Kristín Tómasdóttir styrkir sjálfsmynd ungra krakka.

Kristín Tómasdóttir rithöfundur hefur á undanförnum árum skrifað sex bækur ætlaðar ungum krökkum. Hún leggur áherslu á að byggja upp sterka sjálfsmynd og efla vitund þeirra um eigin tilfinningalíf. Nýjasta bók hennar, Sterkar stelpur, hefur þó ákveðna sérstöðu því hún er ætluð yngri lesendahópi og er tileinkuð yngstu dóttur hennar sem er trans stúlka.

Kristín hefur einnig sett saman sjálfstyrkingarnámskeið fyrir stelpur og ferðast um landið í þeim tilgangi að efla íslenskar stelpur.

„Ég fann fyrir mikilli eftirspurn meðal foreldra sem voru farnir að finna fyrir því að sjálfsmynd stelpna þeirra væri farin að þróast í neikvæða átt fyrr en þá hafði grunað,“ segir hún. „Við erum að sjá stelpur niður í 6 ára fara í megrun og alls kyns önnur merki sem foreldrar hræðast en vita líka að hægt er að koma í veg fyrir með fyrirbyggjandi sjálfstyrkingu.“

Ítarlegra viðtal við Kristínu er að finna í nýjustu Vikunni.

Texti / Íris Hauksdóttir
Myndir / Aldís Pálsdóttir

Sonja Arnardóttir slasaðist illa í bílslysi en keppir nú í fitness.

Fyrir sex árum ákvað Sonja að taka allhressilega til í sínu lífi. Hún ákvað að setja sjálfa sig í fyrsta sæti og hóf að stunda líkamsrækt af kappi. Á síðasta ári byrjaði hún að þjálfa fyrir sitt fyrsta fitness-mót. Í dag er hún hraustari en hún hefur nokkurn tímann verið og stefnir ekki að því að hætta að hreyfa sig í bráð.

Í desember 1991 var hún á ferð í Borgarfirði þegar hún keyrði óvænt inn á mikið ísingasvæði með þeim afleiðingum að hún missti stjórn á bílnum og hann fór nokkrar veltur. Sonja var ekki í öryggisbelti og kastaðist langa leið út um framrúðu bílsins. Hún var með meðvitund allan tímann og man vel sársaukann og brothljóðin þegar bein líkama hennar fóru í sundur. Með henni í för var fyrrverandi eiginmaður hennar sem slasaðist mikið í andliti. Þau voru svo heppin að aðrir vegfarendur komu fljótlega á vettvang til hjálpar og þar á meðal var sjúkraflutningamaður sem sá til þess að Sonja var ekki hreyfð fyrr en læknir og sjúkrabíll voru komnir á staðinn.

Sonja átti erfitt með andardrátt og hélt í raun að hún væri að deyja. Við tóku margar aðgerðir, löng sjúkrahúsvist og endurhæfing. Ljóst var að þessi unga kona næði aldrei fullri heilsu aftur. Í raun var hún stálheppin að mænan skyldi ekki fara í sundur. Nú nærri þremur áratugum síðar er hún enn að takast á við líkamlegar og andlegar afleiðingar slyssins en telur að það stranga mataræði og agi sem fylgir fitness-íþróttinni hafi hjálpað sér mikið. Hún lætur enga bilbug á sér finna og stefnir á að keppa aftur á mótum í ár.

Viðtalið í heild má finna í nýjasta tölublaði Vikunnar.

Texti / Hildur Friðriksdóttir
Myndir / Hákon Davíð Björnsson
Förðun / Björg Alfreðsdóttir
Fatnaður / Lindex og Vila

Tiltölulega ný tækni í varanlegri förðun.

Það er ekki ofsögum sagt að augabrúnirnar eru besti „fylgihlutur“ hverrar konu, enda ramma þær inn andlitið. Síðustu misserin hefur tiltölulega ný tækni í varanlegri förðun notið mikilla vinsælda enda útlitið náttúrulegra en það sem áður þekktist.

Microblading-aðferðin hefur notið mikilla vinsælda um heim allan en hér á landi eru nokkrar snyrtistofur sem sérhæfa sig í þessari nýlegu tækni. Aðferðin felur í sér að búa til örmjó „hár“ með stykki sem hefur örfínan hnífsodd sem sker í ysta lag húðarinnar sem síðan er fyllt upp í með lit. Með þessum hætti er auðvelt að búa til aukahár, þykkja brúnir og breyta lagi þeirra eða jafnvel hanna þær frá grunni ef engin hár eru fyrir.

Hér eru nokkur atriði sem vert er að hafa í huga ef þú hefur áhuga á því að fá þér microblading-augabrúnatattú:

Leggstu í rannsóknarvinnu
Vertu viss um að vera búin að kynna þér þann sérfræðing sem þú velur til þess að gera tattúið vel áður en hafist er handa. Fáðu að sjá fyrir og eftir-myndir eftir viðkomandi til að vera viss um að vinna hans/hennar sé þér að skapi og menntun og reynsla standist kröfur þínar. Sérfræðingurinn ætti einnig að geta svarað öllum spurningum sem vakna hjá kúnnanum og aðgerðin framkvæmd í sterílu og fagmannlegu umhverfi.

Undirbúðu þig
Áður en þú færð þér microblading-tattú skaltu forðast það að vaxa eða plokka augabrúnirnar. Einnig er gott að sleppa því að nota kornamaska sem inniheldur allskyns sýrur sem eiga það til að skapa roða í húðinni og varastu að nota blóðþynnandi lyf. Þær sem eru óléttar, með barn á brjósti eða sykursjúkar ættu að forðast microblading.

Tjáðu þig
Sérfræðingurinn sem þú leitar til mun mæla andlit þitt og augabrúnir og vinna út frá andlitsfalli þínu og mælingum til að fá sem náttúrulegasta yfirbragðið. En vertu dugleg við að tjá óskir þínar við sérfræðinginn og áður en hafist er handa er mikilvægt að þú sjáir teikningarnar á andlitinu, ef vera skyldi að þú vildir gera einhverjar breytingar.

Passaðu upp á þær
Þegar þú ert búin að fá fullkomnar augabrúnir er eðlilegt að þú viljir sýna þær. Passaðu samt upp á að nota ekki krem og aðrar húðvörur nálægt svæðinu í að minnsta kostu tíu daga eftir aðgerðina og ekki snerta svæðið. Vertu dugleg að bera græðandi krem á svæðið með eyrnapinna.
Þar sem hrúður myndast á meðferðarsvæðinu mun liturinn vera dekkri og skarpari fyrstu vikuna. Eftir 6-10 daga dofnar liturinn um u.þ.b. helming. Eftir 4-6 vikur ættirðu að fara aftur og láta laga það sem hefur dofnað og láta vita ef þú vilt láta lagfæra eitthvað varðandi útlit brúnanna.

Passaðu upp á að fara ekki í sólbað, synda eða svitna mikið fyrstu tíu dagana eftir microblading. Þegar svæðið hefur náð að gróa er gott að nota sólarvörn á brúnirnar til að koma í veg fyrir að þær dofni.

Misjafnt er eftir húðtýpu og lit á brúnum hversu lengi microblading-aðferðin endist á húðinni en eftir hálft ár getur útlit háranna farið að dofna. Mælt er með endurkomu á 8 mánaða til tveggja ára fresti.

Texti / Helga Kristjáns

Fjórir frægustu kvenleikstjórar samtímans.

Kvikmyndabransinn er algjört karlaveldi; karlar reka framleiðslufyrirtækin, vinna flest verðlaun, fá betur borgað fyrir leik sinn í kvikmyndum og svona mætti lengi telja. Það hallar sérstaklega á kvenkynsleikstjóra. Ein skýringin á þessu er að konur eru ekki meðvitaðar um fulltrúa sína innan þessarar stéttar og átta sig því ekki á að þetta sé mögulegur starfsferill fyrir þær. Við viljum því fjalla um fjóra frægustu kvenleikstjórana í bransanum um þessar mundir.

Kathryn Bigelow
Einn frægasti kvenleikstjóri samtímans er Kathryn Bigelow (á myndinn hér að ofan). Hún var lengi gift öðrum frægum leikstjóra, James Cameron, sem leikstýrði meðal annars Titanic. Kathryn er þekkt fyrir fremur karllægar kvikmyndir svo sem Zero Dark Thirty og Point Break og var fyrsta konan til að vinna Óskarsverðlaun fyrir leikstjórn kvikmyndarinnar The Hurt Locker árið 2008.

„Ef það er einhver mótstaða gegn því að konur séu að gera kvikmyndir þá kýs ég að leiða hana alveg hjá mér af tveimur ástæðum: Ég get ekki breytt kyni mínu og ég þverneita að hætta að gera kvikmyndir.“

________________________________________________________________

Sofia Coppola
Það má með sanni segja að leikstjórn sé Sofiu Coppola í blóð borin en hún er dóttir leikstjórans fræga Francis Ford Coppola sem á meðal annars heiðurinn að myndunum um Guðföðurinn. Hún vann Óskarsverðlaun árið 2004 fyrir handritið að Lost In Translation og hún var einnig tilnefnd fyrir leikstjórn sömu myndar. Sofia fékk einnig þann mikla heiður að fá Gullpálmann fyrir leikstjórn á kvikmyndahátíðinni í Cannes en hún er aðeins önnur konan til að hljóta þau verðlaun og fyrsta bandaríska konan.

„Meðalmennska og miðjumoð er það versta sem ég get hugsað mér. Það er miklu áhugaverðara að fá sterk og afgerandi viðbrögð og að það sé blanda af fólki sem ýmist fílar myndina eða fílar hana ekki. Þannig verða til samræður.“

________________________________________________________________

Jane Campion
Fyrir um það bil tveimur áratugum var Jane Campion aðalkonan í leikstjórabransanum. Hún byrjaði að reyna fyrir sér í heimalandi sínu, Ástralíu, og sló svo í gegn með myndinni The Piano sem fjallaði um mállausan píanóleikara. Hún var aðeins tilnefnd til Óskarsverðlauna en vann hins vegar Gullpálmann fyrst kvenna fyrir þá mynd.

„Ég myndi svo gjarnan vilja sjá fleiri kvenleikstjóra því þær standa fyrir helming mannkyns sem fæddi allan heiminn. Ef þær eru ekki að skrifa og leikstýra þá munum við hin ekki fá að heyra alla söguna.“

________________________________________________________________

Catherine Hardwicke
Þó að hún sé eflaust þekktust fyrir að hafa leikstýrt fyrstu, og bestu, Twilight-myndinni þá er Catherine Hardwicke mest metin fyrir leikstjórnarlega frumraun sína, Thirteen, sem er hrá og átakanleg þroskasaga. Hún hefur mikinn áhuga á að segja sögur kvenna og ein af nýrri myndum hennar er fallega vináttumyndina Miss You Already.

„Ég hef setið fundi þar sem voru bókstaflega tólf reiðir karlar í fundarherbergi og ég. Þegar hver einasti þeirra skaut niður hugmynd mína stóð ég samt bara fastar á mínu.“

Texti / Hildur Friðriksdóttir

Elfa Þorsteinsdóttir heilsufrömuður stendur á bakvið heimasíðuna rawmother.com þar sem hún deilir hráfæðisuppskriftum og ýmsum heilsutengdum fróðleik.

Heilsuáhugi hennar kviknaði fyrir nokkrum árum þegar breytt mataræði gjörbreytti líðan langveiks sonar hennar.

„Heimasíðan hefur verið lengi í fæðingu. Ég eignaðist dreng árið 2005 sem var langveikur. Eftir lífsnauðsynlegar aðgerðir sat hann enn þá eftir með ýmis heilsufarsleg vandamál sem hefðbundar lækningar gátu ekki hjálpað honum með. Þarna hófst fyrir alvöru heilsuáhuginn minn,“ segir Elfa sem búið hefur ásamt fjölskyldu sinni á suðurströnd Englands í fimm ár. Eftir aðgerðirnar og ýmsa fylgikvilla átti sonur hennar, Anthony, meðal annars erfitt með alla næringarinntöku. „Ég var mamma með veikan strák með það eina markmið að finna lausn sem virkaði fyrir hann. Eftir mikinn lestur ákvað ég að prófa að fara með honum á hráfæði í eitt ár og athuga hvort það myndi hjálpa honum. Það er skemmst frá því að segja að á sjö mánuðum komst líkami hans í fullkomið lag og allt fór að virka rétt í fyrsta skipti á ævi hans.

Daginn sem ég fékk niðurstöðurnar úr prufunum hans lofaði ég honum að ég myndi vera með honum á hráfæði þar til hann flytti að heiman og fljótlega var öll fjölskyldan komin á sama fæði. Maðurinn minn losnaði í kjölfarið við ýmis heilsufarsleg vandamál á nokkrum mánuðum auk þess að missa 30 kíló og dóttir okkar losnaði við áreynsluasma. Ég hef lært svo margt á þessum tíma í sambandi við heilsu og hvernig við getum notað réttan mat til að hjálpa líkama okkar að lækna sig sjálfur. Mér fannst ekki hægt að vera komin með alla þessa þekkingu, eftir að vera búin að lifa þessum lífsstíl í svona mörg ár, og halda henni bara fyrir sjálfa mig og fjölskyldu mína.

„Ég hef lært svo margt á þessum tíma í sambandi við heilsu og hvernig við getum notað réttan mat til að hjálpa líkama okkar að lækna sig sjálfur.“

Það er líka búin að vera gríðarlega mikil eftirspurn eftir námskeiðum hjá mér og ráðum í sambandi við bætt mataræði. Svo það lá eiginlega beinast við að koma þekkingunni fyrir á einum stað. Ég var svo heppin að fá hana Ingibjörgu Rósu, vinkonu mína, með mér í þetta verkefni. Hún er mín hægri hönd í öllu sem kemur að tæknimálum, textum fyrir heimasíðuna og uppsetningu, enda með enskukunnáttu upp á rúmlega tíu. Heimasíðan var svo opnuð á ellefu ára afmælisdegi hans Anthonys í fyrra.“

Sérstakar barnauppskriftir

Síðan er í stöðugri þróun og vinnslu þar sem Elfa bætir inn uppskriftum reglulega, setur inn bloggpósta og fræðslu. „Sérstaðan felst kannski helst í því að þarna er manneskja sem lifir þessum lífsstíl og er með alla fjölskyldu sína á hráfæði. Ég legg mikið upp úr því að maturinn bragðist vel og geti því höfðað til sem flestra. Fólk hefur svo val um að koma í áskrift hjá mér þar sem það fær nýjar uppskriftir reglulega með vídeói um hvernig hver réttur er búinn til. Þetta er eins og að vera í áskrift að hráfæðinámskeiði þar sem ég býð öllum heim í eldhús til mín.

