Sveindís Anna Jóhannsdóttir, félags- og fjölskylduráðgjafi, hefur sérhæft sig í handleiðslu gegn kulnun í starfi.
Vinnutengd streita hefur á undanförnum árum aukist hjá þjóðinni og mikilvægt að grípa tímalega til aðgerða. Sveindís Anna Jóhannsdóttir, félags- og fjölskylduráðgjafi, hefur vakið athygli á því að handleiðsla sé öflugt verkfæri gegn kulnun í starfi.
„Birtingarmyndir kulnunar geta verið margvíslegar en eitt af því sem hverfur eða minnkar stórlega er gamansemin. Það verður allt svo alvarlegt. Ekkert er lengur skemmtilegt eða hægt að brosa að. Fólk fer einnig að einangra sig, hætta að taka þátt, vinna jafnvel í kaffi- og matartímum til að forðast samstarfsfólk. Síðan fer fólk einnig að forðast kunningja og vini og að lokum einangrar fólk sig líka frá fjölskyldunni,“ segir Sveindís í greinargóðu viðtali í 2. tölublaði Vikunnar sem kom í verslanir í dag.
Hún segir að góð vinnustaðamenning sé mikilvæg gegn kulnun í starfi. „Auknar líkur eru á kulnun ef markmið starfsins eru óljós eða mótsagnarkennd. Strangar reglur lofa ekki góðu sem og neikvætt andrúmsloft, lítið rými fyrir nýjar hugmyndir, slök stjórnun og eftirfylgd, lítil áhrif starfsmanna á eigið starf og stöðugt kapphlaup við tímann. Einnig of mörg verkefni, þegar sjaldan er hrósað fyrir vel unnin störf og þegar fjöldi undirmanna er yfir 35 manns.“
Nánar má lesa um málið í 2. tölublaði Vikunnar sem kom út í dag 11. janúar.
Fyrsta ástin er flókið fyrirbæri sem engu að síður er svo freistandi að fanga á hvíta tjaldinu.
Hér eru nokkrar ljúfsárar og yndislegar myndir um fyrstu ástina.
Algjörar andstæður
Í Spectacular Now (sbr. mynd hér að ofan) er sagt frá Sutter Keely sem lifir í núinu og er ekkert mikið fyrir það að gera plön fyrir framtíðina. Hann er á síðasta ári í framhaldsskóla, heillandi og vinamargur, miðdepill athyglinnar í veislum, elskar að vinna í fatabúðinni og svo framvegis – en hann er líka efnilegur alkóhólisti og vískíflaskan er aldrei langt undan. Eftir að kærastan segir honum upp fer hann á fyllerí og vaknar í ókunnugum garði þar sem Aimee Finecky stendur yfir honum. Hún er öðruvísi en þær stelpur sem hann á að venjast, sannkölluð „góð stelpa“ sem leggur sig fram í skóla, á sér drauma um framtíðina og hefur aldrei átt kærasta. Þrátt fyrir að vera svona ólík ná þau merkilega vel saman og hafa áhrif hvort á annað, bæði góð og slæm.
Oliver ákveður að hann ætli að verða besti kærasti í heimi til að tryggja að Jordana haldi áfram að vera hrifin af honum.
Skeleggur strákur
Skondna kvikmyndin Submarine segir frá hinum 15 ára gamla Oliver Tate en hann á sér tvö meginmarkmið: að missa sveindóminn fyrir næsta afmælisdag og rústa sambandi móður sinnar við elskhuga sinn. Oliver er bráðþroska ungur strákur og rembist við að auka vinsældir sínar í skólanum. Einn góðan veðurdag verður hin dökkhærða fegurðardís, Jordana, skotin í honum og hann ákveður að hann ætli að verða besti kærasti í heimi til að tryggja að hún haldi áfram að vera hrifin af honum. Á sama tíma er hjónaband foreldra hans í molum og ekki bætir úr skák þegar fyrrum kærasti móður hans flytur inn í húsið við hliðina. Oliver leggur á ráðin um það hvernig hann geti látið foreldra sína vera áfram saman. Lúmskt skemmtileg bresk kvikmynd þar sem hinn ungi leikari Craig Roberts ber af.
Cada og Thomas sem er yfir sig ástfanginn af henni.
Sorgleg en falleg
Það er ekki hægt að fjalla um fyrstu ástina og þroskasögur án þess að tala um My Girl. Þar kynnumst við Vödu Sultenfuss sem er heltekin af dauðanum. Móðir hennar er látin og faðir hennar rekur útfararstofu. Hún heldur að hún sé ástfangin af enskukennaranum sínum og skráir sig meira að segja í ljóðanámskeið til að ganga í augun á honum. Besti vinur hennar, Thomas J., er algjör ofnæmispési. Hann er yfir sig ástfanginn af Vödu og tilbúinn til að gera hvað sem er fyrir hana. Vada reiðist þegar faðir hennar ræður förðunarfræðing á útfararstofuna og hrífst af henni. Hún gerir allt hvað hún getur til að skemma fyrir þeim. Eins og flestir vita er endir myndarinnar mjög sorglegur og það er nauðsynlegt að vera með tissjúkassa við höndina þegar maður horfir á þessa.
Oskar kynnist Eli sem er heldur betur sérstök stúlka.
Flókin ást
Það er nógu erfitt og flókið að verða skotinn í fyrsta skiptið þó manneskjan sem maður er skotinn í sé ekki vampýra í þokkabót. Í sænsku myndinni Låt den rätte komma in kynnumst við Oskari, 12 ára gömlum strák í Stokkhólmi sem er lagður í einelti í skólanum og foreldrar hans láta hann alveg afskiptan. Líf hans breytist þegar hann kynnist Eli sem er heldur betur sérstök stúlka. Hún þolir illa sólskinið, fúlsar við flestum mat og svo þarf að bjóða henni sérstaklega inn í herbergi. Hann fellur engu að síður fyrir henni og hún gefur honum styrk til að standa með sjálfum sér. En þegar hann uppgötvar að hún þarf að drekka mannablóð til að lifa neyðist hann til að hugsa sinn gang upp á nýtt.
Moonrise Kingdom fjallar um samband 12 ára stráks, Sam, og stelpu, Suzy, sem hafa verið pennavinir í eitt ár.
Sannkallað ævintýri
Á eyjunni New Penzance búa aðeins örfáar hræður auk þess sem þar eru reknar sumarbúðir. Myndin Moonrise Kingdom fjallar um samband 12 ára stráks, Sam, og stelpu, Suzy, sem hafa verið pennavinir í eitt ár. Þau verða ástfangin í gegnum bréfaskriftirnar og gera með sér leynilegt samkomulag um að flýja saman út í óbyggðirnar. Suzy býr á eyjunni með fjölskyldu sinni en Sam kemur árlega í Ivanhoe-sumarbúðirnar. Á meðan yfirvöld og hinar ýmsu stofnanir leita þeirra sækir skuggalegur stormur í sig veðrið þannig að á endanum er hið sallarólega samfélag litlu eyjunnar komið á annan endann.
Á Suðurlandi eru margir stórbrotnir staðir sem vert er að heimsækja við réttar aðstæður.
Þar er hvergi meiri fjölbreytni í náttúrufari á Íslandi eins og jöklar, eldfjöll, eldfjallaeyjar, háhitasvæði, jökulár, svartar sjávarstrendur, víðáttumikil undirlendi, mýrar og stöðuvötn af öllum stærðum og gerðum. Það er því óhætt að mæla með ósnortnu hálendi Suðurlands við áhugasama ferðalanga.
Lakagígar eru, hvernig sem á þá er litið, ein stórfelldasta furðusmíð í náttúru landsins. Mynd / www.commons.wikimedia.org
Lakagígar gusu árið 1783 hinu mesta hraungosi er sögur fara af á jörðinni. Þeir voru þá kallaðir Skaftáreldar og er gígaröðin 25 kílómetrar að lengd og endar við Vatnajökul. Alls eru gígaopin talin vera um 100. Gígarnir eru af margvíslegri gerð og lögun. Sumir eru kringlóttir, aðrir aflangir og stundum meira eða minna brotnir. Í barmi flestra þeirra er skarð sem hraunið hefur runnið út úr.
Flestir þeirra eru að miklu leyti þaktir þykkri breiðu af grámosa og hinir fegurstu tilsýndar. Ganga ber um þá með gætni því að mosinn er afar viðkvæmur. Lakagígar eru, hvernig sem á þá er litið, ein stórfelldasta furðusmíð í náttúru landsins en þeir voru friðlýstir árið 1971.
Fjaðrárgljúfur Hið 100 metra djúpa og tveggja kílómetra langa Fjaðrárgljúfur er bæði stórbrotið og hrikalegt. Gljúfrið er veggbratt, hlykkjótt og þröngt. Berggrunnurinn í Fjaðrárgljúfri er að mestu móberg frá kuldaskeiðum ísaldar og telst um tveggja milljóna ára gamalt. Fjaðrá á upptök sín í Geirlandshrauni og fellur fram af heiðarbrúninni í þessu mikilfenglega gljúfri þar til hún skilar sér niður í Skaftá. Fjaðrá er bergvatnsá og ljóst er að hún hefur breyst mikið í tímans rás. Í dag er Fjaðrá oftast frekar vatnslítil og því geta göngumenn hæglega kosið að ganga inn gljúfrið en þá þarf að vaða ána alloft. Innst í gljúfrinu eru fossar svo ganga þarf sömu leið til baka. Flestir velja að ganga eftir göngustíg uppi á gljúfurbarminum og njóta um leið útsýnisins yfir gljúfrið. Fjaðrárgljúfur er á náttúruminjaskrá og öðlaðist heimsfrægð eftir að söngvarinn Justin Bieber tók upp myndband sitt I´ll Show You í gljúfrinu.
Raufarhólshellir Einn af lengstu hellum Íslands nefnist Raufarhólshellir og er staðsettur við Þrengslaveg. Hellirinn er yfir 1.300 metra langur og myndaðist í Leitarhraunsgosi í Bláfjöllum fyrir um 5.200 árum. Vinsælt er að nota hellinn í kvikmyndum og til að mynda var hluti úr kvikmyndinni Noah (2014) tekinn upp þar. Daglegar ferðir eru í boði í hellinn.
Jökladýrð Hluta af hinni kraftmiklu móður jörð er að finna í hinum hættulegu jöklum landsins. Flesta jökla landsins er að finna á Suðurlandi og vert að hafa í huga að mestu máli skiptir að setja í forgang viðeigandi búnað og skipulagningu ef ferðast á yfir jökul. Eitt megineinkenni jökla er að þeir hreyfast. Í jöklunum eru margar virkar eldstöðvar en eldgos og jarðhiti bræða ís og geta valdið jökulhlaupi. Um þriðjungur þess vatns sem fellur til sjávar á Íslandi er jökulvatn. Aðgengi að íslenskum jöklum er nokkuð mismunandi en þó er mögulegt að komast að flestum þeirra. Ferð upp á jökul getur verið ógleymanlegt ævintýri en þó ber að hafa í huga að þeir geta verið stórhættulegir og því nauðsynlegt að vera í fylgd reyndra jöklaleiðsögumanna. Nokkur fyrirtæki sjá um skipulagðar jöklaferðir á Suðurlandi en hægt er að nálgast upplýsingar um þær á Netinu, í upplýsingamiðstöðvum ferðamála eða hjá starfsmönnum hótela. Vikan mælir eindregið með að ferðamenn hafi samband við ferðaskipuleggjendur og leiðsögumenn á svæðunum áður en lagt er af stað upp á jökul.
Systrastapi við Klaustur Árið 1186 var sett nunnuklaustur í Kirkjubæ á Síðu sem síðar var nefnt Kirkjubæjarklaustur. Örnefnin Systrastapi og Systrafoss eru einmitt tengd þeim tíma.
Mikilvægt er að leggja af stað vel undirbúinn.
Systrastapi er klettastapi vestan við Klaustur. Þjóðsaga segir að uppi á stapanum sé legstaður tveggja klaustursystra sem hafi verið brenndar á báli fyrir brot á siðareglum. Önnur hafði selt sig fjandanum, gengið með vígt brauð fyrir náðhúsdyr og lagst með karlmönnum. Hin hafði talað óguðlega um páfann. Eftir siðaskiptin var seinni nunnan talin saklaus og á leiði hennar óx fagur gróður en á leiði hinnar seku var gróðurlaust. Klifra má upp á stapann en þaðan er mikið útsýni með jöklasýn.
Systrafoss heitir fossinn þar sem Fossá fellur úr Systravatni fram af fjallsbrúninni fyrir ofan Kirkjubæjarklaustur, ofan í Fossárgil. Fallegar gönguleiðir eru í nágrenni fossins og greið gönguleið er upp á fjallsbrúnina að Systravatni en ofan af brúninni er stórbrotið útsýni.
