „Þar held ég, og miða við reynslu mína af Lukku, og Lönu eldri systur hennar sem er 9 ára í dag, á Laufásborg, að leikskólinn sé líklega framsæknasta og besta skólastigið á Íslandi. Gæði starfs og náms þar eru allt önnur og betri en þegar synir mínir voru í leikskóla fyrir 15-25 árum. Gaman væri að geta sagt hið sama um grunn- og framhaldsskólann, en ég held að því miður hafi þar orðið þróun í öfuga átt námslega séð, þótt vonandi líði börnum betur í sínum skólum í dag en í þeim eineltispytti sem þá var að finna víða í grunnskólum landsins.“
„Pabbi, góðan daginn!“
Runólfur telur sig einstaklega lánsaman einstakling að verða þeirrar gæfu aðnjótandi að eignast barn, kominn yfir fimmtugt. „Þetta er bónus sem fáir njóta. Auðvitað hefur þetta breytt öllu í okkar lífi sem var bara orðið frekar þægilegt. En hver vill ekki vakna fyrir sjö á morgnana og takast á við einstaklega ákveðna og þrjóska þriggja ára dóttur sína um hvað hún vill borða, í hvaða nærbuxur hún vill fara, Möggu Pálu sé lof fyrir skólabúninginn, og hvað hún ætlar og vill almennt séð í lífinu – þessa einu og hálfu klukkustund sem hún hefur til að ráðskast með aldraðan föður sinn og aðeins yngri móður þar til Hjallastefnan tekur við þessari kæru vinkonu úr höndum foreldra hennar.
Ég vildi ekki skipta á þessu fyrir neitt annað, enda kominn á þann aldur að frami og ferðalög skipta minna máli þar sem enginn staður er til hvar maður hittir ekki fyrir sig sjálfan. Það gerist þessa dagana kannski ekki á stangveiðum á Kyrrahafseyju, við sólarlag hjá Uluru eða í safari í Ngorogoro, heldur bara á Haðarstígnum klukkan 6:40 á mánudagsmorgni þegar lítil og björt stúlkuröddin segir stundarhátt innan úr herberginu sínu: „Pabbi, góðan daginn!“ Þannig líður lífið áfram dag fyrir dag. Þannig er núið hjá hinum aldraða föður. Og það er bara býsna gott.“
Gott mannval
Eins og fram kom í inngangi er Runólfur félagi í hinum óformlegan félagsskap, Félag eldri feðra, sem gerir þá kröfu til félagsmanna að þeir hafi verið orðnir fimmtugir þegar þeir eignuðust sitt síðasta barn. „Við tökum okkur hóflega alvarlega, en erum með hóp á Netinu. Þetta er skemmtilegur félagsskapur enda þarna að finna mikið og gott mannval. Almennt erum við á því að það fari metnaðargjörnum ungkörlum mun betur að vera og verða feður þegar þeir hafa gert sér grein fyrir því með aukum þroska og aldri að börnin okkar, líf okkar, fjölskylda og við sjálfir, skiptir mun meira máli en utanaðkomandi viðurkenning, efnisleg gæði eða svokallaðar tómstundir. Slíkar stundir eru í lífi virkra eldri feðra hvorki margar né tómar. Okkur leiðist ekki og lífið er gott.“
Fyrir nokkrum árum bökuðum við fjórar mismunandi súkkulaðikökur og fimm forfallnir kökusælkerar smökkuðu afraksturinn og gáfu einkunn. Skemmst er frá því að segja að þessi uppskrift stóð uppi sem sigurvegari og flestir í dómnefndinni fengu sér auka sneið af henni eftir að hafa borðað fjórar seiðar af súkkulaðikökum. Það er því óhætt að mæla með þessari kökur, hún er dásamleg með ísköldu mjólkurglasi eða eðal kaffi og einnig er hún góð með Earl Gray tei.
DJÖFLATERTA 10-12 sneiðar
BOTNAR: 80 g súkkulaði, 130 g smjör, mjúkt 280 g púðursykur 3 msk. kakó 3 egg 2 tsk. matarsódi 280 g hveiti 1 dl jógúrt 2 -3 tsk. vanilludropar 2 dl sjóðandi vatn
Gómsæt og girnileg.
Hitið ofninn í 180°C. Bræðið súkkulaðið yfir vatnsbaði. Hrærið saman smjör og sykur þar til það er mjög vel samlagað eða í 5-6 mín. Bætið eggjum út í einu í einu og hrærið mjög vel saman við. Bætið bræddu súkkulaði út í og hrærið saman við.
Sigtið hveiti, kakó og matarsóda saman og bætið út í ásamt jógúrt og vanilludropum, hrærið þetta saman þar til allt er vel blandað. Hellið sjóðandi vatni út í á meðan hrærivélin gengur á lægstu stillingu og hrærið það saman við deigið. Smyrjið 2 x 24-26 cm form og skiptið deiginu í formin. Bakið botnana í 20-25 mín. Takið botnana úr formunum og látið þá kólna.
Leggið botnana saman með hluta af kreminu og þekið síðan kökuna með kreminu. Það er fallegt að hafa kökuna slétta en líka flott að gera lautir í kremið með hníf. Skreytið annaðhvort með rifnu súkkulaði eða kókosmjöli.
KREM: 200 g smjör, mjúkt 1 dl kakó 350 g flórsykur, sigtaður ½ dl mjólk 1 tsk. vanilludropar ½ tsk. skyndikaffiduft
Hrærið allt saman og leggið kökuna saman með kreminu.
Berið kökuna fram með þeytturm rjóma ef vill.
Uppskrift / Sigríður Björk Bragadóttir Stílisti / Hanna Ingibjörg Arnarsdóttir Mynd / Aldís Pálsdóttir
Bandarísk trans kona gat gefið nýfæddu barni sínu brjóst í sex vikur eftir að hún fékk sérstaka mjólkunarmeðferð á sjúkrahúsi í New York.
Þetta er ekki fyrsta trans konan sem gefur brjóst en læknar segja að þetta sé í fyrsta sinn sem þetta hefur verið skjalfest í læknabókmenntum, en þessi nýjasta skýrsla er birt í tímaritinu Transgender Health.
Samkvæmt tímaritinu sagði konan sem um ræðir, sem er þrítug, við lækna í New York að hún vildi gefa brjóst af því að maki hennar, sem gekk með barnið, vildi það ekki. Þá var maki hennar kominn fimm mánuði á leið. Hún var sett á lyfjakúr, sem enn var á tilraunastigi, en meðfram honum þurfti hún til dæmis að pumpa brjóst sín. Innan mánaðar gat hún framleitt nokkra mjólkurdropa en innan þriggja mánaða, tveimur vikum áður en barnið átti að fæðast, var hún að framleiða átta únsur af mjólk á dag, tæplega 240 millilítra. Þegar barnið svo fæddist gat hún séð um að veita barni sínu næringu í sex vikur.
Læknarnir sem sáu um þessa meðferð unnu með sérstakri deild fyrir trans fólk innan Mount Sinai-sjúkrahússins. Zil Goldstein, hjúkrunarfræðingur og læknirinn Tamar Reisman skrifa í skýrslu sína að þessi meðferð sýni að það sé hægt að koma mjólkurframleiðslu af stað hjá trans konum sem vilja gefa barni brjóst.
„Við trúum því að þetta sé fyrsta formlega skýrslan í læknabókmenntum um að mjólkurmyndun sé komið af stað í trans konu,“ segja þau í skýrslunni.
Seinni undakeppni Söngvakeppninnar fer fram í dag, laugardaginn 17. febrúar. Þar keppa sex lög um sæti í undanúrslitunum 3. mars, þar sem kemur í ljós hvaða lag fer fyrir Íslands hönd í Eurovision í Portúgal í maí.
Líkt og með fyrri undankeppnina síðasta laugardag, fengum við Eurovision-sérfræðingana Flosa Jón Ófeigsson og Kristínu Kristjánsdóttur til að spá í spilin um hverjir komast áfram í undanúrslit á laugardaginn. Þau voru nokkuð sannspá síðast og spáðu því að Fókus hópurinn og Heimilistónar kæmust upp úr undankeppninni.
Sjarmatröll sem á ekki eftir að klikka
Golddigger – Aron Hannes
Flosi: „Þetta er klárlega fjörugasta lagið í keppninni í ár finnst mér. Mér finnst þetta vera mest „current“ lagið í ár. Ég gjörsamlega féll fyrir Aroni Hannesi í fyrra. Hann er alveg búinn að sanna það að hann er pottþéttur flytjandi í beinni útsendingu, þannig að hann á ekki eftir að klikka. Hann er líka orðinn betri í að nota myndavélina. Hann er tilbúinn í þetta. Þetta er lagið sem ég held að flestir í keppninni séu að bíða eftir að sjá af því að þeir halda að þetta sé atriðið sem þeir eru að fara að keppa við. Svo lengi sem konseptið virkar í atriðinu þá held ég að hann eigi eftir að fara í alla leið í einvígið.“
Kristín: „Þetta er bara fínasta lag, með því skásta í ár. Það er húkkur í þessu og pínu djamm. Einn írskur vinur minn sagði að þetta minnti á framlag Belgíu árið 2016 en svo er líka Bruno Mars-fílíngur í þessu. Ég er nokkuð örugg með að hann fari í úrslitin. Aron er rosa sjarmatröll.“
„Hún grætir mig eiginlega í hvert skipti sem hún syngur“
Óskin mín – Rakel Pálsdóttir
Flosi: „Rakel mín er búin að vera í uppáhaldi síðan við tókum þátt saman í X Factor fyrir löngu, löngu síðan. Hún grætir mig eiginlega í hvert skipti sem hún syngur svona fallega ballöðu. Það er engin rödd sem er svona hugljúf og einlæg í keppninni í ár. Hún syngur og segir söguna bara með því að opna munninn á sér. Ég held að þetta sé svarti péturinn í þessum riðli.“
Kristín: „Þetta er rosa sætt lag og mikil tilfinning í því. Ég held að þetta verði engin svakaleg sprenging en það þarf alltaf að vera eitt svona lag. Ég held að hún fari ekki áfram. Hún á örugglega eftir að heilla helling af fólki enda hörkusöngkona. En það er ekki alveg nógu mikill húkkur í laginu.“
Stefanía og diskókúlurnar
Svaka stuð – SLAY
Flosi: „Þær Stefanía, Agnes og Regina eru æðislegar. Þær munu negla þetta. Stefanía er einn besti söngvari sem er að performa núna. Hún er með svakalega og fallega rödd og þær Agnes og Regina eru diskókúlurnar í kringum hana. Það er rosalega gaman að fylgjast með þeim. Lagið sjálft grípur mig ekki en lagið þarf ekki alltaf að vera gott til að fara áfram. Ef hún fer áfram er það af því að hún er frábær flytjandi. Lagið greip mig ekki við fyrstu hlustun en það er að vinna á. Ég fer alveg í svaka stuð þegar ég hlusta á það.“
Kristín: „Mér finnst þetta svolítið skemmtilegt. Ég get alveg dansað með Breezer við þetta lag. Þetta er bara ótrúlega hresst, ekkert að þessu. Ég hugsa að það eigi séns ef þær eigna sér sviðið eins og enginn sé morgundagurinn. Þær eru voðalega hressar. Þetta lag býður uppá attitjúd og Stefanía hefur svo mikið af því. Ég vil alveg sjá þær áfram.“
Danska uppskriftin fer ekki áfram
Brosa – Gyða Margrét Kristjánsdóttir og Þórir Geir Guðmundsson
Flosi: „Þetta er ofboðslega hugljúft og skemmtilegt lag. Þetta er danska uppskriftin af Eurovision lagi; gítar, útileiga og góður fílíngur. Ég veit ekki hvort þjóðin mun fíla það eða ekki. Ég verð ekkert fúll ef það fer áfram, en þetta eru ungir krakkar sem eru að fara að syngja og verður að koma í ljós hvort þau í raun og veru höndla þessa pressu sem er í þessar þrjár mínútur. Þetta veltur allt á flutningnum þeirra. Það þarf bara eitt feil og þá missir fólk áhugann. Eins og er, er ég meira á því að það komist ekki áfram.“
Kristín: „Þau eru voða krúttleg. Þetta stendur og fellur með flutningnum en ég held að þau komist ekki áfram.“
Dagur er algjör þruma
Í stormi – Dagur Sigurðsson
Flosi: „Þetta er atriði sem ég er mjög spenntur að sjá vegna þess að hann veit ekkert hvað hann er kominn í. Hann veit ekki hvað Eurovision búbblan er. Það er það skemmtilega við hann. Þarna munum við ekki hafa áhyggjur af flutningi og ég er aðallega spenntur að sjá hvort atriðið í heild gefur manni gæsahúð eins og röddin hans. Lagahöfundurinn Júlí Heiðar er líka algjör snillingur og okkar vonarstjarna. Hann veit alveg hvað hann er að gera. Ef að þeir halda rétt á spilunum þá er þetta lag sem gæti farið alla leið til Portúgal. Það eina sem getur komið í veg fyrir það er að það er annað lag komið í úrslit með svipað element; strákur á sviði sem syngur fallega. Þessi tvö atriði gætu tekið frá hvort öðru. En það er gaman hvað Dagur er þakklátur. Hann er með nákvæmlega sama þakklæti og Ari. Það er gaman að fylgjast með þeim og þeir eru ekki með neina dívustælar. Þeir eru mjög auðmjúkir og einlægir.“
Kristín: „Hann er æðislegur þessi strákur. Mér finnst þetta lag svolítið flott, það vann svolítið á. Hann sjálfur er svo mikil þruma. Úr því Ari fór áfram út á sig sjálfan og röddina þá er Dagur að fara að fljúga áfram. Það er eitthvað að ef hann fer ekki áfram. Hann kann þetta. Hann er ekki að standa uppá sviði í fyrsta sinn heldur hefur hann troðið upp margoft út um allar trissur. Hann veit nákvæmlega hvað hann er að gera og þetta er bara enn eitt giggið.“
„Autotune er besti vinur þessara krakka“
Hér með þér – Egill Ploder Ottósson og Sonja Valdin
Flosi: „Nú er ég maður sem er mjög gagnrýninn á raddir. Ef fólk getur ekki sungið, þá á það ekki að vera í svona keppni. Egill og Sonja eru frábærir skemmtikraftar. Lagið per se er ekkert slæmt, þó ég fíli eiginlega öll lögin betur sem þau hafa gefið út. Mér finnst bara hræðilegt að hlusta á þau. Vinsældarlega séð ætti þetta að fljúga áfram. Þau eiga svakalegan aðdáendahóp á aldrinum 16 til 25 ára sem að þau eru að ná til. En munu þessir krakkar kjósa dúett sem er rammfalskur? Ég bara veit það ekki. Ég vona að ég hafi rangt fyrir mér því ég vil ekki að neinn líti illa út. Ef að þú púlla flutninginn í beinni útsendingu gætu þau farið í undanúrslit í staðinn fyrir Rakeli. Ég verð hins vegar að segja að Egill og Sonja eru mjög vel undirbúin í öllum viðtölum og með markaðshlutann alveg á hreinu. Það gæti fleytt þeim langt.“
Kristín: „Aaa, nei. Ég er búin að heyra í þeim „live“ og autotune er besti vinur þessara krakka. Þau gætu halað inn stigum út af aðdáendahópi Áttunnar en ég held að það sé borin von að þau komist lengra. Þeirra aðdáendahópur er vanur því að þau séu með svo peppuð lög og tvíræðan texta, svo kemur þessi kjút ástaróður. Þau gætu halað inn eitthvað af stigum en ég held að þau fari ekki alla leið.“
Eftir að hafa horft á fyrri undankeppnina eru Flosi og Kristín ekki sammála um hvaða lag eigi eftir að fara alla leið til Portúgal.