Anthony er líka með sitt svæði á síðunni, Anthony’s Kitchen, þar sem við búum saman til uppáhaldsréttina hans. Þeir eiga það sameiginlegt að vera allir mjög einfaldir og bragðgóðir. Við upptökur á efni fyrir Anthony’s Kitchen verða stundum mistök. Það er stundum ansi spaugilegt það sem miður fer og svo á Anthony til að vera mjög orðheppinn í tökum, sem er ekki hægt að nota í aðalmyndböndin, svo Anthony kom með þá hugmynd að gera myndbönd úr skotunum sem misheppnast og við erum nýbúin að setja þau inn á síðuna líka.“

Elfa tekur að sér að leiða hópa í föstur og safahreinsanir. „Ég hef farið reglulega í hreinsanir síðan ég var 18 ára. Þær eru einfaldlega hluti af mínum lífsstíl. Á síðustu árum hefur verið sótt mjög mikið í að komast í þessar hreinsanir með mér og það hefur undið upp á sig. Ég býð Facebook-vinum mínum og fylgjendum að koma með mér í hreinsanir þrisvar sinnum á ári. Þar fá allir frítt prógramm sem ég hef sett saman og stuðning í gegnum alla hreinsunina. Nýárshreinsunin er sú lengsta, 10-14 dagar, svo eru styttri hreinsanir í maí og september, 4-5 dagar. Þetta hefur verið ótrúlega gaman og gefandi þrátt fyrir mikla vinnu við hverja hreinsun. Þessar hreinsanir hafa verið upphafið hjá mörgum að taka næstu skref að bættum lífsstíl sem mér þykir sérstaklega vænt um að fá að vera þátttakandi í.“

Í þekktum heilsuþætti

Elfu bregður fyrir í myndinni Fat, Sick & Nearly Dead 2 eftir ástralska kvikmyndagerðarmanninn og heilsufrömuðinn Joe Cross en hann hefur persónulega reynslu af djúsföstu. „Fyrir nokkrum árum var ég að hjálpa einni vinkonu minni sem þurfti að fara í langa og mikla safahreisnun og ákvað að prófa að bjóða Facebook-vinum mínum að vera með. Ég átti von á að fá kannski 4-5 með okkur en á rúmum sólarhring voru komnir yfir 100 manns í hreinsihópinn, alls staðar að úr heiminum. Ég hafði ekki hugmynd um hvernig ég gæti stutt allan hópinn og hafði því samband við Joe Cross sem þá hafði nýlega gefið út myndina sína Fat Sick and Nearly Dead og bað um hjálp hans. Honum fannst mjög sérstakt það sem ég var að gera og gerði þá undantekningu að hjálpa mér við að styðja og hvetja fólkið í hópnum. Hann kom inn, kommenteraði og fylgdist með okkur – sem var brjálað „búst“ fyrir alla. Við Joe höfum hist nokkrum sinnum eftir þetta þegar hann hefur komið til London. Hann er svo einstaklega vandaður maður, er alveg eins í persónu og þú sérð hann á skjánum. Honum fannst svo flott að þekkja manneskju frá kalda Íslandi sem væri að djúsa þannig að ég fékk að vera ein af þeim sem heilsa áhorfendum í upphafsatriði myndarinnar Fat, Sick and Nearly Dead 2.“

Fram undan er áframhaldandi uppbygging uppskriftabankans á heimasíðunni, viðbætur á fróðleik og fleira. „Svo eru hreinsanirnar mínar reglulega á dagskrá. Á Facebook getur fólk skráð sig í hópinn og fengið aðgang að prógramminu og stuðningshópnum frítt. Svo er líka hægt að fylgjast með mér á Instagram og Twitter þar sem allar upplýsingar eru einnig settar inn. Svo langar mig mjög mikið til að koma til Íslands og halda þar námskeið aftur sem fyrst.

„Ég hef farið reglulega í hreinsanir síðan ég var 18 ára. Þær eru einfaldlega hluti af mínum lífsstíl. Á síðustu árum hefur verið sótt mjög mikið í að komast í þessar hreinsanir með mér og það hefur undið upp á sig.“

Við Anthony erum með langan lista af hugmyndum og réttum sem við eigum eftir að taka upp fyrir Anthony’s Kitchen. Regluleg „live-vídeó“ eru á Facebook-síðunni minni og margt fleira skemmtilegt fram undan. Það er um að gera að fylgjast með fyrir þá sem hafa áhuga á að bæta við hollum  grænmetisréttum fyrir fjölskylduna og fá heilsutengda fróðleiksmola.“

Hráfæðis-triffli

Triffli er gamall og hefðbundinn enskur eftirréttur sem er borinn fram í glerskál og samanstendur vanalega af svampbotni eða makkarónukökum, ávöxtum og eggjakremi. Að auki er oft áfengi í honum svo hann er langt í frá hollur í sinni upprunalegu mynd. Hér er hins vegar útgáfa af honum sem er svo holl að óhætt er að fá sér tvo og jafnvel þrjá skammta.

Súkkulaðilag
1 bolli möndlur

1 bolli mjúkar döðlur

1 bolli kakóduft

3 msk. sæta í fljótandi formi, t.d. kókosnektar, hunang, agave o.fl.

3 msk. kókosolía

salt

Setjið möndlur, döðlur og kakóduft í matvinnsluvél og látið hana ganga þar til möndlurnar og döðlurnar eru komnar í fína bita.
Bætið þá sætunni, kókosolíunni og smávegis salti, eftir smekki hvers og eins, út í og látið matvinnsluvélina ganga áfram í nokkrar sekúndur, eða þar til kurlið loðir saman þegar það er kramið á milli tveggja fingra.

Berjalag

300 g hindber eða jarðarber, eftir smekk. Hvort tveggja eru himnesk ber til að nota í þessa uppskrift.

Settu berin í skál og stappaðu þau með gaffli til að búa til gróft mauk.

Ágætt er að skilja nokkur ber eftir til að nota til að skreyta með.

Búðingur

1 bolli nýkreistur appelsínusafi, úr u.þ.b. 3 appelsínum

safi úr 1 appelsínugulri papriku, u.þ.b. 1 dl

1 mangó

safi úr ½ sítrónu

1 bolli kasjúhnetur, lagðar í bleyti í 2-4 klst.

1 bolli kókosolía, fljótandi, hún bráðnar við 25°C

½ bolli hreint xylitol

1 tsk. stevíudropar með vanillubragði

salt eftir smekk

Paprikan er sett í gegnum djúsvél, eða bara í blandara og svo má sía safann frá með fínni grisju eða hnetumjólkurpoka. Afhýðið mangóið og takið steininn frá.

Allt er sett í blandarakönnu og blandað vel eða þar til kasjúhneturnar eru vel maukaðar og komin er búðingsblanda með silkimjúkri áferð.

Samsetning

Sett í lögum í fallega glerskál. Byrjið á að setja helminginn af súkkulaðikurlinu í botninn á skálinni. Þrýstið aðeins niður með sleif svo botninn verði vel þéttur. Hellið helmingnum af búðingnum yfir. Þar ofan á fer allt berjamaukið og svo restin af súkkulaðikurlinu áður en afgangurinn af búðingnum fer ofan á sem efsta lag.

Fallegt að skreyta með sömu berjum og notuð eru í berjalagið.

Látið standa í vel köldum ískáp í um það bil 8-10 klst. eða inni í frysti í 2 klst. til að búðingurinn þéttist áður en trifflið er borið fram.
Njótið hvers munnbita af þessum heilsusamlega og himneska eftirrétti.

Texti / Ragnhildur Aðalsteinsdóttir
Myndir / Alexandra Kristjánsdóttir

Það er hægt að gera margt með skemmtilegt með krökkunum heima.

Samverustundir fjölskyldunnar eru mjög dýrmætar. Oft er talað um gildi útiveru og hvernig má gera skemmtilega hluti með börnum utan veggja heimilisins. En innivera er ekki síður góð og gild, það er hægt að gera margt fleira skemmtilegt en bara að horfa á sjónvarpið. Hér eru nokkrar góðar hugmyndir.

Allir í eldhúsinu
Góð leið til að verja tíma með börnunum er að elda eða baka eitthvað með þeim. Matreiðsla getur aukið áhuga, sjálfstraust, forvitni og frumkvæði barna. Þau eru flest vön að sjá foreldra sína í eldhúsinu þannig að við það að fá að taka þátt finna þau fyrir trausti frá hinum fullorðnu og gera sér grein fyrir að þau séu að læra eitthvað sem er mikilvægt. Með því að taka þátt fer barnið einnig að velta fyrir sé hvað það borðar, hvað er í matnum sem það borðar og hvaðan hráefnið kemur. Með því að kynnast öllu ferlinu og hráefnum frá grunni getur gert það að verkum að matvendni minnki ef hún er til staðar. Það skiptir miklu máli fyrir allt lífið að fá áhuga á matreiðslu og geta eldað sér næringarríkan mat. Því upplýstara sem barnið verður því minni líkur verða á að það velji eingöngu skyndibita í framtíðinni. Matreiðsla stuðlar einnig að ýmiss konar færni, svo sem stærðfræði, því það þarf að mæla hráefni, telja og stundum leggja saman, og einnig eykst orðaforði barnsins. Það er líka mikil áskorun að takast á við afleiðingarnar ef eitthvað fer úrskeiðis og vinna að lausnum í þeim efnum.

Litagleði
Flestir foreldrar þekkja það að vera beðnir um að sitja og teikna með barninu sem getur reynst flókið ef maður hefur litla sem enga hæfileika á því sviði. Hins vegar geta allir litað og undanfarin ár hafa vinsældir litabóka fyrir fullorðna aukist til muna. Margir trúa því að það sé róandi fyrir hugann að lita og þessi iðja er oft tengd við hugmyndir um gjörhygli, eða mindfulness, og litir hafa lengi verið notaðir í ýmiss konar listmeðferð. Helsti munurinn á litabókum fyrir börn og fullorðna er erfiðleikastigið, litabækur fullorðinna eru með smærri og flóknari myndum. Þannig að nú geta foreldrar og börn setið saman með sína litabókina hvert og notið þess að lita saman.

Fjölskyldan getur setið saman og lesið bók þannig að hver fjölskyldumeðlimur fær sitt tækifæri til að lesa upphátt fyrir hina … Þetta eykur bæði lesskilning og lestrarfærni barna.

Sögustund
Margir, ef ekki flestir, foreldrar lesa fyrir börnin sín þar til þau ná þeim aldri að byrja að lesa sjálf. En það er ekki síður skemmtilegt að lesa með börnunum sínum þegar þau eru farin að geta það sjálf. Til dæmis getur fjölskyldan setið saman og lesið bók þannig að hver fjölskyldumeðlimur fær sitt tækifæri til að lesa upphátt fyrir hina. Síðan má ræða saman um atvik í bókinni og spá í söguþráðinn. Þetta eykur bæði lesskilning og lestrarfærni barna auk þess sem orðaforði þeirra eykst. Einnig getur þetta aukið sjálfstraust barna því þau munu oft þurfa að lesa upphátt fyrir jafningja sína í skólanum sem getur verið ógnvekjandi fyrir marga.

Spilerí
Í dag spila börn frekar tölvuleiki en hefðbundin spil. Það er allt gott og blessað því leikirnir æfa oftar en ekki svipaða tækni og færni, svo sem kænsku, úrlausn vandamála og þolinmæði. Það getur þó verið erfiðara fyrir foreldra að taka þátt í því spili. Því ekki grafa upp spilastokk og kenna börnum nokkra góða leiki sem þið spiluðuð í æsku? Þetta gefur tengingu við fortíðina og börn hafa gaman af því að heyra hvernig hlutirnir voru þegar þið voruð krakkar. Borðspil eru einnig skemmtileg þótt þau séu oft tímafrekari en að spila á spil. Hægt er að nota tímann á meðan spilað er til að ræða daginn og veginn, spyrja um skóladaginn eða hvað sem er án þess þó að það sé þvingað eða einhver pressa.

Í barndóm aftur
Það hafa allir gott af því að leika sér aðeins og finna barnið innra með sér. Börn hafa líka þörf fyrir að finna þessa tengingu við foreldra sína, að þeir séu líka börn inn við beinið. Fyrir utan þessa klassísku leiki, svo sem feluleik, er til dæmis skemmtilegt að búa til virki úr púðum, sófum og teppum og síðan er hægt að fara í þykjustuleik inni í virkinu. Annar skemmtilegur leikur er nokkurs konar dótakeila; þá er böngsum, dótaköllum eða öðru dóti raðað upp við endann á löngum gangi og leikmenn skiptast svo á að rúlla bolta og reyna að fella dótið. Önnur útfærsla á þessum leik er að leikmenn stilli sér upp sitt hvorum megin við ganginn með sína dótakalla og þá er markmiðið að vera fyrstur til að fella alla kallana hjá hinum. Önnur góð leið til að fá útrás og hafa það gaman er að halda danspartí, þá er einfaldlega skemmtilegt lag sett á fóninn og svo dansa allir eins og þeir eigi lífið að leysa.

Texti / Hildur Friðriksdóttir
Myndir / www.pixabay.com

Sex góð ráð til þess að líða betur og ná lengra í starfi.

Flest viljum við ná einhverri velgengni í því starfi sem við höfum valið okkur. Við verjum jú bróðurpartinum af lífinu í vinnunni og því skiptir máli að við finnum að við séum að ná árangri. Ýmislegt í okkar hversdagslegu rútínu hefur áhrif á það hvernig við vinnum vinnuna okkar og þar með hversu mikilli velgengni við njótum. Hér eru sex góð ráð til þess að líða betur og ná lengra í starfi.

1. Einbeittu þér að styrkleikum, ekki veikleikum. Stundum eigum við það til að eyða of miklum tíma í að bæta okkur í því sem við erum ekki góð í að eðlisfari. Það getur verið gáfulegra að bæta styrkleika þína enn frekar. Oftar en ekki vinnur fólk saman í hóp þar sem einstaklingar bæta hverjir aðra upp þannig að það skiptir ekki máli þótt þú sért ekki góð/ur í öllu – svo lengi sem þú ert mjög góð/ur í sumu.

2. Hagaðu vinnu þinni eins og þér þykir best. Það sem hentar einum þarf ekki að henta öllum öðrum starfsmönnum fyrirtækis. Undanfarin ár hafa mörg fyrirtæki innleitt opin rými en sumum þykir betra að vinna bak við luktar dyr, allavega í ákveðnum verkefnum. Oftast er hægt að finna lausn á þessum vanda til dæmis með því að nota fundarherbergi þegar þau eru laus eða óska eftir því að vinna heima. Einnig geta hljóðeinangrandi heyrnatól komið að góðum notum.

3. Hafðu hemil á skapinu þínu. Viðhorf þitt hefur ekki aðeins áhrif á líðan og afrakstur þinn í vinnunni heldur einnig á samstarfsfélaga þína. Þess vegna ættirðu að reyna eftir bestu getu að hafa jákvæðni að leiðarljósi en rannsóknir hafa sýnt að með því að hugsa jákvætt verðum við ósjálfrátt jákvæðari gagnvart vinnunni og jákvæðir einstaklingar áorka meira.

4. Veldu hollari mat. Þegar öllu er á botninn hvolft er fæðan eldsneyti líkamans og gæði hennar geta haft mikil áhrif á okkur. Ef þú veist að þú munt ekki hafa tíma til að ná þér í hádegismat reyndu að hafa með þér nesti svo þú sleppir ekki máltíðum. Forðastu sykur líka eftir bestu getu því hann getur valdið blóðsykurshruni og meðfylgjandi orkuleysi.

5. Láttu gott af þér leiða. Þó að það sé mikilvægt að hugsa um sjálfan sig þá getur það aukið vellíðan að gera eitthvað gott fyrir aðra, hvort sem það er að hella upp á kaffi, hjálpa með verkefni eða bjóða einhverjum far heim. Þetta eykur liðsheildina og þýðir það að vinnufélagar þínir eru mun líklegri til að koma þér til hjálpar þegar þú þarft á því að halda.

6. Ekki hugsa um það sem er liðið. Þegar við eigum slæman dag í vinnunni hættir okkur til að taka þær tilfinningar með okkur heim og endurhugsa allt sem við gerðum og hvernig við hefðum getað gert betur. Með þessu erum við að viðhalda streitunni og öllum fylgifiskum hennar þannig að við náum ekki að hvílast almennilega. Hafðu þann vana á að fara einu sinni yfir daginn að honum loknum og segðu svo skilið við hann.

Texti / Hildur Friðriksdóttir

Ingibjörg Lára Hjartardóttir flutti til Jamaíku fyrir tæpum fjórum árum vegna spennandi atvinnutilboðs og ævintýraþrár.

Við fengum hana til að segja okkur frá nokkrum stöðum sem hún mælir með að gestir landsins skoði.

Pelican Bar
Á litlu sandskeri út með suðurströnd Jamaíku er Pelican Bar sem er byggður úr rekavið. Til að komast þangað færðu annað hvort sjómann til að sigla með þig á litlum báti, um það bil 20 mínútur frá Treasure Beach, eða ferð í skipulagða útsýnisferð.

Á barnum er hvorki salernisaðstaða né rafmagn. Kælirinn fyrir bjór er gömul frystikista sem er full af klaka. Þarna er góð stemning, hægt að synda í sjónum í kring og oft sitja pelikanar á bátunum sem bíða eftir fólkinu.

