Hafsteinn Ólafsson galdrar fram spennandi rétti.

Hafsteinn Ólafsson, yfirmaður á veitingastaðnum Sumac Grill + Drinks, er sannkallaður matgæðingur. Hafsteinn er jafnframt meðlimur í íslenska kokkalandsliðinu og átti því ekki í neinum vandræðum með að töfra fram spennandi rétti.

Hvað var það fyrsta sem þú lærðir að elda?
Mig minnir að það hefði verið skyrterta sem ég lærði að gera í minni fyrstu vinnu í eldhúsi 14 ára gamall.

Ertu jafnvígur á bakstur og matseld?
Nei alls ekki, held mig aðallega við matseld en maður getur samt alveg bjargað sér í bakstrinum.

Höfðar einhver matreiðsluhefð sérstaklega til þín?
Já ég er mikið fyrir það að grilla og þá helst á alvörukolagrillum.

Verstu mistök sem þú hefur gert í eldhúsinu?
Ekkert eitt sem mér dettur í hug en maður er alltaf að gera einhver lítil mistök sem hjálpa manni bara að verða betri í því sem maður gerir.

Hefur þú uppgötvað einhverja snilld í matseld nýlega?
Já núna í undirbúningnum og opnuninni á Sumac vorum við mikið að prófa okkur áfram með allskonar framandi krydd. Við ferðuðumst meðal annars til Líbanon til að fá innblástur.

Hefur þú ræktað krydd- eða matjurtir?
Ég hef oft reynt það en það gengur yfirleitt illa.

Hver er stærsta áskorun sem þú hefur mætt í eldamennsku?
Þær eru allmargar en ég held að ég verði að nefna þau tvö skipti sem ég fór að keppa með kokkalandsliðinu á heimsmeistaramótinu 2014 og Ólimpíuleikunum í matreiðslu 2016.

___________________________________________________________________

Lax

1 laxaflak

Roðflettið og beinhreinsið laxinn. Stráið kryddblöndunni yfir hann og leyfið að standa í 40 mín. inni í kæli, skolið laxinn eftir þann tíma og skerið flakið í u.þ.b. 6 bita. Stillið ofnin á 50°C. Setjið laxinn í eldfast mót og vel af olíu yfir, eldið í 15-20 mín. eða þar til laxinn brotnar í flögur.

Kryddblanda
100 g salt
60 g sykur
10 g kóríanderfræ
10 g fenníkufræ
börkur af einni sítrónu

Öllu blandað saman.

Kúmkat
2 stk. kúmkat
100 g appelsínusafi
100 g eplaedik
100 g sykur

Kúmkatið er skorið í þunnar sneiðar. Appelsínusafi, edik og sykur er soðið saman í potti og svo hellt yfir kúmkatið.

Fenníkusósa
2 stk. fenníka
2 stk. laukur
300 ml hvítvín
700 ml rjómi
200 g smjör
2 stk. anísstjörnur
2 stk. appelsínur
300 ml appelsínusafi

Fenníka, laukur og anísstjörnur svitað saman í potti. Þegar það er orðið mjúkt er hvítvíni bætt út í og þessu leyft að malla í um 10 mín. þá er appelsínusafanum bætt út í. Þessu leyft að sjóða saman í um 15 mín. Því næst fer rjóminn út í. Þessu er leyft að sjóða saman þar til rétt þykkt og bragð hefur náðst. Þá er sósan sigtuð og í lokin er köldum smjörteningum hrært rólega út í.

Laxinn er svo rifinn niður í litla bita og dressingu úr sítrónuolíu og graslaukstráð yfir. Kúmkatið og kóríander sett á laxinn og svo sósan í lokin.

_______________________________________________________________

Romaine

1 haus romaine-salat

Romaine-hausinn er skorinn til helminga og skolaður. Best er að grilla romain-salatið en einnig er hægt að steikja það á pönnu.

Aioli
50 g eggjarauður
150 g olía
100 g hvítlauksolía
1 msk. dijon-sinnep
salt
sítrónusafi

Eggjarauðurnar eru hitaðar varlega í vatnsbaði upp í 55°C til að gerilsneyða þær, svo er olíunni hrært út í mjórri bunu og sinnepi bætt út í. Smakkið til með salti og sítrónu.

Djúpsteiktar kjúklingabaunir

1 dós kjúklingabaunir
1 msk. reykt paprika
1 msk. cayenne-pipar

Kjúklingabaununum er velt upp úr kryddinu og svo djúpsteikt á 180°C þar til gullinbrúnar og stökkar.

Romaine-salatið er svo borið fram með rifnum geitaosti.

_______________________________________________________________

Bakað blómkál

1 blómkálshaus

Hitið ofn í 190°C. Sjóðið blómkálið í 6 mín. Bragðbætið með kryddblöndunni og bakið í 15 mín. eða þar til blómkálið er orðið gullinbrúnt. Berið blómkálið fram með jógúrtsósu, granateplum og ristuðum möndluflögum.

kryddblanda:
10 g salt
5 g sykur
5 g malað kummin
3 g ristuð og möluð kóríanderfræ

Blandið öllu saman.

jógúrtsósa:
200 g grísk jógúrt
30 g kummin
50 g tahini

salt
pipar
sítrónusafi

Blandið jógúrt, tahini og kummin saman og smakkað til með salti, pipar, og sítrónu.

granatepla-vinaigrette:
1 stk. granatepli
1 stk. appelsína
50 ml ólífuolía
25 ml eplaedik
salt
hunang
ristaðar möndlur

Opnið granateplið og takið fræin úr. Bætið appelsínusafa og berki saman við og bætið því næst olíunni og edikinu út í. Smakkið til með salti og hunangi. Stráið ristuðum möndlum yfir í lokin.

Umsjón / Íris Hauksdóttir
Myndir / Heiðdís Guðbjörg Gunnarsdóttir

Nú sækir kuldaboli að og við erum öll farin að draga fram vetraryfirhafnirnar.

Hvort sem þú kýst að klæðast kápu, frakka eða úlpu þá er nauðsynlegt að verja sig vel. En hver er sagan á bak við þessar flíkur og hvernig hafa þær þróast í gegnum tíðina?

Á miðöldum voru það nær eingöngu karlmenn sem klæddust sérsniðnum kápum, frökkum eða öðrum yfirhöfnum á meðan konur vöfðu sig sjölum. Í Evrópu voru þetta yfirleitt millisíðir frakkar sem voru hnepptir að framan, aðsniðnir í mittið og með einskonar opnu pilsi að neðan.

Hér á landi voru yfirhafnir unnar úr vaðmáli, svokölluðu hafnarvoði, og margar hétu skondnum en lýsandi nöfnum. Belghempa var karlmannsyfirhöfn til ferðalaga, úr grófu vaðmáli, hnésíð, ófóðruð og skrautlaus, en doppa var sjóflík sem var hnésíður stakkur úr grófu og mjög þykku vaðmáli.

Með tíð og tíma þróuðust yfirhafnir og frá 18. öld byrjuðu að koma fram kápur eins og við þekkjum þær í dag; hné- eða skósíðar, ein- eða tvíhnepptar og úr ull eða öðrum efnum. Sum snið eiga rót sína í hermannaklæðum enda voru þau sérstaklega hönnuð með notagildið í huga.

Stuttar kápur eða frakkar, sem nefnast pea coat á ensku, komu fyrst fram á sjónarsviðið fyrir rúmum tvö hundruð árum. Kápan nær aðeins niður að lærum og klauf á sitthvorri hlið þannig að auðvelt var að setjast í henni. Hún er yfirleitt úr ull og tvíhneppt með stórum tölum úr við, plasti eða málmi. Þessi stutta flík var fyrst hönnuð fyrir sjóliða í herliði Evrópu og Bandaríkjanna en nútímaútgáfur eru svo gott sem nákvæmlega eins.

Svokölluð duffel-kápa kemur reglulega í tísku en uppruna hennar má rekja allt til 1820. Kápan er nefnd eftir bænum Duffel í útjaðri Antwerp í Belgíu en talið er að sniðið sé að fyrirmynd pólsks hermannafrakka. Kápan var afar vinsæl meðal hermanna og almennings Evrópu seinni hluta 19. aldar og fram yfir fyrri heimsstyrjöld. Einkenni duffel-kápu eru þykkt ullarefni og líning með skosku köflóttu mynstri, þverfaldsfestingar úr leðri og beini eða við, tveir stórir utanáliggjandi vasar og hetta með hálsbandi sem hægt var að hneppa.

Trench-kápan var fyrst þróuð sem hlífðarflík fyrir breska og franska hermenn í fyrri heimsstyrjöldinni. Þegar margir heyra orðið „trench“ dettur þeim vörumerkið Burberry í hug og það er ekki furða, tískuhúsið hefur framleitt kápurnar í rúma öld. Thomas Burberry fann upp gaberdínefni árið 1850 sem er afar þéttofið efni úr ull eða bómull sem hleypir síður vind eða regni í gegn. Rúmum tuttugu árum síðar, árið 1901, sendi hann inn tillögu að regnfrakka fyrir herforingja breska hersins sem var samþykkt og send til framleiðslu. Þannig fæddist trench-frakkinn. Í dag er hann vinsæll hjá báðum kynjum enda stílhrein og afslöppuð yfirhöfn. Hefðbundinn frakki er tvíhnepptur með tíu tölum, með breiðum boðungi og belti um miðjuna og oft líka neðst á ermunum.

Í kringum 1920 naut mjög skemmtilegt kápusnið vinsælda meðal kvenna, svokallað púpu-snið eða cocoon coat. Slíkar kápur voru víðar um miðjuna og mjókkuðu svo niður fyrir hné. Eins og aðrar flíkur á þessum tíma voru kápurnar skreyttar fallegum munstrum, loðskinni, fjöðrum og fleira. Þetta snið komst síðan óvænt í tísku aftur á undanförnum árum og þá í mun stílhreinni búning en áður.

Dúnfylltar flíkur hafa lengi verið notaðar til að halda hita á fólki yfir harða vetrarmánuði og fundist hafa dæmi um slíkar flíkur í Evrópu, Indlandi og jafnvel Kína. Rússneskir hermenn klæddust einnig dúnfylltum frökkum í fyrstu heimsstyrjöldinni. Sá sem á þó heiðurinn af því að setja dúnúlpur á almennan markað er Eddie Bauer. Hann saumaði fyrstu úlpuna árið 1936 og sótti um einkaleyfi á uppfinningunni árið 1940. Innblásturinn að hugmyndin var sagan um rússnesku hermennina sem afi hans sagði honum þegar hann var barn. Sú saga rifjaðist svo upp fyrir honum þegar hann varð næstum úti í veiðiferð. Dúnúlpur hafa dottið í og úr tísku nokkrum sinnum síðan og eru ákkúrat í tísku núna.

Höfundur / Hildur Friðriksdóttir

Eplaedik hefur á undanförnum árum farið frá því að vera talið gamaldags húsráð í að vera vinsælt heilsulyf.

Það er búið til úr ferskum eplum sem eru hökkuð og látin gerjast í viðartunnum. Sýran í eplaedikinu er lykillinn að heilsueflandi kostum þess – kostum svo sem bættri meltingu, heilbrigðari húð, jafnvægi á blóðsykri, auknu þyngdartapi og minni bólgum og verkjum í líkamanum. Mikilvægt er að edikið sem þú notar sé bæði er ósíað og ógerilsneitt og helst lífrænt því það er stútfullt af lifandi og heilsubætandi gerlum. Hér eru fimm sniðugar leiðir til að nota eplaedik í daglegu lífi.

1. Detox-hreinsun
Talið er að eplaedik hjálpi til við hreinsun með því að auka starfsemi lifrarinnar við að losa sig við eiturefni, auk þess inniheldur það mikið af vítamínum, steinefnum og ensímum sem eru líkamanum mikilvæg í hreinsun. Síðan getur eplaedik einnig hjálpað til við að draga úr vatnsuppsöfnun, eða bjúg, í líkamanum. Ýmist er hægt að innbyrða eplaedikið eða bæta því út í baðið. Til að útbúa hreinsandi bað bættu 1-2 bollum af ediki út í baðið á meðan þú lætur renna í. Liggðu í baðinu 20-30 mínútur og skolaðu baðvatnið af áður en þú þurrkar þér.

2. Heilbrigð húð
Eplaedik getur hjálpað til gegn hinum ýmsu húðvandamálum því það er bæði bakteríudrepandi og róandi. Hægt er að nota það í að fjarlægja vörtur á fótum, draga úr og meðhöndla bólur, minnka svitalykt og jafnvel milda sársauka sem fylgir sólbruna. Þegar á að nota eplaedik á húð þarf að blanda það með vatni, annars getur það verið of ertandi, og best er að nota tvo hluta af vatni á móti einum af eplaediki. Síðan er hægt að setja blönduna í lítinn spreybrúsa og spreyja beint á eða annars konar flösku og nota bómull og bera blönduna á húð.

3. Náttúrulegt hreinsiefni
Upp á síðkastið hefur verið mikið rætt um notkun ediks til að hreinsa heimilið vegna náttúrulegra sýkladrepandi eiginleika þess. Blandaðu saman hálfum bolla af eplaediki á móti 1 bolla af vatni. Þú getur notað þessa blöndu til að þrífa baðherbergisflísar, eldhúsyfirborð, glugga, gler og spegla. Einnig er sniðugt að bæta örlitlum matarsóda í blönduna og þá verður allt skínandi hreint.

4. Bragðgóður og hollur drykkur
Eplaedik getur haft góð áhrif á meltinguna; jafnað sýrustig í maga, dregið úr bólgum í meltingarvegi og svo framvegis. Auðvelt er að útbúa góðan og heilsubætandi drykk með með því að blanda tveimur matskeiðum af eplaediki og tveimur matskeiðum af hunangi saman við bolla af heitu vatni. Drekktu þrjá bolla á viku og sjáðu hvort þú finnir ekki mun.

Þegar á að nota eplaedik á húð þarf að blanda það með vatni, annars getur það verið of ertandi, og best er að nota tvo hluta af vatni á móti einum af eplaediki. Síðan er hægt að setja blönduna í lítinn spreybrúsa og spreyja beint á eða annars konar flösku og nota bómull og bera blönduna á húð.

5. Glansandi hár
Það hljómar ef til vill furðulega en með því að nota eplaedik eftir að þú hefur þvegið hárið með sjampói lokarðu hárendum og hreinsar burt eftirstöðvar af óhreinindum þannig að hárið glansar enn meira á eftir. Settu hálfa matskeið af ediki í vatn. Helltu blöndunni yfir höfuðið inn í sturtu og skolaðu svo vandlega úr. Vissulega er örlítið sérstök lykt af hárinu á meðan það er blautt en hún hverfur þegar það þornar.

Höfundur / Hildur Friðriksdóttir

Borgin Aberdeen er full af fallegum almenningsgörðum, söfnum og stórbrotnum arkitektúr.

Aberdeen er krúttleg borg í Skotlandi sem líkja má við Akureyri okkar Íslendinga, hún hefur sjarma smábæjar en er með allt það sem finna má í stórborgum.

