Vefritið Men’s Health fékk vefsíðuna simpatic.us til að framkvæma fyrir sig könnun um algengar kynlífsfantasíur kvenna. Vefsíðan sérhæfir sig í að tengja pör nánar saman með það til hliðsjónar hvað þau vilja gera í kynlífinu.
2700 kvenkyns notendur vefsíðunnar voru spurðir um kynlísfantasíur í könnuninni og gætu niðurstöður komið einhverjum á óvart. Hér eru algengustu fantasíurnar meðal kvenna:
1. Að klæmast
Næstum því 81 prósent kvenna sögðust vilja að makinn sinn klæmdist við þær á meðan á kynlífi stendur. Það hefur oft verið sagt að klúrið tal geti verið mjög örvandi, en mikilvægt er að prófa sig áfram með maka sínum til að finna hvers konar tal virkar í svefnherberginu.
2. Að fara á strippklúbb
Tæplega 70% kvennanna sögðust hafa áhuga á að fara á nektarklúbb með maka sínum, þar sem það þótti spennandi og líklegt til að auka kynferðislega spennu á milli parsins.
3. Fjarstýrt kynlífstæki
63 prósent svarenda höfðu átt dagdrauma um að nota fjarstýrð kynlífstæki, á meðan 44 prósent þeirra sögðust vilja að maki sinn myndi stýra slíku tæki á almannafæri.
4. Bundið fyrir augun
58 prósent þeirra kvenna sem svöruðu sögðust eiga fantasíu um að hafa bundið fyrir augun í samförum. Gætu það verið Fifty Shades of Grey-áhrifin?
Agnes Marínósdóttir, Regina Lilja Magnúsdóttir og Stefanía Svavarsdóttir keppa í seinni undankeppni Söngvakeppninnar þann 17. febrúar næstkomandi með lagið Svaka stuð, eða Heart Attack.
Stöllurnar gáfu nýverið út myndband við lagið og tilkynntu jafnframt að þær koma fram undir hljómsveitarnafninu Slay. En af hverju Slay?
„Góð spurning! Það tók okkur dágóðan tíma að finna uppá nafni en það er eitthvað við Slay sem er töff og það er reffilegt hvernig maður segir það. Fólk tengir þetta oftast við þungarokk en við erum bara í þungadiskó. Aðallega kemur nafnið frá þættinum Ru Paul’s Dragrace sem er þáttur sem allir verða að sjá,“ segir Agnes.
Hún segir tökur fyrir myndbandið hafa gengið afar vel.
„Við tókum þetta alla leið með vindvél og konfetti úti um allt. Ég held að það sé enn konfetti á tökustaðnum,“ segir Agnes og hlær.
„Við vorum í pallíettukjólum og með krullur og með svakalega flott tökulið, þá Heimi Frey Hlöðversson, Jónmund Gíslason, Guðmund Erlings og Aron Þór Árnason. Algjörir snillingar! Það skemmdi ekki fyrir að hafa tvær grúppíur með, þær Nadiu Tamimi og Ásgerði Ósk Jakobsdóttur. Og Sif Þórisdóttur make-up snilling. Vá, þetta var gott kvöld,“ segir Agnes og bætir við að stemningin á tökustað hafi verið vægast sagt góð.
„Það var fyndið þegar við vorum búin að taka nokkur skot með konfetti og grúppíurnar byrjuðu að henda alls konar rusli framan í okkur. Við vorum orðnar glimmer ryksugur þarna í endann. Takk, stelpur.“
En hvernig er stemmingin í herbúðum Slay fyrir undanúrslitakvöldinu?
„Alveg geggjuð. Við erum svo léttar á því og hoppum í öll verkefni með bros á vör og njótum. Júró njóta núna!“
Dásamlega góð hnetukaka að hætti Guðnýjar Þórarinsdóttur.
Við elskum hnetur, hvort sem þær eru einar og sér, í mat, eða í köku eins og þessari hér. Það er alltaf eitthvað notalegt við góða hnetuköku og við getum svo sannarlega mælt með þessari fallegu köku, hún er dásamlega góð.
Hnetuhringur Guðnýjar fyrir 10
Uppskriftin að hnetuhringnum er upprunalega úr gömlu dönsku blaði og mögulega kannast einhverjir lesendur við hana. Kakan hefur verið vinsæl í fjölskyldu Guðnýjar okkar í umbrotsdeildinni og við höfum stundum fengið hana með kaffinu þegar Guðný kemur færandi hendi í vinnuna. Þessi kaka er nánast eins og konfekt og okkur finnst hún alveg ægilega góð.
100 g heslihnetur
100 g möndlur
4 eggjahvítur
200 g sykur
100 g suðusúkkulaði
2 tsk. smjör
Stillið ofn á 180°C. Smyrjið með smjöri lítið hringform með gati. Setjið hnetur og möndlur í matvinnsluvél og hakkið fremur smátt. Þeytið saman eggjahvítur og sykur þar til blandan er stíf og hreyfist ekki í skálinni sé henni hvolft. Blandið hnetunum varlega saman við með sleikju (takið gjarnan svolítið af hnetum frá til þess að skreyta með). Bakið í 25-30 mín. Látið kökuna kólna áður en hún er tekin úr forminu. Bræðið súkkulaði og smjör varlega saman og smyrjið yfir kökuna. Skreytið með söxuðum hnetum og möndlum.
Á flótta
Salt fjallar um leyniþjónustukonuna Evelyn Salt sem sór þess eið að þjóna föðurlandi sínu í einu og öllu. Það reynir hins vegar á tryggð hennar þegar svikari ásakar hana um að vera rússneskur njósnari. Salt leggst á flótta og notar áralanga þjálfun sína og reynslu til að komast hjá því að verða handsömuð en jafnframt reyna að sanna sakleysi sitt.
Prinsessan bjargar heiminum
Wonder Woman var fyrst kynnt til sögunnar í Batman vs. Superman í fyrra og hefur nú fengið sína eigin mynd sem gefur innsýn í sögu persónunnar. Áður en hún varð Wonder Woman var Díana prinsessa Amazónanna og mikill stríðsmaður. Bandarískum herflugmanni skolar upp á strendur Themyscira og hann segir Díönu frá hörmungarástandinu sem ríkir í heiminum en sagan gerist á tímum fyrstu heimsstyrjaldarinnar. Díana ákveður að fara frá paradísareyju sinni og halda til Lundúna til að binda endi á stríðið.
Fyrst kvenna
Hermenn Bandaríkjahers eru oft kallaðir G.I. Joes en myndin G.I. Jane fjallar um Jordan O´Neill liðþjálfa sem reynir að verða fyrsta konan í sjóhernum. Í viðræðum við tilvonandi yfirmann í sjóhersins hvetur stjórnin, sem skipuð er af öldungardeildarþingmönnum, hann til að jafna hlutfall kynjanna í sjóhernum. Hann leggur til að þau velji kvenþáttakanda og ef hún kemst í gegnum inntökuprófin fyrir úrvalsdeild sjóhersins muni sjóherinn verða að fullu opinn konum. O´Neill fær þetta verkefni í hendurnar og enginn býst við að henni takist það, enda gefast 60% allra karlmanna sem reyna við þessi próf upp. O´Neill ætlar hins vegar að sanna að hún og konur almennt geti þetta. En ýmislegt fleira liggur að baki.
Óhrædd í hringnum
Million Dollar Baby fjallar um hina efnilegu hnefaleikakonu Maggie Fitzgerald. Hún vill æfa með besta þjálfaranum, Frankie Dunn en hann gefur lítið fyrir það í fyrstu og segist engan áhuga hafa á að þjálfa konu. Dunn lifir einmanalegu lífi því dóttir hans talar ekki við hann og hann á fáa vini. Maggie er hins vegar hörkutól sem lætur ekki neita sér. Dunn slær til að lokum og Maggie sannar ekki einungis að hún er boxarinn sem hann hefur alltaf dreymt um að þjálfa, heldur einnig vinur sem fyllir upp í tómið í lífi hans.
Friðrik Erlingssson er handritshöfundur barnateiknimyndarinnar Lói, þú flýgur aldrei einn, sem er sú fyrsta sinnar tegundar í fullri lengd hér á landi. Kvikmyndin, sem frumsýnd var í byrjun mánaðarins tók rúm sex ár í framleiðslu og er önnur dýrasta teiknimynd sem gerð hefur verið hér á landi.
Friðrik segir hugmyndina að handritinu hafi kviknað á Eyrarbakka. „Maður þarf ekki að dvelja lengi á Eyrarbakka til þess að verða var við farfuglana. Þeir eru áberandi bæði á vorin þegar þeir koma að landinu og svo á haustin þegar þeir hópast niður í fjöru áður en þeir hefja langflugið suður á bóginn. Rétt fyrir norðan Eyrarbakka er svo eitt stærsta fuglafriðland í Evrópu, svo þeir eru mjög nálægir á Bakkanum og söngur þeirra er viðvarandi yfir sumarið, bæði á nótt sem degi. Hinar mismunandi fuglategundir eru líka mjög afgerandi og skemmtilegar persónur og hver tegund með sinn eigin persónuleika, tjaldurinn og stelkurinn eru báðir svolítið taugaveiklaðir, spóinn yfirvegaður, hrossagaukurinn alltaf að segja brandara og kvikindislegur hlátur stokkandanna hljómar úr sefi einhvers staðar.
Sagan snýst að stórum hluta um baráttu upp á líf og dauða, og dauðinn kemur við sögu, því hann er jú órjúfanlegur hluti af lífinu og þá ekki síst í hinni hörðu lífsbaráttu farfuglanna. Hins vegar er dauðinn viðkvæmt umfjöllunarefni í mörgum samfélögum og margir erlendir framleiðendur eru viðkvæmir eða hræddir við að standa að sögum sem búa yfir íslenskri hreinskilni í þessum efnum.“
Friðrik segir sögur fyrir börn mikilvægustu verkefni allra höfunda, hvort sem um er að ræða bækur eða kvikmyndir. „Það er stór ábyrgðarhluti að semja sögu fyrir börn eða unglinga, því fólk á þessum aldri er alla jafnan opnara, einlægara og hrekklausara heldur en fullorðið fólk.
Ef höfundar geta ekki sagt sögur frá hjartanu, þá ættu þeir ekki að skrifa fyrir ungt fólk. En sögur sem koma frá hjartanu munu snerta við öðrum hjörtum, og þá hefur sagan öðlast raunverulegan tilgang.”
Ítarlegt viðtal við Friðrik má finna í nýjustu Vikunni.
Völvan, vitundarvakning um málefni píkunnar, hefur birt nýtt myndband sem heitir einfaldlega Píkuskoðun. Í myndbandinu er tónlistarkonan Salka Sól til að mynda tekin tali og spurð út í píkuskoðun.
Hún segist hafa fengið bók sem unglingur þar sem kona sat með spegil að skoða á sér kynfærin og hafi því ákveðið að gera slíkt hið saman.
„Mér hafði ekki dottið þetta í hug. Það fyrsta sem ég gerði var að ná í spegil og skoða á mér píkuna. Ég gat horft í svona hálfa sekúndu,“ segir Salka Sól, sem brá greinilega yfir því sem hún sá.
„Það er skrýtið að lifa í líkamanum sínum í geðveikt langan tíma og þekkja líkama sinn og maður sér sig í spegli. Svo allt í einu sér maður einhvern hlut á líkamanum sínum sem maður vissi ekki hvernig leit út.“
Seinna í myndbandinu segir Salka það mikilvægt fyrir konur að skoða á sér píkuna, en eins og kemur einnig fram í myndbandinu er ekki sjálfgefið að konur treysti sér í það.
„Ég held að það sé brjálæðislega mikilvægt að skoða á sér píkuna. Bara reglulega. Því hún breytist. Hún hlýtur að breytast. Skoða hana í alls konar ástandi, rakaða eða órakaða eða eitthvað.“
Það eru Inga Björk Bjarnadóttir, Ingigerður Bjarndís Ágústsdóttir og María Hjarðar sem standa að Völvunni, en þær vilja vitundarvakningu á öllu sem viðkemur píkunni. Myndbandið Píkuskoðun má sjá hér fyrir neðan.
Svefnherbergið er staðurinn þar sem þú átt að geta slakað á, á leið þinni inn í draumalandið. Hér eru nokkur ráð um það hvernig hægt er að gera svefnherbergið að kósí griðastað.
1. Dúnmjúk sængurföt
Veldu sængina þína og sængurföt af kostgæfni og ekki hika við að eyða aðeins meiri peningum til að eignast það sem þig langar mest í, svo að ekki sé talað um rúmið sjálft – við verjum jú stórum hluta ævi okkar í svefnherberginu. Ekkert er yndislegra en að sökkva sér í brjálæðislega þægilegt rúm.
2. Rétti ilmurinn
Val á rétta ilminum fer eftir smekk hvers og eins en lavender er vinsælasta ilmkjarnaolían fyrir slakandi andrúmsloft. Hægt er að fá ýmisskonar sprei eða olíur til að setja beint á koddann en þá þarf að varast að setja of mikið. Einnig má kveikja á ilmkertum og ilmolíubrennurum en passa að fara að öllu með gát með því að hafa eldinn í öruggum stjökum á öruggum stöðum, langt frá gardínum og værðarvoðum, og slökkva áður en farið er að sofa.
3. Motta sem faðmar fæturna
Rétt gólfmotta er sannarlega eitthvað sem vert er að hugsa út í að fá sér – motta sem faðmar fæturna þegar þú stígur fram úr á morgnana. Veldu þér til dæmis þykka og grófa flosmottu eða mjúkt lambaskinn. Að auki eru margskonar mottur á markaðnum og aðalmálið að þér finnist mottan passa við annað í herberginu og fílir liti og gerð vel.
