Hrönn Helgadóttir segir frá stöðunum á Jótlandi sem fjölskyldan heimsækir mest.

Hrönn Helgadóttir býr í Horsens, ásamt eiginmanni og tveimur börnum, og starfar sem hársnyrtir. Hún segir að bærinn sé frekar rólegur og stutt í allskonar skemmtilega afþreyingu. Hún segir okkur frá stöðunum sem þau heimsækja mest en það eru staðir sem henta vel fyrir börnin.

„Hverfið sem við búum í er aðeins fyrir utan miðbæinn en samt er ég bara um 5-7 mínútur að hjóla í vinnuna í miðbænum. Umhverfið í kringum okkur er frábært. Við erum með skóg og tjörn og rétt hjá okkur er stór almenningsgarður með leikvelli, grillaðstöðu og allskonar afþreyingu. Þangað er yndislegt að hjóla á sumrin með nesti og sleikja sólina. Við hjólum allan ársins hring og það er frábært hvað veturinn er mildur og sumarið langt. Jótland hefur upp á margt að bjóða en þeir staðir sem við höfum sótt eru aðallega skemmtigarðar og barnvænir staðir. Svo höfum við líka farið nokkra túra til Þýsklands. Það tekur ekki nema rúma klukkustund að keyra til Flensborgar héðan. Það er mikill kostur að geta farið á bílnum í frí til Evrópu í stað þess að fljúga allt eins og þegar við bjuggum á Íslandi. Við vorum t.d. í Þýskalandi um páskana og stefnum á túr um Evrópu fljótlega.“

Lalandia er við hliðin á Legolandi og er innandyra vatnaveröld, ásamt skautasvelli, skíðabraut, keilu, og ýmislegu fleiru. Þangað förum við mest yfir vetrartímann, helst til að fara í baðlandið.

Djurs Sommerland

Djurs er okkar uppáhaldsstaður, við höfum keypt okkur árspassa í garðinn síðustu tvö ár og stefnum á að gera það sama í ár. Við erum rúman klukkutíma að keyra þangað, förum að morgni með nestispakka eða kjöt á grillið og komum heim að kvöldi. Garðurinn er blanda af vatnsrennibrauta- og skemmtigarði, risastór með fjölbreyttum grasflötum þar sem hægt er að sitja og njóta. Einnig er fjöldinn allur af grillstæðum. Nóg er af tækjum og afþreyingu fyrir alla aldurshópa og við foreldrarnir skemmtum okkur alveg jafnvel og börnin. Það sem hann hefur fram yfir aðra garða er að maður finnur ekki eins mikið fyrir fjöldanum og raðirnar verða ekki eins langar.

Lalandia

Lalandia er við hliðin á Legolandi og er innandyra vatnaveröld, ásamt skautasvelli, skíðabraut, keilu, og ýmislegu fleiru. Þangað förum við mest yfir vetrartímann, helst til að fara í baðlandið. Maður fær svolítið á tilfinninguna að vera á sólarströnd; það er heitt þarna inni og sólbekkir úti um allt. Svo fer maður bara á sundfötum og kaupir sér að borða eða ís, mjög kósí. Þarna er fjöldinn allur af rennibrautum, öldulaug, smábarnalaug og barnaveröld. Einnig eru heitir pottar og gufuböð.

Randers Regnskov

Í Randers sem er í fjörutíu mínútna akstursfjarlægð frá Horsens er flottur innandyra regnskógur sem skiptist í þrjár hvelfingar; Asíu, Suður-Ameríku og Afríku. Þar er hægt að sjá helstu dýrin sem lifa í þessum regnskógum. Mínum börnum finnst fiðrildaveröldin skemmtilegust en þar fljúga fiðrildi í öllum stærðum, gerðum og litum allt í kringum mann. Fyrir utan er hefðbundið skátaleiksvæði með alls konar þrautum. Fræðandi og skemmtileg upplifun fyrir bæði börn og fullorðna.

Saksild strand

Hér í Horsens er lítil strönd í nánast göngufæri við okkur og þar finnst krökkunum meðal annars svakalega gaman að fara á krabbaveiðar. Ef veðrið er virkilega gott þá pökkum við í kæliboxið og keyrum á einn af mínum uppáhaldsstöðum, Saksild-ströndina, sem er dásemd með algerlega hreinni strönd og blágrænum sjó. Þar getur hitinn orðið mikill og okkur líður oft eins og við séum á Spáni. Sjórinn er grunnur langt út, þannig að börnin geta vaðið eins og þau vilja meðan foreldrarnir liggja í leti. Stundum förum við nokkrar fjölskyldur saman og tökum grillið með og förum ekki heim fyrr en sólin sest. Þarna eru líka veitingastaðir og ísbúðir. Þetta er ódýr og frábær fjölskylduskemmtun.

Givskud ZOO

Rétt hjá okkur er skemmtilegur dýragarður sem bæði er hægt að keyra í gegnum og rölta um. Þar er hægt að sjá allt frá fiskum og músum upp í fíla, ljón og gíraffa. Einu sinni sáum við þegar ljónin fengu sebrahest að éta og það er upplifun sem börnin gleyma seint. Okkur finnst alltaf gaman að ganga í gegnum apagarðinn þar sem aparnir eru svolítið að stríða og við sáum einu sinni apa taka snuð af barni, setja það upp í sig og hlaupa í burtu. Ég mæli með því að þeir sem eru að ferðast á Jótlandi gefi sér tíma til þess að kíkja í Giveskud sem er ekki í nema fimmtán mínútna akstursleið frá Legolandi. Á öllum bílastæðunum í garðinum eru nestis- og grillaðstæður og ég mæli með að fólk taki með sér nesti eða eitthvað á grillið í garðana því verðið á mat og drykk þar inni er í hærri kantinum.

Legoland

Legoland þekkja sennilega flestir en það er staður sem allir þurfa auðvitað að heimsækja þegar þeir koma hingað. Þar er alltaf rosalega margt fólk og langar biðraðir í öll tæki. Sérstaklega á háannatíma. Við mælum með því við okkar gesti að koma frekar í júní eða eftir miðjan ágúst til þess að fá sem mest út úr heimsókninni. Legoland er frábær garður og margt mjög skemmtilegt að sjá. En takið með ykkur drykki og nesti, allavega eitthvað af því. Því tíuþúsundkallarnir eru fljótir að hverfa í mat og drykk þarna inni.

Myndatexti: Sonja Bríe og Helgi Sævar (7 og 5 ára á myndinni) á Saksild-ströndinni á Jótlandi.

Texti / Ragnhildur Aðalsteinsdóttir
Myndir / Hrönn Helgadóttir og www.pixabay.com

Ein einfaldasta leiðin til að öðlast betri heilsu er að ganga meira.

Kyrrseta er mjög einkennandi þáttur nútímalífsstíls og við megum öll við því að hreyfa okkur meira. Það er eitt að fara reglulega í ræktina en við þurfum að stunda hreyfingu daglega og oft á dag. Ein einfaldasta leiðin til að öðlast betri heilsu er að ganga meira.

Vinsældir heilsuúra og skrefamæla hafa aukist til muna á síðustu árum, en þau gera manni auðvelt að fylgjast með hversu mikið maður gengur á hverjum degi.

Ráðlagt er að ganga að minnsta kosti tíu þúsund skref á hverjum degi en margir eiga í erfiðleikum með að ná því markmiði. Hér eru nokkrar góðar leiðir til að auka skrefafjöldann um tvö þúsund á hverjum degi.

Símafundir á ferð

Til hvers að sitja kyrr á meðan þú ert í símanum þegar þú getur staðið upp frá skrifborði þínu, fengið ferskt loft og bætt við þig skrefum? Ef þú gengur á jöfnum hraða meðan á tíu mínútna símtali stendur geturðu safnað þúsund skrefum án þess að taka eftir því.

Ráðlagt er að ganga að minnsta kosti tíu þúsund skref á hverjum degi en margir eiga í erfiðleikum með að ná því markmiði.

Farðu lengri leiðina

Við stöndum mörgum sinnum upp á hverjum degi, hvort sem það er til að fara á salernið eða til að sækja vatn eða kaffi. Prófaðu að fara lengri leiðina í hverri af þessum ferðum, til dæmis fara á salernið sem er fjær skrifstofu þinni eða einfaldlega taka krók á leiðinni, þetta mun aðeins taka þig örfáum mínútum lengur en skrefin safnast upp.

Með daglegum verkum

Mikið af þeim verkum sem við gerum á hverjum degi framkvæmum við á meðan við stöndum kyrr, en hægt væri að hámarka nýtingu tímans með því að stunda hreyfingu á meðan. Til dæmis er sniðugt að ganga um gólf á meðan þú burstar tennurnar, en það er fjórar mínútur á dag sem getur þýtt allt að fimm hundruð skref. Síðan geturðu gengið um á meðan þú bíður eftir lyftu eða strætó eða hvenær sem er.

Upp og niður

Það er gamalt og gott ráð að sleppa því að nota lyftur eða rúllustiga. Það segir sig sjálft að þú safnar ekki skrefum með því að standa kyrr í lyftu. Á hverri mínútu sem við göngum upp stiga getum við safnað allt að tvö hundruð og sjötíu skrefum svo það getur fljótt borgað sig.

Sæktu hádegismatinn

Alltof oft kýs fólk að grípa snöggan hádegismat og jafnvel borða hann við skrifborðið sitt. Það er mun heilsusamlegra að gefa sér tíma til að borða í friði. Ekki er verra ef þú ferð út að ná þér í hádegismat og fá þér gönguferð fram og til baka. Ef það hentar ekki, til dæmis ef það er mötuneyti á vinnustað þínum, þá ættirðu samt að gefa þér tuttugu mínútur til að fara út að ganga því þannig eykurðu skrefafjölda dagsins um heil tvö þúsund skref.

Texti / Hildur Friðriksdóttir
Myndir / www.pixabay.com

Tískuhönnuðir taka þátt í kvenréttindabaráttunni með því að fagna fjölbreytileikanum.

Við vorum orðin allt of vön því að sjá einsleitar og sviplausar fyrirsætur ganga niður tískusýningarpallana til að kynna fyrir okkur nýjustu tísku.

Síðustu misseri virðist tískuheimurinn þó vera farinn að ranka við sér og hönnuðir eru farnir að taka þátt í kvenréttindabaráttunni með því að fagna fjölbreytileikanum. Þeir sem sýndu tískuna síðustu mánuði og vikur notuðu meðal annars konu á áttræðisaldri, ofurfyrirsætu í svokallaðri „yfirstærð“og múslímska fyrirsætu með hijab. Þá veigruðu þeir sér ekki við að senda frá sér rammpólitísk og feminísk skilaboð sem eiga erindi til allra.

Sterk skilaboð
Óhætt er að segja að sjaldan eða aldrei hafi tískusýningarpallarnir verið eins stútfullir af kvennakrafti og á síðustu vikum og margir hönnuðir gáfu okkur von um að hægt og rólega séu tímarnir að breytast til hins betra.

Tískuheimurinn virðist smám saman vera að brjóta niður veggi í staðinn fyrir að byggja þá og leyfir einstaklingum frekar að njóta sín óháð kynþætti, kyni, aldri, trúarbrögðum eða kílóafjölda.

Í ljósi þess að konur yfir sextugt eru með stærstu kaupendum hátísku í heiminum verður að þykja skrítið að þær sé sjaldan sýnilegar á tískusýningarpöllunum eða í auglýsingum. Þess vegna var einstaklega ánægjulegt að að sjá eldri konu ganga niður pallinn fyrir tískuhúsið Simone Rocha.

Michael Kors fékk ofurfyrirsætuna í „yfirstærð“, Ashley Graham, til að sýna fötin sín.

Múslímska fyrirsætan Halima Aden, sú fyrsta til að ganga niður tískusýningarpall á tískuviku í New York með hijab bundinn um höfuðið.

Feminísk skilaboð komust vel til skila á tískusýningarpalli Prabal Gurung sem sendi fyrirsætur sínar niður pallinn í rammpólitískum bolum.

Í lokaatriðinu hjá Missoni báru fyrirsæturnar bleikar píkuhúfur sem eru nýtt merki kvenréttindahreyfingarinnar (sbr. aðalmynd).

Litadýrð

Margir stærstu tískuhönnuðirnir fengu innblástur frá götutískunni og sendu fyrirsætur niður pallinn með einstaklega litríkt hár. Við sáum meðal annars gular strípur hjá Versace, skærblátt hár hjá Marc Jacobs, eldrautt hjá Saint Laurent og Barbie-bleikt hjá Dior.

Förðunin undirstrikaði persónulega tjáningu þeirra sem hana báru og litadýrð var víða að finna baksviðs.

Nú er tími til kominn að þora að vera „öðruvísi“ og prófa sig áfram með liti sem við þorum vanalega ekki að snerta. Augnskuggapallettan Color Shot í stílnum Bold frá Smashbox er tilvalin í verkið.

Baksviðs hjá Prada sendi förðunargoðsögnin Pat McGrath þau skilaboð að förðun fyrirsætnanna sé frekar ætluð til persónulegrar tjáningar en til þess að þóknast öðru fólki.

Persónulegar klippingar

Í takt við einstaka persónuleika sem sáust víða á hausttískusýningarpöllunum voru sérstakar klippingar áberandi. Náttúruleg áferð á hári fyrirsætnanna fékk að njóta sín og töffaralegir drengjakollar og bob-klippingar komu sterkar inn.

Lengi lifi byltingin

Fyrirsætur Dior báru leðuralpahúfur en alpahúfan hefur löngum verið tengd byltingu og uppreisn en það má með sanni segja að uppreisnin sé hafin innan tískuheimsins.

Texti / Helga Kristjáns

Montréal er ein af fallegustu borgum Kanada og býður upp á fjölbreytta möguleika fyrir ferðamenn.

Borgin er fræg fyrir frábæran mat og það sama á við um þjónustuna. Borgin er frönskumælandi en langflestir tala þó ensku líka.

Gamli bærinn í Montréal er heillandi og þar er yndislegt að labba um steinlagðar göturnar og virða fyrir sér fallegan arkitektúrinn og mannlífið. Þar er fjöldinn allur af veitingastöðum og kaffihúsum sem mörg hver skora hátt á TripAdvisor. Listagallerí eru víða sem og svokallaðar „lundabúðir“ en stærri verslunarkeðjur eru annars staðar. Notre Dame-kirkjan trónir yfir torgið d‘Armes. Óhætt er að mæla með því að borga sanngjarnt gjaldið við innganginn og skoða þessa stórkostlegu byggingu.

Skammt frá gamla bænum er Kínahverfið. Þar eru ótal asískir veitingastaðir, matarmarkaðir og verslanir. Úr hverri höfuðátt inn í hverfið eru fjögur hefðbundin kínversk hlið (paifang) sem gefin voru af Shanghai árið 1999. Einni götu fyrir ofan Kínahverfið er Rue Sainte-Catherine sem er aðalverslunargata borgarinnar og mjög löng. Þar er að finna allar helstu verslunarkeðjurnar, eins og H&M, Apple, Sport Experts, Zöru, North Face og svona mætti lengi telja.

Gamli bærinn og hinar ýmsu verslunarmiðstöðvar Rue Sainte Catherine tengjast í gegnum The Underground City sem er nokkurs konar verslunarborg undir miðborginni. Fyrir þá sem koma þangað í fyrsta sinn getur reynst allflókið að rata því ranghalarnir virðast endalausir.

Neðanjarðarborgin tengist einnig neðanjarðarlestarkerfinu og hentar vel að nota hvort tveggja yfir háveturinn þegar frosthörkur eru sem mestar og yfir sumarið þegar hitinn er hvað mestur. Þarna má labba langar leiðir milli staða án þess að koma nokkru sinni upp á yfirborðið.

Gamli bærinn í Montréal er heillandi og þar er yndislegt að labba um steinlagðar göturnar og virða fyrir sér fallegan arkitektúrinn og mannlífið. Þar er fjöldinn allur af veitingastöðum og kaffihúsum sem mörg hver skora hátt á TripAdvisor.

Fyrir austan miðbæ Montréal er hverfið Gay Village. Á hverju sumri lokast sá hluti Sainte-Catherine Street sem tilheyrir Gay Village fyrir akandi umferð og listaverkið Pink Ball eftir landslagsarkitektinn Claude Cormier er hengt yfir götuna á eins kílómetra kafla. Í ár lét hann verkið hins vegar mynda regnbogalitina í stað bleikra tóna. U.þ.b. 200 þúsund kúlur eru í verkinu. Hverfið á sér áratuga langa sögu og byrjaði fyrir alvöru að myndast um og eftir Expo 67.

Expo og manngerðar eyjar

Í Montréal er margt að skoða. Fjallið, eða kannski réttara sagt hæðin, Mont Royal sem borgin heitir eftir trónir fyrir ofan bæinn. Allmargar gönguleiðir eru á toppinn bæði á malbikuðum stígum og troðningum í gegnum skóginn. Til dæmis er hægt að hefja gönguna við Sir George Etienni Cartier-minnismerkið. Aðalútsýnisstaðurinn af hæðinni er við Chalet du Mont-Royal og þar er magnað að horfa yfir borgina.

Jacques Cartier-brúin liggur yfir á eyjuna Sainte-Hélène og þar er meðal annars skemmtigarðurinn Le Ronde. Hvers kyns tívolítæki fyrir unga sem aldna eru í garðinum og þar eru oft haldnir alls konar viðburðir og tónleikar.

Heimssýningin Expo 67 var haldin á eyjunni árið 1967 sem og á eyjunni Notre Dame sem var manngerð árið 1965 fyrir sýninguna, meðal annars úr efni frá gerð neðanjarðarlestarkerfisins. Sainte-Hélène var stækkuð af sama tilefni. The Biosphere-hvelfingin er meðal þess sem enn stendur eftir sýninguna.

Árið 1999 var eyjunum gefið sameiginlega nafnið Parc Jean-Drapeau til minningar um bogarstjórann sem hjálpaði til við að fá Expo 67 til eyjanna á sínum tíma og lét byggja neðanjarðarlestina.

haust var parísarhjól tekið í notkun á bökkum St. Lawrence-árinnar fyrir neðan gamla bæinn. Þar er ljúft að taka sér far og fá útsýni yfir ána, eyjarnar og skýjakljúfana.

Ljúffengur matur

Borgin er þekkt fyrir ríka matarmenningu og hver veitingastaðurinn á fætur öðrum býður upp á einstaklega góðan mat og framúrskarandi þjónustu. Morgunmatur er sjaldan innifalinn í hótelverði og þá er um að gera að kíkja á einn af mörgum morgunverðarstöðum borgarinnar. Eggspectation býður upp á frábært úrval og ljúffenga safa. La Finsa Coffee and Office hefur heimatilbúinn mat á boðstólum og besta kaffið að margra mati. Einnig má mæla

með Brasserie 701 sem er virkilega flottur staður rétt hjá Notra Dame-kirkjunni. Montréal er þekkt fyrir beyglurnar sínar og einn þekktasti beyglustaðurinn er líklega Fairmount Bagel.

Pítsustaðurinn Pizzeria Bros lætur lítið yfir sér en þar fást virkilega góðar pítsur sem pantaðar eru yfir afgreiðsluborð líkt og á Subway. Nokkur borð eru á staðnum til að sitja við en það er líka tilvalið að sækja þangað pítsu til að fara með upp á hótel að borða.