Aberdeen er þriðja stærsta borg Skotlands og oft nefnd granítborgin, eða Silver by the Sea, enda nánast allar byggingar á svæðinu byggðar úr hinum níðsterka og fallega efnivið, graníti. Olíuvinnsla í Norðursjó skipar stóran sess í samfélaginu og í Aberdeen er stærsti þyrluflugvöllur í Evrópu. Í borginni eru margir fallegir almenningsgarðar, stórbrotinn arkitektúr og skemmtileg söfn, enda á borgin sér margra alda sögu.

Aðalverslunargatan heitir Granite Mile og er hluti af Union Street en þar eru meira en 800 verslanir, veitingastaðir og barir. Stærsta verslunarmiðstöðin heitir Union Square og þar má finna H&M, Zöru, Michael Kors, Apple og fleiri þekktar búðir. Verslunarmiðstöðvarnar Bon Accord og St Nicholas eru samtengdar skammmt frá en þar er einnig H&M-verslun, Karen Millen, L‘Occitan, Marks & Spencer og fleiri. Í Trinity Center er svo meðal annars Debenhams og Primark.

Óhætt er að mæla með Scene-hótelunum í miðborg Aberdeen sem bjóða upp á öll nútímaþægindi. Hótelin eru þrjú og eru rekin af Scene-fjölskyldunni. Hótelin eru í samstarfi við nokkra veitingastaði víðs vegar um Aberdeen þar sem hægt er að borða og bæta á hótelreikninginn. Hótelin eru einnig í samstarfi við tvær líkamsræktarstöðvar. Fyrsta hótelið var stofnað árið 1979 og starfsemin hefur vaxið hægt og bítandi síðan. Álman á einu hótelinu var áður kirkja sem var gerð upp sem hótel, virkilega sjarmerandi.

Fjölskyldufaðirinn, stofnandi keðjunnar og framkvæmdastjóri, Charles Skene, leggur mikinn metnað í reksturinn og hefur forðast að láta fyrirtækið verða of stórt eða hluta af alþjóðlegum keðjum. Fyrir nokkrum árum var hann sæmdur OBE, Order of the British Empire sem er eins konar fálkaorða þeirra Breta, fyrir störf sín.

Í sambýli við Trump

Aberdeen og nágrenni er golfparadís en þar eru fimmtíu og sjö 18 holu golfvellir. Skammt norðan við Aberdeen er golfvöllur í eigu Donalds Trump sem kallast einfaldlega Trump International Golf Links. Hann er byggður innan um miklar sandöldur við austurströnd Skotlands sem gerir völlinn einstakan. Sandöldurnar, sem voru látnar halda sér á milli teiga, brauta og flata, eru í hlutverki hindrana og ekki er um aðrar hindranir að ræða.

Golfarkitektinn Dr. Martin Hawtree hannaði völlinn sem var opnaður árið 2012 eftir nokkra baráttu en ekki voru allir á eitt sáttir um framkvæmdina. Trump þurfti að kaupa land af nokkrum aðilum til að geta byggt þennan draumavöll en ekki voru allir sem vildu selja. Einn eigandinn býr til dæmis enn á svæðinu og golfvöllurinn var byggður í kringum býli hans. Sagan segir að sambýlið gangi ekkert allt of vel.

Gamlt höfðingjasetur sem Trump keypti gegnir hlutverki hótels og veitingastaðar sem er sérstaklega ætlað golfurum. Sérstök svíta þar er kennd við Trump og hann dvelur í henni þegar hann er sjálfur á svæðinu. Þessa svítu er svo hægt að leigja fyrir þónokkur pund. Við golfvöllinn er svo glæsilegur golfskáli, veitingastaður og verslun.

Í kastalanum sjálfum er flott herbergi í gamaldags stíl en í gamalli hlöðu og útihúsum á móti er búið að innrétta flott nútímaleg herbergi.

Meldrum House Country Hotel and Golf Course er í um fjörutíu og fimm mínútna akstursfjarlægð frá Aberdeen. Hótelið er í gömlum kastala sem upphaflega var byggður á þrettándu öld en hefur tekið töluverðum breytingum í gegnum tíðina síðan. The Cave Bar er einn af elstu hlutum hússins eða um 800 ára gamall og þar er meðal annars eitt stærsta safn af Glen Garioch-viskíi og gaman að fara í viskísmökkun. Í kastalanum sjálfum er flott herbergi í gamaldags stíl en í gamalli hlöðu og útihúsum á móti er búið að innrétta flott nútímaleg herbergi. Golfvöllurinn er mun hefðbundnari en Trump-völlurinn, með trjám, tjörnum og sandgryfjum.

Fór næstum í flóði

Skosku hálöndin ættu allir að heimsækja einhvern tímann á ævinni. Þau eru svo falleg, full af dýrðarljóma og sögu. Þau eru meðal annars þekkt fyrir þá fjölmörgu kastala sem þar eru. Einn þeirra er Crathes Castel; það er ævintýri líkast að fara í túr um kastalann, skoða hvern krók og kima og kynnast sögu hans. Í kringum kastalann er stór garður og í raun heljarstórt útivistarsvæði sem er vinsælt meðal bæði heima- og ferðamanna. Þar er hægt að velja um sex mismunandi gönguleiðir og tilvalið fyrir fjölskylduna að njóta dagsins með nesti og nýja skó eða kíkja á veitingastaðinn sem er skammt frá kastalanum.

Ekki langt frá Crathes-kastalanum, meðfram ánni River Dee, er Banchory Lodge Hotel. Áin komst í heimsfréttirnar eitt sinn mikil flóð urðu í henni og eyðilögðu meðal annars næstum því heilan kastala sem stendur á árbakkanum. Flóðið náði alveg upp að veggjum hótelsins í Banchory Lodge en það slapp við stórfelldar skemmdir. Talsmenn hótelsins sögðu að það hefði verið ógnvekjandi að sjá stærðarinnar hjólhýsi fljóta fram hjá. Banchory Lodge Hotel er fallegt sveitahótel sem býður upp á flott hótelherbergi með fallegu útsýni. Á staðnum er frábær veitingastaður með mjög góðum mat og hægt að sitja úti á palli þegar veðrið er gott. Mikið er um að þarna séu haldnar veislur, ekki síst brúðkaupsveislur, enda frábær aðstaða til slíks og svo geta allir gestirnir gist á staðnum.

Vatnsdropar í viskíið

Viskí er eitt af einkennistáknum Skotlands og í landinu eru framleidd yfir 2.200 vörumerki af þessum eðaldrykk. Viskíhéruðin í landinu eru sex talsins og þar með tegundirnar því þær hafa mismunandi karakter eftir því á hvaða svæði þær eru framleiddar. Vinsælt er að fara í

viskísmökkun og skammt frá Meldrum House Country Hotel er viskíverksmiðjan Glen Garioch þar sem boðið er upp á viskísmökkun og skoðunarferð um húsakynnin. Fyrirtækið hefur í rúm 200 ár framleitt handunnið og ókaldhreinsað maltviskí.

Til að finna karakterinn í viskíinu eru oft settir nokkrir dropar af vatni út í það en við það verður ilmurinn og bragðið fyllra, líkt og þegar nýbúið er að rigna þá finnst lyktin af gróðri miklu betur.

Upplifun fólks af styrkleika viskís er persónubundin, það er sem sagt misjafnt hversu sterkt fólk á að hafa viskíið sem það drekkur. Ef það finnur fyrir bruna í hálsinum þegar það tekur sopa er drykkurinn of sterkur. Dropum af vatni er þá bætt við þangað til viskíið verður passlega sterkt. Til er sérstakt vatn til að setja út í viskí frá mismunandi stöðum í Skotlandi og bragðið verður mismunandi eftir uppruna vatnsins.

Litríkt fiskiþorp

Óhætt er að mæla með leiðsögn um borgina og fá þannig söguna og helstu perlur staðarins beint í æð. Litla fiskiþorpið í mynni hafnarinnar í Aberdeen er sérstaklega áhugavert. Það er kallað Footdee eða Fittie og samanstendur af tveimur svæðum með litlum húsum sem byggð eru í ferhyrning. Í gamla daga bjuggu sjómenn og fjölskyldur þeirra í húsunum. Þó að margar af þessum fjölskyldum búi þarna enn þá er fiskilífið á miklu undanhaldi. Á árum áður mátti sjá eiginkonurnar sitja við útidyrnar að gera við net og skiptast á sögum við nágrannana. Fiskinet voru víðs vegar þar sem greiða þurfti úr flækjum og hengja þau til þerris. Þessi litlu hús og garðarnir hafa þó fengið að halda sér. Húsin hafa öll sinn sjarma, eru litrík og margvíslega skreytt. Sumum er vel haldið við, öðrum ekki. Þarna er dásamlegt að vera og svolítið eins og að koma inn í nýja veröld úr ys og þys borgarlífsins.

Höfundur / Ragnhildur Aðalsteinsdóttir
Myndir / www.pixabay.com

Tumblr-síðan Headless Women of Hollywood vekur athygli á þeirri tilhneigingu kvikmyndabransans til að nota kvenmannslíkama til að selja myndir – og þá er átt við kvenlíkama án höfuðs.

Konur eru oft hlutgerðar í Hollywood og í öðrum formum dægurmenningar – það er ekkert nýtt. En þegar konan er gerð að litlu öðru en bara líkamanum þá verðum við að segja: hingað og ekki lengra.

Tumblr-síðan Headless Women of Hollywood vekur athygli á þeirri tilhneigingu kvikmyndabransans til að nota kvenmannslíkama til að selja myndir – og þá er átt við kvenlíkama án höfuðs.

Einhverjum finnst þetta varla vera tiltökumál, og að verið sé að gera úlfalda úr mýflugu á þessari vefsíðu, en málið er að þetta er bara einn hluti af mun stærra vandamáli sem þarf að uppræta.

Oftar en ekki snýr konan baki í myndavélina, í hælum en litlu öðru með stórt bil á milli fóta. Jafnvel þegar höfuð eða andlit konu er sýnt er fókusinn oft færður á ákveðna þætti andlits … í stað þess að sýna heildina og persónugera einstaklinginn.

Heiðurinn af tumblr-síðunni á uppistandarinn Marcia Belsky en með henni vill hún hvetja Hollywood til að hætta að afhausa konur. „Með því að afhausa konuna er hún óneitanlega hlutgerð og látin sæta augnaráði karlmanna (e. Male Gaze). Samþykki hennar skiptir ekki

lengur máli, það hefur verið fjarlægt ásamt höfði hennar, og hennar eini tilgangur er að láta horfa á sig af karlmönnum. Virði hennar er bundið við kynþokka hennar ekki persónu,“ segir hún á síðunni.

Á síðunni eru birt kvikmyndaplaköt, auglýsingar og fleira þar sem hauslaus kona kemur fyrir. Oftar en ekki snýr konan baki í myndavélina, í hælum en litlu öðru með stórt bil á milli fóta. Jafnvel þegar höfuð eða andlit konu er sýnt er fókusinn oft færður á ákveðna þætti andlits, eins og varir eða augu, í stað þess að sýna heildina og persónugera einstaklinginn. Þegar maður fer að skoða síðuna kemur það manni í raun á óvart hversu algengt þetta fyrirbæri er og hversu blindur maður hefur verið fyrir því hingað til.

Höfundur / Hildur Friðriksdóttir

Vestrar eru enn afar vinsælir og hér eru nokkur nýleg dæmi.

Kjarkaðar konur

Godless er ný sjö þátta sería úr smiðju Netflix en þættirnir voru framleiddir af Steven Soderbergh. Þættirnir gerast árið 1884 í Nýju-Mexíkó. Stórhættulegi útlaginn Frank Griffin er á höttunum eftir Roy Goode sem stal frá honum gulli. Roy þessi var áður hluti af bófagengi Franks og Frank leit á hann sem son áður en Roy stakk hann í bakið. Roy felur sig á býli ekkjunnar Alice Fletcher sem býr í útjaðri bæjarins La Belle. Íbúar La Belle eru nær eingöngu konur því allir karlmenn bæjarins létust í hræðilegu námuslysi nokkrum árum áður. En hvernig verja nokkrar konur sig gegn manni eins og Frank?

Skemmtigarður framtíðarinnar

Sjónvarpsþættirnir Westworld eru byggðir á samnefndri kvikmynd eftir Michael Chrichton. Þeir gerast í framtíðarheimi og Westworld er í raun sýndarveruleikaskemmtigarður sem lítur út eins og villta vestrið. Þar geta gestir hagað sér eins og þeim sýnist innan um afar raunveruleg vélmenni í alls kyns hlutverkum. Þættirnir eru stjörnum prýddir en Anthony Hopkins leikur skapara garðsins, Ed Harris leikur ruddalegan gest og þau Evan Rachel Wood, Thandie Newton og James Marsden leika öll vélmenni, eða gestgjafa eins og þau eru kölluð í þáttunum.

Í leit að ástinni

Í Slow West kynnumst við ungum Skota sem ferðast alla leið til villta vestursins í Bandaríkjunum í leit að Rose, konunni sem hann elskar. Á ferð sinni kynnist hann útlaganum Silas sem slæst í för með honum sem leiðsögumaður og verndari. Jay veit hins vegar ekki að Rose og faðir hennar eru eftirlýst og fé sett til höfuðs þeirra, tvö þúsund dollarar lífs eða liðin.

Mannaveiðari og þræll

Tarantino-vestrinn Django Unchained gerist í suðurríkjum Bandaríkjanna skömmu áður en þrælastríðið braust út. Þýski læknirinn og mannaveiðarinn dr. King Schultz er á höttunum eftir hinum morðóðu Brittles-bræðrum þegar hann hittir þrælinn Django í Texas og fær hann til að aðstoða sig við leitina gegn loforði um frelsi hans og eiginkonu hans, Broomhildu, en hún er í eigu grimma plantekrueigandans Calvin Candie. Django og Schultz láta sér ekki nægja að handsama Brittles-bræðurnar heldur ná einnig að klófesta marga af hættulegustu glæpamönnum suðursins áður en þeir snúa sér að frelsun Broomhildu.

… mannaveiðarinn dr. King Schultz er á höttunum eftir hinum morðóðu Brittles-bræðrum þegar hann hittir þrælinn Django í Texas og fær hann til að aðstoða sig við leitina gegn loforði um frelsi hans og eiginkonu hans.

Hefnd og svik

True Grit kom fyrst út árið 1969 en hún er byggð á samnefndri skáldsögu Charles Portis. Þessi útgáfa Coen-bræðra frá árinu 2010 vakti mikla lukku meðal áhorfenda og gagnrýnenda. Sagan gerist árið 1877 og segir frá unglingsstúlkunni Mattie Ross. Faðir hennar er myrtur á hrottalegan hátt af undirmanni sínum sem flýr af vettvangi með tvo hesta og gull föður hennar. Mattie vill tafarlausa hefnd og leitar til hins gamalreynda og harnaða lögreglumanns Rooster Cogburns. Hann hafnar fyrst um sinn beiðni hennar en hún nær sínu fram á endanum. Þegar annar lögreglumaður, LaBoeuf sem er einnig á höttunum eftir Chaney, mætir á svæðið vandast málin. Laboeuf og Rooster taka höndum saman til að hafa uppi á Chaney, gegn vilja Mattie, og þar með hefst hættuleg för þremenninganna til að ná fram hefndum.

Höfundur / Hildur Friðriksdóttir

Víða um heim má finna staði með spennandi gönguleiðum.