Frá Hrífunesi yfir í Þjórsárdal Óhætt er að mæla með göngu frá Hrífunesi yfir í Þjórsárdal sem álitinn er af mörgum einn fegursti dalur landsins. Þjórsárdalur er staðsettur í Árnessýslu og liggur milli Búrfells og Skriðufells. Dalurinn skiptist í tvo dalbotna um Rauðukamba og Bergólfsstaðaá en hann er bæði sléttlendur og vikurborin eftir síendurtekin eldgos í Heklu. Talið er að Þjórsárdalur hafi verið fullbyggður á þjóðveldisöld en lagst í eyði á 17. öld. Merkustu staðir dalsins eru taldir vera Stöng, Háifoss, Þjóðveldisbærinn, Vegghamar og Gjáin.
Fagmennska var í hæsta gæðaflokki á Hátíðarkvöldverði Klúbbs matreiðslumanna 2018!
Selma Björnsdóttir hélt uppi fjörinu.
Óhætt er að segja að öllu hafi verið tjaldað til á Hátíðarkvöldverði Klúbbs matreiðslumanna, sem fór fram á Hilton Reykjavík Nordica síðastliðinn laugardag. Tekið var á móti gestum með freyðandi kampavíni og smáréttum en um 400 gestir sóttu veisluhöldin ásamt fjölda fagfólks sem útbjó matinn og þjónaði gestum.
Er Hátíðarkvöldverðurinn liður í fjáröflun félagsins og því unnu fagmenn, kokkar og matreiðslumenn, launalaust þetta kvöld. Klúbburinn notar svo ágóðan til að fjármagna ýmsa áhugaverða viðburði, svo sem keppnina Kokka ársins og fleira.
Góð stemning var á staðnum en það voru þau Erpur Eyvindarson og Selma Björnsdóttir sem héldu uppi fjörinu og skemmtu gestum sem nutu þess að borða gómsæta réttina sem voru reiddir fram hver á eftir öðrum.
Nánar í næsta tölublaði Gestgjafans, sem kemur út fimmtudaginn 18. janúar!
Myndir / Sigurjón Ragnar
Texti / Hanna Ingibjörg Arnarsdóttir
Viktoría Hermannsdóttir fer af stað með Málið er, vikulega útvarpsþætti á Rás 1
Viktoría Hermannsdóttir vakti mikla athygli fyrir útvarpsþáttaseríuna Ástandsbörnin sem hún gerði fyrir Rás 1 í fyrra og útvarpsþáttinn Á ég bróður sem var sjálfstætt framhald og var fluttur um jólin. Núna fer hún af stað með vikulega útvarpsþætti á Rás 1 sem bera heitið Málið er.
„Þetta er í raun mjög opið og ég ætla taka fyrir eitthvað sem mér finnst áhugavert hverju sinni. Þetta verður í heimildastíl og mikil vinna lögð í hvern þátt. Ég er algjör grúskari og elska góðar sögur þannig að það er skemmtilegt tækifæri fyrir mig að fá að fjalla um það sem mér finnst áhugavert á þessum skemmtilega vettvangi sem útvarpið er,“ segir Viktoría. Hún er umsjónarmaður þáttanna en hugmyndin er líka að aðrir dagskrárgerðarmenn geti tekið mál fyrir og kafað ofan í þau.
Í fyrsta þættinum ætlar Viktoría að kafa ofan í heim týndu barnanna á Íslandi.
„Ég fæ að fylgja eftir lögreglumanni sem hefur undanfarin ár verið vakinn og sofin yfir því að leita að þessum börnum. Þetta eru börn á aldrinum 11-18 ára sem oft er lýst eftir. Þetta er ekki mjög stór hópur en það hefur fjölgað í honum undanfarið og vandi margra er mikill. Ég skoða allar hliðar í þessum þætti – kynnist þessum heimi í gegnum lögreglumanninn sem lifir og hrærist í þessu, foreldra sem eiga barn sem tilheyrir þessum hópi og svo unga konu sem eitt sinn tilheyrði þessum hópi og veitir okkur innsýn í þennan heim sem er ekkert alltof fallegur,“ segir Viktoría.
Þættirnir verða á dagskrá kl. 16 alla föstudaga á Rás 1 og verða aðgengilegir á hlaðvarpinu líka.
Skautadrottningin fyrrverandi Tonya Harding stendur uppi í hárinu á Piers Morgan.
Tonya Harding svaraði fyrir sig þegar Piers Morgan spjallaði við hana í þættinum Good Morning Britain. Kvikmynd um ævi Tonyu hefur farið sigurför um heiminn. Mynd / www.commons.wikipedia.org
Kvikmyndin I, Tonya, með Margot Robbie í hlutverk fyrrum ólympufara í listhlaupi á skautum, Tonyu Harding hefur farið sigurför um heiminn. Tonya var í viðtali gegnum gervihnött við Piers Morgan í Good Morning Britain þegar hann gaf í skyn að hún hefði ekki verið alsaklaust fórnarlamb þegar sá fáheyrði atburður átti sér stað að ofbeldismaður á launum hjá fyrrum eiginmanni Tonyu barði helsta keppinaut hennar í hnéð með hafnaboltakylfu. Skautadrottningin fyrrverandi svaraði hvasst fyrir sig.
Morgan gekk hart fram í spurningum sínum um árásina sem átti sér stað árið 1994. Báðar voru skautakonurnar á leið á ólympíuleika en Tonya hafði alla tíð mátt þola að fá lægri einkunnir fyrir frammistöðu sína á ísnum en Nancy. Í myndinni kemur fram að þetta hafi verið vegna þess að dómurum fannst Tonya ekki þess verð að vera fulltrúi Bandaríkjanna á alþjóðavettvangi. Stúlkurnar voru báðar frá fátækum heimilum en fjölskylda Tonyu ansi skrautleg meðan meiri reglusemi og festa ríkti í kringum Nancy.
Morgan er þekktur fyrir að vera óvæginn og nokkuð dómharður um menn og málefni. Hann spurði hana ítrekað um meint ofbeldi móður hennar og fyrrum eiginmanns gagnvart henni og sagði svo: „Kannski hentar þér að leika fórnarlamb. En ég held að þú hafir ekki verið fórnarlambið í þessu öll. Það var Nancy Kerrigan en draumur hennar um ólympíugull var gerður að engu.“
„Þakka þér kærlega fyrir en ég held ég verði að segja góða nótt,“ var svar skautadrottningarinnar og hún átti bágt með að leyna reiði sinni.
Þeir sem hafa séð myndina geta líklega ekki annað en dáðst að stillingu hennar því á sinni tíð var hún þekkt fyrir flest annað en yfirvegun. Hún svaraði þó nokkrum spurningum í viðbót en viðtalinu lauk með því að hún fullyrti að hún hefði ekkert vitað um ráðagerðir fyrrum manns síns og félaga hans. Hún benti einnig á að þolendur ofbeldis hafa sjaldan kraft til að standa með sjálfum sér eða setja sig upp á móti kúgurum sínum. Þess má einnig geta að á Golden Globe verðlaunahátíðinni hampaði Allison Janney gullnum hnetti fyrir túlkun sína á móður Tonyu Harding í myndinni.
Það er ekkert sjálfsagt að fjölskyldum lyndi vel saman eins og sjá má í The Glass Castle og fleiri kvikmyndum.
Erfið ævi
Í The Glass Castle (sjá mynd hér að ofan) kynnumst við Jeannette Walls sem fæddist 1960 og ólst upp ásamt þremur systkinum í mikilli fátækt, óreiðu og afskiptaleysi. Faðir þeirra var drykkfelldur draumóramaður sem hélst hvergi í vinnu og móðirin sagðist vera listakona þótt hún skapaði aldrei neitt af viti og virtist oft hvorki vita í þennan heim né annan. Fjölskyldan festi hvergi rætur, flutti eða flúði stöðugt frá einum stað til annars þannig að hvorki Jeannette né systkini hennar gengu í skóla á uppvaxtarárunum. Þetta uppeldi gerði það þó að verkum að þau lærðu fljótt að standa á eigin fótum og flúðu foreldra sína um leið og þau gátu. Það er þangað til foreldrarnir daga uppi sem hústökufólk í New York. Áhugaverð mynd með hinni hæfileikaríku Brie Larson en handritið er byggt á sjálfævisögu Jeanette Walls sjálfrar.
Þessi skrautlegi hópur leggur af stað í ferðalag á heiðgulri rútu til að koma yngsta barninu í fegurðarsamkeppni.
Sólskinsferðin
Allir fjölskyldumeðlimirnir í Little Miss Sunshine eiga það sameiginlegt að taka sjálfa sig aðeins of alvarlega. Fjölskyldan samanstendur af keðjureykjandi móður, nær gjaldþrota fjölskylduföður, samkynhneigðum frænda sem er að jafna sig eftir sjálfsmorðstilraun, þunglyndum táningi og afa sem reynist vera heróínsjúklingur. Þessi skrautlegi hópur leggur af stað í ferðalag á heiðgulri rútu til að koma yngsta barninu í fegurðarsamkeppni og að sjálfsögðu fer allt í bál og brand á leiðinni.
Fjölskyldan í The Royal Tenenbaums er skemmtilega öðruvísi.
Furðufuglar
Persónur í kvikmyndum Wes Andersons eiga alltaf í dálítið furðulegum samskiptum og það á sannarlega við um fjölskylduna í The Royal Tenenbaums. Fjölskyldufaðirinn, Royal, hefur hvorki reynst góður faðir né góður eiginmaður. Þegar hann er loksins búinn að glopra öllu frá sér reynir hann að komast aftur í mjúkinn hjá fjölskyldu sinni, fyrrum eiginkonu og þremur börnum. Í stað þess að biðjast afsökunnar eins og maður þykist hann hins vegar vera með banvænan sjúkdóm og höfðar til samvisku þeirra. Þetta verður óvænt til þess að draga saman alla fjölskylduna – en alls ekki hrakfallalaust.
The Squid and the Whale fjallar um áhrif skilnaðar á fjölskyldu.
Skilnaður og brestir
Myndin The Squid and the Whale fjallar um áhrif skilnaðar á fjölskyldu. Bernard Berkman er hrokafullur rithöfundur sem var eitt sinn mikils metinn en ferill hans hefur smám saman orðið að engu. Hann starfar sem háskólakennari og verður afar ósáttur þegar ótrú eiginkona hans, Joan, fær ritverk sín útgefin og mjög góðar viðtökur. Þau ákveða þau að skilja og tilkynna það tveimur sonum sínum, Walt sem er sextán ára og Frank sem er tólf. Drengirnir skiptast á að dvelja hjá foreldrum sínum og fljótlega fara þeir að skipa sér í lið með hvoru þeirra fyrir sig. Þessi togstreita hefur gríðarleg áhrif á strákana en foreldrarnir virðast bara hugsa um sjálfa sig.
Blaðamaður og ljósmyndari Húsa og híbýla heimsóttu fallegt hús við Hverfisgötu í Reykjavík.
Í þessu reisulega húsi var hér áður fyrr starfrækt kaupfélag. Íbúðin er á annarri hæð og það er bæði hægt að taka stigann upp eða gamla, græna og mjög svo sjarmerandi lyftu sem okkur skilst að sé ein elsta lyfta landsins. Sólveig Andrea innanhússarkitekt tók að sér að hanna þessa feiknaflottu íbúð í hjarta Reykjavíkur þar sem iðandi mannlífið er beint fyrir neðan gluggana, Sólveig tók á móti tvíeykinu frá blaðinu, ásamt smekkdömunni sem þarna býr ásamt eiginmanni sínum og dóttur.
Hjónin keyptu íbúðina vorið 2016 eftir að hafa haft augastað á henni í nokkurn tíma. Þau ákváðu strax að taka hana alla í gegn og fluttu svo inn rúmu ári seinna. Það er hátt til lofts og fallegir stórir gluggar setja sterkan svip á rýmið sem er allt nýuppgert. Það fer ekki á milli mála að þarna búa fagurkerar sem hafa nef fyrir fallegri hönnun því íbúðin er öll ofboðslega smekkleg, stíllinn er töff en samt hlýlegur og örlítið rómantískur. Hlýlegt parket, kristalsljósakrónur, mildir brúnir tónar hér og þar, mottur, málverk og íburðamikil og klassísk húsgögn.
Íbúðin er öll ofboðslega smekkleg, stíllinn er töff en samt hlýlegur og örlítið rómantískur.
En hvað var það sem eigendurnir voru að sækjast eftir, voru ákveðnar hugmyndir eða kröfur frá þeim?
„Já, þeir voru að sækjast eftir þessum svokallaða loft-íbúða tilfinningu; rýmið opið, loftin frekar hrá og ófrágengnir veggirnir, það er að segja ekki pússaðir og spartslaðir. Það var samt ákveðið að mála alla veggina, líka þessa hráu og halda hráleikanum í loftunum og upprunalegu útliti gluggana. Gluggakistan í eldhúsrýminu var svona djúp og þau vildu halda henni þannig enda mjög flott svona djúp og mikil. Eigendurnir vildu í rauninni halda í allt það sem gerði íbúðina að iðnaðarhúsnæði,“ segir Sólveig og labbar með okkur um íbúðina.