Flosi: „Miðað við laugardaginn síðasta eiga Heimilistónar eftir að taka þetta. Og ég vil nýta tækifærið og senda mikið hrós til RÚV sem hafa gert undankeppnina alltaf stærri og stærri og flottari og flottari.“
Kristín: „Ég held að Heimilistónar séu ekki að fara alla leið. Ég væri ekki hissa á að þær fari í einvígið. Ég gæti trúað því að þetta yrði á milli Arons og Fókus hópsins, en ég ætla ekki að útiloka neitt.“
Jakob Frímann með dætrum sínum Katrínu Borg, 5 ára, og Jarúnu Júlíu, 10 ára.
Jakob Frímann Magnússon, tónlistarmaður og framkvæmdastjóri Miðborgarinnar okkar, var 59 ára gamall þegar hann eignaðist yngsta barnið sitt en þá voru liðin 35 ár síðan elsta dóttir hans fæddist. Jakob er einn af fjórum úr Félagi eldri feðra sem eru í viðtali í nýjasta tölublaði Mannlífs.
„Ég var 34 ára þegar Bryndís mín kom í heiminn og tilfinningin var stórkostleg. Mér fannst ég upplifa kraftaverk og upplifunin var miklu stærri og magnaðri en ég bjóst við,“ segir Jakob sem á fjórar dætur; Katrínu Borg, 5 ára; Jarúnu Júlíu, 10 ára; Bryndísi, 30 ára og Ernu Guðrúnu sem hann ættleiddi og er nú 40 ára. Eiginkona Jakobs og móðir yngstu dætrana er Birna Rún Gísladóttir viðskiptafræðingur sem starfar hjá Arion banka.
„Þegar Katrín Borg fæddist var ég 59 ára og upplifunin var afar sterk sem fyrr. Eins og mér fannst ég njóta þess í botn þegar frumburðurinn kom í heiminn þá virðist mér ég nú hafa meiri þroska og burði til þess að njóta þess til hlítar frá degi til dags að eiga ung börn. Það hefur satt að segja veitt mér alveg ólýsanlega gleði og viðvarandi hamingju sem ég þakka af auðmýkt á degi hverjum. Ég er á þeim stað í lífinu núna, að ég nýt upplifunarinnar svo sterklega að mig hefði í raun aldrei órað fyrir því. Við erum alveg einstaklega heppin með börnin okkar og leggjum okkur fram um að rækta þau sem best við getum, fyrst og fremst með því að umvefja þau ómældum kærleika. Það er ekki til neitt dásamlegra í lífinu en að halda á barninu sínu og umvefja það umhyggju og ást í sinni tærustu mynd.
Vinir og ættingjar hafa samglaðst okkur frá fyrsta degi og ég hef aldrei fundið fyrir efasemdum eða fordómum neins konar, þvert á móti. Ég á frábæra konu með stóra og skemmtilega fjölskyldu. Þaðan er nú stoðkerfi fjölskyldunar fyrst og fremst sprottið; ótal svilkonur, frænkur og vinkonur reiðubúnar að passa dömurnar okkar þegar svo ber undir, að ekki sé minnst á mína frábæru tengdamóður Sigurlaugu Þórðardóttur, hana ömmu Systu, sem ávallt er boðin og búin þegar mikið liggur við.“
Mælir með þessu
Jakob segist ekki finna fyrir þreytu, heldur þvert á móti. „Ég bý sem betur fer yfir mikilli orku og hef alltaf gert. Það hefur tvímælalaust gefið mér aukna orku að eignast þessar ljósverur mínar og gleðigjafa. Börnin héldu í raun ekki vöku fyrir okkur nema rétt eftir fæðingu, vorið 2007 og haustið 2012. Ég mæli eindregið með því við þá sem eiga ungar heilbrigðar konur og hafa til þess aðstæður, að eignast börn fram eftir aldri. Það er að mínu mati bæði yngjandi, mannbætandi og einstaklega gefandi. Föðurhlutverkið er nú einu sinni hið mikilvægasta í mínu lífi og ég elska börnin mín alveg óendanlega. Að svæfa þau yngstu með frumsömdum ævintýrum og vakna með þeim á morgnana og aka í skólann, það eru bestu stundir dagsins. Þetta eru svo ómetanleg lífsgæði að mig hefði aldrei órað fyrir því hve mikillar gæfu ég yrði aðnjótandi. Ég hlakka til hvers nýs dags með þessum elskum öllum. Við erum afar samrýmd fjölskylda og njótum hins einfalda í lífinu saman, ekki síður en að ferðast og skemmta okkur við söng og leik. Lífið er sannarlega ljúft þeim föður sem hér er annars vegar.“
Íslenska framleiðslufyrirtækið Hero Productions hafði umsjón með tökum á nýrri auglýsingaherferð með einni skærustu stjörnu Hollywood.
Búi Baldvinsson er eigandi framleiðslufyrirtækisins Hero Productions sem hefur á skömmum tíma unnið með fjölda stórra fyrirtækja, Samsung, Huawei, Nissan, Mercedes Benz, Prince EA, Tineshe, Swedish House Mafia, Aerie, Fabletics, Warner Brothers, Netflix, BBC, National Geographic, Arla, Canon og fleirum.
„Þegar svona stór stjarna er orðin hluti af verkefninu þá er það auðvitað ákveðin staðfesting á því maður sé á réttri leið. Það er því ekki annað hægt en að fyllast stolti,“ segir Búi Baldvinsson eigandi framleiðslufyrirtækisins Hero Productions, sem hafði umsjón með tökum á nýrri auglýsingu fyrir stóran, ónefndan símaframleiðanda fyrr í mánuðinum, en það er engin önnur en kvikmyndaleikkonan Gal Gadot sem fer með aðalhlutverkið.
Gal Godot er rísandi Hollywood-stjarna eftir leik sinni í DC kvikmyndunum Batman vs. Superman, Justice League og Wonder Woman, en sú síðastnefnda var ein af tekjuhæstu kvikmyndum síðasta árs. Í auglýsingunni ferðast Gadot um Ísland og dregur í leiðinni upp farsímann sinn sem framkallar töfrandi ævintýraheim Íslands. Auglýsingunni er leikstýrt af ísraelska leikstjóranum Eli Sverdlov og skotin af Emmanuel Kadosh en Hero Productions hafði umsjón með tökum á Íslandi.
„Þegar svona stór stjarna er orðin hluti af verkefninu þá er það auðvitað ákveðin staðfesting á því maður sé á réttri leið. Það er því ekki annað hægt en að fyllast stolti,“
„Við kvikmynduðum meðal annars við Hjörleifshöfða og Skógarfoss, á Stokksnesi og Höfn í Hornafirði, í íshelli og í Reynisfjöru þannig að þetta var heilmikið púsl,“ lýsir Búi og viðurkennir að á ýmsu hafi gengið meðan á tökum stóð. „Það var algjört vonskuveður á öllu Suðurlandi. Á meðan við vorum á Stokksnesi geisaði til dæmis stormur sinn hvoru megin við fjallið. En veðurguðirnir voru okkur einstaklega hliðhollir því það var algjört logn akkúrat á svæðinu þar sem við vorum við tökur.“ Miðað við aðstæður hafi hlutirnir gengið eins og í sögu og bæði tökulið og heimamenn lagst á eitt að um að láta allt ganga upp.
En hvernig kom til að Hero Productions fékk þetta verkefni? „Við unnum með leikstjóranum og tökumanninum við gerð auglýsingar fyrir erlenda arkitektastofu sem varkvikmynduð upp við Jökulsárlón veturinn 2016. Þeir urðu þá báðir alveg yfir sig hrifnir af því hvernig við gátum unnið við erfiðar aðstæður og fannst því bara engir aðrir koma til greina þegar kom að því að gera þessa auglýsingu.“
Spurður hvenær standi svo til að frumsýna segir Búi tökur nú standa yfir með Gadot í Los Angeles og þeim verði haldið áfram í Þýskalandi. „Auglýsingin ætti svo að fara í loftið í byrjun sumars,“ svarar hann hress.
Sigurður Steinar er á hraðri uppleið í tískuheiminum eftir frábæran árangur í Elite Model Look-fyrirsætukeppninni í Mílanó. Mannlíf tók þennan hressa og efnilega 17 ára Reykvíking tali.
Árlega halda yfir 30 lönd undankeppni fyrir Elite Model Look sem þúsundir keppenda taka þátt í. Af þeim 64 þátttakendum sem komust áfram í ár stóðu uppi 15 sigurvegarar, 10 stúlkur og 5 strákar. Sigurður Steinar var einn fimm sigurvegara í hópi drengja en ekki er raðað sérstaklega í sæti fyrir utan það efsta. Sigurvegararnir fá allir samning við Elite International sem tryggir þeim verkefni í kjölfarið.
Hvernig tilfinning var að ná svona langt í keppninni? „Vá, þegar ég stóð á sviðinu og það var bara eitt sæti eftir og svo heyrist í hljóðkerfinu: „From Iceland, Siggi!“ Það var eitt af skrítnustu augnablikum sem ég hef upplifað! Við höfðum öll fengið fyrirmæli um að halda „kúlinu“ ef við kæmumst áfram, þannig að ég gekk bara fram og tók hring með hinum efstu 15 módelunum en rosalega langaði mig til að fagna!“
Áttirðu von á þessu? „Alls ekki. Það voru svo rosalega margir og flottir krakkar í þessari keppni.“
Var keppnin erfið? „Já, vikuna fyrir keppni þurftum við að vakna klukkan 7 á hverjum morgni, skella í okkur morgunmat og flýta okkur út í rútu sem ók með okkur í risastórt stúdíó þar sem við tóku strangar æfingar. Til dæmis fengum við strákarnir flestir blöðrur á fæturna bara af því að æfa göngulagið í allt of þröngum skóm. Stelpurnar þurftu að ganga í hælaskóm sem var örugglega enn verra. Svo var æft alveg til klukkan 9 öll kvöld. Þannig að þetta var ein af erfiðari en skemmtilegri vikum lífs míns!“
Hvernig kom til að þú tókst þátt? „Þetta byjaði allt hjá Eskimo Models á Íslandi. Fyrir þeirra tilstilli komst ég á samning hjá Elite í París og þar var ákveðið að senda mig beint í stóru lokakeppnina í Mílanó.“
Hafa einhverjar dyr opnast í kjölfarið? „Já, ég er strax kominn á samning hjá Elite Paris og Elite Milano og var að undirrita samning við Elite London. Í janúar tók ég svo þátt í Men’s Fashion Week Winter í París þar sem ég vann fyrir Loewe og ég er líka búinn að fara í prufur hjá Louis Vuitton, Versace, Chanel, Vouge, GQ magazine, Armani, Diesel, Lacoste og fleirum.“
Mynd / Nicholas Efimtcev
Ferðastu þá ekki svolítið í tengslum við starfið? „Jú, ég hef búið í Mílanó og París sem er alveg mögnuð borg. Svo er ég að fara til London til að taka þátt í Men’s fashion.“
Ertu í skóla samhliða módelstörfunum? „Ég kláraði eitt ár í tækniteiknun í Tækniskólanum sem var mjög skemmtilegt en þegar þetta tækifæri bauðst skyndilega ákvað ég, í samráði við foreldra mína og Eskimo, að bíða með námið. Það er nefnilega mjög erfitt að sinna hvorutveggja á sama tíma.“
Hvað finnst skólafélögunum og vinunum um þetta? „Allir í kringum mig eru bara rosalega stoltir af mér og hafa verið duglegir að hvetja mig áfram.“
Stefnirðu að frama í þessu eða langar þig til að vinna við eitthvað annað þegar þú verður eldri? „Ég ætla að einbeita mér að þessu, alla vega eins og er en ég stefni að því að fara í nám í arkitektúr seinna.“
Elite Model Look-keppnin hefur verið haldin árlega frá 1983 og er stór stökkpallur fyrir fyrirsætur en meðal þeirra sem hafa byrjað feril sinn þar eru ofurfyrirsæturnar Cindy Crawford og Gisele Bundchen. Mynd / Cynthia Frebourg
En þessi bransi, er hann í líkingu við það sem þú ímyndaðir þér? „Nei, þegar ég byrjaði vissi ég ekki alveg hvað ég var að fara út í. Þetta er mjög gaman en líka algjört puð. Það tekur á að fara í 16 prufur á einum degi og ekki grunaði mig að ég myndi lenda í topp fimm í stærstu módelkeppni í heimi! Þessi bransi er svolítið þannig; það er erfitt að sjá fyrir hvað gerist næst. Nú er ég til dæmis að fara til London og svo kannski til París. Annað veit ég ekki í bili. Eina sem ég veit er að það er búið að vera algjört ævintýri að fá að ferðast og búa í svona flottum stórborgum bara 17 ára og þurfa að sjá um sig sjálfur.“
Áttu heilræði handa þeim sem vilja feta sig út á þessa braut? „Hafðu trú á þér. Vertu ófeiminn og alls ekki reyna að vera eins og allir hinir. Vertu bara þú sjálfur og komdu alltaf heiðarlega fram.“
Hægt er að fylgjast með Sigurði Steinari á Instragram undir notendanafninu sigurdur_st
Félag Ungra athafnakvenna í samstarfi við Alvotech munu standa fyrir ráðstefnu sem haldin verður 10. mars næstkomandi í Hörpu sem tileinkuð er ungum konum í atvinnulífinu og nefnist ráðstefnan UAK dagurinn.