Einnig er óhætt að mæla með Piazza del Sogno sem er aðeins fínni pítsustaður með ekta ítölskum pítsum og ef þið viljið steikur þá býður keðjan The Keg Steakhouse upp á ljúffengar nautasteikur. Veitingastaðurinn Terrasse William Gray er staðsettur á verönd efstu hæðar samnefnds hótels og þar eru framreiddir virkilega flottir smáréttir og kokteilar. Það sem er alveg extra þægilegt við veitingastaði og kaffihús í Montréal er að þar er ekkert mál að fá sundurliðaðan reikning þegar hópur fólks er saman úti að borða og það sem meira er að þjónarnir gera það með bros á vör.

Annars er gagnlegt að fara inn á TripAdvisor og skoða umsagnir staðanna áður en haldið er af stað og oft er betra að vera búinn að panta á vinsælli stöðum.

Höfundur og ljósmyndari / Ragnhildur Aðalsteinsdóttir

Bjartur Guðmundsson býður upp á óvenjulega árangursþjálfun.

Bjartur Guðmundsson er leikari, árangursþjálfi og eigandi fyrirtækisins Optimized Performance sem hann stofnaði í febrúar 2016. Hann býður upp á óvenjulega árangursþjálfun fyrir alla sem vilja öðlast hámarksaðgengi að getu sinni og hæfileikum á hvaða sviði sem er. Bjartur byggir námskeiðin ekki síst út frá eign reynslu.

„Ég trúi því að allur árangur, óháð í hverju, sé bundinn við þrjá þætti. Í fyrsta lagi þekkingu og kunnáttu, í öðru lagi viðhorfi okkar til okkar sjálfra og þess sem við viljum ná árangri í og í þriðja lagi venjubundnu tilfinningalegu ástandi.

Af þessum þremur atriðum vegur tilfinningalegt ástand þyngst, svo viðhorf og síðan þekking og kunnátta. Þar af leiðandi gengur Optimized Performance út á tilfinninga- og viðhorfsþjálfun sem fer fram á hrikalega skemmtilegum og áhrifaríkum námkeiðum þar sem þátttakendur læra að örva taugakerfið þannig að útkoman verði það sem ég kalla topp tilfinningalegt ástand,“ segir Bjartur.

„Í þessu öfluga ástandi galopnast aðgengi taugakerfisins að hæfileikum, upplýsingum og skapandi hugsun, við tökum uppbyggilegri ákvarðanir og fylgjum þeim eftir með vandaðri athöfnum, samskiptahæfni fer upp á annað plan og kærleiksríkt sjálfstraust fer í hæstu hæðir. Þetta er alveg geggjað hreint út sagt.“

Var hræddur við höfnun

Bjartur segist hafa misstigið sig ótal sinnum og upphaf þessa ævintýris megi rekja til þess að hann hélt að hann væri búinn að meika það sem leikari stuttu eftir að hann útskrifaðist frá Listaháskóla Íslands árið 2009. „Fyrir vikið féll ég í þann fúla pitt að trúa því að nú myndu leikstjórar og framleiðendur bjóða mér hlutverk í hrönnum. Með öðrum orðum þá varð ég hrokafullur og taldi mér trú um að það væri fyrir neðan mína virðingu að sækjast af krafti eftir hlutverkum en raunverulega var ég bara skíthræddur við höfnun og að standast ekki væntingar. Ég áorkaði þó einu og það var að verða grautfúll, reiður og bitur á mettíma en sem betur fer er ég frekar jákvæður einstaklingur að upplagi og fór að leita leiða til að komast á betri stað. Það er sagt að við þurfum annaðhvort örvæntingu eða innblástur til að taka nýja stefnu í lífinu og ég var svo sannarlega örvæntingafullur á þessum tímapunkti. Innblásturinn kom svo þegar vinur minn benti mér á mannræktarfrömuðinn Anthony Robbins en ég er undir gríðarlegum áhrifum frá honum, hef marglesið allar bækur hans, farið í gegnum hljóðprógrömm og setið námskeið. Síðan þá hef ég verið mikill áhugamaður um mannrækt og jákvæða sálfræði sem svo varð til þess að ég stofnaði Optimized Performance,“ segir Bjartur.

„… Með öðrum orðum þá varð ég hrokafullur og taldi mér trú um að það væri fyrir neðan mína virðingu að sækjast af krafti eftir hlutverkum en raunverulega var ég bara skíthræddur við höfnun og að standast ekki væntingar.“

Til þessa hefur hann unnið með tæplega 80 vinnustöðum og rúmlega 3.000 einstaklingum og segir að viðbrögðin við námskeiðunum hafi verið ótrúlega góð. „Það er eitthvað við það að gefa af sér en markmiðið með þessu öllu er að miðla hugmyndafræði og aðferðum sem geta stórbætt lífsgæði fólks. Námskeiðin eru fyrir alla sem hafa áhuga á því að taka skref fram á við og eru tilbúnir að axla ábyrgð á eigin gæfu.

Það hefur verið sagt að ef við viljum betra líf þá þurfum við sjálf að verða betri í lífinu. Með því að læra hvernig hægt er að innprenta uppbyggileg viðhorf og hvernig hægt er kynda upp öflugar uppbyggilegar tilfinningar sem veita kraft, hugrekki, trú og traust þá eru okkur bókstaflega allir vegir færir. Fyrir mér eru þetta lykilatriði ef maður vill verða góður í lífinu og það magnaða er að þetta er ekki flókið og er meira að segja frekar létt ef maður skilur og kann aðferðirnar.“

Niðurrif engum til góðs

Bjartur lumar á ýmsum ráðum til fólks sem á það til að tala sig niður. „Já. Í fyrsta lagi verðum við að átta okkur á því að við gerum ekkert nema við trúum því að það muni hafa einhverjar jákvæðar afleiðingar í för með sér eða við trúum því að það forði okkur frá einhverjum neikvæðum afleiðingum. Það að tala okkur niður getur leitt til þess að annað fólk sýni okkur alúð og hlýju og þannig upplifum við ást og tengingu. Sumir trúa því að það sé bókstaflega mikilvægt að drulla yfir sjálfa sig til þess að læra af mistökum. Sjálfsniðurrif getur verið leið okkar til að finnast við vera auðmjúk, ekki hrokafull eins og allir hrokafullu fávitarnir og þannig upplifum við að við séum merkileg. Stundum notum við niðurrif til að búa til afsakanir, til að stjórna, til að forðast að gera eitthvað sem við óttumst en vitum að væri gott fyrir okkur. Við notum sjálfsniðurrif líka til að gefa okkur leyfi til að gera eitthvað sem veitir skjótfengna vellíðan en er raunverulega ekki gott fyrir okkur né aðra.

Ég veit að þetta kann að hljóma fáránlega og það er fáránlegt að við notum sjálfsniðurrif á þennan hátt en ef við gerum mikið af því, þá er það vegna þess að við höldum að það muni forða okkur frá meiri sársauka eða hreinlega veita okkur vellíðan.

Til að venja okkur af þessum ósið þurfum við að komast að því hvaða sársauka við erum að reyna að forðast og/eða hvaða vellíðan við erum að sækjast eftir. Því næst þurfum við að átta okkur á því að sjálfsniðurrif mun alltaf leiða til meiri sársauka en vellíðunar og taka ákvörðun um að það sé heimskulegt og ekki þess virði. Þetta gerum við með því að svara eftirfarandi spurningum: Hvaða sársauka mun það leiða af sér að rífa mig niður? Hvaða vellíðan mun það leiða af sér að hætta að rífa mig níður? Hvaða vellíðan mun ég upplifa ef ég tem mér að tala mig upp?

Hér er mikilvægt að koma með eins mörg svör og hægt er við hverri spurningu og svörin verða að kynda upp tilfinningar. Ef okkur tekst að gera þetta þá fer okkur virkilega að langa til að breyta hugsanamynstri okkar sem þýðir að við erum opin fyrir næsta skrefi sem er að taka eftir því þegar við dettum inn í niðurrif og gera eftirfarandi um leið: Hoppa með hendur upp í loft og íhuga þessar spurningar í tvær mínútur: Hvað gæti ég verið þakklát/ur fyrir núna ef ég vildi virkilega vera þakklát/ur? Hvað gæti mér líkað vel við í eigin fari ef ég virkilega vildi? Hverju gæti ég verið stolt/ur af við sjálfa/n mig ef ég virkilega vildi? Líkamsbeiting hefur stórkostleg áhrif á líðan okkar og það eitt að hoppa með hendur upp í loft í tvær mínútur kemur okkur í betra andlegt ástand þar sem er auðveldara að tala sig upp. Það sama gildir með spurningarnar en með því að einbeita okkur að þeim og svara í tvær mínútur getum við kynt upp sterkar uppbyggilegar tilfinningar. Með því að hoppa og svara spurningunum getum við keyrt okkur upp í frábært tilfinningalegt ástand á aðeins tveimur mínútum og tamið okkur uppbyggilegri viðhorf gagnvart sjálfum okkur. Ég hvet alla til að prófa þetta,“ segir Bjartur brosandi.

„Æfingin hér að ofan er frábær til að komast í gott tilfinningalegt ástand en almennt er það þrennt sem ber að hafa í huga. Að beita líkamanum og röddinni eins og þegar okkur líður vel, hugleiða uppbyggilegar spurningar og nota orðalag sem er uppbyggilegt.“

Og það er margt skemmtilegt fram undan hjá Bjarti. „Ég er á fullu að bóka námskeið með hinum ýmsu fyrirtækjum fyrir veturinn en ég bendi áhugasömum á að senda mér bara tölvupóst á [email protected] eða fara á www.optimized.is og kynna sér málið betur. Svo er ég svo brattur að lofa því að ef þér líkar ekki námskeiðið þá færðu það endurgreitt að fullu,“ segir hann sposkur að lokum.

Texti / Ragnhildur Aðalssteinsdóttir
Myndir / Hákon Davíð Björnsson

Anna Bryndís Skúladóttir á margar uppáhaldsgönguleiðir á Austurlandi.

„Ég er fædd og uppaldin á Borgarfirði eystra en bjó á Egilsstöðum í um 30 ár,“ segir Anna Bryndís eða Bryndís eins og hún er kölluð. „Ég er mikill náttúruunnandi og fjallageit og hef notið ríkulega þess mikla fjölbreytileika sem Borgarfjörður og Fljótsdalshérað bjóða upp á til náttúruskoðunar og gönguferða. Borgarfjörður er þekktur fyrir sinn formfagra og litskrúðuga fjallahring og er þar meðal annars að finna annað stærsta líparítsvæði landsins. Víkurnar sunnan Borgarfjarðar eru löngu orðið þekkt göngusvæði með mikla sögu og merka jarðfræði. Fljótsdalshérað er hins vegar víðfeðmasta sveitarfélag landsins með gríðarlegan fjölbreytileika í landslagi. Fjölbreytileiki flóru, gróðurs og dýralífs er að sama skapi mikill og má þar nefna heimahaga hreindýra við Snæfell og varpland heiðagæsa á Eyjabökkum sem er fögur gróðurvin á hálendinu austan Snæfells.“

Fyrir sjö árum stofnuðu nokkrar fjallageitur Fjallgönguklúbbinn Fjallhress og síðan þá hafa meðlimir hans gengið á eitt alvörufjall í mánuði, farið í ótal léttari göngur en einnig krefjandi ferðir utan fjórðungs. „Vetrargöngur á fjöll eru ekki síðri að fegurð en á sumrin og er birtan oft ómótstæðileg á þessum tíma. Austurland er algjör fjallgönguparadís og sækjum við heim fjöll til okkar góðu nágranna um allt Austurland. Á fimm árum hafa Fjallhressir gengið á yfir sextíu 1000 m háa tinda og er hæðartala samtals orðin um 36.000 m. Wildboys.is skipuleggja, reka og sjá um leiðsögn Fjallhressra.

Dyrfjöll – Súla (1136 m)

Krefjandi ganga, óstikuð. Gengið frá Brandsbalarétt upp fagran Jökuldalinn sem er mikil hvilft austan Dyrfjalla og einkennist af þursabergi af öllum stærðum og gerðum og áin bugðast fagurlega um slétta grasbala. Ævintýralegt er að nálgast síðan þverhnípt klettastál Dyrfjalla þar sem gengið er inn á jökulfönn við rætur þess. Gengið er inn á blómi skrýdda rák í fjallinu þar sem fara þarf með gát við gjá sem oft er milli jökuls og klettastáls. Fjallið er bratt en stórfenglegt útsýni í stórbrotnu landslagi. Gönguvegalengd er 18 km. Mæli með leiðsögumanni.

Fljótsdalur – Laugarfell á Fljótsdalshéraði

Mjög falleg stikuð gönguleið frá Kleif í Norðurdal í Fljótsdal upp í Laugafell um 12 km leið. Gengið er upp með Jökulsánni sem er þekkt fyrir marga fagra fossa, stóra sem smáa. Gengið er um þéttvaxinn Kleifarskóg og skal varast að láta villt jarðarber sem mikið er af ginna sig um of, því skógurinn er þéttur á köflum og mikilvægt að hópurinn haldi saman. Í Laugafelli er myndarlegt hostel með veitingasölu og dásamlegum náttúrulaugum. Góður vegur er úr Fljótsdal í Laugafell til að komast til baka. Einnig er hægt að ganga frá Kleif allt að Eyjabakkafossi, 20 km leið, og láta sækja sig þangað.

Skælingur (832 m) á Borgarfirði eystra

Skælingur er skemmtilegt göngufjall með stórkostlegu útsýni yfir Loðmundarfjörð, Seyðisfjörð og til Víkur en einnig er einstaklega fallegt útsýni á hinn fagra Hvítserk. Skælingur er stundum kallaður Kínverska musterið vegna einstæðrar lögunar sinnar. Gengið er á fjallið frá akveginum upp á Neshálsi milli Húsavíkur og Loðmundarfjarðar eftir ómerktri leið á tindinn og ágætt er að ganga upp innarlega á fjallinu, vestarlega. Leiðin er brött en stutt þar sem byrjað er í mikilli hæð.

Snæfell (1833 m) á Fljótsdalshéraði

Auðvitað valdi ég Snæfell ,,konung íslenskra fjalla“ á uppáhaldslistann en fjallið er hæsta fjall landsins utan jökla og liggur skammt norðan Vatnajökuls. Fjallið er innan Vatnajökulsþjóðgarðs og er stikuð leið skammt frá Snæfellsskála á fjallið úr suðvestri allt að jökli, gott er að fá upplýsingar hjá landverði um leiðina. Ráðlegt að hafa göngustafi og keðjubrodda meðferðis. Í góðu skyggni er mikið og gríðarfallegt útsýni af fjallinu meðal annars yfir Eyjabakka. Úrval gönguleiða er í nágrenni Snæfells og tilvalið að dvelja á svæðinu nokkra daga og ganga, má nefna Þjófadali, hring um Snæfell og Vatnsdal.

Stórurð á Fljótsdalshéraði

Fáséð furðuveröld sem enginn ætti að láta fram hjá sér fara. Þar ægir saman þursabergsbjörgum á stærð við blokkir innan um sléttar grundir og túrkisbláar tjarnir. Dyrfjöll gnæfa yfir í botni dalsins og flikruberg skreytir fjallshlíðar. Hægt er að velja um nokkrar stikaðar gönguleiðir til og frá Stórurð og tilvalið að velja aðra leið til baka en komið var, algengustu leiðir eru um 15 km samtals en einnig er hægt að velja lengri leiðir sem liggja til Borgarfjarðar. Mæli ég þó með upphafi göngu af bílastæði á Vatnsskarði þar sem aðkoman að Stórurð er skemmtilegust og fólk grípur andann á lofti af hrifningu.

Þerribjörg á Fljótsdalshéraði

Nokkuð krefjandi ganga. Ekið frá Hellisheiði eystri og þaðan eftir vegslóða (ekki fólksbílar) að Kattárdalsdrögum, bílum lagt þar við skilti. Stikað er frá skiltinu fram á brún beint ofan við Múlahöfn. Kindagata er frá brún niður um 400 m brattan skriðuhrygg. Frá Múlahöfn er gengið í norður, þar blasir við Þerribjarg og Langisandur. Einstök náttúruperla þar sem fögur og afar litskrúðug líparítbjörg með dökkum berggöngum skreyta svæðið. Leiðin er ekki fyrir lofthrædda og mæli ég með leiðsögumanni.

Höfundur / Ragnhildur Aðalsteinsdóttir
Myndir / www.pixabay.com

Það er ástæðulaust að hætta líkamsrækt í desember þótt mikið sé að gera.

Í desember hætta margir að mæta í ræktina og bera oftar en ekki fyrir sig tímaleysi. Það er þó engin ástæða til þess að hætta alveg að stunda líkamsrækt því það er lítið mál að koma stuttum sprettum inn í daglegt líf og þeir geta gert gæfumuninn. Hér eru nokkrar góðar uppástungur og hugmyndir.

Alhliða hreyfing og tannheilsa

Sestu upp við vegg þannig að fótleggirnir myndi níutíu gráðu horn og hnén séu beint upp frá tám. Haltu þessari stöðu á meðan þú burstar tennurnar eða eins lengi og þú getur en með tímanum lengist sá tími sem þú getur haldið stöðunni. Styrktaræfingar sem þessar eru góðar því þær reyna svo til ekkert á liði og styrkja marga vöðva í einu.

Bless, bingó

Skiptu kerru út fyrir tvær körfur, eina í hvorri hönd. Eftir því sem þú verslar meira því meira reynir þú á axlir, herðar, bak-, brjóst- og handleggsvöðva. Þessi aðferð getur líka haft góð áhrif á fjárhaginn því þú ert mun ólíklegri til að kaupa óþarfa hluti ef þú veist að þú þarft að bera þá út um alla búð.

Beðið eftir hraðsuðukatlinum

Hvort sem þú ert kaffi- eða tedrykkjumanneskja þá getur þú nýtt tímann á meðan þú bíður eftir bollanum. Á þeim tíma sem það tekur meðalhraðsuðuketil að sjóða vatn getur þú brennt allt að fjörutíu hitaeiningar með eftirfarandi æfingum: gerðu tíu stjörnuhopp og tíu armbeygjur upp frá vinnuborði eldhússins, gerðu síðan átta stjörnuhopp og átta armbeygjur og haltu áfram þar til þú nærð núlli.

Sterkir leggir fyrir morgunmat

Gerðu til skiptis tíu framstig og tíu hnébeygjur á meðan þú ristar þér brauðsneið eða eldar hafragraut á morgnana. Farðu djúpt og hægt í hverja æfingu og spenntu rassvöðvana þegar þú stendur upp. Til að gera æfinguna enn erfiðari getur þú haldið á þungum hlutum sem finnast í eldhúsinu, til dæmis tveggja lítra gosflösku, á meðan.

Bætt líkamsstaða í vinnunni

Húkir þú fram á skrifborðið í vinnunni? Það er lítið mál að leiðrétta það. Í hvert skipti sem þú sendir tölvupóst eða síminn þinn hringir, lyftu þá öxlum upp að eyrum og rúllaðu þeim aftur á bak. Ímyndaðu þér að þú sért með sítrónu milli herðablaðanna og þú sért að reyna að kreista hana. Þessi æfing opnar brjóstkassann og réttir úr hryggnum.

Sterkt bak í upphafi dags

Stattu upprétt með krosslagðar hendur og jafnt í báðar fætur. Rúllaðu efri hluta baksins frá vinstri til hægri án þess að hreyfa mjaðmir né mjóbak og leyfðu höfðinu að fylgja með. Þessi æfing getur fyrirbyggt bakverk og þeir sem sinna kyrrsetustarfi ættu að gera hana reglulega yfir daginn.