Arkitektinn gæti vel hugsað sér að búa þarna
Ertu ánægð með útkomuna á þessari íbúð við Hverfisgötuna?
„Já, alveg svakalega, líka af því húsráðendur eru svo rosalega smekklegir. Það var svo gaman að koma þegar allt var tilbúð og þau flutt inn og sjá útkomuna því það er allt svo smekklegt hjá þeim. Þau voru mjög opin fyrir mínum hugmyndum og höfðu skoðanir og áhuga á öllu sem þurfti að gera og ákveða í ferlinu. Við útfærðum margt í sameiningu og annað kom alfarið frá þeim eins og til dæmis brúni liturinn sem er á nokkrum veggjum, hann er frá Slippfélaginu.“
Það er hátt til lofts og fallegir stórir gluggar setja sterkan svip á rýmið sem er allt nýuppgert.
Við spyrjum við Sólveigu hvort hún sjálf gæti hugsað sér að búa í þessari íbúð? „Já, ekki spurning. Kannski ekki með þrjú börn en ég væri til í það þegar börnin eru farin að heiman. Staðsetningin er ekki mjög barnvæn en þetta er æðislegt ef maður er barnalaus eða með uppkomin börn,“ svarar hún brosandi og við kveðjum þessar smekkkonur og gamla sjarmahúsið við Hverfisgötuna.
Þórdísi Elvu finnst þessi yfirlýsing vera dæmigerð afstaða þeirra sem eru mótfallnir framförum.
Rúmlega 100 franskar konur ásaka forsprakka byltingarinnar undir myllumerkinu #metoo um nornaveiðar. Catherine Deneuve er ein þeirra kvenna sem skrifað hafa opið bréf þar sem þær gagnrýna baráttuna gegn kynferðislegri áreitni og segja hana ógn gegn kynferðislegu frelsi. Í yfirlýsingunni kemur fram að konur sem ekki taki þátt í byltingunni eigi yfir höfði sér ásakanir um svik gegn kynsystrum sínum.
Þær segja karlmönnum hafa verið vikið úr störfum fyrir sakleysislegar snertingar og einstaka kossa. Það brjóti ekki gegn sæmd kvenna að snerta líkama þeirra og gerir þær síður en svo að fórnarlömbum.
Catherine Deneuve er ein þekktasta leikkona frakka en hún hefur meðal annars skapað sér miklar óvinsældir eftir opinbera yfirlýsingu þess lútandi að standa með leikstjóranum Roman Polanski sem sakaður var um nauðgun á ungri stúlku. Þá var haft eftir Deneuve að nauðgun sé ofmetin.
Þórdís Elva Þorvaldsdóttir er ein þeirra sem farið hefur fremst í flokki baráttunnar á Íslandi segir yfirlýsinguna dæma sig sjálfa. „Hér er verið að fordæma konur fyrir að standa á rétti sínum að verða ekki fyrir áreitni eða ofbeldi. Til að gera lítið úr þeim eru notuð dæmi eins og „hendi á hné“, „þvingaður koss“ og „kynferðisleg skilaboð“ sem konum eru send, svo sem typpamyndir. Í nútímanum eru þetta ótvíræð dæmi um kynferðislega áreitni. Þegar Catherine Deneuve var ung þótti ýmislegt sem ógnar lýðheilsu ekki vera sérstakt tiltökumál, eins og að reykja í flugvélum og sleppa bílbeltanotkun. Sem betur fer hafa viðmiðin breyst og kröfurnar aukist.
Mér finnst þessi yfirlýsing vera dæmigerð afstaða þeirra sem eru mótfallnir framförum, því fyrr á tímum tíðkaðist verra atlæti. Í stað þess að horfa með nostalgíu til fortíðar, þar sem mannréttindi voru fótum troðin í öllum flokkum, hvort sem um er að ræða mannréttindi kvenna, þeldökkra, samkynhneigðra eða transfólks svo dæmi séu nefnd ættum við að vera stolt af þeim árangri sem náðst hefur. Viðtökurnar við #metoo sýna að á heimsvísu erum við langflest stolt af þessari þörfu byltingu. Ég spái því að Catherine Deneuve og hennar skoðanasystkin verði notuð sem dæmi í sögubókum framtíðarinnar um fólk sem andmælti framförunum, á sama hátt og þeir sem andmæltu mannréttindasigrum annarra minnihlutahópa.”
Hlaupaárið 2018 fer af stað með krafti og mörg skemmtileg keppnishlaup framundan. Hlaupasería FH og BOSE inniheldur þrenn fimm kílómetra hlaup og stigakeppni einstaklinga. Hlaupunum er startað á göngustígnum gegnt íþróttahúsinu á Strandgötu í Hafnarfirði stundvíslega klukkan 19 fimmtudagana 25. janúar, 22. febrúar og 22. mars.
Hörður Jóhann Halldórsson, formaður Hlaupahóps FH, á von á mikilli stemningu í Hlaupaseríu FH og BOSE í vetur.
„Þetta er í áttunda árið sem að hlaupaserían er haldin. Þær breytingar urðu í ár að samið var við Origo og samhliða ákveðið að nefna seríuna Hlaupaseríu FH og BOSE,“ segir Hörður Jóhann Halldórsson formaður Hlaupahóps FH. „Hlaupaleiðin er mæld af löggildum mælingamönnum, brautin nokkuð flöt og því ákjósanleg til bætinga. Besta tíma konu í brautinni á Arndís Ýr Hafþórsdóttir, 17:52 og besta tíma karls í brautinni á Kári Steinn Karlsson, 15:03. Þau sem oftast hafa unnið hlaup í seríunni eru Arnar Pétursson sem hefur unnið fimm sinnum og Arndís Ýr Hafþórsdóttir, níu sinnum, en alls hafa 22 hlaup verið haldin síðan 2011. Reikna má með fjölmörgum hlaupurum í ár og mikilli stemningu þar sem DJ mun koma hlaupurum í gírinn við upphaf og endi hlaups. Undan- og eftirfarar verða á hjólum, öflug brautargæsla og hraðastjórar í 20, 25 og 30 mínútum nýtast sem ákveðin tímaviðmið í hlaupinu, sem ætti að hjálpa hlaupurum að ná markmiðum sínum hafi þeir ákveðið að klára hlaupið innan ákveðins tíma.“
Skráning í hlaupin fer fram á hlaup.is.
Texti / Ragnhildur Aðalsteinsdóttir
Arnar Pálsson flugvirki segir frá áhugaverðum stöðum í Delitzsch í Þýskalandi.
Arnar Pálsson hefur búið ásamt konu sinni Maríu og hluta af börnum þeirra í Delitzsch í nokkur ár.
„Ég kynntist Maríu í Yakutsk í Síberíu og þar giftum við okkur. Við eigum saman tvö börn. Fyrir átti María einn son og ég átti tvær dætur og einn son. Við búum fimm saman hér í Delitzsch en börnin mín þrjú búa hjá mömmu sinni í Reykjavík.
María flutti fyrst til Íslands og við bjuggum saman í Keflavík í tæplega sex ár. Fyrir fjórum árum fékk ég einfaldlega nóg af ástandinu heima og fann vinnu á flugvellinum í Leipzig. Fyrstu tvö árin flaug ég á milli, vann í 14 daga og átti 14 daga frí á milli. Þar sem tækifærið var komið fór ég að undirbúa að flytja fjölskylduna með mér til Þýskalands og í ágúst í hittiðfyrra fluttum við út. Við keyptum okkur hús í júní á síðasta ári og líkar vel hérna. Það er svo miklu auðveldara að lifa hér en á Íslandi. Verðlag, úrval og gæði matvöru eru ekkert í líkingu við það sem er á Íslandi. Heilbrigðiskerfið virkar mjög vel og aldrei þurfum við að taka upp veskið þegar við hittum lækna. Lánavextir hér eru ekkert í líkingu við það sem þú sérð á Íslandi,“ segir Arnar.
„Það er svo miklu auðveldara að lifa hér en á Íslandi. Verðlag, úrval og gæði matvöru eru ekkert í líkingu við það sem er á Íslandi.“
„Delitzsch er mjög þægilegur bær að búa í en íbúar eru tæplega 20.000 talsins. Við búum í útjaðrinum svo það er ofsalega rólegt kringum húsið okkar og mjög öruggt fyrir börnin að leika úti. Delitzsch er mitt á milli Leipzig og Halle og tekur ekki nema um 20 mínútur að keyra þangað ef okkur vantar eitthvað á öðrum hvorum staðnum.
Minnivarðinn The Monument to the Battle of the Nations í Leipzig.
Hér eru margir áhugaverðir staðir. Delitzsch-kastali (sjá mynd hér að ofan) og garðurinn þar í kringum er virkilega flottur.
Hér er Porsche-verksmiðja þar sem hægt er að prófa bíla og skoða safn og hér er líka BMW-verksmiðja.
Miðborg Leipzig er heillandi og skemmtileg og ég hvet fólk til að ganga þar um og skoða. Gröf Johannesar Sebastians Bach er í Thomas-kirkju, hæsta minnismerki Evrópu er á staðnum en það var reist til minningar um fyrsta sigurinn gegn Napóleon árið 1813 og er kallað The Monument to the Battle of the Nations.“
Spennandi fjallgöngunámskeið með Vilborgu Örnu í janúar.
Vilborg Arna Gissurardóttir og félagar bjóða upp á skemmtilegt fjallgöngunámskeið í vetur.
Vilborg Arna Gissurardóttir slær sjaldan slöku við og fer nú í janúar af stað með gönguhóp ásamt Ingu Dagmar Karlsdóttur og Tomaszi Þór Verusyni þar sem boðið er upp á göngudagskrá fram á vor. Fjallgöngurnar er tvær til þrjár í mánuði, stigvaxandi í takt við hækkandi sól og aukið þrek, og á endanum verður farið á Hvannadalshnjúk ef aðstæður og veður leyfir.
„Fjallgöngur eru ein besta líkamsræktin sem hægt er að stunda og eru þekktar fyrir að hafa jákvæð áhrif á líkama, streitu og huga. Við byrjum á minni fjöllum og bætum smá saman í hæðarmetrana með hækkandi sól. Ein þekktasta aukaverkunin af fjallgöngunum hafa verið nýir félagar og fleiri áskoranir svo við hvetjum alla áhugasama til þess að vera með,“ segir Vilborg Arna.
Þátttakendur þurfa að eiga Esjubrodda og ljós auk þess að vera viðbúin að leigja viðeigandi búnað fyrir jöklaferðirnar þannig að það má búast við spennandi ævintýrum með þessum flottu fjallagörpum.
Lýsing skiptir sköpum inni á heimili. Það má skipta lýsingu í þrjá flokka: umlykjandi lýsingu, sem veitir almenna birtu, áherslulýsingu, sem vekur athygli á ákveðnum stað eða mun á heimilinu, og að lokum vinnulýsingu, sem gefur manni næga birtu til að klára ákveðin verk. Síðan er hægt að nota ýmsar ólíkar gerðir ljósgjafa til að ná fram þeirri lýsingu sem maður vill.
Sniðugt er að hafa dimmera á loftljósum til að geta stýrt birtustiginu og stemningunni í rýminu.
Loftljós flokkast nær alltaf undir umlykjandi lýsingu. Sniðugt er að hafa dimmera á þessum ljósum til að geta stýrt birtustiginu og stemningunni í rýminu.
Loftljós eru ýmist ljósakrónur sem hanga niður úr loftinu eða kúplar sem liggja þétt upp við það.
Krónur setja meiri svip á herbergið og því skiptir sköpum að velja einhverja sem passar vel við stíl þess en kúplar dreifa birtu meira yfir allt herbergið án þess að vera fyrir.
Veggljós hafa verið mjög vanmetin undanfarin ár en svo virðist sem vinsældir þeirra séu að aukast.
Veggljós geta bæði flokkast sem umlykjandi en einnig áherslulýsing, til dæmis þegar þau eru staðsett sitthvorum megin við fallegt málverk.
Veggljós eru handhæg leið til að stýra birtunni, það að hafa aðeins kveikt á þeim en ekki loftljósi gefur dramatíska eða rómantíska lýsingu.
Gólflampar eru annað dæmi um vanmetna lýsingu. Þeir geta nefnilega þjónað öllum þremur hlutverkum lýsingar. Ótrúlega margar gerðir eru til, sumar lýsa upp og aðrar niður, sumar eru hönnunarmunir á meðan aðrar setja notagildið á oddinn. Eitt er víst að það geta allir bætt einum gólflampa við inn í stofu hjá sér.