Fram undan er spennandi ráðstefna í Hörpu þar sem félagið leitast við að skapa vettvang fyrir konur til að fræðast og efla hver aðra, fylla þátttakendur eldmóði og fá til liðs við sig áhrifafólk, ráðherra og erlenda gesti. Markmiðið er að gera stjórnendum fyrirtækja, stjórnmálamönnum og ungu fólki í atvinnulífinu á Íslandi grein fyrir kröftum vel menntaðra og reynslumikilla kvenna ásamt mikilvægi þess að hlustað sé á kröfur þessa öfluga hóps hvað varðar atvinnutækifæri.
Sigyn Jónsdóttir er formaður Ungra athafnakvenna (UAK). Sigyn er hugbúnaðar- og rekstrarverkfræðingur frá Columbia University og starfar hjá Men & Mice ásamt því að sitja í stjórn nýsköpunarfyrirtækisins Mure. UAK var stofnað árið 2014 af Lilju Gylfadóttur. Alls eru sex konur í stjórn UAK og eru félagskonur um 250 talsins. Í hverri viku bætast við nýjar félagskonur.
Hver eru helstu áherslur UAK og hafið þið sett ykkur markmið með starfseminni? „Ungar athafnakonur vilja stuðla að jafnrétti, hugarfarsbreytingu og framþróun í samfélaginu. Félagið er fyrir konur sem vilja skara fram úr á hinum ýmsu sviðum atvinnulífsins og við leitumst við að skapa vettvang fyrir konur til að fræðast og efla hver aðra,“ segir Sigyn.
„UAK dagurinn er ráðstefna tileinkuð ungum konum í atvinnulífinu. Á ráðstefnunni fáum við tækifæri til að hlusta á íslenska og erlenda leiðtoga ræða málefni sem skipta máli fyrir samfélagið sem við búum í, málefni sem tengjast jafnrétti.“
Hvernig vegnar ungum konum almennt og hver er upplifun þeirra í atvinnulífinu? „Ungar íslenskar konur eru í mikilli forréttindastöðu þegar horft er til annarra heimshorna eða nær okkur, til stöðu kvenna af erlendum uppruna hér á landi. Tækifærin eru ótal mörg og háskólarnir fullir af ungum konum sem eru tilbúnar að takast á við krefjandi stöður í atvinnulífinu. Eftir útskrift tekur svo við blákaldur raunveruleikinn og við okkur blasa staðreyndirnar, rúmlega 90% þeirra sem stýra peningum á Íslandi eru karlar. Þessu þarf að breyta og við ætlum ekki að sitja rólegar og bíða eftir því að hlutirnir breytist. Þar til konur og karlar standa jöfnum fótum í íslensku samfélagi munu Ungar athafnakonur starfa áfram og vinna að jafnrétti með fræðslu, umræðu og hvatningu,“ segir Sigyn.
Getur þú sagt okkur frekar frá UAK deginum sem fram undan er í Hörpu? „UAK dagurinn er ráðstefna tileinkuð ungum konum í atvinnulífinu. Á ráðstefnunni fáum við tækifæri til að hlusta á íslenska og erlenda leiðtoga ræða málefni sem skipta máli fyrir samfélagið sem við búum í, málefni sem tengjast jafnrétti,“ segir Sigyn.
Hvert er markmið ykkar með ráðstefnunni? „Við viljum gera stjórnendum fyrirtækja, stjórnmálamönnum og ungu fólki í atvinnulífinu grein fyrir kröftum vel menntaðra og reynslumikilla kvenna ásamt mikilvægi þess að hlustað sé á kröfur þessa öfluga hóps hvað varðar atvinnutækifæri,“ segir Sigyn.
*SÉRSTAKUR GESTUR RÁÐSTEFNUNNAR ER LAURA KORNHAUSER
Sérstakur gestur er Laura Kornahauser.
Laura er forseti og framkvæmdastjóri Stratyfy sem spáir fyrir um og greinir gögn til að efla hina sönnu sérfræðinga fyrirtækja – fólkið sem stýrir þeim til að taka upplýstari ákvarðanir til að bæta fyrirtækið. Hún tók þátt í að stofna Stratyfy árið 2016 ásamt þremur verkfræðingum. Fyrir stofnun Stratyfy var Laura framkvæmdastjóri hjá JPMorgan og vann við að selja flóknar afleiddar vörur til stórra kúnna. Á tólf árum hjá JPMorgan varð Laura sérfræðingur í að sjá um flókin sambönd við kúnna, bera kennsl á vörutækifæri og að þróa ný boð til að koma til móts við aukna eftirspurn kúnna. Hún upplifði þá óhagkvæmni þeirra vara sem notaðar voru, sérstaklega þeirra sem notaðar voru til að fylgja þróun í umhverfi reglugerðar. Eftir að hafa skapað ýmis ferli, tæki og tól til að hjálpa við að bæta árangur viðskipta, vissi hún að það þyrfti að vera til betri lausn og hún ætlaði að finna hana.
Hér má sjá dagskrána sem er hin glæsilegasta og von er á öflugum og fjölbreytum hóp fyrirmynda öðrum til eftirbreytni.
UAK dagurinn 2018 – Ráðstefna tileinkuð ungum konum í atvinnulífinu
· Hvar og hvernig er AI þróað? Hverjir eru að því? Hvaða fyrirtæki? Hvernig eru teymin samansett, t.d. kynjahlutföll?
· Eru konur í minnihluta í þeim greinum sem verða hvað mest áberandi í fjórðu iðnbyltingunni? Ef já, hvað er hægt að gera? Eru stjórnvöld, menntastofnanir og fyrirtækin í landinu að undirbúa sig fyrir fjórðu iðnbyltinguna? Hvernig?
Gestir verða fulltrúar atvinnulífsins, stjórnvalda og háskólasamfélagsins.
Panel: Umræðan um áhrifamiklar konur
· Fyrirfinnst tvöfalt siðgæði gagnvart konum í almennri umræðu Íslendinga um áhugaverða einstaklinga?
· Gerum við meiri kröfur til útlits, framkomu og vinnubragða kvenna? Er orðræðan um áhrifamiklar konur harkalegri en orðræðan um karla í sambærilegum störfum?
· Fá konur, sem eru áberandi vegna vinnu sinnar, verri útreið í fjölmiðlum og athugasemdakerfum netheima vegna mistaka sinna?
· Finnst konum þær þurfa að vanda sig meira í starfi og með það sem þær tjá sig um opinberlega vegna ótta við að vera dæmdar harkalegar en karlar?
· Ef já, af hverju? Og hvernig breytum við þessu?
Gestir verða konur sem hafa verið áberandi í stjórnmálum eða stjórnendur stórra fyrirtækja sem hafa leitt erfið verkefni eða þurft að taka erfiðar ákvarðanir. Einnig farið í gegnum krefjandi tímabil á sínum starfsferli, þurft að svara fyrir sína vinnu og mögulega upplifað ósanngjörn viðhorf og athugasemdir í sinn garð.
Stjórn UAK, talið frá vinstri: Helena Rós Sturludóttir samskiptastjóri, Elísabet Erlendsdóttir viðskiptastjóri, Andrea Gunnarsdóttir viðburðastjóri, Sigyn Jónsdóttir formaður og Anna Berglind Jónsdóttir. Á myndina vantar Ásbjörgu Einarsdóttur fjármálastjóra.
Stúdíó Birtingur í samstarfi við Félag ungra athafnakvenna.
Umsjón / Sjöfn Þórðardóttir
Myndir / Heiðdís Guðbjörg Gunnarsdóttir
Ljósmyndarinn Curtis Wiklund hefur síðustu ár teiknað mikilvægar stundir í lífi sínu með eiginkonu sinni, Jordin og börnunum þeirra, Casen og Hayden.
Í samtali við fréttaveituna Buzzfeed segist Curtis hafa byrjað að teikna þegar hann var ungur drengur en að listin hafi vikið fyrir tónlist um langa hríð þar til hann kynntist Jordin. Hún hvatti eiginmann sinn til að teikna á hverjum degi og fyrr en varði gerði Curtis sér grein fyrir að uppáhaldsiðja hans var að teikna stundirnar sem hann eyddi með konu sinni.
Fjölskyldan uppí rúmi að lesa bók.
Teikningarnar eiga það sameiginlegt að vera einlægar og hugljúfar og teiknar hann stundir sem margir foreldrar kannast við.
„Mig langaði að teikna allar þessar stundir svo ég myndi aldrei gleyma þeim. Jordin hefur alltaf verið driffjöðurin í þessum stundum þar sem ég finn fyrir alls kyns tilfinningum. Það er eins og ég sé meira í tengslum við raunveruleikann í gegnum hana. Krakkarnir mínir eru farnir að hafa þessi áhrif á mig líka, að láta mig finna djúpar tilfinningar,“ segir Curtis.
Smá aðstoð á salerninu.
Teikningarnar af fjölskyldunni kallar han einfaldlega Us, eða Við, og gaf þær út í bók í desember síðastliðnum. Hann hefur unnið að þessum teikningum síðan árið 2011 en árið 2016 fengu teikningarnar meira vægi þegar hann og Jordin misstu fóstur.
„Fyrsta fósturlátið okkar var svo óvænt að ég vissi ekki hvernig ég ætti að vinna úr því. Þegar ég kom heim gat ég ekki hugsað um annað en að teikna það. Mér fannst það ekki raunverulegt fyrr en ég teiknaði okkur. Síðan starði ég á teikninguna og grét. Já, það var heilandi,“ segir Curtis, en teikningin sem um ræðir er hér fyrir neðan:
Átakanleg stund.
Hann túlkaði einnig tímann sem þau eyddu í að reyna að vinna úr sorginni í gegnum teikningarnar og á endanum kom að glaðari stundum hjá fjölskyldunni. Þessi teikning hér fyrir neðan sýnir þegar Curtis og Jordin komust að því að þau ættu von á barni á ný, en barnið, stúlka, er væntanlegt í mars á þessu ári.
Æðislegar fréttir.
Hér fyrir neðan má sjá nokkrar teikningar eftir Curtis en fleiri af verkum hans má sjá á heimasíðu hans.
Líf fræga fólksins er stundum úti um allt, á öllum miðlum og verða hinir minnstu atburðir að stórum fréttum.
Það eru samt sem áður nokkur stjörnupör sem hafa náð að halda einum af mikilvægustu dögunum í lífinu leyndum, sjálfum brúðkaupsdeginum.
1. Brúðkaupið tilkynnt á Instagram
Spéfuglinn Amy Schumer kom aðdáendum sínum á óvart fyrir stuttu þegar hún tilkynnti það á Instagram að hún hefði gengið að eiga kærasta sinn, kokkinn Chris Fischer. Amy birti fullt af myndum af athöfninni og skrifaði við þær einfaldlega: Jebb.
Leikaraparið Blake Lively og Ryan Reynolds giftu sig í laumi í Charleston árið 2012, en þau byrjuðu saman árið 2011. Blake og Ryan hafa ekki mikið opnað sig um brúðkaupið en brúðurin ku hafa ljómað í kjól frá Marchesa og hælum frá Christian Louboutin. Ryan klæddist jakkafötum frá Burberry. Þau deildu hins vegar nokkrum myndum úr veislunni á vefsíðunni Martha Stewart Weddings, þó mestmegnis af matnum og skreytingum.
Leikkonan Ellen Page birti mynd af höndum sínum og eiginkonu sinnar, Emmu Porter, á Instagram í byrjun janúar á þessu ári og tilkynnti þar með að þær hefðu látið pússa sig saman, enda báðar með giftingarhring á fingri.
„Ég trúi því ekki að ég geti kallað þessa undursamlegu konu eiginkonu mína,“ skrifar Ellen við myndina.
Leikarinn Ashton Kutcher gekk að eiga leikkonuna Milu Kunis árið 2015 og náðu þau að halda því leyndu fyrir umheiminum.
Ashton sagði seinna í samtali við spjallþáttadrottninguna Ellen DeGeneres að hann hefði skipulega verið að birta myndir af sér á samfélagsmiðlum til að rugla fjölmiðla í ríminu því parið vildi ekki mikil læti við athöfnina. Þau vildu ekki öskra heitin sín á þessum stóra degi. Mila sagði síðar í samtali við Conan O’Brien að giftingarhringarnir hefðu verið keyptir á Etsy.