Vinsældir ýmiskonar gönguferða hafa aukist mjög á undanförnum árum og víða um heim má finna staði með spennandi gönguleiðum sem skarta glæsilegu útsýni og ýmsu sem gerir þær sérstakar á einn eða annan hátt.

Zion Narrows í Utah-ríki, Bandaríkjunum

Zion Narrows er mögnuð gönguleið sem skartar töfrandi landslagi sem liggur í gegnum þröng gljúfur úr litríkum, eins kílómetra háum sandveggjum.

Á hinum fræga hluta leiðarinnar sem nefnist Wall Street verða gljúfrin ekki nema sex metrar að breidd að ofan. Ríflega helming leiðarinnar þarf að ganga upp með á sem liðast fallega í gegnum gljúfrin.

Úr veggjum gljúfranna hanga runnar, vatn kemur úr sprungum, þarna eru breiður af mosa, fossar og há tré.

Rétt er að taka fram að það getur verið mjög hættulegt að fara þessa leið því fljót geta komið snögglega og árlega deyja göngugarpar á leiðinni. Því þarf að vera með veðurspána á hreinu áður en farið er, og vera viss um að alls engin rigning sé í kortunum.

Með nauðsynlegum varúðarráðstöfunum er þessi gönguleið ein sú allra flottasta í Bandaríkjunum og sannarlega engu lík.

Tongariro-gönguleiðin á Nýja-Sjálandi

Landslagið á Nýja-Sjálandi er sérstaklega fallegt og því ekki að undra að ein flottasta gönguleið í heimi sé á norðureyju landsins. Hægt er að taka frá einum og upp í þrjá daga í gönguna.

Leiðin sem er um 35 kílómetra löng liggur í gegnum eldfjallasvæði og eyðimerkur sem líkjast einna helst öðrum hnöttum og fallegir fjallstindar gnæfa yfir.

Göngufólk mun sjá virka eldfjallið Ngaurube eða Doom eins og það hét í Lord of the Rings. Einnig sjóðandi leirkatla, gíga og hraun …

Göngufólk mun sjá virka eldfjallið Ngaurube eða Doom eins og það hét í kvikmyndinni Lord of the Rings. Einnig sjóðandi leirkatla, gíga, hraun og hin glæsilegu Emerald-vötn.

Ferðalagið er ekki síst skemmtilegt eftir að fer að dimma en þá er hægt að koma sér fyrir í þægilegum fjallakofum sem eru með fínum rúmum, gashiturum og -eldavélum, rennandi vatni og klósettum. Ferðalangar geta svo auðveldlega lagt lykkju á leið sína og gengið á topp fjallanna Tongariro og Ngauruhoe.

West Coast í Bresku Kólumbíu, Kanada

Þá sem langar í óvenjulega göngu í gegnum óspillta kanadíska náttúru, upplifa tempraða skóga, harðgerðar strandlengjur og stórkostlega fjallstinda, þá er West Coast-gönguleiðin málið. Göngufólk mun vakna í tindrandi sólarupprás, njóta ótrúlegs sólarlags, klöngrast yfir stóra steina og trjáboli, yfir læki og ár, fram hjá fossum, upplifa hve ótrúlega lítil mannskepnan er í kringum risastór tré í eldgömlum skógi. Einnig gæti fólk séð hvali, sæljón, minka og kannski einnig birni og úlfa, svo ekki sé minnst á skipsflök og aðrar minjar. Erfitt getur verið að komast að í þessa einstöku göngu og stundum er hægt að lenda í slæmu veðri, jafnvel á sumrin. Engin ganga í Norður-Ameríku býður upp á jafnfjölbreytt landslag og er sannarlega þessi virði að fara hana.

Torres del Paine-gönguleiðin í Chile

Þeir sem eru að leita að stórkostlegu Alpafjallalandslagi, jöklum, jökulvötnum, skörpum fjallstindum, einstöku dýralífi og möguleikanum á því að sjá hina töfrandi graníttinda Towers of Paine, ættu að fara í þessa vinsælu 100 kílómera löngu gönguleið í Patagonia-fjöllunum í Chile. Staðurinn hefur verið útnefndur einn 50 staða sem fólk ætti að heimsækja á lífsleiðinni, af tímaritinu National Geographic. Þessi dásamlega gönguleið liggur um Magellenic-skóginn, forug fen, klettótt gil og yfir óstöðugar brýr. Þótt svæðið sé heillandi frá upphafi til enda þarf að hafa í huga að þar geta veður orðið válynd. Því getur bakpokinn orðið ansi þungur með öllu sem á þarf að halda til að halda á sér hita. Hægt er að lenda í byl og því gæti hluti leiðarinnar lokast. En slæmt veðurfar veldur því að leiðin er ekki fjölfarin og því mun ferðalöngum finnast þeir hafa unnið enn stórkostlegra afrek ef þeir ganga þessa leið.

Annapurna-gönguleiðin í Nepal

Marga göngugarpa dreymir um að fara til Nepal til að komast í tæri við eina glæsilegustu fjallasýn í heimi. Þessi gönguleið í Annapurna býður ekki aðeins upp á snævi þakta fjallstinda, heldur einnig fjölbreytta náttúru og menningu. Gangan sem liggur frá suðrænu landslagi að hæstu fjöllum í heimi tekur um þrjár vikur og á leiðinni er hægt að gista í þægilegum skálum. Varast þarf háfjallaveiki en möguleiki er á henni þegar komið er í meira en fimm kílómetra hæð yfir sjávarmáli. Á leiðinni hitta ferðalangar Tíbeta sem búa í fjöllunum, sjá búddahof, geta heimsótt tehús, baðað sig í heitum lindum og njóta eins fallegasta útsýnis í heiminum.

Kilimanjaro í Tanzaníu

Þá sem langar að príla upp á verulega hátt fjall en ekki fara í brjálæðislega tæknilega, hættulega og bratta göngu þá er ferð á Kilimanjaro frábær kostur. Fjallið er 5,895 metra hátt og oft sagt að það sé hæsta fjall í heimi sem hægt er að ganga á án þess að þurfa tæknilega kunnáttu í klifri og útbúnaði. Það er ekki þar með sagt að gangan sé auðveld því hún er líkamlega krefjandi og árlega deyja nokkrir úr háfjallaveiki á þessari leið. Nokkrar leiðir eru á topp þessa hæsta frístandandi fjalls heims og hæsta tinds Afríku. Gangan hefst við miðbaug og farið er í gegnum allar loftlagstegundir í þessa sex daga og fimm nætur sem gangan tekur. Byrjað er í heitu graslendi, síðan farið í gegnum tempraða skóga og jökulfyllta dali að ísköldum tindinum.

Kalalau á Hawaii

Kalalau á Hawaii er ein glæsilegasta gönguleið í heimi. Klettarnir liggja gróðri vaxnir niður í sæblátt Kyrrahafið. Þar eru ævintýralega fullkomnir fossar sem falla niður í suðræna dali og öldurnar skella með dramatískum hætti á klettana. Í hafinu má sjá stökkvandi höfrunga og hnúfubaka og sjávarskjaldbökur við ströndina. Stígurinn er 17 kílómetra langur og þar sem hann liggur er um 1.000 metra hátt fall niður í sjó. Farið er yfir fimm stóra dali og fleiri litla. Fyrir mjög þjálfaða göngumenn tekur ferðin einn dag en tvö fyrir marga aðra sem tjalda á leiðinni. Stígurinn var fyrst byggður seint á nítjándu öld og endurbyggður árið 1960. Hann er nánast aldrei alveg flatur og á sumum stöðum liggur hann frekar nálægt hengiflugi, nokkur hundruð metra háu, beint niður í sjó.

Höfundur / Ragnhildur Aðalsteinsdóttir

Stundum þarf bara smá hugmyndaflug til að hressa upp á sambandið.

Misjafnt er hvað pör eru dugleg að gera hluti saman til að krydda sambandið þegar grár hversdagurinn tekur við eftir gáskafulla hveitibrauðsdaga svo ekki sé talað um þegar börnin fara að koma í heiminn og taka í burtu mestallan frítímann. Notalegar stundir þurfa þó ekki að vera flóknar og geta vel samræmst daglegum athöfnum – eina sem þarf er smávegis hugmyndaflug.

Stefnumót á virkum degi
Stundum henta virkir dagar betur til stefnumóta en helgar sem oft eru fullar af dagskrá og fólk vill kannski frekar nýta með börnunum. Fáðu pössun á mánudagskvöldi, taktu á móti makanum með sjóðheitu baði, kertaljósum og hafðu betri fötin tilbúin. Svo getið þið skellt ykkur út að borða, jafnvel í einn kaffibolla á eftir og samt verið komin heim á skikkanlegum tíma til að hleypa barnapíunni heim og komast það tímanlega í rúmið að þið verðið ekki að deyja úr þreytu daginn eftir. Auðvitað mætti líka skreppa saman í bíó eða leikhús en það gefur ykkur náttúrlega ekki eins mikinn tíma til að tala saman.

Saman í heimilisverkin
Í stað þess að híma í sitthvoru horninu við heimilisverkin getur verið sniðugt að boða til stefnumóts við þvottafjallið, uppvaskið eða eldamennskuna. Þegar mikið er að gera eru oft fáar stundir sem nást til að spjalla saman um daginn og veginn. Það getur því verið mjög skemmtilegt að njóta þess að vera saman á stundum sem mörgum finnst kvöð. Þeir sem hafa prófað þetta hafa sagt að á þessum klukkutíma sem tók að brjóta saman allan hreina þvottinn sem hafði safnast saman hafi þau hjónin náð að spjalla meira saman en í langan tíma. Það sama á við um eldamennsku – njótið þess að búa til matinn og spjalla saman í leiðinni um daginn og veginn. Sumir hafa líka nefnt að það sé ofsalega róandi að vaska upp, eins og hálfgerð hugleiðsla, og þarna geta pör hugleitt saman án þess að verða fyrir nokkurri truflun. Af hverju ekki að njóta þessara daglegu athafna, það þarf að gera þær hvort sem er.

Hittast í hádeginu
Sama hversu mikið við höfum að gera þá þurfum við alltaf að gefa okkur tíma til að borða og því er einhvern veginn svo hentugt að nota þær stundir til að njóta samvista. Skipuleggið að hittast sem oftast í hádeginu og fá ykkur „löns“ saman. Þetta brýtur upp vinnudaginn, þið hittist og eigið saman stund – gætu verið einu stundirnar sumar vikurnar sem þið hafið til að hittast bara tvö saman. Stundum gætuð þið jafnvel gripið með ykkur pizzu, góðan heilsudrykk eða jafnvel bara fengið ykkur skyr eða eitthvað álíka fljótlegt og hist heima í hádeginu – fengið ykkur einn stuttan í leiðinni.

Þegar mikið er að gera eru oft fáar stundir sem nást til að spjalla saman um daginn og veginn. Það getur því verið mjög skemmtilegt að njóta þess að vera saman á stundum sem mörgum finnst kvöð.

Dansnámskeið
Mikil skemmtun og samvera getur verið fólgin í því að fara saman á dansnámskeið. Það er bara enn skemmtilegra ef þið hafið aldrei kunnað neitt að dansa því þá getið þið grenjað af hlátri yfir klunnaskapnum og tilraununum til að ná sporunum rétt. Hver veit nema þið náið svo að láta þetta allt smella saman að lokum og getið þá svifið um í hvort annars örmum og slegið í gegn á dansgólfum skemmtistaðanna.

Taka til í geymslunni – saman
Margir hugsa til þess með hryllingi að fara í gegnum allt dótið sem hefur safnast saman í geymslunni á undanförnum árum og flestir muna varla hvað þar reynist vera – alla vega í fæstum tilfellum hlutir sem vantar því þeirra hefur ekki verið saknað síðan þeir fór í geymsluna. En þetta þarf ekki að vera svo slæmt. Skipuleggið stefnumót í geymslunni því þetta þarf ekki að vera svo leiðinlegt ef þið gerið þetta saman. Þegar hver hluturinn birtist á fætur öðrum þá rifjar það upp alls konar skemmtilegar minningar, t.d. lampinn frá Gunnu frænku sem ykkur fannst svo ljótur, hallærislegi jakkinn sem makinn kom með í sambandið en mátti aldrei henda og svo framvegis. Þegar þið hafið farið í gegnum allt og flokkað eftir því hvort eigi að geyma það áfram, henda eða að losa ykkur við þá getið þið auglýst eigulega hluti á bland.is, jafnvel pantað bás í Kolaportinu eða haldið bílskúrssölu og grætt á öllu saman.

Ekki leita langt yfir skammt
Skoðaðu hvað sniðugt er hægt að gera í þínu nánasta umhverfi því oft er það sem sniðugt er að gera rétt fyrir framan nefið á okkur. Það þarf ekki alltaf að ferðast langar leiðir, krefjast mikils útbúnaðar eða fjárútláta að gera eitthvað skemmtilegt. Farið saman á bókasafnið og kíkið á bækur og blöð saman. Þar er til dæmis hægt að kíkja í gömul tímarit og oft er ekkert fyndnara en að sjá hvað fólk og tískan hefur breyst í áranna rás. Farið saman í gönguferð á staði sem ykkur hefur aldrei dottið í hug að fara á en stendur ykkur nærri. Þá gæti takmarkið til dæmis verið að ganga leið og götur sem þið hafið ekki farið áður og þá mun áreiðanleg margt koma á óvart.

Sjónvarpslaus fimmtudagskvöld
Mörg okkar muna þá tíð þegar engar sjónvarpsútsendingar voru á fimmtudagskvöldum og ekki í júlí heldur. Á þessari tækniöld sem nú er runnin upp þá væri ekki vitlaust að hverfa einstöku sinnum aftur til þessara tíma. Slökkvið á sjónvarpinu, GSM-símum, Neti og tölvum. Heimasíminn má lifa svona til öryggis. Kveikið á kertum og njótið þess að vera heima í kyrrðinni frá þessu utanaðkomandi áreiti. Ef þið eigið börn þá skuluð þið leyfa þeim að njóta þessara stunda með ykkur. Komið saman og látið ykkur detta eitthvað sniðugt til að gera saman, t.d. spila, teikna, fara í leiki eins og að fela hlut, mjálmaðu nú kisa mín eða hollin skollin. Þarna gæti skapast tími sem allir fjölskyldumeðlimir gætu kunnað að meta og þjappað ykkur saman.

Komdu á óvart
Verið dugleg að gera eitthvað óvænt fyrir makann. Bakaðu köku, vöfflur eða gerðu heilsusamlokur og vertu tilbúin/n með kaffi og með því þegar makinn kemur heim úr vinnu seinnipartinn. Ef makinn sér alltaf um ákveðin húsverk skaltu koma honum á óvart með því að klára þau án þess að hann viti og segja að í staðinn séuð þið að fara saman í bíó. Komdu með góðan kaffibolla á leiðinni heim úr vinnu og færðu elskunni þinni eða keyptu uppáhaldstímaritið, bók eftir uppáhaldshöfundinn, gott freyðibað eða sturtusápu, kassa af uppáhaldsdrykknum sem aldrei er nóg til af eða bara hvað sem þér dettur í í hug.