Borðlampa má bæði nota sem áherslu- og vinnulýsingu. Glæsilegur lampi á hliðarborði getur sett punktinn yfir i-ið í stíliseringu herbergis en einnig getur hann komið að góðu gagni við lestur bóka. Eins koma borðlampar að góðum notum í skrifstofurými þar sem þörf er á mikilli birtu.
Góðan borðlampa er hægt að nota sem vinnulýsingu – og ekki skemmir fyrir ef hann er fallega hannaður.
Hér er uppskrift að ljúffengri döðluköku. Ávextirnir sem hér eru flokkast undir ofurfæðu og eru bara tillaga. Þið getið auðvitað notað þá ávexti sem ykkur finnast bestir.
Döðlukaka með ávöxtum.
Döðlukaka með ávöxtum
fyrir 8 Botn:
500 g þurrkaðar döðlur
3 dl vatn
½ dl kókosolía, mýkt í vatnsbaði
1 stór, þroskaður banani eða 2 litlir
2 msk. hunang eða agave-síróp
1 ½ dl tröllhafrar
Ofan á:
2 kíví, skræld og skorin í bita
1 dl bláber
100 g jarðarber, skorin í tvennt
kjarnar úr ½ granatepli
100 g 70% súkkulaði, gróft saxað
50 g ristaðar valhnetur eða pekanhnetur, gróft saxaðar, eða grófar, ristaðar kókosflögur
Sjóðið döðlur í vatni í 10 mín. Látið standa í 15 mín. og sigtið svo vatnið frá. Setjið döðlurnar í matvinnsluvél og maukið vel ásamt kókosolíu, banana, sætuefni og tröllhöfrum. Setjið maukið í form sem er u.þ.b. 20×30 cm, kælið. Raðið ávöxtum, súkkulaði og hnetum eða kókosflögum ofan á og berið fram með þeyttum rjóma.
Trefjaríkir hafrar eru jafnvel enn hollari en áður hefur verið talið og sýna nýjar rannsóknir að þeir minnka ekki bara líkurnar á hjartasjúkdómum heldur einnig tegund 2 sykursýki.
Litið var á fyrirsætur fyrri áratuga sem persónuleikalaus herðatré og fjölbreytnin var eftir því. Vissulega sáum við fyrirsætur á tíunda áratugnum neita að klæðast feldi vegna dýraverndunarsamtakanna PETA en þá voru það ofurfyrirsætur á borð við Naomi Campbell og Cindy Crawford sem höfðu þá þegar skapað sér nafn innan bransans og höfðu efni á því að tjá sig.
Með vinsældum samfélagsmiðla hefur hópur fyrirsæta og aktívista notað rödd sína og andlit til þess að vekja athygli á mikilvægum málefnum og uppskera frekar frægð og frama fyrir vikið en skammir. Skoðum nokkrar ungar og áhugaverðar konur sem eru hægt og bítandi að breyta heiminum.
Ebonee Davis hefur rætt rasisma í tískubransanum.
Ebonee Davis
Ebonee Davis vakti mikla athygli þegar hún skrifaði áhrifaríkt opið bréf stílað á tískubransann. Spurningar eins og hvaða áhrif fjölmiðlar hafi á menningu okkar og hvort tískuheimurinn geti hætt að vera rasískur voru henni efstar í huga. Eins og þekkt er hafa fyrirsætur af afrískum uppruna átt erfiðar uppdráttar og enn í dag eru svartar fyrirsætur minna en 10% þeirra sem ganga niður tískusýningarpallana. Ebonee segist hafa fengið að heyra að fyrirtæki bókuðu bara svartar fyrirsætur ef þær litu út fyrir að koma beint frá afskekktu þorpi í Afríku eða eins og hvítar konur dýft í súkkulaði. Hún segist hafa reynt að fara eftir þeim ráðleggingum frá byrjun ferilsins árið 2011. Það var ekki fyrr en hún ákvað að leyfa náttúrulegu hári sínu að njóta sín og hún opnaði munninn og krafðist réttlætis að ferill hennar fór á flug. Náttúruleg fegurð hennar landaði henni meðal annars haustherferð Calvin Klein árið 2016.
Fjölbreytni í tískuheiminum, femínismi og fíkn eru Adwou Aboah hugleikin.
Adwoa Aboah
Adwoa er stofnandi Gurls Talk, sem er vefmiðill sem einbeitir sér að málefnum kvenna og hvetur ungar konur til að tjá sig án þess að vera dæmdar eða mismunað. Hún talar reglulega hreinskilningslega um fjölbreytni í tískuheiminum, femínisma, andlega heilsu og fíkn.
Cameron Russel hefur m.a. verið dugleg að ræða félagsleg og pólitísk málefni, loftlagsbreytingar og hreina orku.
Cameron Russel
Horft hefur verið á Ted-fyrirlestur ofurfyrirsætunnar Cameron Russel rúmlega nítján milljón sinnum þegar þetta er skrifað. Cameron útskrifaðist úr hagfræði og stjórnmálafræði frá Colombia-háskóla og hefur heldur betur gert meira en að sitja fyrir og vera sæt síðan hún útskrifaðist. Hún hefur verið dugleg að ræða félagsleg og pólitísk málefni, loftlagsbreytingar, hreina orku og sanngjörn laun fyrir þá sem vinna í tískuiðnaðinum, til að nefna örfá dæmi.
Markmið Avery McCall er að safna fjármunum til að vinna með flóttamönnum.
Avery McCall
Avery hefur verið virkur þátttakandi í stjórnmálum frá tólf ára aldri og meðal annars verið unglingaráðgjafi fyrir herferð Sameinuðu þjóðanna, Foundation’s Girl Up. Hún varði menntaskólaárunum sem talsmaður flóttamanna og aðstoðaði þá sem fluttust frá stríðshrjáðu Sýrlandi, Suður-Súdan og frá lýðveldinu Kongó. Hún hefur notað andlit sitt til góðs innan tískuheimsins til að vekja athygli á mikilvægum málefnum. Hennar markmið er að safna fjármunum til að vinna með flóttamönnum og draumurinn er að geta leiðbeint börnum sem flýja frá stríðshrjáðum löndum.
Andreja Pejic hefur varpað ljósi á málefni transfólks innan tískuheimsins.
Andreja Pejic
Andreja hefur verið kölluð fyrsta transsúpermódelið. Andrej var fæddur í fyrrum Júgóslavíu en alinn upp í Melbourne í Ástralíu. Áður en hann fór í kynleiðréttingu árið 2013 var hann þegar þekkt fyrirsæta innan tískuheimsins og vakti útlit hans víða athygli, enda átti hann auðvelt með að fara í hlutverk beggja kynja. Síðustu árin hefur ferill Andreju blómstrað og hún meðal annars setið fyrir á forsíðum tímarita á borð við Elle, L’Officiel, Fashion og GQ. Árið 2015 varð hún fyrsta transfyrirsætan til þess að vera andlit snyrtivörufyrirtækis en hún landaði stórum samningi við Make Up For Ever. Andreja hefur varpað ljósi á málefni transfólks og opnað dyr fyrir fjölbreyttari hóp innan tískuheimsins.
Charli Howard og Clémentine Desseaux
Líkamsímynd hefur verið mikið tískuorð upp á síðkastið í bransanum og sem betur fer eru sífellt fleiri týpur sem ná árangri í tískuheiminum í dag. Þær Charli Howard og Clémentine Desseaux vöktu heimsathygli fyrir verkefni sitt All Woman Project sem er myndasería, sem hefur ekki verið átt við í Photoshop, af konum af öllum stærðum, gerðum, litum og aldri sem sanna það að fegurð kemur ekki í einni staðlaðri stærð.
Hér er uppskrift að ekta fiskisúpu í anda Miðjarðarhafsins.
4 msk. olía
1 laukur, saxaður smátt
4 hvítlauksgeirar, saxaðir
1 fersk fenníka, sneidd
1 stór gulrót, í litlum bitum
1 lítill blaðlaukur, sneiddur
300 g tómatar, saxaðir
safi úr 1 appelsínu
safi úr 1 sítrónu
1 tsk. þurrkað tímían
2 tsk. paprika
12 dl fiskisoð eða vatn og fiskikraftur
1 ½ dl hvítvín
1 msk. tómatmauk
1 msk. sykur eða hunang
1-2 tsk. salt
300 g lax
400 g stórar rækjur
300 g langa eða annar hvítur fiskur
2 msk. þurrkuð steinselja
Steikið laukinn í olíunni þar til hann fer að verða glær. Bætið hvítlauk, fenníku, gulrót og blaðlauk út í og steikið aðeins áfram. Bætið öllu nema fiski og steinselju út og látið súpuna sjóða í 20 mín. Bætið fiski út í og látið sjóða í 4-5 mín. í viðbót. Stráið steinselju yfir í lokinn.
Anna Bryndís Skúladóttir er mikil fjallageit og gefur ráð varðandi búnað.
Anna Bryndís Skúladóttir er mikil fjallageit og hefur ásamt félögum sínum í Fjallgönguklúbbnum Fjallhress gengið á marga flotta austfirska tinda. Við fengum hana til að segja okkur fá eftirminnilegustu göngunum og gefa okkur nokkur góð ráð um búnað.
Á toppi Hvannadalshnjúks.
„Falleg náttúra og að kljást við fjölbreytt landslag og ögrandi fjöll er það skemmtilegasta við fjallamennskuna. Ég fer mikið ein á fjöll og finnst það frábært en það er líka mjög gefandi að ganga með vinum mínum í Fjallgönguklúbbnum Fjallhress og um leið eykur það öryggi á fjöllum,“ segir Bryndís. Hún er deildarstjóri í Seyðisfjarðarskóla á leikskóladeild og starfar einnig sem fjallaleiðsögumaður og landvörður á sumrin. Í frítíma sínum stundar hún fjallgöngur og kajakróður.
„Súla, hæsti tindur Dyrfjalla, er í uppáhaldi vegna þess hve mikil fjölbreytni er í gönguleiðinni og einstök innkoma á þetta mikla klettafjall, sem er blómi skrýdd klettarák. Útsýnið af toppnum er magnað. Eftirminnilegast er þó líklega þegar dóttir mín hringdi í mig þar sem ég var að koma niður af Hvannadalshnjúk og sagði að það væri farið að gjósa á jöklinum. Nei, ég hélt nú ekki. ,,Jú mamma, þetta er bæði í fréttum í útvarpi og sérútsending í sjónvarpinu sagði hún mjög angistarfull.“ Þá sneri ég mér við og sá þá gosstrókinn stíga upp til himins. Þetta var Grímsvatnagosið í maí 2011.“
Mikilvægt að láta vita af sér
Hvað þurfa byrjendur í fjallamennsku að hafa í huga og hvaða búnaður er nauðsynlegur? „Það þarf að huga að veðurspá og láta aðra vita hvert halda skal og hvenær þú áætlar að koma til baka. Góður bakpoki undir skjólfatnað og nesti er mikilvægt. Ólíkan búnað þarf í vetrarfjallamennsku og sumarfjallgöngum. Létt föt, sólgleraugu og sólarvörn í sólinni á sumrin. Muna líka að hafa sólgleraugu og sólarvörn í vetrarsól í snjó og á jökli, ullarfatnað innst og góðar ullarpeysur undir skjólgóðri skel er mjög gott. Göngustafir koma sér vel við ýmsar aðstæður og að vetri eru broddar og ísaxir oft nauðsynleg. Sími, áttaviti eða GSP-tæki eru allt góð öryggistæki. Ekki gleyma vatni á brúsa í allar lengri göngur.“
Hvaða nesti finnst þér best að hafa? „Það fer eftir árstíðum og erfiðleikastigi. Léttari samlokur og ávaxtasafa á sumrin en á veturna kæfusamloku, lifrarpylsu og egg. Svo er ég alltaf með svart te á brúsa. Snickers er ómissandi og reyndu ekki að koma með súkkulaðirúsínur þar sem ég er,“ segir hún hlæjandi.
Hún hvetur fólk hiklaust til að stunda fjallamennsku. „Fjallganga er gríðarlega góð alhliða hreyfing og gott sport bæði fyrir sál og líkama. Náttúran er endalaus uppspretta fegurðar og fjölbreytileika en það er ekki síður magnað að upplifa náttúruna í ham þar sem mannskepnan fær ekki beislað hana, s.s. í jarðskjálftum, gosum, flóðum og skriðuföllum.“
Og það er skemmtilegt göngusumar fram undan hjá Bryndísi en hún ætlar meðal annars að ganga á Búlandstind, Grjótfjall og Þriggjakirknafell, einnig Kverkfjöll og í Hveradal, á Jónsfjall og í Mínuskörð í botni Borgarfjarðar eystra og loka þar með fjallahringnum í firðinum. Þá mun hún fara í fimm daga ferð um Víknaslóðir sem leiðsögumaður, ganga Fimmvörðuháls og fara í kjakferðir í fjallvötnunum á hálendinu.