4. Málaðu herbergið
Ekki hika við að mála herbergið og það er óþarfi að óttast að nota liti. Ef þú velur mjög dökka eða skæra liti getur verið sniðugt að velja aðeins einn vegg fyrir þann lit en hafa hina veggina hlutlausa. Djúprauður, súkkulaðibrúnn og beislitur gefa til dæmis mjög kósí fíling. Veggfóður er líka mikið í tísku núna og ekki vitlaust að fá sér svoleiðis til að flikka upp á svefnherbergið.
5. Rúmteppi
Það er gott að venja sig á að búa um rúmið á morgnana því það er svo miklu notalegra að koma að því þannig þegar maður fer þreyttur að sofa á kvöldin. Þá er ekki verra að eiga fallegt rúmteppi sem í senn gerir rúmið snyrtilegt og lífgar upp á herbergið, hvort sem þú velur teppi í hlutlausum stíl eða jafnvel handprjónað eða heklað ömmuteppi úr dúllum.
Eldhús eru alls konar; stór og smá, litrík, klassísk, stílhrein, smart, flippuð og svo framvegis.
Hús og híbýli teymið er alltaf að mynda falleg eldhús og hér eru tvö algjörlega æðisleg; annað er stílhreint og hlýlegt en hitt er sannkallað pastel-partí með retro yfirbragði.
Þetta litfagra og skemmtilega eldhús er undir súð. Eigendur þess tóku það í gegn og eru ánægðir með hvað það tók miklum og skemmtilegum breytingum fyrir tiltölulega lítinn pening.
,,Mér finnst afar mikilvægt að vera með plöntur og liti í þessu rými, þar sem eldhúsið er mjög bjart og sólin skín beint inn í það nánast allan daginn, litirnir og plönturnar fá að njóta sín rosalega vel,“ segir eigandi eldhússins bjarta.
,,Svo finnst mér einnig nauðsynlegt að umkringja sig björtum og skemmtilegum litum þegar líða fer á skammdegið.“
Innréttingin er upprunaleg frá 2001 en hún var sprautuð hvít og svo voru settar höldur frá versluninni Brynju.
Hús og híbýli teymið kíkti á gullfallegt eldhús á Selfossi, fyrir eldhúsblaðið, hjá þeim Ingibjörgu og Guðmundi sem Sæbjörg Guðjónsdóttir innanhússarkitekt hannaði fyrir ekki svo löngu.
Ingibjörg og Guðmundur vildu fá opið eldhús með góðu vinnurými og plássi fyrir stórt borðstofuborð og útkoman er hin glæsilegasta. Þetta er hlýlegt, tímalaust og smart eldhús.
Gólfið er flotað og lakkað, innréttingin er frá Fagus og borðplatan er marmari.
Texti / Sigríður Elín Ásmundsdóttir og María Erla Kjartansdóttir
Myndir / Hákon Davíð Björnsson
Saga hinnar 21 árs Belen Aldecosea hefur náð athygli heimsins, en hún er harla óvenjuleg. Þann 21. nóvember síðastliðinn var Belen bókuð í flug með flugfélaginu Spirit frá Baltimore til Suður-Flórída. Hún segist hafa hringt í flugfélagið til að athuga hvort að hamsturinn hennar Pebbles, sem læknir skrifaði uppá að væri stuðningsdýrið hennar, mætti fljúga með henni. Belen segir að svarið frá flugfélaginu hafi verið jákvætt.
En þegar að Belen mætti í flug sagði starfsmaður flugfélagins að dýrið mætti ekki fljúga. Ráðlagði starfsmaðurinn henni að sturta hamstrinum niður inni á einu salerni flugvélarinnar svo hún gæti flogið með vélinni. Og þar sem þetta var í aðdraganda þakkargjörðarhátíðarinnar voru allir vinir Belen uppteknir og hún of ung til að leigja sér bílaleigubíl og keyra.
Það endaði því með því að hún gerði eitt það erfiðasta sem hún hafði gert á lífsleiðinni – hún sturtaði Pebbles niður.
„Hún var hrædd. Ég var hrædd. Það var hræðilegt að setja hana í klósettið. Ég varð mjög tilfinningaleg. Ég grét. Ég sat í góðar tíu mínútur á salerninu og grét,“ segir Belen í samtali við Miami Herald.
Öll nagdýr bönnuð
Belen íhugar að lögsækja flugfélagið, en forsvarsmenn þess hafa staðfastlega neitað því að starfsmaður á þeirra vegum hafi sagt henni að sturta hamstrinum niður.
Belen fékk Pebbles síðasta haust eftir að hún fékk kýli á hálsinn og talið var að hugsanlega væri um krabbamein að ræða. Kýlið reyndist síðar vera jákvætt. Hún býr í Baltimore en bókaði flug til Suður-Flórída til að láta fjarlægja kýlið.
Forsvarsmenn flugfélagsins játa að mistök hafi átt sér stað þegar að starfsmaður hafi sagt Belen að hamsturinn mætti koma með í flugið, en nagdýr af öllu tagi eru bönnuð í flugum hjá Spirit. Þeir segja einnig að Belen hafi verið boðið að fljúga níu tímum seinna svo hún hefði tíma til að finna stað fyrir hamsturinn að vera á.
„Gögn okkar sýna að gesturinn þáði seinna flugið án mótmæla,“ segir Derek Dombrowski, talsmaður flugfélagsins í samtali við BuzzFeed News og bætir við að Belen hafi verið boðinn afsláttarmiði vegna óþægindanna en að flugfélagið hafi ekki heyrt meira í henni. Belen sturtaði dýrinu niður eftir að hún þáði boð um að fljúga síðar um daginn og segir að starfsmaður hafi stungið uppá því að hún losaði sig við dýrið á þann hátt eða sleppti því lausu.
Omarosa Manigault er einn af keppendunum í sjónvarpsþættinum Celebrity Big Brother. Omarosa vakti fyrst athygli sem keppandi í The Apprentice, undir stjórn Donalds Trump, árið 2004 og réð sig síðar sem samskiptafulltrúa hans þegar hann varð forseti Bandaríkjanna. Hún sagði upp í desember í fyrra, þó margir fjölmiðlar hafi haldið því fram að hún hefði verið rekin.
Í meðfylgjandi myndbandi má sjá Omarosu rifja upp tíma sinn í Hvíta húsinu í spjalli við sjónvarpsstjörnuna, og keppanda í Celebrity Big Brother, Ross Matthews. Hún segist hafa verið að þjóna þjóð sinni þegar Ross spyr hana af hverju í ósköpunum hún réði sig í vinnu hjá Trump.
Hún segir enn fremur að hún hafi reynt að hafa hemil á forsetanum, til dæmis á samfélagsmiðlum, en hann fer oft mikinn á Twitter.
„Ég reyndi að vera sú manneskja en allir í kringum hann réðust á mig. Þeir sögðu: Haldið henni frá honum. Ekki veita henni aðganga að honum. Ekki leyfa henni að tala við hann,“ segir Omarosa kjökrandi.
Ross spyr hana síðan hvort að bandaríska þjóðin ætti að hafa áhyggjur af hegðun forsetans. Þá kinkar hún kolli.
„Þetta verður ekki í lagi. Það verður það ekki. Þetta er svo slæmt.“
Fyrri undankeppnin í Söngvakeppninni fer fram á laugardagskvöldið og keppa sex lög um að komast í úrslitin þann 3. mars næstkomandi.
Við fengum Eurovision-sérfræðingana með meiru, Flosa Jón Ófeigsson og Kristínu Kristjánsdóttur til að spá í spilin og reyna að sjá fyrir hvaða þrjú lög komast áfram í úrslitin.
Lagið ekki nógu sterkt en treysta á gott „show“
Ég mun skína – Þórunn Antonía
Flosi: „Ég elska gamla stöffið sem Þórunn Antonía hefur búið til. Ég er mikill aðdáandi en ég verð að segja að ég varð fyrir pínu vonbrigðum með lagið af því að hún er svo flott. Hún verður frábær á sviði og mun negla þetta þegar kemur að beinu útsendingunni. Mér finnst lagið bara ekki nógu sterkt ef ég á að vera hreinskilinn. Það þarf að vera rosa „show“ ef hún ætlar að grípa fólkið. Þetta atriði minnir mig á Svölu í fyrra, nema ekki eins gott lag.“
Kristín: „Ég veit ekki alveg með þetta. Hún er náttúrulega rosalega hæfileikarík söngkona en þetta er ekki hennar besta. Eiginlega langt því frá. Það er spurning hvort hún skíni það skært að hún komist áfram. Ég ætla ekki að afskrifa hana. Ég vona að hún keyri þetta aðeins upp og geri ekki sömu mistökin og Svala gerði í fyrra, að vera ekki með nógu gott „show“.“
„Ég gæti ekki munað lagið þó að líf mitt lægi við“
Ég og þú – Sólborg Guðbrandsdóttir og Tómas Helgi Wehmeier
Flosi: „Ég veit ekki hvort fólk eigi eftir að ná laginu. Ég hef pínu áhyggjur af því. Ég hef líka pínu áhyggjur af því að lagið sé raddað allan tímann. Það má ekki vera neitt stress á þeim. Þau eru bæði úr The Voice þannig að þau eru komin með smá reynslu í bankann. Þetta eru svo miklar týpur og flottar. Ef röddin virkar þá er aldrei að vita hvað gerist á laugardaginn. Þetta er eitt af lögunum sem vinnur á.“
Kristín: „Þetta á ekki eftir að fljúga. Ég trúi ekki að tvær svona hrikalega töff manneskjur geti verið með svona arfaslakt lag. Það er ekkert að ske og ég gæti ekki munað lagið þó að líf mitt lægi við. Ég er eiginlega alveg viss um að þau komast ekki áfram.“
Úrelt lag en flottur söngvari
Heim – Ari Ólafsson
Flosi: „Lagahöfundurinn Þórunn Clausen er náttúrulega reynslubolti í Söngvakeppninni. Ég veit að atriðið verður pottþétt og það verður öllu tjaldað til. Það eru alltaf flott atriði frá Þórunni. Ari sjálfur er okkar vonarstjarna, bara 19 ára gamall. Ég hef engar áhyggjur af flutninginum sjálfum. Spurningin er hvort þetta sé of einfalt eða ekki. Það verður að koma í ljós á kvöldinu sjálfu. Þessi hái tónn sem allir eru að tala um kemur seint í laginu. Ef að fólk fílar ekki lagið nær það ekki þessum svaka tóni sem hann á eftir að rústa. En hann er gullfallegur strákur og myndavélin mun örugglega elska hann.“
Kristín: „Mér finnst Ari rosa flottur. En mér finnst þetta lag sjúklega leiðinlegt. Mér finnst það rosalega úrelt. Það hefði kannski virkað fyrir fimmtán árum. Hann er rosa flottur söngvari og tilvonandi stjarna. Ég hef á tilfinningunni að lagið eigi ekki eftir að gera mikið. Það gæti hins vegar verið svarti hesturinn í keppninni. Ég sé það samt ekki alveg því lagið er svo auðgleymanlegt.“
Ást við fyrstu sýn
Kúst og fæjó – Heimilistónar
Flosi: „Þetta er náttúrulega bara ást við fyrstu sýn. Þetta er landslið leikkvenna á Íslandi og ég hef engar áhyggjur af flutningnum. Þetta er eina lagið sem verður pottþétt á íslensku þannig að þeir sem búast ekki við að við syngjum á ensku í keppninni þurfa að setja X við Heimilistóna. Þetta er svolítið gamaldags lag og mömmufílíngur í því. Það er eitthvað sem grípur mig við þetta. Þetta atriði er eins og Daði Freyr í fyrra. Fólk hélt að hann væri grínatriði, alveg eins og það heldur með Heimliistóna en þeim er alvara með þetta. Þetta er sko ekkert grín og ég held að þetta fljúgi áfram.“
Kristín: „Kúst og fæjó er að fara áfram. Þetta er eina lagið í allri keppninni sem ég man alltaf. Ég er alltaf að syngja það. Þær hala inn eitthvað af stigum og ég spái þeim alla leið í einvígið. Þessi retro stíll á laginu og þreytta sixtís húsmóðirin – etta virkar allt saman. Þetta er allt öðruvísi, eins og Daði í fyrra. Ég segi að þær verði Daðinn í ár.“
Fer örugglega áfram
Aldrei gefast upp – Fókus hópurinn
Flosi: „Ég held að þetta sé eitt af lögunum sem fer áfram. Þetta eru fimm “solid” söngvarar. Þau eru öll með reynslu í bankanum úr The Voice. Þau tóna rosalega vel saman. Raddirnar þeirra blandast svo vel saman. Þau eru hress og skemmtileg. Þau eru miklar keppnismanneskjur en taka sig ekki of alvarlega. Ég er smá sökker fyrir góðum röddum og harmoníum og ég hef engar áhyggjur af því að þetta klikki. Þetta er það lag í fyrri undankeppninni em ætti örugglega að fara áfram.“
Kristín: „Það er sennilega að fara áfram. Ég er nokkuð viss um það. Þau eru öll frekar sterk og harmonæsa svo vel. Þetta lag hefur „major hook”. Ég spái þeim áfram.“
Svarti hesturinn í keppninni
Litir – Guðmundur Þórarinsson
Flosi: „Ég held að hann gæti orðið svarti hesturinn í keppninni. Lagið er frekar ferskt. Svo verð ég að segja, sem samkynhneigður karlmaður, að það er ekki leiðinlegt að sjá hann uppi á sviðinu. Þetta er ekki uppáhaldslagið mitt persónulega. Ég er Euro-skvísa þannig að ég elska glimmer og ostapopplög. En það er eitthvað við þetta. Þetta gæti orðið lagið sem bankar á dyrnar.“
Kristín: „Hann er alveg ágætur og kom svolítið á óvart. Ég vil sjá hann í beinni útsendingu. Guðmundur er óskrifað blað. Ég vil sjá hvernig hann tæklar þetta. Þetta lag er rosalega lágstemmt. Ef hann neglir þetta þá ætla ég ekki að afskrifa hann en ef þetta verður bara hann með gítarinn þá gæti þetta vel týnst.“
Þá er komið að stóru spurningunni – telja Flosi og Kristín að sigurlagið, lagið sem fer fyrir Íslands hönd í Eurovision í Lissabon í maí, leynist í fyrri undankeppninni?