Sólarhringssjónvarpsmaraþon
Farið saman á hótel í einn sólarhring með allar seríurnar af uppáhaldssjónvarpsþættinum ykkar og skipuleggið maraþon. Setjið fyrirfram reglur um hluti sem þið eigið að gera ef eitthvað ákveðið gerist í þáttunum. Ef þetta er til dæmis Friends gætuð þið haft: Alltaf þegar Phoebe spilar á gítarinn þá á að fara í sleik, alltaf þegar Joey reynir að sjarmera einhvern upp úr skónum á að kyssast, þegar Ross gerir eitthvað vandræðalegt á að fara úr að ofan og svo framvegis.

Höfundur / Ragnhildur Aðalsteinsdóttir

Flest höfum við heyrt um svart og grænt te – en hvað er hvítt te?

Fjölmargar rannsóknir hafa sýnt fram á hollustu tes og það kemur því ekki á óvart að te er vinsælasti drykkur heims á eftir vatni.

Allar tegundir tes koma af sömu plöntu, Camellia Sinensis, eða afbrigðis hennar sem kallast Camellia Assamica, en það er aðeins meðferð og vinnsla eftir tínslu ákvarðar hvort teið verður svart, hvítt eða grænt. Ávaxtate, jurtate og rauðrunnate eru í raun ekki te heldur seyði úr ávöxtum, blómum, jurtum eða nálum rauðrunnans og innihalda ekki koffín.

Hvítt te er sérstakt vegna þess að einungis eru notuð ung laufblöð. Þá eru klipptir af runnanum laufsprotar sem eru við það að opnast og tvö til þrjú ung laufblöð. Í vönduðustu hvítu tei eru einungis notaðir laufsprotar. Af þessari ástæðu er uppskerutíminn stuttur, stundum ekki nema tveir til þrír dagar nokkrum sinnum á ári. Stuttur uppskerutími og vandasöm tínsla gerir það að verkum að hvítt te er sjaldgæfara og dýrara en annað te og það er aðeins ræktað í mjög takmörkuðu magni í Kína og á Sri Lanka.

… hvítt te er mikið um sig, létt og oft má sjá stilka og heil blöð í teinu. Einföld framleiðsla þýðir líka að næringarefni laufanna varðveitast vel og teið er því sérstaklega gott fyrir heilsuna.

Þegar tínslan hefur farið fram er framleiðslan einföld. Teið er látið þorna í nokkra daga í sólinni eða í sérstökum þurrkhúsum. Þessi einfalda framleiðsluaðferð gerir það að verkum að hvítt te er mikið um sig, létt og oft má sjá stilka og heil blöð í teinu. Einföld framleiðsla þýðir líka að næringarefni laufanna varðveitast vel og teið er því sérstaklega gott fyrir heilsuna.

Drukkið í mörg þúsund ár

Te á sér mjög langa sögu og hefur verið til sem drykkur í tæplega 5000 ár. Ein vinsæl þjóðsaga um uppruna tesins fjallar um keisara í Kína sem kallaði sig Wan Tu. Þekkt bók skáldsins Lu Yus, Tai Ching, fjallar um Wan Tu og þau áhrif sem te hafði á líf hans. Wan Tu var illur og grimmur harðstjóri sem var steypt af stóli af einum ráðamanna sinna og hrakinn á brott til afskekkts staðar í Kína.

Dag einn sat hann í skugganum af stórum runna og hugleiddi hvernig hann gæti náð fram hefndum. Vegna fátæktar sinnar þurfti hann að sætta sig við að drekka einungis vatn. Þar sem Wan Tu sat í þungum þönkum að sjóða vatn, féll lauf af runnanum ofan við höfuð hans, ofan í pottinn. Wan Tu komst að því að útkoman var bragðgóður drykkur sem hafði róandi áhrif. Teið hreinsaði hugann á svo áhrifaríkan hátt að hann sat undir runnanum næstu sjö árin, drakk te, iðraðist gjörða sinna sem harðstjóri og hugsaði um hvernig hann gæti bætt þær upp.

Hann nefndi drykkinn Thai, sem merkir friður. Wan Tu sneri aftur til heimaborgar sinnar í dulargervi og varð vel metinn ráðgjafi fyrrum ráðamanns síns, sem hafði steypt honum af stóli. Hann varð svo vitur og ástsæll meðal fólksins, að þegar ráðamaðurinn lést, var Wan Tu kosinn arftaki hans og stjórnaði í mörg ár. Á þeim tíma kynnti hann einnig þjóð sína fyrir tei. Ekki fyrr en á dánarbeði, leysti Wan Tu frá skjóðunni.

Heilsuávinningur hvíts tes:

Inniheldur kraftmikil andoxunarefni sem vernda líkamann fyrir sindurefnum og stuðla að frumuendurnýjun.

• Hægir á öldrun húðarinnar.
• Hreinsar húðina og kemur í veg fyrir að bakteríur stífli svitaholur.
• Heldur húðinni bjartri og viðheldur raka.
• Styrkir bein og tennur.
• Er örverueyðandi og verndar því líkamann gegn sýkingum.
• Inniheldur efni sem talin eru hraða brennslu líkamans.
• Jafnar blóðsykur og heldur honum stöðugum.
• Minnkar streituáhrif í líkamanum og hefur góð áhrif á hjartað.

Höfundur / Hildur Friðriksdóttir
Heimild / teogkaffi.is

Fátt er betra en klassísk morðgáta á dimmu vetrarkvöldi.

Engin undankomuleið
Murder on the Orient Express var nýlega frumsýnd í kvikmyndahúsum landsins. Hér er á ferðinni endurgerð af frægri mynd sem kom út árið 1974 byggð á sögu Agöthu Christie. Belgíski leynilögreglumaðurinn sérvitri Hercule Poirot er á leið til Vestur-Evrópu á fyrsta farrými Austurlandahraðlestarinnar. Nótt eina er einn af farþegunum myrtur í svefni og þar sem lestin er teppt vegna snjóskriðu sem hylur lestarteinana fær Hercule tíma og tækifæri til að rannsaka málið, raða saman sönnunargögnunum og finna morðingjann áður en lögreglan kemur um borð. Myndin skartar úrvalsliði leikara svo sem Johnny Depp, Judi Dench og Penelope Cruz en í þetta sinn fer Kenneth Brannagh með hlutverk Poirot.

Uppi og niðri
Í myndinni Gosford Park má glöggt sjá stéttaskiptinguna sem ríkti í Englandi á árum áður. Á efri hæðum sveitasetursins býr Sir William McCordle ásamt mun yngri eiginkonu sinni Lady Sylviu. Þau lifa hinu ljúfa lífi og skemmta sér við skotveiðar, útreiðar og veisluhöld. Niðri vinna þjónarnir baki brotnu undir stjórn yfirþjónsins Mr. Jennings og húsfreyjunnar fröken Wilson. Hvort sem þeim líkar það vel eða illa þá vita allir hver þeirra staða er. Einn góðan dag breytist allt þegar Sir William býður í skotveiðiveislu og vinir hans og þjónar þeirra hleypa öllu í bál og brand. Þar með hefst saga af lygum, svikum, hefnd, biturð, peningum og ást – og svo auðvitað morði.

Nótt eina er einn af farþegunum myrtur í svefni og þar sem lestin er teppt vegna snjóskriðu … fær Hercule tíma og tækifæri til að rannsaka málið.

Glæpur eða leikur
Smáþjófurinn Harry Lockhart er á flótta í Los Angeles undan lögreglunni eftir misheppnað rán en ratar óvart í leikprufu fyrir hlutverk rannsóknarlögreglumanns í kvikmynd. Hann fær hlutverkið og er boðið í ekta Hollywood-partí. Þar hittir hann einkaspæjarann Perry van Shrike sem stingur upp á að hann taki þátt í því að rannsaka glæp til að undirbúa sig fyrir hlutverkið. Harry og Petty flækjast inn í flókið morðmál. Kiss Kiss Bang Bang er skemmtileg mynd í nýtískulegum noir-stíl.

Flækjur
Í klassísku kvikmyndinni The Big Sleep, sem er byggð á vinsælum bókum Raymond Chandler, kynnumst við einkaspæjaranum Philip Marlowe. Hann er í upphafi ráðinn af afar ríkri fjölskyldu til að stöðva fjárkúgara sem hefur verið að áreita yngri systurina, Carmen. Eldri systirin, Vivian, vill þó meina að faðir hennar hafi ráðið Marlowe til að rannsaka allt annað mál. Með tímanum flækist málið til muna, og söguþráður myndarinnar með, og á endanum er það orðið að morðgátu.

Fræg fjöldamorð
Myndin From Hell fjallar um hið alræmda mál raðmorðingjans Jack the Ripper sem lék lausum hala í London árið 1888. Jack myrti eingöngu vændiskonur í Whitechapel-hverfinu í London. Við fylgjumst við rannsóknarlögreglumönnunum Fred Abberline og Peter Godley við rannsókn málsins. Þeir félagar kynnast vændiskonum sem eru vinkonur fórnarlamba og hafa sína sögu að segja. Abberline er ópíumfíkill og þykist sjá inn í framtíðina. Hann verður jafnframt ástfanginn af Mary Kelly, einni vændiskonunni, og vill skiljanlega leysa málið áður en hún fellur fyrir hendi morðingjans.

Höfundur / Hildur Friðriksdóttir

Á undanförnum árum hafa komið á markað fjölmargar nýjungar í húðvörum sem eiga uppruna sinn að rekja til Asíu, þá sérstaklega til Japan og Suður-Kóreu.

Ein þessara nýjunga eru svokallaðir taumaskar en hvernig virka þeir og er árangurinn þess virði að líta út eins og Hannibal Lechter í hálftíma?

Ólíkt venjulegum andlitsmöskum, yfirleitt þykkt krem eða leir í túbu sem er borinn á og síðan þvegin af eftir tiltekinn tíma, eru taumaskar í raun líkari serumi. Um er að ræða grímu úr tauefni, gegnsósa í þunnu, gelkenndu serumi, stútfullu af virkum efnum.Tauefnið sjálft er úr örþunnri bómull eða öðrum trefjum og sniðið eins og gríma, með götum fyrir augu, nef og munn, ásamt litlum blöðkum á hliðunum til að tryggja að maskinn passi á öll andlit. Áferðin á gelinu sem efnið er bleytt í er nógu þykk til að maskinn loði við húðina án þess að renna til og efnið leki ekki niður og fari til spillis.

Maskann á að setja á hreina, þurra húð en gott er að nota ávaxtasýru eða ensímhreinsi til að fjarlægja dauðar húðfrumur af yfirborðinu.

Samkvæmt leiðbeiningum á að leyfa maskanum að vera á í tíu til tuttugu mínútur. Það er samt óhætt að láta hann vera á húðinni þar til hún hefur upptekið meirihluti serumsins og gríman sjálf orðin nokkuð þurr. Þessi aðferð tryggir hámarksupptöku virku efnanna.

Best er að liggja út af á meðan maskinn er á því þá færist hann ekkert til. Það er líka mikilvægt að gefa sér tíma og slaka á, við þurfum öll á því að halda og við lítum betur út fyrir vikið.

Helstu kostir taumaska

• Fyrst og fremst eru þeir ótrúlega þægilegir og auðveldir í notkun, meira að segja þeir sem eru ekkert alltof duglegir við að hugsa um húðina geta skellt einum á sig.
• Mörgum finnst sérstaklega gott að ferðast með þá milli landa því þeir teljast ekki sem vökvi og má þess vegna taka með í handfarangri. Sumir setja þá meira að segja á sig í lengri flugum því þurrt loft í flugvélum getur leikið húðina grátt og þá er gott að setja á sig maska en þurfa ekki að þvo sér eftir notkun. Þú gætir samt fengið nokkur skrítin augnaráð frá samferðamönnum.
• Til eru fjölmargar gerðir taumaska sem hafa ólíka virkni, flestar þeirra eiga það þó sameiginlegt að veita mjög öflugt rakaskot. Árangurinn er því strax sjáanlegur, húðin verður mun þéttari og unglegri. Það þýðir að það hentar vel að nota þá rétt fyrir eitthvert sérstakt tilefni, enda hafa margar stórstjörnur birt mynd af sér með taumaska rétt áður en þær ganga rauða dregilinn.
• Þegar öllu er á botninn hvolft koma taumaskar ekki beint í staðinn fyrir annars konar andlitsmaska, heldur eru þeir góð viðbót sem er þægilegt að grípa til þegar maður vill líta extra vel út án þess að þurfa að hafa mikið fyrir því.

Höfundur / Hildur Friðriksdóttir

Jackie Cardoso Da Silva barðist fyrir lífi sonar síns.

Jackie Cardoso Da Silva kynntist íslenskum skiptinema í Brasilíu og flutti til Íslands í kjölfarið. Hún settist fyrst að á Egilsstöðum, síðan í Reykjavík og nú býr hún í Vestmannaeyjum þar sem hún er sannfærð um að sér hafi verið ætlað að búa. Hún sér lengra en nef hennar nær, dreymir fyrir ýmsu og finnur annað á sér. Á miðilsfundi kom í gegn sál sem talaði til hennar og hún vissi að sér væri ætlað að eignast fatlaðan son.

Bernharð sonur hennar er haldinn Duchenne-vöðvarýrnun. Hann veiktist alvarlega árið 2011 og næstu ár sinnti móðir hans fáu öðru en umönnun hans. „Hann bara veikast skyndilega og það leit í byrjun út fyrir að vera ælupest sem fór versnandi. Veikindin byrjuðu að morgunlagi og klukkan 16 var ég komin með hann upp á spítala og mátti ekki seinni vera. Hálftíma seinna sagði hann við mig að hann elskaði mig og bað mig um að fyrirgefa sér fyrir að vera svona veikur. Svo datt hann út.

„Hann bara veikast skyndilega og það leit í byrjun út fyrir að vera ælupest sem fór versnandi. Veikindin byrjuðu að morgunlagi og klukkan 16 var ég komin með hann upp á spítala og mátti ekki seinni vera.“

Við vorum spurð hvort við værum með einhverja hugmynd um hversu lengi ætti að reyna endurlífgun en læknarnir voru vissir um að þessi veikindi væru vegna hrörnunarsjúkdómsins. Ég hlustaði ekki á þá og sagði þeim bara að bjarga syni mínum.

Þá var hann svo illa farinn að það náðist ekki í neinar æðar á honum heldur þurfti að bora með borvél til að gefa honum lyf í beinmerg. Honum var síðan haldið sofandi í næstum þrjár vikur.

Heimurinn hrundi. Ég var hjá honun dag og nótt, ég gat ekki gefist upp á honum, ég var ekki búin að kenna honum nógu mikið um að elska lífið. Ég átti allt eftir. Ég talaði stanslaust við hann og sagði honum að verkefninu væri ekki lokið. Ég lofaði honum því að líf hans yrði betra eftir að hann jafnaði sig og ég myndi gefa honum allt sem hann þyrfti til að vera hamingjusamur. Hann mætti ekki fara frá mér því hann væri heldur ekki búinn að kenna mér allt sem hann þyrfti.“

Jackie hefur stóran og hlýjan persónuleika og leitast til að bæta líðan fólksins í kringum sig á margvíslegan máta.

Margt fleira um lífshlaup og vinnu þessarar merku konu má lesa í nýjustu Vikunni.

Höfundur / Ragnhildur Aðalsteinsdóttir
Myndir / Aldís Pálsdóttir

Hafsteinn Ólafsson galdrar fram spennandi rétti.