Tónlistarhjónin Beyoncé og Jay-Z giftu sig við leynilega athöfn árið 2008 og hafa lítið sem ekkert tjáð sig um stóra daginn í fjölmiðlum síðan. Gestalistinn var styttri en gengur og gerist í stjörnuheimum og lögðu hjónin mikið upp úr því að skapa nánd, bæði við athöfnina og í veislunni sjálfri.
Leikkonan Margot Robbie játaðist Tom Ackerley í Ástralíu árið 2016. Sögusagnir fóru af stað um brúðkaupið eftir að Margot sást klædd bol sem á stóð Say I Do Down Under, eða Segðu Já í Ástralíu. Margot svaraði þessum sögusögnum með því að birta mynd af giftingarhringnum á Instagram.
Leikkonan Zoe Saldana giftist ítalska listamanninum Marco Pergo árið 2013 en í viðtali við The Hollywood Reporter stuttu síðar sagði Zoe að brúðkaupið hefði verið ákveðið með aðeins þriggja vikna fyrirvara.
Fyrirsætan Hunter McGrady er ein af þeim sem prýðir síður nýjasta heftis tímaritsins Sports Illustrated. Hunter er það sem kallað er fyrirsæta í yfirstærð en í viðtali við tímaritið Women’s Health segist hún vera mjög ósátt við að fólk setji samasemmerki milli holdafars hennar og að hún lifi óheilbrigðum lífsstíl.
„Það er kjaftæði. 100 prósent. Ég gæti gefið fólkinu í kringum mig upplýsingar um kólestórólið mitt, hjartað, allt og ég er fullkomin,“ segir Hunter.
Ólst upp á setti
Hunter steig fyrst af alvöru inní fyrirsætubransann þegar hún var sextán ára. Þá var hún í amerískri stærð 2, sem er evrópsk stærð 34. Hún segir að hún hafi ekki notið velgengni í bransanum eða fundið fyrir hamingju fyrr en hún tók þá ákvörðun að hætta að reyna að passa inní ákveðna stærð og taka líkamanum sem hún fæddist í fagnandi.
„Móðir mín var fyrirsæta, amma mín var fyrirsæta, frænka mín var fyrirsæta, faðir minn var leikari. Ég er fædd og uppalin í Los Angeles. Ég var alltaf á setti, ég var alltaf með myndavélar í kringum mig, ég var alltaf í tökum og það var eitthvað sem mig langaði alltaf að gera. Ég horfði upp til móður minnar og mér fannst hún vera (og finnst hún enn vera) glæsilegasta manneskjan í heiminum. Mig langaði að vera eins og hún,“ segir Hunter þegar hún rifjar upp barnæskuna.
„Fyrsta myndatakan mín var þegar ég var þriggja eða fjögurra ára gömul en ég byrjaði að gera þetta að aðalstarfi þegar ég var sextán ára,“ segir Hunter og bætir við að hún hafi verið rétt um fimmtíu kíló á þeim tíma.
„Núna er ég í stærð 16 og ég lít allt öðruvísi út. Þið getið ímyndað ykkur hve grönn ég var. Ég lifði svakalega óheilbrigðu lífi þegar ég var stærð 2. Ég var ekki mjó, ég var að svelta mig. Ég var í ræktinni í marga klukkutíma á dag. Hefðbundin máltíð hjá mér var salat með engri sósu og það var morgunmatur, hádegismatur og kvöldmatur – og jafnvel þá fékk ég samviskubit. Af því að mér fannst ég vera eyðileggja möguleika mína á að verða ofurfyrirsæta,“ segir Hunter.
Hún segist hafa fengið mjög mannskemmandi leiðbeiningar frá umboðsskrifstofum sem voru aldrei sáttar við útlit hennar.
„Maður er svampur þegar maður er sextán ára. Mér var sagt að ég væri of stór, að ég gæti ekki gert þetta, að ég þyrfti að léttast, að ég þyrfti að laga húðina mína. Þeir segja í raun og veru að maður þurfi að breyta öllu við sig sjálfan og koma aftur. Það er það sem er sagt við stúlkur og ég trúði því. Ég varð alvarlega þunglynd, eins og allir yrðu. Ég ákvað að þetta væri eitthvað sem ég gæti ekki gert. Það var ekkert meira sem ég gat gert. Ég hafði gefið mig alla í þetta og þetta var bara ekki í spilunum fyrir mig.“
„Við vissum ekki hve stór þú værir“
Það var ein stund sem breytti öllu fyrir Hunter og þá ákvað hún að taka sér frí frá fyrirsætustörfum og klára skóla.
„Ég var ráðin í myndatöku. Það var bolafyrirtæki í Los Angeles. Ég var ráðin og ég var svo spennandi. Ég hugsaði: Guð minn góður, loksins! Nú er komið að því! Ég bað móður mína um að keyra mig því ég var ekki komin með bílpróf og ég var svo spennt. Þetta var mín stoltasta stund. Við gengum inn og það var svo svalt að sjá ljósin og myndavélarnar og allt sem því fylgir. Allir að ganga um og þetta var eins og í kvikmynd. En allt í einu byrjuðu allir að stara á mig. Ég fann fyrir skrýtnum straumum á settinu. Framleiðandinn dró mig til hliðar og talaði við okkur móður mína og sagði:
„Jiminn, ég veit ekki hvernig ég á að segja þetta. Okkur finnst þetta leiðinlegt en við vissum ekki hve stór þú værir.“
Á þessari stundu var ég búin að upplifa svo mikið af vonbrigðum að ég hugsaði: Ég vil ekki stunda fyrirsætustörf ef þetta verður alltaf svona. Þetta var ekki þess virði.“
Eins og áður segir tók Hunter sér frí frá fyrirsætustörfum til að klára skóla og segir að sá tími hafi verið mjög góður.
„Ég hugsaði: Guð gaf mér þennan eina líkama, sjáum hvernig hann breytist. Ég varð þykkari, og ég var með slitför og appelsínuhúð og ég var farin að lifa heilbrigðara lífi. Mér leið betur og loksins var ég hamingjusamari. Ég naut lífsins og ég naut þess aftur að vera með fjölskyldu og vinum. Ég grét ekki kvölds og morgna,“ segir Hunter, sem kynntist fyrst fyrirsætum í yfirstærð þegar hún var nítján ára gömul.
„Þá var ég í stærð 14 og ég sagði: Mig langar að prófa þetta. Þetta er leið fyrir mig að prófa að vinna í fyrirsætuheiminum aftur. Mig langar að prófa. Ég gekk inn á Wilhelmina-umboðsskrifstofuna og fékk samning sama dag. Og ég er ekki að grínast, á einni viku bókaði ég þrjú mismunandi verkefni.“
Þú ert falleg. Þú ert þess virði
Í dag segist Hunter vinna í því á hverjum degi að hugsa jákvætt um líkama sinn.
„Lykilorðið er ferli. Þetta er eitthvað sem þarf að gera á hverjum degi. Ég held að aðalatriðið fyrir mig séu jákvæðar staðhæfingar. Og ég veit að þetta hljómar eins og klisja. Ég vakna á morgnana, spyrjið bara unnusta minn, og horfi í spegil og segi við sjálfa mig: Þú ert falleg. Þú ert þess virði. Dagurinn í dag verður góður dagur. Já, þú ert með bólu en hún er flott á þér. Ég segi þessa hluti við mig áður en ég fer út því ég þarf á þessu að halda. Vegna þess að heimurinn er þannig staddur á samfélagsmiðlum að allir eiga eftir að segja þér eitthvað annað. Af því að við lifum í heimi þar sem verið er að segja okkur að líta öðruvísi út. Að hafa öðruvísi hárgreiðslu. Að þú verðir falleg/ur ef þú missir nokkur kíló. Ef þú segir þessi orð ekki við þig sjálfa/n þá mun enginn gera það.“
Átta ára dóttir mín er búin að suða um að fá að búa til slím stanslaust síðustu mánuði. Af hverju? Jú, ALLAR YouTube-stjörnurnar eru að gera þetta!
Ég er búin að humma þetta af mér, því ég var búin að kanna þetta aðeins og fannst þetta svo fáránlega flókið. Svo var ég líka viss um að þetta myndi skapa svo mikla ringulreið á heimilinu að ég yrði fjögur ár að þrífa slím á bak við ofnana, úr hverjum krók og kima, úr nærbuxunum mínum. Ég sem sagt miklaði þetta svakalega fyrir mér.
Loksins fékk hún að búa til slím!
Við skyldum búa til slím
En svo kom vetrarfrí. Og eins og allir foreldrar vita þarf að vera vel skipulagður í svona fríi, þó aðeins um tvo daga sé að ræða. Maður þarf að vera með stíft prógramm frá morgni til kvölds til að þessi blessuðu börn fatti ekki að mamma og pabbi eru ekkert sérstaklega skemmtileg. Þannig að ég ákvað að nú væri komið að stóru stundi. Við skyldum búa til slím. Er ég lagðist á koddann kvöldið fyrir stóra slímdaginn fór um mig hrollur. Annað hvort yrði ég besta mamma í heimi eða algjörlega ömurlegur pappír. Eina sem ég get gert var að krossa fingur að ég myndi á einhvern undraverðan hátt aula mig út úr þessu með hjálp fyrrnefndra YouTube-stjarna og fullt af lími og raksápu.
Hneyksluð í Smáralind
Fyrstu skrefin.
Við byrjuðum daginn á að fara í verslunarferð. Ég var búin að lesa mér til um að það væri svakalega sniðugt að nota Borax í svona slímgerð. Ég hafði reyndar ekki hugmynd um hvað þetta Borax var en vissi að ég gat fengið það í verslun nokkurri í Kópavogi. Ég tilkynnti dóttur minni sigri hrósandi að ég væri búin að finna Borax! En henni virtist vera alveg sama. Var slímáhuginn að hverfa?
Næsta stopp var matvöruverslun þar sem við keyptum raksápu. Sko, það er mjög mikilvægt að kaupa froðu, ekki gel. Nei sko, ég var bara alveg með’etta! Svo fórum við í föndurbúð og keyptum stóra túbu af hvítu, rándýru hobbílími. Hér er mjög mikilvægt að kaupa lím sem er annað hvort glært eða hvítt og fljótandi.
Á þessum tímapunkti hélt ég að ég væri komin með það sem þyrfti. En þá stoppaði dóttir mín, yfir sig hneyksluð á miðju gólfinu í Smáralind og sagði hátt og skýrt:
„Mamma! Okkur vantar saline solution!“
Ókei, hún er átta ára! Hvernig vissi hún hvað saline solution var? Ég hefði ekki samþykkt þennan útúrdúr, því ég var handviss um að við þyrftum ekkert saltlausnina, nema mig vantaði linsuvökva hvort sem er. Þannig að saline solution, eða bara linsuvökvi, var keyptur í næsta apóteki.
Er við keyrðum heim, skalf ég af ótta. Þetta var bara að fara að gerast. Og mér fannst ég ekki vera undirbúin!
Hún ætlaði ekki að klúðra þessu
Þvílík einbeiting.
Við komum heim og í taugaveiklun minni tók ég til skál og skeið og byrjaði að gúggla af kappi í símanum mínum um hvernig við ættum að byrja herlegheitin. En viti menn, þegar ég leit upp frá símanum var dóttir mín búin að hræra í eitt stykki fullkomið slím. Án uppskriftar, án leiðbeiningar, án YouTube-stjarnanna sér við hlið. Svo hélt hún bara áfram. Hún gerði hvern slímskammtinn á fætur öðrum og var meira að segja byrjuð að leika sér með hitt og þetta til að sjá útkomuna.
Hvernig gat þetta hafa farið framhjá mér? Eftir að hafa horft á átrúnaðargoðin sín gera slím, í þeirri veiku von að hún myndi einhvern tímann fá að gera slím, hafði hún verið að læra, taka heilanótur og spá og spekúlera í slímgerð svo hún yrði vel undirbúin. Hún ætlaði greinilega ekki að klúðra þessu þegar dagurinn kæmi.
Linsuvökvi er málið
Og vitiði, við prófuðum í eitt skipti að nota þetta Borax sem hvorugt okkar vissi hvað var og komumst fljótt að því að linsuvökvi var algjörlega málið. Svo lékum við okkur með liti og höfðum svo fáránlega gaman. Þetta var æðisleg stund í eldhúsinu og ég held að mér hafi fundist skemmtilegast að sjá hvað dóttir mín var búin að mastera þetta, án þess að hafa nokkurn tímann gert þetta sjálf.
Vá, hvað þetta var gaman!
Og gleðin, maður minn. Hún var svo hamingjusöm. Kallaði mig heimsins bestu mömmu allavega tíu sinnum og var einhvers staðar langt uppí skýjunum yfir því að fá að búa til slím. Það var líka svo gaman að horfa uppá barnið mitt svona óstjórnlega einbeitt í leik og sköpun. Við erum að tala um að slímgerðin hófst rúmlega tólf á hádegi og leiknum lauk ekki fyrr en að verða fimm. Það kalla ég vel gert!
Þannig að ég mæli með slímgerð. Ég er ekki með neina heilaga uppskrift en hér kemur slumpið okkar.
Hráefni:
Slím er magnað!
Glært eða hvítt fljótandi lím Raksápa í froðuformi Linsuvökvi Matarlitur eða glimmer að eitthvað annað sniðugt
Aðferð:
Byrjið á því að sprauta lími í skál, sirka einn bolla. Sprautið síðan raksápu ofan í skálina og það má alveg vera slatti. Því meiri froða, því mýkra verður slímið. Hrærið þetta vel saman. Sprautið síðan smá linsuvökva saman við, bara hálfri eða einni teskeið í einu. Hrærið alltaf á milli. Þegar slímið er hætt að límast við skálina þá er það tilbúið. Síðan er matarlitnum bætt út í og hnoðað og hnoðað og hnoðað. Síðan má bara leika sér að vild og teygja og toga. Ef slímið er of klístrað er bætt smá linsuvökva við, en bara smá.