Flosi: „Fyrir mér eru tvö atriði á laugardaginn sem eiga möguleika á að fara í einvígið, það eru Heimilistónar og Fókus hópurinn. En þetta fer eftir því hvernig seinni undankeppnin verður.“
Kristín: „Ég hef aldrei rétt fyrir mér en ég held að sigurlagið leynist í hinum riðlinum. Hins vegar held ég að Kúst og fæjó eigi efitr að fara langt.“
Bráðum mun Theodóra koma á markað með sínar eigin gallabuxur.
Theodóra Elísabet Smáradóttir, hönnuður og framkvæmdarstjóri, byrjaði ung að skapa og sjá tækifæri í nánast öllu í umhverfinu. Hún rekur hönnunarfyrirtæki og verslun í Kópavogi ásamt eigimanni sínum þar sem hún selur meðal annars hinar vinsælu MuffinTopKiller®-buxur sem halda vel utan um miðjusvæði líkamans.
„Ég hafði fengið mig fullsadda af illa sniðnum buxum með vonlausum streng í mittinu sem annað hvort var svo víður að buxurnar héldust ekki uppi eða með alltof þröngum mjóum streng sem skarst inn í mittið og bjó til það sem oft er kallað „muffintop“ eða hliðarspik sem kemur upp úr strengnum. Ég fór af stað í þróunarvinnu til að geta hafið framleiðslu á MTK-efninu í teygjuna. Þetta efni er framleitt fyrir okkur erlendis og hvergi annarsstaðar hægt að fá. Gott aðhald og þægindi er helsta sérstaða buxnanna.Teygjan mótar miðjusvæði líkamans og gefur þetta góða aðhald sem konur eru sjúkar í. Þær eru þægilegar, styðja vel við magann og móta línurnar í stað þess að búa til muffintop eins og margar aðrar buxur gera. Buxurnar henta öllum konum, á öllum aldri og í öllum stærðum. Það er alveg sama hvernig við erum í laginu, það skiptir okkur allar máli að líða vel yfir daginn og finna til frelsis“.
Dýrmætur lærdómur frá ömmu
Sköpunarkrafturinn hefur fylgt Theodóru frá barnæsku og saumaáhuginn kviknaði um 4-5 ára aldurinn þegar amma hennar kenndi henni á saumavél. „Amma mín, Theodóra Elísabet „nafna mín og vinkona“ eins og við kölluðum okkur, er fyrirmyndin mín. Strax á þessum aldri var ég með miklar hugmyndir um hvað ég vildi skapa og amma leyfði þessum sköpunarkrafti að blómstra. Hún stoppaði mig aldrei af með því að segja hvernig hlutir ættu að vera samkvæmt bókinn en var alltaf tibúin á hliðarlínunni svo ég færi mér ekki að voða í sumum af þessum framkvæmdum. Hún var reiðubúin að aðstoða mig um leið og ég var opin fyrir hennar ráðleggingum þegar ég sá að hlutirnir gengu ekki alveg upp eins og þeir höfðu gert í huga mér. Það dýrmætasta sem hún kenndi mér var að láta hugann ráða og finna út hvernig ég gat leyst það sem ég sá fyrir mér. Stundu gengu hlutirnir upp og stundum alls ekki og á því lærði ég einmitt mest. Ég sé í dag að það var leið ömmu til að kenna mér án þess að takmarka hugann. Svona lærði ég að allt er hægt og ég trúi því enn í dag – það er bara spurning hvað þú ert tilbúin að leggja á þig til að framkvæma það. Ég reyni eftir bestu getu að kenna dætrum mínum það sama – setja sér engar hindranir. Ef þær mæti lokuðum dyrum að finna þá opin glugga til að skríða inn um. Gefast ekki upp en það sé í lagi að hætta ef þær telji það rétt. Ég er enn að læra þann hluta, að það megi hætta að vel ígrunduðu máli án þess að það kallist uppgjöf.“
Mikilvægar fjölskyldustundir
Teygjan í MuffinTopKiller®-buxunum mótar miðjusvæði líkamans og gefur gott aðhald.
Eignmaður Theodóru er Sigurður Jónsson og hann starfar að fullu með henni í rekstrinum. Þau eiga þrjár dætur sem heita Viktoría Sól, 5 ára, Elísabet Sól, 2 ára, og Ísabella Sól, 5 mánaða. „Það gengur vel að samtvinna þetta en getur auðvitað verið krefjandi suma daga ekki síst fyrir dæturnar sem þurfa oft að þvælast með mömmu og pabba á fundi og jafnvel á sýningar erlendis. Við erum mjög meðvituð um að ofbjóða þeim ekki og pössum að hafa svoleiðis daga líka skemmtilega fyrir þær. Við erum vöknuð og byrjuð að vinna fyrir klukkan 6 á morgnana og hættum að vinna klukkan 16 þegar tvær elstu eru búnar í leikskólanum. Yngsta stelpan er með okkur foreldrunum allan daginn og verður heima til alla vega eins árs aldurs þegar hún fer í dagvistun. Við vinnum ekki um helgar heldur nýtum tímann saman enda er fjölskyldan í fyrsta sæti hjá okkur. Stelpurnar okkar er mikil partídýr sem vilja helst vera í eða halda matarboð með vinum okkar og fjölskyldu allar helgar og njóta lífsins saman sem við svo sannarlega gerum,“ segir Theodóra.
Þau hjónin reka verslun að Hlíðarsmára 4 í Kópavogi og margt áhugavert framundan. Auk MTK-buxnanna eru til sölu ýmis annar fatnaður sem Theodóra hannar. Í hinum helmingi verslunarinnar eru barnavörur til sölu, meðal annars barnavagn sem hún lét framleiða sérstaklega fyrir íslenskar aðstæður.
Til eru ófáar kvikmyndir sem fjalla um hið flókna en fallega samband sem á sér stað milli móður og dóttur. Hér eru nokkrar sem sýna kómísku hliðina.
Svaðilför í frumskógi
Þegar kærasti Emily segir henni upp ákveður hún að fara með ofurvarkára móður sína í ævintýralegt frí til Ecuador. Það endar ekki betur en svo að þeim er rænt. Þær átta sig fljótlega á því að þær verða að vinna saman, þrátt fyrir að vera gjörólíkar týpur. Þessi reynsla hefur góð áhrif á samband þeirra og þær bindast fyrir vikið traustari böndum við það að reyna að losna úr prísundinni í frumskóginum.
Samþykktur af mömmu
Í myndinni Because I Said So kynnumst við Daphne Wilder. Hún er móðir sem þekkir engin mörk og vill vera með stöðug ítök í lífi dætra sinna. Dætur hennar þrjár eru geðlæknirinn Maggie, hin kynþokkafulla og óábyrga Mae og hin óörugga en aðlaðandi Milly – sem er ekki enn gengin út og veit ekki hvernig á að haga sér þegar kemur að karlmönnum. Til að koma í veg fyrir að yngsta dóttirin geri sömu mistök og hún gerði ákveður Daphne að finna sjálf fullkominn mann fyrir hana og koma þeim saman án þess að Milly viti.
Hættulegt tvíeyki
Þegar kemur að því að svindla á milljónamæringum eru mæðgurnar Maxine Paige sannir fagmenn. Svikamyllan í myndinni Heartbreakers er einföld; fyrst giftist Maxine þeim, síðan tælir Paige þá og svo fer Maxine fram á skilnað með tilheyrandi skilnaðarpakka. Þegar þessu er lokið snúa þær sér að næsta fórnarlambi. Allt gengur eins og í sögu þar til Paige brýtur meginreglu þeirra mæðgna og verður ástfangin í alvöru af ungum barþjóni. Núna þarf Maxine að passa upp á að missa ekki dótturina og besta glæpafélaga sem hún mun nokkurn tíma eignast auk þess sem hún situr uppi gift hinum miður geðslega milljarðamæringi William Tensy.
Hollywood-uppeldi
Handritshöfundur myndarinnar Postcards from the Edge og bókarinnar sem hún er byggð á er engin önnur en leikkonan Carrie Fisher. Í myndinni er sagt frá leikkonunni Suzanne sem er nýkomin af meðferðarstofnun vegna eiturlyfjafíknar. Hún neyðist til að flytja aftur heim til móður sinnar sem hún sagði skilið við fyrir mörgum árum. Suzanne lifði í skugga móður sinnar alla sína æsku en Doris er hávær, stjórnsöm, sjálfhverf og með mikið keppnisskap. Hún á það til að gefa dóttur sinni góð ráð, hvort sem hún sækist eftir því eða ekki. Myndin er mjög kómísk og Meryl Streep og Shirley Maclaine fara á kostum í hlutverki mæðgnanna. Margar getgátur hafa verið uppi um það hvort samband mæðgnanna væri byggt á sambandi Carrie Fisher og móður hennar Debbie Reynolds en Carrie neitaði því alla tíð.
Ólíkar en samrýndar
Myndin Anywhere but Here sýnir hversu ólíkar mæðgur geta oft verið. Adele August er sérvitur kona sem fær einn góðan veðurdag alveg nóg af litla bænum sem hún býr í. Hún yfirgefur fjölskylduna og annan eiginmann sinn og flytur til Beverly Hills ásamt dóttur sinni. Hún gerir það til að láta óræða og óraunhæfa drauma sína rætast. Dóttir hennar Ann er alls ekki sátt við flutningana eða við litríka hegðun móður sinnar. Adele skráir Ann í gagnfræðiskóla í Beverly Hills með það fyrir augum að hún kynnist börnum frægra leikara, fari síðan í UCLA og verði leikkona sjálf. Ann er hins vegar staðráðin í því að fara í háskóla á austurströndinni. Á endanum sættast þær hvor við aðra og læra að meta hversu ólíkar þær eru.
Bræðralag við Cornell-háskóla í Bandaríkjunum hefur verið sett á tveggja ára skilorð eftir að skólayfirvöld komust að því að bræðralagið hélt sérstaka keppni þar sem nýir meðlimir kepptust um að sofa hjá þyngstu konunni. Var keppnin kölluð “pig roast”, sem væri hægt að þýða sem svínaveisla.
Bræðralagið Zeta Beta Tau ku hafa haldið keppnina á síðasta ári. Meðlimir fengu stig fyrir að sofa hjá konum. Ef jafntefli kom upp, fékk sá meðlimur verðlaun sem hafði sofið hjá þyngstu konunni. Meðlimunum var sagt af sér eldri meðlimum að segja konunum ekki frá keppninni.
Rannsókn á málinu lauk í janúar, en meðlimir bræðralagsins munu þurfa að sækja námskeið um kynferðislegt ofbeldi og áreiti.
Í tilkynningu á Facebook-síðu bræðralagsins kemur fram að keppnin hafi ekki verið samþykkt af yfirstjórn bræðralagsins og að forsvarsmenn bræðralagsins væru gjörsamlega miður sín yfir þessu athæfi.
„Við trúum því varla að þetta hafi verið gert af þeim sem við köllum bræður. Í kjölfarið höfum við hafið sjálfsskoðun til að tryggja að svona gerist ekki aftur hjá neinum sem tengist ZBT eða háskólasamfélaginu,“ segir í tilkynningunni. Þá er því einnig haldið fram að þeir bræður sem fari ekki eftir gildum og hugsjónum bræðralagsins verði reknir úr reglunni.
„Við erum staðráðin í að sýna með aðgerðum okkar að þessi óafsakanlega hegðun verður ekki liðin.“
Ráð við Cornell-háskóla, sem hefur með bræðralög að gera, vinnur nú að því að finna nýjar leiðir til að fræða meðlimi bræðralaga um hvernig þeir styðji við kynjamisrétti í skólasamfélaginu og hvernig hægt sé að breyta hugarfari þeirra í rétta átt.
Raunveruleikastjarnan og frumkvöðullinn Kylie Jenner eignaðist sitt fyrsta barn um mánaðarmótin. Kylie opinberaði svo nafn hnátunnar í gær, miðvikudaginn 7. febrúar, og hefur hún hlotið nafnið Stormi. Með þessari opinberun fylgdi mynd af smárri hendi Stormi halda um hendi móður sinnar.
Internetið nánast sprakk þegar Kylie birti myndina á Instagram og á aðeins nokkrum klukkutímum varð þetta sú mynd á Instagram sem hefur fengið flest læk frá upphafi.
Þegar þetta er skrifað er myndin búin að fá rúmlega fjórtán milljónir læka og hrifsaði Kylie toppsætið af knattspyrnugoðsögninni Cristiano Ronaldo.
Rúmlega 11,3 millónir Instagram-notenda hafa líkað við mynd sem Ronaldo setti inn seint á síðasta ári þegar hann tilkynnti að hann væri búinn að eignast sitt fjórða barn, dótturina Alönu Martinu með kærustu sinni, Georginu Rodriguez. Birti hann fallega mynd af spítalanum sem hitti rakleiðis í mark hjá aðdáendum hans.