Hafsteinn Ólafsson, yfirmaður á veitingastaðnum Sumac Grill + Drinks, er sannkallaður matgæðingur. Hafsteinn er jafnframt meðlimur í íslenska kokkalandsliðinu og átti því ekki í neinum vandræðum með að töfra fram spennandi rétti.

Hvað var það fyrsta sem þú lærðir að elda?
Mig minnir að það hefði verið skyrterta sem ég lærði að gera í minni fyrstu vinnu í eldhúsi 14 ára gamall.

Ertu jafnvígur á bakstur og matseld?
Nei alls ekki, held mig aðallega við matseld en maður getur samt alveg bjargað sér í bakstrinum.

Höfðar einhver matreiðsluhefð sérstaklega til þín?
Já ég er mikið fyrir það að grilla og þá helst á alvörukolagrillum.

Verstu mistök sem þú hefur gert í eldhúsinu?
Ekkert eitt sem mér dettur í hug en maður er alltaf að gera einhver lítil mistök sem hjálpa manni bara að verða betri í því sem maður gerir.

Hefur þú uppgötvað einhverja snilld í matseld nýlega?
Já núna í undirbúningnum og opnuninni á Sumac vorum við mikið að prófa okkur áfram með allskonar framandi krydd. Við ferðuðumst meðal annars til Líbanon til að fá innblástur.

Hefur þú ræktað krydd- eða matjurtir?
Ég hef oft reynt það en það gengur yfirleitt illa.

Hver er stærsta áskorun sem þú hefur mætt í eldamennsku?
Þær eru allmargar en ég held að ég verði að nefna þau tvö skipti sem ég fór að keppa með kokkalandsliðinu á heimsmeistaramótinu 2014 og Ólimpíuleikunum í matreiðslu 2016.

___________________________________________________________________

Lax

1 laxaflak

Roðflettið og beinhreinsið laxinn. Stráið kryddblöndunni yfir hann og leyfið að standa í 40 mín. inni í kæli, skolið laxinn eftir þann tíma og skerið flakið í u.þ.b. 6 bita. Stillið ofnin á 50°C. Setjið laxinn í eldfast mót og vel af olíu yfir, eldið í 15-20 mín. eða þar til laxinn brotnar í flögur.

Kryddblanda
100 g salt
60 g sykur
10 g kóríanderfræ
10 g fenníkufræ
börkur af einni sítrónu

Öllu blandað saman.

Kúmkat
2 stk. kúmkat
100 g appelsínusafi
100 g eplaedik
100 g sykur

Kúmkatið er skorið í þunnar sneiðar. Appelsínusafi, edik og sykur er soðið saman í potti og svo hellt yfir kúmkatið.

Fenníkusósa
2 stk. fenníka
2 stk. laukur
300 ml hvítvín
700 ml rjómi
200 g smjör
2 stk. anísstjörnur
2 stk. appelsínur
300 ml appelsínusafi

Fenníka, laukur og anísstjörnur svitað saman í potti. Þegar það er orðið mjúkt er hvítvíni bætt út í og þessu leyft að malla í um 10 mín. þá er appelsínusafanum bætt út í. Þessu leyft að sjóða saman í um 15 mín. Því næst fer rjóminn út í. Þessu er leyft að sjóða saman þar til rétt þykkt og bragð hefur náðst. Þá er sósan sigtuð og í lokin er köldum smjörteningum hrært rólega út í.

Laxinn er svo rifinn niður í litla bita og dressingu úr sítrónuolíu og graslaukstráð yfir. Kúmkatið og kóríander sett á laxinn og svo sósan í lokin.

_______________________________________________________________

Romaine

1 haus romaine-salat

Romaine-hausinn er skorinn til helminga og skolaður. Best er að grilla romain-salatið en einnig er hægt að steikja það á pönnu.

Aioli
50 g eggjarauður
150 g olía
100 g hvítlauksolía
1 msk. dijon-sinnep
salt
sítrónusafi

Eggjarauðurnar eru hitaðar varlega í vatnsbaði upp í 55°C til að gerilsneyða þær, svo er olíunni hrært út í mjórri bunu og sinnepi bætt út í. Smakkið til með salti og sítrónu.

Djúpsteiktar kjúklingabaunir

1 dós kjúklingabaunir
1 msk. reykt paprika
1 msk. cayenne-pipar

Kjúklingabaununum er velt upp úr kryddinu og svo djúpsteikt á 180°C þar til gullinbrúnar og stökkar.

Romaine-salatið er svo borið fram með rifnum geitaosti.

_______________________________________________________________

Bakað blómkál

1 blómkálshaus

Hitið ofn í 190°C. Sjóðið blómkálið í 6 mín. Bragðbætið með kryddblöndunni og bakið í 15 mín. eða þar til blómkálið er orðið gullinbrúnt. Berið blómkálið fram með jógúrtsósu, granateplum og ristuðum möndluflögum.

kryddblanda:
10 g salt
5 g sykur
5 g malað kummin
3 g ristuð og möluð kóríanderfræ

Blandið öllu saman.

jógúrtsósa:
200 g grísk jógúrt
30 g kummin
50 g tahini

salt
pipar
sítrónusafi

Blandið jógúrt, tahini og kummin saman og smakkað til með salti, pipar, og sítrónu.

granatepla-vinaigrette:
1 stk. granatepli
1 stk. appelsína
50 ml ólífuolía
25 ml eplaedik
salt
hunang
ristaðar möndlur

Opnið granateplið og takið fræin úr. Bætið appelsínusafa og berki saman við og bætið því næst olíunni og edikinu út í. Smakkið til með salti og hunangi. Stráið ristuðum möndlum yfir í lokin.

Umsjón / Íris Hauksdóttir
Myndir / Heiðdís Guðbjörg Gunnarsdóttir

Nú sækir kuldaboli að og við erum öll farin að draga fram vetraryfirhafnirnar.

Hvort sem þú kýst að klæðast kápu, frakka eða úlpu þá er nauðsynlegt að verja sig vel. En hver er sagan á bak við þessar flíkur og hvernig hafa þær þróast í gegnum tíðina?

Á miðöldum voru það nær eingöngu karlmenn sem klæddust sérsniðnum kápum, frökkum eða öðrum yfirhöfnum á meðan konur vöfðu sig sjölum. Í Evrópu voru þetta yfirleitt millisíðir frakkar sem voru hnepptir að framan, aðsniðnir í mittið og með einskonar opnu pilsi að neðan.

Hér á landi voru yfirhafnir unnar úr vaðmáli, svokölluðu hafnarvoði, og margar hétu skondnum en lýsandi nöfnum. Belghempa var karlmannsyfirhöfn til ferðalaga, úr grófu vaðmáli, hnésíð, ófóðruð og skrautlaus, en doppa var sjóflík sem var hnésíður stakkur úr grófu og mjög þykku vaðmáli.

Með tíð og tíma þróuðust yfirhafnir og frá 18. öld byrjuðu að koma fram kápur eins og við þekkjum þær í dag; hné- eða skósíðar, ein- eða tvíhnepptar og úr ull eða öðrum efnum. Sum snið eiga rót sína í hermannaklæðum enda voru þau sérstaklega hönnuð með notagildið í huga.

Stuttar kápur eða frakkar, sem nefnast pea coat á ensku, komu fyrst fram á sjónarsviðið fyrir rúmum tvö hundruð árum. Kápan nær aðeins niður að lærum og klauf á sitthvorri hlið þannig að auðvelt var að setjast í henni. Hún er yfirleitt úr ull og tvíhneppt með stórum tölum úr við, plasti eða málmi. Þessi stutta flík var fyrst hönnuð fyrir sjóliða í herliði Evrópu og Bandaríkjanna en nútímaútgáfur eru svo gott sem nákvæmlega eins.

Svokölluð duffel-kápa kemur reglulega í tísku en uppruna hennar má rekja allt til 1820. Kápan er nefnd eftir bænum Duffel í útjaðri Antwerp í Belgíu en talið er að sniðið sé að fyrirmynd pólsks hermannafrakka. Kápan var afar vinsæl meðal hermanna og almennings Evrópu seinni hluta 19. aldar og fram yfir fyrri heimsstyrjöld. Einkenni duffel-kápu eru þykkt ullarefni og líning með skosku köflóttu mynstri, þverfaldsfestingar úr leðri og beini eða við, tveir stórir utanáliggjandi vasar og hetta með hálsbandi sem hægt var að hneppa.

Trench-kápan var fyrst þróuð sem hlífðarflík fyrir breska og franska hermenn í fyrri heimsstyrjöldinni. Þegar margir heyra orðið „trench“ dettur þeim vörumerkið Burberry í hug og það er ekki furða, tískuhúsið hefur framleitt kápurnar í rúma öld. Thomas Burberry fann upp gaberdínefni árið 1850 sem er afar þéttofið efni úr ull eða bómull sem hleypir síður vind eða regni í gegn. Rúmum tuttugu árum síðar, árið 1901, sendi hann inn tillögu að regnfrakka fyrir herforingja breska hersins sem var samþykkt og send til framleiðslu. Þannig fæddist trench-frakkinn. Í dag er hann vinsæll hjá báðum kynjum enda stílhrein og afslöppuð yfirhöfn. Hefðbundinn frakki er tvíhnepptur með tíu tölum, með breiðum boðungi og belti um miðjuna og oft líka neðst á ermunum.

Í kringum 1920 naut mjög skemmtilegt kápusnið vinsælda meðal kvenna, svokallað púpu-snið eða cocoon coat. Slíkar kápur voru víðar um miðjuna og mjókkuðu svo niður fyrir hné. Eins og aðrar flíkur á þessum tíma voru kápurnar skreyttar fallegum munstrum, loðskinni, fjöðrum og fleira. Þetta snið komst síðan óvænt í tísku aftur á undanförnum árum og þá í mun stílhreinni búning en áður.

Dúnfylltar flíkur hafa lengi verið notaðar til að halda hita á fólki yfir harða vetrarmánuði og fundist hafa dæmi um slíkar flíkur í Evrópu, Indlandi og jafnvel Kína. Rússneskir hermenn klæddust einnig dúnfylltum frökkum í fyrstu heimsstyrjöldinni. Sá sem á þó heiðurinn af því að setja dúnúlpur á almennan markað er Eddie Bauer. Hann saumaði fyrstu úlpuna árið 1936 og sótti um einkaleyfi á uppfinningunni árið 1940. Innblásturinn að hugmyndin var sagan um rússnesku hermennina sem afi hans sagði honum þegar hann var barn. Sú saga rifjaðist svo upp fyrir honum þegar hann varð næstum úti í veiðiferð. Dúnúlpur hafa dottið í og úr tísku nokkrum sinnum síðan og eru ákkúrat í tísku núna.

Höfundur / Hildur Friðriksdóttir

Eplaedik hefur á undanförnum árum farið frá því að vera talið gamaldags húsráð í að vera vinsælt heilsulyf.

Það er búið til úr ferskum eplum sem eru hökkuð og látin gerjast í viðartunnum. Sýran í eplaedikinu er lykillinn að heilsueflandi kostum þess – kostum svo sem bættri meltingu, heilbrigðari húð, jafnvægi á blóðsykri, auknu þyngdartapi og minni bólgum og verkjum í líkamanum. Mikilvægt er að edikið sem þú notar sé bæði er ósíað og ógerilsneitt og helst lífrænt því það er stútfullt af lifandi og heilsubætandi gerlum. Hér eru fimm sniðugar leiðir til að nota eplaedik í daglegu lífi.

1. Detox-hreinsun
Talið er að eplaedik hjálpi til við hreinsun með því að auka starfsemi lifrarinnar við að losa sig við eiturefni, auk þess inniheldur það mikið af vítamínum, steinefnum og ensímum sem eru líkamanum mikilvæg í hreinsun. Síðan getur eplaedik einnig hjálpað til við að draga úr vatnsuppsöfnun, eða bjúg, í líkamanum. Ýmist er hægt að innbyrða eplaedikið eða bæta því út í baðið. Til að útbúa hreinsandi bað bættu 1-2 bollum af ediki út í baðið á meðan þú lætur renna í. Liggðu í baðinu 20-30 mínútur og skolaðu baðvatnið af áður en þú þurrkar þér.

2. Heilbrigð húð
Eplaedik getur hjálpað til gegn hinum ýmsu húðvandamálum því það er bæði bakteríudrepandi og róandi. Hægt er að nota það í að fjarlægja vörtur á fótum, draga úr og meðhöndla bólur, minnka svitalykt og jafnvel milda sársauka sem fylgir sólbruna. Þegar á að nota eplaedik á húð þarf að blanda það með vatni, annars getur það verið of ertandi, og best er að nota tvo hluta af vatni á móti einum af eplaediki. Síðan er hægt að setja blönduna í lítinn spreybrúsa og spreyja beint á eða annars konar flösku og nota bómull og bera blönduna á húð.

3. Náttúrulegt hreinsiefni
Upp á síðkastið hefur verið mikið rætt um notkun ediks til að hreinsa heimilið vegna náttúrulegra sýkladrepandi eiginleika þess. Blandaðu saman hálfum bolla af eplaediki á móti 1 bolla af vatni. Þú getur notað þessa blöndu til að þrífa baðherbergisflísar, eldhúsyfirborð, glugga, gler og spegla. Einnig er sniðugt að bæta örlitlum matarsóda í blönduna og þá verður allt skínandi hreint.

4. Bragðgóður og hollur drykkur
Eplaedik getur haft góð áhrif á meltinguna; jafnað sýrustig í maga, dregið úr bólgum í meltingarvegi og svo framvegis. Auðvelt er að útbúa góðan og heilsubætandi drykk með með því að blanda tveimur matskeiðum af eplaediki og tveimur matskeiðum af hunangi saman við bolla af heitu vatni. Drekktu þrjá bolla á viku og sjáðu hvort þú finnir ekki mun.

Þegar á að nota eplaedik á húð þarf að blanda það með vatni, annars getur það verið of ertandi, og best er að nota tvo hluta af vatni á móti einum af eplaediki. Síðan er hægt að setja blönduna í lítinn spreybrúsa og spreyja beint á eða annars konar flösku og nota bómull og bera blönduna á húð.

5. Glansandi hár
Það hljómar ef til vill furðulega en með því að nota eplaedik eftir að þú hefur þvegið hárið með sjampói lokarðu hárendum og hreinsar burt eftirstöðvar af óhreinindum þannig að hárið glansar enn meira á eftir. Settu hálfa matskeið af ediki í vatn. Helltu blöndunni yfir höfuðið inn í sturtu og skolaðu svo vandlega úr. Vissulega er örlítið sérstök lykt af hárinu á meðan það er blautt en hún hverfur þegar það þornar.

Höfundur / Hildur Friðriksdóttir

Borgin Aberdeen er full af fallegum almenningsgörðum, söfnum og stórbrotnum arkitektúr.

Aberdeen er krúttleg borg í Skotlandi sem líkja má við Akureyri okkar Íslendinga, hún hefur sjarma smábæjar en er með allt það sem finna má í stórborgum.