Best er að geyma slímið í loftþéttum umbúðum inni í ísskáp en við vitum ekki enn hve lengi það dugar. Þegar slímið er nýkomið úr ísskápnum þarf að hnoða það til svo það hitni aðeins og þá er það teygjanlegra og meðfærilegra. Góða skemmtun!
Seventeen perished and more than a dozen were wounded in the hail of bullets at Marjory Stoneman Douglas High School in Parkland
Sautján nemendur létust og að minnsta kosti fjórtán slösuðust þegar hinn nítján ára Nikolas Cruz hóf skothríð í skólanum Marjory Stoneman Douglas í Flórída fyrir stuttu.
Þessi harmleikur hefur enn og aftur vakið upp margar spurningar varðandi byssulöggjöf í Bandaríkjunum og var til dæmis haldinn mótmælafundur í Fort Lauderdale um helgina þar sem löggjöfinni var mótmælt. Emma Gonzales lifði af skotárásina og hélt áhrifamikla ræðu á fundinum en ræða hennar hefur farið eins og eldur um sinu á internetinu.
„Hver einasta manneskja hér í dag ætti að vera heima að syrgja. En í staðinn erum við hér saman því ef ríkisstjórnin okkar og forseti geta bara sent góðar hugsanir og beðið fyrir fórnarlömbunum þá er kominn tími til að fórnarlömbin breyti því sem þarf að breyta,“ sagði Emma á fundinum og uppskar mikið lófatak.
Hún hélt áfram og sagðist vera fullviss um að hún og skólafélagar hennar yrðu tekin fyrir í sögubókunum. En ekki bara í tölfræði um skotárásir í Bandaríkjunum heldur út af þeirri von hennar að þau yrðu fórnarlömb síðustu skotárásarinnar þar vestan hafs. Svo hafði hún sterk skilaboð til forseta Bandaríkjanna, Donalds Trump, og annarra stjórnmálamanna sem þiggja greiðslur frá Landssambandi byssueiganda (NRA):
„Skammist ykkar!“
Emma er orðin eins konar hetja á samfélagsmiðlum og hafa fjölmargir deilt ræðu hennar í von um að breyta lögunum. Hér fyrir neðan má sjá nokkur tíst um hina hugrökku Emmu:
If you told me that there would be a day when a high school student could beat the US President in a debate, I would have called you crazy.
Snjóbrettakonan Brenna Huckaby tók sér smá frí frá æfingum fyrir Vetrarólympíuleikana í PyeongChang og sat fyrir á síðum tímaritsins Sports Illustrated fyrir stuttu. Það væri svo sem ekki í frásögur færandi nema fyrir þær að sakir að Brenna er fyrsta konan sem misst hefur útlim sem hefur setið fyrir í tímaritinu.
Brenna var grein með osteosarcoma, sem er tegund af krabbameinsæxli í beini, árið 2010 og þurfti að taka af henni hægri fótlegginn. Í samtali við Cosmopolitan segir hún að þessi tími hafi verið afar erfiður en að hún hafi fljótlega ákveðið að umkringja sig jákvæðni.
Brenna situr fyrir í nýjasta hefti tímaritsins Sports Illustrated.
„Ég byrjaði að fara í ræktina og það byggði sjálfstraustið mitt upp hægt og bítandi, af því að ég gat gengið með hjálp gervifóts. Þetta hljómar ekki eins og mikið en ég reyndi að finna eitthvað sem ég hafði gaman að. Ég umkringdi mig fólki sem lét mér líða vel. Það var ekki auðvelt en manni verður að líða vel til að finna annað fólk sem lætur manni líða vel,“ segir Brenna.
Hún segir að viðbrögðin við myndunum í Sports Illustrated hafi verið mjög góð.
„Áður en ég fór í tökur hugsaði ég: Ég er að opna mig fyrir alls konar góðum hlutum en hugsanlega líka mikið af slæmum hlutum. Mig langaði að þetta yrði gert rétt. Mig langaði að vera fulltrúi kvenna með fötlun á réttan hátt.“
En hvaða ráð hefur hún til annarra kvenna með fötlun?
„Þú ert afl. Reyndu að láta aflimunina stöðva líf þitt – þú bara getur það ekki. Ráð mitt væri að muna hver þú ert að innan og að líkami þinn er tól. Ekki vera hrædd við að ýta við þér sjálfri og koma þér út.“
Við fallega strönd
Paradísin Maya Tulum í Mexíkó er vinsæl á meðal jógaunnenda. Ýmsar spa-meðferðir og heilbrigt mataræði eru í boði í fallegu umhverfi en Maya Tulum er við fallega ljósa strönd og því um að gera að panta herbergi með útsýni yfir hafið.
Grísk sveitastemning
Ertu í leit að afskekktum og friðsælum stað? Þá gæti Victor van Kooten´s Yoga Hall hugsanlega verið málið. Staðurinn er í friðsælli grískri sveit, í rólegum ólífulundi í Eftalou Valley, og skammt frá er að finna fallega og notalega strönd. Á hverjum morgni er boðið upp á jógakennslu og hugleiðsla býðst á kvöldin.
Kyrrðarstund með höfrungum
Það er líklega fátt betra til að endurhlaða batteríin en að stunda jóga, hugleiðslu og læra öndunaræfingar í sjónum. Á eyjunni Bimini á Bahamas er hægt að stunda óhefðbundið jóga og um leið njóta stundar í sjónum með höfrungum.
Sólarmegin í lífinu
Boðið er upp á ýmsar samsetningar spa-meðferða og einnig opna jógatíma á Como Shambhala Retreat á Maldíveyjum. Jógasetrið er sólarmegin á eyjunni með útsýni yfir sjóinn. Þeir sem kjósa sveigjaleika geta leigt sumarhús og útbúið eigin stundaskrá.
Krefjandi reynsla
Þeir sem kjósa krefjandi jóga gætu haft ánægju af Hatha-jóganámskeiðum sem kennd eru á Sivananda Yoga Vedanta Dhanwantari Ashram, nálægt Neyyar Dam Tiger Reserve í Kerala á Vestur-Indlandi. Þátttakendur iðka hugleiðslu, jóga og söng.
Kári Sverrisson ljósmyndari myndar vor- og sumarlínur Marinu Rinaldi og Chanel.
Kári Sverrisson hefur í nógu að snúast. Hann segir ýmislegt spennandi vera á döfinni en þó ekkert sem hann er tilbúinn til að ræða að sinni.
Óhætt er að segja að Kári Sverrisson hafi haft í nógu að snúast frá því að hann útskrifaðist með masters-gráðu í tískuljósmyndun frá London College of Fashion árið 2014, fyrstur Íslendinga. Nýverið var hann fenginn til að mynda vor- og sumarlínu Marinu Rinaldi, sem er stærsta og þekktasta „yfirstærðar“ fatamerkið í heiminum í dag og jafnframt í eigu ítalska tískurisans Max Mara.
„Listrænn stjórnandi Marina Rinaldi hafði samband við mig seint á síðasta ári og lýsti yfir áhuga á samstarfi. Hann var búinn að fylgjast með mér á Instagram í smátíma og sagðist vilja fá mig til að skjóta vor- og sumarlínu fyrirtæksins,“ segir Kári sem sló til og flaug mánuði seinna á vegum fyrirtækisins til Mílanó á Ítalíu þar sem myndatakan fór fram.
Var þetta stórt verkefni? „Við vorum um 15 manns á setti og þarna voru nokkrir sem flugu sérstakleg til Mílanó til að vinna að því, þar á meðal förðunarfræðingur annars staðar frá á Ítalíu, stílisti frá New York, hárstílisti frá London og módel frá London að nafni Ali Tate sem er fyrirsæta í yfirstærð og frekar þekkt nafn innan tískuheimsins. Þannig að já, ég myndi segja það.“
Mannlíf fékk leyfi til að birta myndir úr tískuþættinum sem Kári tók fyrir Marinu Rinaldi, en að hans sögn koma myndirnar til með að birtast í tískutímatímaritum og -blöðum á næstu dögum.
„Hann var búinn að fylgjast með mér á Instagram í smátíma og sagðist vilja fá mig til að skjóta vor- og sumarlínu fyrirtæksins.“
Spurður hvernig tilfinning hafi verið að vinna með svona stóru fyrirtæki viðurkennir Kári að það hafi verið svolítið stressandi til að byrja með. „Þemað í þættinum var safarí þannig að myndirnar áttu að líta út eins og þær væru teknar á heitri sólarströnd og fyrirtækið vildi nota flókna ljósauppstillingu til að fanga það. Lýsingu sem ég er ekki vanur að nota. Í ofanálag mættu háttsettir aðilar frá Marinu Rinaldi mættu á staðinn til að tryggja að allt gengi fyrir sig eins og til var ætlast. Ég fékk því kannski ekki alveg sama frelsi og yfirleitt þegar ég hef verið að mynda tískuþætti fyrir blöð eins og ELLE, Glamour og L’Officiel. En þetta var gaman og sem betur fer gekk allt upp. Þannig að þegar tökum lauk voru allir ánægðir.“
Þetta er ekki eina umfangsmikla verkefnið sem Kári hefur fengist við að undanföru. Nýverið vann hann fyrir Chanel. „Ég tók tvo tískuþætti á tveimur dögum, hvorn á sínum staðnum í London, á þekktum veitingastað og í rosalega flottu húsi í Notting Hill,“ lýsir hann. „Annar þátturinn var samstarfsverkefni með Dior og hinn með Chanel og bæði verkefni mjög skemmtileg enda er allt lagt í tökurnar þegar maður er að vinna með svona vönduð og dýr merki.“
Verkefni af þessu tagi, opna þau ekki alls konar dyr? „Algjörlega og þar að auki lærir maður heilmikið af því sem þeim, hvort sem maður er að mynda föt, fólk, mat og svo framvegis. Þetta er allt saman dýrmæt reynsla.“
Leysir kvenlega orku úr læðingi í vestfirskri náttúrufegurð.
Listakonan Kitty Von-Sometime, sem er hvað þekktust fyrir myndbandsþætti sína The Weird Girls Project þar sem konur eru í forgrunni, hefur tekið að sér að stýra sjálfsstyrkingarferð fyrir konur til Vestfjarða í haust.
„Ég ætla að aðstoða konur við að sleppa fram af sér beislinu, hjálpa þeim að finna sjálfar sig og hæfileika sína og leyfa þeim að njóta sín. Þetta er í raun sama hugmyndafræði og liggur til grundvallar The Weird Girls Project-myndbandsþáttunum sem ganga út á að efla sjálfstraust og líkamsmynd kvenna.“
Að sögn Kittyar gengur sú hugmyndafræði jafnframt út á viðbrögð við hinu óþekkta og óvænta. Þannig fái konurnar sem hún boðar í tökur aldrei að vita hvað sé í vændum. Að vissu leyti verði sami háttur hafður á í haust þar sem ákveðnum upplýsingum um ferðina verði haldið leyndum fram á síðustu stundu.
„Það sem ég get sagt á þessu stigi málsins er að þarna verða gestafyrirlesarar og kennarar og uppbyggilegar umræður. Þetta verður þriggja daga vinnustofa og gisting og matur eru innifalin. Að því loknu verður skotinn nýr myndaþáttur sem þátttakendum og konum á svæðinu gefst kostur að taka þátt í,“ segir hún full tilhlökkunar.
Það er Samfélagsmiðstöðin Blábankinn á Þingeyri sem stendur fyrir viðburðinum í samstarfi við Kitty, en frekari upplýsingar um verkefnið má nálgast á vefsíðunni www.theweirdgirlsproject.com/
VINSÆLU STARLUX-GÆÐADÝNURNAR FYRIR FERMINGARBARNIÐ
Hjá VOGUE FYRIR HEIMILIÐ er gríðalega mikið úrval af rúmum og rúmdýnum. Fyrir fermingarnar eru Starlux-gæðadýnur vinsælastar en þær eru hannaðar af okkar fagfólki og framleiddar erlendis. Þær eru með tvo stífleika, mjúkan og stífan, og því er hægt að snúa þeim við. Hver dýna er með sérstyrktum kanti, þannig að þegar unglingarnir sitja í rúminu heldur hún sínu lagi.
ANTÍKBLEIKT OG DÖKKGRÁR ERU MÓÐINS Í DAG – FLOTT Í UNGLINGAHERBERGIÐ
Antíkbleiki liturinn er mjög vinsæll og kemur mjög vel út með dökkgráa litnum.
Eins og sjá má á myndinni (hér að ofan) þá eru þessi fallegu nettu sófar fáanlegir hjá VOGUE FYRIR HEIMILIÐ, mjög smart inni í unglingaherbergi. Svo er frábært að geta valið gluggtjöld sem passa vel inni í umhverfið.
FJÖLBREYTTIR FYLGIHLUTIR OG LITAGLEÐIN Í FYRIRRÚMI
Einnig eru fáanlegir fallegir fylgihlutir, má þar meðal annars nefna skápúðana sem eru frábærir til að hafa þegar unglingurinn er að lesa eða er í tölvunni. Það getur verið gaman að velja áklæði í stíl fyrir dívaninn og höfuðgaflinn. Einnig er hægt að velja hrúgald sem er hægt poppa upp í skemmtilegum gulum lit eins og sjá má á myndinni. Þessi grái litur á rúminu er mjög vinsæll hjá ungu kynslóðinni. Tauið nýtur sífellt meiri vinsælda þegar rúm er valið.
SVEFNSTÓLLINN LOKI
Svefnstóllinn Loki er hönnun frá Snæland en hann nýtur gríðarlegrar vinsældar bæði í unglinga-herbergið og sem aukasvefnstæði hjá ömmum og öfum. Hægt er að velja áklæði úr fjölmörgum litum og hægt að fá hann í nokkrum breiddum.