Fljóta á fleka niður Martha Brae-ána
Martha Brae-áin er í um 45 mínútna akstursfjarlægð frá Montego Bay. Ferðin niður ána tekur eina til tvær klukkustundir á bambusfleka. Á leiðinni er fylgst með lífinu meðfram ánni og hægt að stoppa á leiðinni til að kaupa minjagripi eða Red Stripe-bjór. Best að fara á degi þegar engin skemmtiferðaskip eru í höfn því þá er maður nánast einn á ánni. Dásamlega slakandi.

Á litlu sandskeri út með suðurströnd Jamaíku er Pelican Bar sem er byggður úr rekavið. Til að komast þangað færðu annað hvort sjómann til að sigla með þig á litlum báti, um það bil 20 mínútur frá Treasure Beach …

Scotchies
Scotchies er veitingastaður í útjaðri Montego Bay. Þar er boðið upp á grillaðan kjúkling og svínakjöt, marinerað með svokallaðri Jerk Seasoning, innlendri kryddblöndu með sterkum chili-pipar sem heitir Scotch Bonnet. Þetta getur verið mjög sterkt. Meðlætið eru grillaðir grænir bananar, sætar kartöflur og hrísgrjón með nýrnabaunum, eða Rice & Peas eins og innfæddir kalla það. Grillið er frumstætt og yfir það breitt með bárujárni þannig að kjötið er hálfreykt um leið og það er grillað. Best að fá sér ískalda Red Stripe-heimabjórinn með. Máltíðin kostar innan við 2.000 kr. fyrir tvo.

YS-fossarnir
Þessir fossar í ánni YS í suðurhluta Jamaíku eru sjö talsins. Það er hægt að labba upp hluta fossanna með leiðsögumanni og eins er hægt að synda í hyljum fyrir neðan flesta þeirra. Mér finnst þessir fossar mun fallegri en Dunn’s-fossarnir sem eru frægastir og flestir sjá þegar þeir koma til Jamaíku. Það er ekki eins mikil mannmergð við YS og þar með betri upplifun.

Negril-ströndin
Negril er lengsta ströndin á Jamaíku, kölluð 7 Mile Beach, nærri 12 kílómetra löng. Gaman er að labba hana og sjá bæði innfædda og ferðamenn njóta sín. Sölumennirnir láta sér segjast ef maður er bara ákveðinn og kurteis.

Texti / Ragnhildur Aðalsteinsdóttir

Kvikmyndir um töfra njóta yfirleitt mikilla vinsælda.

Sögur um galdra hafa ávallt fylgt mannkyninu. Kvikmyndir eru líklega einn besti vettvangurinn til að segja slíkar sögur því tæknin sem er notuð er oft töfrum líkust. Hér eru nokkrar frábærar myndir sem sýna margar ólíkar hliðar á þessum spennandi og yfirskilvitlegu hæfileikum.

 Töfraskepnur

Flestir sem hafa fylgst með ævintýrum galdrapiltsins Harry Potter, hvort sem það á hvíta tjaldinu eða á prenti, kannast við nafnið Newt Scamander. Hann er höfundur bókarinnar Fantastic Beasts and Where to Find Them sem hvert skólabarn í Hogwarts þarf að kaupa og lesa á fyrsta árinu sínu. Árið 2001 gaf J.K. Rowling út sérstaka útgáfu af bókinni sem vakti mikla lukku hjá aðdáendum.

Í nýlegri kvikmynd byggð á þeirri bók (sjá mynd að ofan) er ungi fræðimaðurinn Newt Scamander nýkominn til New York árið 1926 í leit að töfraverum sem hann hefur einsett sér að rannsaka og bjarga þegar það á við. Hann veit þó ekki að stórhættuleg og kraftmikil vá vofir yfir borginni og hann flækist fljótt inn þau mál.

Gæfa eða bölvun

Systurnar Sally og Gillian Owens í myndinni Practical Magic hafa alla tíð vitað að þær væru ekki eins og fólk er flest. Þær ólust upp hjá frænkum sínum á vægast sagt óvenjulegu heimili þar sem þeim voru litlar eða engar reglur settar. Frænkurnar lögðu sig fram við að vekja hjá systrunum hina einstöku dulrænu hæfileika sem fylgt hafa konum af Owens ættinni í þeirri von að veita þeim þann styrk sem fylgir því að iðka hvítgaldra í nytsamlegum tilgangi. En galdrasæringar Owens kvennanna kosta sitt og í raun fylgir þeim hin mesta bölvun – mennirnir sem þær verða ástfangnar af eru dæmdir til ótímabærs andláts.

Köld kvenna ráð

Galdrar hafa lengi heillað táningsstelpur sem ýmist reyna að nota þá til að laða að sér ást eða leita hefnda. The Craft segir einmitt frá einum slíkum hóp. Þegar ný stelpa flytur í bæinn kynnist hún fljótlega öðrum stelpum sem hafa áhuga á yfirskilvitlegum og dularfullum hlutum. Saman búa þessar fjórar stelpur yfir miklum yfirnáttúrulegum kröftum. Þær geta nánast allt, allt frá því að ná í draumaprinsinn og látið hann dýrka sig, og hvað annað sem þeim dettur í hug – þær eru óstöðvandi og möguleikarnir eru endalausir. Slíku valdi fylgir mikil ábyrgð og það getur óvænt snúist gegn manni, eins og stelpurnar fá að kynnast.

Keppinautar á sviði

Kvikmyndin The Prestige gerist í lok nítjándu aldar í London og segir frá Robert Angier og Alfred Borden sem eru vinir og aðstoðarmenn töframanns. Þegar Julia, ástkær eiginkona Roberts, deyr slysalega í einu atriði kennir Robert Alfred um dauða hennar þannig að vinátta þeirra snýst upp í andhverfu sína. Báðir verða þeir síða frægir töframenn og keppinautar á því sviði – þeir gera hvað þeir geta til að skemma fyrir hvorum öðrum. Þegar Alfred framkvæmir árangursríkt bragð verður Robert hreinlega að komast að því hvernig hann fór að því en kemst að því að sumt er best látið kyrrt liggja.

Texti / Hildur Friðriksdóttir

Mömmubloggarar hafa aldrei verið vinsælli en nú.

Svokallaðir mömmubloggarar hafa aldrei notið jafn mikilla vinsælda og nú, enda frábært að geta fengið stílráð og mömmumola á sama stað. Hér eru bloggsíður fantaflottra mæðra sem við mælum með að þið smellið á í næsta netrúnti.

Ruth Crilly (mynd að ofan)
Ruth Crilly er fyrirsæta og móðir sem á von á sínu öðru barni. Hún hefur lengi haldið úti „bjútí“bloggsíðu og vinsælli YouTube-stöð en eftir að hún varð móðir stofnaði hún bloggið TheUpphill.com þar sem hún fjallar um allt sem snýr að móðurhlutverkinu. Hún er sjarmatröll mikið með einstaklega smitandi húmor, við mælum með henni heilshugar.

_______________________________________________________________

Joanna Goddard
Joanna byrjaði feril sinn hjá Cosmopolitan og þekkir því fjölmiðlabransann inn og út. Hún hefur einnig skrifað fyrir Elle, Glamour, New York, Condé Nast Traveler og Martha Stewart Living. Bloggsíðan hennar, sem í byrjun var einungis hobbí, er nú orðið að hennar aðalatvinnu. Fylgist með ævintýrum hennar og fjölskyldunnar á CupOfJo.com.

_______________________________________________________________

Anh Sundstrom
Anh Sundstrom er mamma hennar litlu Luciu og fáránlega smart markaðsstýra en hún heldur úti mömmutískublogginu 9to5Chic.com. Síðan bloggsíðan hennar fór á flug hefur hún birst í Elle og Glamour, meðal annars.

_______________________________________________________________

Sofi Fahrman
Hin sænska Sofi heldur úti gríðarvinsælu bloggsíðunni Sofi´s Snapshots (Sofissnapshots.com), hún hefur gefið út fjórar bækur sem farið hafa beint á topp vinsældarlista, og stjórnað sænsku útgáfunni af Project Runway. Talandi um mömmuinnblástur!

_______________________________________________________________

Rachel Parcell
Rachel Parcell hefur grætt á tá og fingri síðan hún stofnaði vefsíðuna sína Pink Peonies og meðal annars hannað sína eigin skartgripalínu. Hægt er að fylgjast með þessari sjarmerandi tveggja barna móður á Pinkpeonies.com.

_______________________________________________________________

Anjelica Lorenz
Við mælum með því að þið kíkið á bloggsíðu hinnar hrikalega smörtu Anjelica Lorenz, Modejunkie.com, hvort sem það er til að fá stílinnblástur eða hugmyndir fyrir næsta barnaafmæli.

_______________________________________________________________

Emily Schuman
Cupcakes and Cashmere hefur lengi verið vinsælt tískublogg en nýverið hafa lesendur þess fengið að fylgjast með hvernig Emily Schuman spreytir sig í mömmuhlutverkinu. Bollaköku- og kasmírblanda klikkar seint! Cupcakesandcashmere.com

_______________________________________________________________

Charlotte Groeneveld-Van Haren
Tveggja barna móðirin Charlotte er þekkt fyrir frábæran stíl og birtist reglulega á síðum tímarita á borð við Vogue Paris, InStyle, Nylon og W Magazine. Mömmustílinnblástur beint í æð! Thefashionguitar.com

Texti / Helga Kristjáns

Prýðilegir partýréttir eða „daginn-eftir-partý-réttir“ úr smiðju Önnu Bjarkar Eðvarðsdóttur.

Anna Björk Eðvarðsdóttir lærði fyrst að elda egg í brauði og segir það hafa verið ást við fyrsta bita. Hún segir árstíðirnar ráða því hvaða matreiðsluhefð sé í uppáhaldi en réttirnar sem hún býður lesendum upp á að þessu sinni eru hver öðrum girnilegri.

Hvað starfarðu og hvaða verkefni fæstu við um þessar mundir? Ég er bloggari, sjálfboðaliði, eiginkona, mamma og amma. Það sem ég hef verið að dunda mér við undanfarið er að gera upp 34 feta seglskútu sem við Guðjón eigum. Hún stóð á landi í nokkur ár og þurfti á ást og umhyggju að halda þegar við sjósettum hana aftur. Við erum að klára það og vonum að við náum að sigla eitthvað áður en haustlægðirnar hellast yfir okkur.

Hvað var það fyrsta sem þú lærðir að elda? Egg í brauði, það er sem sagt brauðsneið sem miðjan er skoinn úr. Ytra lagið af sneiðinni er steikt á pönnu og egg brotið ofan í holuna og þegar eggið hefur tekið sig í smástund á pönnunni er miðjan sett ofan á eggið án þess að sprengja rauðuna og svo er sneiðinni snúið við og hún steikt áfram á hinni hliðinni. Þessi dásemd er svo borin fram með tómatsósu og sinnepi, til hliðar. Þetta varð ást við fyrsta bita, ást sem varir enn.

Ertu jafnvíg á bakstur og matseld? Mér finnst miklu skemmtilegra að elda en baka. Ég baka ekki mikið af hnallþórum en ég hef gaman af því að baka brauð og allskonar bökur. Ég hef ekki lagt mikla rækt við bakasturinn. Ég hef alltaf haldið því fram að það sé mömmu að kenna, hún er svo frábær bakari að ég hef ekki nennt að reyna eins mikið fyrir mér í þeim efnum.

Höfðar einhver matreiðsluhefð sérstaklega til þín? Nei, alls ekki. Mér finnst það fara eftir árstíðunum hvað höfðar til mín á hverjum tíma. Hvaða hráefni er ferskast, veðrið og hitastigið skiptir máli og svo auðvitað hvað er til í ísskápnum. Ég er mjög nýtin og þoli ekki að henda mat.

Mér finnst það fara eftir árstíðunum hvað höfðar til mín á hverjum tíma. Hvaða hráefni er ferskast, veðrið og hitastigið skiptir máli og svo auðvitað hvað er til í ísskápnum. Ég er mjög nýtin og þoli ekki að henda mat.

Verstu mistök sem þú hefur gert í eldhúsinu? Örugglega nokkur en ég er með nokkuð gott valminni á svoleiðis og sigta það frá og nenni ekki mikið að pæla í því. En ef þú pressar mig þá rámar mig óljóst í fyllingu í sítrónu-marensböku sem vildi ekki láta að stjórn, ójá, oftar en einu sinni.

Hefur þú uppgötvað einhverja snilld í matseld nýlega? „Low and slow“, eða hægeldaður matur. Það er ekkert nýtt við það en mikil snilld sem minnir á sig aftur og aftur. Aðferðin gefur hráefninu tíma svo það njóti sín sem best og maður þarf ekki að standa yfir pottunum lengi. Þá er t.d. hægt að kaupa ódýrari bita af kjöti sem eru oft vannýttir og útbúa stórkostlega veislu. Ég á mér uppáhaldsmeðlæti sem eru hægeldaðir smátómatar í góðri ólífuolíu með sneiddum hvítlauk og tímíani, dásamlegir.

Hver er stærsta áskorun sem þú hefur mætt í eldamennsku? Það var eflaust að sjá um veitingarnar í vígslu reiðhallarinnar í Mosfellsbæ hjá Hestamannafélaginu Herði en þá var Guðjón formaður Harðar. Annars er það þetta venjulega, eins og hjá flestum, að elda hátíðarmatinn um jól og áramót, að allt lukkist sem best. Maturinn er svo stór hluti af upplifuninni á jólunum, ilmurinn sem læðist í gegnum húsið eftir því sem líður á daginn kemur með hátíðarstemninguna. Í sumar var skírnarveisla yngri dóttursonarins heima hjá okkur Guðjóni. Það var hádegisverður fyrir stórfjölskylduna og vini sem ég naut að elda eins og alltaf þegar maður eldar fyrir þá sem hafa gaman af því að borða góðan mat.

Uppáhaldsmatreiðsluþættir? Þættir sem fara nánar í efnð, eins og hvaðan hráefnið kemur, hvernig það er alið eða ræktað. Þættir sem eru um hvernig matur var eldaður hér áður fyrr. Mér finnst það allt svo forvitnilegt hvernig farið var að áður en öll nútímaþægindin komu til sögunnar. Hið blómlega bú er t.d. þáttur sem ég naut að horfa á og breskir þættir sem heita Food Unwrapped eru uppáhaldsþættir. Annars finnst mér alltaf gaman að horfa á matreiðsluþætti.

Bloggsíða: annabjork.is.

____________________________________________________________

Cheddar- og parmesanbitar með reyktri papriku og rósmaríni

45 stykki

125 g mjúkt smjör

1 msk. flórsykur

1 tsk. kummin

1 tsk. reykt paprikuduft

80 g sterkur cheddar-ostur

50 g rifinn parmesanostur

2 tsk. kúmenfræ

2 tsk. saxað ferskt rósmarínlauf

110 g hveiti

50 g maísmjöl (gróft eins og polenta)

salt á hnífsoddi

 Ofan á kökurnar

1 egg, þeytt

rósmaríngreinar

gróft sjávarsalt

Ofninn er hitaður í 160°C á blæstri. Smjör, flórsykur, kummin og paprika er þeytt létt og ljós. Hrærið svo báða ostana varlega út í ásamt kúmeni og rósmaríni.

Að lokum er hveiti og maísmjöli ásamt salti bætt út í og hrært í samfellt deig. Deigið er sett á bökunarpappír og annað lag af pappír lagt ofan á deigið og það er svo flatt út þar á milli með kökukefli þar til það er eins og 100 kr. peningur. Sett í kæli og kælt. Þegar deigið er tilbúið til að baka eru stungnar út kökur sem eru um 5 cm í þvermál, penslaðar með þeyttu eggi og söxuðu rósmaríni og grófu sjávarsalti dreift yfir.

Kökunum er raðar á pappírsklædda bökunarpötu og þær bakaðar í 16-17 mínútur. Hægt er að frysta óbakað deigið.