Aberdeen er þriðja stærsta borg Skotlands og oft nefnd granítborgin, eða Silver by the Sea, enda nánast allar byggingar á svæðinu byggðar úr hinum níðsterka og fallega efnivið, graníti. Olíuvinnsla í Norðursjó skipar stóran sess í samfélaginu og í Aberdeen er stærsti þyrluflugvöllur í Evrópu. Í borginni eru margir fallegir almenningsgarðar, stórbrotinn arkitektúr og skemmtileg söfn, enda á borgin sér margra alda sögu.

Aðalverslunargatan heitir Granite Mile og er hluti af Union Street en þar eru meira en 800 verslanir, veitingastaðir og barir. Stærsta verslunarmiðstöðin heitir Union Square og þar má finna H&M, Zöru, Michael Kors, Apple og fleiri þekktar búðir. Verslunarmiðstöðvarnar Bon Accord og St Nicholas eru samtengdar skammmt frá en þar er einnig H&M-verslun, Karen Millen, L‘Occitan, Marks & Spencer og fleiri. Í Trinity Center er svo meðal annars Debenhams og Primark.

Óhætt er að mæla með Scene-hótelunum í miðborg Aberdeen sem bjóða upp á öll nútímaþægindi. Hótelin eru þrjú og eru rekin af Scene-fjölskyldunni. Hótelin eru í samstarfi við nokkra veitingastaði víðs vegar um Aberdeen þar sem hægt er að borða og bæta á hótelreikninginn. Hótelin eru einnig í samstarfi við tvær líkamsræktarstöðvar. Fyrsta hótelið var stofnað árið 1979 og starfsemin hefur vaxið hægt og bítandi síðan. Álman á einu hótelinu var áður kirkja sem var gerð upp sem hótel, virkilega sjarmerandi.

Fjölskyldufaðirinn, stofnandi keðjunnar og framkvæmdastjóri, Charles Skene, leggur mikinn metnað í reksturinn og hefur forðast að láta fyrirtækið verða of stórt eða hluta af alþjóðlegum keðjum. Fyrir nokkrum árum var hann sæmdur OBE, Order of the British Empire sem er eins konar fálkaorða þeirra Breta, fyrir störf sín.

Í sambýli við Trump

Aberdeen og nágrenni er golfparadís en þar eru fimmtíu og sjö 18 holu golfvellir. Skammt norðan við Aberdeen er golfvöllur í eigu Donalds Trump sem kallast einfaldlega Trump International Golf Links. Hann er byggður innan um miklar sandöldur við austurströnd Skotlands sem gerir völlinn einstakan. Sandöldurnar, sem voru látnar halda sér á milli teiga, brauta og flata, eru í hlutverki hindrana og ekki er um aðrar hindranir að ræða.

Golfarkitektinn Dr. Martin Hawtree hannaði völlinn sem var opnaður árið 2012 eftir nokkra baráttu en ekki voru allir á eitt sáttir um framkvæmdina. Trump þurfti að kaupa land af nokkrum aðilum til að geta byggt þennan draumavöll en ekki voru allir sem vildu selja. Einn eigandinn býr til dæmis enn á svæðinu og golfvöllurinn var byggður í kringum býli hans. Sagan segir að sambýlið gangi ekkert allt of vel.

Gamlt höfðingjasetur sem Trump keypti gegnir hlutverki hótels og veitingastaðar sem er sérstaklega ætlað golfurum. Sérstök svíta þar er kennd við Trump og hann dvelur í henni þegar hann er sjálfur á svæðinu. Þessa svítu er svo hægt að leigja fyrir þónokkur pund. Við golfvöllinn er svo glæsilegur golfskáli, veitingastaður og verslun.

Í kastalanum sjálfum er flott herbergi í gamaldags stíl en í gamalli hlöðu og útihúsum á móti er búið að innrétta flott nútímaleg herbergi.

Meldrum House Country Hotel and Golf Course er í um fjörutíu og fimm mínútna akstursfjarlægð frá Aberdeen. Hótelið er í gömlum kastala sem upphaflega var byggður á þrettándu öld en hefur tekið töluverðum breytingum í gegnum tíðina síðan. The Cave Bar er einn af elstu hlutum hússins eða um 800 ára gamall og þar er meðal annars eitt stærsta safn af Glen Garioch-viskíi og gaman að fara í viskísmökkun. Í kastalanum sjálfum er flott herbergi í gamaldags stíl en í gamalli hlöðu og útihúsum á móti er búið að innrétta flott nútímaleg herbergi. Golfvöllurinn er mun hefðbundnari en Trump-völlurinn, með trjám, tjörnum og sandgryfjum.

Fór næstum í flóði

Skosku hálöndin ættu allir að heimsækja einhvern tímann á ævinni. Þau eru svo falleg, full af dýrðarljóma og sögu. Þau eru meðal annars þekkt fyrir þá fjölmörgu kastala sem þar eru. Einn þeirra er Crathes Castel; það er ævintýri líkast að fara í túr um kastalann, skoða hvern krók og kima og kynnast sögu hans. Í kringum kastalann er stór garður og í raun heljarstórt útivistarsvæði sem er vinsælt meðal bæði heima- og ferðamanna. Þar er hægt að velja um sex mismunandi gönguleiðir og tilvalið fyrir fjölskylduna að njóta dagsins með nesti og nýja skó eða kíkja á veitingastaðinn sem er skammt frá kastalanum.

Ekki langt frá Crathes-kastalanum, meðfram ánni River Dee, er Banchory Lodge Hotel. Áin komst í heimsfréttirnar eitt sinn mikil flóð urðu í henni og eyðilögðu meðal annars næstum því heilan kastala sem stendur á árbakkanum. Flóðið náði alveg upp að veggjum hótelsins í Banchory Lodge en það slapp við stórfelldar skemmdir. Talsmenn hótelsins sögðu að það hefði verið ógnvekjandi að sjá stærðarinnar hjólhýsi fljóta fram hjá. Banchory Lodge Hotel er fallegt sveitahótel sem býður upp á flott hótelherbergi með fallegu útsýni. Á staðnum er frábær veitingastaður með mjög góðum mat og hægt að sitja úti á palli þegar veðrið er gott. Mikið er um að þarna séu haldnar veislur, ekki síst brúðkaupsveislur, enda frábær aðstaða til slíks og svo geta allir gestirnir gist á staðnum.

Vatnsdropar í viskíið

Viskí er eitt af einkennistáknum Skotlands og í landinu eru framleidd yfir 2.200 vörumerki af þessum eðaldrykk. Viskíhéruðin í landinu eru sex talsins og þar með tegundirnar því þær hafa mismunandi karakter eftir því á hvaða svæði þær eru framleiddar. Vinsælt er að fara í

viskísmökkun og skammt frá Meldrum House Country Hotel er viskíverksmiðjan Glen Garioch þar sem boðið er upp á viskísmökkun og skoðunarferð um húsakynnin. Fyrirtækið hefur í rúm 200 ár framleitt handunnið og ókaldhreinsað maltviskí.

Til að finna karakterinn í viskíinu eru oft settir nokkrir dropar af vatni út í það en við það verður ilmurinn og bragðið fyllra, líkt og þegar nýbúið er að rigna þá finnst lyktin af gróðri miklu betur.

Upplifun fólks af styrkleika viskís er persónubundin, það er sem sagt misjafnt hversu sterkt fólk á að hafa viskíið sem það drekkur. Ef það finnur fyrir bruna í hálsinum þegar það tekur sopa er drykkurinn of sterkur. Dropum af vatni er þá bætt við þangað til viskíið verður passlega sterkt. Til er sérstakt vatn til að setja út í viskí frá mismunandi stöðum í Skotlandi og bragðið verður mismunandi eftir uppruna vatnsins.

Litríkt fiskiþorp

Óhætt er að mæla með leiðsögn um borgina og fá þannig söguna og helstu perlur staðarins beint í æð. Litla fiskiþorpið í mynni hafnarinnar í Aberdeen er sérstaklega áhugavert. Það er kallað Footdee eða Fittie og samanstendur af tveimur svæðum með litlum húsum sem byggð eru í ferhyrning. Í gamla daga bjuggu sjómenn og fjölskyldur þeirra í húsunum. Þó að margar af þessum fjölskyldum búi þarna enn þá er fiskilífið á miklu undanhaldi. Á árum áður mátti sjá eiginkonurnar sitja við útidyrnar að gera við net og skiptast á sögum við nágrannana. Fiskinet voru víðs vegar þar sem greiða þurfti úr flækjum og hengja þau til þerris. Þessi litlu hús og garðarnir hafa þó fengið að halda sér. Húsin hafa öll sinn sjarma, eru litrík og margvíslega skreytt. Sumum er vel haldið við, öðrum ekki. Þarna er dásamlegt að vera og svolítið eins og að koma inn í nýja veröld úr ys og þys borgarlífsins.

Höfundur / Ragnhildur Aðalsteinsdóttir
Myndir / www.pixabay.com

Tumblr-síðan Headless Women of Hollywood vekur athygli á þeirri tilhneigingu kvikmyndabransans til að nota kvenmannslíkama til að selja myndir – og þá er átt við kvenlíkama án höfuðs.

Konur eru oft hlutgerðar í Hollywood og í öðrum formum dægurmenningar – það er ekkert nýtt. En þegar konan er gerð að litlu öðru en bara líkamanum þá verðum við að segja: hingað og ekki lengra.

Tumblr-síðan Headless Women of Hollywood vekur athygli á þeirri tilhneigingu kvikmyndabransans til að nota kvenmannslíkama til að selja myndir – og þá er átt við kvenlíkama án höfuðs.

Einhverjum finnst þetta varla vera tiltökumál, og að verið sé að gera úlfalda úr mýflugu á þessari vefsíðu, en málið er að þetta er bara einn hluti af mun stærra vandamáli sem þarf að uppræta.

Oftar en ekki snýr konan baki í myndavélina, í hælum en litlu öðru með stórt bil á milli fóta. Jafnvel þegar höfuð eða andlit konu er sýnt er fókusinn oft færður á ákveðna þætti andlits … í stað þess að sýna heildina og persónugera einstaklinginn.

Heiðurinn af tumblr-síðunni á uppistandarinn Marcia Belsky en með henni vill hún hvetja Hollywood til að hætta að afhausa konur. „Með því að afhausa konuna er hún óneitanlega hlutgerð og látin sæta augnaráði karlmanna (e. Male Gaze). Samþykki hennar skiptir ekki

lengur máli, það hefur verið fjarlægt ásamt höfði hennar, og hennar eini tilgangur er að láta horfa á sig af karlmönnum. Virði hennar er bundið við kynþokka hennar ekki persónu,“ segir hún á síðunni.

Á síðunni eru birt kvikmyndaplaköt, auglýsingar og fleira þar sem hauslaus kona kemur fyrir. Oftar en ekki snýr konan baki í myndavélina, í hælum en litlu öðru með stórt bil á milli fóta. Jafnvel þegar höfuð eða andlit konu er sýnt er fókusinn oft færður á ákveðna þætti andlits, eins og varir eða augu, í stað þess að sýna heildina og persónugera einstaklinginn. Þegar maður fer að skoða síðuna kemur það manni í raun á óvart hversu algengt þetta fyrirbæri er og hversu blindur maður hefur verið fyrir því hingað til.

Höfundur / Hildur Friðriksdóttir

Vestrar eru enn afar vinsælir og hér eru nokkur nýleg dæmi.

Kjarkaðar konur

Godless er ný sjö þátta sería úr smiðju Netflix en þættirnir voru framleiddir af Steven Soderbergh. Þættirnir gerast árið 1884 í Nýju-Mexíkó. Stórhættulegi útlaginn Frank Griffin er á höttunum eftir Roy Goode sem stal frá honum gulli. Roy þessi var áður hluti af bófagengi Franks og Frank leit á hann sem son áður en Roy stakk hann í bakið. Roy felur sig á býli ekkjunnar Alice Fletcher sem býr í útjaðri bæjarins La Belle. Íbúar La Belle eru nær eingöngu konur því allir karlmenn bæjarins létust í hræðilegu námuslysi nokkrum árum áður. En hvernig verja nokkrar konur sig gegn manni eins og Frank?

Skemmtigarður framtíðarinnar

Sjónvarpsþættirnir Westworld eru byggðir á samnefndri kvikmynd eftir Michael Chrichton. Þeir gerast í framtíðarheimi og Westworld er í raun sýndarveruleikaskemmtigarður sem lítur út eins og villta vestrið. Þar geta gestir hagað sér eins og þeim sýnist innan um afar raunveruleg vélmenni í alls kyns hlutverkum. Þættirnir eru stjörnum prýddir en Anthony Hopkins leikur skapara garðsins, Ed Harris leikur ruddalegan gest og þau Evan Rachel Wood, Thandie Newton og James Marsden leika öll vélmenni, eða gestgjafa eins og þau eru kölluð í þáttunum.

Í leit að ástinni

Í Slow West kynnumst við ungum Skota sem ferðast alla leið til villta vestursins í Bandaríkjunum í leit að Rose, konunni sem hann elskar. Á ferð sinni kynnist hann útlaganum Silas sem slæst í för með honum sem leiðsögumaður og verndari. Jay veit hins vegar ekki að Rose og faðir hennar eru eftirlýst og fé sett til höfuðs þeirra, tvö þúsund dollarar lífs eða liðin.

Mannaveiðari og þræll

Tarantino-vestrinn Django Unchained gerist í suðurríkjum Bandaríkjanna skömmu áður en þrælastríðið braust út. Þýski læknirinn og mannaveiðarinn dr. King Schultz er á höttunum eftir hinum morðóðu Brittles-bræðrum þegar hann hittir þrælinn Django í Texas og fær hann til að aðstoða sig við leitina gegn loforði um frelsi hans og eiginkonu hans, Broomhildu, en hún er í eigu grimma plantekrueigandans Calvin Candie. Django og Schultz láta sér ekki nægja að handsama Brittles-bræðurnar heldur ná einnig að klófesta marga af hættulegustu glæpamönnum suðursins áður en þeir snúa sér að frelsun Broomhildu.

… mannaveiðarinn dr. King Schultz er á höttunum eftir hinum morðóðu Brittles-bræðrum þegar hann hittir þrælinn Django í Texas og fær hann til að aðstoða sig við leitina gegn loforði um frelsi hans og eiginkonu hans.

Hefnd og svik

True Grit kom fyrst út árið 1969 en hún er byggð á samnefndri skáldsögu Charles Portis. Þessi útgáfa Coen-bræðra frá árinu 2010 vakti mikla lukku meðal áhorfenda og gagnrýnenda. Sagan gerist árið 1877 og segir frá unglingsstúlkunni Mattie Ross. Faðir hennar er myrtur á hrottalegan hátt af undirmanni sínum sem flýr af vettvangi með tvo hesta og gull föður hennar. Mattie vill tafarlausa hefnd og leitar til hins gamalreynda og harnaða lögreglumanns Rooster Cogburns. Hann hafnar fyrst um sinn beiðni hennar en hún nær sínu fram á endanum. Þegar annar lögreglumaður, LaBoeuf sem er einnig á höttunum eftir Chaney, mætir á svæðið vandast málin. Laboeuf og Rooster taka höndum saman til að hafa uppi á Chaney, gegn vilja Mattie, og þar með hefst hættuleg för þremenninganna til að ná fram hefndum.

Höfundur / Hildur Friðriksdóttir

Víða um heim má finna staði með spennandi gönguleiðum.