Þá hafa rúmlega 11,2 milljónir grammara líkað við mynd sem söngkonan Beyoncé setti inn af sér óléttri snemma á síðasta ári, þar sem hún tilkynnti að hún og eiginmaður hennar, Jay Z, ættu von á tvíburum, sem komu í heiminn um mitt síðasta ár. Þeir hlutu nöfnin Rumi og Sir Carter.
Kylie er nú í sjöunda sæti yfir þær manneskjur á Instagram sem eiga flesta fylgjendur, á eftir stjörnunum Selenu Gomez, Ronaldo, Ariönu Grande, Beyoncé, systur sinni Kim Kardashian og Taylor Swift.
Með tilkomu samfélagsmiðla hafa foreldrar fengið óvænt vopn í hendurnar – að geta gert góðlátlegt grín að börnunum sínum þannig að þau fari hjá sér. Þetta höfum við séð margoft, til dæmis þegar foreldrar endurgera sjálfsmyndir barnanna sinna, börnunum til mikils ama.
Stjörnupabbinn Will Smith hefur nú gengið einu skrefi lengra og ákvað að endurgera mynbandið við lagið Icon, en það er sonur hans Jaden Smith sem flytur lagið. Will gerði þetta til að fagna því að lagið náði þeim stóra áfanga að vera streymt hundrað milljón sinnum á Spotify.
„Til hamingju með 100.000.000 streymi á Spotify, Jaden! Það er æðisleg gjöf fyrir foreldra að dást að börnunum sínum. Haltu áfram að vera þú,“ skrifar Will við myndbandið á Instagram, og má greina vissa hæðni í kveðjunni.
Jaden Smith hefur fetað í fótspor foreldra sinna, en móðir hans er leikkonan Jada Pinkett-Smith, og hefur náð góðum frama í leiklistinni. Hann lék til dæmis á móti föður sínum í kvikmyndinni The Pursuit of Happyness og vakti síðar lukku í endurgerð á The Karate Kid. Í nóvemer í fyrra gaf hann síðan út sína fyrstu plötu, Syre, en lagið Icon er einmitt á þeirri plötu.
Hér fyrir neðan má sjá upprunalegu útgáfuna af myndbandinu við Icon, en faðir hans virðist hafa náð að stæla það ótrúlega vel.
„Ég var þekktur sem íþróttamaður og þegar ég fór úr því í þetta man ég að fólk sagði: Guð minn góður, hvað gerðist?“ segir Noah Kingery í viðtali við vefritið Men’s Health.
Noah segir sögu sína í viðtalinu, en á yngri árum spilaði hann knattspyrnu í Brasilíu. Hann borðaði hollan mat og æfði mikið en þegar hann var átján ára þurfti hann að velja milli þess að bjarga sambandi sínu við kærustu sína í heimabænum Dallas í Bandaríkjunum eða halda áfram að láta ferilinn blómstra í Brasilíu. Hann valdi að snúa aftur heim til að halda kærustunni.
Sambandið hins vegar gekk ekki upp og það fékk mikið á Noah. Hann leitaði að huggun í mat og áfengi og þyngdist um rúm 96 kíló á einu ári. Þá var hann orðinn rúm 160 kíló og hafði aldrei verið jafn þungur.
Alltaf maðurinn á bak við tjöldin
Árið 2009 flutti Noah til Los Angeles til að stofna sitt eigið fatamerki, Prep Couture, en meðal viðskiptavina hans voru Kanye West og Justin Bieber.
„Ég gat ekki klæðst neinu sem ég bjó til. Ég var alltaf maðurinn á bak við tjöldin og vildi ekki láta sjá mig,“ segir Noah. Þáttaskil urðu í lífi hans ári síðar þegar náinn vinur hans lést í bílslysi þegar ökumaður undir áhrifum áfengis keyrði á hann.
„Ég sagði við sjálfan mig: Ókei, ég verð að hætta að drekka og ná stjórn á þessu. Ég þarf að verða aftur fótboltamaðurinn sem ég var í miðskóla.“
Léttist um 67 kíló en sjálfstraustið vantaði
Noah ákvað að borða og æfa eins og þegar hann var í formi. Hann hætti að borða sjö þúsund kaloríur af kínverskum mat á dag og byrjaði að borða hreinan mat. Hann æfði af fullum krafti og lyfti lóðum til að byggja upp vöðvamassa. Og hann hætti að drekka. Allt þetta varð til þess að hann léttist um 67 kíló.
„En ég fékk ekki meira sjálfstraust. Mér fannst ég enn vera rúm 160 kíló. Ég var alltaf að berjast við það,“ segir Noah og níu mánuðum síðar féll hann.
„Ég vildi ekki hugsa um hve illa mér leið þannig að ég féll aftur í mína gömlu fíkn – áfengi.“
Noah byrjaði í kjölfarið að borða óhollan mat og hætti að æfa. Fljótlega bætti hann nánast öllu aftur á sig og var fljótlega orðinn 145 kíló. Á þessum tímapunkti íhugaði hann sjálfsvíg.
„Mér fannst eins og ég væri með pálmann í höndunum fjárhagslega en í einkalífinu fannst mér ég vera tómur. Mig langaði ekki að halda áfram að lifa. Þannig að einn dag keypti ég vodkaflösku og verkjastillandi og fór uppá 31. hæð í húsinu sem ég bjó í. Mig langaði til að hoppa. En einn af bestu vinum mínum hringdi og ég sagði honum hvað ég ætlaði að gera og hann flýtti sér til mín. Næsta sem ég man er að hann sagði: Ef einhver getur breyst, getur þú það en þú verður að finna sjálfan þig. Ef þessi stund breytir þér ekki, þá gerir ekkert það,“ segir Noah.
Hann ákvað að breyta fíkninni í eitthvað gott – að borða góðan og hollan mat og hugsa vel um líkamann. Hann ákvað að æfa aftur eins og hann gerði og í dag æfir hann fimm daga vikunnar í einn til tvo tíma. Hann borðar fjórar máltíðir á dag og borðar máltíð sem er rík af kolvetnum annað hvort fyrir eða rétt eftir æfingar. Hann borðar mikið af próteini, eins og fitulítið kjöt, egg og gríska jógúrt. Hann velur að borða eingöngu mat sem honum finnst góður.
„Þú verður að elska það sem þú borðar. Ef þú sérð þig ekki borða það næstu þrjá mánuði þá er það ekki að fara að virka.“
Getum ekki breytt gærdeginum
Í dag er Noah 75 kíló og vinnur sem næringarfræðingur. Nú nýtur hann lífsins við að hjálpa öðrum og hjálpaði meira að segja móður sinni að losa sig við 48 kíló.
„Ég hef verið þarna. Ég veit hvernig það er að reyna að losa sig við slæma ávana. Mig langaði að hafa tilgang í vegferð annarra og sjá hvernig líf þeirra breytist,” segir Noah og bætir við.
„Við getum ekki breytt því sem gerðist í gær en við getum gert það sem við getum í dag til að breyta morgundeginum.“
Átakið Sjúk ást er nýtt átak sem Stígamót hleypti af stokkunum í gær. Um er að ræða forvarnaverkefni gegn ofbeldi sem ætlað er ungu fólki á aldrinum 13 til 20 ára.
Markmið átaksins er að vekja athygli á einkennum heilbrigðra, óheilbrigðra og ofbeldisfullra sambanda. Á vefsíðu átaksins er að finna aragrúa af upplýsingum og ákváðum við hjá Mannlífi að kynna okkur hvað það er sem einkennir andlegt ofbeldi, ofbeldi sem oft erfitt er að greina eða segja frá.
Andlegt ofbeldi felur í sér hótanir, niðurlægingu, óvelkomið og yfirþyrmandi eftirlit svo sem með endalausum skilaboðum, auðmýkingu, ógnun, einangrun eða ofsóknir.
Andlegt ofbeldi getur líka birst á duldari hátt:
Að uppnefna þig og gera lítið úr þér
Að öskra á þig
Að niðurlægja þig viljandi fyrir framan aðra
Að koma í veg fyrir að þú hittir eða talir við vini þína eða fjölskyldumeðlimi
Að segja þér í hverju þú átt að vera eða hvernig þú átt að haga þér
Að eyðileggja eigur þínar í bræðiskasti (henda hlutum, kýla í vegg, sparka í hurð o.s.frv.)
Að notast við samfélagsmiðla eða síma til að stjórna þér, ógna eða niðurlægja.
Að nota hegðun þína sem afsökun fyrir ofbeldi eða óheilbrigðri hegðun.
Að saka þig um framhjáhald og fyllast afbrýðisemi yfir samskiptum þínum við annað fólk
Að ofsækja þig
Að hóta að fremja sjálfsvíg til að koma í veg fyrir að þú slítir sambandinu
Að hóta að skaða þig, gæludýrið þitt eða fólk sem þér er annt um
Að láta þig efast um upplifanir þínar og tilfinningar þannig að þú heldur jafnvel að þú sért að ímynda þér ofbeldið sem þú verður fyrir
Að þrýsta á um kynferðislegar athafnir með því að láta þig fá samviskubit eða saka þig um barnaskap þegar þú vilt ekki gera eitthvað
Að hóta að opinbera einkamál þín, svo sem kynhneigð eða heimilisaðstæður
Að hóta að dreifa viðkvæmum myndum af þér á netinu
Að dreifa ljótum sögum um þig
Er andlegt ofbeldi virkilega ofbeldi?
Samband getur verið óheilbrigt og ofbeldisfullt án þess að það leiði nokkurn tíma til líkamlegs ofbeldis. Andlegt ofbeldi veldur tilfinningalegum skaða og sárum. Stundum verður ofbeldið svo slæmt að þú ferð að trúa því sem maki þinn segir. Þú ferð að halda að þú sért einskis virði, ljót og heimsk manneskja. Þú sannfærist jafnvel um að enginn annar myndi vilja vera í sambandi með þér því stöðug gagnrýni og niðurlæging brýtur niður sjálfsmyndina. Þú gætir jafnvel farið að kenna þér um ofbeldishegðun makans.
RASP: 1 ½ dl góður brauðraspur 2 hnefafylli möndluflögur, kramdar og muldar gróft börkur af 1 sítrónu 6 litlir vorlaukar, fínt saxaðir, notið eins mikið af græna hlutanum og hægt er hnefafylli steinselja, smátt skorin 2 msk. ólífuolía
Blandið öllu vel saman.
800 g laxaflak 1 msk. ólífuolía safi úr 1 sítrónu 1 tsk. grænt dijon-sinnep með kryddjurtum (fine herbes), eða annað gott sinnep gróft sjávarsalt nýmalaður svartur pipar
Hitið ofn í 180°C. Setjið laxaflak í eldfast mót með roðið niður og penslið með olíu og sinnepi og dreypið sítrónusafa yfir. Stráið ríflega af salti og svörtum pipar yfir flakið og hyljið það því næst með brauðraspinu. Bakið í 15-20 mín. og látið síðan standa í 5-10 mín. áður en fiskurinn er borinn fram. Berið gjarnan fram með góðu salati, jógúrtsósu og kartöflum.
Ráð sem gera okkur betur í stakk búin til að takast á við veturinn.
Mörg þekkjum við vetrarblúsinn sem á það til að læðast að okkur á veturna. Hér eru nokkur ráð sem gera okkur betur í stakk búin til að takast á við hann, án þess að missa vitið!
Kveiktu ljósið um leið og vekjaraklukkan hringir.
Kveiktu ljósið um leið og vekjaraklukkan hringir. Að græja sig fyrir vinnudaginn í myrkri gerir þig bara þreyttari og myglulegri.
Klæddu þig vel og taktu þér smágöngutúr í hádeginu. Það kemur ekkert í staðinn fyrir sólarljós, nýttu það litla sem gefst! Fríska loftið gerir einnig kraftaverk.
Planaðu vinahitting strax eftir vinnu. Þér er enginn greiði gerður með að fara beint á Facebook eða að horfa á sjónvarpið uppi í sófa í fósturstellingunni. Hittu vini eða fjölskyldu allavega einu sinni í viku og virkjaðu hláturvöðvana.
Taktu D-vítamíntöflur, þær hafa góð áhrif á skapið. Á haustin og veturna fáum við ekki nóg af D-vítamíni frá sólinni og þurfum smáhjálp.
Skreyttu heimilið með fallegum púðum, nýju rúmteppi eða kertum. Splæstu jafnvel í bjartan lit á vegginn. Þegar það er grátt úti verður að vera bjart og upplífgandi inni!
Afskorin blóm lífga upp á heimilið – og skapið í leiðinni.
Farðu út að leika! Sleðaferðir, skíðaferðir eða aðrar fjölskylduferðir úti gera kraftaverk fyrir sálina.
Drekktu grænt te – það er hollt og getur hjálpað við að ráða bót á depurð sem oft fylgir vetrinum.
Við eigum það til að borða meira af ávöxtum á sumrin, enda úrvalið í hámarki. Haltu áfram að borða ávexti þegar hausta fer, ávextir eru náttúrlegt þunglyndislyf.
Farðu snemma að sofa og fáðu góðan nætursvefn.
Vertu meðvituð/meðvitaður um líðan þína og minntu sjálfa/n þig á að vetrarblúsinn er bara tímabundinn – að vera meðvituð skiptir miklu máli fyrir okkur. Gerðu þér grein fyrir tilfinningum þínum, ekki dæma þær eða reyna að fela þær. Reyndu að sjá allar jákvæðu hliðarnar á vetrinum!