____________________________________________________________

Fyllt frönsk samloka með saltkaramellu-bananasósu

fyrir 6

12 sneiðar af hvítu samlokubrauði

250 g rjómostur, við stofuhita, í bláu boxunum

125 g mascarpone-ostur, við stofuhita

½ bolli ristaðar pekanhnetur, saxaðar

2 msk. púðursykur, þjappaðar

1 tsk. kanill

½ tsk. salt

6 egg, léttþeytt

3 bollar mjólk

¼ tsk. salt

Ofninn er hitaður í 180°C.  Sex brauðsneiðum er raðað á stóran djúpan disk.  Hrærið saman í skál rjómaost, mascarpone, pekanhnetur, púðursykur, kanil og salt. Maukinu er smurt á sneiðarnar og hinar sex sneiðarnar eru lagðar ofan á. Þeytið saman í annarri skál egg, mjólk og salt. Hrærunni er hellt jafnt yfir sneiðarnar svo hún þeki allt yfirborðið og látin bíða í smástund svo þær drekki í sig vökvann. Bökunarpappír er settur í ofnskúffu og samlokunum raðað ofan í.  Bakaðar í 1 klukkustund en snúið á 15 mínútna fresti svo þær bakist jafnt.

Saltkaramellu-bananasósa

¾ bollar dökkur púðursykur, þéttpakkaður

½ bolli rjómi

½ bolli smjör

2 msk. síróp

1 tsk. vanilludropar

½ tsk. gróft sjávarsalt

1 banani

Púðursykur, rjómi, smjör og síróp er hitað í potti á rúmlegum meðalhita. Suðan er látin koma upp og hitinn lækkaður og þetta látið malla í 3-4 mínútur. Tekið af hitanum, vanillu og salti bætt út í. Hellt í skál og látið kólna niður í stofuhita í um klukkustund. Bananinn er skorinn í sneiðar og hann hrærður varlega út í. 

Sósan er borin fram með brauðinu.

____________________________________________________________

Harissa-lamborgarar með feta og klettasalati

fyrir 2

250 lambahakk

½ tsk. kummin

cayanne-pipar eftir smekk (sterkur)

2 msk. harissa-mauk

sjávarsalt og nýmalaður svartur pipar

60 g fetaostur

ólífuolía til að pensla með

2 pítubrauð

klettasalat

grísk jógúrt

Hakkinu og kryddinu ásamt harissa-maukinu og salti er hnoðað vel saman. Deiginu er skipt í tvo jafna hluta. Fetaosturinn er mulinn í miðjuna á hvorum borgara og deiginu vafið utan um ostinn og lokað vel. Grillpanna er hituð á meðalhita, borgararnir penslaðir með olíu og steiktir í 5-6  mínútur. Pítubrauðin eru hituð í brauðristinni. Þau eru svo fyllt með grískri jógúrt, klettasalati og lamborgara. Þessi borgari er frábær á útigrillið.

____________________________________________________________

Pylsur með bjórsoðnum sætum lauk og chili-salsa

fyrir 4

pylsur að eigin vali

brioch-pylsubrauð

mjúkt smjör

sterkt sinnep

Pylsurnar eru grillaðar eða steiktar. Brauðin eru opnuð og þunnu lagi af smjöri er smurt inn í þau og þau grilluð eða ristuð, bara að innan, á þurri pönnu á háum hita. Brauðið smurt að innan með sterku sinnepi, síðan er pylsa lögð í brauðið ásamt lauk og salsa.

Bjórsoðinn sætur laukur

2 tsk. ólífuolía

2 tsk. smjör

3 stórir laukar í þunnum sneiðum

1 tsk. kúmenfræ

2 msk. dökkur muscavado-sykur eða dökkur púðursykur

2 hvítlauksrif, marin

1 flaska ljós bjór

sjávarsalt og nýmalaður svartur pipar

Olía og smjör er hitað á pönnu og lauk, kúmeni og salti er bætt út í og steikt á meðalhita í u.þ.b. 10 mínútur og hrært í við og við. Sykrinum er dreift yfir ásamt hvítlauk og látið mallað áfram þar til laukurinn fer að karamelliserast. Þá er bjórnum hellt yfir og látið mallað áfram í um 15 mínútur, eða þar til bjórinn er gufaður upp og laukurinn er dökkur á litinn. Smakkað til með salti og pipar.

Chili-salsa

2 vorlaukar, í þunnum sneiðum

1 rautt chili, fínsaxað (fræin með ef þú vilt salsað sterkt)

2 msk. söxuð steinselja

2 tsk. ólífuolía

Öllu blandað saman í skál.

____________________________________________________________

Rækjur með smjör- og blóðbergsbollubrauði

forréttur fyrir 4 eða kvöldveður fyrir 2

20 tígrisrækjur

2 msk. Shriracha Hot Sauce

2 msk. olía

¼ tsk. salt

2 tsk. sykur

5 hvítlauksrif, marin

Útbúið marineringuna og látið rækjurnar marinerast í nokkra tíma. Þær eru svo þræddar á grillpinna en ekki henda marineringunni. Rækjurnar eru grillaðar þar til þær eru orðnar bleikar og gegnsteiktar en passið að ofelda þær ekki. Marineringin er sett í lítinn pott og látin malla í nokkrar mínútur, síðan er henni hellt yfir grillaðar rækjurnar.

Smjör- og blóðbergsbollubrauð

2 öskjur tilbúið pizzudeig, ekki útrúllað

50 g smjör, brætt

blóðbergs- eða rósmaríngreinar

1-2 msk. polenta

gróft sjávarsalt

Smyrjið 20 cm lausbotna kökuform að innan með olíu og polentan er hrist innan í forminu svo hún þeki botn og hliðar. Deiginu er skipt í u.þ.b. 14 jafnstóra hluta og þeir hnoðaðir létt í litlar bollur sem er jafnað í formið. Þær þekja ekki botninn en fylla vel út í eftir hefingu. Mér finnst fínt að láta deigið hefast í 1-2 klukkustundir undir plastfilmu áður en ég baka það. Ofninn er hitaður í 200°C.  Smjörið er brætt og kælt aðeins, svo er því penslað yfir brauðið. Að lokum er blóðbergi og grófu salti dreift yfir og brauðið bakað í 30-35 mínútur. Tekið úr forminu um leið og það hefur kólnað aðeins og borið fram með rækjunum og auka smjöri.

Umsjón / Íris Hauksdóttir
Myndir / Heiðdís Guðbjörg Gunnarsdóttir

Nú eru áramótin á næsta leiti og þá fara flestir í einhvers konar veislu eða partí.

Það er því við hæfi að skoða nokkrar bestu og frægustu partímyndir allra tíma.

Á æskuslóðum
Eins og nafnið gefur til kynna fjallar kvikmyndin Sisters um systurnar Kate og Mauru Ellis (mynd hér að ofan). Þegar þær komast á snoðir um áform foreldra sinna um að selja æskuheimili þeirra ákveða þær að halda kveðjuhóf á meðan foreldrarnir bregða sér frá. Þetta partí skal toppa öll partí sem áður hafa verið haldin í þessu húsi. Félögum þeirra úr gagnfræðiskóla er öllum boðið. Þrátt fyrir að meirihluti þeirra sé nú orðinn ráðsettur og með börn kunna þeir enn að djamma. Tina Fey og Amy Poehler, sem leika systurnar, eru kómískir snillingar. Í myndinni fylgjumst við með kostulegum undirbúningi og auðvitað veislunni sjálfri sem eins og flestir ættu að geta giskað á fer heldur betur úrskeiðis með verulega skondnum afleiðingum.

Tryllt tógapartí
Animal House (hér til hliðar) gerist árið 1962 í Faber-framhaldsskólanum. Delta Tau Chi-bræðralagið er illa þokkað og hver sem er getur fengið inngöngu á meðan Omega Theta Pi-bræðralagið er ekki opið hverjum sem er og í raun stútfullt af ríkum, hvítum strákum sem enginn þolir nema skólastjórinn. Skólastjórinn leitar til þeirra til að hrekja fyrrnefnda bræðralagið úr skólanum. Alls kyns bellibrögðum er beitt og skólastjórinn nær vilja sínum næstum fram. Delturnar halda risastórt tóga-partí með hljómsveit og öllu klabbinu. Ýmistlegt skrautlegt gerist í partíinu, meðal annars sefur einn bræðranna hjá eiginkonu skólastjórans.

________________________________________________________________

Sögulegt partí
Í Project X á Thomas afmæli og eins og alla unga menn dreymir hann um að halda besta og flottasta afmælispartí sem haldið hefur verið. Til allrar lukku verða foreldrar hans ekki heima svo Thomas lætur slag standa og fær félaga sína, J.B. og Costa, í lið með sér. Hann lætur orðið ganga að öllum sé boðið heim til hans í partí ársins – og enginn lætur segja sér það tvisvar. Allir mæta og upphefst einhver svakalegasta veisla sem sögur fara af. Það skemmir auðvitað ekki fyrir að Thomas á ríka foreldra sem búa í stóru húsi með sundlaug og alls konar fíneríi. Auðvitað reynast nágrannarnir ekki alveg sáttir við lætin en það bíttar engu.

________________________________________________________________

Þrautaganga
Lúðarnir og bestu vinirnir Evan og Seth í myndinni Superbad gera hér um bil hvað sem er til að vinna sér hylli kvenpeningsins. Þegar þeir komast óvænt yfir heimboð í partí eyða þeir heilum degi, ásamt vini sínum Fogell, í að komast yfir nægt áfengi fyrir partíið. Þeir ætla að deila áfenginu með tveimur stelpum, Jules og Beccu, í þeirri von að þeir missi loksins sveindóminn og geti farið í framhaldsskóla eftir viðburðaríkt sumar. Áætlun þeirra flækist þegar Fogell lendir upp á kant við tvær klaufskar löggur sem hægja á þeim en jafnframt aðstoða þá um leið. Komast þeir einhvern tímann í partíið og með nægilegt áfengi?

________________________________________________________________

Óþreyjufull ungmenni
Can‘t Hardly Wait er klassísk partímynd í þeim skilningi að hún gerist nær eingöngu í einu partíi. Eftir brautskráningu nemenda í Huntington Hill-skólanum er komið að lokapartíinu. Þar er samankomin hin skrautlega nemendaflóra sem þrifist hefur í skólanum undanfarin fjögur ár – nördar, íþróttagarpar, fegurðardísir og hornrekur. Öll eru þau staðráðin í að sleppa fram af sér beislinu og gera upp þær tilfinningar sem legið hafa bældar alla skólagönguna, enda ekki seinna vænna áður en þau halda sína leið.

Texti / Hildur Friðriksdóttir

Nokkur góð ráð varðandi val á ilmvatni til að auka endingu.

Hvernig við skynjum ilm og hvaða ilmur okkur þykir góður er afar persónubundið. Þess vegna er mjög áhættusamt að gefa einhverjum ilmvatn að gjöf, það er, ef viðkomandi hefur ekki valið sér það sjálfur. En þegar við höfum loksins fundið rétta ilminn fyrir okkur þá viljum auðvitað að hann endist sem lengst á okkur. Hér eru nokkur góð ráð varðandi val á ilmvatni til að auka endingu og hvernig sé best að geyma þau.

1. Ilmvötn hafa takmarkaðan líftíma síðan fer lyktin að breytast og dofna. Ákveðnir þættir geta haft áhrif á og takmarkað líftímann, þá sérstaklega hiti, birta og raki. Þess vegna er óráðlegt að geyma ilmvötn inni á baðherbergi eða úti í gluggakistu og mælst er til að geyma þau frekar á þurrum og skuggsælum stað. Það þýðir þó ekki að þú þurfir að geyma þau inni í skáp. Yfirleitt er mikil vinna lögð í hönnun ilmvatsnglasa og því er tilvalið að stilla þeim fallega upp á snyrtiborði eða kommóðu, margir hafa til dæmis notað fallega bakka eða kökudiska.

2. Ilmur endist skemur á þurri húð og þess vegna er mikilvægt að bera krem á húðina ef þú vilt að hann endist lengur. Mörg ilmvatnsmerki framleiða body lotion með sama ilmi sem vissulega eykur áhrif hans en það er ekkert síðra að nota gott ilmlaust krem. Einnig mæla sumir sérfræðingar með því að bera vaselín á þá staði sem þú spreyjar ilmvatninu á því það myndar nokkurs konar hjúp á milli ilmvatnsins og húðarinnar og eykur þannig endingu.

Algengt er að sjá konur nudda úlnliðunum saman eftir að þær hafa spreyjað ilmvatni á sig en það eru mikil mistök. Það verður til þess að toppnótur ilmsins hverfa hraðar og ilmurinn endist skemur á úlnliðnum.

3. Spreyjaðu ilmvatni á helstu púlsstaði líkamans, það er úlnliði, háls og olnboga- og hnésbætur, því það tryggir að ilmurinn dreifist vel. Best er að spreyja á sig ilmvatni þegar maður er nýkominn úr sturtu og áður en maður klæðir sig því þá er húðin rök og grípur frekar ilminn. Þetta kemur líka í veg fyrir að ilmvatnið liti viðkvæm föt eða skartgripi. Algengt er að sjá konur nudda úlnliðunum saman eftir að þær hafa spreyjað ilmvatni á sig en það eru mikil mistök. Það verður til þess að toppnótur ilmsins hverfa hraðar og ilmurinn endist skemur á úlnliðnum. Ef þú vilt aðeins fá léttan ilm eða ert að bæta á þig örlítið meira ilmvatni fyrir kvöldið er sniðugt að spreyja ilmvatninu létt upp í loftið og ganga inn í mistrið. Margar konur spreyja ilmvatni í hárið á sér milli þvotta, enda er mikil uppgufun sem fer fram í gegnum höfuðið, ilmvatn sem inniheldur alkahól getur þó þurrkað hárið óþarflega mikið og þá er betra að spreyja ilmvatninu í hárbursta og renna honum svo í gegnum hárið.

4. Það getur reynst flókið að finna sér nýjan ilm og nauðsynlegt að vera með helstu hugtök á hreinu. Eau de toilette er með léttari ilm en Eau de parfum og er þar af leiðandi yfirleitt aðeins ódýrari. Ilmnótur skiptast niður í grunn-, mið- og toppnótur en ilmur getur ýmist verið blómlegur, sætur, kryddaður eða sítrus- og ávaxtakenndur. Einnig er hægt að fá ilm í föstu formi eða sem hreina ilmolíu, en slíkur ilmur er oftar en ekki kröftugri en sá sem er spreyjaður.

5. Það er mjög misjafnt hvernig ilmvötn lykta á fólki. Í flestum verslunum er að finna þar til gerðan pappír sem þú getur spreyjað á áður en þú reynir eitthvað á eigin skinni. Ef þú hins vegar lendir í því að þú spreyjar á þig ilmvatni sem hentar þér alls ekki er gott að strjúka meikhreinsiklút yfir svæðið til að fjarlægja ilminn. Sniðugt er að blanda ólíkum ilmvötnum saman til að fá einstakan ilm sem einkennir þig. Þá er sniðugt að nota prufupappírinn til að prófa ólíkar blöndur. Þumalputtareglan segir að þú eigir að byrja á þyngri ilmi og enda á léttari, því annars er hætta á að sá léttari kæfist. Til að finna sanna lykt ilmvatnsins verður að spreyja því á húð og leyfa því að bíða í nokkrar mínútur á meðan það rýkur aðeins og aðlagast þér.

6. Ilmvötn má nota á fjölmarga vegu, til dæmis er sniðugt að spreyja uppáhaldsilmvatninu þínu á sængurfötin þín. Einnig er hægt að spreyja því á tissjúpappír sem þú setur í skúffurnar þar sem þú geymir fötin þín þannig að þau dragi í sig örlítinn ilm. Góð leið til að nýta síðustu dropana af ilmvatni sem leynist á botni glassins er að hella því út í lyktarlaust body lotion og gefa því þannig ilm.