Aðalmynd: Bryndís ásamt Skúla Júlíussyni á Stöng í Berufirði.
Hér er uppskrift að salati sem er ekki bara bráðhollt heldur algjört sælkerafæði líka.
Hollt og gott. Appelsínusalat með súkkulaði-sorbet.
Appelsínusalat með súkkulaði-sorbet
fyrir 4
Ráðlagður dagskammtur af hreinu súkkulaði, samkvæmt ofurfæðiskenningum, er u.þ.b. 15-20 grömm. Það er nú alveg næg ástæða til að skoða þetta fæði svolítið betur.
Hér er uppskrift að súkkulaði-sorbet sem er dökkur og seiðandi og með appelsínum og granateplum er hann alveg ómótstæðilegur.
3-4 appelsínur
1 granatepli
Súkkulaði-sorbet
3 dl vatn
40 g kakó (eins dökkt og þið hafið efni á)
100 g hrásykur
100 g 70% súkkulaði, saxað
½ tsk. vanilludropar
svolítið salt
Sjóðið vatn, kakó og sykur saman. Bætið súkkulaði út í ásamt vanillu og salti og hrærið í þar til súkkulaðið er uppleyst, kælið. Frystið í ísvél eða í frysti. Ef þið setjið ísinn í frysti er gott að setja þunnt lag í stórt form svo hann frjósi fljótt og hræra í öðru hvoru á meðan ísinn er að frjósa.
Hátt hlutfall andoxunarefna í dökku súkkulaði geri það að hinu fullkomna sælgæti. Súkkulaði er ríkt af flavoníðum sem sannað hefur verið að auka blóðflæði, draga úr hósta, bæta minni og mýkja húðina. Þeir sem aðhyllast ofurfæðiskenningar segja ráðlagðan dagskammt vera 15-20 grömm á dag.
Í nýjasta tölublaði Vikunnar er að finna ítarlegt viðtal við Kristínu.
Kristín Tómasdóttir rithöfundur hefur á undanförnum árum skrifað sex bækur ætlaðar ungum krökkum. Hún leggur áherslu á að byggja upp sterka sjálfsmynd og efla vitund þeirra um eigin tilfinningalíf. Nýjasta bók hennar, Sterkar stelpur, hefur þó ákveðna sérstöðu því hún er ætluð yngri lesendahópi og er tileinkuð yngstu dóttur hennar sem er trans stúlka.
Kristín hefur einnig sett saman sjálfstyrkingarnámskeið fyrir stelpur og ferðast um landið í þeim tilgangi að efla íslenskar stelpur.
„Ég fann fyrir mikilli eftirspurn meðal foreldra sem voru farnir að finna fyrir því að sjálfsmynd stelpna þeirra væri farin að þróast í neikvæða átt fyrr en þá hafði grunað,“ segir hún. „Við erum að sjá stelpur niður í 6 ára fara í megrun og alls kyns önnur merki sem foreldrar hræðast en vita líka að hægt er að koma í veg fyrir með fyrirbyggjandi sjálfstyrkingu.“
Ítarlegra viðtal við Kristínu er að finna í nýjustu Vikunni.
Þegar farið er í frí um landið hættir okkur til að stoppa bara á þekktustu stöðunum því við vitum ekki af öllu hinu sem Ísland hefur upp á að bjóða.
Suðurlandið er einn vinsælasti staður ferðamanna sem koma hingað til lands og geymir ótrúlegar náttúruperlur. Hér eru nokkrir staðir sem minna hefur farið fyrir og við mælum sannarlega með að þið skoðið.
Þótt núna sé kannski ekki eins sumarlegt um að lítast og á þessari ljósmynd þá er óhætt að segja að Svartifoss sé einn fallegasti foss landsins.
Fjaðrárgljúfur
Fjaðrárgljúfur er virkilega falleg náttúrusmíð rétt við þjóðveg númer eitt, skammt vestan við Kirkjubæjarklaustur. Ekið er að gljúfrinu um Lakaveg og þaðan gengið upp með gilinu. Einnig er hægt að ganga upp eftir gljúfrinu sjálfu en það gæti þurft að vaða töluvert. Mikilfenglegar móbergsmyndir prýða gilið og þetta getur verið skemmtilegt stopp fyrir alla fjölskylduna.
Gljúfrabúi
Fossinn Gljúfrabúi er aðeins nokkur hundruð metrum fyrir innan Seljalandsfoss og fellur bak við hamravegg úr móbergi, kallaður Franskanef, sem lokar fossinn af. Hægt er að komast inn í hellinn um op að framanverðu þar sem áin Gljúfurá rennur út og það er töfrum líkast að sjá fossinn steypast niður þessa 40 metra. Einng má klifra upp á Franskanef og sá fossinn að ofanverðu en munið að fara að öllu með gát.
Svartifoss
Svartifoss er einn fallegasti foss á landinu þar sem hann fellur niður ægifagurt stuðlaberg í Skaftafelli. Frá Skaftafellssofu er hægt að ganga að Svartafossi en leiðin er tæpir tveir kílómetrar og tekur um 35-45 mínútur. Gengið er meðfram tjaldsvæðinu og beygt upp á hæð sem heitir Austurbrekkur. Farið er yfir Eystragil á göngubrú og á leiðinni sjást Hundafoss og Magnúsarfoss. Þegar komið er upp hæðina er gott útsýni að Svartafossi og svo er gengið niður í gilið til að komast alveg að fossinum.
Þakgil
Þakgil er falinn gimsteinn á Höfðabrekkuafrétti staðsett milli Mýrdalsjökuls og Mýrdalssands um 15 kílómetra frá þjóðveginum en beygt er út af þjóðvegi númer eitt við Höfðabrekku sem er fimm kílómetrum fyrir austan Vík. Þar er gott tjaldsvæði, veðursæld og stórbrotin náttúra. Ef þú ert á leiðinni í útilegu þá er þetta staður sem er virkilega þess virði að skoða. Einnig er hægt að leigja smáhýsi á staðnum. Margar fallegar gönguleiðir við allra hæfi eru á svæðinu.
Ingólfshöfði
Fjölskyldufyrirtækið Öræfaferðir á Hofsnesi sem staðsett er rétt hjá Fagurhólsmýri við rætur Öræfajökuls býður upp á spennandi lunda- og söguferðir út í Ingólfshöfða á heyvögnum sem eru hengdir aftan í dráttarvélar (sjá aðalmynd). Ferðin tekur alls tvo og hálfan klukkutíma og ferðin í vagninum um það bil 25 mínútur hvora leið. Það kostar 7.500 kr. fyrir fullorðna, 2.500 kr. fyrir börn á aldrinum 8-16 ára en börn frá 4-7 ára frá frítt. Gengið er um höfðann með leiðsögumanni og það eru 99% líkur á því að sjá lunda á svæðinu yfir sumartímann. Skemmtileg ævintýraferð fyrir fjölskylduna í sumarfríinu.
Sveindís Anna Jóhannsdóttir, félags- og fjölskylduráðgjafi, hefur sérhæft sig í handleiðslu gegn kulnun í starfi.
Vinnutengd streita hefur á undanförnum árum aukist hjá þjóðinni og mikilvægt að grípa tímalega til aðgerða. Sveindís Anna Jóhannsdóttir, félags- og fjölskylduráðgjafi, hefur vakið athygli á því að handleiðsla sé öflugt verkfæri gegn kulnun í starfi.
„Birtingarmyndir kulnunar geta verið margvíslegar en eitt af því sem hverfur eða minnkar stórlega er gamansemin. Það verður allt svo alvarlegt. Ekkert er lengur skemmtilegt eða hægt að brosa að. Fólk fer einnig að einangra sig, hætta að taka þátt, vinna jafnvel í kaffi- og matartímum til að forðast samstarfsfólk. Síðan fer fólk einnig að forðast kunningja og vini og að lokum einangrar fólk sig líka frá fjölskyldunni,“ segir Sveindís í greinargóðu viðtali í 2. tölublaði Vikunnar sem kom í verslanir í dag.
Hún segir að góð vinnustaðamenning sé mikilvæg gegn kulnun í starfi. „Auknar líkur eru á kulnun ef markmið starfsins eru óljós eða mótsagnarkennd. Strangar reglur lofa ekki góðu sem og neikvætt andrúmsloft, lítið rými fyrir nýjar hugmyndir, slök stjórnun og eftirfylgd, lítil áhrif starfsmanna á eigið starf og stöðugt kapphlaup við tímann. Einnig of mörg verkefni, þegar sjaldan er hrósað fyrir vel unnin störf og þegar fjöldi undirmanna er yfir 35 manns.“
Nánar má lesa um málið í 2. tölublaði Vikunnar sem kom út í dag 11. janúar.
Fyrsta ástin er flókið fyrirbæri sem engu að síður er svo freistandi að fanga á hvíta tjaldinu.
Hér eru nokkrar ljúfsárar og yndislegar myndir um fyrstu ástina.
Algjörar andstæður
Í Spectacular Now (sbr. mynd hér að ofan) er sagt frá Sutter Keely sem lifir í núinu og er ekkert mikið fyrir það að gera plön fyrir framtíðina. Hann er á síðasta ári í framhaldsskóla, heillandi og vinamargur, miðdepill athyglinnar í veislum, elskar að vinna í fatabúðinni og svo framvegis – en hann er líka efnilegur alkóhólisti og vískíflaskan er aldrei langt undan. Eftir að kærastan segir honum upp fer hann á fyllerí og vaknar í ókunnugum garði þar sem Aimee Finecky stendur yfir honum. Hún er öðruvísi en þær stelpur sem hann á að venjast, sannkölluð „góð stelpa“ sem leggur sig fram í skóla, á sér drauma um framtíðina og hefur aldrei átt kærasta. Þrátt fyrir að vera svona ólík ná þau merkilega vel saman og hafa áhrif hvort á annað, bæði góð og slæm.
Oliver ákveður að hann ætli að verða besti kærasti í heimi til að tryggja að Jordana haldi áfram að vera hrifin af honum.
Skeleggur strákur
Skondna kvikmyndin Submarine segir frá hinum 15 ára gamla Oliver Tate en hann á sér tvö meginmarkmið: að missa sveindóminn fyrir næsta afmælisdag og rústa sambandi móður sinnar við elskhuga sinn. Oliver er bráðþroska ungur strákur og rembist við að auka vinsældir sínar í skólanum. Einn góðan veðurdag verður hin dökkhærða fegurðardís, Jordana, skotin í honum og hann ákveður að hann ætli að verða besti kærasti í heimi til að tryggja að hún haldi áfram að vera hrifin af honum. Á sama tíma er hjónaband foreldra hans í molum og ekki bætir úr skák þegar fyrrum kærasti móður hans flytur inn í húsið við hliðina. Oliver leggur á ráðin um það hvernig hann geti látið foreldra sína vera áfram saman. Lúmskt skemmtileg bresk kvikmynd þar sem hinn ungi leikari Craig Roberts ber af.
Cada og Thomas sem er yfir sig ástfanginn af henni.
Sorgleg en falleg
Það er ekki hægt að fjalla um fyrstu ástina og þroskasögur án þess að tala um My Girl. Þar kynnumst við Vödu Sultenfuss sem er heltekin af dauðanum. Móðir hennar er látin og faðir hennar rekur útfararstofu. Hún heldur að hún sé ástfangin af enskukennaranum sínum og skráir sig meira að segja í ljóðanámskeið til að ganga í augun á honum. Besti vinur hennar, Thomas J., er algjör ofnæmispési. Hann er yfir sig ástfanginn af Vödu og tilbúinn til að gera hvað sem er fyrir hana. Vada reiðist þegar faðir hennar ræður förðunarfræðing á útfararstofuna og hrífst af henni. Hún gerir allt hvað hún getur til að skemma fyrir þeim. Eins og flestir vita er endir myndarinnar mjög sorglegur og það er nauðsynlegt að vera með tissjúkassa við höndina þegar maður horfir á þessa.
Oskar kynnist Eli sem er heldur betur sérstök stúlka.
Flókin ást
Það er nógu erfitt og flókið að verða skotinn í fyrsta skiptið þó manneskjan sem maður er skotinn í sé ekki vampýra í þokkabót. Í sænsku myndinni Låt den rätte komma in kynnumst við Oskari, 12 ára gömlum strák í Stokkhólmi sem er lagður í einelti í skólanum og foreldrar hans láta hann alveg afskiptan. Líf hans breytist þegar hann kynnist Eli sem er heldur betur sérstök stúlka. Hún þolir illa sólskinið, fúlsar við flestum mat og svo þarf að bjóða henni sérstaklega inn í herbergi. Hann fellur engu að síður fyrir henni og hún gefur honum styrk til að standa með sjálfum sér. En þegar hann uppgötvar að hún þarf að drekka mannablóð til að lifa neyðist hann til að hugsa sinn gang upp á nýtt.