Bættu hreyfingu við húsverkin

Gerðu hnébeygjur í stað þess að beygja þig í baki þegar þú tekur úr þvottavélinni. Í staðinn fyrir að ganga einfaldlega um gólf á meðan þú ryksugar þá getur þú gert framstig. Styrktu kálfa með því að standa á tám og færa hælana upp og niður á meðan þú vaskar upp. Möguleikarnir eru óendanlegir, þú þarft bara að hugsa út fyrir kassann.

Stinnur rass í sturtu

Lyftu öðrum fætinum upp í níutíu gráðu beygju þannig að hnéð er í beinni línu út frá mjöðm. Haltu þessari stöðu eins lengi og þú getur, til dæmis á meðan þú þværð á þér hárið, og skiptu síðan um fót. Æfingin reynir á rassvöðva og vöðvana aftan á lærum. Gættu þess að sturtubotninn sé ekki of sleipur því þá gætir þú runnið til.

Texti / Hildur Friðriksdóttir
Myndir / www.pixabay.com

Gjafir sem innihalda ást og hlátur hitta alltaf í mark hjá yngstu kynslóðinni.

Allir krakkar elska að fá pakka. Þeir geta komið í öllum stærðum og gerðum en þær gjafir sem hitta alltaf í mark innihalda ást og hlátur. Þessar gjafir segja hvað skýrast: „Ég var að hugsa um þig“. Kostnaðurinn er enginn enda eru dýrustu gjafirnar eru ekki þær bestu.

Öll börn þrá að eiga einkastund með foreldrum sínum. Barnið upplifir sig einstakara við það eitt að fá tíma þegar aðeins það á hug og hjörtu foreldra sinna.  Það er jafnframt mikilvægt fyrir foreldrana að eiga gæðastund með barninu sínu.

Þegar tímaleysið er algjört er snjallt að gera eldamennskuna að skemmtilegu stefnumóti barns og foreldris. Búðarferðin getur líka orðið að æsispennandi rannsóknarleiðangri og bílaþvottastöðin reynst sannkallaður ævintýraheimur með réttu hugarfari.  Því er mikilvægt að bregða reglulega út af vananum, fara jafnvel lengri leiðina og finna það áhugaverða í hversdagslegum viðkomustöðum.

Þegar kemur að stefnumóti er gott ráð að leyfa barninu að velja hvað það vill gera. Oft eru það einföldustu og ódýrustu lausnirnar sem það leitar að. Þegar barnið fær tækifæri til þess að velja verður skipulagningin mun meira spennandi og barninu finnst það vera við stjórn.

Börn elska að hjálpa og hafa hlutverk. Þvottakarfan getur til að mynda reynst hin besta skemmtun þegar barnið fær að taka þátt og sortera sokkana. Vissulega er oft fljótlegra að þjóta einn í búðina eða henda tilbúnum rétti í ofninn en með því að virkja þátttöku barnanna og leyfa þeim að gera hlutina á sínum hraða söfnum við dýrmætum augnablikum í minningabankann sem verða aldrei metin til fjár.
Að fara á stefnumót með foreldrinu í bakaríið getur sem dæmi orðið uppspretta yndislegra minninga síðar meir.

Foreldrasamviskubitinu sagt stríð á hendur

Stefnumótið þarf ekki að vera þaulskipulagt því lausnin liggur oft í því að skapa augnablik í hversdagsleikanum. Með þessum hætti má kría út nokkrar dýrmætar mínútur í daglegri rútínu og forðast um leið hið alræmda foreldrasamviskubit. Samverustundir sem oft eru af svo skornum skammti aukast í kjölfarið og upp spretta nýjar hugmyndir af skemmtilegri afþreyingu með barninu.

Þegar kemur að skipulögðu stefnumóti er gott ráð að leyfa barninu að velja hvað það vill gera. Oft eru það einföldustu og ódýrustu lausnirnar sem það leitar að. Þegar barnið fær tækifæri til þess að velja verður skipulagningin mun meira spennandi og barninu finnst það vera við stjórn.

Að kasta steinum í læk eða safna laufblöðum getur verið hin mesta skemmtun. Tína köngla og mála síðan heima, eða fara í fjársjóðsleit í skóginum. Rannsóknarleiðangur um hverfið eða heimsókn á skólalóðina fyrir tilvonandi nemendur. Meira að segja kanilsnúðabakstur getur vakið upp mikla kátínu eða barn sem fær að telja kartöflur ofan í kvöldverðarpottinn. Kostnaðarhliðin þarf því ekki að vefjast fyrir fjársveltum foreldrum og enn síður fyrirhöfnin. Einföldustu atriði geta vakið stórkostlega kæti hjá börnum.

Ekki vanmeta útiveruna, það er flest auðveldara að vera úti, hvort sem það er gönguferð, hjólaferð eða könnunarleiðangur. Ferska loftið gerir öllum gott. Tímaramminn er síðan annað mál. Margir foreldar bera fyrir sig tímaleysi og áætla að til þess að stefnumótið eigi að bera tilætlaðan árangur verði það að vera langt. Viðveran mun kannski taka nokkrar klukkustundir en barnið mun muna eftir því og tala um það í langan tíma á eftir. Eins ber að hafa í huga að gleðirammi barna er ákveðið langur og auðvelt fyrir foreldra að mikla hluti óþarflega fyrir sér.

Nokkrar hugmyndir af einkatíma barns

Leyfðu barninu að velja hvað er í matinn og hvar þið borðið hann, hvort sem það er heima eða á veitingastaðnum. Sjálfstraust barna eykst með því að fá að stjórna.

Ef þú ert foreldri hefurðu sjálfsagt heyrt setninguna sjáðu mig oftar en einu sinni. Gefðu barninu athyglina – leyfðu því að vera í sviðsljósinu.

Eftir kvöldbaðið er ómetanleg stund að barnið velji sér bók til að lesa. Þannig sameinast það foreldri sínu í dagsins lok sem reynist oftar en ekki besta stund hans fyrir innileg samtöl.

Fyrir suma eru morgnarnir besti tíminn sem foreldrið getur átt með börnum sínum en fyrir aðra eru kvöldin þeirra tími. Nýtið tímann og styrkleika barnanna til fulls.

Setið upp skipulagt stefnumót með hverju barni fyrir sig.

Súperkvöld er önnur hugmynd að skemmtilegri tilbreytingu fyrir barnafólk en það eru kvöld sem börnin ráða ferðinni í einu og öllu.

Höfundur / Íris Hauksdóttir
Myndir / www.pixabay.com

Fanney Vigfúsdóttir segir frá skemmtilegum stöðum í Kaupmannahöfn.

Fanney Vigfúsdóttir var í námi í heimilislækninugm í Kaupmannahöfn og þekkir borgina og svæðið í kring vel. Við fengum hana til að segja okkur frá nokkrum stöðum sem hún mælir með að fólk skoði þegar það fer til borgarinnar.

„Það var á allan hátt lærdómsríkt að búa í Kaupmannahöfn. Borgin er falleg með ógrynni af möguleikum til að upplifa eitthvað við allra hæfi. Hægt er að hjóla mest allt sem farið er innanbæjar og svo eru góðar almenningssamgöngur ef maður vill kíkja fyrir utan borgarmörkin. Það er mikið af almenningsgörðum sem er gaman að labba um og skoða eða að hittast í með vinum og grilla og hafa það huggulegt,“ segir Fanney.

Jónshús

Það ætti að vera skylda fyrir Íslendinga sem koma til Kaupmannahafnar að koma í Jónshús. Að labba frá Nørreport, fram hjá Kongens Have, jafnvel fara dálítinn krók og labba í gegnum garðinn, dást að Rosenborg-kastalanum og Statens Museum for Kunst á leiðinni og svo sjá þetta fallega hornhús á Øster Voldgade 12 (á milli Østerport og Nørreport). Í þessu húsi bjó Jón Sigurðsson með konu sinni og barðist fyrir sjálfstæði Íslendinga og seinna keypti íslenskur kaupmaður það og gaf íslenska ríkinu sem á það enn. Þarna er mjög áhugavert og flott safn um Jón Sigurðsson og einnig er þetta félagsheimili með allskonar starfsemi fyrir Íslendinga í Kaupmannahöfn.

Skt. Hans Torv á Nørrebro

Þetta huggulega torg hefur alltaf verið í uppáhaldi. Þar er hægt að setjast niður og njóta veitinga og drykkja eða fá sér ís. Margt áhugavert er hægt að skoða í öllum áttum frá torginu. Hægt er að labba niður að síkjunum og kíkja í second hand-verslanir á leiðinni eða í gegnum Elmegade þar sem eru margar litlar búðir. Á Nörrebrogade er ekta fjölbreytileiki með fólki alls staðar að úr heiminum og í Assistants Kirkegård getur maður séð fólk í sólbaði milli legsteinanna ásamt því að dást að þessum fallega kyrrláta garði í miðri borgarösinni.

Frederiksborg Slot í Hillerød

Það er virkilega þess virði að taka lestina út úr bænum og fara til Hillerød. Þar er hugguleg göngugata og við enda hennar Frederiksborg Slot sem er yndislega fallegur kastali með enn þá fallegri hallargarði. Manni líður eins og maður sé kominn í ævintýri, algjörlega magnað.

Stevns Klint í Højerup

Ég gæti ekki mælt nóg með að taka allavega einn dag í að fara og skoða Stevns sem er svæði á litlum skaga um það bil 40 mínútum suður frá Kaupmannahöfn. Það er auðveldast að vera á bíl, en það eru líka einhverjar almenningssamgöngur og einnig eru hjólastígar um allt. Ef ég hefði bara einn dag myndi ég byrja að keyra til Højerup að Stevns Klint en þar er kirkja sem stendur á bjargbrún. Hluti kirkjunnar er dottinn í hafið en maður getur farið inn í kirkjuna og út á svalir þar sem maður horfir beint niður í grýtta fjöruna. Útsýnið er magnað og hægt er að labba niður brattan langan stiga niður í fjöruna, þetta er algjörlega einn fallegasti staður í Danmörku. Þaðan myndi ég svo kíkja í Holtug Kridtbrud, labba þangað niður og skoða salamöndrutjarnirnar, litlar tjarnir sem eru fullar af litlum salamöndrum og svo eru litlar eðlur líka allt um kring. Á leiðinni myndi ég keyra upp að Vallø Slot, litlum kastala sem er búið að breyta í íbúðir, með fallegum hallargarði og litlum hallarbæ með flottum veitingastað, á þessum leiðum eru falleg engi og skógsvæði sem maður getur alveg gleymt sér við að skoða. Ég verð að mæla með að koma við á einhverjum af þeim mörgu sveitabæjum sem selja ávexti/grænmeti og annað ræktað á búinu, brakandi ferskt og gott.

Aðalmynd: Stevns Klint í Højerup.

Texti / Ragnhildur Aðalsteinsdóttir

Matur kemur oftar en ekki við sögu í jólamyndum.

Góðverk á jólunum

Little Women er ein af þessum klassísku jólamyndum sem sumir kjósa að horfa á á hverju ári. Myndin segir frá systrunum Jo, Meg, Beth og Amy ásamt móður þeirra en faðir þeirra er fjarverandi að berjast í borgarastyrjöldinni í Bandaríkjunum. Þetta er náin og samheldin fjölskylda sem þó þarf að glíma við erfiðleika, eins og aðrar fjölskyldur. Eitt hjartnæmasta atriði myndarinnar er þegar konurnar ákveða að gefa allan hátíðarmatinn sem þær hafa safnað fyrir í marga mánuði og búið er að matreiða eftir kúnstarinnar reglum. Nágrannar þeirra voru nefnilega hjálparþurfi. Það reynist þeim erfitt að pakka saman öllu veisluborðinu án þess að hafa svo mikið sem snert við matnum en viðbrögð nágranna þeirra við þessari gjöf gerir það þess virði.

Fjölskyldudrama

Í Family Stone (aðalmynd) fylgjumst við með hrakfarajólum Stone-fjölskyldunnar. Elsti sonurinn, Everett, hefur boðið kærustu sinni, Meredith, heim um jólin með það fyrir augum að biðja hennar yfir hátíðarnar með glæsilegum hring. Hún fær miður góðar móttökur og ákveður í örvæntingu að bjóða systur sinni að koma til að dreifa athyglinni. Allt gengur á afturfótunum og Meredith er svo stíf að allt sem hún segir kemur út á versta mögulega veg og móðgar meirihlutann af fjölskyldunni. Á jóladag biður Everett móður sína um hringinn sem er erfðargripur en hún neitar honum upphaflega um hann. Þegar henni snýst síðan hugur eru farnar að renna tvær grímur á Everett og hann er ekki viss hvort hann vilji enn þá giftast Meredith.

Óætur kalkúnn

Clark Wilhelm Griswold langar að halda hin fullkomnu Griswold-fjölskyldujól. Eftir margra mánaða undirbúning býður hann bæði foreldrum sínum og tengdaforeldrum og einnig Louis, frænda sínum, og elliærri frænku sinni, Bethany. Honum að óvörum mætir líka groddalegi frændi konu hans, Eddie, ásamt allri fjölskyldu sinni í húsbílnum sínum. Clark er búinn að skreyta húsið með meira en 20.000 ljósaperum og ná í risastórt jólatré sem passar eiginlega ekki inn í stofuna. Þegar þau eru loks sest við borðstofuborðið, búin að fara með borðbæn og ætla að gæða sér á kræsingum þá er kalkúnninn ekki eins og hann átti að vera. Um leið og Clark sker í fuglinn þá svo gott sem springur hann, með tilheyrandi búkhljóði, því hann er algjörlega orðinn að engu að innan.

Pítsuveisla í limmósínu

Í Home Alone 2: Lost in New York er Kevin McCallister mættur aftur. Í þetta skiptið fer hann óvart í aðra flugvél en fjölskylda sín og endar í New York-borg, í stað Flórída. Hann er ekki lengi að gera borgina að leikvelli sínum, enda með nóg af peningum og kreditkortum. Eitt minnisstætt atriði er þegar Kevin keyrir um borgina í limmósínu og hámar í sig ostapítsu á meðan, mjög grand á því. Kevin er ekki einn lengi því hinir illræmdu bjánabófar, Harry og Marv, enn þá í sárum eftir síðustu viðskipti sín við Kevin, eru líka mættir á svæðið og ætla núna að fremja rán aldarinnar.

Höfundur / Hildur Friðriksdóttir

Í desember gæti verið sniðugt að „detoxa“ eða „pretoxa“ áður en jólahátíðin skellur á.

Desember er annasamasti mánuður ársins hjá flestum. Við þurfum ekki aðeins að versla jólagjafir, þrífa heimilið, skrifa jólakort, skreyta og guð má vita hvað heldur er okkur einnig boðið í alls konar aðventuboð á vinnustöðum, til ættingja og vina. Síðan skellur jólahátíðin á og það er sama upp á teningnum þá. Þannig að mánuðurinn einkennist af áti, drykkju, streitu og svefnleysi. Við höfum oft heyrt talað um detox, eða hreinsun, eftir þetta sukktímabil en einnig er gáfulegt að huga að nokkurs konar „pretoxi“, það er andlegum og líkamlegum undirbúningi, og hér eru nokkur góð ráð.

Matur

Hangikjöt, skata, villibráð, grafinn lax og svo mætti lengi telja. Þótt hátíðarmatur sé vissulega gómsætur er hann einnig þungur í maga og oftar en ekki fremur saltur. Án þess að þú gerir þér fulla grein fyrir því þá getur hann farið að hafa áhrif á heilsu þína.

Þú getur lítið stjórnað hvað er á boðstólum í þeim veislum og partíum sem þú ferð í. Þess vegna er enn mikilvægara að passa upp á að ísskápurinn þinn sé að minnsta kosti vel birgur af alls kyns ferskum mat, eins og grænmeti. Þau fáu kvöld sem þú ert heima hjá þér í aðdraganda jólanna ættir þú að reyna að fá þér salat eða annan léttan mat. Þú munt sofa betur og almennt líða betur þegar þú vaknar daginn eftir.
Takmarkaðu nammiátið við nokkra daga því of mikill sykur getur valdið ójöfnu orkustigi, þannig að þú ert annað hvort alltof þreytt eða of ör.

Drykkur

Áfengi er oftar en ekki haft um hönd í kringum hátíðarnar og þá kannski í meira mæli en gengur og gerist aðra mánuði ársins. Það er mikilvægt að reyna að gæta hófs og jafnframt vanda valið. Reyndu að drekka sem minnst af sykruðum drykkjum og drekktu alltaf eitt vatnsglas á móti hverjum drykk svo þú verðir ekki fyrir vökvatapi.

Hátíðarmatur er eins og áður sagði fremur saltur og reyktur sem þýðir að okkur hættir til að binda meira vatn í líkamanum. Þannig að þegar þú hættir einn morgun að passa í buxurnar þínar þá er það ekki endilega vegna þess að þú sért búin að fitna heldur getur það einfaldlega verið bjúgur. Því er gott að venja sig á að drekka nóg af vatni og fá sér vatnslosandi drykk, eins og sítrónuvatn, á morgnana.
Eins og áður sagði er maturinn í þessum mánuði ekki mjög fjölbreyttur. Til að auka vítamín- og steinefnaneyslu þína er gott að fá sér „smoothie“ á morgnana með nóg af ferskum eða frosnum ávöxtum, kókosvatni, chia-fræjum, avókadó og spínati eða grænkáli. Þannig færðu góðan kraft og næringu fyrir daginn og þú getur tjúttað fram eftir nóttu ef þannig liggur á þér.

Reyndu líka eftir bestu getu að skipta kaffinu út fyrir te því það hefur alla jafna mun meira magn andoxunarefna ásamt því að innihalda jurtir sem geta hjálpað til við að jafna meltingu, styrkja ónæmiskerfið, gefa orku og einbeitningu og svo framvegis.

Hvíld

Það er alveg bókað mál að þú færð ekki nægan svefn í desember, hvort sem þú ert að djamma á jólahlaðborðum eða sveitt að versla jólagjafir á miðnæturopnun í verslunum. Þess vegna verður að grípa gæsina þegar hún gefst og fara snemma að sofa og tryggja gæði svefnsins. Skiptu reglulega um á rúminu, því fátt hjálpar manni að sofna eins og tandurhrein og ilmandi sængurföt. Það þekkja flestir að lavender er mjög róandi og því er sniðugt að blanda nokkrum dropum af lavander-ilmolíu við vatn og spreyja létt yfir koddann.

Einnig er gott að drekka róandi te á kvöldin til að tryggja að maður sofni snemma. Það er hægt að fá ýmsar gerðir af tei í verslunum og mikilvægast er að það sé koffínlaust en síðan eru ýmsar jurtir sem eru svefnaukandi, eins og kamilla, eða garðabrúða.

Hættu líka í símanum og spjaldtölvunni allavega klukkutíma áður en þú ætlar upp í rúm því bláa ljósið sem slík tæki gefa frá sér hamla melatónínframleiðslu svo það tekur þig lengri tíma að sofna.

Texti / Hildur Friðriksdóttir
Myndir / www.pixabay.com

Með einföldum ráðum er hægt að bæta ásýnd baðherbergja.