Texti / Hildur Friðriksdóttir

Kristín Tómasdóttir styrkir sjálfsmynd ungra krakka.

Kristín Tómasdóttir rithöfundur hefur á undanförnum árum skrifað sex bækur ætlaðar ungum krökkum. Hún leggur áherslu á að byggja upp sterka sjálfsmynd og efla vitund þeirra um eigin tilfinningalíf. Nýjasta bók hennar, Sterkar stelpur, hefur þó ákveðna sérstöðu því hún er ætluð yngri lesendahópi og er tileinkuð yngstu dóttur hennar sem er trans stúlka.

Kristín hefur einnig sett saman sjálfstyrkingarnámskeið fyrir stelpur og ferðast um landið í þeim tilgangi að efla íslenskar stelpur.

„Ég fann fyrir mikilli eftirspurn meðal foreldra sem voru farnir að finna fyrir því að sjálfsmynd stelpna þeirra væri farin að þróast í neikvæða átt fyrr en þá hafði grunað,“ segir hún. „Við erum að sjá stelpur niður í 6 ára fara í megrun og alls kyns önnur merki sem foreldrar hræðast en vita líka að hægt er að koma í veg fyrir með fyrirbyggjandi sjálfstyrkingu.“

Ítarlegra viðtal við Kristínu er að finna í nýjustu Vikunni.

Texti / Íris Hauksdóttir
Myndir / Aldís Pálsdóttir

Sonja Arnardóttir slasaðist illa í bílslysi en keppir nú í fitness.

Fyrir sex árum ákvað Sonja að taka allhressilega til í sínu lífi. Hún ákvað að setja sjálfa sig í fyrsta sæti og hóf að stunda líkamsrækt af kappi. Á síðasta ári byrjaði hún að þjálfa fyrir sitt fyrsta fitness-mót. Í dag er hún hraustari en hún hefur nokkurn tímann verið og stefnir ekki að því að hætta að hreyfa sig í bráð.

Í desember 1991 var hún á ferð í Borgarfirði þegar hún keyrði óvænt inn á mikið ísingasvæði með þeim afleiðingum að hún missti stjórn á bílnum og hann fór nokkrar veltur. Sonja var ekki í öryggisbelti og kastaðist langa leið út um framrúðu bílsins. Hún var með meðvitund allan tímann og man vel sársaukann og brothljóðin þegar bein líkama hennar fóru í sundur. Með henni í för var fyrrverandi eiginmaður hennar sem slasaðist mikið í andliti. Þau voru svo heppin að aðrir vegfarendur komu fljótlega á vettvang til hjálpar og þar á meðal var sjúkraflutningamaður sem sá til þess að Sonja var ekki hreyfð fyrr en læknir og sjúkrabíll voru komnir á staðinn.

Sonja átti erfitt með andardrátt og hélt í raun að hún væri að deyja. Við tóku margar aðgerðir, löng sjúkrahúsvist og endurhæfing. Ljóst var að þessi unga kona næði aldrei fullri heilsu aftur. Í raun var hún stálheppin að mænan skyldi ekki fara í sundur. Nú nærri þremur áratugum síðar er hún enn að takast á við líkamlegar og andlegar afleiðingar slyssins en telur að það stranga mataræði og agi sem fylgir fitness-íþróttinni hafi hjálpað sér mikið. Hún lætur enga bilbug á sér finna og stefnir á að keppa aftur á mótum í ár.

Viðtalið í heild má finna í nýjasta tölublaði Vikunnar.

Texti / Hildur Friðriksdóttir
Myndir / Hákon Davíð Björnsson
Förðun / Björg Alfreðsdóttir
Fatnaður / Lindex og Vila

Tiltölulega ný tækni í varanlegri förðun.

Það er ekki ofsögum sagt að augabrúnirnar eru besti „fylgihlutur“ hverrar konu, enda ramma þær inn andlitið. Síðustu misserin hefur tiltölulega ný tækni í varanlegri förðun notið mikilla vinsælda enda útlitið náttúrulegra en það sem áður þekktist.

Microblading-aðferðin hefur notið mikilla vinsælda um heim allan en hér á landi eru nokkrar snyrtistofur sem sérhæfa sig í þessari nýlegu tækni. Aðferðin felur í sér að búa til örmjó „hár“ með stykki sem hefur örfínan hnífsodd sem sker í ysta lag húðarinnar sem síðan er fyllt upp í með lit. Með þessum hætti er auðvelt að búa til aukahár, þykkja brúnir og breyta lagi þeirra eða jafnvel hanna þær frá grunni ef engin hár eru fyrir.

Hér eru nokkur atriði sem vert er að hafa í huga ef þú hefur áhuga á því að fá þér microblading-augabrúnatattú:

Leggstu í rannsóknarvinnu
Vertu viss um að vera búin að kynna þér þann sérfræðing sem þú velur til þess að gera tattúið vel áður en hafist er handa. Fáðu að sjá fyrir og eftir-myndir eftir viðkomandi til að vera viss um að vinna hans/hennar sé þér að skapi og menntun og reynsla standist kröfur þínar. Sérfræðingurinn ætti einnig að geta svarað öllum spurningum sem vakna hjá kúnnanum og aðgerðin framkvæmd í sterílu og fagmannlegu umhverfi.

Undirbúðu þig
Áður en þú færð þér microblading-tattú skaltu forðast það að vaxa eða plokka augabrúnirnar. Einnig er gott að sleppa því að nota kornamaska sem inniheldur allskyns sýrur sem eiga það til að skapa roða í húðinni og varastu að nota blóðþynnandi lyf. Þær sem eru óléttar, með barn á brjósti eða sykursjúkar ættu að forðast microblading.

Tjáðu þig
Sérfræðingurinn sem þú leitar til mun mæla andlit þitt og augabrúnir og vinna út frá andlitsfalli þínu og mælingum til að fá sem náttúrulegasta yfirbragðið. En vertu dugleg við að tjá óskir þínar við sérfræðinginn og áður en hafist er handa er mikilvægt að þú sjáir teikningarnar á andlitinu, ef vera skyldi að þú vildir gera einhverjar breytingar.

Passaðu upp á þær
Þegar þú ert búin að fá fullkomnar augabrúnir er eðlilegt að þú viljir sýna þær. Passaðu samt upp á að nota ekki krem og aðrar húðvörur nálægt svæðinu í að minnsta kostu tíu daga eftir aðgerðina og ekki snerta svæðið. Vertu dugleg að bera græðandi krem á svæðið með eyrnapinna.
Þar sem hrúður myndast á meðferðarsvæðinu mun liturinn vera dekkri og skarpari fyrstu vikuna. Eftir 6-10 daga dofnar liturinn um u.þ.b. helming. Eftir 4-6 vikur ættirðu að fara aftur og láta laga það sem hefur dofnað og láta vita ef þú vilt láta lagfæra eitthvað varðandi útlit brúnanna.

Passaðu upp á að fara ekki í sólbað, synda eða svitna mikið fyrstu tíu dagana eftir microblading. Þegar svæðið hefur náð að gróa er gott að nota sólarvörn á brúnirnar til að koma í veg fyrir að þær dofni.

Misjafnt er eftir húðtýpu og lit á brúnum hversu lengi microblading-aðferðin endist á húðinni en eftir hálft ár getur útlit háranna farið að dofna. Mælt er með endurkomu á 8 mánaða til tveggja ára fresti.

Texti / Helga Kristjáns

Fjórir frægustu kvenleikstjórar samtímans.

Kvikmyndabransinn er algjört karlaveldi; karlar reka framleiðslufyrirtækin, vinna flest verðlaun, fá betur borgað fyrir leik sinn í kvikmyndum og svona mætti lengi telja. Það hallar sérstaklega á kvenkynsleikstjóra. Ein skýringin á þessu er að konur eru ekki meðvitaðar um fulltrúa sína innan þessarar stéttar og átta sig því ekki á að þetta sé mögulegur starfsferill fyrir þær. Við viljum því fjalla um fjóra frægustu kvenleikstjórana í bransanum um þessar mundir.

Kathryn Bigelow
Einn frægasti kvenleikstjóri samtímans er Kathryn Bigelow (á myndinn hér að ofan). Hún var lengi gift öðrum frægum leikstjóra, James Cameron, sem leikstýrði meðal annars Titanic. Kathryn er þekkt fyrir fremur karllægar kvikmyndir svo sem Zero Dark Thirty og Point Break og var fyrsta konan til að vinna Óskarsverðlaun fyrir leikstjórn kvikmyndarinnar The Hurt Locker árið 2008.

„Ef það er einhver mótstaða gegn því að konur séu að gera kvikmyndir þá kýs ég að leiða hana alveg hjá mér af tveimur ástæðum: Ég get ekki breytt kyni mínu og ég þverneita að hætta að gera kvikmyndir.“

________________________________________________________________

Sofia Coppola
Það má með sanni segja að leikstjórn sé Sofiu Coppola í blóð borin en hún er dóttir leikstjórans fræga Francis Ford Coppola sem á meðal annars heiðurinn að myndunum um Guðföðurinn. Hún vann Óskarsverðlaun árið 2004 fyrir handritið að Lost In Translation og hún var einnig tilnefnd fyrir leikstjórn sömu myndar. Sofia fékk einnig þann mikla heiður að fá Gullpálmann fyrir leikstjórn á kvikmyndahátíðinni í Cannes en hún er aðeins önnur konan til að hljóta þau verðlaun og fyrsta bandaríska konan.

„Meðalmennska og miðjumoð er það versta sem ég get hugsað mér. Það er miklu áhugaverðara að fá sterk og afgerandi viðbrögð og að það sé blanda af fólki sem ýmist fílar myndina eða fílar hana ekki. Þannig verða til samræður.“

________________________________________________________________

Jane Campion
Fyrir um það bil tveimur áratugum var Jane Campion aðalkonan í leikstjórabransanum. Hún byrjaði að reyna fyrir sér í heimalandi sínu, Ástralíu, og sló svo í gegn með myndinni The Piano sem fjallaði um mállausan píanóleikara. Hún var aðeins tilnefnd til Óskarsverðlauna en vann hins vegar Gullpálmann fyrst kvenna fyrir þá mynd.

„Ég myndi svo gjarnan vilja sjá fleiri kvenleikstjóra því þær standa fyrir helming mannkyns sem fæddi allan heiminn. Ef þær eru ekki að skrifa og leikstýra þá munum við hin ekki fá að heyra alla söguna.“

________________________________________________________________

Catherine Hardwicke
Þó að hún sé eflaust þekktust fyrir að hafa leikstýrt fyrstu, og bestu, Twilight-myndinni þá er Catherine Hardwicke mest metin fyrir leikstjórnarlega frumraun sína, Thirteen, sem er hrá og átakanleg þroskasaga. Hún hefur mikinn áhuga á að segja sögur kvenna og ein af nýrri myndum hennar er fallega vináttumyndina Miss You Already.

„Ég hef setið fundi þar sem voru bókstaflega tólf reiðir karlar í fundarherbergi og ég. Þegar hver einasti þeirra skaut niður hugmynd mína stóð ég samt bara fastar á mínu.“

Texti / Hildur Friðriksdóttir

Elfa Þorsteinsdóttir heilsufrömuður stendur á bakvið heimasíðuna rawmother.com þar sem hún deilir hráfæðisuppskriftum og ýmsum heilsutengdum fróðleik.

Heilsuáhugi hennar kviknaði fyrir nokkrum árum þegar breytt mataræði gjörbreytti líðan langveiks sonar hennar.

„Heimasíðan hefur verið lengi í fæðingu. Ég eignaðist dreng árið 2005 sem var langveikur. Eftir lífsnauðsynlegar aðgerðir sat hann enn þá eftir með ýmis heilsufarsleg vandamál sem hefðbundar lækningar gátu ekki hjálpað honum með. Þarna hófst fyrir alvöru heilsuáhuginn minn,“ segir Elfa sem búið hefur ásamt fjölskyldu sinni á suðurströnd Englands í fimm ár. Eftir aðgerðirnar og ýmsa fylgikvilla átti sonur hennar, Anthony, meðal annars erfitt með alla næringarinntöku. „Ég var mamma með veikan strák með það eina markmið að finna lausn sem virkaði fyrir hann. Eftir mikinn lestur ákvað ég að prófa að fara með honum á hráfæði í eitt ár og athuga hvort það myndi hjálpa honum. Það er skemmst frá því að segja að á sjö mánuðum komst líkami hans í fullkomið lag og allt fór að virka rétt í fyrsta skipti á ævi hans.

Daginn sem ég fékk niðurstöðurnar úr prufunum hans lofaði ég honum að ég myndi vera með honum á hráfæði þar til hann flytti að heiman og fljótlega var öll fjölskyldan komin á sama fæði. Maðurinn minn losnaði í kjölfarið við ýmis heilsufarsleg vandamál á nokkrum mánuðum auk þess að missa 30 kíló og dóttir okkar losnaði við áreynsluasma. Ég hef lært svo margt á þessum tíma í sambandi við heilsu og hvernig við getum notað réttan mat til að hjálpa líkama okkar að lækna sig sjálfur. Mér fannst ekki hægt að vera komin með alla þessa þekkingu, eftir að vera búin að lifa þessum lífsstíl í svona mörg ár, og halda henni bara fyrir sjálfa mig og fjölskyldu mína.

„Ég hef lært svo margt á þessum tíma í sambandi við heilsu og hvernig við getum notað réttan mat til að hjálpa líkama okkar að lækna sig sjálfur.“

Það er líka búin að vera gríðarlega mikil eftirspurn eftir námskeiðum hjá mér og ráðum í sambandi við bætt mataræði. Svo það lá eiginlega beinast við að koma þekkingunni fyrir á einum stað. Ég var svo heppin að fá hana Ingibjörgu Rósu, vinkonu mína, með mér í þetta verkefni. Hún er mín hægri hönd í öllu sem kemur að tæknimálum, textum fyrir heimasíðuna og uppsetningu, enda með enskukunnáttu upp á rúmlega tíu. Heimasíðan var svo opnuð á ellefu ára afmælisdegi hans Anthonys í fyrra.“

Sérstakar barnauppskriftir

Síðan er í stöðugri þróun og vinnslu þar sem Elfa bætir inn uppskriftum reglulega, setur inn bloggpósta og fræðslu. „Sérstaðan felst kannski helst í því að þarna er manneskja sem lifir þessum lífsstíl og er með alla fjölskyldu sína á hráfæði. Ég legg mikið upp úr því að maturinn bragðist vel og geti því höfðað til sem flestra. Fólk hefur svo val um að koma í áskrift hjá mér þar sem það fær nýjar uppskriftir reglulega með vídeói um hvernig hver réttur er búinn til. Þetta er eins og að vera í áskrift að hráfæðinámskeiði þar sem ég býð öllum heim í eldhús til mín.