Vefritið Men’s Health fékk vefsíðuna simpatic.us til að framkvæma fyrir sig könnun um algengar kynlífsfantasíur kvenna. Vefsíðan sérhæfir sig í að tengja pör nánar saman með það til hliðsjónar hvað þau vilja gera í kynlífinu.
2700 kvenkyns notendur vefsíðunnar voru spurðir um kynlísfantasíur í könnuninni og gætu niðurstöður komið einhverjum á óvart. Hér eru algengustu fantasíurnar meðal kvenna:
1. Að klæmast
Næstum því 81 prósent kvenna sögðust vilja að makinn sinn klæmdist við þær á meðan á kynlífi stendur. Það hefur oft verið sagt að klúrið tal geti verið mjög örvandi, en mikilvægt er að prófa sig áfram með maka sínum til að finna hvers konar tal virkar í svefnherberginu.
2. Að fara á strippklúbb
Tæplega 70% kvennanna sögðust hafa áhuga á að fara á nektarklúbb með maka sínum, þar sem það þótti spennandi og líklegt til að auka kynferðislega spennu á milli parsins.
3. Fjarstýrt kynlífstæki
63 prósent svarenda höfðu átt dagdrauma um að nota fjarstýrð kynlífstæki, á meðan 44 prósent þeirra sögðust vilja að maki sinn myndi stýra slíku tæki á almannafæri.
4. Bundið fyrir augun
58 prósent þeirra kvenna sem svöruðu sögðust eiga fantasíu um að hafa bundið fyrir augun í samförum. Gætu það verið Fifty Shades of Grey-áhrifin?
Agnes Marínósdóttir, Regina Lilja Magnúsdóttir og Stefanía Svavarsdóttir keppa í seinni undankeppni Söngvakeppninnar þann 17. febrúar næstkomandi með lagið Svaka stuð, eða Heart Attack.
Stöllurnar gáfu nýverið út myndband við lagið og tilkynntu jafnframt að þær koma fram undir hljómsveitarnafninu Slay. En af hverju Slay?
„Góð spurning! Það tók okkur dágóðan tíma að finna uppá nafni en það er eitthvað við Slay sem er töff og það er reffilegt hvernig maður segir það. Fólk tengir þetta oftast við þungarokk en við erum bara í þungadiskó. Aðallega kemur nafnið frá þættinum Ru Paul’s Dragrace sem er þáttur sem allir verða að sjá,“ segir Agnes.
Hún segir tökur fyrir myndbandið hafa gengið afar vel.
„Við tókum þetta alla leið með vindvél og konfetti úti um allt. Ég held að það sé enn konfetti á tökustaðnum,“ segir Agnes og hlær.
„Við vorum í pallíettukjólum og með krullur og með svakalega flott tökulið, þá Heimi Frey Hlöðversson, Jónmund Gíslason, Guðmund Erlings og Aron Þór Árnason. Algjörir snillingar! Það skemmdi ekki fyrir að hafa tvær grúppíur með, þær Nadiu Tamimi og Ásgerði Ósk Jakobsdóttur. Og Sif Þórisdóttur make-up snilling. Vá, þetta var gott kvöld,“ segir Agnes og bætir við að stemningin á tökustað hafi verið vægast sagt góð.
„Það var fyndið þegar við vorum búin að taka nokkur skot með konfetti og grúppíurnar byrjuðu að henda alls konar rusli framan í okkur. Við vorum orðnar glimmer ryksugur þarna í endann. Takk, stelpur.“
En hvernig er stemmingin í herbúðum Slay fyrir undanúrslitakvöldinu?
„Alveg geggjuð. Við erum svo léttar á því og hoppum í öll verkefni með bros á vör og njótum. Júró njóta núna!“
Dásamlega góð hnetukaka að hætti Guðnýjar Þórarinsdóttur.
Við elskum hnetur, hvort sem þær eru einar og sér, í mat, eða í köku eins og þessari hér. Það er alltaf eitthvað notalegt við góða hnetuköku og við getum svo sannarlega mælt með þessari fallegu köku, hún er dásamlega góð.
Hnetuhringur Guðnýjar fyrir 10
Uppskriftin að hnetuhringnum er upprunalega úr gömlu dönsku blaði og mögulega kannast einhverjir lesendur við hana. Kakan hefur verið vinsæl í fjölskyldu Guðnýjar okkar í umbrotsdeildinni og við höfum stundum fengið hana með kaffinu þegar Guðný kemur færandi hendi í vinnuna. Þessi kaka er nánast eins og konfekt og okkur finnst hún alveg ægilega góð.
100 g heslihnetur
100 g möndlur
4 eggjahvítur
200 g sykur
100 g suðusúkkulaði
2 tsk. smjör
Stillið ofn á 180°C. Smyrjið með smjöri lítið hringform með gati. Setjið hnetur og möndlur í matvinnsluvél og hakkið fremur smátt. Þeytið saman eggjahvítur og sykur þar til blandan er stíf og hreyfist ekki í skálinni sé henni hvolft. Blandið hnetunum varlega saman við með sleikju (takið gjarnan svolítið af hnetum frá til þess að skreyta með). Bakið í 25-30 mín. Látið kökuna kólna áður en hún er tekin úr forminu. Bræðið súkkulaði og smjör varlega saman og smyrjið yfir kökuna. Skreytið með söxuðum hnetum og möndlum.
Á flótta
Salt fjallar um leyniþjónustukonuna Evelyn Salt sem sór þess eið að þjóna föðurlandi sínu í einu og öllu. Það reynir hins vegar á tryggð hennar þegar svikari ásakar hana um að vera rússneskur njósnari. Salt leggst á flótta og notar áralanga þjálfun sína og reynslu til að komast hjá því að verða handsömuð en jafnframt reyna að sanna sakleysi sitt.
Prinsessan bjargar heiminum
Wonder Woman var fyrst kynnt til sögunnar í Batman vs. Superman í fyrra og hefur nú fengið sína eigin mynd sem gefur innsýn í sögu persónunnar. Áður en hún varð Wonder Woman var Díana prinsessa Amazónanna og mikill stríðsmaður. Bandarískum herflugmanni skolar upp á strendur Themyscira og hann segir Díönu frá hörmungarástandinu sem ríkir í heiminum en sagan gerist á tímum fyrstu heimsstyrjaldarinnar. Díana ákveður að fara frá paradísareyju sinni og halda til Lundúna til að binda endi á stríðið.
Fyrst kvenna
Hermenn Bandaríkjahers eru oft kallaðir G.I. Joes en myndin G.I. Jane fjallar um Jordan O´Neill liðþjálfa sem reynir að verða fyrsta konan í sjóhernum. Í viðræðum við tilvonandi yfirmann í sjóhersins hvetur stjórnin, sem skipuð er af öldungardeildarþingmönnum, hann til að jafna hlutfall kynjanna í sjóhernum. Hann leggur til að þau velji kvenþáttakanda og ef hún kemst í gegnum inntökuprófin fyrir úrvalsdeild sjóhersins muni sjóherinn verða að fullu opinn konum. O´Neill fær þetta verkefni í hendurnar og enginn býst við að henni takist það, enda gefast 60% allra karlmanna sem reyna við þessi próf upp. O´Neill ætlar hins vegar að sanna að hún og konur almennt geti þetta. En ýmislegt fleira liggur að baki.
Óhrædd í hringnum
Million Dollar Baby fjallar um hina efnilegu hnefaleikakonu Maggie Fitzgerald. Hún vill æfa með besta þjálfaranum, Frankie Dunn en hann gefur lítið fyrir það í fyrstu og segist engan áhuga hafa á að þjálfa konu. Dunn lifir einmanalegu lífi því dóttir hans talar ekki við hann og hann á fáa vini. Maggie er hins vegar hörkutól sem lætur ekki neita sér. Dunn slær til að lokum og Maggie sannar ekki einungis að hún er boxarinn sem hann hefur alltaf dreymt um að þjálfa, heldur einnig vinur sem fyllir upp í tómið í lífi hans.
Friðrik Erlingssson er handritshöfundur barnateiknimyndarinnar Lói, þú flýgur aldrei einn, sem er sú fyrsta sinnar tegundar í fullri lengd hér á landi. Kvikmyndin, sem frumsýnd var í byrjun mánaðarins tók rúm sex ár í framleiðslu og er önnur dýrasta teiknimynd sem gerð hefur verið hér á landi.
Friðrik segir hugmyndina að handritinu hafi kviknað á Eyrarbakka. „Maður þarf ekki að dvelja lengi á Eyrarbakka til þess að verða var við farfuglana. Þeir eru áberandi bæði á vorin þegar þeir koma að landinu og svo á haustin þegar þeir hópast niður í fjöru áður en þeir hefja langflugið suður á bóginn. Rétt fyrir norðan Eyrarbakka er svo eitt stærsta fuglafriðland í Evrópu, svo þeir eru mjög nálægir á Bakkanum og söngur þeirra er viðvarandi yfir sumarið, bæði á nótt sem degi. Hinar mismunandi fuglategundir eru líka mjög afgerandi og skemmtilegar persónur og hver tegund með sinn eigin persónuleika, tjaldurinn og stelkurinn eru báðir svolítið taugaveiklaðir, spóinn yfirvegaður, hrossagaukurinn alltaf að segja brandara og kvikindislegur hlátur stokkandanna hljómar úr sefi einhvers staðar.
Sagan snýst að stórum hluta um baráttu upp á líf og dauða, og dauðinn kemur við sögu, því hann er jú órjúfanlegur hluti af lífinu og þá ekki síst í hinni hörðu lífsbaráttu farfuglanna. Hins vegar er dauðinn viðkvæmt umfjöllunarefni í mörgum samfélögum og margir erlendir framleiðendur eru viðkvæmir eða hræddir við að standa að sögum sem búa yfir íslenskri hreinskilni í þessum efnum.“
Friðrik segir sögur fyrir börn mikilvægustu verkefni allra höfunda, hvort sem um er að ræða bækur eða kvikmyndir. „Það er stór ábyrgðarhluti að semja sögu fyrir börn eða unglinga, því fólk á þessum aldri er alla jafnan opnara, einlægara og hrekklausara heldur en fullorðið fólk.
Ef höfundar geta ekki sagt sögur frá hjartanu, þá ættu þeir ekki að skrifa fyrir ungt fólk. En sögur sem koma frá hjartanu munu snerta við öðrum hjörtum, og þá hefur sagan öðlast raunverulegan tilgang.”
Ítarlegt viðtal við Friðrik má finna í nýjustu Vikunni.
Völvan, vitundarvakning um málefni píkunnar, hefur birt nýtt myndband sem heitir einfaldlega Píkuskoðun. Í myndbandinu er tónlistarkonan Salka Sól til að mynda tekin tali og spurð út í píkuskoðun.
Hún segist hafa fengið bók sem unglingur þar sem kona sat með spegil að skoða á sér kynfærin og hafi því ákveðið að gera slíkt hið saman.
„Mér hafði ekki dottið þetta í hug. Það fyrsta sem ég gerði var að ná í spegil og skoða á mér píkuna. Ég gat horft í svona hálfa sekúndu,“ segir Salka Sól, sem brá greinilega yfir því sem hún sá.
„Það er skrýtið að lifa í líkamanum sínum í geðveikt langan tíma og þekkja líkama sinn og maður sér sig í spegli. Svo allt í einu sér maður einhvern hlut á líkamanum sínum sem maður vissi ekki hvernig leit út.“
Seinna í myndbandinu segir Salka það mikilvægt fyrir konur að skoða á sér píkuna, en eins og kemur einnig fram í myndbandinu er ekki sjálfgefið að konur treysti sér í það.
„Ég held að það sé brjálæðislega mikilvægt að skoða á sér píkuna. Bara reglulega. Því hún breytist. Hún hlýtur að breytast. Skoða hana í alls konar ástandi, rakaða eða órakaða eða eitthvað.“
Það eru Inga Björk Bjarnadóttir, Ingigerður Bjarndís Ágústsdóttir og María Hjarðar sem standa að Völvunni, en þær vilja vitundarvakningu á öllu sem viðkemur píkunni. Myndbandið Píkuskoðun má sjá hér fyrir neðan.
Svefnherbergið er staðurinn þar sem þú átt að geta slakað á, á leið þinni inn í draumalandið. Hér eru nokkur ráð um það hvernig hægt er að gera svefnherbergið að kósí griðastað.
1. Dúnmjúk sængurföt
Veldu sængina þína og sængurföt af kostgæfni og ekki hika við að eyða aðeins meiri peningum til að eignast það sem þig langar mest í, svo að ekki sé talað um rúmið sjálft – við verjum jú stórum hluta ævi okkar í svefnherberginu. Ekkert er yndislegra en að sökkva sér í brjálæðislega þægilegt rúm.
2. Rétti ilmurinn
Val á rétta ilminum fer eftir smekk hvers og eins en lavender er vinsælasta ilmkjarnaolían fyrir slakandi andrúmsloft. Hægt er að fá ýmisskonar sprei eða olíur til að setja beint á koddann en þá þarf að varast að setja of mikið. Einnig má kveikja á ilmkertum og ilmolíubrennurum en passa að fara að öllu með gát með því að hafa eldinn í öruggum stjökum á öruggum stöðum, langt frá gardínum og værðarvoðum, og slökkva áður en farið er að sofa.
3. Motta sem faðmar fæturna
Rétt gólfmotta er sannarlega eitthvað sem vert er að hugsa út í að fá sér – motta sem faðmar fæturna þegar þú stígur fram úr á morgnana. Veldu þér til dæmis þykka og grófa flosmottu eða mjúkt lambaskinn. Að auki eru margskonar mottur á markaðnum og aðalmálið að þér finnist mottan passa við annað í herberginu og fílir liti og gerð vel.