Vinsældir ýmiskonar gönguferða hafa aukist mjög á undanförnum árum og víða um heim má finna staði með spennandi gönguleiðum sem skarta glæsilegu útsýni og ýmsu sem gerir þær sérstakar á einn eða annan hátt.

Zion Narrows í Utah-ríki, Bandaríkjunum

Zion Narrows er mögnuð gönguleið sem skartar töfrandi landslagi sem liggur í gegnum þröng gljúfur úr litríkum, eins kílómetra háum sandveggjum.

Á hinum fræga hluta leiðarinnar sem nefnist Wall Street verða gljúfrin ekki nema sex metrar að breidd að ofan. Ríflega helming leiðarinnar þarf að ganga upp með á sem liðast fallega í gegnum gljúfrin.

Úr veggjum gljúfranna hanga runnar, vatn kemur úr sprungum, þarna eru breiður af mosa, fossar og há tré.

Rétt er að taka fram að það getur verið mjög hættulegt að fara þessa leið því fljót geta komið snögglega og árlega deyja göngugarpar á leiðinni. Því þarf að vera með veðurspána á hreinu áður en farið er, og vera viss um að alls engin rigning sé í kortunum.

Með nauðsynlegum varúðarráðstöfunum er þessi gönguleið ein sú allra flottasta í Bandaríkjunum og sannarlega engu lík.

Tongariro-gönguleiðin á Nýja-Sjálandi

Landslagið á Nýja-Sjálandi er sérstaklega fallegt og því ekki að undra að ein flottasta gönguleið í heimi sé á norðureyju landsins. Hægt er að taka frá einum og upp í þrjá daga í gönguna.

Leiðin sem er um 35 kílómetra löng liggur í gegnum eldfjallasvæði og eyðimerkur sem líkjast einna helst öðrum hnöttum og fallegir fjallstindar gnæfa yfir.

Göngufólk mun sjá virka eldfjallið Ngaurube eða Doom eins og það hét í Lord of the Rings. Einnig sjóðandi leirkatla, gíga og hraun …

Göngufólk mun sjá virka eldfjallið Ngaurube eða Doom eins og það hét í kvikmyndinni Lord of the Rings. Einnig sjóðandi leirkatla, gíga, hraun og hin glæsilegu Emerald-vötn.

Ferðalagið er ekki síst skemmtilegt eftir að fer að dimma en þá er hægt að koma sér fyrir í þægilegum fjallakofum sem eru með fínum rúmum, gashiturum og -eldavélum, rennandi vatni og klósettum. Ferðalangar geta svo auðveldlega lagt lykkju á leið sína og gengið á topp fjallanna Tongariro og Ngauruhoe.

West Coast í Bresku Kólumbíu, Kanada

Þá sem langar í óvenjulega göngu í gegnum óspillta kanadíska náttúru, upplifa tempraða skóga, harðgerðar strandlengjur og stórkostlega fjallstinda, þá er West Coast-gönguleiðin málið. Göngufólk mun vakna í tindrandi sólarupprás, njóta ótrúlegs sólarlags, klöngrast yfir stóra steina og trjáboli, yfir læki og ár, fram hjá fossum, upplifa hve ótrúlega lítil mannskepnan er í kringum risastór tré í eldgömlum skógi. Einnig gæti fólk séð hvali, sæljón, minka og kannski einnig birni og úlfa, svo ekki sé minnst á skipsflök og aðrar minjar. Erfitt getur verið að komast að í þessa einstöku göngu og stundum er hægt að lenda í slæmu veðri, jafnvel á sumrin. Engin ganga í Norður-Ameríku býður upp á jafnfjölbreytt landslag og er sannarlega þessi virði að fara hana.

Torres del Paine-gönguleiðin í Chile

Þeir sem eru að leita að stórkostlegu Alpafjallalandslagi, jöklum, jökulvötnum, skörpum fjallstindum, einstöku dýralífi og möguleikanum á því að sjá hina töfrandi graníttinda Towers of Paine, ættu að fara í þessa vinsælu 100 kílómera löngu gönguleið í Patagonia-fjöllunum í Chile. Staðurinn hefur verið útnefndur einn 50 staða sem fólk ætti að heimsækja á lífsleiðinni, af tímaritinu National Geographic. Þessi dásamlega gönguleið liggur um Magellenic-skóginn, forug fen, klettótt gil og yfir óstöðugar brýr. Þótt svæðið sé heillandi frá upphafi til enda þarf að hafa í huga að þar geta veður orðið válynd. Því getur bakpokinn orðið ansi þungur með öllu sem á þarf að halda til að halda á sér hita. Hægt er að lenda í byl og því gæti hluti leiðarinnar lokast. En slæmt veðurfar veldur því að leiðin er ekki fjölfarin og því mun ferðalöngum finnast þeir hafa unnið enn stórkostlegra afrek ef þeir ganga þessa leið.

Annapurna-gönguleiðin í Nepal

Marga göngugarpa dreymir um að fara til Nepal til að komast í tæri við eina glæsilegustu fjallasýn í heimi. Þessi gönguleið í Annapurna býður ekki aðeins upp á snævi þakta fjallstinda, heldur einnig fjölbreytta náttúru og menningu. Gangan sem liggur frá suðrænu landslagi að hæstu fjöllum í heimi tekur um þrjár vikur og á leiðinni er hægt að gista í þægilegum skálum. Varast þarf háfjallaveiki en möguleiki er á henni þegar komið er í meira en fimm kílómetra hæð yfir sjávarmáli. Á leiðinni hitta ferðalangar Tíbeta sem búa í fjöllunum, sjá búddahof, geta heimsótt tehús, baðað sig í heitum lindum og njóta eins fallegasta útsýnis í heiminum.

Kilimanjaro í Tanzaníu

Þá sem langar að príla upp á verulega hátt fjall en ekki fara í brjálæðislega tæknilega, hættulega og bratta göngu þá er ferð á Kilimanjaro frábær kostur. Fjallið er 5,895 metra hátt og oft sagt að það sé hæsta fjall í heimi sem hægt er að ganga á án þess að þurfa tæknilega kunnáttu í klifri og útbúnaði. Það er ekki þar með sagt að gangan sé auðveld því hún er líkamlega krefjandi og árlega deyja nokkrir úr háfjallaveiki á þessari leið. Nokkrar leiðir eru á topp þessa hæsta frístandandi fjalls heims og hæsta tinds Afríku. Gangan hefst við miðbaug og farið er í gegnum allar loftlagstegundir í þessa sex daga og fimm nætur sem gangan tekur. Byrjað er í heitu graslendi, síðan farið í gegnum tempraða skóga og jökulfyllta dali að ísköldum tindinum.

Kalalau á Hawaii

Kalalau á Hawaii er ein glæsilegasta gönguleið í heimi. Klettarnir liggja gróðri vaxnir niður í sæblátt Kyrrahafið. Þar eru ævintýralega fullkomnir fossar sem falla niður í suðræna dali og öldurnar skella með dramatískum hætti á klettana. Í hafinu má sjá stökkvandi höfrunga og hnúfubaka og sjávarskjaldbökur við ströndina. Stígurinn er 17 kílómetra langur og þar sem hann liggur er um 1.000 metra hátt fall niður í sjó. Farið er yfir fimm stóra dali og fleiri litla. Fyrir mjög þjálfaða göngumenn tekur ferðin einn dag en tvö fyrir marga aðra sem tjalda á leiðinni. Stígurinn var fyrst byggður seint á nítjándu öld og endurbyggður árið 1960. Hann er nánast aldrei alveg flatur og á sumum stöðum liggur hann frekar nálægt hengiflugi, nokkur hundruð metra háu, beint niður í sjó.

Höfundur / Ragnhildur Aðalsteinsdóttir

Stundum þarf bara smá hugmyndaflug til að hressa upp á sambandið.

Misjafnt er hvað pör eru dugleg að gera hluti saman til að krydda sambandið þegar grár hversdagurinn tekur við eftir gáskafulla hveitibrauðsdaga svo ekki sé talað um þegar börnin fara að koma í heiminn og taka í burtu mestallan frítímann. Notalegar stundir þurfa þó ekki að vera flóknar og geta vel samræmst daglegum athöfnum – eina sem þarf er smávegis hugmyndaflug.

Stefnumót á virkum degi
Stundum henta virkir dagar betur til stefnumóta en helgar sem oft eru fullar af dagskrá og fólk vill kannski frekar nýta með börnunum. Fáðu pössun á mánudagskvöldi, taktu á móti makanum með sjóðheitu baði, kertaljósum og hafðu betri fötin tilbúin. Svo getið þið skellt ykkur út að borða, jafnvel í einn kaffibolla á eftir og samt verið komin heim á skikkanlegum tíma til að hleypa barnapíunni heim og komast það tímanlega í rúmið að þið verðið ekki að deyja úr þreytu daginn eftir. Auðvitað mætti líka skreppa saman í bíó eða leikhús en það gefur ykkur náttúrlega ekki eins mikinn tíma til að tala saman.

Saman í heimilisverkin
Í stað þess að híma í sitthvoru horninu við heimilisverkin getur verið sniðugt að boða til stefnumóts við þvottafjallið, uppvaskið eða eldamennskuna. Þegar mikið er að gera eru oft fáar stundir sem nást til að spjalla saman um daginn og veginn. Það getur því verið mjög skemmtilegt að njóta þess að vera saman á stundum sem mörgum finnst kvöð. Þeir sem hafa prófað þetta hafa sagt að á þessum klukkutíma sem tók að brjóta saman allan hreina þvottinn sem hafði safnast saman hafi þau hjónin náð að spjalla meira saman en í langan tíma. Það sama á við um eldamennsku – njótið þess að búa til matinn og spjalla saman í leiðinni um daginn og veginn. Sumir hafa líka nefnt að það sé ofsalega róandi að vaska upp, eins og hálfgerð hugleiðsla, og þarna geta pör hugleitt saman án þess að verða fyrir nokkurri truflun. Af hverju ekki að njóta þessara daglegu athafna, það þarf að gera þær hvort sem er.

Hittast í hádeginu
Sama hversu mikið við höfum að gera þá þurfum við alltaf að gefa okkur tíma til að borða og því er einhvern veginn svo hentugt að nota þær stundir til að njóta samvista. Skipuleggið að hittast sem oftast í hádeginu og fá ykkur „löns“ saman. Þetta brýtur upp vinnudaginn, þið hittist og eigið saman stund – gætu verið einu stundirnar sumar vikurnar sem þið hafið til að hittast bara tvö saman. Stundum gætuð þið jafnvel gripið með ykkur pizzu, góðan heilsudrykk eða jafnvel bara fengið ykkur skyr eða eitthvað álíka fljótlegt og hist heima í hádeginu – fengið ykkur einn stuttan í leiðinni.

Þegar mikið er að gera eru oft fáar stundir sem nást til að spjalla saman um daginn og veginn. Það getur því verið mjög skemmtilegt að njóta þess að vera saman á stundum sem mörgum finnst kvöð.

Dansnámskeið
Mikil skemmtun og samvera getur verið fólgin í því að fara saman á dansnámskeið. Það er bara enn skemmtilegra ef þið hafið aldrei kunnað neitt að dansa því þá getið þið grenjað af hlátri yfir klunnaskapnum og tilraununum til að ná sporunum rétt. Hver veit nema þið náið svo að láta þetta allt smella saman að lokum og getið þá svifið um í hvort annars örmum og slegið í gegn á dansgólfum skemmtistaðanna.

Taka til í geymslunni – saman
Margir hugsa til þess með hryllingi að fara í gegnum allt dótið sem hefur safnast saman í geymslunni á undanförnum árum og flestir muna varla hvað þar reynist vera – alla vega í fæstum tilfellum hlutir sem vantar því þeirra hefur ekki verið saknað síðan þeir fór í geymsluna. En þetta þarf ekki að vera svo slæmt. Skipuleggið stefnumót í geymslunni því þetta þarf ekki að vera svo leiðinlegt ef þið gerið þetta saman. Þegar hver hluturinn birtist á fætur öðrum þá rifjar það upp alls konar skemmtilegar minningar, t.d. lampinn frá Gunnu frænku sem ykkur fannst svo ljótur, hallærislegi jakkinn sem makinn kom með í sambandið en mátti aldrei henda og svo framvegis. Þegar þið hafið farið í gegnum allt og flokkað eftir því hvort eigi að geyma það áfram, henda eða að losa ykkur við þá getið þið auglýst eigulega hluti á bland.is, jafnvel pantað bás í Kolaportinu eða haldið bílskúrssölu og grætt á öllu saman.

Ekki leita langt yfir skammt
Skoðaðu hvað sniðugt er hægt að gera í þínu nánasta umhverfi því oft er það sem sniðugt er að gera rétt fyrir framan nefið á okkur. Það þarf ekki alltaf að ferðast langar leiðir, krefjast mikils útbúnaðar eða fjárútláta að gera eitthvað skemmtilegt. Farið saman á bókasafnið og kíkið á bækur og blöð saman. Þar er til dæmis hægt að kíkja í gömul tímarit og oft er ekkert fyndnara en að sjá hvað fólk og tískan hefur breyst í áranna rás. Farið saman í gönguferð á staði sem ykkur hefur aldrei dottið í hug að fara á en stendur ykkur nærri. Þá gæti takmarkið til dæmis verið að ganga leið og götur sem þið hafið ekki farið áður og þá mun áreiðanleg margt koma á óvart.

Sjónvarpslaus fimmtudagskvöld
Mörg okkar muna þá tíð þegar engar sjónvarpsútsendingar voru á fimmtudagskvöldum og ekki í júlí heldur. Á þessari tækniöld sem nú er runnin upp þá væri ekki vitlaust að hverfa einstöku sinnum aftur til þessara tíma. Slökkvið á sjónvarpinu, GSM-símum, Neti og tölvum. Heimasíminn má lifa svona til öryggis. Kveikið á kertum og njótið þess að vera heima í kyrrðinni frá þessu utanaðkomandi áreiti. Ef þið eigið börn þá skuluð þið leyfa þeim að njóta þessara stunda með ykkur. Komið saman og látið ykkur detta eitthvað sniðugt til að gera saman, t.d. spila, teikna, fara í leiki eins og að fela hlut, mjálmaðu nú kisa mín eða hollin skollin. Þarna gæti skapast tími sem allir fjölskyldumeðlimir gætu kunnað að meta og þjappað ykkur saman.

Komdu á óvart
Verið dugleg að gera eitthvað óvænt fyrir makann. Bakaðu köku, vöfflur eða gerðu heilsusamlokur og vertu tilbúin/n með kaffi og með því þegar makinn kemur heim úr vinnu seinnipartinn. Ef makinn sér alltaf um ákveðin húsverk skaltu koma honum á óvart með því að klára þau án þess að hann viti og segja að í staðinn séuð þið að fara saman í bíó. Komdu með góðan kaffibolla á leiðinni heim úr vinnu og færðu elskunni þinni eða keyptu uppáhaldstímaritið, bók eftir uppáhaldshöfundinn, gott freyðibað eða sturtusápu, kassa af uppáhaldsdrykknum sem aldrei er nóg til af eða bara hvað sem þér dettur í í hug.