Anthony er líka með sitt svæði á síðunni, Anthony’s Kitchen, þar sem við búum saman til uppáhaldsréttina hans. Þeir eiga það sameiginlegt að vera allir mjög einfaldir og bragðgóðir. Við upptökur á efni fyrir Anthony’s Kitchen verða stundum mistök. Það er stundum ansi spaugilegt það sem miður fer og svo á Anthony til að vera mjög orðheppinn í tökum, sem er ekki hægt að nota í aðalmyndböndin, svo Anthony kom með þá hugmynd að gera myndbönd úr skotunum sem misheppnast og við erum nýbúin að setja þau inn á síðuna líka.“

Elfa tekur að sér að leiða hópa í föstur og safahreinsanir. „Ég hef farið reglulega í hreinsanir síðan ég var 18 ára. Þær eru einfaldlega hluti af mínum lífsstíl. Á síðustu árum hefur verið sótt mjög mikið í að komast í þessar hreinsanir með mér og það hefur undið upp á sig. Ég býð Facebook-vinum mínum og fylgjendum að koma með mér í hreinsanir þrisvar sinnum á ári. Þar fá allir frítt prógramm sem ég hef sett saman og stuðning í gegnum alla hreinsunina. Nýárshreinsunin er sú lengsta, 10-14 dagar, svo eru styttri hreinsanir í maí og september, 4-5 dagar. Þetta hefur verið ótrúlega gaman og gefandi þrátt fyrir mikla vinnu við hverja hreinsun. Þessar hreinsanir hafa verið upphafið hjá mörgum að taka næstu skref að bættum lífsstíl sem mér þykir sérstaklega vænt um að fá að vera þátttakandi í.“

Í þekktum heilsuþætti

Elfu bregður fyrir í myndinni Fat, Sick & Nearly Dead 2 eftir ástralska kvikmyndagerðarmanninn og heilsufrömuðinn Joe Cross en hann hefur persónulega reynslu af djúsföstu. „Fyrir nokkrum árum var ég að hjálpa einni vinkonu minni sem þurfti að fara í langa og mikla safahreisnun og ákvað að prófa að bjóða Facebook-vinum mínum að vera með. Ég átti von á að fá kannski 4-5 með okkur en á rúmum sólarhring voru komnir yfir 100 manns í hreinsihópinn, alls staðar að úr heiminum. Ég hafði ekki hugmynd um hvernig ég gæti stutt allan hópinn og hafði því samband við Joe Cross sem þá hafði nýlega gefið út myndina sína Fat Sick and Nearly Dead og bað um hjálp hans. Honum fannst mjög sérstakt það sem ég var að gera og gerði þá undantekningu að hjálpa mér við að styðja og hvetja fólkið í hópnum. Hann kom inn, kommenteraði og fylgdist með okkur – sem var brjálað „búst“ fyrir alla. Við Joe höfum hist nokkrum sinnum eftir þetta þegar hann hefur komið til London. Hann er svo einstaklega vandaður maður, er alveg eins í persónu og þú sérð hann á skjánum. Honum fannst svo flott að þekkja manneskju frá kalda Íslandi sem væri að djúsa þannig að ég fékk að vera ein af þeim sem heilsa áhorfendum í upphafsatriði myndarinnar Fat, Sick and Nearly Dead 2.“

Fram undan er áframhaldandi uppbygging uppskriftabankans á heimasíðunni, viðbætur á fróðleik og fleira. „Svo eru hreinsanirnar mínar reglulega á dagskrá. Á Facebook getur fólk skráð sig í hópinn og fengið aðgang að prógramminu og stuðningshópnum frítt. Svo er líka hægt að fylgjast með mér á Instagram og Twitter þar sem allar upplýsingar eru einnig settar inn. Svo langar mig mjög mikið til að koma til Íslands og halda þar námskeið aftur sem fyrst.

„Ég hef farið reglulega í hreinsanir síðan ég var 18 ára. Þær eru einfaldlega hluti af mínum lífsstíl. Á síðustu árum hefur verið sótt mjög mikið í að komast í þessar hreinsanir með mér og það hefur undið upp á sig.“

Við Anthony erum með langan lista af hugmyndum og réttum sem við eigum eftir að taka upp fyrir Anthony’s Kitchen. Regluleg „live-vídeó“ eru á Facebook-síðunni minni og margt fleira skemmtilegt fram undan. Það er um að gera að fylgjast með fyrir þá sem hafa áhuga á að bæta við hollum  grænmetisréttum fyrir fjölskylduna og fá heilsutengda fróðleiksmola.“

Hráfæðis-triffli

Triffli er gamall og hefðbundinn enskur eftirréttur sem er borinn fram í glerskál og samanstendur vanalega af svampbotni eða makkarónukökum, ávöxtum og eggjakremi. Að auki er oft áfengi í honum svo hann er langt í frá hollur í sinni upprunalegu mynd. Hér er hins vegar útgáfa af honum sem er svo holl að óhætt er að fá sér tvo og jafnvel þrjá skammta.

Súkkulaðilag
1 bolli möndlur

1 bolli mjúkar döðlur

1 bolli kakóduft

3 msk. sæta í fljótandi formi, t.d. kókosnektar, hunang, agave o.fl.

3 msk. kókosolía

salt

Setjið möndlur, döðlur og kakóduft í matvinnsluvél og látið hana ganga þar til möndlurnar og döðlurnar eru komnar í fína bita.
Bætið þá sætunni, kókosolíunni og smávegis salti, eftir smekki hvers og eins, út í og látið matvinnsluvélina ganga áfram í nokkrar sekúndur, eða þar til kurlið loðir saman þegar það er kramið á milli tveggja fingra.

Berjalag

300 g hindber eða jarðarber, eftir smekk. Hvort tveggja eru himnesk ber til að nota í þessa uppskrift.

Settu berin í skál og stappaðu þau með gaffli til að búa til gróft mauk.

Ágætt er að skilja nokkur ber eftir til að nota til að skreyta með.

Búðingur

1 bolli nýkreistur appelsínusafi, úr u.þ.b. 3 appelsínum

safi úr 1 appelsínugulri papriku, u.þ.b. 1 dl

1 mangó

safi úr ½ sítrónu

1 bolli kasjúhnetur, lagðar í bleyti í 2-4 klst.

1 bolli kókosolía, fljótandi, hún bráðnar við 25°C

½ bolli hreint xylitol

1 tsk. stevíudropar með vanillubragði

salt eftir smekk

Paprikan er sett í gegnum djúsvél, eða bara í blandara og svo má sía safann frá með fínni grisju eða hnetumjólkurpoka. Afhýðið mangóið og takið steininn frá.

Allt er sett í blandarakönnu og blandað vel eða þar til kasjúhneturnar eru vel maukaðar og komin er búðingsblanda með silkimjúkri áferð.

Samsetning

Sett í lögum í fallega glerskál. Byrjið á að setja helminginn af súkkulaðikurlinu í botninn á skálinni. Þrýstið aðeins niður með sleif svo botninn verði vel þéttur. Hellið helmingnum af búðingnum yfir. Þar ofan á fer allt berjamaukið og svo restin af súkkulaðikurlinu áður en afgangurinn af búðingnum fer ofan á sem efsta lag.

Fallegt að skreyta með sömu berjum og notuð eru í berjalagið.

Látið standa í vel köldum ískáp í um það bil 8-10 klst. eða inni í frysti í 2 klst. til að búðingurinn þéttist áður en trifflið er borið fram.
Njótið hvers munnbita af þessum heilsusamlega og himneska eftirrétti.

Texti / Ragnhildur Aðalsteinsdóttir
Myndir / Alexandra Kristjánsdóttir

Það er hægt að gera margt með skemmtilegt með krökkunum heima.

Samverustundir fjölskyldunnar eru mjög dýrmætar. Oft er talað um gildi útiveru og hvernig má gera skemmtilega hluti með börnum utan veggja heimilisins. En innivera er ekki síður góð og gild, það er hægt að gera margt fleira skemmtilegt en bara að horfa á sjónvarpið. Hér eru nokkrar góðar hugmyndir.

Allir í eldhúsinu
Góð leið til að verja tíma með börnunum er að elda eða baka eitthvað með þeim. Matreiðsla getur aukið áhuga, sjálfstraust, forvitni og frumkvæði barna. Þau eru flest vön að sjá foreldra sína í eldhúsinu þannig að við það að fá að taka þátt finna þau fyrir trausti frá hinum fullorðnu og gera sér grein fyrir að þau séu að læra eitthvað sem er mikilvægt. Með því að taka þátt fer barnið einnig að velta fyrir sé hvað það borðar, hvað er í matnum sem það borðar og hvaðan hráefnið kemur. Með því að kynnast öllu ferlinu og hráefnum frá grunni getur gert það að verkum að matvendni minnki ef hún er til staðar. Það skiptir miklu máli fyrir allt lífið að fá áhuga á matreiðslu og geta eldað sér næringarríkan mat. Því upplýstara sem barnið verður því minni líkur verða á að það velji eingöngu skyndibita í framtíðinni. Matreiðsla stuðlar einnig að ýmiss konar færni, svo sem stærðfræði, því það þarf að mæla hráefni, telja og stundum leggja saman, og einnig eykst orðaforði barnsins. Það er líka mikil áskorun að takast á við afleiðingarnar ef eitthvað fer úrskeiðis og vinna að lausnum í þeim efnum.

Litagleði
Flestir foreldrar þekkja það að vera beðnir um að sitja og teikna með barninu sem getur reynst flókið ef maður hefur litla sem enga hæfileika á því sviði. Hins vegar geta allir litað og undanfarin ár hafa vinsældir litabóka fyrir fullorðna aukist til muna. Margir trúa því að það sé róandi fyrir hugann að lita og þessi iðja er oft tengd við hugmyndir um gjörhygli, eða mindfulness, og litir hafa lengi verið notaðir í ýmiss konar listmeðferð. Helsti munurinn á litabókum fyrir börn og fullorðna er erfiðleikastigið, litabækur fullorðinna eru með smærri og flóknari myndum. Þannig að nú geta foreldrar og börn setið saman með sína litabókina hvert og notið þess að lita saman.

Fjölskyldan getur setið saman og lesið bók þannig að hver fjölskyldumeðlimur fær sitt tækifæri til að lesa upphátt fyrir hina … Þetta eykur bæði lesskilning og lestrarfærni barna.

Sögustund
Margir, ef ekki flestir, foreldrar lesa fyrir börnin sín þar til þau ná þeim aldri að byrja að lesa sjálf. En það er ekki síður skemmtilegt að lesa með börnunum sínum þegar þau eru farin að geta það sjálf. Til dæmis getur fjölskyldan setið saman og lesið bók þannig að hver fjölskyldumeðlimur fær sitt tækifæri til að lesa upphátt fyrir hina. Síðan má ræða saman um atvik í bókinni og spá í söguþráðinn. Þetta eykur bæði lesskilning og lestrarfærni barna auk þess sem orðaforði þeirra eykst. Einnig getur þetta aukið sjálfstraust barna því þau munu oft þurfa að lesa upphátt fyrir jafningja sína í skólanum sem getur verið ógnvekjandi fyrir marga.

Spilerí
Í dag spila börn frekar tölvuleiki en hefðbundin spil. Það er allt gott og blessað því leikirnir æfa oftar en ekki svipaða tækni og færni, svo sem kænsku, úrlausn vandamála og þolinmæði. Það getur þó verið erfiðara fyrir foreldra að taka þátt í því spili. Því ekki grafa upp spilastokk og kenna börnum nokkra góða leiki sem þið spiluðuð í æsku? Þetta gefur tengingu við fortíðina og börn hafa gaman af því að heyra hvernig hlutirnir voru þegar þið voruð krakkar. Borðspil eru einnig skemmtileg þótt þau séu oft tímafrekari en að spila á spil. Hægt er að nota tímann á meðan spilað er til að ræða daginn og veginn, spyrja um skóladaginn eða hvað sem er án þess þó að það sé þvingað eða einhver pressa.

Í barndóm aftur
Það hafa allir gott af því að leika sér aðeins og finna barnið innra með sér. Börn hafa líka þörf fyrir að finna þessa tengingu við foreldra sína, að þeir séu líka börn inn við beinið. Fyrir utan þessa klassísku leiki, svo sem feluleik, er til dæmis skemmtilegt að búa til virki úr púðum, sófum og teppum og síðan er hægt að fara í þykjustuleik inni í virkinu. Annar skemmtilegur leikur er nokkurs konar dótakeila; þá er böngsum, dótaköllum eða öðru dóti raðað upp við endann á löngum gangi og leikmenn skiptast svo á að rúlla bolta og reyna að fella dótið. Önnur útfærsla á þessum leik er að leikmenn stilli sér upp sitt hvorum megin við ganginn með sína dótakalla og þá er markmiðið að vera fyrstur til að fella alla kallana hjá hinum. Önnur góð leið til að fá útrás og hafa það gaman er að halda danspartí, þá er einfaldlega skemmtilegt lag sett á fóninn og svo dansa allir eins og þeir eigi lífið að leysa.

Texti / Hildur Friðriksdóttir
Myndir / www.pixabay.com

Sex góð ráð til þess að líða betur og ná lengra í starfi.

Flest viljum við ná einhverri velgengni í því starfi sem við höfum valið okkur. Við verjum jú bróðurpartinum af lífinu í vinnunni og því skiptir máli að við finnum að við séum að ná árangri. Ýmislegt í okkar hversdagslegu rútínu hefur áhrif á það hvernig við vinnum vinnuna okkar og þar með hversu mikilli velgengni við njótum. Hér eru sex góð ráð til þess að líða betur og ná lengra í starfi.

1. Einbeittu þér að styrkleikum, ekki veikleikum. Stundum eigum við það til að eyða of miklum tíma í að bæta okkur í því sem við erum ekki góð í að eðlisfari. Það getur verið gáfulegra að bæta styrkleika þína enn frekar. Oftar en ekki vinnur fólk saman í hóp þar sem einstaklingar bæta hverjir aðra upp þannig að það skiptir ekki máli þótt þú sért ekki góð/ur í öllu – svo lengi sem þú ert mjög góð/ur í sumu.

2. Hagaðu vinnu þinni eins og þér þykir best. Það sem hentar einum þarf ekki að henta öllum öðrum starfsmönnum fyrirtækis. Undanfarin ár hafa mörg fyrirtæki innleitt opin rými en sumum þykir betra að vinna bak við luktar dyr, allavega í ákveðnum verkefnum. Oftast er hægt að finna lausn á þessum vanda til dæmis með því að nota fundarherbergi þegar þau eru laus eða óska eftir því að vinna heima. Einnig geta hljóðeinangrandi heyrnatól komið að góðum notum.

3. Hafðu hemil á skapinu þínu. Viðhorf þitt hefur ekki aðeins áhrif á líðan og afrakstur þinn í vinnunni heldur einnig á samstarfsfélaga þína. Þess vegna ættirðu að reyna eftir bestu getu að hafa jákvæðni að leiðarljósi en rannsóknir hafa sýnt að með því að hugsa jákvætt verðum við ósjálfrátt jákvæðari gagnvart vinnunni og jákvæðir einstaklingar áorka meira.

4. Veldu hollari mat. Þegar öllu er á botninn hvolft er fæðan eldsneyti líkamans og gæði hennar geta haft mikil áhrif á okkur. Ef þú veist að þú munt ekki hafa tíma til að ná þér í hádegismat reyndu að hafa með þér nesti svo þú sleppir ekki máltíðum. Forðastu sykur líka eftir bestu getu því hann getur valdið blóðsykurshruni og meðfylgjandi orkuleysi.

5. Láttu gott af þér leiða. Þó að það sé mikilvægt að hugsa um sjálfan sig þá getur það aukið vellíðan að gera eitthvað gott fyrir aðra, hvort sem það er að hella upp á kaffi, hjálpa með verkefni eða bjóða einhverjum far heim. Þetta eykur liðsheildina og þýðir það að vinnufélagar þínir eru mun líklegri til að koma þér til hjálpar þegar þú þarft á því að halda.

6. Ekki hugsa um það sem er liðið. Þegar við eigum slæman dag í vinnunni hættir okkur til að taka þær tilfinningar með okkur heim og endurhugsa allt sem við gerðum og hvernig við hefðum getað gert betur. Með þessu erum við að viðhalda streitunni og öllum fylgifiskum hennar þannig að við náum ekki að hvílast almennilega. Hafðu þann vana á að fara einu sinni yfir daginn að honum loknum og segðu svo skilið við hann.

Texti / Hildur Friðriksdóttir

Ingibjörg Lára Hjartardóttir flutti til Jamaíku fyrir tæpum fjórum árum vegna spennandi atvinnutilboðs og ævintýraþrár.

Við fengum hana til að segja okkur frá nokkrum stöðum sem hún mælir með að gestir landsins skoði.

Pelican Bar
Á litlu sandskeri út með suðurströnd Jamaíku er Pelican Bar sem er byggður úr rekavið. Til að komast þangað færðu annað hvort sjómann til að sigla með þig á litlum báti, um það bil 20 mínútur frá Treasure Beach, eða ferð í skipulagða útsýnisferð.

Á barnum er hvorki salernisaðstaða né rafmagn. Kælirinn fyrir bjór er gömul frystikista sem er full af klaka. Þarna er góð stemning, hægt að synda í sjónum í kring og oft sitja pelikanar á bátunum sem bíða eftir fólkinu.