4. Málaðu herbergið
Ekki hika við að mála herbergið og það er óþarfi að óttast að nota liti. Ef þú velur mjög dökka eða skæra liti getur verið sniðugt að velja aðeins einn vegg fyrir þann lit en hafa hina veggina hlutlausa. Djúprauður, súkkulaðibrúnn og beislitur gefa til dæmis mjög kósí fíling. Veggfóður er líka mikið í tísku núna og ekki vitlaust að fá sér svoleiðis til að flikka upp á svefnherbergið.
5. Rúmteppi
Það er gott að venja sig á að búa um rúmið á morgnana því það er svo miklu notalegra að koma að því þannig þegar maður fer þreyttur að sofa á kvöldin. Þá er ekki verra að eiga fallegt rúmteppi sem í senn gerir rúmið snyrtilegt og lífgar upp á herbergið, hvort sem þú velur teppi í hlutlausum stíl eða jafnvel handprjónað eða heklað ömmuteppi úr dúllum.
Eldhús eru alls konar; stór og smá, litrík, klassísk, stílhrein, smart, flippuð og svo framvegis.
Hús og híbýli teymið er alltaf að mynda falleg eldhús og hér eru tvö algjörlega æðisleg; annað er stílhreint og hlýlegt en hitt er sannkallað pastel-partí með retro yfirbragði.
Þetta litfagra og skemmtilega eldhús er undir súð. Eigendur þess tóku það í gegn og eru ánægðir með hvað það tók miklum og skemmtilegum breytingum fyrir tiltölulega lítinn pening.
,,Mér finnst afar mikilvægt að vera með plöntur og liti í þessu rými, þar sem eldhúsið er mjög bjart og sólin skín beint inn í það nánast allan daginn, litirnir og plönturnar fá að njóta sín rosalega vel,“ segir eigandi eldhússins bjarta.
,,Svo finnst mér einnig nauðsynlegt að umkringja sig björtum og skemmtilegum litum þegar líða fer á skammdegið.“
Innréttingin er upprunaleg frá 2001 en hún var sprautuð hvít og svo voru settar höldur frá versluninni Brynju.
Hús og híbýli teymið kíkti á gullfallegt eldhús á Selfossi, fyrir eldhúsblaðið, hjá þeim Ingibjörgu og Guðmundi sem Sæbjörg Guðjónsdóttir innanhússarkitekt hannaði fyrir ekki svo löngu.
Ingibjörg og Guðmundur vildu fá opið eldhús með góðu vinnurými og plássi fyrir stórt borðstofuborð og útkoman er hin glæsilegasta. Þetta er hlýlegt, tímalaust og smart eldhús.
Gólfið er flotað og lakkað, innréttingin er frá Fagus og borðplatan er marmari.
Texti / Sigríður Elín Ásmundsdóttir og María Erla Kjartansdóttir
Myndir / Hákon Davíð Björnsson
Saga hinnar 21 árs Belen Aldecosea hefur náð athygli heimsins, en hún er harla óvenjuleg. Þann 21. nóvember síðastliðinn var Belen bókuð í flug með flugfélaginu Spirit frá Baltimore til Suður-Flórída. Hún segist hafa hringt í flugfélagið til að athuga hvort að hamsturinn hennar Pebbles, sem læknir skrifaði uppá að væri stuðningsdýrið hennar, mætti fljúga með henni. Belen segir að svarið frá flugfélaginu hafi verið jákvætt.
En þegar að Belen mætti í flug sagði starfsmaður flugfélagins að dýrið mætti ekki fljúga. Ráðlagði starfsmaðurinn henni að sturta hamstrinum niður inni á einu salerni flugvélarinnar svo hún gæti flogið með vélinni. Og þar sem þetta var í aðdraganda þakkargjörðarhátíðarinnar voru allir vinir Belen uppteknir og hún of ung til að leigja sér bílaleigubíl og keyra.
Það endaði því með því að hún gerði eitt það erfiðasta sem hún hafði gert á lífsleiðinni – hún sturtaði Pebbles niður.
„Hún var hrædd. Ég var hrædd. Það var hræðilegt að setja hana í klósettið. Ég varð mjög tilfinningaleg. Ég grét. Ég sat í góðar tíu mínútur á salerninu og grét,“ segir Belen í samtali við Miami Herald.
Öll nagdýr bönnuð
Belen íhugar að lögsækja flugfélagið, en forsvarsmenn þess hafa staðfastlega neitað því að starfsmaður á þeirra vegum hafi sagt henni að sturta hamstrinum niður.
Belen fékk Pebbles síðasta haust eftir að hún fékk kýli á hálsinn og talið var að hugsanlega væri um krabbamein að ræða. Kýlið reyndist síðar vera jákvætt. Hún býr í Baltimore en bókaði flug til Suður-Flórída til að láta fjarlægja kýlið.
Forsvarsmenn flugfélagsins játa að mistök hafi átt sér stað þegar að starfsmaður hafi sagt Belen að hamsturinn mætti koma með í flugið, en nagdýr af öllu tagi eru bönnuð í flugum hjá Spirit. Þeir segja einnig að Belen hafi verið boðið að fljúga níu tímum seinna svo hún hefði tíma til að finna stað fyrir hamsturinn að vera á.
„Gögn okkar sýna að gesturinn þáði seinna flugið án mótmæla,“ segir Derek Dombrowski, talsmaður flugfélagsins í samtali við BuzzFeed News og bætir við að Belen hafi verið boðinn afsláttarmiði vegna óþægindanna en að flugfélagið hafi ekki heyrt meira í henni. Belen sturtaði dýrinu niður eftir að hún þáði boð um að fljúga síðar um daginn og segir að starfsmaður hafi stungið uppá því að hún losaði sig við dýrið á þann hátt eða sleppti því lausu.
Omarosa Manigault er einn af keppendunum í sjónvarpsþættinum Celebrity Big Brother. Omarosa vakti fyrst athygli sem keppandi í The Apprentice, undir stjórn Donalds Trump, árið 2004 og réð sig síðar sem samskiptafulltrúa hans þegar hann varð forseti Bandaríkjanna. Hún sagði upp í desember í fyrra, þó margir fjölmiðlar hafi haldið því fram að hún hefði verið rekin.
Í meðfylgjandi myndbandi má sjá Omarosu rifja upp tíma sinn í Hvíta húsinu í spjalli við sjónvarpsstjörnuna, og keppanda í Celebrity Big Brother, Ross Matthews. Hún segist hafa verið að þjóna þjóð sinni þegar Ross spyr hana af hverju í ósköpunum hún réði sig í vinnu hjá Trump.
Hún segir enn fremur að hún hafi reynt að hafa hemil á forsetanum, til dæmis á samfélagsmiðlum, en hann fer oft mikinn á Twitter.
„Ég reyndi að vera sú manneskja en allir í kringum hann réðust á mig. Þeir sögðu: Haldið henni frá honum. Ekki veita henni aðganga að honum. Ekki leyfa henni að tala við hann,“ segir Omarosa kjökrandi.
Ross spyr hana síðan hvort að bandaríska þjóðin ætti að hafa áhyggjur af hegðun forsetans. Þá kinkar hún kolli.
„Þetta verður ekki í lagi. Það verður það ekki. Þetta er svo slæmt.“
Fyrri undankeppnin í Söngvakeppninni fer fram á laugardagskvöldið og keppa sex lög um að komast í úrslitin þann 3. mars næstkomandi.
Við fengum Eurovision-sérfræðingana með meiru, Flosa Jón Ófeigsson og Kristínu Kristjánsdóttur til að spá í spilin og reyna að sjá fyrir hvaða þrjú lög komast áfram í úrslitin.
Lagið ekki nógu sterkt en treysta á gott „show“
Ég mun skína – Þórunn Antonía
Flosi: „Ég elska gamla stöffið sem Þórunn Antonía hefur búið til. Ég er mikill aðdáandi en ég verð að segja að ég varð fyrir pínu vonbrigðum með lagið af því að hún er svo flott. Hún verður frábær á sviði og mun negla þetta þegar kemur að beinu útsendingunni. Mér finnst lagið bara ekki nógu sterkt ef ég á að vera hreinskilinn. Það þarf að vera rosa „show“ ef hún ætlar að grípa fólkið. Þetta atriði minnir mig á Svölu í fyrra, nema ekki eins gott lag.“
Kristín: „Ég veit ekki alveg með þetta. Hún er náttúrulega rosalega hæfileikarík söngkona en þetta er ekki hennar besta. Eiginlega langt því frá. Það er spurning hvort hún skíni það skært að hún komist áfram. Ég ætla ekki að afskrifa hana. Ég vona að hún keyri þetta aðeins upp og geri ekki sömu mistökin og Svala gerði í fyrra, að vera ekki með nógu gott „show“.“
„Ég gæti ekki munað lagið þó að líf mitt lægi við“
Ég og þú – Sólborg Guðbrandsdóttir og Tómas Helgi Wehmeier
Flosi: „Ég veit ekki hvort fólk eigi eftir að ná laginu. Ég hef pínu áhyggjur af því. Ég hef líka pínu áhyggjur af því að lagið sé raddað allan tímann. Það má ekki vera neitt stress á þeim. Þau eru bæði úr The Voice þannig að þau eru komin með smá reynslu í bankann. Þetta eru svo miklar týpur og flottar. Ef röddin virkar þá er aldrei að vita hvað gerist á laugardaginn. Þetta er eitt af lögunum sem vinnur á.“
Kristín: „Þetta á ekki eftir að fljúga. Ég trúi ekki að tvær svona hrikalega töff manneskjur geti verið með svona arfaslakt lag. Það er ekkert að ske og ég gæti ekki munað lagið þó að líf mitt lægi við. Ég er eiginlega alveg viss um að þau komast ekki áfram.“
Úrelt lag en flottur söngvari
Heim – Ari Ólafsson
Flosi: „Lagahöfundurinn Þórunn Clausen er náttúrulega reynslubolti í Söngvakeppninni. Ég veit að atriðið verður pottþétt og það verður öllu tjaldað til. Það eru alltaf flott atriði frá Þórunni. Ari sjálfur er okkar vonarstjarna, bara 19 ára gamall. Ég hef engar áhyggjur af flutninginum sjálfum. Spurningin er hvort þetta sé of einfalt eða ekki. Það verður að koma í ljós á kvöldinu sjálfu. Þessi hái tónn sem allir eru að tala um kemur seint í laginu. Ef að fólk fílar ekki lagið nær það ekki þessum svaka tóni sem hann á eftir að rústa. En hann er gullfallegur strákur og myndavélin mun örugglega elska hann.“
Kristín: „Mér finnst Ari rosa flottur. En mér finnst þetta lag sjúklega leiðinlegt. Mér finnst það rosalega úrelt. Það hefði kannski virkað fyrir fimmtán árum. Hann er rosa flottur söngvari og tilvonandi stjarna. Ég hef á tilfinningunni að lagið eigi ekki eftir að gera mikið. Það gæti hins vegar verið svarti hesturinn í keppninni. Ég sé það samt ekki alveg því lagið er svo auðgleymanlegt.“
Ást við fyrstu sýn
Kúst og fæjó – Heimilistónar
Flosi: „Þetta er náttúrulega bara ást við fyrstu sýn. Þetta er landslið leikkvenna á Íslandi og ég hef engar áhyggjur af flutningnum. Þetta er eina lagið sem verður pottþétt á íslensku þannig að þeir sem búast ekki við að við syngjum á ensku í keppninni þurfa að setja X við Heimilistóna. Þetta er svolítið gamaldags lag og mömmufílíngur í því. Það er eitthvað sem grípur mig við þetta. Þetta atriði er eins og Daði Freyr í fyrra. Fólk hélt að hann væri grínatriði, alveg eins og það heldur með Heimliistóna en þeim er alvara með þetta. Þetta er sko ekkert grín og ég held að þetta fljúgi áfram.“
Kristín: „Kúst og fæjó er að fara áfram. Þetta er eina lagið í allri keppninni sem ég man alltaf. Ég er alltaf að syngja það. Þær hala inn eitthvað af stigum og ég spái þeim alla leið í einvígið. Þessi retro stíll á laginu og þreytta sixtís húsmóðirin – etta virkar allt saman. Þetta er allt öðruvísi, eins og Daði í fyrra. Ég segi að þær verði Daðinn í ár.“
Fer örugglega áfram
Aldrei gefast upp – Fókus hópurinn
Flosi: „Ég held að þetta sé eitt af lögunum sem fer áfram. Þetta eru fimm “solid” söngvarar. Þau eru öll með reynslu í bankanum úr The Voice. Þau tóna rosalega vel saman. Raddirnar þeirra blandast svo vel saman. Þau eru hress og skemmtileg. Þau eru miklar keppnismanneskjur en taka sig ekki of alvarlega. Ég er smá sökker fyrir góðum röddum og harmoníum og ég hef engar áhyggjur af því að þetta klikki. Þetta er það lag í fyrri undankeppninni em ætti örugglega að fara áfram.“
Kristín: „Það er sennilega að fara áfram. Ég er nokkuð viss um það. Þau eru öll frekar sterk og harmonæsa svo vel. Þetta lag hefur „major hook”. Ég spái þeim áfram.“
Svarti hesturinn í keppninni
Litir – Guðmundur Þórarinsson
Flosi: „Ég held að hann gæti orðið svarti hesturinn í keppninni. Lagið er frekar ferskt. Svo verð ég að segja, sem samkynhneigður karlmaður, að það er ekki leiðinlegt að sjá hann uppi á sviðinu. Þetta er ekki uppáhaldslagið mitt persónulega. Ég er Euro-skvísa þannig að ég elska glimmer og ostapopplög. En það er eitthvað við þetta. Þetta gæti orðið lagið sem bankar á dyrnar.“
Kristín: „Hann er alveg ágætur og kom svolítið á óvart. Ég vil sjá hann í beinni útsendingu. Guðmundur er óskrifað blað. Ég vil sjá hvernig hann tæklar þetta. Þetta lag er rosalega lágstemmt. Ef hann neglir þetta þá ætla ég ekki að afskrifa hann en ef þetta verður bara hann með gítarinn þá gæti þetta vel týnst.“
Þá er komið að stóru spurningunni – telja Flosi og Kristín að sigurlagið, lagið sem fer fyrir Íslands hönd í Eurovision í Lissabon í maí, leynist í fyrri undankeppninni?