Baðherbergi eru oft þau rými sem fá hvað minnstar endurbætur innan heimilisins. Flestir eru þó sammála um að vilja hafa baðherbergin hrein og snyrtileg en stærðarinnar vegna getur reynst erfitt að koma skipulagi á handklæði, sturtusápur og baðdót barnanna. Það er þó heilmikið sem hægt er að bæta með einföldum ráðum sem þurfa hvorki að kosta mikið né krefjast mikilla framkvæmda.

Á flestum heimilum eru baðherbergin í smærra lagi og því rúmast takmarkað magn húsgagna þar inni. Því eru það smáhlutirnir sem skapa rétta andrúmsloftið enda dvelja flestir góðan part af deginum inni á baðherberginu.

Falleg handklæði fleyta baðherberginu langt, hvort sem þeim er rúllað upp í opinni hillu eða látin hanga á vegg.

Sturtuhengi geta gert ótrúlega mikið fyrir stílhrein baðherbergi og skapað réttu stemninguna hvort sem hún er suðræn eða skræpótt, einföld eða með prenti.

Margir geyma körfur fyrir óhreinan þvott á baðherbergjum sínum og geta þau vissulega stungið í stúf. Það þarf þó ekki að vera flókið að finna smekklegar körfur á góðu verði sem gera mikið fyrir heildarrýmið.

Kerti eru ómissandi þegar kemur að því að skapa þægilegt andrúmsloft innan baðherbergisins. Hvort sem um er að ræða fallegt ilmkerti við vaskinn eða við freyðibaðið.

Sápan setur svo svip sinn á baðherbergið, hvort sem um er að ræða handsápu, sturtusápu eða baðsöltin. Það er auðvelt að týna sér í úrvali á öllum þeim gæðahúðvörum sem framleiddar eru og því kjörið að skipta oft út og skapa þannig fjölbreytta stemningu innan baðherbergisins. Eins er hægt að kaupa fjölnota og fallegar sápupumpur og fylla reglulega á.

Kerti eru ómissandi þegar kemur að því að skapa þægilegt andrúmsloft innan baðherbergisins. Hvort sem um er að ræða fallegt ilmkerti við vaskinn eða við freyðibaðið.

Lítill kollur eða hliðarborð fyrir handklæði eða húðvörur getur sömuleiðis komið sér vel. Kollinn má nýta undir tölvuna fyrir þá sem vilja horfa á bíómynd í baði.

Fyrir yngstu baðdýrkendurna er um að gera að verða sér úti um baðleikföng og hirslur undir baðdótið.

Sérstakir baðlitir og slím færa svo sannarlega fjör í baðið sem og segulstafir sem hægt er að líma á vegginn meðan á baðferðinni stendur.

Þá geta plöntur færa líf í litlaust rými en þær skapa jafnframt hlýju og notalegheit.

Höfundur / Íris Hauksdóttir
Myndir / www.pexels.com

Kolbrún Baldursdóttir sálfræðingur heldur fyrirlestra og námskeið um einelti fyrir fólk á öllum aldri.

Kolbrún Baldursdóttir hefur starfað sem sálfræðingur í 25 ár. Hún rekur eigin sálfræðistofu ásamt því að vera í hlutastarfi á heilsugæslu og sinna sálfræðiþjónustu fyrir hælisleitendur. Hún heldur einnig fyrirlestra og námskeið um einelti fyrir fólk á öllum aldri og ekki síst foreldra bæði fórnarlamba og gerenda. Við fengum hana til að gefa okkur innsýn í viðfangsefnið.

„Snemma á ferli mínum tóku eineltismálin hug minn,“ segir Kolbrún. „Mér fannst alltaf svo innilega sárt að hitta einstaklinga, börn og fullorðna sem voru niðurbrotin vegna þess að einhver einn eða fleiri höfðu verið að níðast á þeim leynt og ljóst. Skaðsemi langvinns eineltis getur verið mannskemmandi og dæmi eru um að andleg líðan þolanda er rústir einar eftir einelti. Afleiðingar lifa stundum með manneskjunni alla ævi þótt margir finni leið með eða án aðstoðar til að milda og lifa með sársaukanum, brotinni sjálfsmynd og viðloðandi höfnunartilfinningu. Þeir sem koma úr erfiðum uppeldisaðstæðum, eiga erfitt félagslega eða glíma við annan vanda fyrir ná sér jafnvel ekki á strik eftir að einelti hefur bæst við. Þá er eins og mælirinn fyllist endanlega. Dæmi eru um að fólk verði öryrkjar og einstaka sjá enga vonarglætu og hafa svipt sig lífi.

Mér hefur alltaf fundist að við, einstaklingar, hópar og samfélagið allt, ættum að geta gert eitthvað verulega raunhæft í þessum málum, ekki bara til skemmri tíma heldur til framtíðar. Eineltishegðun mun koma upp endrum og sinnum en með skilvirkum forvörnum, virkri viðbragðsáætlun og faglegri vinnslu mála sem koma upp getur verulega dregið úr eineltistilburðum og ef mál kemur upp skiptir öllu að gripið sé strax inn í og einelti stoppað nánast í fæðingu.“

Kolbrún hefur skrifað fjölda greina og pistla um hugmyndir í þessu sambandi ásamt því að þekkja málið af eigin raun. „Ég hef komið að vinnslu þessara mála í mörg ár bæði í málum þar sem aðilar eru börn, unglingar og fullorðið fólk. Ég held að ég hefði aldrei getað rætt af neinu alvöru öryggi um þessi mál nema af því að ég hef sjálf fengið að snerta á þeim með beinum hætti. Með hverju máli sem ég hef komið að sem sálfræðingur hef ég sjálf lært eitthvað nýtt og þróað þannig hugmyndafræðina og betrumbætt verklagið.“

Breytt viðhorf og úrlausnir

Auk fræðslufyrirlestra og greinaskrifa var Kolbrún með sálfræðiþætti, Í nærveru sálar, á ÍNN meðal annars um eineltismál. „Það var um það leyti sem Skólavefurinn bað mig að skrifa leiðbeiningabók um einelti. Bókin EKKI MEIR kom út 2012 og strax í kjölfarið fór ég í samstarf við Æskulýðsvettvanginn og nokkur sveitarfélög og fékk enn frekari tækifæri til að fara um allt land og miðla því hvernig fyrirbyggjandi vinna gæti litið út með viðbragðsáætlun, tilkynningareyðublaði, verkferlum og verklagi. Þessum hugmyndum mínum um forvarnir og úrvinnslu eineltismála var hvarvetna vel tekið. Margir tóku þessar leiðbeiningar upp strax í kjölfarið og tileinkuðu sér verkfæri sem mér fannst hafa gagnast mér í þessum málum. Það gaf mér enn meiri kraft til að halda áfram þessu verkefni. EKKI MEIR ævintýrið er enn í gangi og lifir góðu lífi og ég mun sinna þeirri fræðslu áfram næstu árin.“

Kolbrún segir að samfélagið viðurkenni nú einelti og skaðsemi þess sé flestum orðin kunn. Einnig sé nánast horfið að fólk fullyrði að einelti sé ekki til á þeirra vinnustað eða skóla. „Allt hefur gerst með meiri hraða eftir tilkomu samfélagsmiðlanna. Nú tjáir sig hver sem vill um sína reynslu til dæmis á Facebook og viðbrögðin láta ekki á sér standa. Samfélagsmiðlar koma málum sannarlega hratt upp á borð. Eðli þessara mála er svipað í dag og áður að mörgu leyti nema við hefur bæst neteinelti með tilkomu Netsins og samfélagsmiðlanna. Þau mál eru afar erfið vegna þess að netníð eða myndir sem ætlað er að skaða og meiða breiðast út af ógnarhraða svo engin bönd ná utan um. Á Netinu geta gerendur blómstrað þar sem þeir hafa falið sig í lokuðum grúppum, þykjast vera aðrir en þeir eru eða eru undir fölskum nöfnum.

„Ég man þegar dætur mínar voru litlar þá spurði ég þær af og til eftirfarandi spurninga: Ert þú ekki öruggleg góð við alla í bekknum? Eru krakkarnir góðir við þig? Heldur þú að einhverjum í þínum bekk líði illa vegna einhvers í bekknum? Ef kom svar sem hringdi bjöllum var síðan brugðist við því eftir atvikum.“

Við erum farin að hjálpa þeim sem stríða og meiða önnur börn. Börnum sem þetta gera þarf að hjálpa. Þetta eru börn sem oft líður illa með sjálf sig og eiga erfitt í skóla-, félags- eða fjölskylduaðstæðum. Sum eru reið inni í sér, önnur hafa einfaldlega ekki fengið viðeigandi leiðbeiningar um samskipti og stundum má tengja orsakir við persónueinkenni eða röskun sem barn kann að glíma við. Við þolendur reynum við að ítreka að þetta er ekki þeim að kenna. Þeim er ekki strítt vegna þess að þau eru svo ómöguleg. En þótt sá sem verður fyrir einelti viti vel að þetta er vandi þess sem sýnir hina vondu hegðun þá líður honum oft engu að síður ömurlega og spyr sig: „Af hverju ég?“ Og foreldrar spyrja: „Af hverju barnið mitt?“ Fullorðnum þolanda tekst iðulega betur að „skila skömminni“ en unglingum sem eru enn að móta og þroska sína sjálfsmynd.

Nú höfum við verkfæri til að taka á þessum málum og gerð er krafa um að forvarnarstarfi sé sinnt. Á heimasíðu minni kolbrunbaldurs.is má finna allan fróðleik um forvarnir og úrvinnslu eineltismála sem ég hef fram að færa. Barnaheill er einnig með frábært verkefni, Vinátta – forvarnarverkefni gegn einelti, sem komið er í tugi leikskóla um land allt og er nú á haustönn verið að bjóða upp á það fyrir fyrstu bekki grunnskóla, sjá nánar um það á barnaheill.is.“

Samstarf við foreldra mikilvægt

Kolbrún segir að hlutverk foreldra sé stórt í eineltismálum eins og öðrum sem varða börn þeirra. „Þá gildir einu hvort um er að ræða foreldra barna sem sjaldan eða aldrei hafa orðið fyrir stríðni eða einelti sem og foreldra barna sem eru þolendur nú eða barna sem kvartað hefur verið út af vegna eineltishegðunar. Reynsla foreldra barna í þessum málum er iðulega erfið og sársaukafull. Foreldrar þolenda finna oft til mikils vanmáttar, kvíða, reiði og sorgar, ótta og óvissu um hvernig tekið verði á málinu og hvort takist að stöðva eineltið. Foreldrar barna sem kvartað er yfir líður einnig oft mjög illa. Stundum trúa þau því ekki að barn þeirra hafi sýnt viðlíka hegðun, aðrir foreldrar segjast ekkert endilega hissa t.d. ef barn þeirra á sögu um að hafa sýnt af sér slæma framkomu. Flestir foreldrar finna til sterkrar verndartilfinningar þegar barn þeirra er ásakað um að leggja í einelti og þá án tillits til hvort foreldrar trúi ásökununum eða ekki. Það er ekkert nema eðlilegt. Aðalatriðið er að vinna með skólanum eða félagasamtökunum að fá málið upp á borð þannig að hægt sé að skoða það og ljúka því. Stundum er svona mál byggt á misskilningi sem leysist auðveldlega þegar farið er að skoða málið nánar. Þá kemur jafnvel í ljós að ekki var um að ræða einelti heldur einhvern misskilning jafnvel, stundum hefur verið um að ræða valdabaráttu og stundum er um flokkadrætti að ræða. Þessi mál geta verið gríðarlega flókin og margslungin eins og oft þegar kemur að mannlegum samskiptum.

Samvinna foreldra við skóla og aðrar stofnanir sem barnið er hjá skiptir öllu þegar erfið mál koma upp. Þá reynir á að aðilar treysti hver öðrum og sjái að hagsmunir barnanna er það sem skiptir öllu og þá er átt við hagsmunir allra barnanna sem að málinu koma. Foreldrar eru lykilaðilar þegar grafast á fyrir um orsakir og stöðva óheillaþróun málsins. Foreldrar eru einnig áhrifamestu fyrirmyndir barna sinna. Foreldrar sem horfast ekki í augu við meintan hlut barna sinna í kvörtunarmáli eru að senda þeim „vond skilaboð“ sem koma þeim ekki til góða hvorki nú né síðar. Í þeim tilfellum sem foreldrar eru e.t.v. óánægðir með skólann má sú óánægja aldrei verða til að hindra samvinnu þegar greiða á úr erfiðum málum.

Enginn stendur eins nærri börnunum og foreldrar þeirra. Hvað varðar fræðslu og þjálfun barna í samskiptum skiptir máli að byrja um leið og þroski leyfir að kenna þeim að koma vel fram við alla, líka þá sem eru ekki endilega vinir eða bestu vinir. Kenna þeim að setja sig í spor annarra, að láta vita ef þeir sjá stríðni eða einelti og ekki megi skilja út undan. Ég man þegar dætur mínar voru litlar þá spurði ég þær af og til eftirfarandi spurninga: Ert þú ekki öruggleg góð við alla í bekknum? Eru krakkarnir góðir við þig? Heldur þú að einhverjum í þínum bekk líði illa vegna einhvers í bekknum? Ef kom svar sem hringdi bjöllum var síðan brugðist við því eftir atvikum. Með einföldum spurningum er hægt að fylgjast með gangi mála í skólum barna sinna og ef barnið sýnir vanlíðunareinnkenni eða upplýsir um ofbeldisatvik af einhverju tagi er mikilvægt að hafa strax samband við skólann eða íþrótta- eða æskulýðsfélagið. Öllu skiptir að hafa samband og sé niðurstaðan að tilkynna einelti að koma þá kvörtuninni á framfæri með skriflegum hætti. Ef kvörtunin er einungis munnleg er alltaf meiri hætta á að upplýsingar skili sér ekki nægjanlega vel og meiri hætta er á misskilningi. Hlutverk foreldra er líka að taka virkan þátt í að gera kannski gott kerfi betra og koma með góðar ábendingar og tillögur sem geta bætt verkferla skóla í þessum málum.“

„Foreldrar sem horfast ekki í augu við meintan hlut barna sinna í kvörtunarmáli eru að senda þeim „vond skilaboð“ sem koma þeim ekki til góða hvorki nú né síðar.“

Kolbrún býður meðal annars upp á prógramm fyrir foreldra barna sem tengjast eineltismálum. „Í þeim fyrirlestri sem ég hef sniðið með foreldra í huga í þessum málum fer ég í gegnum þessa þætti. Ég byrja á að ræða birtingamyndir eineltis, algengar orsakir og ástæður stríðni og eineltis. Einnig tengsl ADHD og eineltis og hvernig það geti mögulega verið áhættuþáttur bæði fyrir að stríða og vera strítt/lagður í einelti. Áherslan er síðan á hlutverk og aðkomu foreldra að þessum málum, reynslu þeirra og með hvaða hætti þeir geta komið sterkar inn í forvarnarstarf og úrvinnslustarf. Loks fer ég lið fyri lið yfir hvernig ferli frá tilkynningu til málaloka lítur út frá sjónarhorni foreldra.“

Hún ætlar að miðla því sem hún kann í þessum málaflokki eins lengi og óskað er eftir. Ég mæti á eins marga staði og ég get, nota heimasíðuna og bíð upp á handleiðslu og ráðgjöf á stofu. Þetta er ekki lengur bara einhver vinna hjá mér heldur löngu orðið hugsjón og áhugamál vegna þess að ég veit og skynja að þessum málum er hægt að þoka til enn betri vegar.“

Höfundur / Ragnhildur Aðalsteinsdóttir
Myndir/ www.pixabay.com

Ekkert lát virðist vera á ofurhetjuæði sem hefur staðið í rúm tíu ár.

Á hverju ári koma út tvær til þrjár myndir í þessum flokki og vekja miklar vinsældir, bæði hjá áhorfendum og gagnrýnendum.

Til heljar

Myndin Thor: Ragnarok var frumsýnd nýlega, en um er að ræða þriðju myndina um þrumuguðinn og hvorki meira né minna en sautjándu myndina í Avengers-seríu Marvel.

Í þetta sinn þarf Thor að takast á við hina illu en máttugu Helu sem Óðinn kastaði niður í Niflheim . Framleiðendur myndarinnar virðast þó hafa leitt hjá sér þá staðreynd að Hel sem Hela byggir á er eitt afkvæma Loka samkvæmt Eddukvæðum og Heimskringlu.

Í myndinni snýr Hela aftur frá undirheimum staðráðin í að leggja Ásgarð í eyði og koma bræðrum sínum og systrum, og mannkyninu í heild, fyrir kattarnef. Thor fær til liðs við sig bæði nýja og gamla félaga í baráttunni við þennan erfiða óvin.

Leðurblakan snýr aftur

Í upphafi ofurhetjuæðisins sem nú er í gangi var Dark Knight-þríleikurinn hans Christopher Nolan, en í þeim snéri ein frægasta ofurhetja allra tíma, Batman, aftur á hvíta tjaldið. Í myndunum sem eru mun dekkri og alvarlegri en fyrri Batman-myndir glímir Batman við klassísk illmenni svo sem Scarecrow, Joker, Catwoman og Bane. Með hlutverk leðurblökunnar fer Christian Bale og voru flestir sammála um að hann næði persónunni mjög vel.

Ofurfjölskyldufaðir

Í teiknimyndinni The Incredibles kynnumst við Bob Parr, öðru nafni Mr Incredible, og eiginkonu hans Helen, öðru nafni Elastic girl. Þau voru einar mestu ofurhetjur heims en hafa neyðst til að lifa í leyni undanfarin ár vegna aðfara yfirvalda gegn ofurhetjum. Þau búa í úthverfunum ásamt börnum sínum þremur, Violet, Dash og Jack-Jack, sem eru öll gædd ofurhæfileikum. Bob þráir ekkert heitar en að komast aftur í ofurhetjugallann og stekkur því á tækifærið þegar hann fær dularfull skilaboð um háleynilegt verkefni á fjarlægri eyju. Hann uppgötvar fljótlega að ekki er allt sem sýnist og hann þarf hjálp fjölskyldu sinnar við að bjarga heiminum fá gereyðingu.

Andhetja eða ofurhetja?

Deadpool fjallar um ofurhetju sem hefur engan áhuga á að vera ofurhetja. Fyrrum sérsveitarmaðurinn og málaliðinn Wade Wilson greinist með ólæknandi krabbamein og í örvæntingu sinni samþykkir hann að gangast undir ólöglega lyfjameðferð sem á að gefa honum ofurkrafta. Þegar ofurkraftar Wade virkjast afmyndast húð hans einnig svo hann lítur út fyrir að hafa verið brenndur. Honum finnst hann því ekki eiga afturkvæmt til unnustu sinnar heldur ákveður að ná fram hefndum sem grímuklædda andhetjan Deadpool.

Engir kraftar

Kick-Ass er ekki beint hefðbundin ofurhetjumynd að því leyti að aðalsöguhetjan er ekki gædd neinum ofurkröftum. Dave Lizewski er dálítið lúðalegur unglingur sem hefur brennandi áhuga á teiknimyndasögum, á nokkra góða vini og býr einn með föður sínum. Líf hans er fremur einfalt og þægilegt. Það er að segja þar til að hann ákveður einn daginn að gerast ofurhetja. Hann pantar sér búning á Netinu og heldur út á stræti borgarinnar til að koma í veg fyrir glæpi. Hann flækist þó fljótt inn í mun stærri og hættulegri mál en hann átti von á.