VOGUE FYRIR HEIMILIÐ
Síðmúla 30
108 Reykjavík
Sími: 533-3500
WWW.VOGUE.IS
VOGUE FYRIR HEIMILIÐ
Hofsbót 4
600 Akureyri
Sími: 462-3504
WWW.VOGUE.IS
Skekkt líkamsímynd og óraunhæfar væntingar stóðu í veginum.
Hrafnhildur Ýr Víglundsdóttir er komin áfram í Söngvakeppninni 2018 ásamt sönghópnum Fókus.
Hrafnhildur Ýr Víglundsdóttir tekur þátt í Söngvakeppninni 2018 ásamt sönghópnum Fókus. Lagið þeirra, Aldrei gefast upp, komst áfram í úrslitakeppnina.
„Meðlimir Fókushópsins kynntust við gerð raunveruleikaþáttanna The Voice Ísland veturinn 2016-2017. Þegar þáttunum lauk höfðum við öll mikinn áhuga á að vinna meira saman og höfum verið að koma fram hér og þar síðan þá,“ segir Hrafnhildur sem ólst upp á bóndabæ í Húnavatnssýslu frá fimm ára aldri. „Þar græddi ég stjúppabba og tvo bræður og ólst upp á yndislegum stað í kringum húsdýr, fallega náttúru, álfa og huldufólk. Eldri bóndinn, sem varð afi minn, var mjög andlegur maður. Á sjötugsaldri breiddi hann alltaf ullarpeysuna sína á gólfið í stofunni, gerði jógaæfingar og setti fæturna aftur fyrir haus. Ég bað fljótlega um mína eigin lopapeysu svo ég gæti gert æfingar með honum.“
Þótt Hrafnhildur hafi lengi stundað söng og víða komið fram síðastliðin 23 ár var það ekki fyrr en nýlega sem hún varð þekkt nafn. „Ég held að ástæðan hafi verið sambland af lélegu sjálfstrausti, skekktri líkamsímynd og óraunhæfum væntingum bæði til sjálfrar mín og annarra. Þegar sjálfsmyndin er brotin þarf oft mikla vinnu og langan tíma til að trúa því að maður geti haft eitthvað eftirsóknarvert að bjóða. Ég fór að vinna mikið í sjálfri mér fyrir 10 árum og hef mest stuðst við óhefðbundnar aðferðir því þær hefðbundnu hentuðu mér illa. Ég hef mikla trú á að maður geti læknað svo margt sjálfur með því að hugsa vel um sálina sína og læra að elska sig. Þótt sjálfsvinnu sé aldrei alveg lokið get ég samt sagt núna að ég sé ástfangin af sjálfri mér og standi sterk í því sem ég geri,“ segir Hrafnhildur.
Ýtarlegt viðtal er við Hrafnhildi í 7. tbl. Vikunnar.
Runólfur ásamt tveimur yngstu dætrum sínum, þeim Sigrúnu Erlu Runólfsdóttur og Lönu Sóeyju Magnúsdóttur.
Runólfur Ágústsson, framkvæmdastjóri, er 54 ára og á sex börn og stjúpbörn á aldrinum þriggja ára til þrítugs. Hann er kvæntur Áslaugu Guðrúnardóttur, markaðs- og kynningarstjóra Listasafns Reykjavíkur. Runólfur er í Félagi eldri feðra og er viðtali í nýjasta tölublaði Mannlífs ásamt þremur öðrum félögum.
„Ég var 24 ára þegar frumburðinn minn hann Skarphéðinn fæddist. Það var um hábjarta sumarnótt á sjúkrahúsinu á Akranesi. Eftir fæðinguna keyrði ég heim upp í Borgarfjörð og tók upp í einmana erlendan puttaling þarna um 2 leytið um nóttina. Sá maður man væntanlega enn eftir þessum hálftíma upp í Borgarnes enda fékk hann ítarlega lýsingu á bæði fæðingu, dásemd barnsins og tilfinningum hins nýbakaða föður,“ segir Runólfur þegar hann er spurður um fæðingu frumburðarins.
„Á þessum tíma tíðkaðist ekki að feður tækju fæðingarorlof og er það líklega stærsta breytingin á því að verða pabbi í dag og þá. Þegar Sigrún Erla, sem við köllum reyndar oftast Lukku, fæddist fyrir þremur árum tók ég að sjálfsögðu fæðingarorlof og ég verð líka að játa það að ég er líklegast mun betri faðir í dag en þá. Það gerir þroskinn. Sem eldri faðir forgangsraða ég öðruvísi og ver mun meiri tíma með yngri börnunum mínu en ég gerði fyrir 20-30 árum með þeim eldri, þegar ég var enn þá með þann metnað að sigra heiminn og taldi störf mín að þeim málum mikilvægari en að vera til staðar fyrir börnin mín og fjölskyldu.“
Hann segir að önnur jákvæð breyting sé gæðin á leikskólunum. „Þar held ég, og miða við reynslu mína af Lukku, og Lönu eldri systur hennar sem er 9 ára í dag, á Laufásborg, að leikskólinn sé líklega framsæknasta og besta skólastigið á Íslandi. Gæði starfs og náms þar eru allt önnur og betri en þegar synir mínir voru í leikskóla fyrir 15-25 árum. Gaman væri að geta sagt hið sama um grunn- og framhaldsskólann, en ég held að því miður hafi þar orðið þróun í öfuga átt námslega séð, þótt vonandi líði börnum betur í sínum skólum í dag en í þeim eineltispytti sem þá var að finna víða í grunnskólum landsins.“
„Pabbi, góðan daginn!“
Runólfur telur sig einstaklega lánsaman einstakling að verða þeirrar gæfu aðnjótandi að eignast barn, kominn yfir fimmtugt. „Þetta er bónus sem fáir njóta. Auðvitað hefur þetta breytt öllu í okkar lífi sem var bara orðið frekar þægilegt. En hver vill ekki vakna fyrir sjö á morgnana og takast á við einstaklega ákveðna og þrjóska þriggja ára dóttur sína um hvað hún vill borða, í hvaða nærbuxur hún vill fara, Möggu Pálu sé lof fyrir skólabúninginn, og hvað hún ætlar og vill almennt séð í lífinu – þessa einu og hálfu klukkustund sem hún hefur til að ráðskast með aldraðan föður sinn og aðeins yngri móður þar til Hjallastefnan tekur við þessari kæru vinkonu úr höndum foreldra hennar.
Ég vildi ekki skipta á þessu fyrir neitt annað, enda kominn á þann aldur að frami og ferðalög skipta minna máli þar sem enginn staður er til hvar maður hittir ekki fyrir sig sjálfan. Það gerist þessa dagana kannski ekki á stangveiðum á Kyrrahafseyju, við sólarlag hjá Uluru eða í safari í Ngorogoro, heldur bara á Haðarstígnum klukkan 6:40 á mánudagsmorgni þegar lítil og björt stúlkuröddin segir stundarhátt innan úr herberginu sínu: „Pabbi, góðan daginn!“ Þannig líður lífið áfram dag fyrir dag. Þannig er núið hjá hinum aldraða föður. Og það er bara býsna gott.“
Gott mannval
Eins og fram kom í inngangi er Runólfur félagi í hinum óformlegan félagsskap, Félag eldri feðra, sem gerir þá kröfu til félagsmanna að þeir hafi verið orðnir fimmtugir þegar þeir eignuðust sitt síðasta barn. „Við tökum okkur hóflega alvarlega, en erum með hóp á Netinu. Þetta er skemmtilegur félagsskapur enda þarna að finna mikið og gott mannval. Almennt erum við á því að það fari metnaðargjörnum ungkörlum mun betur að vera og verða feður þegar þeir hafa gert sér grein fyrir því með aukum þroska og aldri að börnin okkar, líf okkar, fjölskylda og við sjálfir, skiptir mun meira máli en utanaðkomandi viðurkenning, efnisleg gæði eða svokallaðar tómstundir. Slíkar stundir eru í lífi virkra eldri feðra hvorki margar né tómar. Okkur leiðist ekki og lífið er gott.“
Fyrir nokkrum árum bökuðum við fjórar mismunandi súkkulaðikökur og fimm forfallnir kökusælkerar smökkuðu afraksturinn og gáfu einkunn. Skemmst er frá því að segja að þessi uppskrift stóð uppi sem sigurvegari og flestir í dómnefndinni fengu sér auka sneið af henni eftir að hafa borðað fjórar seiðar af súkkulaðikökum. Það er því óhætt að mæla með þessari kökur, hún er dásamleg með ísköldu mjólkurglasi eða eðal kaffi og einnig er hún góð með Earl Gray tei.
DJÖFLATERTA 10-12 sneiðar
BOTNAR: 80 g súkkulaði, 130 g smjör, mjúkt 280 g púðursykur 3 msk. kakó 3 egg 2 tsk. matarsódi 280 g hveiti 1 dl jógúrt 2 -3 tsk. vanilludropar 2 dl sjóðandi vatn
Gómsæt og girnileg.
Hitið ofninn í 180°C. Bræðið súkkulaðið yfir vatnsbaði. Hrærið saman smjör og sykur þar til það er mjög vel samlagað eða í 5-6 mín. Bætið eggjum út í einu í einu og hrærið mjög vel saman við. Bætið bræddu súkkulaði út í og hrærið saman við.
Sigtið hveiti, kakó og matarsóda saman og bætið út í ásamt jógúrt og vanilludropum, hrærið þetta saman þar til allt er vel blandað. Hellið sjóðandi vatni út í á meðan hrærivélin gengur á lægstu stillingu og hrærið það saman við deigið. Smyrjið 2 x 24-26 cm form og skiptið deiginu í formin. Bakið botnana í 20-25 mín. Takið botnana úr formunum og látið þá kólna.
Leggið botnana saman með hluta af kreminu og þekið síðan kökuna með kreminu. Það er fallegt að hafa kökuna slétta en líka flott að gera lautir í kremið með hníf. Skreytið annaðhvort með rifnu súkkulaði eða kókosmjöli.
KREM: 200 g smjör, mjúkt 1 dl kakó 350 g flórsykur, sigtaður ½ dl mjólk 1 tsk. vanilludropar ½ tsk. skyndikaffiduft
Hrærið allt saman og leggið kökuna saman með kreminu.
Berið kökuna fram með þeytturm rjóma ef vill.
Uppskrift / Sigríður Björk Bragadóttir Stílisti / Hanna Ingibjörg Arnarsdóttir Mynd / Aldís Pálsdóttir
Bandarísk trans kona gat gefið nýfæddu barni sínu brjóst í sex vikur eftir að hún fékk sérstaka mjólkunarmeðferð á sjúkrahúsi í New York.
Þetta er ekki fyrsta trans konan sem gefur brjóst en læknar segja að þetta sé í fyrsta sinn sem þetta hefur verið skjalfest í læknabókmenntum, en þessi nýjasta skýrsla er birt í tímaritinu Transgender Health.
Samkvæmt tímaritinu sagði konan sem um ræðir, sem er þrítug, við lækna í New York að hún vildi gefa brjóst af því að maki hennar, sem gekk með barnið, vildi það ekki. Þá var maki hennar kominn fimm mánuði á leið. Hún var sett á lyfjakúr, sem enn var á tilraunastigi, en meðfram honum þurfti hún til dæmis að pumpa brjóst sín. Innan mánaðar gat hún framleitt nokkra mjólkurdropa en innan þriggja mánaða, tveimur vikum áður en barnið átti að fæðast, var hún að framleiða átta únsur af mjólk á dag, tæplega 240 millilítra. Þegar barnið svo fæddist gat hún séð um að veita barni sínu næringu í sex vikur.
Læknarnir sem sáu um þessa meðferð unnu með sérstakri deild fyrir trans fólk innan Mount Sinai-sjúkrahússins. Zil Goldstein, hjúkrunarfræðingur og læknirinn Tamar Reisman skrifa í skýrslu sína að þessi meðferð sýni að það sé hægt að koma mjólkurframleiðslu af stað hjá trans konum sem vilja gefa barni brjóst.
„Við trúum því að þetta sé fyrsta formlega skýrslan í læknabókmenntum um að mjólkurmyndun sé komið af stað í trans konu,“ segja þau í skýrslunni.
Seinni undakeppni Söngvakeppninnar fer fram í dag, laugardaginn 17. febrúar. Þar keppa sex lög um sæti í undanúrslitunum 3. mars, þar sem kemur í ljós hvaða lag fer fyrir Íslands hönd í Eurovision í Portúgal í maí.
Líkt og með fyrri undankeppnina síðasta laugardag, fengum við Eurovision-sérfræðingana Flosa Jón Ófeigsson og Kristínu Kristjánsdóttur til að spá í spilin um hverjir komast áfram í undanúrslit á laugardaginn. Þau voru nokkuð sannspá síðast og spáðu því að Fókus hópurinn og Heimilistónar kæmust upp úr undankeppninni.