Flosi: „Fyrir mér eru tvö atriði á laugardaginn sem eiga möguleika á að fara í einvígið, það eru Heimilistónar og Fókus hópurinn. En þetta fer eftir því hvernig seinni undankeppnin verður.“
Kristín: „Ég hef aldrei rétt fyrir mér en ég held að sigurlagið leynist í hinum riðlinum. Hins vegar held ég að Kúst og fæjó eigi efitr að fara langt.“
Bráðum mun Theodóra koma á markað með sínar eigin gallabuxur.
Theodóra Elísabet Smáradóttir, hönnuður og framkvæmdarstjóri, byrjaði ung að skapa og sjá tækifæri í nánast öllu í umhverfinu. Hún rekur hönnunarfyrirtæki og verslun í Kópavogi ásamt eigimanni sínum þar sem hún selur meðal annars hinar vinsælu MuffinTopKiller®-buxur sem halda vel utan um miðjusvæði líkamans.
„Ég hafði fengið mig fullsadda af illa sniðnum buxum með vonlausum streng í mittinu sem annað hvort var svo víður að buxurnar héldust ekki uppi eða með alltof þröngum mjóum streng sem skarst inn í mittið og bjó til það sem oft er kallað „muffintop“ eða hliðarspik sem kemur upp úr strengnum. Ég fór af stað í þróunarvinnu til að geta hafið framleiðslu á MTK-efninu í teygjuna. Þetta efni er framleitt fyrir okkur erlendis og hvergi annarsstaðar hægt að fá. Gott aðhald og þægindi er helsta sérstaða buxnanna.Teygjan mótar miðjusvæði líkamans og gefur þetta góða aðhald sem konur eru sjúkar í. Þær eru þægilegar, styðja vel við magann og móta línurnar í stað þess að búa til muffintop eins og margar aðrar buxur gera. Buxurnar henta öllum konum, á öllum aldri og í öllum stærðum. Það er alveg sama hvernig við erum í laginu, það skiptir okkur allar máli að líða vel yfir daginn og finna til frelsis“.
Dýrmætur lærdómur frá ömmu
Sköpunarkrafturinn hefur fylgt Theodóru frá barnæsku og saumaáhuginn kviknaði um 4-5 ára aldurinn þegar amma hennar kenndi henni á saumavél. „Amma mín, Theodóra Elísabet „nafna mín og vinkona“ eins og við kölluðum okkur, er fyrirmyndin mín. Strax á þessum aldri var ég með miklar hugmyndir um hvað ég vildi skapa og amma leyfði þessum sköpunarkrafti að blómstra. Hún stoppaði mig aldrei af með því að segja hvernig hlutir ættu að vera samkvæmt bókinn en var alltaf tibúin á hliðarlínunni svo ég færi mér ekki að voða í sumum af þessum framkvæmdum. Hún var reiðubúin að aðstoða mig um leið og ég var opin fyrir hennar ráðleggingum þegar ég sá að hlutirnir gengu ekki alveg upp eins og þeir höfðu gert í huga mér. Það dýrmætasta sem hún kenndi mér var að láta hugann ráða og finna út hvernig ég gat leyst það sem ég sá fyrir mér. Stundu gengu hlutirnir upp og stundum alls ekki og á því lærði ég einmitt mest. Ég sé í dag að það var leið ömmu til að kenna mér án þess að takmarka hugann. Svona lærði ég að allt er hægt og ég trúi því enn í dag – það er bara spurning hvað þú ert tilbúin að leggja á þig til að framkvæma það. Ég reyni eftir bestu getu að kenna dætrum mínum það sama – setja sér engar hindranir. Ef þær mæti lokuðum dyrum að finna þá opin glugga til að skríða inn um. Gefast ekki upp en það sé í lagi að hætta ef þær telji það rétt. Ég er enn að læra þann hluta, að það megi hætta að vel ígrunduðu máli án þess að það kallist uppgjöf.“
Mikilvægar fjölskyldustundir
Teygjan í MuffinTopKiller®-buxunum mótar miðjusvæði líkamans og gefur gott aðhald.
Eignmaður Theodóru er Sigurður Jónsson og hann starfar að fullu með henni í rekstrinum. Þau eiga þrjár dætur sem heita Viktoría Sól, 5 ára, Elísabet Sól, 2 ára, og Ísabella Sól, 5 mánaða. „Það gengur vel að samtvinna þetta en getur auðvitað verið krefjandi suma daga ekki síst fyrir dæturnar sem þurfa oft að þvælast með mömmu og pabba á fundi og jafnvel á sýningar erlendis. Við erum mjög meðvituð um að ofbjóða þeim ekki og pössum að hafa svoleiðis daga líka skemmtilega fyrir þær. Við erum vöknuð og byrjuð að vinna fyrir klukkan 6 á morgnana og hættum að vinna klukkan 16 þegar tvær elstu eru búnar í leikskólanum. Yngsta stelpan er með okkur foreldrunum allan daginn og verður heima til alla vega eins árs aldurs þegar hún fer í dagvistun. Við vinnum ekki um helgar heldur nýtum tímann saman enda er fjölskyldan í fyrsta sæti hjá okkur. Stelpurnar okkar er mikil partídýr sem vilja helst vera í eða halda matarboð með vinum okkar og fjölskyldu allar helgar og njóta lífsins saman sem við svo sannarlega gerum,“ segir Theodóra.
Þau hjónin reka verslun að Hlíðarsmára 4 í Kópavogi og margt áhugavert framundan. Auk MTK-buxnanna eru til sölu ýmis annar fatnaður sem Theodóra hannar. Í hinum helmingi verslunarinnar eru barnavörur til sölu, meðal annars barnavagn sem hún lét framleiða sérstaklega fyrir íslenskar aðstæður.
Til eru ófáar kvikmyndir sem fjalla um hið flókna en fallega samband sem á sér stað milli móður og dóttur. Hér eru nokkrar sem sýna kómísku hliðina.
Svaðilför í frumskógi
Þegar kærasti Emily segir henni upp ákveður hún að fara með ofurvarkára móður sína í ævintýralegt frí til Ecuador. Það endar ekki betur en svo að þeim er rænt. Þær átta sig fljótlega á því að þær verða að vinna saman, þrátt fyrir að vera gjörólíkar týpur. Þessi reynsla hefur góð áhrif á samband þeirra og þær bindast fyrir vikið traustari böndum við það að reyna að losna úr prísundinni í frumskóginum.
Samþykktur af mömmu
Í myndinni Because I Said So kynnumst við Daphne Wilder. Hún er móðir sem þekkir engin mörk og vill vera með stöðug ítök í lífi dætra sinna. Dætur hennar þrjár eru geðlæknirinn Maggie, hin kynþokkafulla og óábyrga Mae og hin óörugga en aðlaðandi Milly – sem er ekki enn gengin út og veit ekki hvernig á að haga sér þegar kemur að karlmönnum. Til að koma í veg fyrir að yngsta dóttirin geri sömu mistök og hún gerði ákveður Daphne að finna sjálf fullkominn mann fyrir hana og koma þeim saman án þess að Milly viti.
Hættulegt tvíeyki
Þegar kemur að því að svindla á milljónamæringum eru mæðgurnar Maxine Paige sannir fagmenn. Svikamyllan í myndinni Heartbreakers er einföld; fyrst giftist Maxine þeim, síðan tælir Paige þá og svo fer Maxine fram á skilnað með tilheyrandi skilnaðarpakka. Þegar þessu er lokið snúa þær sér að næsta fórnarlambi. Allt gengur eins og í sögu þar til Paige brýtur meginreglu þeirra mæðgna og verður ástfangin í alvöru af ungum barþjóni. Núna þarf Maxine að passa upp á að missa ekki dótturina og besta glæpafélaga sem hún mun nokkurn tíma eignast auk þess sem hún situr uppi gift hinum miður geðslega milljarðamæringi William Tensy.
Hollywood-uppeldi
Handritshöfundur myndarinnar Postcards from the Edge og bókarinnar sem hún er byggð á er engin önnur en leikkonan Carrie Fisher. Í myndinni er sagt frá leikkonunni Suzanne sem er nýkomin af meðferðarstofnun vegna eiturlyfjafíknar. Hún neyðist til að flytja aftur heim til móður sinnar sem hún sagði skilið við fyrir mörgum árum. Suzanne lifði í skugga móður sinnar alla sína æsku en Doris er hávær, stjórnsöm, sjálfhverf og með mikið keppnisskap. Hún á það til að gefa dóttur sinni góð ráð, hvort sem hún sækist eftir því eða ekki. Myndin er mjög kómísk og Meryl Streep og Shirley Maclaine fara á kostum í hlutverki mæðgnanna. Margar getgátur hafa verið uppi um það hvort samband mæðgnanna væri byggt á sambandi Carrie Fisher og móður hennar Debbie Reynolds en Carrie neitaði því alla tíð.
Ólíkar en samrýndar
Myndin Anywhere but Here sýnir hversu ólíkar mæðgur geta oft verið. Adele August er sérvitur kona sem fær einn góðan veðurdag alveg nóg af litla bænum sem hún býr í. Hún yfirgefur fjölskylduna og annan eiginmann sinn og flytur til Beverly Hills ásamt dóttur sinni. Hún gerir það til að láta óræða og óraunhæfa drauma sína rætast. Dóttir hennar Ann er alls ekki sátt við flutningana eða við litríka hegðun móður sinnar. Adele skráir Ann í gagnfræðiskóla í Beverly Hills með það fyrir augum að hún kynnist börnum frægra leikara, fari síðan í UCLA og verði leikkona sjálf. Ann er hins vegar staðráðin í því að fara í háskóla á austurströndinni. Á endanum sættast þær hvor við aðra og læra að meta hversu ólíkar þær eru.
Bræðralag við Cornell-háskóla í Bandaríkjunum hefur verið sett á tveggja ára skilorð eftir að skólayfirvöld komust að því að bræðralagið hélt sérstaka keppni þar sem nýir meðlimir kepptust um að sofa hjá þyngstu konunni. Var keppnin kölluð “pig roast”, sem væri hægt að þýða sem svínaveisla.
Bræðralagið Zeta Beta Tau ku hafa haldið keppnina á síðasta ári. Meðlimir fengu stig fyrir að sofa hjá konum. Ef jafntefli kom upp, fékk sá meðlimur verðlaun sem hafði sofið hjá þyngstu konunni. Meðlimunum var sagt af sér eldri meðlimum að segja konunum ekki frá keppninni.
Rannsókn á málinu lauk í janúar, en meðlimir bræðralagsins munu þurfa að sækja námskeið um kynferðislegt ofbeldi og áreiti.
Í tilkynningu á Facebook-síðu bræðralagsins kemur fram að keppnin hafi ekki verið samþykkt af yfirstjórn bræðralagsins og að forsvarsmenn bræðralagsins væru gjörsamlega miður sín yfir þessu athæfi.
„Við trúum því varla að þetta hafi verið gert af þeim sem við köllum bræður. Í kjölfarið höfum við hafið sjálfsskoðun til að tryggja að svona gerist ekki aftur hjá neinum sem tengist ZBT eða háskólasamfélaginu,“ segir í tilkynningunni. Þá er því einnig haldið fram að þeir bræður sem fari ekki eftir gildum og hugsjónum bræðralagsins verði reknir úr reglunni.
„Við erum staðráðin í að sýna með aðgerðum okkar að þessi óafsakanlega hegðun verður ekki liðin.“
Ráð við Cornell-háskóla, sem hefur með bræðralög að gera, vinnur nú að því að finna nýjar leiðir til að fræða meðlimi bræðralaga um hvernig þeir styðji við kynjamisrétti í skólasamfélaginu og hvernig hægt sé að breyta hugarfari þeirra í rétta átt.
Raunveruleikastjarnan og frumkvöðullinn Kylie Jenner eignaðist sitt fyrsta barn um mánaðarmótin. Kylie opinberaði svo nafn hnátunnar í gær, miðvikudaginn 7. febrúar, og hefur hún hlotið nafnið Stormi. Með þessari opinberun fylgdi mynd af smárri hendi Stormi halda um hendi móður sinnar.
Internetið nánast sprakk þegar Kylie birti myndina á Instagram og á aðeins nokkrum klukkutímum varð þetta sú mynd á Instagram sem hefur fengið flest læk frá upphafi.
Þegar þetta er skrifað er myndin búin að fá rúmlega fjórtán milljónir læka og hrifsaði Kylie toppsætið af knattspyrnugoðsögninni Cristiano Ronaldo.
Rúmlega 11,3 millónir Instagram-notenda hafa líkað við mynd sem Ronaldo setti inn seint á síðasta ári þegar hann tilkynnti að hann væri búinn að eignast sitt fjórða barn, dótturina Alönu Martinu með kærustu sinni, Georginu Rodriguez. Birti hann fallega mynd af spítalanum sem hitti rakleiðis í mark hjá aðdáendum hans.