Fljóta á fleka niður Martha Brae-ána
Martha Brae-áin er í um 45 mínútna akstursfjarlægð frá Montego Bay. Ferðin niður ána tekur eina til tvær klukkustundir á bambusfleka. Á leiðinni er fylgst með lífinu meðfram ánni og hægt að stoppa á leiðinni til að kaupa minjagripi eða Red Stripe-bjór. Best að fara á degi þegar engin skemmtiferðaskip eru í höfn því þá er maður nánast einn á ánni. Dásamlega slakandi.

Á litlu sandskeri út með suðurströnd Jamaíku er Pelican Bar sem er byggður úr rekavið. Til að komast þangað færðu annað hvort sjómann til að sigla með þig á litlum báti, um það bil 20 mínútur frá Treasure Beach …

Scotchies
Scotchies er veitingastaður í útjaðri Montego Bay. Þar er boðið upp á grillaðan kjúkling og svínakjöt, marinerað með svokallaðri Jerk Seasoning, innlendri kryddblöndu með sterkum chili-pipar sem heitir Scotch Bonnet. Þetta getur verið mjög sterkt. Meðlætið eru grillaðir grænir bananar, sætar kartöflur og hrísgrjón með nýrnabaunum, eða Rice & Peas eins og innfæddir kalla það. Grillið er frumstætt og yfir það breitt með bárujárni þannig að kjötið er hálfreykt um leið og það er grillað. Best að fá sér ískalda Red Stripe-heimabjórinn með. Máltíðin kostar innan við 2.000 kr. fyrir tvo.

YS-fossarnir
Þessir fossar í ánni YS í suðurhluta Jamaíku eru sjö talsins. Það er hægt að labba upp hluta fossanna með leiðsögumanni og eins er hægt að synda í hyljum fyrir neðan flesta þeirra. Mér finnst þessir fossar mun fallegri en Dunn’s-fossarnir sem eru frægastir og flestir sjá þegar þeir koma til Jamaíku. Það er ekki eins mikil mannmergð við YS og þar með betri upplifun.

Negril-ströndin
Negril er lengsta ströndin á Jamaíku, kölluð 7 Mile Beach, nærri 12 kílómetra löng. Gaman er að labba hana og sjá bæði innfædda og ferðamenn njóta sín. Sölumennirnir láta sér segjast ef maður er bara ákveðinn og kurteis.

Texti / Ragnhildur Aðalsteinsdóttir

Kvikmyndir um töfra njóta yfirleitt mikilla vinsælda.

Sögur um galdra hafa ávallt fylgt mannkyninu. Kvikmyndir eru líklega einn besti vettvangurinn til að segja slíkar sögur því tæknin sem er notuð er oft töfrum líkust. Hér eru nokkrar frábærar myndir sem sýna margar ólíkar hliðar á þessum spennandi og yfirskilvitlegu hæfileikum.

 Töfraskepnur

Flestir sem hafa fylgst með ævintýrum galdrapiltsins Harry Potter, hvort sem það á hvíta tjaldinu eða á prenti, kannast við nafnið Newt Scamander. Hann er höfundur bókarinnar Fantastic Beasts and Where to Find Them sem hvert skólabarn í Hogwarts þarf að kaupa og lesa á fyrsta árinu sínu. Árið 2001 gaf J.K. Rowling út sérstaka útgáfu af bókinni sem vakti mikla lukku hjá aðdáendum.

Í nýlegri kvikmynd byggð á þeirri bók (sjá mynd að ofan) er ungi fræðimaðurinn Newt Scamander nýkominn til New York árið 1926 í leit að töfraverum sem hann hefur einsett sér að rannsaka og bjarga þegar það á við. Hann veit þó ekki að stórhættuleg og kraftmikil vá vofir yfir borginni og hann flækist fljótt inn þau mál.

Gæfa eða bölvun

Systurnar Sally og Gillian Owens í myndinni Practical Magic hafa alla tíð vitað að þær væru ekki eins og fólk er flest. Þær ólust upp hjá frænkum sínum á vægast sagt óvenjulegu heimili þar sem þeim voru litlar eða engar reglur settar. Frænkurnar lögðu sig fram við að vekja hjá systrunum hina einstöku dulrænu hæfileika sem fylgt hafa konum af Owens ættinni í þeirri von að veita þeim þann styrk sem fylgir því að iðka hvítgaldra í nytsamlegum tilgangi. En galdrasæringar Owens kvennanna kosta sitt og í raun fylgir þeim hin mesta bölvun – mennirnir sem þær verða ástfangnar af eru dæmdir til ótímabærs andláts.

Köld kvenna ráð

Galdrar hafa lengi heillað táningsstelpur sem ýmist reyna að nota þá til að laða að sér ást eða leita hefnda. The Craft segir einmitt frá einum slíkum hóp. Þegar ný stelpa flytur í bæinn kynnist hún fljótlega öðrum stelpum sem hafa áhuga á yfirskilvitlegum og dularfullum hlutum. Saman búa þessar fjórar stelpur yfir miklum yfirnáttúrulegum kröftum. Þær geta nánast allt, allt frá því að ná í draumaprinsinn og látið hann dýrka sig, og hvað annað sem þeim dettur í hug – þær eru óstöðvandi og möguleikarnir eru endalausir. Slíku valdi fylgir mikil ábyrgð og það getur óvænt snúist gegn manni, eins og stelpurnar fá að kynnast.

Keppinautar á sviði

Kvikmyndin The Prestige gerist í lok nítjándu aldar í London og segir frá Robert Angier og Alfred Borden sem eru vinir og aðstoðarmenn töframanns. Þegar Julia, ástkær eiginkona Roberts, deyr slysalega í einu atriði kennir Robert Alfred um dauða hennar þannig að vinátta þeirra snýst upp í andhverfu sína. Báðir verða þeir síða frægir töframenn og keppinautar á því sviði – þeir gera hvað þeir geta til að skemma fyrir hvorum öðrum. Þegar Alfred framkvæmir árangursríkt bragð verður Robert hreinlega að komast að því hvernig hann fór að því en kemst að því að sumt er best látið kyrrt liggja.

Texti / Hildur Friðriksdóttir

Mömmubloggarar hafa aldrei verið vinsælli en nú.

Svokallaðir mömmubloggarar hafa aldrei notið jafn mikilla vinsælda og nú, enda frábært að geta fengið stílráð og mömmumola á sama stað. Hér eru bloggsíður fantaflottra mæðra sem við mælum með að þið smellið á í næsta netrúnti.

Ruth Crilly (mynd að ofan)
Ruth Crilly er fyrirsæta og móðir sem á von á sínu öðru barni. Hún hefur lengi haldið úti „bjútí“bloggsíðu og vinsælli YouTube-stöð en eftir að hún varð móðir stofnaði hún bloggið TheUpphill.com þar sem hún fjallar um allt sem snýr að móðurhlutverkinu. Hún er sjarmatröll mikið með einstaklega smitandi húmor, við mælum með henni heilshugar.

_______________________________________________________________

Joanna Goddard
Joanna byrjaði feril sinn hjá Cosmopolitan og þekkir því fjölmiðlabransann inn og út. Hún hefur einnig skrifað fyrir Elle, Glamour, New York, Condé Nast Traveler og Martha Stewart Living. Bloggsíðan hennar, sem í byrjun var einungis hobbí, er nú orðið að hennar aðalatvinnu. Fylgist með ævintýrum hennar og fjölskyldunnar á CupOfJo.com.

_______________________________________________________________

Anh Sundstrom
Anh Sundstrom er mamma hennar litlu Luciu og fáránlega smart markaðsstýra en hún heldur úti mömmutískublogginu 9to5Chic.com. Síðan bloggsíðan hennar fór á flug hefur hún birst í Elle og Glamour, meðal annars.

_______________________________________________________________

Sofi Fahrman
Hin sænska Sofi heldur úti gríðarvinsælu bloggsíðunni Sofi´s Snapshots (Sofissnapshots.com), hún hefur gefið út fjórar bækur sem farið hafa beint á topp vinsældarlista, og stjórnað sænsku útgáfunni af Project Runway. Talandi um mömmuinnblástur!

_______________________________________________________________

Rachel Parcell
Rachel Parcell hefur grætt á tá og fingri síðan hún stofnaði vefsíðuna sína Pink Peonies og meðal annars hannað sína eigin skartgripalínu. Hægt er að fylgjast með þessari sjarmerandi tveggja barna móður á Pinkpeonies.com.

_______________________________________________________________

Anjelica Lorenz
Við mælum með því að þið kíkið á bloggsíðu hinnar hrikalega smörtu Anjelica Lorenz, Modejunkie.com, hvort sem það er til að fá stílinnblástur eða hugmyndir fyrir næsta barnaafmæli.

_______________________________________________________________

Emily Schuman
Cupcakes and Cashmere hefur lengi verið vinsælt tískublogg en nýverið hafa lesendur þess fengið að fylgjast með hvernig Emily Schuman spreytir sig í mömmuhlutverkinu. Bollaköku- og kasmírblanda klikkar seint! Cupcakesandcashmere.com

_______________________________________________________________

Charlotte Groeneveld-Van Haren
Tveggja barna móðirin Charlotte er þekkt fyrir frábæran stíl og birtist reglulega á síðum tímarita á borð við Vogue Paris, InStyle, Nylon og W Magazine. Mömmustílinnblástur beint í æð! Thefashionguitar.com

Texti / Helga Kristjáns

Prýðilegir partýréttir eða „daginn-eftir-partý-réttir“ úr smiðju Önnu Bjarkar Eðvarðsdóttur.

Anna Björk Eðvarðsdóttir lærði fyrst að elda egg í brauði og segir það hafa verið ást við fyrsta bita. Hún segir árstíðirnar ráða því hvaða matreiðsluhefð sé í uppáhaldi en réttirnar sem hún býður lesendum upp á að þessu sinni eru hver öðrum girnilegri.

Hvað starfarðu og hvaða verkefni fæstu við um þessar mundir? Ég er bloggari, sjálfboðaliði, eiginkona, mamma og amma. Það sem ég hef verið að dunda mér við undanfarið er að gera upp 34 feta seglskútu sem við Guðjón eigum. Hún stóð á landi í nokkur ár og þurfti á ást og umhyggju að halda þegar við sjósettum hana aftur. Við erum að klára það og vonum að við náum að sigla eitthvað áður en haustlægðirnar hellast yfir okkur.

Hvað var það fyrsta sem þú lærðir að elda? Egg í brauði, það er sem sagt brauðsneið sem miðjan er skoinn úr. Ytra lagið af sneiðinni er steikt á pönnu og egg brotið ofan í holuna og þegar eggið hefur tekið sig í smástund á pönnunni er miðjan sett ofan á eggið án þess að sprengja rauðuna og svo er sneiðinni snúið við og hún steikt áfram á hinni hliðinni. Þessi dásemd er svo borin fram með tómatsósu og sinnepi, til hliðar. Þetta varð ást við fyrsta bita, ást sem varir enn.

Ertu jafnvíg á bakstur og matseld? Mér finnst miklu skemmtilegra að elda en baka. Ég baka ekki mikið af hnallþórum en ég hef gaman af því að baka brauð og allskonar bökur. Ég hef ekki lagt mikla rækt við bakasturinn. Ég hef alltaf haldið því fram að það sé mömmu að kenna, hún er svo frábær bakari að ég hef ekki nennt að reyna eins mikið fyrir mér í þeim efnum.

Höfðar einhver matreiðsluhefð sérstaklega til þín? Nei, alls ekki. Mér finnst það fara eftir árstíðunum hvað höfðar til mín á hverjum tíma. Hvaða hráefni er ferskast, veðrið og hitastigið skiptir máli og svo auðvitað hvað er til í ísskápnum. Ég er mjög nýtin og þoli ekki að henda mat.

Mér finnst það fara eftir árstíðunum hvað höfðar til mín á hverjum tíma. Hvaða hráefni er ferskast, veðrið og hitastigið skiptir máli og svo auðvitað hvað er til í ísskápnum. Ég er mjög nýtin og þoli ekki að henda mat.

Verstu mistök sem þú hefur gert í eldhúsinu? Örugglega nokkur en ég er með nokkuð gott valminni á svoleiðis og sigta það frá og nenni ekki mikið að pæla í því. En ef þú pressar mig þá rámar mig óljóst í fyllingu í sítrónu-marensböku sem vildi ekki láta að stjórn, ójá, oftar en einu sinni.

Hefur þú uppgötvað einhverja snilld í matseld nýlega? „Low and slow“, eða hægeldaður matur. Það er ekkert nýtt við það en mikil snilld sem minnir á sig aftur og aftur. Aðferðin gefur hráefninu tíma svo það njóti sín sem best og maður þarf ekki að standa yfir pottunum lengi. Þá er t.d. hægt að kaupa ódýrari bita af kjöti sem eru oft vannýttir og útbúa stórkostlega veislu. Ég á mér uppáhaldsmeðlæti sem eru hægeldaðir smátómatar í góðri ólífuolíu með sneiddum hvítlauk og tímíani, dásamlegir.

Hver er stærsta áskorun sem þú hefur mætt í eldamennsku? Það var eflaust að sjá um veitingarnar í vígslu reiðhallarinnar í Mosfellsbæ hjá Hestamannafélaginu Herði en þá var Guðjón formaður Harðar. Annars er það þetta venjulega, eins og hjá flestum, að elda hátíðarmatinn um jól og áramót, að allt lukkist sem best. Maturinn er svo stór hluti af upplifuninni á jólunum, ilmurinn sem læðist í gegnum húsið eftir því sem líður á daginn kemur með hátíðarstemninguna. Í sumar var skírnarveisla yngri dóttursonarins heima hjá okkur Guðjóni. Það var hádegisverður fyrir stórfjölskylduna og vini sem ég naut að elda eins og alltaf þegar maður eldar fyrir þá sem hafa gaman af því að borða góðan mat.

Uppáhaldsmatreiðsluþættir? Þættir sem fara nánar í efnð, eins og hvaðan hráefnið kemur, hvernig það er alið eða ræktað. Þættir sem eru um hvernig matur var eldaður hér áður fyrr. Mér finnst það allt svo forvitnilegt hvernig farið var að áður en öll nútímaþægindin komu til sögunnar. Hið blómlega bú er t.d. þáttur sem ég naut að horfa á og breskir þættir sem heita Food Unwrapped eru uppáhaldsþættir. Annars finnst mér alltaf gaman að horfa á matreiðsluþætti.

Bloggsíða: annabjork.is.

____________________________________________________________

Cheddar- og parmesanbitar með reyktri papriku og rósmaríni

45 stykki

125 g mjúkt smjör

1 msk. flórsykur

1 tsk. kummin

1 tsk. reykt paprikuduft

80 g sterkur cheddar-ostur

50 g rifinn parmesanostur

2 tsk. kúmenfræ

2 tsk. saxað ferskt rósmarínlauf

110 g hveiti

50 g maísmjöl (gróft eins og polenta)

salt á hnífsoddi

 Ofan á kökurnar

1 egg, þeytt

rósmaríngreinar

gróft sjávarsalt

Ofninn er hitaður í 160°C á blæstri. Smjör, flórsykur, kummin og paprika er þeytt létt og ljós. Hrærið svo báða ostana varlega út í ásamt kúmeni og rósmaríni.

Að lokum er hveiti og maísmjöli ásamt salti bætt út í og hrært í samfellt deig. Deigið er sett á bökunarpappír og annað lag af pappír lagt ofan á deigið og það er svo flatt út þar á milli með kökukefli þar til það er eins og 100 kr. peningur. Sett í kæli og kælt. Þegar deigið er tilbúið til að baka eru stungnar út kökur sem eru um 5 cm í þvermál, penslaðar með þeyttu eggi og söxuðu rósmaríni og grófu sjávarsalti dreift yfir.

Kökunum er raðar á pappírsklædda bökunarpötu og þær bakaðar í 16-17 mínútur. Hægt er að frysta óbakað deigið.