Sjarmatröll sem á ekki eftir að klikka
Golddigger – Aron Hannes
Flosi: „Þetta er klárlega fjörugasta lagið í keppninni í ár finnst mér. Mér finnst þetta vera mest „current“ lagið í ár. Ég gjörsamlega féll fyrir Aroni Hannesi í fyrra. Hann er alveg búinn að sanna það að hann er pottþéttur flytjandi í beinni útsendingu, þannig að hann á ekki eftir að klikka. Hann er líka orðinn betri í að nota myndavélina. Hann er tilbúinn í þetta. Þetta er lagið sem ég held að flestir í keppninni séu að bíða eftir að sjá af því að þeir halda að þetta sé atriðið sem þeir eru að fara að keppa við. Svo lengi sem konseptið virkar í atriðinu þá held ég að hann eigi eftir að fara í alla leið í einvígið.“
Kristín: „Þetta er bara fínasta lag, með því skásta í ár. Það er húkkur í þessu og pínu djamm. Einn írskur vinur minn sagði að þetta minnti á framlag Belgíu árið 2016 en svo er líka Bruno Mars-fílíngur í þessu. Ég er nokkuð örugg með að hann fari í úrslitin. Aron er rosa sjarmatröll.“
„Hún grætir mig eiginlega í hvert skipti sem hún syngur“
Óskin mín – Rakel Pálsdóttir
Flosi: „Rakel mín er búin að vera í uppáhaldi síðan við tókum þátt saman í X Factor fyrir löngu, löngu síðan. Hún grætir mig eiginlega í hvert skipti sem hún syngur svona fallega ballöðu. Það er engin rödd sem er svona hugljúf og einlæg í keppninni í ár. Hún syngur og segir söguna bara með því að opna munninn á sér. Ég held að þetta sé svarti péturinn í þessum riðli.“
Kristín: „Þetta er rosa sætt lag og mikil tilfinning í því. Ég held að þetta verði engin svakaleg sprenging en það þarf alltaf að vera eitt svona lag. Ég held að hún fari ekki áfram. Hún á örugglega eftir að heilla helling af fólki enda hörkusöngkona. En það er ekki alveg nógu mikill húkkur í laginu.“
Stefanía og diskókúlurnar
Svaka stuð – SLAY
Flosi: „Þær Stefanía, Agnes og Regina eru æðislegar. Þær munu negla þetta. Stefanía er einn besti söngvari sem er að performa núna. Hún er með svakalega og fallega rödd og þær Agnes og Regina eru diskókúlurnar í kringum hana. Það er rosalega gaman að fylgjast með þeim. Lagið sjálft grípur mig ekki en lagið þarf ekki alltaf að vera gott til að fara áfram. Ef hún fer áfram er það af því að hún er frábær flytjandi. Lagið greip mig ekki við fyrstu hlustun en það er að vinna á. Ég fer alveg í svaka stuð þegar ég hlusta á það.“
Kristín: „Mér finnst þetta svolítið skemmtilegt. Ég get alveg dansað með Breezer við þetta lag. Þetta er bara ótrúlega hresst, ekkert að þessu. Ég hugsa að það eigi séns ef þær eigna sér sviðið eins og enginn sé morgundagurinn. Þær eru voðalega hressar. Þetta lag býður uppá attitjúd og Stefanía hefur svo mikið af því. Ég vil alveg sjá þær áfram.“
Danska uppskriftin fer ekki áfram
Brosa – Gyða Margrét Kristjánsdóttir og Þórir Geir Guðmundsson
Flosi: „Þetta er ofboðslega hugljúft og skemmtilegt lag. Þetta er danska uppskriftin af Eurovision lagi; gítar, útileiga og góður fílíngur. Ég veit ekki hvort þjóðin mun fíla það eða ekki. Ég verð ekkert fúll ef það fer áfram, en þetta eru ungir krakkar sem eru að fara að syngja og verður að koma í ljós hvort þau í raun og veru höndla þessa pressu sem er í þessar þrjár mínútur. Þetta veltur allt á flutningnum þeirra. Það þarf bara eitt feil og þá missir fólk áhugann. Eins og er, er ég meira á því að það komist ekki áfram.“
Kristín: „Þau eru voða krúttleg. Þetta stendur og fellur með flutningnum en ég held að þau komist ekki áfram.“
Dagur er algjör þruma
Í stormi – Dagur Sigurðsson
Flosi: „Þetta er atriði sem ég er mjög spenntur að sjá vegna þess að hann veit ekkert hvað hann er kominn í. Hann veit ekki hvað Eurovision búbblan er. Það er það skemmtilega við hann. Þarna munum við ekki hafa áhyggjur af flutningi og ég er aðallega spenntur að sjá hvort atriðið í heild gefur manni gæsahúð eins og röddin hans. Lagahöfundurinn Júlí Heiðar er líka algjör snillingur og okkar vonarstjarna. Hann veit alveg hvað hann er að gera. Ef að þeir halda rétt á spilunum þá er þetta lag sem gæti farið alla leið til Portúgal. Það eina sem getur komið í veg fyrir það er að það er annað lag komið í úrslit með svipað element; strákur á sviði sem syngur fallega. Þessi tvö atriði gætu tekið frá hvort öðru. En það er gaman hvað Dagur er þakklátur. Hann er með nákvæmlega sama þakklæti og Ari. Það er gaman að fylgjast með þeim og þeir eru ekki með neina dívustælar. Þeir eru mjög auðmjúkir og einlægir.“
Kristín: „Hann er æðislegur þessi strákur. Mér finnst þetta lag svolítið flott, það vann svolítið á. Hann sjálfur er svo mikil þruma. Úr því Ari fór áfram út á sig sjálfan og röddina þá er Dagur að fara að fljúga áfram. Það er eitthvað að ef hann fer ekki áfram. Hann kann þetta. Hann er ekki að standa uppá sviði í fyrsta sinn heldur hefur hann troðið upp margoft út um allar trissur. Hann veit nákvæmlega hvað hann er að gera og þetta er bara enn eitt giggið.“
„Autotune er besti vinur þessara krakka“
Hér með þér – Egill Ploder Ottósson og Sonja Valdin
Flosi: „Nú er ég maður sem er mjög gagnrýninn á raddir. Ef fólk getur ekki sungið, þá á það ekki að vera í svona keppni. Egill og Sonja eru frábærir skemmtikraftar. Lagið per se er ekkert slæmt, þó ég fíli eiginlega öll lögin betur sem þau hafa gefið út. Mér finnst bara hræðilegt að hlusta á þau. Vinsældarlega séð ætti þetta að fljúga áfram. Þau eiga svakalegan aðdáendahóp á aldrinum 16 til 25 ára sem að þau eru að ná til. En munu þessir krakkar kjósa dúett sem er rammfalskur? Ég bara veit það ekki. Ég vona að ég hafi rangt fyrir mér því ég vil ekki að neinn líti illa út. Ef að þú púlla flutninginn í beinni útsendingu gætu þau farið í undanúrslit í staðinn fyrir Rakeli. Ég verð hins vegar að segja að Egill og Sonja eru mjög vel undirbúin í öllum viðtölum og með markaðshlutann alveg á hreinu. Það gæti fleytt þeim langt.“
Kristín: „Aaa, nei. Ég er búin að heyra í þeim „live“ og autotune er besti vinur þessara krakka. Þau gætu halað inn stigum út af aðdáendahópi Áttunnar en ég held að það sé borin von að þau komist lengra. Þeirra aðdáendahópur er vanur því að þau séu með svo peppuð lög og tvíræðan texta, svo kemur þessi kjút ástaróður. Þau gætu halað inn eitthvað af stigum en ég held að þau fari ekki alla leið.“
Eftir að hafa horft á fyrri undankeppnina eru Flosi og Kristín ekki sammála um hvaða lag eigi eftir að fara alla leið til Portúgal.
Flosi: „Miðað við laugardaginn síðasta eiga Heimilistónar eftir að taka þetta. Og ég vil nýta tækifærið og senda mikið hrós til RÚV sem hafa gert undankeppnina alltaf stærri og stærri og flottari og flottari.“
Kristín: „Ég held að Heimilistónar séu ekki að fara alla leið. Ég væri ekki hissa á að þær fari í einvígið. Ég gæti trúað því að þetta yrði á milli Arons og Fókus hópsins, en ég ætla ekki að útiloka neitt.“
Jakob Frímann með dætrum sínum Katrínu Borg, 5 ára, og Jarúnu Júlíu, 10 ára.
Jakob Frímann Magnússon, tónlistarmaður og framkvæmdastjóri Miðborgarinnar okkar, var 59 ára gamall þegar hann eignaðist yngsta barnið sitt en þá voru liðin 35 ár síðan elsta dóttir hans fæddist. Jakob er einn af fjórum úr Félagi eldri feðra sem eru í viðtali í nýjasta tölublaði Mannlífs.
„Ég var 34 ára þegar Bryndís mín kom í heiminn og tilfinningin var stórkostleg. Mér fannst ég upplifa kraftaverk og upplifunin var miklu stærri og magnaðri en ég bjóst við,“ segir Jakob sem á fjórar dætur; Katrínu Borg, 5 ára; Jarúnu Júlíu, 10 ára; Bryndísi, 30 ára og Ernu Guðrúnu sem hann ættleiddi og er nú 40 ára. Eiginkona Jakobs og móðir yngstu dætrana er Birna Rún Gísladóttir viðskiptafræðingur sem starfar hjá Arion banka.
„Þegar Katrín Borg fæddist var ég 59 ára og upplifunin var afar sterk sem fyrr. Eins og mér fannst ég njóta þess í botn þegar frumburðurinn kom í heiminn þá virðist mér ég nú hafa meiri þroska og burði til þess að njóta þess til hlítar frá degi til dags að eiga ung börn. Það hefur satt að segja veitt mér alveg ólýsanlega gleði og viðvarandi hamingju sem ég þakka af auðmýkt á degi hverjum. Ég er á þeim stað í lífinu núna, að ég nýt upplifunarinnar svo sterklega að mig hefði í raun aldrei órað fyrir því. Við erum alveg einstaklega heppin með börnin okkar og leggjum okkur fram um að rækta þau sem best við getum, fyrst og fremst með því að umvefja þau ómældum kærleika. Það er ekki til neitt dásamlegra í lífinu en að halda á barninu sínu og umvefja það umhyggju og ást í sinni tærustu mynd.
Vinir og ættingjar hafa samglaðst okkur frá fyrsta degi og ég hef aldrei fundið fyrir efasemdum eða fordómum neins konar, þvert á móti. Ég á frábæra konu með stóra og skemmtilega fjölskyldu. Þaðan er nú stoðkerfi fjölskyldunar fyrst og fremst sprottið; ótal svilkonur, frænkur og vinkonur reiðubúnar að passa dömurnar okkar þegar svo ber undir, að ekki sé minnst á mína frábæru tengdamóður Sigurlaugu Þórðardóttur, hana ömmu Systu, sem ávallt er boðin og búin þegar mikið liggur við.“
Mælir með þessu
Jakob segist ekki finna fyrir þreytu, heldur þvert á móti. „Ég bý sem betur fer yfir mikilli orku og hef alltaf gert. Það hefur tvímælalaust gefið mér aukna orku að eignast þessar ljósverur mínar og gleðigjafa. Börnin héldu í raun ekki vöku fyrir okkur nema rétt eftir fæðingu, vorið 2007 og haustið 2012. Ég mæli eindregið með því við þá sem eiga ungar heilbrigðar konur og hafa til þess aðstæður, að eignast börn fram eftir aldri. Það er að mínu mati bæði yngjandi, mannbætandi og einstaklega gefandi. Föðurhlutverkið er nú einu sinni hið mikilvægasta í mínu lífi og ég elska börnin mín alveg óendanlega. Að svæfa þau yngstu með frumsömdum ævintýrum og vakna með þeim á morgnana og aka í skólann, það eru bestu stundir dagsins. Þetta eru svo ómetanleg lífsgæði að mig hefði aldrei órað fyrir því hve mikillar gæfu ég yrði aðnjótandi. Ég hlakka til hvers nýs dags með þessum elskum öllum. Við erum afar samrýmd fjölskylda og njótum hins einfalda í lífinu saman, ekki síður en að ferðast og skemmta okkur við söng og leik. Lífið er sannarlega ljúft þeim föður sem hér er annars vegar.“
Íslenska framleiðslufyrirtækið Hero Productions hafði umsjón með tökum á nýrri auglýsingaherferð með einni skærustu stjörnu Hollywood.
Búi Baldvinsson er eigandi framleiðslufyrirtækisins Hero Productions sem hefur á skömmum tíma unnið með fjölda stórra fyrirtækja, Samsung, Huawei, Nissan, Mercedes Benz, Prince EA, Tineshe, Swedish House Mafia, Aerie, Fabletics, Warner Brothers, Netflix, BBC, National Geographic, Arla, Canon og fleirum.
„Þegar svona stór stjarna er orðin hluti af verkefninu þá er það auðvitað ákveðin staðfesting á því maður sé á réttri leið. Það er því ekki annað hægt en að fyllast stolti,“ segir Búi Baldvinsson eigandi framleiðslufyrirtækisins Hero Productions, sem hafði umsjón með tökum á nýrri auglýsingu fyrir stóran, ónefndan símaframleiðanda fyrr í mánuðinum, en það er engin önnur en kvikmyndaleikkonan Gal Gadot sem fer með aðalhlutverkið.
Gal Godot er rísandi Hollywood-stjarna eftir leik sinni í DC kvikmyndunum Batman vs. Superman, Justice League og Wonder Woman, en sú síðastnefnda var ein af tekjuhæstu kvikmyndum síðasta árs. Í auglýsingunni ferðast Gadot um Ísland og dregur í leiðinni upp farsímann sinn sem framkallar töfrandi ævintýraheim Íslands. Auglýsingunni er leikstýrt af ísraelska leikstjóranum Eli Sverdlov og skotin af Emmanuel Kadosh en Hero Productions hafði umsjón með tökum á Íslandi.
„Þegar svona stór stjarna er orðin hluti af verkefninu þá er það auðvitað ákveðin staðfesting á því maður sé á réttri leið. Það er því ekki annað hægt en að fyllast stolti,“
„Við kvikmynduðum meðal annars við Hjörleifshöfða og Skógarfoss, á Stokksnesi og Höfn í Hornafirði, í íshelli og í Reynisfjöru þannig að þetta var heilmikið púsl,“ lýsir Búi og viðurkennir að á ýmsu hafi gengið meðan á tökum stóð. „Það var algjört vonskuveður á öllu Suðurlandi. Á meðan við vorum á Stokksnesi geisaði til dæmis stormur sinn hvoru megin við fjallið. En veðurguðirnir voru okkur einstaklega hliðhollir því það var algjört logn akkúrat á svæðinu þar sem við vorum við tökur.“ Miðað við aðstæður hafi hlutirnir gengið eins og í sögu og bæði tökulið og heimamenn lagst á eitt að um að láta allt ganga upp.