Höfundur / Hildur Friðriksdóttir

Hrönn Helgadóttir segir frá stöðunum á Jótlandi sem fjölskyldan heimsækir mest.

Hrönn Helgadóttir býr í Horsens, ásamt eiginmanni og tveimur börnum, og starfar sem hársnyrtir. Hún segir að bærinn sé frekar rólegur og stutt í allskonar skemmtilega afþreyingu. Hún segir okkur frá stöðunum sem þau heimsækja mest en það eru staðir sem henta vel fyrir börnin.

„Hverfið sem við búum í er aðeins fyrir utan miðbæinn en samt er ég bara um 5-7 mínútur að hjóla í vinnuna í miðbænum. Umhverfið í kringum okkur er frábært. Við erum með skóg og tjörn og rétt hjá okkur er stór almenningsgarður með leikvelli, grillaðstöðu og allskonar afþreyingu. Þangað er yndislegt að hjóla á sumrin með nesti og sleikja sólina. Við hjólum allan ársins hring og það er frábært hvað veturinn er mildur og sumarið langt. Jótland hefur upp á margt að bjóða en þeir staðir sem við höfum sótt eru aðallega skemmtigarðar og barnvænir staðir. Svo höfum við líka farið nokkra túra til Þýsklands. Það tekur ekki nema rúma klukkustund að keyra til Flensborgar héðan. Það er mikill kostur að geta farið á bílnum í frí til Evrópu í stað þess að fljúga allt eins og þegar við bjuggum á Íslandi. Við vorum t.d. í Þýskalandi um páskana og stefnum á túr um Evrópu fljótlega.“

Lalandia er við hliðin á Legolandi og er innandyra vatnaveröld, ásamt skautasvelli, skíðabraut, keilu, og ýmislegu fleiru. Þangað förum við mest yfir vetrartímann, helst til að fara í baðlandið.

Djurs Sommerland

Djurs er okkar uppáhaldsstaður, við höfum keypt okkur árspassa í garðinn síðustu tvö ár og stefnum á að gera það sama í ár. Við erum rúman klukkutíma að keyra þangað, förum að morgni með nestispakka eða kjöt á grillið og komum heim að kvöldi. Garðurinn er blanda af vatnsrennibrauta- og skemmtigarði, risastór með fjölbreyttum grasflötum þar sem hægt er að sitja og njóta. Einnig er fjöldinn allur af grillstæðum. Nóg er af tækjum og afþreyingu fyrir alla aldurshópa og við foreldrarnir skemmtum okkur alveg jafnvel og börnin. Það sem hann hefur fram yfir aðra garða er að maður finnur ekki eins mikið fyrir fjöldanum og raðirnar verða ekki eins langar.

Lalandia

Lalandia er við hliðin á Legolandi og er innandyra vatnaveröld, ásamt skautasvelli, skíðabraut, keilu, og ýmislegu fleiru. Þangað förum við mest yfir vetrartímann, helst til að fara í baðlandið. Maður fær svolítið á tilfinninguna að vera á sólarströnd; það er heitt þarna inni og sólbekkir úti um allt. Svo fer maður bara á sundfötum og kaupir sér að borða eða ís, mjög kósí. Þarna er fjöldinn allur af rennibrautum, öldulaug, smábarnalaug og barnaveröld. Einnig eru heitir pottar og gufuböð.

Randers Regnskov

Í Randers sem er í fjörutíu mínútna akstursfjarlægð frá Horsens er flottur innandyra regnskógur sem skiptist í þrjár hvelfingar; Asíu, Suður-Ameríku og Afríku. Þar er hægt að sjá helstu dýrin sem lifa í þessum regnskógum. Mínum börnum finnst fiðrildaveröldin skemmtilegust en þar fljúga fiðrildi í öllum stærðum, gerðum og litum allt í kringum mann. Fyrir utan er hefðbundið skátaleiksvæði með alls konar þrautum. Fræðandi og skemmtileg upplifun fyrir bæði börn og fullorðna.

Saksild strand

Hér í Horsens er lítil strönd í nánast göngufæri við okkur og þar finnst krökkunum meðal annars svakalega gaman að fara á krabbaveiðar. Ef veðrið er virkilega gott þá pökkum við í kæliboxið og keyrum á einn af mínum uppáhaldsstöðum, Saksild-ströndina, sem er dásemd með algerlega hreinni strönd og blágrænum sjó. Þar getur hitinn orðið mikill og okkur líður oft eins og við séum á Spáni. Sjórinn er grunnur langt út, þannig að börnin geta vaðið eins og þau vilja meðan foreldrarnir liggja í leti. Stundum förum við nokkrar fjölskyldur saman og tökum grillið með og förum ekki heim fyrr en sólin sest. Þarna eru líka veitingastaðir og ísbúðir. Þetta er ódýr og frábær fjölskylduskemmtun.

Givskud ZOO

Rétt hjá okkur er skemmtilegur dýragarður sem bæði er hægt að keyra í gegnum og rölta um. Þar er hægt að sjá allt frá fiskum og músum upp í fíla, ljón og gíraffa. Einu sinni sáum við þegar ljónin fengu sebrahest að éta og það er upplifun sem börnin gleyma seint. Okkur finnst alltaf gaman að ganga í gegnum apagarðinn þar sem aparnir eru svolítið að stríða og við sáum einu sinni apa taka snuð af barni, setja það upp í sig og hlaupa í burtu. Ég mæli með því að þeir sem eru að ferðast á Jótlandi gefi sér tíma til þess að kíkja í Giveskud sem er ekki í nema fimmtán mínútna akstursleið frá Legolandi. Á öllum bílastæðunum í garðinum eru nestis- og grillaðstæður og ég mæli með að fólk taki með sér nesti eða eitthvað á grillið í garðana því verðið á mat og drykk þar inni er í hærri kantinum.

Legoland

Legoland þekkja sennilega flestir en það er staður sem allir þurfa auðvitað að heimsækja þegar þeir koma hingað. Þar er alltaf rosalega margt fólk og langar biðraðir í öll tæki. Sérstaklega á háannatíma. Við mælum með því við okkar gesti að koma frekar í júní eða eftir miðjan ágúst til þess að fá sem mest út úr heimsókninni. Legoland er frábær garður og margt mjög skemmtilegt að sjá. En takið með ykkur drykki og nesti, allavega eitthvað af því. Því tíuþúsundkallarnir eru fljótir að hverfa í mat og drykk þarna inni.

Myndatexti: Sonja Bríe og Helgi Sævar (7 og 5 ára á myndinni) á Saksild-ströndinni á Jótlandi.

Texti / Ragnhildur Aðalsteinsdóttir
Myndir / Hrönn Helgadóttir og www.pixabay.com

Ein einfaldasta leiðin til að öðlast betri heilsu er að ganga meira.

Kyrrseta er mjög einkennandi þáttur nútímalífsstíls og við megum öll við því að hreyfa okkur meira. Það er eitt að fara reglulega í ræktina en við þurfum að stunda hreyfingu daglega og oft á dag. Ein einfaldasta leiðin til að öðlast betri heilsu er að ganga meira.

Vinsældir heilsuúra og skrefamæla hafa aukist til muna á síðustu árum, en þau gera manni auðvelt að fylgjast með hversu mikið maður gengur á hverjum degi.

Ráðlagt er að ganga að minnsta kosti tíu þúsund skref á hverjum degi en margir eiga í erfiðleikum með að ná því markmiði. Hér eru nokkrar góðar leiðir til að auka skrefafjöldann um tvö þúsund á hverjum degi.

Símafundir á ferð

Til hvers að sitja kyrr á meðan þú ert í símanum þegar þú getur staðið upp frá skrifborði þínu, fengið ferskt loft og bætt við þig skrefum? Ef þú gengur á jöfnum hraða meðan á tíu mínútna símtali stendur geturðu safnað þúsund skrefum án þess að taka eftir því.

Ráðlagt er að ganga að minnsta kosti tíu þúsund skref á hverjum degi en margir eiga í erfiðleikum með að ná því markmiði.

Farðu lengri leiðina

Við stöndum mörgum sinnum upp á hverjum degi, hvort sem það er til að fara á salernið eða til að sækja vatn eða kaffi. Prófaðu að fara lengri leiðina í hverri af þessum ferðum, til dæmis fara á salernið sem er fjær skrifstofu þinni eða einfaldlega taka krók á leiðinni, þetta mun aðeins taka þig örfáum mínútum lengur en skrefin safnast upp.

Með daglegum verkum

Mikið af þeim verkum sem við gerum á hverjum degi framkvæmum við á meðan við stöndum kyrr, en hægt væri að hámarka nýtingu tímans með því að stunda hreyfingu á meðan. Til dæmis er sniðugt að ganga um gólf á meðan þú burstar tennurnar, en það er fjórar mínútur á dag sem getur þýtt allt að fimm hundruð skref. Síðan geturðu gengið um á meðan þú bíður eftir lyftu eða strætó eða hvenær sem er.

Upp og niður

Það er gamalt og gott ráð að sleppa því að nota lyftur eða rúllustiga. Það segir sig sjálft að þú safnar ekki skrefum með því að standa kyrr í lyftu. Á hverri mínútu sem við göngum upp stiga getum við safnað allt að tvö hundruð og sjötíu skrefum svo það getur fljótt borgað sig.

Sæktu hádegismatinn

Alltof oft kýs fólk að grípa snöggan hádegismat og jafnvel borða hann við skrifborðið sitt. Það er mun heilsusamlegra að gefa sér tíma til að borða í friði. Ekki er verra ef þú ferð út að ná þér í hádegismat og fá þér gönguferð fram og til baka. Ef það hentar ekki, til dæmis ef það er mötuneyti á vinnustað þínum, þá ættirðu samt að gefa þér tuttugu mínútur til að fara út að ganga því þannig eykurðu skrefafjölda dagsins um heil tvö þúsund skref.

Texti / Hildur Friðriksdóttir
Myndir / www.pixabay.com

Tískuhönnuðir taka þátt í kvenréttindabaráttunni með því að fagna fjölbreytileikanum.

Við vorum orðin allt of vön því að sjá einsleitar og sviplausar fyrirsætur ganga niður tískusýningarpallana til að kynna fyrir okkur nýjustu tísku.

Síðustu misseri virðist tískuheimurinn þó vera farinn að ranka við sér og hönnuðir eru farnir að taka þátt í kvenréttindabaráttunni með því að fagna fjölbreytileikanum. Þeir sem sýndu tískuna síðustu mánuði og vikur notuðu meðal annars konu á áttræðisaldri, ofurfyrirsætu í svokallaðri „yfirstærð“og múslímska fyrirsætu með hijab. Þá veigruðu þeir sér ekki við að senda frá sér rammpólitísk og feminísk skilaboð sem eiga erindi til allra.

Sterk skilaboð
Óhætt er að segja að sjaldan eða aldrei hafi tískusýningarpallarnir verið eins stútfullir af kvennakrafti og á síðustu vikum og margir hönnuðir gáfu okkur von um að hægt og rólega séu tímarnir að breytast til hins betra.

Tískuheimurinn virðist smám saman vera að brjóta niður veggi í staðinn fyrir að byggja þá og leyfir einstaklingum frekar að njóta sín óháð kynþætti, kyni, aldri, trúarbrögðum eða kílóafjölda.

Í ljósi þess að konur yfir sextugt eru með stærstu kaupendum hátísku í heiminum verður að þykja skrítið að þær sé sjaldan sýnilegar á tískusýningarpöllunum eða í auglýsingum. Þess vegna var einstaklega ánægjulegt að að sjá eldri konu ganga niður pallinn fyrir tískuhúsið Simone Rocha.

Michael Kors fékk ofurfyrirsætuna í „yfirstærð“, Ashley Graham, til að sýna fötin sín.

Múslímska fyrirsætan Halima Aden, sú fyrsta til að ganga niður tískusýningarpall á tískuviku í New York með hijab bundinn um höfuðið.

Feminísk skilaboð komust vel til skila á tískusýningarpalli Prabal Gurung sem sendi fyrirsætur sínar niður pallinn í rammpólitískum bolum.

Í lokaatriðinu hjá Missoni báru fyrirsæturnar bleikar píkuhúfur sem eru nýtt merki kvenréttindahreyfingarinnar (sbr. aðalmynd).

Litadýrð

Margir stærstu tískuhönnuðirnir fengu innblástur frá götutískunni og sendu fyrirsætur niður pallinn með einstaklega litríkt hár. Við sáum meðal annars gular strípur hjá Versace, skærblátt hár hjá Marc Jacobs, eldrautt hjá Saint Laurent og Barbie-bleikt hjá Dior.

Förðunin undirstrikaði persónulega tjáningu þeirra sem hana báru og litadýrð var víða að finna baksviðs.

Nú er tími til kominn að þora að vera „öðruvísi“ og prófa sig áfram með liti sem við þorum vanalega ekki að snerta. Augnskuggapallettan Color Shot í stílnum Bold frá Smashbox er tilvalin í verkið.

Baksviðs hjá Prada sendi förðunargoðsögnin Pat McGrath þau skilaboð að förðun fyrirsætnanna sé frekar ætluð til persónulegrar tjáningar en til þess að þóknast öðru fólki.

Persónulegar klippingar

Í takt við einstaka persónuleika sem sáust víða á hausttískusýningarpöllunum voru sérstakar klippingar áberandi. Náttúruleg áferð á hári fyrirsætnanna fékk að njóta sín og töffaralegir drengjakollar og bob-klippingar komu sterkar inn.

Lengi lifi byltingin

Fyrirsætur Dior báru leðuralpahúfur en alpahúfan hefur löngum verið tengd byltingu og uppreisn en það má með sanni segja að uppreisnin sé hafin innan tískuheimsins.

Texti / Helga Kristjáns

Montréal er ein af fallegustu borgum Kanada og býður upp á fjölbreytta möguleika fyrir ferðamenn.

Borgin er fræg fyrir frábæran mat og það sama á við um þjónustuna. Borgin er frönskumælandi en langflestir tala þó ensku líka.

Gamli bærinn í Montréal er heillandi og þar er yndislegt að labba um steinlagðar göturnar og virða fyrir sér fallegan arkitektúrinn og mannlífið. Þar er fjöldinn allur af veitingastöðum og kaffihúsum sem mörg hver skora hátt á TripAdvisor. Listagallerí eru víða sem og svokallaðar „lundabúðir“ en stærri verslunarkeðjur eru annars staðar. Notre Dame-kirkjan trónir yfir torgið d‘Armes. Óhætt er að mæla með því að borga sanngjarnt gjaldið við innganginn og skoða þessa stórkostlegu byggingu.

Skammt frá gamla bænum er Kínahverfið. Þar eru ótal asískir veitingastaðir, matarmarkaðir og verslanir. Úr hverri höfuðátt inn í hverfið eru fjögur hefðbundin kínversk hlið (paifang) sem gefin voru af Shanghai árið 1999. Einni götu fyrir ofan Kínahverfið er Rue Sainte-Catherine sem er aðalverslunargata borgarinnar og mjög löng. Þar er að finna allar helstu verslunarkeðjurnar, eins og H&M, Apple, Sport Experts, Zöru, North Face og svona mætti lengi telja.

Gamli bærinn og hinar ýmsu verslunarmiðstöðvar Rue Sainte Catherine tengjast í gegnum The Underground City sem er nokkurs konar verslunarborg undir miðborginni. Fyrir þá sem koma þangað í fyrsta sinn getur reynst allflókið að rata því ranghalarnir virðast endalausir.

Neðanjarðarborgin tengist einnig neðanjarðarlestarkerfinu og hentar vel að nota hvort tveggja yfir háveturinn þegar frosthörkur eru sem mestar og yfir sumarið þegar hitinn er hvað mestur. Þarna má labba langar leiðir milli staða án þess að koma nokkru sinni upp á yfirborðið.

Gamli bærinn í Montréal er heillandi og þar er yndislegt að labba um steinlagðar göturnar og virða fyrir sér fallegan arkitektúrinn og mannlífið. Þar er fjöldinn allur af veitingastöðum og kaffihúsum sem mörg hver skora hátt á TripAdvisor.

Fyrir austan miðbæ Montréal er hverfið Gay Village. Á hverju sumri lokast sá hluti Sainte-Catherine Street sem tilheyrir Gay Village fyrir akandi umferð og listaverkið Pink Ball eftir landslagsarkitektinn Claude Cormier er hengt yfir götuna á eins kílómetra kafla. Í ár lét hann verkið hins vegar mynda regnbogalitina í stað bleikra tóna. U.þ.b. 200 þúsund kúlur eru í verkinu. Hverfið á sér áratuga langa sögu og byrjaði fyrir alvöru að myndast um og eftir Expo 67.

Expo og manngerðar eyjar

Í Montréal er margt að skoða. Fjallið, eða kannski réttara sagt hæðin, Mont Royal sem borgin heitir eftir trónir fyrir ofan bæinn. Allmargar gönguleiðir eru á toppinn bæði á malbikuðum stígum og troðningum í gegnum skóginn. Til dæmis er hægt að hefja gönguna við Sir George Etienni Cartier-minnismerkið. Aðalútsýnisstaðurinn af hæðinni er við Chalet du Mont-Royal og þar er magnað að horfa yfir borgina.

Jacques Cartier-brúin liggur yfir á eyjuna Sainte-Hélène og þar er meðal annars skemmtigarðurinn Le Ronde. Hvers kyns tívolítæki fyrir unga sem aldna eru í garðinum og þar eru oft haldnir alls konar viðburðir og tónleikar.

Heimssýningin Expo 67 var haldin á eyjunni árið 1967 sem og á eyjunni Notre Dame sem var manngerð árið 1965 fyrir sýninguna, meðal annars úr efni frá gerð neðanjarðarlestarkerfisins. Sainte-Hélène var stækkuð af sama tilefni. The Biosphere-hvelfingin er meðal þess sem enn stendur eftir sýninguna.

Árið 1999 var eyjunum gefið sameiginlega nafnið Parc Jean-Drapeau til minningar um bogarstjórann sem hjálpaði til við að fá Expo 67 til eyjanna á sínum tíma og lét byggja neðanjarðarlestina.

haust var parísarhjól tekið í notkun á bökkum St. Lawrence-árinnar fyrir neðan gamla bæinn. Þar er ljúft að taka sér far og fá útsýni yfir ána, eyjarnar og skýjakljúfana.

Ljúffengur matur

Borgin er þekkt fyrir ríka matarmenningu og hver veitingastaðurinn á fætur öðrum býður upp á einstaklega góðan mat og framúrskarandi þjónustu. Morgunmatur er sjaldan innifalinn í hótelverði og þá er um að gera að kíkja á einn af mörgum morgunverðarstöðum borgarinnar. Eggspectation býður upp á frábært úrval og ljúffenga safa. La Finsa Coffee and Office hefur heimatilbúinn mat á boðstólum og besta kaffið að margra mati. Einnig má mæla

með Brasserie 701 sem er virkilega flottur staður rétt hjá Notra Dame-kirkjunni. Montréal er þekkt fyrir beyglurnar sínar og einn þekktasti beyglustaðurinn er líklega Fairmount Bagel.

Pítsustaðurinn Pizzeria Bros lætur lítið yfir sér en þar fást virkilega góðar pítsur sem pantaðar eru yfir afgreiðsluborð líkt og á Subway. Nokkur borð eru á staðnum til að sitja við en það er líka tilvalið að sækja þangað pítsu til að fara með upp á hótel að borða.