Moonrise Kingdom fjallar um samband 12 ára stráks, Sam, og stelpu, Suzy, sem hafa verið pennavinir í eitt ár.
Sannkallað ævintýri
Á eyjunni New Penzance búa aðeins örfáar hræður auk þess sem þar eru reknar sumarbúðir. Myndin Moonrise Kingdom fjallar um samband 12 ára stráks, Sam, og stelpu, Suzy, sem hafa verið pennavinir í eitt ár. Þau verða ástfangin í gegnum bréfaskriftirnar og gera með sér leynilegt samkomulag um að flýja saman út í óbyggðirnar. Suzy býr á eyjunni með fjölskyldu sinni en Sam kemur árlega í Ivanhoe-sumarbúðirnar. Á meðan yfirvöld og hinar ýmsu stofnanir leita þeirra sækir skuggalegur stormur í sig veðrið þannig að á endanum er hið sallarólega samfélag litlu eyjunnar komið á annan endann.
Á Suðurlandi eru margir stórbrotnir staðir sem vert er að heimsækja við réttar aðstæður.
Þar er hvergi meiri fjölbreytni í náttúrufari á Íslandi eins og jöklar, eldfjöll, eldfjallaeyjar, háhitasvæði, jökulár, svartar sjávarstrendur, víðáttumikil undirlendi, mýrar og stöðuvötn af öllum stærðum og gerðum. Það er því óhætt að mæla með ósnortnu hálendi Suðurlands við áhugasama ferðalanga.
Lakagígar eru, hvernig sem á þá er litið, ein stórfelldasta furðusmíð í náttúru landsins. Mynd / www.commons.wikimedia.org
Lakagígar gusu árið 1783 hinu mesta hraungosi er sögur fara af á jörðinni. Þeir voru þá kallaðir Skaftáreldar og er gígaröðin 25 kílómetrar að lengd og endar við Vatnajökul. Alls eru gígaopin talin vera um 100. Gígarnir eru af margvíslegri gerð og lögun. Sumir eru kringlóttir, aðrir aflangir og stundum meira eða minna brotnir. Í barmi flestra þeirra er skarð sem hraunið hefur runnið út úr.
Flestir þeirra eru að miklu leyti þaktir þykkri breiðu af grámosa og hinir fegurstu tilsýndar. Ganga ber um þá með gætni því að mosinn er afar viðkvæmur. Lakagígar eru, hvernig sem á þá er litið, ein stórfelldasta furðusmíð í náttúru landsins en þeir voru friðlýstir árið 1971.
Fjaðrárgljúfur Hið 100 metra djúpa og tveggja kílómetra langa Fjaðrárgljúfur er bæði stórbrotið og hrikalegt. Gljúfrið er veggbratt, hlykkjótt og þröngt. Berggrunnurinn í Fjaðrárgljúfri er að mestu móberg frá kuldaskeiðum ísaldar og telst um tveggja milljóna ára gamalt. Fjaðrá á upptök sín í Geirlandshrauni og fellur fram af heiðarbrúninni í þessu mikilfenglega gljúfri þar til hún skilar sér niður í Skaftá. Fjaðrá er bergvatnsá og ljóst er að hún hefur breyst mikið í tímans rás. Í dag er Fjaðrá oftast frekar vatnslítil og því geta göngumenn hæglega kosið að ganga inn gljúfrið en þá þarf að vaða ána alloft. Innst í gljúfrinu eru fossar svo ganga þarf sömu leið til baka. Flestir velja að ganga eftir göngustíg uppi á gljúfurbarminum og njóta um leið útsýnisins yfir gljúfrið. Fjaðrárgljúfur er á náttúruminjaskrá og öðlaðist heimsfrægð eftir að söngvarinn Justin Bieber tók upp myndband sitt I´ll Show You í gljúfrinu.
Raufarhólshellir Einn af lengstu hellum Íslands nefnist Raufarhólshellir og er staðsettur við Þrengslaveg. Hellirinn er yfir 1.300 metra langur og myndaðist í Leitarhraunsgosi í Bláfjöllum fyrir um 5.200 árum. Vinsælt er að nota hellinn í kvikmyndum og til að mynda var hluti úr kvikmyndinni Noah (2014) tekinn upp þar. Daglegar ferðir eru í boði í hellinn.
Jökladýrð Hluta af hinni kraftmiklu móður jörð er að finna í hinum hættulegu jöklum landsins. Flesta jökla landsins er að finna á Suðurlandi og vert að hafa í huga að mestu máli skiptir að setja í forgang viðeigandi búnað og skipulagningu ef ferðast á yfir jökul. Eitt megineinkenni jökla er að þeir hreyfast. Í jöklunum eru margar virkar eldstöðvar en eldgos og jarðhiti bræða ís og geta valdið jökulhlaupi. Um þriðjungur þess vatns sem fellur til sjávar á Íslandi er jökulvatn. Aðgengi að íslenskum jöklum er nokkuð mismunandi en þó er mögulegt að komast að flestum þeirra. Ferð upp á jökul getur verið ógleymanlegt ævintýri en þó ber að hafa í huga að þeir geta verið stórhættulegir og því nauðsynlegt að vera í fylgd reyndra jöklaleiðsögumanna. Nokkur fyrirtæki sjá um skipulagðar jöklaferðir á Suðurlandi en hægt er að nálgast upplýsingar um þær á Netinu, í upplýsingamiðstöðvum ferðamála eða hjá starfsmönnum hótela. Vikan mælir eindregið með að ferðamenn hafi samband við ferðaskipuleggjendur og leiðsögumenn á svæðunum áður en lagt er af stað upp á jökul.
Systrastapi við Klaustur Árið 1186 var sett nunnuklaustur í Kirkjubæ á Síðu sem síðar var nefnt Kirkjubæjarklaustur. Örnefnin Systrastapi og Systrafoss eru einmitt tengd þeim tíma.
Mikilvægt er að leggja af stað vel undirbúinn.
Systrastapi er klettastapi vestan við Klaustur. Þjóðsaga segir að uppi á stapanum sé legstaður tveggja klaustursystra sem hafi verið brenndar á báli fyrir brot á siðareglum. Önnur hafði selt sig fjandanum, gengið með vígt brauð fyrir náðhúsdyr og lagst með karlmönnum. Hin hafði talað óguðlega um páfann. Eftir siðaskiptin var seinni nunnan talin saklaus og á leiði hennar óx fagur gróður en á leiði hinnar seku var gróðurlaust. Klifra má upp á stapann en þaðan er mikið útsýni með jöklasýn.
Systrafoss heitir fossinn þar sem Fossá fellur úr Systravatni fram af fjallsbrúninni fyrir ofan Kirkjubæjarklaustur, ofan í Fossárgil. Fallegar gönguleiðir eru í nágrenni fossins og greið gönguleið er upp á fjallsbrúnina að Systravatni en ofan af brúninni er stórbrotið útsýni.
Frá Hrífunesi yfir í Þjórsárdal Óhætt er að mæla með göngu frá Hrífunesi yfir í Þjórsárdal sem álitinn er af mörgum einn fegursti dalur landsins. Þjórsárdalur er staðsettur í Árnessýslu og liggur milli Búrfells og Skriðufells. Dalurinn skiptist í tvo dalbotna um Rauðukamba og Bergólfsstaðaá en hann er bæði sléttlendur og vikurborin eftir síendurtekin eldgos í Heklu. Talið er að Þjórsárdalur hafi verið fullbyggður á þjóðveldisöld en lagst í eyði á 17. öld. Merkustu staðir dalsins eru taldir vera Stöng, Háifoss, Þjóðveldisbærinn, Vegghamar og Gjáin.
Fagmennska var í hæsta gæðaflokki á Hátíðarkvöldverði Klúbbs matreiðslumanna 2018!
Selma Björnsdóttir hélt uppi fjörinu.
Óhætt er að segja að öllu hafi verið tjaldað til á Hátíðarkvöldverði Klúbbs matreiðslumanna, sem fór fram á Hilton Reykjavík Nordica síðastliðinn laugardag. Tekið var á móti gestum með freyðandi kampavíni og smáréttum en um 400 gestir sóttu veisluhöldin ásamt fjölda fagfólks sem útbjó matinn og þjónaði gestum.
Er Hátíðarkvöldverðurinn liður í fjáröflun félagsins og því unnu fagmenn, kokkar og matreiðslumenn, launalaust þetta kvöld. Klúbburinn notar svo ágóðan til að fjármagna ýmsa áhugaverða viðburði, svo sem keppnina Kokka ársins og fleira.
Góð stemning var á staðnum en það voru þau Erpur Eyvindarson og Selma Björnsdóttir sem héldu uppi fjörinu og skemmtu gestum sem nutu þess að borða gómsæta réttina sem voru reiddir fram hver á eftir öðrum.
Nánar í næsta tölublaði Gestgjafans, sem kemur út fimmtudaginn 18. janúar!
Myndir / Sigurjón Ragnar
Texti / Hanna Ingibjörg Arnarsdóttir
Viktoría Hermannsdóttir fer af stað með Málið er, vikulega útvarpsþætti á Rás 1
Viktoría Hermannsdóttir vakti mikla athygli fyrir útvarpsþáttaseríuna Ástandsbörnin sem hún gerði fyrir Rás 1 í fyrra og útvarpsþáttinn Á ég bróður sem var sjálfstætt framhald og var fluttur um jólin. Núna fer hún af stað með vikulega útvarpsþætti á Rás 1 sem bera heitið Málið er.
„Þetta er í raun mjög opið og ég ætla taka fyrir eitthvað sem mér finnst áhugavert hverju sinni. Þetta verður í heimildastíl og mikil vinna lögð í hvern þátt. Ég er algjör grúskari og elska góðar sögur þannig að það er skemmtilegt tækifæri fyrir mig að fá að fjalla um það sem mér finnst áhugavert á þessum skemmtilega vettvangi sem útvarpið er,“ segir Viktoría. Hún er umsjónarmaður þáttanna en hugmyndin er líka að aðrir dagskrárgerðarmenn geti tekið mál fyrir og kafað ofan í þau.
Í fyrsta þættinum ætlar Viktoría að kafa ofan í heim týndu barnanna á Íslandi.
„Ég fæ að fylgja eftir lögreglumanni sem hefur undanfarin ár verið vakinn og sofin yfir því að leita að þessum börnum. Þetta eru börn á aldrinum 11-18 ára sem oft er lýst eftir. Þetta er ekki mjög stór hópur en það hefur fjölgað í honum undanfarið og vandi margra er mikill. Ég skoða allar hliðar í þessum þætti – kynnist þessum heimi í gegnum lögreglumanninn sem lifir og hrærist í þessu, foreldra sem eiga barn sem tilheyrir þessum hópi og svo unga konu sem eitt sinn tilheyrði þessum hópi og veitir okkur innsýn í þennan heim sem er ekkert alltof fallegur,“ segir Viktoría.
Þættirnir verða á dagskrá kl. 16 alla föstudaga á Rás 1 og verða aðgengilegir á hlaðvarpinu líka.
Skautadrottningin fyrrverandi Tonya Harding stendur uppi í hárinu á Piers Morgan.
Tonya Harding svaraði fyrir sig þegar Piers Morgan spjallaði við hana í þættinum Good Morning Britain. Kvikmynd um ævi Tonyu hefur farið sigurför um heiminn. Mynd / www.commons.wikipedia.org
Kvikmyndin I, Tonya, með Margot Robbie í hlutverk fyrrum ólympufara í listhlaupi á skautum, Tonyu Harding hefur farið sigurför um heiminn. Tonya var í viðtali gegnum gervihnött við Piers Morgan í Good Morning Britain þegar hann gaf í skyn að hún hefði ekki verið alsaklaust fórnarlamb þegar sá fáheyrði atburður átti sér stað að ofbeldismaður á launum hjá fyrrum eiginmanni Tonyu barði helsta keppinaut hennar í hnéð með hafnaboltakylfu. Skautadrottningin fyrrverandi svaraði hvasst fyrir sig.
Morgan gekk hart fram í spurningum sínum um árásina sem átti sér stað árið 1994. Báðar voru skautakonurnar á leið á ólympíuleika en Tonya hafði alla tíð mátt þola að fá lægri einkunnir fyrir frammistöðu sína á ísnum en Nancy. Í myndinni kemur fram að þetta hafi verið vegna þess að dómurum fannst Tonya ekki þess verð að vera fulltrúi Bandaríkjanna á alþjóðavettvangi. Stúlkurnar voru báðar frá fátækum heimilum en fjölskylda Tonyu ansi skrautleg meðan meiri reglusemi og festa ríkti í kringum Nancy.