En hvernig kom til að Hero Productions fékk þetta verkefni? „Við unnum með leikstjóranum og tökumanninum við gerð auglýsingar fyrir erlenda arkitektastofu sem varkvikmynduð upp við Jökulsárlón veturinn 2016. Þeir urðu þá báðir alveg yfir sig hrifnir af því hvernig við gátum unnið við erfiðar aðstæður og fannst því bara engir aðrir koma til greina þegar kom að því að gera þessa auglýsingu.“
Spurður hvenær standi svo til að frumsýna segir Búi tökur nú standa yfir með Gadot í Los Angeles og þeim verði haldið áfram í Þýskalandi. „Auglýsingin ætti svo að fara í loftið í byrjun sumars,“ svarar hann hress.
Sigurður Steinar er á hraðri uppleið í tískuheiminum eftir frábæran árangur í Elite Model Look-fyrirsætukeppninni í Mílanó. Mannlíf tók þennan hressa og efnilega 17 ára Reykvíking tali.
Árlega halda yfir 30 lönd undankeppni fyrir Elite Model Look sem þúsundir keppenda taka þátt í. Af þeim 64 þátttakendum sem komust áfram í ár stóðu uppi 15 sigurvegarar, 10 stúlkur og 5 strákar. Sigurður Steinar var einn fimm sigurvegara í hópi drengja en ekki er raðað sérstaklega í sæti fyrir utan það efsta. Sigurvegararnir fá allir samning við Elite International sem tryggir þeim verkefni í kjölfarið.
Hvernig tilfinning var að ná svona langt í keppninni? „Vá, þegar ég stóð á sviðinu og það var bara eitt sæti eftir og svo heyrist í hljóðkerfinu: „From Iceland, Siggi!“ Það var eitt af skrítnustu augnablikum sem ég hef upplifað! Við höfðum öll fengið fyrirmæli um að halda „kúlinu“ ef við kæmumst áfram, þannig að ég gekk bara fram og tók hring með hinum efstu 15 módelunum en rosalega langaði mig til að fagna!“
Áttirðu von á þessu? „Alls ekki. Það voru svo rosalega margir og flottir krakkar í þessari keppni.“
Var keppnin erfið? „Já, vikuna fyrir keppni þurftum við að vakna klukkan 7 á hverjum morgni, skella í okkur morgunmat og flýta okkur út í rútu sem ók með okkur í risastórt stúdíó þar sem við tóku strangar æfingar. Til dæmis fengum við strákarnir flestir blöðrur á fæturna bara af því að æfa göngulagið í allt of þröngum skóm. Stelpurnar þurftu að ganga í hælaskóm sem var örugglega enn verra. Svo var æft alveg til klukkan 9 öll kvöld. Þannig að þetta var ein af erfiðari en skemmtilegri vikum lífs míns!“
Hvernig kom til að þú tókst þátt? „Þetta byjaði allt hjá Eskimo Models á Íslandi. Fyrir þeirra tilstilli komst ég á samning hjá Elite í París og þar var ákveðið að senda mig beint í stóru lokakeppnina í Mílanó.“
Hafa einhverjar dyr opnast í kjölfarið? „Já, ég er strax kominn á samning hjá Elite Paris og Elite Milano og var að undirrita samning við Elite London. Í janúar tók ég svo þátt í Men’s Fashion Week Winter í París þar sem ég vann fyrir Loewe og ég er líka búinn að fara í prufur hjá Louis Vuitton, Versace, Chanel, Vouge, GQ magazine, Armani, Diesel, Lacoste og fleirum.“
Mynd / Nicholas Efimtcev
Ferðastu þá ekki svolítið í tengslum við starfið? „Jú, ég hef búið í Mílanó og París sem er alveg mögnuð borg. Svo er ég að fara til London til að taka þátt í Men’s fashion.“
Ertu í skóla samhliða módelstörfunum? „Ég kláraði eitt ár í tækniteiknun í Tækniskólanum sem var mjög skemmtilegt en þegar þetta tækifæri bauðst skyndilega ákvað ég, í samráði við foreldra mína og Eskimo, að bíða með námið. Það er nefnilega mjög erfitt að sinna hvorutveggja á sama tíma.“
Hvað finnst skólafélögunum og vinunum um þetta? „Allir í kringum mig eru bara rosalega stoltir af mér og hafa verið duglegir að hvetja mig áfram.“
Stefnirðu að frama í þessu eða langar þig til að vinna við eitthvað annað þegar þú verður eldri? „Ég ætla að einbeita mér að þessu, alla vega eins og er en ég stefni að því að fara í nám í arkitektúr seinna.“
Elite Model Look-keppnin hefur verið haldin árlega frá 1983 og er stór stökkpallur fyrir fyrirsætur en meðal þeirra sem hafa byrjað feril sinn þar eru ofurfyrirsæturnar Cindy Crawford og Gisele Bundchen. Mynd / Cynthia Frebourg
En þessi bransi, er hann í líkingu við það sem þú ímyndaðir þér? „Nei, þegar ég byrjaði vissi ég ekki alveg hvað ég var að fara út í. Þetta er mjög gaman en líka algjört puð. Það tekur á að fara í 16 prufur á einum degi og ekki grunaði mig að ég myndi lenda í topp fimm í stærstu módelkeppni í heimi! Þessi bransi er svolítið þannig; það er erfitt að sjá fyrir hvað gerist næst. Nú er ég til dæmis að fara til London og svo kannski til París. Annað veit ég ekki í bili. Eina sem ég veit er að það er búið að vera algjört ævintýri að fá að ferðast og búa í svona flottum stórborgum bara 17 ára og þurfa að sjá um sig sjálfur.“
Áttu heilræði handa þeim sem vilja feta sig út á þessa braut? „Hafðu trú á þér. Vertu ófeiminn og alls ekki reyna að vera eins og allir hinir. Vertu bara þú sjálfur og komdu alltaf heiðarlega fram.“
Hægt er að fylgjast með Sigurði Steinari á Instragram undir notendanafninu sigurdur_st
Félag Ungra athafnakvenna í samstarfi við Alvotech munu standa fyrir ráðstefnu sem haldin verður 10. mars næstkomandi í Hörpu sem tileinkuð er ungum konum í atvinnulífinu og nefnist ráðstefnan UAK dagurinn.
Fram undan er spennandi ráðstefna í Hörpu þar sem félagið leitast við að skapa vettvang fyrir konur til að fræðast og efla hver aðra, fylla þátttakendur eldmóði og fá til liðs við sig áhrifafólk, ráðherra og erlenda gesti. Markmiðið er að gera stjórnendum fyrirtækja, stjórnmálamönnum og ungu fólki í atvinnulífinu á Íslandi grein fyrir kröftum vel menntaðra og reynslumikilla kvenna ásamt mikilvægi þess að hlustað sé á kröfur þessa öfluga hóps hvað varðar atvinnutækifæri.
Sigyn Jónsdóttir er formaður Ungra athafnakvenna (UAK). Sigyn er hugbúnaðar- og rekstrarverkfræðingur frá Columbia University og starfar hjá Men & Mice ásamt því að sitja í stjórn nýsköpunarfyrirtækisins Mure. UAK var stofnað árið 2014 af Lilju Gylfadóttur. Alls eru sex konur í stjórn UAK og eru félagskonur um 250 talsins. Í hverri viku bætast við nýjar félagskonur.
Hver eru helstu áherslur UAK og hafið þið sett ykkur markmið með starfseminni? „Ungar athafnakonur vilja stuðla að jafnrétti, hugarfarsbreytingu og framþróun í samfélaginu. Félagið er fyrir konur sem vilja skara fram úr á hinum ýmsu sviðum atvinnulífsins og við leitumst við að skapa vettvang fyrir konur til að fræðast og efla hver aðra,“ segir Sigyn.
„UAK dagurinn er ráðstefna tileinkuð ungum konum í atvinnulífinu. Á ráðstefnunni fáum við tækifæri til að hlusta á íslenska og erlenda leiðtoga ræða málefni sem skipta máli fyrir samfélagið sem við búum í, málefni sem tengjast jafnrétti.“
Hvernig vegnar ungum konum almennt og hver er upplifun þeirra í atvinnulífinu? „Ungar íslenskar konur eru í mikilli forréttindastöðu þegar horft er til annarra heimshorna eða nær okkur, til stöðu kvenna af erlendum uppruna hér á landi. Tækifærin eru ótal mörg og háskólarnir fullir af ungum konum sem eru tilbúnar að takast á við krefjandi stöður í atvinnulífinu. Eftir útskrift tekur svo við blákaldur raunveruleikinn og við okkur blasa staðreyndirnar, rúmlega 90% þeirra sem stýra peningum á Íslandi eru karlar. Þessu þarf að breyta og við ætlum ekki að sitja rólegar og bíða eftir því að hlutirnir breytist. Þar til konur og karlar standa jöfnum fótum í íslensku samfélagi munu Ungar athafnakonur starfa áfram og vinna að jafnrétti með fræðslu, umræðu og hvatningu,“ segir Sigyn.
Getur þú sagt okkur frekar frá UAK deginum sem fram undan er í Hörpu? „UAK dagurinn er ráðstefna tileinkuð ungum konum í atvinnulífinu. Á ráðstefnunni fáum við tækifæri til að hlusta á íslenska og erlenda leiðtoga ræða málefni sem skipta máli fyrir samfélagið sem við búum í, málefni sem tengjast jafnrétti,“ segir Sigyn.
Hvert er markmið ykkar með ráðstefnunni? „Við viljum gera stjórnendum fyrirtækja, stjórnmálamönnum og ungu fólki í atvinnulífinu grein fyrir kröftum vel menntaðra og reynslumikilla kvenna ásamt mikilvægi þess að hlustað sé á kröfur þessa öfluga hóps hvað varðar atvinnutækifæri,“ segir Sigyn.
*SÉRSTAKUR GESTUR RÁÐSTEFNUNNAR ER LAURA KORNHAUSER
Sérstakur gestur er Laura Kornahauser.
Laura er forseti og framkvæmdastjóri Stratyfy sem spáir fyrir um og greinir gögn til að efla hina sönnu sérfræðinga fyrirtækja – fólkið sem stýrir þeim til að taka upplýstari ákvarðanir til að bæta fyrirtækið. Hún tók þátt í að stofna Stratyfy árið 2016 ásamt þremur verkfræðingum. Fyrir stofnun Stratyfy var Laura framkvæmdastjóri hjá JPMorgan og vann við að selja flóknar afleiddar vörur til stórra kúnna. Á tólf árum hjá JPMorgan varð Laura sérfræðingur í að sjá um flókin sambönd við kúnna, bera kennsl á vörutækifæri og að þróa ný boð til að koma til móts við aukna eftirspurn kúnna. Hún upplifði þá óhagkvæmni þeirra vara sem notaðar voru, sérstaklega þeirra sem notaðar voru til að fylgja þróun í umhverfi reglugerðar. Eftir að hafa skapað ýmis ferli, tæki og tól til að hjálpa við að bæta árangur viðskipta, vissi hún að það þyrfti að vera til betri lausn og hún ætlaði að finna hana.
Hér má sjá dagskrána sem er hin glæsilegasta og von er á öflugum og fjölbreytum hóp fyrirmynda öðrum til eftirbreytni.
UAK dagurinn 2018 – Ráðstefna tileinkuð ungum konum í atvinnulífinu
· Hvar og hvernig er AI þróað? Hverjir eru að því? Hvaða fyrirtæki? Hvernig eru teymin samansett, t.d. kynjahlutföll?
· Eru konur í minnihluta í þeim greinum sem verða hvað mest áberandi í fjórðu iðnbyltingunni? Ef já, hvað er hægt að gera? Eru stjórnvöld, menntastofnanir og fyrirtækin í landinu að undirbúa sig fyrir fjórðu iðnbyltinguna? Hvernig?
Gestir verða fulltrúar atvinnulífsins, stjórnvalda og háskólasamfélagsins.
Panel: Umræðan um áhrifamiklar konur
· Fyrirfinnst tvöfalt siðgæði gagnvart konum í almennri umræðu Íslendinga um áhugaverða einstaklinga?
· Gerum við meiri kröfur til útlits, framkomu og vinnubragða kvenna? Er orðræðan um áhrifamiklar konur harkalegri en orðræðan um karla í sambærilegum störfum?
· Fá konur, sem eru áberandi vegna vinnu sinnar, verri útreið í fjölmiðlum og athugasemdakerfum netheima vegna mistaka sinna?
· Finnst konum þær þurfa að vanda sig meira í starfi og með það sem þær tjá sig um opinberlega vegna ótta við að vera dæmdar harkalegar en karlar?
· Ef já, af hverju? Og hvernig breytum við þessu?
Gestir verða konur sem hafa verið áberandi í stjórnmálum eða stjórnendur stórra fyrirtækja sem hafa leitt erfið verkefni eða þurft að taka erfiðar ákvarðanir. Einnig farið í gegnum krefjandi tímabil á sínum starfsferli, þurft að svara fyrir sína vinnu og mögulega upplifað ósanngjörn viðhorf og athugasemdir í sinn garð.
Stjórn UAK, talið frá vinstri: Helena Rós Sturludóttir samskiptastjóri, Elísabet Erlendsdóttir viðskiptastjóri, Andrea Gunnarsdóttir viðburðastjóri, Sigyn Jónsdóttir formaður og Anna Berglind Jónsdóttir. Á myndina vantar Ásbjörgu Einarsdóttur fjármálastjóra.
Stúdíó Birtingur í samstarfi við Félag ungra athafnakvenna.
Umsjón / Sjöfn Þórðardóttir
Myndir / Heiðdís Guðbjörg Gunnarsdóttir