Einnig er óhætt að mæla með Piazza del Sogno sem er aðeins fínni pítsustaður með ekta ítölskum pítsum og ef þið viljið steikur þá býður keðjan The Keg Steakhouse upp á ljúffengar nautasteikur. Veitingastaðurinn Terrasse William Gray er staðsettur á verönd efstu hæðar samnefnds hótels og þar eru framreiddir virkilega flottir smáréttir og kokteilar. Það sem er alveg extra þægilegt við veitingastaði og kaffihús í Montréal er að þar er ekkert mál að fá sundurliðaðan reikning þegar hópur fólks er saman úti að borða og það sem meira er að þjónarnir gera það með bros á vör.

Annars er gagnlegt að fara inn á TripAdvisor og skoða umsagnir staðanna áður en haldið er af stað og oft er betra að vera búinn að panta á vinsælli stöðum.

Höfundur og ljósmyndari / Ragnhildur Aðalsteinsdóttir

Bjartur Guðmundsson býður upp á óvenjulega árangursþjálfun.

Bjartur Guðmundsson er leikari, árangursþjálfi og eigandi fyrirtækisins Optimized Performance sem hann stofnaði í febrúar 2016. Hann býður upp á óvenjulega árangursþjálfun fyrir alla sem vilja öðlast hámarksaðgengi að getu sinni og hæfileikum á hvaða sviði sem er. Bjartur byggir námskeiðin ekki síst út frá eign reynslu.

„Ég trúi því að allur árangur, óháð í hverju, sé bundinn við þrjá þætti. Í fyrsta lagi þekkingu og kunnáttu, í öðru lagi viðhorfi okkar til okkar sjálfra og þess sem við viljum ná árangri í og í þriðja lagi venjubundnu tilfinningalegu ástandi.

Af þessum þremur atriðum vegur tilfinningalegt ástand þyngst, svo viðhorf og síðan þekking og kunnátta. Þar af leiðandi gengur Optimized Performance út á tilfinninga- og viðhorfsþjálfun sem fer fram á hrikalega skemmtilegum og áhrifaríkum námkeiðum þar sem þátttakendur læra að örva taugakerfið þannig að útkoman verði það sem ég kalla topp tilfinningalegt ástand,“ segir Bjartur.

„Í þessu öfluga ástandi galopnast aðgengi taugakerfisins að hæfileikum, upplýsingum og skapandi hugsun, við tökum uppbyggilegri ákvarðanir og fylgjum þeim eftir með vandaðri athöfnum, samskiptahæfni fer upp á annað plan og kærleiksríkt sjálfstraust fer í hæstu hæðir. Þetta er alveg geggjað hreint út sagt.“

Var hræddur við höfnun

Bjartur segist hafa misstigið sig ótal sinnum og upphaf þessa ævintýris megi rekja til þess að hann hélt að hann væri búinn að meika það sem leikari stuttu eftir að hann útskrifaðist frá Listaháskóla Íslands árið 2009. „Fyrir vikið féll ég í þann fúla pitt að trúa því að nú myndu leikstjórar og framleiðendur bjóða mér hlutverk í hrönnum. Með öðrum orðum þá varð ég hrokafullur og taldi mér trú um að það væri fyrir neðan mína virðingu að sækjast af krafti eftir hlutverkum en raunverulega var ég bara skíthræddur við höfnun og að standast ekki væntingar. Ég áorkaði þó einu og það var að verða grautfúll, reiður og bitur á mettíma en sem betur fer er ég frekar jákvæður einstaklingur að upplagi og fór að leita leiða til að komast á betri stað. Það er sagt að við þurfum annaðhvort örvæntingu eða innblástur til að taka nýja stefnu í lífinu og ég var svo sannarlega örvæntingafullur á þessum tímapunkti. Innblásturinn kom svo þegar vinur minn benti mér á mannræktarfrömuðinn Anthony Robbins en ég er undir gríðarlegum áhrifum frá honum, hef marglesið allar bækur hans, farið í gegnum hljóðprógrömm og setið námskeið. Síðan þá hef ég verið mikill áhugamaður um mannrækt og jákvæða sálfræði sem svo varð til þess að ég stofnaði Optimized Performance,“ segir Bjartur.

„… Með öðrum orðum þá varð ég hrokafullur og taldi mér trú um að það væri fyrir neðan mína virðingu að sækjast af krafti eftir hlutverkum en raunverulega var ég bara skíthræddur við höfnun og að standast ekki væntingar.“

Til þessa hefur hann unnið með tæplega 80 vinnustöðum og rúmlega 3.000 einstaklingum og segir að viðbrögðin við námskeiðunum hafi verið ótrúlega góð. „Það er eitthvað við það að gefa af sér en markmiðið með þessu öllu er að miðla hugmyndafræði og aðferðum sem geta stórbætt lífsgæði fólks. Námskeiðin eru fyrir alla sem hafa áhuga á því að taka skref fram á við og eru tilbúnir að axla ábyrgð á eigin gæfu.

Það hefur verið sagt að ef við viljum betra líf þá þurfum við sjálf að verða betri í lífinu. Með því að læra hvernig hægt er að innprenta uppbyggileg viðhorf og hvernig hægt er kynda upp öflugar uppbyggilegar tilfinningar sem veita kraft, hugrekki, trú og traust þá eru okkur bókstaflega allir vegir færir. Fyrir mér eru þetta lykilatriði ef maður vill verða góður í lífinu og það magnaða er að þetta er ekki flókið og er meira að segja frekar létt ef maður skilur og kann aðferðirnar.“

Niðurrif engum til góðs

Bjartur lumar á ýmsum ráðum til fólks sem á það til að tala sig niður. „Já. Í fyrsta lagi verðum við að átta okkur á því að við gerum ekkert nema við trúum því að það muni hafa einhverjar jákvæðar afleiðingar í för með sér eða við trúum því að það forði okkur frá einhverjum neikvæðum afleiðingum. Það að tala okkur niður getur leitt til þess að annað fólk sýni okkur alúð og hlýju og þannig upplifum við ást og tengingu. Sumir trúa því að það sé bókstaflega mikilvægt að drulla yfir sjálfa sig til þess að læra af mistökum. Sjálfsniðurrif getur verið leið okkar til að finnast við vera auðmjúk, ekki hrokafull eins og allir hrokafullu fávitarnir og þannig upplifum við að við séum merkileg. Stundum notum við niðurrif til að búa til afsakanir, til að stjórna, til að forðast að gera eitthvað sem við óttumst en vitum að væri gott fyrir okkur. Við notum sjálfsniðurrif líka til að gefa okkur leyfi til að gera eitthvað sem veitir skjótfengna vellíðan en er raunverulega ekki gott fyrir okkur né aðra.

Ég veit að þetta kann að hljóma fáránlega og það er fáránlegt að við notum sjálfsniðurrif á þennan hátt en ef við gerum mikið af því, þá er það vegna þess að við höldum að það muni forða okkur frá meiri sársauka eða hreinlega veita okkur vellíðan.

Til að venja okkur af þessum ósið þurfum við að komast að því hvaða sársauka við erum að reyna að forðast og/eða hvaða vellíðan við erum að sækjast eftir. Því næst þurfum við að átta okkur á því að sjálfsniðurrif mun alltaf leiða til meiri sársauka en vellíðunar og taka ákvörðun um að það sé heimskulegt og ekki þess virði. Þetta gerum við með því að svara eftirfarandi spurningum: Hvaða sársauka mun það leiða af sér að rífa mig niður? Hvaða vellíðan mun það leiða af sér að hætta að rífa mig níður? Hvaða vellíðan mun ég upplifa ef ég tem mér að tala mig upp?

Hér er mikilvægt að koma með eins mörg svör og hægt er við hverri spurningu og svörin verða að kynda upp tilfinningar. Ef okkur tekst að gera þetta þá fer okkur virkilega að langa til að breyta hugsanamynstri okkar sem þýðir að við erum opin fyrir næsta skrefi sem er að taka eftir því þegar við dettum inn í niðurrif og gera eftirfarandi um leið: Hoppa með hendur upp í loft og íhuga þessar spurningar í tvær mínútur: Hvað gæti ég verið þakklát/ur fyrir núna ef ég vildi virkilega vera þakklát/ur? Hvað gæti mér líkað vel við í eigin fari ef ég virkilega vildi? Hverju gæti ég verið stolt/ur af við sjálfa/n mig ef ég virkilega vildi? Líkamsbeiting hefur stórkostleg áhrif á líðan okkar og það eitt að hoppa með hendur upp í loft í tvær mínútur kemur okkur í betra andlegt ástand þar sem er auðveldara að tala sig upp. Það sama gildir með spurningarnar en með því að einbeita okkur að þeim og svara í tvær mínútur getum við kynt upp sterkar uppbyggilegar tilfinningar. Með því að hoppa og svara spurningunum getum við keyrt okkur upp í frábært tilfinningalegt ástand á aðeins tveimur mínútum og tamið okkur uppbyggilegri viðhorf gagnvart sjálfum okkur. Ég hvet alla til að prófa þetta,“ segir Bjartur brosandi.

„Æfingin hér að ofan er frábær til að komast í gott tilfinningalegt ástand en almennt er það þrennt sem ber að hafa í huga. Að beita líkamanum og röddinni eins og þegar okkur líður vel, hugleiða uppbyggilegar spurningar og nota orðalag sem er uppbyggilegt.“

Og það er margt skemmtilegt fram undan hjá Bjarti. „Ég er á fullu að bóka námskeið með hinum ýmsu fyrirtækjum fyrir veturinn en ég bendi áhugasömum á að senda mér bara tölvupóst á [email protected] eða fara á www.optimized.is og kynna sér málið betur. Svo er ég svo brattur að lofa því að ef þér líkar ekki námskeiðið þá færðu það endurgreitt að fullu,“ segir hann sposkur að lokum.

Texti / Ragnhildur Aðalssteinsdóttir
Myndir / Hákon Davíð Björnsson

Anna Bryndís Skúladóttir á margar uppáhaldsgönguleiðir á Austurlandi.

„Ég er fædd og uppaldin á Borgarfirði eystra en bjó á Egilsstöðum í um 30 ár,“ segir Anna Bryndís eða Bryndís eins og hún er kölluð. „Ég er mikill náttúruunnandi og fjallageit og hef notið ríkulega þess mikla fjölbreytileika sem Borgarfjörður og Fljótsdalshérað bjóða upp á til náttúruskoðunar og gönguferða. Borgarfjörður er þekktur fyrir sinn formfagra og litskrúðuga fjallahring og er þar meðal annars að finna annað stærsta líparítsvæði landsins. Víkurnar sunnan Borgarfjarðar eru löngu orðið þekkt göngusvæði með mikla sögu og merka jarðfræði. Fljótsdalshérað er hins vegar víðfeðmasta sveitarfélag landsins með gríðarlegan fjölbreytileika í landslagi. Fjölbreytileiki flóru, gróðurs og dýralífs er að sama skapi mikill og má þar nefna heimahaga hreindýra við Snæfell og varpland heiðagæsa á Eyjabökkum sem er fögur gróðurvin á hálendinu austan Snæfells.“

Fyrir sjö árum stofnuðu nokkrar fjallageitur Fjallgönguklúbbinn Fjallhress og síðan þá hafa meðlimir hans gengið á eitt alvörufjall í mánuði, farið í ótal léttari göngur en einnig krefjandi ferðir utan fjórðungs. „Vetrargöngur á fjöll eru ekki síðri að fegurð en á sumrin og er birtan oft ómótstæðileg á þessum tíma. Austurland er algjör fjallgönguparadís og sækjum við heim fjöll til okkar góðu nágranna um allt Austurland. Á fimm árum hafa Fjallhressir gengið á yfir sextíu 1000 m háa tinda og er hæðartala samtals orðin um 36.000 m. Wildboys.is skipuleggja, reka og sjá um leiðsögn Fjallhressra.

Dyrfjöll – Súla (1136 m)

Krefjandi ganga, óstikuð. Gengið frá Brandsbalarétt upp fagran Jökuldalinn sem er mikil hvilft austan Dyrfjalla og einkennist af þursabergi af öllum stærðum og gerðum og áin bugðast fagurlega um slétta grasbala. Ævintýralegt er að nálgast síðan þverhnípt klettastál Dyrfjalla þar sem gengið er inn á jökulfönn við rætur þess. Gengið er inn á blómi skrýdda rák í fjallinu þar sem fara þarf með gát við gjá sem oft er milli jökuls og klettastáls. Fjallið er bratt en stórfenglegt útsýni í stórbrotnu landslagi. Gönguvegalengd er 18 km. Mæli með leiðsögumanni.

Fljótsdalur – Laugarfell á Fljótsdalshéraði

Mjög falleg stikuð gönguleið frá Kleif í Norðurdal í Fljótsdal upp í Laugafell um 12 km leið. Gengið er upp með Jökulsánni sem er þekkt fyrir marga fagra fossa, stóra sem smáa. Gengið er um þéttvaxinn Kleifarskóg og skal varast að láta villt jarðarber sem mikið er af ginna sig um of, því skógurinn er þéttur á köflum og mikilvægt að hópurinn haldi saman. Í Laugafelli er myndarlegt hostel með veitingasölu og dásamlegum náttúrulaugum. Góður vegur er úr Fljótsdal í Laugafell til að komast til baka. Einnig er hægt að ganga frá Kleif allt að Eyjabakkafossi, 20 km leið, og láta sækja sig þangað.

Skælingur (832 m) á Borgarfirði eystra

Skælingur er skemmtilegt göngufjall með stórkostlegu útsýni yfir Loðmundarfjörð, Seyðisfjörð og til Víkur en einnig er einstaklega fallegt útsýni á hinn fagra Hvítserk. Skælingur er stundum kallaður Kínverska musterið vegna einstæðrar lögunar sinnar. Gengið er á fjallið frá akveginum upp á Neshálsi milli Húsavíkur og Loðmundarfjarðar eftir ómerktri leið á tindinn og ágætt er að ganga upp innarlega á fjallinu, vestarlega. Leiðin er brött en stutt þar sem byrjað er í mikilli hæð.

Snæfell (1833 m) á Fljótsdalshéraði

Auðvitað valdi ég Snæfell ,,konung íslenskra fjalla“ á uppáhaldslistann en fjallið er hæsta fjall landsins utan jökla og liggur skammt norðan Vatnajökuls. Fjallið er innan Vatnajökulsþjóðgarðs og er stikuð leið skammt frá Snæfellsskála á fjallið úr suðvestri allt að jökli, gott er að fá upplýsingar hjá landverði um leiðina. Ráðlegt að hafa göngustafi og keðjubrodda meðferðis. Í góðu skyggni er mikið og gríðarfallegt útsýni af fjallinu meðal annars yfir Eyjabakka. Úrval gönguleiða er í nágrenni Snæfells og tilvalið að dvelja á svæðinu nokkra daga og ganga, má nefna Þjófadali, hring um Snæfell og Vatnsdal.

Stórurð á Fljótsdalshéraði

Fáséð furðuveröld sem enginn ætti að láta fram hjá sér fara. Þar ægir saman þursabergsbjörgum á stærð við blokkir innan um sléttar grundir og túrkisbláar tjarnir. Dyrfjöll gnæfa yfir í botni dalsins og flikruberg skreytir fjallshlíðar. Hægt er að velja um nokkrar stikaðar gönguleiðir til og frá Stórurð og tilvalið að velja aðra leið til baka en komið var, algengustu leiðir eru um 15 km samtals en einnig er hægt að velja lengri leiðir sem liggja til Borgarfjarðar. Mæli ég þó með upphafi göngu af bílastæði á Vatnsskarði þar sem aðkoman að Stórurð er skemmtilegust og fólk grípur andann á lofti af hrifningu.

Þerribjörg á Fljótsdalshéraði

Nokkuð krefjandi ganga. Ekið frá Hellisheiði eystri og þaðan eftir vegslóða (ekki fólksbílar) að Kattárdalsdrögum, bílum lagt þar við skilti. Stikað er frá skiltinu fram á brún beint ofan við Múlahöfn. Kindagata er frá brún niður um 400 m brattan skriðuhrygg. Frá Múlahöfn er gengið í norður, þar blasir við Þerribjarg og Langisandur. Einstök náttúruperla þar sem fögur og afar litskrúðug líparítbjörg með dökkum berggöngum skreyta svæðið. Leiðin er ekki fyrir lofthrædda og mæli ég með leiðsögumanni.

Höfundur / Ragnhildur Aðalsteinsdóttir
Myndir / www.pixabay.com

Það er ástæðulaust að hætta líkamsrækt í desember þótt mikið sé að gera.

Í desember hætta margir að mæta í ræktina og bera oftar en ekki fyrir sig tímaleysi. Það er þó engin ástæða til þess að hætta alveg að stunda líkamsrækt því það er lítið mál að koma stuttum sprettum inn í daglegt líf og þeir geta gert gæfumuninn. Hér eru nokkrar góðar uppástungur og hugmyndir.

Alhliða hreyfing og tannheilsa

Sestu upp við vegg þannig að fótleggirnir myndi níutíu gráðu horn og hnén séu beint upp frá tám. Haltu þessari stöðu á meðan þú burstar tennurnar eða eins lengi og þú getur en með tímanum lengist sá tími sem þú getur haldið stöðunni. Styrktaræfingar sem þessar eru góðar því þær reyna svo til ekkert á liði og styrkja marga vöðva í einu.

Bless, bingó

Skiptu kerru út fyrir tvær körfur, eina í hvorri hönd. Eftir því sem þú verslar meira því meira reynir þú á axlir, herðar, bak-, brjóst- og handleggsvöðva. Þessi aðferð getur líka haft góð áhrif á fjárhaginn því þú ert mun ólíklegri til að kaupa óþarfa hluti ef þú veist að þú þarft að bera þá út um alla búð.

Beðið eftir hraðsuðukatlinum

Hvort sem þú ert kaffi- eða tedrykkjumanneskja þá getur þú nýtt tímann á meðan þú bíður eftir bollanum. Á þeim tíma sem það tekur meðalhraðsuðuketil að sjóða vatn getur þú brennt allt að fjörutíu hitaeiningar með eftirfarandi æfingum: gerðu tíu stjörnuhopp og tíu armbeygjur upp frá vinnuborði eldhússins, gerðu síðan átta stjörnuhopp og átta armbeygjur og haltu áfram þar til þú nærð núlli.

Sterkir leggir fyrir morgunmat

Gerðu til skiptis tíu framstig og tíu hnébeygjur á meðan þú ristar þér brauðsneið eða eldar hafragraut á morgnana. Farðu djúpt og hægt í hverja æfingu og spenntu rassvöðvana þegar þú stendur upp. Til að gera æfinguna enn erfiðari getur þú haldið á þungum hlutum sem finnast í eldhúsinu, til dæmis tveggja lítra gosflösku, á meðan.

Bætt líkamsstaða í vinnunni

Húkir þú fram á skrifborðið í vinnunni? Það er lítið mál að leiðrétta það. Í hvert skipti sem þú sendir tölvupóst eða síminn þinn hringir, lyftu þá öxlum upp að eyrum og rúllaðu þeim aftur á bak. Ímyndaðu þér að þú sért með sítrónu milli herðablaðanna og þú sért að reyna að kreista hana. Þessi æfing opnar brjóstkassann og réttir úr hryggnum.

Sterkt bak í upphafi dags

Stattu upprétt með krosslagðar hendur og jafnt í báðar fætur. Rúllaðu efri hluta baksins frá vinstri til hægri án þess að hreyfa mjaðmir né mjóbak og leyfðu höfðinu að fylgja með. Þessi æfing getur fyrirbyggt bakverk og þeir sem sinna kyrrsetustarfi ættu að gera hana reglulega yfir daginn.