Morgan er þekktur fyrir að vera óvæginn og nokkuð dómharður um menn og málefni. Hann spurði hana ítrekað um meint ofbeldi móður hennar og fyrrum eiginmanns gagnvart henni og sagði svo: „Kannski hentar þér að leika fórnarlamb. En ég held að þú hafir ekki verið fórnarlambið í þessu öll. Það var Nancy Kerrigan en draumur hennar um ólympíugull var gerður að engu.“
„Þakka þér kærlega fyrir en ég held ég verði að segja góða nótt,“ var svar skautadrottningarinnar og hún átti bágt með að leyna reiði sinni.
Þeir sem hafa séð myndina geta líklega ekki annað en dáðst að stillingu hennar því á sinni tíð var hún þekkt fyrir flest annað en yfirvegun. Hún svaraði þó nokkrum spurningum í viðbót en viðtalinu lauk með því að hún fullyrti að hún hefði ekkert vitað um ráðagerðir fyrrum manns síns og félaga hans. Hún benti einnig á að þolendur ofbeldis hafa sjaldan kraft til að standa með sjálfum sér eða setja sig upp á móti kúgurum sínum. Þess má einnig geta að á Golden Globe verðlaunahátíðinni hampaði Allison Janney gullnum hnetti fyrir túlkun sína á móður Tonyu Harding í myndinni.
Það er ekkert sjálfsagt að fjölskyldum lyndi vel saman eins og sjá má í The Glass Castle og fleiri kvikmyndum.
Erfið ævi
Í The Glass Castle (sjá mynd hér að ofan) kynnumst við Jeannette Walls sem fæddist 1960 og ólst upp ásamt þremur systkinum í mikilli fátækt, óreiðu og afskiptaleysi. Faðir þeirra var drykkfelldur draumóramaður sem hélst hvergi í vinnu og móðirin sagðist vera listakona þótt hún skapaði aldrei neitt af viti og virtist oft hvorki vita í þennan heim né annan. Fjölskyldan festi hvergi rætur, flutti eða flúði stöðugt frá einum stað til annars þannig að hvorki Jeannette né systkini hennar gengu í skóla á uppvaxtarárunum. Þetta uppeldi gerði það þó að verkum að þau lærðu fljótt að standa á eigin fótum og flúðu foreldra sína um leið og þau gátu. Það er þangað til foreldrarnir daga uppi sem hústökufólk í New York. Áhugaverð mynd með hinni hæfileikaríku Brie Larson en handritið er byggt á sjálfævisögu Jeanette Walls sjálfrar.
Þessi skrautlegi hópur leggur af stað í ferðalag á heiðgulri rútu til að koma yngsta barninu í fegurðarsamkeppni.
Sólskinsferðin
Allir fjölskyldumeðlimirnir í Little Miss Sunshine eiga það sameiginlegt að taka sjálfa sig aðeins of alvarlega. Fjölskyldan samanstendur af keðjureykjandi móður, nær gjaldþrota fjölskylduföður, samkynhneigðum frænda sem er að jafna sig eftir sjálfsmorðstilraun, þunglyndum táningi og afa sem reynist vera heróínsjúklingur. Þessi skrautlegi hópur leggur af stað í ferðalag á heiðgulri rútu til að koma yngsta barninu í fegurðarsamkeppni og að sjálfsögðu fer allt í bál og brand á leiðinni.
Fjölskyldan í The Royal Tenenbaums er skemmtilega öðruvísi.
Furðufuglar
Persónur í kvikmyndum Wes Andersons eiga alltaf í dálítið furðulegum samskiptum og það á sannarlega við um fjölskylduna í The Royal Tenenbaums. Fjölskyldufaðirinn, Royal, hefur hvorki reynst góður faðir né góður eiginmaður. Þegar hann er loksins búinn að glopra öllu frá sér reynir hann að komast aftur í mjúkinn hjá fjölskyldu sinni, fyrrum eiginkonu og þremur börnum. Í stað þess að biðjast afsökunnar eins og maður þykist hann hins vegar vera með banvænan sjúkdóm og höfðar til samvisku þeirra. Þetta verður óvænt til þess að draga saman alla fjölskylduna – en alls ekki hrakfallalaust.
The Squid and the Whale fjallar um áhrif skilnaðar á fjölskyldu.
Skilnaður og brestir
Myndin The Squid and the Whale fjallar um áhrif skilnaðar á fjölskyldu. Bernard Berkman er hrokafullur rithöfundur sem var eitt sinn mikils metinn en ferill hans hefur smám saman orðið að engu. Hann starfar sem háskólakennari og verður afar ósáttur þegar ótrú eiginkona hans, Joan, fær ritverk sín útgefin og mjög góðar viðtökur. Þau ákveða þau að skilja og tilkynna það tveimur sonum sínum, Walt sem er sextán ára og Frank sem er tólf. Drengirnir skiptast á að dvelja hjá foreldrum sínum og fljótlega fara þeir að skipa sér í lið með hvoru þeirra fyrir sig. Þessi togstreita hefur gríðarleg áhrif á strákana en foreldrarnir virðast bara hugsa um sjálfa sig.
Blaðamaður og ljósmyndari Húsa og híbýla heimsóttu fallegt hús við Hverfisgötu í Reykjavík.
Í þessu reisulega húsi var hér áður fyrr starfrækt kaupfélag. Íbúðin er á annarri hæð og það er bæði hægt að taka stigann upp eða gamla, græna og mjög svo sjarmerandi lyftu sem okkur skilst að sé ein elsta lyfta landsins. Sólveig Andrea innanhússarkitekt tók að sér að hanna þessa feiknaflottu íbúð í hjarta Reykjavíkur þar sem iðandi mannlífið er beint fyrir neðan gluggana, Sólveig tók á móti tvíeykinu frá blaðinu, ásamt smekkdömunni sem þarna býr ásamt eiginmanni sínum og dóttur.
Hjónin keyptu íbúðina vorið 2016 eftir að hafa haft augastað á henni í nokkurn tíma. Þau ákváðu strax að taka hana alla í gegn og fluttu svo inn rúmu ári seinna. Það er hátt til lofts og fallegir stórir gluggar setja sterkan svip á rýmið sem er allt nýuppgert. Það fer ekki á milli mála að þarna búa fagurkerar sem hafa nef fyrir fallegri hönnun því íbúðin er öll ofboðslega smekkleg, stíllinn er töff en samt hlýlegur og örlítið rómantískur. Hlýlegt parket, kristalsljósakrónur, mildir brúnir tónar hér og þar, mottur, málverk og íburðamikil og klassísk húsgögn.
Íbúðin er öll ofboðslega smekkleg, stíllinn er töff en samt hlýlegur og örlítið rómantískur.
En hvað var það sem eigendurnir voru að sækjast eftir, voru ákveðnar hugmyndir eða kröfur frá þeim?
„Já, þeir voru að sækjast eftir þessum svokallaða loft-íbúða tilfinningu; rýmið opið, loftin frekar hrá og ófrágengnir veggirnir, það er að segja ekki pússaðir og spartslaðir. Það var samt ákveðið að mála alla veggina, líka þessa hráu og halda hráleikanum í loftunum og upprunalegu útliti gluggana. Gluggakistan í eldhúsrýminu var svona djúp og þau vildu halda henni þannig enda mjög flott svona djúp og mikil. Eigendurnir vildu í rauninni halda í allt það sem gerði íbúðina að iðnaðarhúsnæði,“ segir Sólveig og labbar með okkur um íbúðina.
Arkitektinn gæti vel hugsað sér að búa þarna
Ertu ánægð með útkomuna á þessari íbúð við Hverfisgötuna?
„Já, alveg svakalega, líka af því húsráðendur eru svo rosalega smekklegir. Það var svo gaman að koma þegar allt var tilbúð og þau flutt inn og sjá útkomuna því það er allt svo smekklegt hjá þeim. Þau voru mjög opin fyrir mínum hugmyndum og höfðu skoðanir og áhuga á öllu sem þurfti að gera og ákveða í ferlinu. Við útfærðum margt í sameiningu og annað kom alfarið frá þeim eins og til dæmis brúni liturinn sem er á nokkrum veggjum, hann er frá Slippfélaginu.“
Það er hátt til lofts og fallegir stórir gluggar setja sterkan svip á rýmið sem er allt nýuppgert.
Við spyrjum við Sólveigu hvort hún sjálf gæti hugsað sér að búa í þessari íbúð? „Já, ekki spurning. Kannski ekki með þrjú börn en ég væri til í það þegar börnin eru farin að heiman. Staðsetningin er ekki mjög barnvæn en þetta er æðislegt ef maður er barnalaus eða með uppkomin börn,“ svarar hún brosandi og við kveðjum þessar smekkkonur og gamla sjarmahúsið við Hverfisgötuna.
Þórdísi Elvu finnst þessi yfirlýsing vera dæmigerð afstaða þeirra sem eru mótfallnir framförum.
Rúmlega 100 franskar konur ásaka forsprakka byltingarinnar undir myllumerkinu #metoo um nornaveiðar. Catherine Deneuve er ein þeirra kvenna sem skrifað hafa opið bréf þar sem þær gagnrýna baráttuna gegn kynferðislegri áreitni og segja hana ógn gegn kynferðislegu frelsi. Í yfirlýsingunni kemur fram að konur sem ekki taki þátt í byltingunni eigi yfir höfði sér ásakanir um svik gegn kynsystrum sínum.
Þær segja karlmönnum hafa verið vikið úr störfum fyrir sakleysislegar snertingar og einstaka kossa. Það brjóti ekki gegn sæmd kvenna að snerta líkama þeirra og gerir þær síður en svo að fórnarlömbum.
Catherine Deneuve er ein þekktasta leikkona frakka en hún hefur meðal annars skapað sér miklar óvinsældir eftir opinbera yfirlýsingu þess lútandi að standa með leikstjóranum Roman Polanski sem sakaður var um nauðgun á ungri stúlku. Þá var haft eftir Deneuve að nauðgun sé ofmetin.
Þórdís Elva Þorvaldsdóttir er ein þeirra sem farið hefur fremst í flokki baráttunnar á Íslandi segir yfirlýsinguna dæma sig sjálfa. „Hér er verið að fordæma konur fyrir að standa á rétti sínum að verða ekki fyrir áreitni eða ofbeldi. Til að gera lítið úr þeim eru notuð dæmi eins og „hendi á hné“, „þvingaður koss“ og „kynferðisleg skilaboð“ sem konum eru send, svo sem typpamyndir. Í nútímanum eru þetta ótvíræð dæmi um kynferðislega áreitni. Þegar Catherine Deneuve var ung þótti ýmislegt sem ógnar lýðheilsu ekki vera sérstakt tiltökumál, eins og að reykja í flugvélum og sleppa bílbeltanotkun. Sem betur fer hafa viðmiðin breyst og kröfurnar aukist.
Mér finnst þessi yfirlýsing vera dæmigerð afstaða þeirra sem eru mótfallnir framförum, því fyrr á tímum tíðkaðist verra atlæti. Í stað þess að horfa með nostalgíu til fortíðar, þar sem mannréttindi voru fótum troðin í öllum flokkum, hvort sem um er að ræða mannréttindi kvenna, þeldökkra, samkynhneigðra eða transfólks svo dæmi séu nefnd ættum við að vera stolt af þeim árangri sem náðst hefur. Viðtökurnar við #metoo sýna að á heimsvísu erum við langflest stolt af þessari þörfu byltingu. Ég spái því að Catherine Deneuve og hennar skoðanasystkin verði notuð sem dæmi í sögubókum framtíðarinnar um fólk sem andmælti framförunum, á sama hátt og þeir sem andmæltu mannréttindasigrum annarra minnihlutahópa.”
Hlaupaárið 2018 fer af stað með krafti og mörg skemmtileg keppnishlaup framundan. Hlaupasería FH og BOSE inniheldur þrenn fimm kílómetra hlaup og stigakeppni einstaklinga. Hlaupunum er startað á göngustígnum gegnt íþróttahúsinu á Strandgötu í Hafnarfirði stundvíslega klukkan 19 fimmtudagana 25. janúar, 22. febrúar og 22. mars.
Hörður Jóhann Halldórsson, formaður Hlaupahóps FH, á von á mikilli stemningu í Hlaupaseríu FH og BOSE í vetur.
„Þetta er í áttunda árið sem að hlaupaserían er haldin. Þær breytingar urðu í ár að samið var við Origo og samhliða ákveðið að nefna seríuna Hlaupaseríu FH og BOSE,“ segir Hörður Jóhann Halldórsson formaður Hlaupahóps FH. „Hlaupaleiðin er mæld af löggildum mælingamönnum, brautin nokkuð flöt og því ákjósanleg til bætinga. Besta tíma konu í brautinni á Arndís Ýr Hafþórsdóttir, 17:52 og besta tíma karls í brautinni á Kári Steinn Karlsson, 15:03. Þau sem oftast hafa unnið hlaup í seríunni eru Arnar Pétursson sem hefur unnið fimm sinnum og Arndís Ýr Hafþórsdóttir, níu sinnum, en alls hafa 22 hlaup verið haldin síðan 2011. Reikna má með fjölmörgum hlaupurum í ár og mikilli stemningu þar sem DJ mun koma hlaupurum í gírinn við upphaf og endi hlaups. Undan- og eftirfarar verða á hjólum, öflug brautargæsla og hraðastjórar í 20, 25 og 30 mínútum nýtast sem ákveðin tímaviðmið í hlaupinu, sem ætti að hjálpa hlaupurum að ná markmiðum sínum hafi þeir ákveðið að klára hlaupið innan ákveðins tíma.“
Skráning í hlaupin fer fram á hlaup.is.