____________________________________________________________

Fyllt frönsk samloka með saltkaramellu-bananasósu

fyrir 6

12 sneiðar af hvítu samlokubrauði

250 g rjómostur, við stofuhita, í bláu boxunum

125 g mascarpone-ostur, við stofuhita

½ bolli ristaðar pekanhnetur, saxaðar

2 msk. púðursykur, þjappaðar

1 tsk. kanill

½ tsk. salt

6 egg, léttþeytt

3 bollar mjólk

¼ tsk. salt

Ofninn er hitaður í 180°C.  Sex brauðsneiðum er raðað á stóran djúpan disk.  Hrærið saman í skál rjómaost, mascarpone, pekanhnetur, púðursykur, kanil og salt. Maukinu er smurt á sneiðarnar og hinar sex sneiðarnar eru lagðar ofan á. Þeytið saman í annarri skál egg, mjólk og salt. Hrærunni er hellt jafnt yfir sneiðarnar svo hún þeki allt yfirborðið og látin bíða í smástund svo þær drekki í sig vökvann. Bökunarpappír er settur í ofnskúffu og samlokunum raðað ofan í.  Bakaðar í 1 klukkustund en snúið á 15 mínútna fresti svo þær bakist jafnt.

Saltkaramellu-bananasósa

¾ bollar dökkur púðursykur, þéttpakkaður

½ bolli rjómi

½ bolli smjör

2 msk. síróp

1 tsk. vanilludropar

½ tsk. gróft sjávarsalt

1 banani

Púðursykur, rjómi, smjör og síróp er hitað í potti á rúmlegum meðalhita. Suðan er látin koma upp og hitinn lækkaður og þetta látið malla í 3-4 mínútur. Tekið af hitanum, vanillu og salti bætt út í. Hellt í skál og látið kólna niður í stofuhita í um klukkustund. Bananinn er skorinn í sneiðar og hann hrærður varlega út í. 

Sósan er borin fram með brauðinu.

____________________________________________________________

Harissa-lamborgarar með feta og klettasalati

fyrir 2

250 lambahakk

½ tsk. kummin

cayanne-pipar eftir smekk (sterkur)

2 msk. harissa-mauk

sjávarsalt og nýmalaður svartur pipar

60 g fetaostur

ólífuolía til að pensla með

2 pítubrauð

klettasalat

grísk jógúrt

Hakkinu og kryddinu ásamt harissa-maukinu og salti er hnoðað vel saman. Deiginu er skipt í tvo jafna hluta. Fetaosturinn er mulinn í miðjuna á hvorum borgara og deiginu vafið utan um ostinn og lokað vel. Grillpanna er hituð á meðalhita, borgararnir penslaðir með olíu og steiktir í 5-6  mínútur. Pítubrauðin eru hituð í brauðristinni. Þau eru svo fyllt með grískri jógúrt, klettasalati og lamborgara. Þessi borgari er frábær á útigrillið.

____________________________________________________________

Pylsur með bjórsoðnum sætum lauk og chili-salsa

fyrir 4

pylsur að eigin vali

brioch-pylsubrauð

mjúkt smjör

sterkt sinnep

Pylsurnar eru grillaðar eða steiktar. Brauðin eru opnuð og þunnu lagi af smjöri er smurt inn í þau og þau grilluð eða ristuð, bara að innan, á þurri pönnu á háum hita. Brauðið smurt að innan með sterku sinnepi, síðan er pylsa lögð í brauðið ásamt lauk og salsa.

Bjórsoðinn sætur laukur

2 tsk. ólífuolía

2 tsk. smjör

3 stórir laukar í þunnum sneiðum

1 tsk. kúmenfræ

2 msk. dökkur muscavado-sykur eða dökkur púðursykur

2 hvítlauksrif, marin

1 flaska ljós bjór

sjávarsalt og nýmalaður svartur pipar

Olía og smjör er hitað á pönnu og lauk, kúmeni og salti er bætt út í og steikt á meðalhita í u.þ.b. 10 mínútur og hrært í við og við. Sykrinum er dreift yfir ásamt hvítlauk og látið mallað áfram þar til laukurinn fer að karamelliserast. Þá er bjórnum hellt yfir og látið mallað áfram í um 15 mínútur, eða þar til bjórinn er gufaður upp og laukurinn er dökkur á litinn. Smakkað til með salti og pipar.

Chili-salsa

2 vorlaukar, í þunnum sneiðum

1 rautt chili, fínsaxað (fræin með ef þú vilt salsað sterkt)

2 msk. söxuð steinselja

2 tsk. ólífuolía

Öllu blandað saman í skál.

____________________________________________________________

Rækjur með smjör- og blóðbergsbollubrauði

forréttur fyrir 4 eða kvöldveður fyrir 2

20 tígrisrækjur

2 msk. Shriracha Hot Sauce

2 msk. olía

¼ tsk. salt

2 tsk. sykur

5 hvítlauksrif, marin

Útbúið marineringuna og látið rækjurnar marinerast í nokkra tíma. Þær eru svo þræddar á grillpinna en ekki henda marineringunni. Rækjurnar eru grillaðar þar til þær eru orðnar bleikar og gegnsteiktar en passið að ofelda þær ekki. Marineringin er sett í lítinn pott og látin malla í nokkrar mínútur, síðan er henni hellt yfir grillaðar rækjurnar.

Smjör- og blóðbergsbollubrauð

2 öskjur tilbúið pizzudeig, ekki útrúllað

50 g smjör, brætt

blóðbergs- eða rósmaríngreinar

1-2 msk. polenta

gróft sjávarsalt

Smyrjið 20 cm lausbotna kökuform að innan með olíu og polentan er hrist innan í forminu svo hún þeki botn og hliðar. Deiginu er skipt í u.þ.b. 14 jafnstóra hluta og þeir hnoðaðir létt í litlar bollur sem er jafnað í formið. Þær þekja ekki botninn en fylla vel út í eftir hefingu. Mér finnst fínt að láta deigið hefast í 1-2 klukkustundir undir plastfilmu áður en ég baka það. Ofninn er hitaður í 200°C.  Smjörið er brætt og kælt aðeins, svo er því penslað yfir brauðið. Að lokum er blóðbergi og grófu salti dreift yfir og brauðið bakað í 30-35 mínútur. Tekið úr forminu um leið og það hefur kólnað aðeins og borið fram með rækjunum og auka smjöri.

Umsjón / Íris Hauksdóttir
Myndir / Heiðdís Guðbjörg Gunnarsdóttir

Nú eru áramótin á næsta leiti og þá fara flestir í einhvers konar veislu eða partí.

Það er því við hæfi að skoða nokkrar bestu og frægustu partímyndir allra tíma.

Á æskuslóðum
Eins og nafnið gefur til kynna fjallar kvikmyndin Sisters um systurnar Kate og Mauru Ellis (mynd hér að ofan). Þegar þær komast á snoðir um áform foreldra sinna um að selja æskuheimili þeirra ákveða þær að halda kveðjuhóf á meðan foreldrarnir bregða sér frá. Þetta partí skal toppa öll partí sem áður hafa verið haldin í þessu húsi. Félögum þeirra úr gagnfræðiskóla er öllum boðið. Þrátt fyrir að meirihluti þeirra sé nú orðinn ráðsettur og með börn kunna þeir enn að djamma. Tina Fey og Amy Poehler, sem leika systurnar, eru kómískir snillingar. Í myndinni fylgjumst við með kostulegum undirbúningi og auðvitað veislunni sjálfri sem eins og flestir ættu að geta giskað á fer heldur betur úrskeiðis með verulega skondnum afleiðingum.

Tryllt tógapartí
Animal House (hér til hliðar) gerist árið 1962 í Faber-framhaldsskólanum. Delta Tau Chi-bræðralagið er illa þokkað og hver sem er getur fengið inngöngu á meðan Omega Theta Pi-bræðralagið er ekki opið hverjum sem er og í raun stútfullt af ríkum, hvítum strákum sem enginn þolir nema skólastjórinn. Skólastjórinn leitar til þeirra til að hrekja fyrrnefnda bræðralagið úr skólanum. Alls kyns bellibrögðum er beitt og skólastjórinn nær vilja sínum næstum fram. Delturnar halda risastórt tóga-partí með hljómsveit og öllu klabbinu. Ýmistlegt skrautlegt gerist í partíinu, meðal annars sefur einn bræðranna hjá eiginkonu skólastjórans.

________________________________________________________________

Sögulegt partí
Í Project X á Thomas afmæli og eins og alla unga menn dreymir hann um að halda besta og flottasta afmælispartí sem haldið hefur verið. Til allrar lukku verða foreldrar hans ekki heima svo Thomas lætur slag standa og fær félaga sína, J.B. og Costa, í lið með sér. Hann lætur orðið ganga að öllum sé boðið heim til hans í partí ársins – og enginn lætur segja sér það tvisvar. Allir mæta og upphefst einhver svakalegasta veisla sem sögur fara af. Það skemmir auðvitað ekki fyrir að Thomas á ríka foreldra sem búa í stóru húsi með sundlaug og alls konar fíneríi. Auðvitað reynast nágrannarnir ekki alveg sáttir við lætin en það bíttar engu.

________________________________________________________________

Þrautaganga
Lúðarnir og bestu vinirnir Evan og Seth í myndinni Superbad gera hér um bil hvað sem er til að vinna sér hylli kvenpeningsins. Þegar þeir komast óvænt yfir heimboð í partí eyða þeir heilum degi, ásamt vini sínum Fogell, í að komast yfir nægt áfengi fyrir partíið. Þeir ætla að deila áfenginu með tveimur stelpum, Jules og Beccu, í þeirri von að þeir missi loksins sveindóminn og geti farið í framhaldsskóla eftir viðburðaríkt sumar. Áætlun þeirra flækist þegar Fogell lendir upp á kant við tvær klaufskar löggur sem hægja á þeim en jafnframt aðstoða þá um leið. Komast þeir einhvern tímann í partíið og með nægilegt áfengi?

________________________________________________________________

Óþreyjufull ungmenni
Can‘t Hardly Wait er klassísk partímynd í þeim skilningi að hún gerist nær eingöngu í einu partíi. Eftir brautskráningu nemenda í Huntington Hill-skólanum er komið að lokapartíinu. Þar er samankomin hin skrautlega nemendaflóra sem þrifist hefur í skólanum undanfarin fjögur ár – nördar, íþróttagarpar, fegurðardísir og hornrekur. Öll eru þau staðráðin í að sleppa fram af sér beislinu og gera upp þær tilfinningar sem legið hafa bældar alla skólagönguna, enda ekki seinna vænna áður en þau halda sína leið.

Texti / Hildur Friðriksdóttir

Nokkur góð ráð varðandi val á ilmvatni til að auka endingu.

Hvernig við skynjum ilm og hvaða ilmur okkur þykir góður er afar persónubundið. Þess vegna er mjög áhættusamt að gefa einhverjum ilmvatn að gjöf, það er, ef viðkomandi hefur ekki valið sér það sjálfur. En þegar við höfum loksins fundið rétta ilminn fyrir okkur þá viljum auðvitað að hann endist sem lengst á okkur. Hér eru nokkur góð ráð varðandi val á ilmvatni til að auka endingu og hvernig sé best að geyma þau.

1. Ilmvötn hafa takmarkaðan líftíma síðan fer lyktin að breytast og dofna. Ákveðnir þættir geta haft áhrif á og takmarkað líftímann, þá sérstaklega hiti, birta og raki. Þess vegna er óráðlegt að geyma ilmvötn inni á baðherbergi eða úti í gluggakistu og mælst er til að geyma þau frekar á þurrum og skuggsælum stað. Það þýðir þó ekki að þú þurfir að geyma þau inni í skáp. Yfirleitt er mikil vinna lögð í hönnun ilmvatsnglasa og því er tilvalið að stilla þeim fallega upp á snyrtiborði eða kommóðu, margir hafa til dæmis notað fallega bakka eða kökudiska.

2. Ilmur endist skemur á þurri húð og þess vegna er mikilvægt að bera krem á húðina ef þú vilt að hann endist lengur. Mörg ilmvatnsmerki framleiða body lotion með sama ilmi sem vissulega eykur áhrif hans en það er ekkert síðra að nota gott ilmlaust krem. Einnig mæla sumir sérfræðingar með því að bera vaselín á þá staði sem þú spreyjar ilmvatninu á því það myndar nokkurs konar hjúp á milli ilmvatnsins og húðarinnar og eykur þannig endingu.

Algengt er að sjá konur nudda úlnliðunum saman eftir að þær hafa spreyjað ilmvatni á sig en það eru mikil mistök. Það verður til þess að toppnótur ilmsins hverfa hraðar og ilmurinn endist skemur á úlnliðnum.

3. Spreyjaðu ilmvatni á helstu púlsstaði líkamans, það er úlnliði, háls og olnboga- og hnésbætur, því það tryggir að ilmurinn dreifist vel. Best er að spreyja á sig ilmvatni þegar maður er nýkominn úr sturtu og áður en maður klæðir sig því þá er húðin rök og grípur frekar ilminn. Þetta kemur líka í veg fyrir að ilmvatnið liti viðkvæm föt eða skartgripi. Algengt er að sjá konur nudda úlnliðunum saman eftir að þær hafa spreyjað ilmvatni á sig en það eru mikil mistök. Það verður til þess að toppnótur ilmsins hverfa hraðar og ilmurinn endist skemur á úlnliðnum. Ef þú vilt aðeins fá léttan ilm eða ert að bæta á þig örlítið meira ilmvatni fyrir kvöldið er sniðugt að spreyja ilmvatninu létt upp í loftið og ganga inn í mistrið. Margar konur spreyja ilmvatni í hárið á sér milli þvotta, enda er mikil uppgufun sem fer fram í gegnum höfuðið, ilmvatn sem inniheldur alkahól getur þó þurrkað hárið óþarflega mikið og þá er betra að spreyja ilmvatninu í hárbursta og renna honum svo í gegnum hárið.

4. Það getur reynst flókið að finna sér nýjan ilm og nauðsynlegt að vera með helstu hugtök á hreinu. Eau de toilette er með léttari ilm en Eau de parfum og er þar af leiðandi yfirleitt aðeins ódýrari. Ilmnótur skiptast niður í grunn-, mið- og toppnótur en ilmur getur ýmist verið blómlegur, sætur, kryddaður eða sítrus- og ávaxtakenndur. Einnig er hægt að fá ilm í föstu formi eða sem hreina ilmolíu, en slíkur ilmur er oftar en ekki kröftugri en sá sem er spreyjaður.

5. Það er mjög misjafnt hvernig ilmvötn lykta á fólki. Í flestum verslunum er að finna þar til gerðan pappír sem þú getur spreyjað á áður en þú reynir eitthvað á eigin skinni. Ef þú hins vegar lendir í því að þú spreyjar á þig ilmvatni sem hentar þér alls ekki er gott að strjúka meikhreinsiklút yfir svæðið til að fjarlægja ilminn. Sniðugt er að blanda ólíkum ilmvötnum saman til að fá einstakan ilm sem einkennir þig. Þá er sniðugt að nota prufupappírinn til að prófa ólíkar blöndur. Þumalputtareglan segir að þú eigir að byrja á þyngri ilmi og enda á léttari, því annars er hætta á að sá léttari kæfist. Til að finna sanna lykt ilmvatnsins verður að spreyja því á húð og leyfa því að bíða í nokkrar mínútur á meðan það rýkur aðeins og aðlagast þér.

6. Ilmvötn má nota á fjölmarga vegu, til dæmis er sniðugt að spreyja uppáhaldsilmvatninu þínu á sængurfötin þín. Einnig er hægt að spreyja því á tissjúpappír sem þú setur í skúffurnar þar sem þú geymir fötin þín þannig að þau dragi í sig örlítinn ilm. Góð leið til að nýta síðustu dropana af ilmvatni sem leynist á botni glassins er að hella því út í lyktarlaust body lotion og gefa því þannig ilm.

Texti / Hildur Friðriksdóttir