Bættu hreyfingu við húsverkin

Gerðu hnébeygjur í stað þess að beygja þig í baki þegar þú tekur úr þvottavélinni. Í staðinn fyrir að ganga einfaldlega um gólf á meðan þú ryksugar þá getur þú gert framstig. Styrktu kálfa með því að standa á tám og færa hælana upp og niður á meðan þú vaskar upp. Möguleikarnir eru óendanlegir, þú þarft bara að hugsa út fyrir kassann.

Stinnur rass í sturtu

Lyftu öðrum fætinum upp í níutíu gráðu beygju þannig að hnéð er í beinni línu út frá mjöðm. Haltu þessari stöðu eins lengi og þú getur, til dæmis á meðan þú þværð á þér hárið, og skiptu síðan um fót. Æfingin reynir á rassvöðva og vöðvana aftan á lærum. Gættu þess að sturtubotninn sé ekki of sleipur því þá gætir þú runnið til.

Texti / Hildur Friðriksdóttir
Myndir / www.pixabay.com

Gjafir sem innihalda ást og hlátur hitta alltaf í mark hjá yngstu kynslóðinni.

Allir krakkar elska að fá pakka. Þeir geta komið í öllum stærðum og gerðum en þær gjafir sem hitta alltaf í mark innihalda ást og hlátur. Þessar gjafir segja hvað skýrast: „Ég var að hugsa um þig“. Kostnaðurinn er enginn enda eru dýrustu gjafirnar eru ekki þær bestu.

Öll börn þrá að eiga einkastund með foreldrum sínum. Barnið upplifir sig einstakara við það eitt að fá tíma þegar aðeins það á hug og hjörtu foreldra sinna.  Það er jafnframt mikilvægt fyrir foreldrana að eiga gæðastund með barninu sínu.

Þegar tímaleysið er algjört er snjallt að gera eldamennskuna að skemmtilegu stefnumóti barns og foreldris. Búðarferðin getur líka orðið að æsispennandi rannsóknarleiðangri og bílaþvottastöðin reynst sannkallaður ævintýraheimur með réttu hugarfari.  Því er mikilvægt að bregða reglulega út af vananum, fara jafnvel lengri leiðina og finna það áhugaverða í hversdagslegum viðkomustöðum.

Þegar kemur að stefnumóti er gott ráð að leyfa barninu að velja hvað það vill gera. Oft eru það einföldustu og ódýrustu lausnirnar sem það leitar að. Þegar barnið fær tækifæri til þess að velja verður skipulagningin mun meira spennandi og barninu finnst það vera við stjórn.

Börn elska að hjálpa og hafa hlutverk. Þvottakarfan getur til að mynda reynst hin besta skemmtun þegar barnið fær að taka þátt og sortera sokkana. Vissulega er oft fljótlegra að þjóta einn í búðina eða henda tilbúnum rétti í ofninn en með því að virkja þátttöku barnanna og leyfa þeim að gera hlutina á sínum hraða söfnum við dýrmætum augnablikum í minningabankann sem verða aldrei metin til fjár.
Að fara á stefnumót með foreldrinu í bakaríið getur sem dæmi orðið uppspretta yndislegra minninga síðar meir.

Foreldrasamviskubitinu sagt stríð á hendur

Stefnumótið þarf ekki að vera þaulskipulagt því lausnin liggur oft í því að skapa augnablik í hversdagsleikanum. Með þessum hætti má kría út nokkrar dýrmætar mínútur í daglegri rútínu og forðast um leið hið alræmda foreldrasamviskubit. Samverustundir sem oft eru af svo skornum skammti aukast í kjölfarið og upp spretta nýjar hugmyndir af skemmtilegri afþreyingu með barninu.

Þegar kemur að skipulögðu stefnumóti er gott ráð að leyfa barninu að velja hvað það vill gera. Oft eru það einföldustu og ódýrustu lausnirnar sem það leitar að. Þegar barnið fær tækifæri til þess að velja verður skipulagningin mun meira spennandi og barninu finnst það vera við stjórn.

Að kasta steinum í læk eða safna laufblöðum getur verið hin mesta skemmtun. Tína köngla og mála síðan heima, eða fara í fjársjóðsleit í skóginum. Rannsóknarleiðangur um hverfið eða heimsókn á skólalóðina fyrir tilvonandi nemendur. Meira að segja kanilsnúðabakstur getur vakið upp mikla kátínu eða barn sem fær að telja kartöflur ofan í kvöldverðarpottinn. Kostnaðarhliðin þarf því ekki að vefjast fyrir fjársveltum foreldrum og enn síður fyrirhöfnin. Einföldustu atriði geta vakið stórkostlega kæti hjá börnum.

Ekki vanmeta útiveruna, það er flest auðveldara að vera úti, hvort sem það er gönguferð, hjólaferð eða könnunarleiðangur. Ferska loftið gerir öllum gott. Tímaramminn er síðan annað mál. Margir foreldar bera fyrir sig tímaleysi og áætla að til þess að stefnumótið eigi að bera tilætlaðan árangur verði það að vera langt. Viðveran mun kannski taka nokkrar klukkustundir en barnið mun muna eftir því og tala um það í langan tíma á eftir. Eins ber að hafa í huga að gleðirammi barna er ákveðið langur og auðvelt fyrir foreldra að mikla hluti óþarflega fyrir sér.

Nokkrar hugmyndir af einkatíma barns

Leyfðu barninu að velja hvað er í matinn og hvar þið borðið hann, hvort sem það er heima eða á veitingastaðnum. Sjálfstraust barna eykst með því að fá að stjórna.

Ef þú ert foreldri hefurðu sjálfsagt heyrt setninguna sjáðu mig oftar en einu sinni. Gefðu barninu athyglina – leyfðu því að vera í sviðsljósinu.

Eftir kvöldbaðið er ómetanleg stund að barnið velji sér bók til að lesa. Þannig sameinast það foreldri sínu í dagsins lok sem reynist oftar en ekki besta stund hans fyrir innileg samtöl.

Fyrir suma eru morgnarnir besti tíminn sem foreldrið getur átt með börnum sínum en fyrir aðra eru kvöldin þeirra tími. Nýtið tímann og styrkleika barnanna til fulls.

Setið upp skipulagt stefnumót með hverju barni fyrir sig.

Súperkvöld er önnur hugmynd að skemmtilegri tilbreytingu fyrir barnafólk en það eru kvöld sem börnin ráða ferðinni í einu og öllu.

Höfundur / Íris Hauksdóttir
Myndir / www.pixabay.com

Fanney Vigfúsdóttir segir frá skemmtilegum stöðum í Kaupmannahöfn.

Fanney Vigfúsdóttir var í námi í heimilislækninugm í Kaupmannahöfn og þekkir borgina og svæðið í kring vel. Við fengum hana til að segja okkur frá nokkrum stöðum sem hún mælir með að fólk skoði þegar það fer til borgarinnar.

„Það var á allan hátt lærdómsríkt að búa í Kaupmannahöfn. Borgin er falleg með ógrynni af möguleikum til að upplifa eitthvað við allra hæfi. Hægt er að hjóla mest allt sem farið er innanbæjar og svo eru góðar almenningssamgöngur ef maður vill kíkja fyrir utan borgarmörkin. Það er mikið af almenningsgörðum sem er gaman að labba um og skoða eða að hittast í með vinum og grilla og hafa það huggulegt,“ segir Fanney.

Jónshús

Það ætti að vera skylda fyrir Íslendinga sem koma til Kaupmannahafnar að koma í Jónshús. Að labba frá Nørreport, fram hjá Kongens Have, jafnvel fara dálítinn krók og labba í gegnum garðinn, dást að Rosenborg-kastalanum og Statens Museum for Kunst á leiðinni og svo sjá þetta fallega hornhús á Øster Voldgade 12 (á milli Østerport og Nørreport). Í þessu húsi bjó Jón Sigurðsson með konu sinni og barðist fyrir sjálfstæði Íslendinga og seinna keypti íslenskur kaupmaður það og gaf íslenska ríkinu sem á það enn. Þarna er mjög áhugavert og flott safn um Jón Sigurðsson og einnig er þetta félagsheimili með allskonar starfsemi fyrir Íslendinga í Kaupmannahöfn.

Skt. Hans Torv á Nørrebro

Þetta huggulega torg hefur alltaf verið í uppáhaldi. Þar er hægt að setjast niður og njóta veitinga og drykkja eða fá sér ís. Margt áhugavert er hægt að skoða í öllum áttum frá torginu. Hægt er að labba niður að síkjunum og kíkja í second hand-verslanir á leiðinni eða í gegnum Elmegade þar sem eru margar litlar búðir. Á Nörrebrogade er ekta fjölbreytileiki með fólki alls staðar að úr heiminum og í Assistants Kirkegård getur maður séð fólk í sólbaði milli legsteinanna ásamt því að dást að þessum fallega kyrrláta garði í miðri borgarösinni.

Frederiksborg Slot í Hillerød

Það er virkilega þess virði að taka lestina út úr bænum og fara til Hillerød. Þar er hugguleg göngugata og við enda hennar Frederiksborg Slot sem er yndislega fallegur kastali með enn þá fallegri hallargarði. Manni líður eins og maður sé kominn í ævintýri, algjörlega magnað.

Stevns Klint í Højerup

Ég gæti ekki mælt nóg með að taka allavega einn dag í að fara og skoða Stevns sem er svæði á litlum skaga um það bil 40 mínútum suður frá Kaupmannahöfn. Það er auðveldast að vera á bíl, en það eru líka einhverjar almenningssamgöngur og einnig eru hjólastígar um allt. Ef ég hefði bara einn dag myndi ég byrja að keyra til Højerup að Stevns Klint en þar er kirkja sem stendur á bjargbrún. Hluti kirkjunnar er dottinn í hafið en maður getur farið inn í kirkjuna og út á svalir þar sem maður horfir beint niður í grýtta fjöruna. Útsýnið er magnað og hægt er að labba niður brattan langan stiga niður í fjöruna, þetta er algjörlega einn fallegasti staður í Danmörku. Þaðan myndi ég svo kíkja í Holtug Kridtbrud, labba þangað niður og skoða salamöndrutjarnirnar, litlar tjarnir sem eru fullar af litlum salamöndrum og svo eru litlar eðlur líka allt um kring. Á leiðinni myndi ég keyra upp að Vallø Slot, litlum kastala sem er búið að breyta í íbúðir, með fallegum hallargarði og litlum hallarbæ með flottum veitingastað, á þessum leiðum eru falleg engi og skógsvæði sem maður getur alveg gleymt sér við að skoða. Ég verð að mæla með að koma við á einhverjum af þeim mörgu sveitabæjum sem selja ávexti/grænmeti og annað ræktað á búinu, brakandi ferskt og gott.

Aðalmynd: Stevns Klint í Højerup.

Texti / Ragnhildur Aðalsteinsdóttir

Matur kemur oftar en ekki við sögu í jólamyndum.

Góðverk á jólunum

Little Women er ein af þessum klassísku jólamyndum sem sumir kjósa að horfa á á hverju ári. Myndin segir frá systrunum Jo, Meg, Beth og Amy ásamt móður þeirra en faðir þeirra er fjarverandi að berjast í borgarastyrjöldinni í Bandaríkjunum. Þetta er náin og samheldin fjölskylda sem þó þarf að glíma við erfiðleika, eins og aðrar fjölskyldur. Eitt hjartnæmasta atriði myndarinnar er þegar konurnar ákveða að gefa allan hátíðarmatinn sem þær hafa safnað fyrir í marga mánuði og búið er að matreiða eftir kúnstarinnar reglum. Nágrannar þeirra voru nefnilega hjálparþurfi. Það reynist þeim erfitt að pakka saman öllu veisluborðinu án þess að hafa svo mikið sem snert við matnum en viðbrögð nágranna þeirra við þessari gjöf gerir það þess virði.

Fjölskyldudrama

Í Family Stone (aðalmynd) fylgjumst við með hrakfarajólum Stone-fjölskyldunnar. Elsti sonurinn, Everett, hefur boðið kærustu sinni, Meredith, heim um jólin með það fyrir augum að biðja hennar yfir hátíðarnar með glæsilegum hring. Hún fær miður góðar móttökur og ákveður í örvæntingu að bjóða systur sinni að koma til að dreifa athyglinni. Allt gengur á afturfótunum og Meredith er svo stíf að allt sem hún segir kemur út á versta mögulega veg og móðgar meirihlutann af fjölskyldunni. Á jóladag biður Everett móður sína um hringinn sem er erfðargripur en hún neitar honum upphaflega um hann. Þegar henni snýst síðan hugur eru farnar að renna tvær grímur á Everett og hann er ekki viss hvort hann vilji enn þá giftast Meredith.

Óætur kalkúnn

Clark Wilhelm Griswold langar að halda hin fullkomnu Griswold-fjölskyldujól. Eftir margra mánaða undirbúning býður hann bæði foreldrum sínum og tengdaforeldrum og einnig Louis, frænda sínum, og elliærri frænku sinni, Bethany. Honum að óvörum mætir líka groddalegi frændi konu hans, Eddie, ásamt allri fjölskyldu sinni í húsbílnum sínum. Clark er búinn að skreyta húsið með meira en 20.000 ljósaperum og ná í risastórt jólatré sem passar eiginlega ekki inn í stofuna. Þegar þau eru loks sest við borðstofuborðið, búin að fara með borðbæn og ætla að gæða sér á kræsingum þá er kalkúnninn ekki eins og hann átti að vera. Um leið og Clark sker í fuglinn þá svo gott sem springur hann, með tilheyrandi búkhljóði, því hann er algjörlega orðinn að engu að innan.

Pítsuveisla í limmósínu

Í Home Alone 2: Lost in New York er Kevin McCallister mættur aftur. Í þetta skiptið fer hann óvart í aðra flugvél en fjölskylda sín og endar í New York-borg, í stað Flórída. Hann er ekki lengi að gera borgina að leikvelli sínum, enda með nóg af peningum og kreditkortum. Eitt minnisstætt atriði er þegar Kevin keyrir um borgina í limmósínu og hámar í sig ostapítsu á meðan, mjög grand á því. Kevin er ekki einn lengi því hinir illræmdu bjánabófar, Harry og Marv, enn þá í sárum eftir síðustu viðskipti sín við Kevin, eru líka mættir á svæðið og ætla núna að fremja rán aldarinnar.

Höfundur / Hildur Friðriksdóttir

Í desember gæti verið sniðugt að „detoxa“ eða „pretoxa“ áður en jólahátíðin skellur á.

Desember er annasamasti mánuður ársins hjá flestum. Við þurfum ekki aðeins að versla jólagjafir, þrífa heimilið, skrifa jólakort, skreyta og guð má vita hvað heldur er okkur einnig boðið í alls konar aðventuboð á vinnustöðum, til ættingja og vina. Síðan skellur jólahátíðin á og það er sama upp á teningnum þá. Þannig að mánuðurinn einkennist af áti, drykkju, streitu og svefnleysi. Við höfum oft heyrt talað um detox, eða hreinsun, eftir þetta sukktímabil en einnig er gáfulegt að huga að nokkurs konar „pretoxi“, það er andlegum og líkamlegum undirbúningi, og hér eru nokkur góð ráð.

Matur

Hangikjöt, skata, villibráð, grafinn lax og svo mætti lengi telja. Þótt hátíðarmatur sé vissulega gómsætur er hann einnig þungur í maga og oftar en ekki fremur saltur. Án þess að þú gerir þér fulla grein fyrir því þá getur hann farið að hafa áhrif á heilsu þína.

Þú getur lítið stjórnað hvað er á boðstólum í þeim veislum og partíum sem þú ferð í. Þess vegna er enn mikilvægara að passa upp á að ísskápurinn þinn sé að minnsta kosti vel birgur af alls kyns ferskum mat, eins og grænmeti. Þau fáu kvöld sem þú ert heima hjá þér í aðdraganda jólanna ættir þú að reyna að fá þér salat eða annan léttan mat. Þú munt sofa betur og almennt líða betur þegar þú vaknar daginn eftir.
Takmarkaðu nammiátið við nokkra daga því of mikill sykur getur valdið ójöfnu orkustigi, þannig að þú ert annað hvort alltof þreytt eða of ör.

Drykkur

Áfengi er oftar en ekki haft um hönd í kringum hátíðarnar og þá kannski í meira mæli en gengur og gerist aðra mánuði ársins. Það er mikilvægt að reyna að gæta hófs og jafnframt vanda valið. Reyndu að drekka sem minnst af sykruðum drykkjum og drekktu alltaf eitt vatnsglas á móti hverjum drykk svo þú verðir ekki fyrir vökvatapi.

Hátíðarmatur er eins og áður sagði fremur saltur og reyktur sem þýðir að okkur hættir til að binda meira vatn í líkamanum. Þannig að þegar þú hættir einn morgun að passa í buxurnar þínar þá er það ekki endilega vegna þess að þú sért búin að fitna heldur getur það einfaldlega verið bjúgur. Því er gott að venja sig á að drekka nóg af vatni og fá sér vatnslosandi drykk, eins og sítrónuvatn, á morgnana.
Eins og áður sagði er maturinn í þessum mánuði ekki mjög fjölbreyttur. Til að auka vítamín- og steinefnaneyslu þína er gott að fá sér „smoothie“ á morgnana með nóg af ferskum eða frosnum ávöxtum, kókosvatni, chia-fræjum, avókadó og spínati eða grænkáli. Þannig færðu góðan kraft og næringu fyrir daginn og þú getur tjúttað fram eftir nóttu ef þannig liggur á þér.

Reyndu líka eftir bestu getu að skipta kaffinu út fyrir te því það hefur alla jafna mun meira magn andoxunarefna ásamt því að innihalda jurtir sem geta hjálpað til við að jafna meltingu, styrkja ónæmiskerfið, gefa orku og einbeitningu og svo framvegis.

Hvíld

Það er alveg bókað mál að þú færð ekki nægan svefn í desember, hvort sem þú ert að djamma á jólahlaðborðum eða sveitt að versla jólagjafir á miðnæturopnun í verslunum. Þess vegna verður að grípa gæsina þegar hún gefst og fara snemma að sofa og tryggja gæði svefnsins. Skiptu reglulega um á rúminu, því fátt hjálpar manni að sofna eins og tandurhrein og ilmandi sængurföt. Það þekkja flestir að lavender er mjög róandi og því er sniðugt að blanda nokkrum dropum af lavander-ilmolíu við vatn og spreyja létt yfir koddann.

Einnig er gott að drekka róandi te á kvöldin til að tryggja að maður sofni snemma. Það er hægt að fá ýmsar gerðir af tei í verslunum og mikilvægast er að það sé koffínlaust en síðan eru ýmsar jurtir sem eru svefnaukandi, eins og kamilla, eða garðabrúða.

Hættu líka í símanum og spjaldtölvunni allavega klukkutíma áður en þú ætlar upp í rúm því bláa ljósið sem slík tæki gefa frá sér hamla melatónínframleiðslu svo það tekur þig lengri tíma að sofna.

Texti / Hildur Friðriksdóttir
Myndir / www.pixabay.com

Með einföldum ráðum er hægt að bæta ásýnd baðherbergja.