Þá hafa rúmlega 11,2 milljónir grammara líkað við mynd sem söngkonan Beyoncé setti inn af sér óléttri snemma á síðasta ári, þar sem hún tilkynnti að hún og eiginmaður hennar, Jay Z, ættu von á tvíburum, sem komu í heiminn um mitt síðasta ár. Þeir hlutu nöfnin Rumi og Sir Carter.
Kylie er nú í sjöunda sæti yfir þær manneskjur á Instagram sem eiga flesta fylgjendur, á eftir stjörnunum Selenu Gomez, Ronaldo, Ariönu Grande, Beyoncé, systur sinni Kim Kardashian og Taylor Swift.
Með tilkomu samfélagsmiðla hafa foreldrar fengið óvænt vopn í hendurnar – að geta gert góðlátlegt grín að börnunum sínum þannig að þau fari hjá sér. Þetta höfum við séð margoft, til dæmis þegar foreldrar endurgera sjálfsmyndir barnanna sinna, börnunum til mikils ama.
Stjörnupabbinn Will Smith hefur nú gengið einu skrefi lengra og ákvað að endurgera mynbandið við lagið Icon, en það er sonur hans Jaden Smith sem flytur lagið. Will gerði þetta til að fagna því að lagið náði þeim stóra áfanga að vera streymt hundrað milljón sinnum á Spotify.
„Til hamingju með 100.000.000 streymi á Spotify, Jaden! Það er æðisleg gjöf fyrir foreldra að dást að börnunum sínum. Haltu áfram að vera þú,“ skrifar Will við myndbandið á Instagram, og má greina vissa hæðni í kveðjunni.
Jaden Smith hefur fetað í fótspor foreldra sinna, en móðir hans er leikkonan Jada Pinkett-Smith, og hefur náð góðum frama í leiklistinni. Hann lék til dæmis á móti föður sínum í kvikmyndinni The Pursuit of Happyness og vakti síðar lukku í endurgerð á The Karate Kid. Í nóvemer í fyrra gaf hann síðan út sína fyrstu plötu, Syre, en lagið Icon er einmitt á þeirri plötu.
Hér fyrir neðan má sjá upprunalegu útgáfuna af myndbandinu við Icon, en faðir hans virðist hafa náð að stæla það ótrúlega vel.
„Ég var þekktur sem íþróttamaður og þegar ég fór úr því í þetta man ég að fólk sagði: Guð minn góður, hvað gerðist?“ segir Noah Kingery í viðtali við vefritið Men’s Health.
Noah segir sögu sína í viðtalinu, en á yngri árum spilaði hann knattspyrnu í Brasilíu. Hann borðaði hollan mat og æfði mikið en þegar hann var átján ára þurfti hann að velja milli þess að bjarga sambandi sínu við kærustu sína í heimabænum Dallas í Bandaríkjunum eða halda áfram að láta ferilinn blómstra í Brasilíu. Hann valdi að snúa aftur heim til að halda kærustunni.
Sambandið hins vegar gekk ekki upp og það fékk mikið á Noah. Hann leitaði að huggun í mat og áfengi og þyngdist um rúm 96 kíló á einu ári. Þá var hann orðinn rúm 160 kíló og hafði aldrei verið jafn þungur.
Alltaf maðurinn á bak við tjöldin
Árið 2009 flutti Noah til Los Angeles til að stofna sitt eigið fatamerki, Prep Couture, en meðal viðskiptavina hans voru Kanye West og Justin Bieber.
„Ég gat ekki klæðst neinu sem ég bjó til. Ég var alltaf maðurinn á bak við tjöldin og vildi ekki láta sjá mig,“ segir Noah. Þáttaskil urðu í lífi hans ári síðar þegar náinn vinur hans lést í bílslysi þegar ökumaður undir áhrifum áfengis keyrði á hann.
„Ég sagði við sjálfan mig: Ókei, ég verð að hætta að drekka og ná stjórn á þessu. Ég þarf að verða aftur fótboltamaðurinn sem ég var í miðskóla.“
Léttist um 67 kíló en sjálfstraustið vantaði
Noah ákvað að borða og æfa eins og þegar hann var í formi. Hann hætti að borða sjö þúsund kaloríur af kínverskum mat á dag og byrjaði að borða hreinan mat. Hann æfði af fullum krafti og lyfti lóðum til að byggja upp vöðvamassa. Og hann hætti að drekka. Allt þetta varð til þess að hann léttist um 67 kíló.
„En ég fékk ekki meira sjálfstraust. Mér fannst ég enn vera rúm 160 kíló. Ég var alltaf að berjast við það,“ segir Noah og níu mánuðum síðar féll hann.
„Ég vildi ekki hugsa um hve illa mér leið þannig að ég féll aftur í mína gömlu fíkn – áfengi.“
Noah byrjaði í kjölfarið að borða óhollan mat og hætti að æfa. Fljótlega bætti hann nánast öllu aftur á sig og var fljótlega orðinn 145 kíló. Á þessum tímapunkti íhugaði hann sjálfsvíg.
„Mér fannst eins og ég væri með pálmann í höndunum fjárhagslega en í einkalífinu fannst mér ég vera tómur. Mig langaði ekki að halda áfram að lifa. Þannig að einn dag keypti ég vodkaflösku og verkjastillandi og fór uppá 31. hæð í húsinu sem ég bjó í. Mig langaði til að hoppa. En einn af bestu vinum mínum hringdi og ég sagði honum hvað ég ætlaði að gera og hann flýtti sér til mín. Næsta sem ég man er að hann sagði: Ef einhver getur breyst, getur þú það en þú verður að finna sjálfan þig. Ef þessi stund breytir þér ekki, þá gerir ekkert það,“ segir Noah.
Hann ákvað að breyta fíkninni í eitthvað gott – að borða góðan og hollan mat og hugsa vel um líkamann. Hann ákvað að æfa aftur eins og hann gerði og í dag æfir hann fimm daga vikunnar í einn til tvo tíma. Hann borðar fjórar máltíðir á dag og borðar máltíð sem er rík af kolvetnum annað hvort fyrir eða rétt eftir æfingar. Hann borðar mikið af próteini, eins og fitulítið kjöt, egg og gríska jógúrt. Hann velur að borða eingöngu mat sem honum finnst góður.
„Þú verður að elska það sem þú borðar. Ef þú sérð þig ekki borða það næstu þrjá mánuði þá er það ekki að fara að virka.“
Getum ekki breytt gærdeginum
Í dag er Noah 75 kíló og vinnur sem næringarfræðingur. Nú nýtur hann lífsins við að hjálpa öðrum og hjálpaði meira að segja móður sinni að losa sig við 48 kíló.
„Ég hef verið þarna. Ég veit hvernig það er að reyna að losa sig við slæma ávana. Mig langaði að hafa tilgang í vegferð annarra og sjá hvernig líf þeirra breytist,” segir Noah og bætir við.
„Við getum ekki breytt því sem gerðist í gær en við getum gert það sem við getum í dag til að breyta morgundeginum.“
Átakið Sjúk ást er nýtt átak sem Stígamót hleypti af stokkunum í gær. Um er að ræða forvarnaverkefni gegn ofbeldi sem ætlað er ungu fólki á aldrinum 13 til 20 ára.
Markmið átaksins er að vekja athygli á einkennum heilbrigðra, óheilbrigðra og ofbeldisfullra sambanda. Á vefsíðu átaksins er að finna aragrúa af upplýsingum og ákváðum við hjá Mannlífi að kynna okkur hvað það er sem einkennir andlegt ofbeldi, ofbeldi sem oft erfitt er að greina eða segja frá.
Andlegt ofbeldi felur í sér hótanir, niðurlægingu, óvelkomið og yfirþyrmandi eftirlit svo sem með endalausum skilaboðum, auðmýkingu, ógnun, einangrun eða ofsóknir.
Andlegt ofbeldi getur líka birst á duldari hátt:
Að uppnefna þig og gera lítið úr þér
Að öskra á þig
Að niðurlægja þig viljandi fyrir framan aðra
Að koma í veg fyrir að þú hittir eða talir við vini þína eða fjölskyldumeðlimi
Að segja þér í hverju þú átt að vera eða hvernig þú átt að haga þér
Að eyðileggja eigur þínar í bræðiskasti (henda hlutum, kýla í vegg, sparka í hurð o.s.frv.)
Að notast við samfélagsmiðla eða síma til að stjórna þér, ógna eða niðurlægja.
Að nota hegðun þína sem afsökun fyrir ofbeldi eða óheilbrigðri hegðun.
Að saka þig um framhjáhald og fyllast afbrýðisemi yfir samskiptum þínum við annað fólk
Að ofsækja þig
Að hóta að fremja sjálfsvíg til að koma í veg fyrir að þú slítir sambandinu
Að hóta að skaða þig, gæludýrið þitt eða fólk sem þér er annt um
Að láta þig efast um upplifanir þínar og tilfinningar þannig að þú heldur jafnvel að þú sért að ímynda þér ofbeldið sem þú verður fyrir
Að þrýsta á um kynferðislegar athafnir með því að láta þig fá samviskubit eða saka þig um barnaskap þegar þú vilt ekki gera eitthvað
Að hóta að opinbera einkamál þín, svo sem kynhneigð eða heimilisaðstæður
Að hóta að dreifa viðkvæmum myndum af þér á netinu
Að dreifa ljótum sögum um þig
Er andlegt ofbeldi virkilega ofbeldi?
Samband getur verið óheilbrigt og ofbeldisfullt án þess að það leiði nokkurn tíma til líkamlegs ofbeldis. Andlegt ofbeldi veldur tilfinningalegum skaða og sárum. Stundum verður ofbeldið svo slæmt að þú ferð að trúa því sem maki þinn segir. Þú ferð að halda að þú sért einskis virði, ljót og heimsk manneskja. Þú sannfærist jafnvel um að enginn annar myndi vilja vera í sambandi með þér því stöðug gagnrýni og niðurlæging brýtur niður sjálfsmyndina. Þú gætir jafnvel farið að kenna þér um ofbeldishegðun makans.
RASP: 1 ½ dl góður brauðraspur 2 hnefafylli möndluflögur, kramdar og muldar gróft börkur af 1 sítrónu 6 litlir vorlaukar, fínt saxaðir, notið eins mikið af græna hlutanum og hægt er hnefafylli steinselja, smátt skorin 2 msk. ólífuolía
Blandið öllu vel saman.
800 g laxaflak 1 msk. ólífuolía safi úr 1 sítrónu 1 tsk. grænt dijon-sinnep með kryddjurtum (fine herbes), eða annað gott sinnep gróft sjávarsalt nýmalaður svartur pipar
Hitið ofn í 180°C. Setjið laxaflak í eldfast mót með roðið niður og penslið með olíu og sinnepi og dreypið sítrónusafa yfir. Stráið ríflega af salti og svörtum pipar yfir flakið og hyljið það því næst með brauðraspinu. Bakið í 15-20 mín. og látið síðan standa í 5-10 mín. áður en fiskurinn er borinn fram. Berið gjarnan fram með góðu salati, jógúrtsósu og kartöflum.
Ráð sem gera okkur betur í stakk búin til að takast á við veturinn.
Mörg þekkjum við vetrarblúsinn sem á það til að læðast að okkur á veturna. Hér eru nokkur ráð sem gera okkur betur í stakk búin til að takast á við hann, án þess að missa vitið!
Kveiktu ljósið um leið og vekjaraklukkan hringir.
Kveiktu ljósið um leið og vekjaraklukkan hringir. Að græja sig fyrir vinnudaginn í myrkri gerir þig bara þreyttari og myglulegri.
Klæddu þig vel og taktu þér smágöngutúr í hádeginu. Það kemur ekkert í staðinn fyrir sólarljós, nýttu það litla sem gefst! Fríska loftið gerir einnig kraftaverk.
Planaðu vinahitting strax eftir vinnu. Þér er enginn greiði gerður með að fara beint á Facebook eða að horfa á sjónvarpið uppi í sófa í fósturstellingunni. Hittu vini eða fjölskyldu allavega einu sinni í viku og virkjaðu hláturvöðvana.
Taktu D-vítamíntöflur, þær hafa góð áhrif á skapið. Á haustin og veturna fáum við ekki nóg af D-vítamíni frá sólinni og þurfum smáhjálp.
Skreyttu heimilið með fallegum púðum, nýju rúmteppi eða kertum. Splæstu jafnvel í bjartan lit á vegginn. Þegar það er grátt úti verður að vera bjart og upplífgandi inni!
Afskorin blóm lífga upp á heimilið – og skapið í leiðinni.
Farðu út að leika! Sleðaferðir, skíðaferðir eða aðrar fjölskylduferðir úti gera kraftaverk fyrir sálina.
Drekktu grænt te – það er hollt og getur hjálpað við að ráða bót á depurð sem oft fylgir vetrinum.
Við eigum það til að borða meira af ávöxtum á sumrin, enda úrvalið í hámarki. Haltu áfram að borða ávexti þegar hausta fer, ávextir eru náttúrlegt þunglyndislyf.
Farðu snemma að sofa og fáðu góðan nætursvefn.
Vertu meðvituð/meðvitaður um líðan þína og minntu sjálfa/n þig á að vetrarblúsinn er bara tímabundinn – að vera meðvituð skiptir miklu máli fyrir okkur. Gerðu þér grein fyrir tilfinningum þínum, ekki dæma þær eða reyna að fela þær. Reyndu að sjá allar jákvæðu hliðarnar á vetrinum!