Sólarhringssjónvarpsmaraþon
Farið saman á hótel í einn sólarhring með allar seríurnar af uppáhaldssjónvarpsþættinum ykkar og skipuleggið maraþon. Setjið fyrirfram reglur um hluti sem þið eigið að gera ef eitthvað ákveðið gerist í þáttunum. Ef þetta er til dæmis Friends gætuð þið haft: Alltaf þegar Phoebe spilar á gítarinn þá á að fara í sleik, alltaf þegar Joey reynir að sjarmera einhvern upp úr skónum á að kyssast, þegar Ross gerir eitthvað vandræðalegt á að fara úr að ofan og svo framvegis.

Höfundur / Ragnhildur Aðalsteinsdóttir

Flest höfum við heyrt um svart og grænt te – en hvað er hvítt te?

Fjölmargar rannsóknir hafa sýnt fram á hollustu tes og það kemur því ekki á óvart að te er vinsælasti drykkur heims á eftir vatni.

Allar tegundir tes koma af sömu plöntu, Camellia Sinensis, eða afbrigðis hennar sem kallast Camellia Assamica, en það er aðeins meðferð og vinnsla eftir tínslu ákvarðar hvort teið verður svart, hvítt eða grænt. Ávaxtate, jurtate og rauðrunnate eru í raun ekki te heldur seyði úr ávöxtum, blómum, jurtum eða nálum rauðrunnans og innihalda ekki koffín.

Hvítt te er sérstakt vegna þess að einungis eru notuð ung laufblöð. Þá eru klipptir af runnanum laufsprotar sem eru við það að opnast og tvö til þrjú ung laufblöð. Í vönduðustu hvítu tei eru einungis notaðir laufsprotar. Af þessari ástæðu er uppskerutíminn stuttur, stundum ekki nema tveir til þrír dagar nokkrum sinnum á ári. Stuttur uppskerutími og vandasöm tínsla gerir það að verkum að hvítt te er sjaldgæfara og dýrara en annað te og það er aðeins ræktað í mjög takmörkuðu magni í Kína og á Sri Lanka.

… hvítt te er mikið um sig, létt og oft má sjá stilka og heil blöð í teinu. Einföld framleiðsla þýðir líka að næringarefni laufanna varðveitast vel og teið er því sérstaklega gott fyrir heilsuna.

Þegar tínslan hefur farið fram er framleiðslan einföld. Teið er látið þorna í nokkra daga í sólinni eða í sérstökum þurrkhúsum. Þessi einfalda framleiðsluaðferð gerir það að verkum að hvítt te er mikið um sig, létt og oft má sjá stilka og heil blöð í teinu. Einföld framleiðsla þýðir líka að næringarefni laufanna varðveitast vel og teið er því sérstaklega gott fyrir heilsuna.

Drukkið í mörg þúsund ár

Te á sér mjög langa sögu og hefur verið til sem drykkur í tæplega 5000 ár. Ein vinsæl þjóðsaga um uppruna tesins fjallar um keisara í Kína sem kallaði sig Wan Tu. Þekkt bók skáldsins Lu Yus, Tai Ching, fjallar um Wan Tu og þau áhrif sem te hafði á líf hans. Wan Tu var illur og grimmur harðstjóri sem var steypt af stóli af einum ráðamanna sinna og hrakinn á brott til afskekkts staðar í Kína.

Dag einn sat hann í skugganum af stórum runna og hugleiddi hvernig hann gæti náð fram hefndum. Vegna fátæktar sinnar þurfti hann að sætta sig við að drekka einungis vatn. Þar sem Wan Tu sat í þungum þönkum að sjóða vatn, féll lauf af runnanum ofan við höfuð hans, ofan í pottinn. Wan Tu komst að því að útkoman var bragðgóður drykkur sem hafði róandi áhrif. Teið hreinsaði hugann á svo áhrifaríkan hátt að hann sat undir runnanum næstu sjö árin, drakk te, iðraðist gjörða sinna sem harðstjóri og hugsaði um hvernig hann gæti bætt þær upp.

Hann nefndi drykkinn Thai, sem merkir friður. Wan Tu sneri aftur til heimaborgar sinnar í dulargervi og varð vel metinn ráðgjafi fyrrum ráðamanns síns, sem hafði steypt honum af stóli. Hann varð svo vitur og ástsæll meðal fólksins, að þegar ráðamaðurinn lést, var Wan Tu kosinn arftaki hans og stjórnaði í mörg ár. Á þeim tíma kynnti hann einnig þjóð sína fyrir tei. Ekki fyrr en á dánarbeði, leysti Wan Tu frá skjóðunni.

Heilsuávinningur hvíts tes:

Inniheldur kraftmikil andoxunarefni sem vernda líkamann fyrir sindurefnum og stuðla að frumuendurnýjun.

• Hægir á öldrun húðarinnar.
• Hreinsar húðina og kemur í veg fyrir að bakteríur stífli svitaholur.
• Heldur húðinni bjartri og viðheldur raka.
• Styrkir bein og tennur.
• Er örverueyðandi og verndar því líkamann gegn sýkingum.
• Inniheldur efni sem talin eru hraða brennslu líkamans.
• Jafnar blóðsykur og heldur honum stöðugum.
• Minnkar streituáhrif í líkamanum og hefur góð áhrif á hjartað.

Höfundur / Hildur Friðriksdóttir
Heimild / teogkaffi.is

Fátt er betra en klassísk morðgáta á dimmu vetrarkvöldi.

Engin undankomuleið
Murder on the Orient Express var nýlega frumsýnd í kvikmyndahúsum landsins. Hér er á ferðinni endurgerð af frægri mynd sem kom út árið 1974 byggð á sögu Agöthu Christie. Belgíski leynilögreglumaðurinn sérvitri Hercule Poirot er á leið til Vestur-Evrópu á fyrsta farrými Austurlandahraðlestarinnar. Nótt eina er einn af farþegunum myrtur í svefni og þar sem lestin er teppt vegna snjóskriðu sem hylur lestarteinana fær Hercule tíma og tækifæri til að rannsaka málið, raða saman sönnunargögnunum og finna morðingjann áður en lögreglan kemur um borð. Myndin skartar úrvalsliði leikara svo sem Johnny Depp, Judi Dench og Penelope Cruz en í þetta sinn fer Kenneth Brannagh með hlutverk Poirot.

Uppi og niðri
Í myndinni Gosford Park má glöggt sjá stéttaskiptinguna sem ríkti í Englandi á árum áður. Á efri hæðum sveitasetursins býr Sir William McCordle ásamt mun yngri eiginkonu sinni Lady Sylviu. Þau lifa hinu ljúfa lífi og skemmta sér við skotveiðar, útreiðar og veisluhöld. Niðri vinna þjónarnir baki brotnu undir stjórn yfirþjónsins Mr. Jennings og húsfreyjunnar fröken Wilson. Hvort sem þeim líkar það vel eða illa þá vita allir hver þeirra staða er. Einn góðan dag breytist allt þegar Sir William býður í skotveiðiveislu og vinir hans og þjónar þeirra hleypa öllu í bál og brand. Þar með hefst saga af lygum, svikum, hefnd, biturð, peningum og ást – og svo auðvitað morði.

Nótt eina er einn af farþegunum myrtur í svefni og þar sem lestin er teppt vegna snjóskriðu … fær Hercule tíma og tækifæri til að rannsaka málið.

Glæpur eða leikur
Smáþjófurinn Harry Lockhart er á flótta í Los Angeles undan lögreglunni eftir misheppnað rán en ratar óvart í leikprufu fyrir hlutverk rannsóknarlögreglumanns í kvikmynd. Hann fær hlutverkið og er boðið í ekta Hollywood-partí. Þar hittir hann einkaspæjarann Perry van Shrike sem stingur upp á að hann taki þátt í því að rannsaka glæp til að undirbúa sig fyrir hlutverkið. Harry og Petty flækjast inn í flókið morðmál. Kiss Kiss Bang Bang er skemmtileg mynd í nýtískulegum noir-stíl.

Flækjur
Í klassísku kvikmyndinni The Big Sleep, sem er byggð á vinsælum bókum Raymond Chandler, kynnumst við einkaspæjaranum Philip Marlowe. Hann er í upphafi ráðinn af afar ríkri fjölskyldu til að stöðva fjárkúgara sem hefur verið að áreita yngri systurina, Carmen. Eldri systirin, Vivian, vill þó meina að faðir hennar hafi ráðið Marlowe til að rannsaka allt annað mál. Með tímanum flækist málið til muna, og söguþráður myndarinnar með, og á endanum er það orðið að morðgátu.

Fræg fjöldamorð
Myndin From Hell fjallar um hið alræmda mál raðmorðingjans Jack the Ripper sem lék lausum hala í London árið 1888. Jack myrti eingöngu vændiskonur í Whitechapel-hverfinu í London. Við fylgjumst við rannsóknarlögreglumönnunum Fred Abberline og Peter Godley við rannsókn málsins. Þeir félagar kynnast vændiskonum sem eru vinkonur fórnarlamba og hafa sína sögu að segja. Abberline er ópíumfíkill og þykist sjá inn í framtíðina. Hann verður jafnframt ástfanginn af Mary Kelly, einni vændiskonunni, og vill skiljanlega leysa málið áður en hún fellur fyrir hendi morðingjans.

Höfundur / Hildur Friðriksdóttir

Á undanförnum árum hafa komið á markað fjölmargar nýjungar í húðvörum sem eiga uppruna sinn að rekja til Asíu, þá sérstaklega til Japan og Suður-Kóreu.

Ein þessara nýjunga eru svokallaðir taumaskar en hvernig virka þeir og er árangurinn þess virði að líta út eins og Hannibal Lechter í hálftíma?

Ólíkt venjulegum andlitsmöskum, yfirleitt þykkt krem eða leir í túbu sem er borinn á og síðan þvegin af eftir tiltekinn tíma, eru taumaskar í raun líkari serumi. Um er að ræða grímu úr tauefni, gegnsósa í þunnu, gelkenndu serumi, stútfullu af virkum efnum.Tauefnið sjálft er úr örþunnri bómull eða öðrum trefjum og sniðið eins og gríma, með götum fyrir augu, nef og munn, ásamt litlum blöðkum á hliðunum til að tryggja að maskinn passi á öll andlit. Áferðin á gelinu sem efnið er bleytt í er nógu þykk til að maskinn loði við húðina án þess að renna til og efnið leki ekki niður og fari til spillis.

Maskann á að setja á hreina, þurra húð en gott er að nota ávaxtasýru eða ensímhreinsi til að fjarlægja dauðar húðfrumur af yfirborðinu.

Samkvæmt leiðbeiningum á að leyfa maskanum að vera á í tíu til tuttugu mínútur. Það er samt óhætt að láta hann vera á húðinni þar til hún hefur upptekið meirihluti serumsins og gríman sjálf orðin nokkuð þurr. Þessi aðferð tryggir hámarksupptöku virku efnanna.

Best er að liggja út af á meðan maskinn er á því þá færist hann ekkert til. Það er líka mikilvægt að gefa sér tíma og slaka á, við þurfum öll á því að halda og við lítum betur út fyrir vikið.

Helstu kostir taumaska

• Fyrst og fremst eru þeir ótrúlega þægilegir og auðveldir í notkun, meira að segja þeir sem eru ekkert alltof duglegir við að hugsa um húðina geta skellt einum á sig.
• Mörgum finnst sérstaklega gott að ferðast með þá milli landa því þeir teljast ekki sem vökvi og má þess vegna taka með í handfarangri. Sumir setja þá meira að segja á sig í lengri flugum því þurrt loft í flugvélum getur leikið húðina grátt og þá er gott að setja á sig maska en þurfa ekki að þvo sér eftir notkun. Þú gætir samt fengið nokkur skrítin augnaráð frá samferðamönnum.
• Til eru fjölmargar gerðir taumaska sem hafa ólíka virkni, flestar þeirra eiga það þó sameiginlegt að veita mjög öflugt rakaskot. Árangurinn er því strax sjáanlegur, húðin verður mun þéttari og unglegri. Það þýðir að það hentar vel að nota þá rétt fyrir eitthvert sérstakt tilefni, enda hafa margar stórstjörnur birt mynd af sér með taumaska rétt áður en þær ganga rauða dregilinn.
• Þegar öllu er á botninn hvolft koma taumaskar ekki beint í staðinn fyrir annars konar andlitsmaska, heldur eru þeir góð viðbót sem er þægilegt að grípa til þegar maður vill líta extra vel út án þess að þurfa að hafa mikið fyrir því.

Höfundur / Hildur Friðriksdóttir

Jackie Cardoso Da Silva barðist fyrir lífi sonar síns.

Jackie Cardoso Da Silva kynntist íslenskum skiptinema í Brasilíu og flutti til Íslands í kjölfarið. Hún settist fyrst að á Egilsstöðum, síðan í Reykjavík og nú býr hún í Vestmannaeyjum þar sem hún er sannfærð um að sér hafi verið ætlað að búa. Hún sér lengra en nef hennar nær, dreymir fyrir ýmsu og finnur annað á sér. Á miðilsfundi kom í gegn sál sem talaði til hennar og hún vissi að sér væri ætlað að eignast fatlaðan son.

Bernharð sonur hennar er haldinn Duchenne-vöðvarýrnun. Hann veiktist alvarlega árið 2011 og næstu ár sinnti móðir hans fáu öðru en umönnun hans. „Hann bara veikast skyndilega og það leit í byrjun út fyrir að vera ælupest sem fór versnandi. Veikindin byrjuðu að morgunlagi og klukkan 16 var ég komin með hann upp á spítala og mátti ekki seinni vera. Hálftíma seinna sagði hann við mig að hann elskaði mig og bað mig um að fyrirgefa sér fyrir að vera svona veikur. Svo datt hann út.

„Hann bara veikast skyndilega og það leit í byrjun út fyrir að vera ælupest sem fór versnandi. Veikindin byrjuðu að morgunlagi og klukkan 16 var ég komin með hann upp á spítala og mátti ekki seinni vera.“

Við vorum spurð hvort við værum með einhverja hugmynd um hversu lengi ætti að reyna endurlífgun en læknarnir voru vissir um að þessi veikindi væru vegna hrörnunarsjúkdómsins. Ég hlustaði ekki á þá og sagði þeim bara að bjarga syni mínum.

Þá var hann svo illa farinn að það náðist ekki í neinar æðar á honum heldur þurfti að bora með borvél til að gefa honum lyf í beinmerg. Honum var síðan haldið sofandi í næstum þrjár vikur.

Heimurinn hrundi. Ég var hjá honun dag og nótt, ég gat ekki gefist upp á honum, ég var ekki búin að kenna honum nógu mikið um að elska lífið. Ég átti allt eftir. Ég talaði stanslaust við hann og sagði honum að verkefninu væri ekki lokið. Ég lofaði honum því að líf hans yrði betra eftir að hann jafnaði sig og ég myndi gefa honum allt sem hann þyrfti til að vera hamingjusamur. Hann mætti ekki fara frá mér því hann væri heldur ekki búinn að kenna mér allt sem hann þyrfti.“

Jackie hefur stóran og hlýjan persónuleika og leitast til að bæta líðan fólksins í kringum sig á margvíslegan máta.

Margt fleira um lífshlaup og vinnu þessarar merku konu má lesa í nýjustu Vikunni.

Höfundur / Ragnhildur Aðalsteinsdóttir
Myndir / Aldís Pálsdóttir