Baðherbergi eru oft þau rými sem fá hvað minnstar endurbætur innan heimilisins. Flestir eru þó sammála um að vilja hafa baðherbergin hrein og snyrtileg en stærðarinnar vegna getur reynst erfitt að koma skipulagi á handklæði, sturtusápur og baðdót barnanna. Það er þó heilmikið sem hægt er að bæta með einföldum ráðum sem þurfa hvorki að kosta mikið né krefjast mikilla framkvæmda.

Á flestum heimilum eru baðherbergin í smærra lagi og því rúmast takmarkað magn húsgagna þar inni. Því eru það smáhlutirnir sem skapa rétta andrúmsloftið enda dvelja flestir góðan part af deginum inni á baðherberginu.

Falleg handklæði fleyta baðherberginu langt, hvort sem þeim er rúllað upp í opinni hillu eða látin hanga á vegg.

Sturtuhengi geta gert ótrúlega mikið fyrir stílhrein baðherbergi og skapað réttu stemninguna hvort sem hún er suðræn eða skræpótt, einföld eða með prenti.

Margir geyma körfur fyrir óhreinan þvott á baðherbergjum sínum og geta þau vissulega stungið í stúf. Það þarf þó ekki að vera flókið að finna smekklegar körfur á góðu verði sem gera mikið fyrir heildarrýmið.

Kerti eru ómissandi þegar kemur að því að skapa þægilegt andrúmsloft innan baðherbergisins. Hvort sem um er að ræða fallegt ilmkerti við vaskinn eða við freyðibaðið.

Sápan setur svo svip sinn á baðherbergið, hvort sem um er að ræða handsápu, sturtusápu eða baðsöltin. Það er auðvelt að týna sér í úrvali á öllum þeim gæðahúðvörum sem framleiddar eru og því kjörið að skipta oft út og skapa þannig fjölbreytta stemningu innan baðherbergisins. Eins er hægt að kaupa fjölnota og fallegar sápupumpur og fylla reglulega á.

Kerti eru ómissandi þegar kemur að því að skapa þægilegt andrúmsloft innan baðherbergisins. Hvort sem um er að ræða fallegt ilmkerti við vaskinn eða við freyðibaðið.

Lítill kollur eða hliðarborð fyrir handklæði eða húðvörur getur sömuleiðis komið sér vel. Kollinn má nýta undir tölvuna fyrir þá sem vilja horfa á bíómynd í baði.

Fyrir yngstu baðdýrkendurna er um að gera að verða sér úti um baðleikföng og hirslur undir baðdótið.

Sérstakir baðlitir og slím færa svo sannarlega fjör í baðið sem og segulstafir sem hægt er að líma á vegginn meðan á baðferðinni stendur.

Þá geta plöntur færa líf í litlaust rými en þær skapa jafnframt hlýju og notalegheit.

Höfundur / Íris Hauksdóttir
Myndir / www.pexels.com

Kolbrún Baldursdóttir sálfræðingur heldur fyrirlestra og námskeið um einelti fyrir fólk á öllum aldri.

Kolbrún Baldursdóttir hefur starfað sem sálfræðingur í 25 ár. Hún rekur eigin sálfræðistofu ásamt því að vera í hlutastarfi á heilsugæslu og sinna sálfræðiþjónustu fyrir hælisleitendur. Hún heldur einnig fyrirlestra og námskeið um einelti fyrir fólk á öllum aldri og ekki síst foreldra bæði fórnarlamba og gerenda. Við fengum hana til að gefa okkur innsýn í viðfangsefnið.

„Snemma á ferli mínum tóku eineltismálin hug minn,“ segir Kolbrún. „Mér fannst alltaf svo innilega sárt að hitta einstaklinga, börn og fullorðna sem voru niðurbrotin vegna þess að einhver einn eða fleiri höfðu verið að níðast á þeim leynt og ljóst. Skaðsemi langvinns eineltis getur verið mannskemmandi og dæmi eru um að andleg líðan þolanda er rústir einar eftir einelti. Afleiðingar lifa stundum með manneskjunni alla ævi þótt margir finni leið með eða án aðstoðar til að milda og lifa með sársaukanum, brotinni sjálfsmynd og viðloðandi höfnunartilfinningu. Þeir sem koma úr erfiðum uppeldisaðstæðum, eiga erfitt félagslega eða glíma við annan vanda fyrir ná sér jafnvel ekki á strik eftir að einelti hefur bæst við. Þá er eins og mælirinn fyllist endanlega. Dæmi eru um að fólk verði öryrkjar og einstaka sjá enga vonarglætu og hafa svipt sig lífi.

Mér hefur alltaf fundist að við, einstaklingar, hópar og samfélagið allt, ættum að geta gert eitthvað verulega raunhæft í þessum málum, ekki bara til skemmri tíma heldur til framtíðar. Eineltishegðun mun koma upp endrum og sinnum en með skilvirkum forvörnum, virkri viðbragðsáætlun og faglegri vinnslu mála sem koma upp getur verulega dregið úr eineltistilburðum og ef mál kemur upp skiptir öllu að gripið sé strax inn í og einelti stoppað nánast í fæðingu.“

Kolbrún hefur skrifað fjölda greina og pistla um hugmyndir í þessu sambandi ásamt því að þekkja málið af eigin raun. „Ég hef komið að vinnslu þessara mála í mörg ár bæði í málum þar sem aðilar eru börn, unglingar og fullorðið fólk. Ég held að ég hefði aldrei getað rætt af neinu alvöru öryggi um þessi mál nema af því að ég hef sjálf fengið að snerta á þeim með beinum hætti. Með hverju máli sem ég hef komið að sem sálfræðingur hef ég sjálf lært eitthvað nýtt og þróað þannig hugmyndafræðina og betrumbætt verklagið.“

Breytt viðhorf og úrlausnir

Auk fræðslufyrirlestra og greinaskrifa var Kolbrún með sálfræðiþætti, Í nærveru sálar, á ÍNN meðal annars um eineltismál. „Það var um það leyti sem Skólavefurinn bað mig að skrifa leiðbeiningabók um einelti. Bókin EKKI MEIR kom út 2012 og strax í kjölfarið fór ég í samstarf við Æskulýðsvettvanginn og nokkur sveitarfélög og fékk enn frekari tækifæri til að fara um allt land og miðla því hvernig fyrirbyggjandi vinna gæti litið út með viðbragðsáætlun, tilkynningareyðublaði, verkferlum og verklagi. Þessum hugmyndum mínum um forvarnir og úrvinnslu eineltismála var hvarvetna vel tekið. Margir tóku þessar leiðbeiningar upp strax í kjölfarið og tileinkuðu sér verkfæri sem mér fannst hafa gagnast mér í þessum málum. Það gaf mér enn meiri kraft til að halda áfram þessu verkefni. EKKI MEIR ævintýrið er enn í gangi og lifir góðu lífi og ég mun sinna þeirri fræðslu áfram næstu árin.“

Kolbrún segir að samfélagið viðurkenni nú einelti og skaðsemi þess sé flestum orðin kunn. Einnig sé nánast horfið að fólk fullyrði að einelti sé ekki til á þeirra vinnustað eða skóla. „Allt hefur gerst með meiri hraða eftir tilkomu samfélagsmiðlanna. Nú tjáir sig hver sem vill um sína reynslu til dæmis á Facebook og viðbrögðin láta ekki á sér standa. Samfélagsmiðlar koma málum sannarlega hratt upp á borð. Eðli þessara mála er svipað í dag og áður að mörgu leyti nema við hefur bæst neteinelti með tilkomu Netsins og samfélagsmiðlanna. Þau mál eru afar erfið vegna þess að netníð eða myndir sem ætlað er að skaða og meiða breiðast út af ógnarhraða svo engin bönd ná utan um. Á Netinu geta gerendur blómstrað þar sem þeir hafa falið sig í lokuðum grúppum, þykjast vera aðrir en þeir eru eða eru undir fölskum nöfnum.

„Ég man þegar dætur mínar voru litlar þá spurði ég þær af og til eftirfarandi spurninga: Ert þú ekki öruggleg góð við alla í bekknum? Eru krakkarnir góðir við þig? Heldur þú að einhverjum í þínum bekk líði illa vegna einhvers í bekknum? Ef kom svar sem hringdi bjöllum var síðan brugðist við því eftir atvikum.“

Við erum farin að hjálpa þeim sem stríða og meiða önnur börn. Börnum sem þetta gera þarf að hjálpa. Þetta eru börn sem oft líður illa með sjálf sig og eiga erfitt í skóla-, félags- eða fjölskylduaðstæðum. Sum eru reið inni í sér, önnur hafa einfaldlega ekki fengið viðeigandi leiðbeiningar um samskipti og stundum má tengja orsakir við persónueinkenni eða röskun sem barn kann að glíma við. Við þolendur reynum við að ítreka að þetta er ekki þeim að kenna. Þeim er ekki strítt vegna þess að þau eru svo ómöguleg. En þótt sá sem verður fyrir einelti viti vel að þetta er vandi þess sem sýnir hina vondu hegðun þá líður honum oft engu að síður ömurlega og spyr sig: „Af hverju ég?“ Og foreldrar spyrja: „Af hverju barnið mitt?“ Fullorðnum þolanda tekst iðulega betur að „skila skömminni“ en unglingum sem eru enn að móta og þroska sína sjálfsmynd.

Nú höfum við verkfæri til að taka á þessum málum og gerð er krafa um að forvarnarstarfi sé sinnt. Á heimasíðu minni kolbrunbaldurs.is má finna allan fróðleik um forvarnir og úrvinnslu eineltismála sem ég hef fram að færa. Barnaheill er einnig með frábært verkefni, Vinátta – forvarnarverkefni gegn einelti, sem komið er í tugi leikskóla um land allt og er nú á haustönn verið að bjóða upp á það fyrir fyrstu bekki grunnskóla, sjá nánar um það á barnaheill.is.“

Samstarf við foreldra mikilvægt

Kolbrún segir að hlutverk foreldra sé stórt í eineltismálum eins og öðrum sem varða börn þeirra. „Þá gildir einu hvort um er að ræða foreldra barna sem sjaldan eða aldrei hafa orðið fyrir stríðni eða einelti sem og foreldra barna sem eru þolendur nú eða barna sem kvartað hefur verið út af vegna eineltishegðunar. Reynsla foreldra barna í þessum málum er iðulega erfið og sársaukafull. Foreldrar þolenda finna oft til mikils vanmáttar, kvíða, reiði og sorgar, ótta og óvissu um hvernig tekið verði á málinu og hvort takist að stöðva eineltið. Foreldrar barna sem kvartað er yfir líður einnig oft mjög illa. Stundum trúa þau því ekki að barn þeirra hafi sýnt viðlíka hegðun, aðrir foreldrar segjast ekkert endilega hissa t.d. ef barn þeirra á sögu um að hafa sýnt af sér slæma framkomu. Flestir foreldrar finna til sterkrar verndartilfinningar þegar barn þeirra er ásakað um að leggja í einelti og þá án tillits til hvort foreldrar trúi ásökununum eða ekki. Það er ekkert nema eðlilegt. Aðalatriðið er að vinna með skólanum eða félagasamtökunum að fá málið upp á borð þannig að hægt sé að skoða það og ljúka því. Stundum er svona mál byggt á misskilningi sem leysist auðveldlega þegar farið er að skoða málið nánar. Þá kemur jafnvel í ljós að ekki var um að ræða einelti heldur einhvern misskilning jafnvel, stundum hefur verið um að ræða valdabaráttu og stundum er um flokkadrætti að ræða. Þessi mál geta verið gríðarlega flókin og margslungin eins og oft þegar kemur að mannlegum samskiptum.

Samvinna foreldra við skóla og aðrar stofnanir sem barnið er hjá skiptir öllu þegar erfið mál koma upp. Þá reynir á að aðilar treysti hver öðrum og sjái að hagsmunir barnanna er það sem skiptir öllu og þá er átt við hagsmunir allra barnanna sem að málinu koma. Foreldrar eru lykilaðilar þegar grafast á fyrir um orsakir og stöðva óheillaþróun málsins. Foreldrar eru einnig áhrifamestu fyrirmyndir barna sinna. Foreldrar sem horfast ekki í augu við meintan hlut barna sinna í kvörtunarmáli eru að senda þeim „vond skilaboð“ sem koma þeim ekki til góða hvorki nú né síðar. Í þeim tilfellum sem foreldrar eru e.t.v. óánægðir með skólann má sú óánægja aldrei verða til að hindra samvinnu þegar greiða á úr erfiðum málum.

Enginn stendur eins nærri börnunum og foreldrar þeirra. Hvað varðar fræðslu og þjálfun barna í samskiptum skiptir máli að byrja um leið og þroski leyfir að kenna þeim að koma vel fram við alla, líka þá sem eru ekki endilega vinir eða bestu vinir. Kenna þeim að setja sig í spor annarra, að láta vita ef þeir sjá stríðni eða einelti og ekki megi skilja út undan. Ég man þegar dætur mínar voru litlar þá spurði ég þær af og til eftirfarandi spurninga: Ert þú ekki öruggleg góð við alla í bekknum? Eru krakkarnir góðir við þig? Heldur þú að einhverjum í þínum bekk líði illa vegna einhvers í bekknum? Ef kom svar sem hringdi bjöllum var síðan brugðist við því eftir atvikum. Með einföldum spurningum er hægt að fylgjast með gangi mála í skólum barna sinna og ef barnið sýnir vanlíðunareinnkenni eða upplýsir um ofbeldisatvik af einhverju tagi er mikilvægt að hafa strax samband við skólann eða íþrótta- eða æskulýðsfélagið. Öllu skiptir að hafa samband og sé niðurstaðan að tilkynna einelti að koma þá kvörtuninni á framfæri með skriflegum hætti. Ef kvörtunin er einungis munnleg er alltaf meiri hætta á að upplýsingar skili sér ekki nægjanlega vel og meiri hætta er á misskilningi. Hlutverk foreldra er líka að taka virkan þátt í að gera kannski gott kerfi betra og koma með góðar ábendingar og tillögur sem geta bætt verkferla skóla í þessum málum.“

„Foreldrar sem horfast ekki í augu við meintan hlut barna sinna í kvörtunarmáli eru að senda þeim „vond skilaboð“ sem koma þeim ekki til góða hvorki nú né síðar.“

Kolbrún býður meðal annars upp á prógramm fyrir foreldra barna sem tengjast eineltismálum. „Í þeim fyrirlestri sem ég hef sniðið með foreldra í huga í þessum málum fer ég í gegnum þessa þætti. Ég byrja á að ræða birtingamyndir eineltis, algengar orsakir og ástæður stríðni og eineltis. Einnig tengsl ADHD og eineltis og hvernig það geti mögulega verið áhættuþáttur bæði fyrir að stríða og vera strítt/lagður í einelti. Áherslan er síðan á hlutverk og aðkomu foreldra að þessum málum, reynslu þeirra og með hvaða hætti þeir geta komið sterkar inn í forvarnarstarf og úrvinnslustarf. Loks fer ég lið fyri lið yfir hvernig ferli frá tilkynningu til málaloka lítur út frá sjónarhorni foreldra.“

Hún ætlar að miðla því sem hún kann í þessum málaflokki eins lengi og óskað er eftir. Ég mæti á eins marga staði og ég get, nota heimasíðuna og bíð upp á handleiðslu og ráðgjöf á stofu. Þetta er ekki lengur bara einhver vinna hjá mér heldur löngu orðið hugsjón og áhugamál vegna þess að ég veit og skynja að þessum málum er hægt að þoka til enn betri vegar.“

Höfundur / Ragnhildur Aðalsteinsdóttir
Myndir/ www.pixabay.com

Ekkert lát virðist vera á ofurhetjuæði sem hefur staðið í rúm tíu ár.

Á hverju ári koma út tvær til þrjár myndir í þessum flokki og vekja miklar vinsældir, bæði hjá áhorfendum og gagnrýnendum.

Til heljar

Myndin Thor: Ragnarok var frumsýnd nýlega, en um er að ræða þriðju myndina um þrumuguðinn og hvorki meira né minna en sautjándu myndina í Avengers-seríu Marvel.

Í þetta sinn þarf Thor að takast á við hina illu en máttugu Helu sem Óðinn kastaði niður í Niflheim . Framleiðendur myndarinnar virðast þó hafa leitt hjá sér þá staðreynd að Hel sem Hela byggir á er eitt afkvæma Loka samkvæmt Eddukvæðum og Heimskringlu.

Í myndinni snýr Hela aftur frá undirheimum staðráðin í að leggja Ásgarð í eyði og koma bræðrum sínum og systrum, og mannkyninu í heild, fyrir kattarnef. Thor fær til liðs við sig bæði nýja og gamla félaga í baráttunni við þennan erfiða óvin.

Leðurblakan snýr aftur

Í upphafi ofurhetjuæðisins sem nú er í gangi var Dark Knight-þríleikurinn hans Christopher Nolan, en í þeim snéri ein frægasta ofurhetja allra tíma, Batman, aftur á hvíta tjaldið. Í myndunum sem eru mun dekkri og alvarlegri en fyrri Batman-myndir glímir Batman við klassísk illmenni svo sem Scarecrow, Joker, Catwoman og Bane. Með hlutverk leðurblökunnar fer Christian Bale og voru flestir sammála um að hann næði persónunni mjög vel.

Ofurfjölskyldufaðir

Í teiknimyndinni The Incredibles kynnumst við Bob Parr, öðru nafni Mr Incredible, og eiginkonu hans Helen, öðru nafni Elastic girl. Þau voru einar mestu ofurhetjur heims en hafa neyðst til að lifa í leyni undanfarin ár vegna aðfara yfirvalda gegn ofurhetjum. Þau búa í úthverfunum ásamt börnum sínum þremur, Violet, Dash og Jack-Jack, sem eru öll gædd ofurhæfileikum. Bob þráir ekkert heitar en að komast aftur í ofurhetjugallann og stekkur því á tækifærið þegar hann fær dularfull skilaboð um háleynilegt verkefni á fjarlægri eyju. Hann uppgötvar fljótlega að ekki er allt sem sýnist og hann þarf hjálp fjölskyldu sinnar við að bjarga heiminum fá gereyðingu.

Andhetja eða ofurhetja?

Deadpool fjallar um ofurhetju sem hefur engan áhuga á að vera ofurhetja. Fyrrum sérsveitarmaðurinn og málaliðinn Wade Wilson greinist með ólæknandi krabbamein og í örvæntingu sinni samþykkir hann að gangast undir ólöglega lyfjameðferð sem á að gefa honum ofurkrafta. Þegar ofurkraftar Wade virkjast afmyndast húð hans einnig svo hann lítur út fyrir að hafa verið brenndur. Honum finnst hann því ekki eiga afturkvæmt til unnustu sinnar heldur ákveður að ná fram hefndum sem grímuklædda andhetjan Deadpool.

Engir kraftar

Kick-Ass er ekki beint hefðbundin ofurhetjumynd að því leyti að aðalsöguhetjan er ekki gædd neinum ofurkröftum. Dave Lizewski er dálítið lúðalegur unglingur sem hefur brennandi áhuga á teiknimyndasögum, á nokkra góða vini og býr einn með föður sínum. Líf hans er fremur einfalt og þægilegt. Það er að segja þar til að hann ákveður einn daginn að gerast ofurhetja. Hann pantar sér búning á Netinu og heldur út á stræti borgarinnar til að koma í veg fyrir glæpi. Hann flækist þó fljótt inn í mun stærri og hættulegri mál en hann átti von á.

Höfundur / Hildur Friðriksdóttir