Texti / Ragnhildur Aðalsteinsdóttir
Arnar Pálsson flugvirki segir frá áhugaverðum stöðum í Delitzsch í Þýskalandi.
Arnar Pálsson hefur búið ásamt konu sinni Maríu og hluta af börnum þeirra í Delitzsch í nokkur ár.
„Ég kynntist Maríu í Yakutsk í Síberíu og þar giftum við okkur. Við eigum saman tvö börn. Fyrir átti María einn son og ég átti tvær dætur og einn son. Við búum fimm saman hér í Delitzsch en börnin mín þrjú búa hjá mömmu sinni í Reykjavík.
María flutti fyrst til Íslands og við bjuggum saman í Keflavík í tæplega sex ár. Fyrir fjórum árum fékk ég einfaldlega nóg af ástandinu heima og fann vinnu á flugvellinum í Leipzig. Fyrstu tvö árin flaug ég á milli, vann í 14 daga og átti 14 daga frí á milli. Þar sem tækifærið var komið fór ég að undirbúa að flytja fjölskylduna með mér til Þýskalands og í ágúst í hittiðfyrra fluttum við út. Við keyptum okkur hús í júní á síðasta ári og líkar vel hérna. Það er svo miklu auðveldara að lifa hér en á Íslandi. Verðlag, úrval og gæði matvöru eru ekkert í líkingu við það sem er á Íslandi. Heilbrigðiskerfið virkar mjög vel og aldrei þurfum við að taka upp veskið þegar við hittum lækna. Lánavextir hér eru ekkert í líkingu við það sem þú sérð á Íslandi,“ segir Arnar.
„Það er svo miklu auðveldara að lifa hér en á Íslandi. Verðlag, úrval og gæði matvöru eru ekkert í líkingu við það sem er á Íslandi.“
„Delitzsch er mjög þægilegur bær að búa í en íbúar eru tæplega 20.000 talsins. Við búum í útjaðrinum svo það er ofsalega rólegt kringum húsið okkar og mjög öruggt fyrir börnin að leika úti. Delitzsch er mitt á milli Leipzig og Halle og tekur ekki nema um 20 mínútur að keyra þangað ef okkur vantar eitthvað á öðrum hvorum staðnum.
Minnivarðinn The Monument to the Battle of the Nations í Leipzig.
Hér eru margir áhugaverðir staðir. Delitzsch-kastali (sjá mynd hér að ofan) og garðurinn þar í kringum er virkilega flottur.
Hér er Porsche-verksmiðja þar sem hægt er að prófa bíla og skoða safn og hér er líka BMW-verksmiðja.
Miðborg Leipzig er heillandi og skemmtileg og ég hvet fólk til að ganga þar um og skoða. Gröf Johannesar Sebastians Bach er í Thomas-kirkju, hæsta minnismerki Evrópu er á staðnum en það var reist til minningar um fyrsta sigurinn gegn Napóleon árið 1813 og er kallað The Monument to the Battle of the Nations.“
Spennandi fjallgöngunámskeið með Vilborgu Örnu í janúar.
Vilborg Arna Gissurardóttir og félagar bjóða upp á skemmtilegt fjallgöngunámskeið í vetur.
Vilborg Arna Gissurardóttir slær sjaldan slöku við og fer nú í janúar af stað með gönguhóp ásamt Ingu Dagmar Karlsdóttur og Tomaszi Þór Verusyni þar sem boðið er upp á göngudagskrá fram á vor. Fjallgöngurnar er tvær til þrjár í mánuði, stigvaxandi í takt við hækkandi sól og aukið þrek, og á endanum verður farið á Hvannadalshnjúk ef aðstæður og veður leyfir.
„Fjallgöngur eru ein besta líkamsræktin sem hægt er að stunda og eru þekktar fyrir að hafa jákvæð áhrif á líkama, streitu og huga. Við byrjum á minni fjöllum og bætum smá saman í hæðarmetrana með hækkandi sól. Ein þekktasta aukaverkunin af fjallgöngunum hafa verið nýir félagar og fleiri áskoranir svo við hvetjum alla áhugasama til þess að vera með,“ segir Vilborg Arna.
Þátttakendur þurfa að eiga Esjubrodda og ljós auk þess að vera viðbúin að leigja viðeigandi búnað fyrir jöklaferðirnar þannig að það má búast við spennandi ævintýrum með þessum flottu fjallagörpum.
Lýsing skiptir sköpum inni á heimili. Það má skipta lýsingu í þrjá flokka: umlykjandi lýsingu, sem veitir almenna birtu, áherslulýsingu, sem vekur athygli á ákveðnum stað eða mun á heimilinu, og að lokum vinnulýsingu, sem gefur manni næga birtu til að klára ákveðin verk. Síðan er hægt að nota ýmsar ólíkar gerðir ljósgjafa til að ná fram þeirri lýsingu sem maður vill.
Sniðugt er að hafa dimmera á loftljósum til að geta stýrt birtustiginu og stemningunni í rýminu.
Loftljós flokkast nær alltaf undir umlykjandi lýsingu. Sniðugt er að hafa dimmera á þessum ljósum til að geta stýrt birtustiginu og stemningunni í rýminu.
Loftljós eru ýmist ljósakrónur sem hanga niður úr loftinu eða kúplar sem liggja þétt upp við það.
Krónur setja meiri svip á herbergið og því skiptir sköpum að velja einhverja sem passar vel við stíl þess en kúplar dreifa birtu meira yfir allt herbergið án þess að vera fyrir.
Veggljós hafa verið mjög vanmetin undanfarin ár en svo virðist sem vinsældir þeirra séu að aukast.
Veggljós geta bæði flokkast sem umlykjandi en einnig áherslulýsing, til dæmis þegar þau eru staðsett sitthvorum megin við fallegt málverk.
Veggljós eru handhæg leið til að stýra birtunni, það að hafa aðeins kveikt á þeim en ekki loftljósi gefur dramatíska eða rómantíska lýsingu.
Gólflampar eru annað dæmi um vanmetna lýsingu. Þeir geta nefnilega þjónað öllum þremur hlutverkum lýsingar. Ótrúlega margar gerðir eru til, sumar lýsa upp og aðrar niður, sumar eru hönnunarmunir á meðan aðrar setja notagildið á oddinn. Eitt er víst að það geta allir bætt einum gólflampa við inn í stofu hjá sér.
Borðlampa má bæði nota sem áherslu- og vinnulýsingu. Glæsilegur lampi á hliðarborði getur sett punktinn yfir i-ið í stíliseringu herbergis en einnig getur hann komið að góðu gagni við lestur bóka. Eins koma borðlampar að góðum notum í skrifstofurými þar sem þörf er á mikilli birtu.
Góðan borðlampa er hægt að nota sem vinnulýsingu – og ekki skemmir fyrir ef hann er fallega hannaður.
Hér er uppskrift að ljúffengri döðluköku. Ávextirnir sem hér eru flokkast undir ofurfæðu og eru bara tillaga. Þið getið auðvitað notað þá ávexti sem ykkur finnast bestir.
Döðlukaka með ávöxtum.
Döðlukaka með ávöxtum
fyrir 8 Botn:
500 g þurrkaðar döðlur
3 dl vatn
½ dl kókosolía, mýkt í vatnsbaði
1 stór, þroskaður banani eða 2 litlir
2 msk. hunang eða agave-síróp
1 ½ dl tröllhafrar
Ofan á:
2 kíví, skræld og skorin í bita
1 dl bláber
100 g jarðarber, skorin í tvennt
kjarnar úr ½ granatepli
100 g 70% súkkulaði, gróft saxað
50 g ristaðar valhnetur eða pekanhnetur, gróft saxaðar, eða grófar, ristaðar kókosflögur
Sjóðið döðlur í vatni í 10 mín. Látið standa í 15 mín. og sigtið svo vatnið frá. Setjið döðlurnar í matvinnsluvél og maukið vel ásamt kókosolíu, banana, sætuefni og tröllhöfrum. Setjið maukið í form sem er u.þ.b. 20×30 cm, kælið. Raðið ávöxtum, súkkulaði og hnetum eða kókosflögum ofan á og berið fram með þeyttum rjóma.
Trefjaríkir hafrar eru jafnvel enn hollari en áður hefur verið talið og sýna nýjar rannsóknir að þeir minnka ekki bara líkurnar á hjartasjúkdómum heldur einnig tegund 2 sykursýki.
Litið var á fyrirsætur fyrri áratuga sem persónuleikalaus herðatré og fjölbreytnin var eftir því. Vissulega sáum við fyrirsætur á tíunda áratugnum neita að klæðast feldi vegna dýraverndunarsamtakanna PETA en þá voru það ofurfyrirsætur á borð við Naomi Campbell og Cindy Crawford sem höfðu þá þegar skapað sér nafn innan bransans og höfðu efni á því að tjá sig.
Með vinsældum samfélagsmiðla hefur hópur fyrirsæta og aktívista notað rödd sína og andlit til þess að vekja athygli á mikilvægum málefnum og uppskera frekar frægð og frama fyrir vikið en skammir. Skoðum nokkrar ungar og áhugaverðar konur sem eru hægt og bítandi að breyta heiminum.
Ebonee Davis hefur rætt rasisma í tískubransanum.
Ebonee Davis
Ebonee Davis vakti mikla athygli þegar hún skrifaði áhrifaríkt opið bréf stílað á tískubransann. Spurningar eins og hvaða áhrif fjölmiðlar hafi á menningu okkar og hvort tískuheimurinn geti hætt að vera rasískur voru henni efstar í huga. Eins og þekkt er hafa fyrirsætur af afrískum uppruna átt erfiðar uppdráttar og enn í dag eru svartar fyrirsætur minna en 10% þeirra sem ganga niður tískusýningarpallana. Ebonee segist hafa fengið að heyra að fyrirtæki bókuðu bara svartar fyrirsætur ef þær litu út fyrir að koma beint frá afskekktu þorpi í Afríku eða eins og hvítar konur dýft í súkkulaði. Hún segist hafa reynt að fara eftir þeim ráðleggingum frá byrjun ferilsins árið 2011. Það var ekki fyrr en hún ákvað að leyfa náttúrulegu hári sínu að njóta sín og hún opnaði munninn og krafðist réttlætis að ferill hennar fór á flug. Náttúruleg fegurð hennar landaði henni meðal annars haustherferð Calvin Klein árið 2016.
Fjölbreytni í tískuheiminum, femínismi og fíkn eru Adwou Aboah hugleikin.
Adwoa Aboah
Adwoa er stofnandi Gurls Talk, sem er vefmiðill sem einbeitir sér að málefnum kvenna og hvetur ungar konur til að tjá sig án þess að vera dæmdar eða mismunað. Hún talar reglulega hreinskilningslega um fjölbreytni í tískuheiminum, femínisma, andlega heilsu og fíkn.
Cameron Russel hefur m.a. verið dugleg að ræða félagsleg og pólitísk málefni, loftlagsbreytingar og hreina orku.
Cameron Russel
Horft hefur verið á Ted-fyrirlestur ofurfyrirsætunnar Cameron Russel rúmlega nítján milljón sinnum þegar þetta er skrifað. Cameron útskrifaðist úr hagfræði og stjórnmálafræði frá Colombia-háskóla og hefur heldur betur gert meira en að sitja fyrir og vera sæt síðan hún útskrifaðist. Hún hefur verið dugleg að ræða félagsleg og pólitísk málefni, loftlagsbreytingar, hreina orku og sanngjörn laun fyrir þá sem vinna í tískuiðnaðinum, til að nefna örfá dæmi.
Markmið Avery McCall er að safna fjármunum til að vinna með flóttamönnum.
Avery McCall
Avery hefur verið virkur þátttakandi í stjórnmálum frá tólf ára aldri og meðal annars verið unglingaráðgjafi fyrir herferð Sameinuðu þjóðanna, Foundation’s Girl Up. Hún varði menntaskólaárunum sem talsmaður flóttamanna og aðstoðaði þá sem fluttust frá stríðshrjáðu Sýrlandi, Suður-Súdan og frá lýðveldinu Kongó. Hún hefur notað andlit sitt til góðs innan tískuheimsins til að vekja athygli á mikilvægum málefnum. Hennar markmið er að safna fjármunum til að vinna með flóttamönnum og draumurinn er að geta leiðbeint börnum sem flýja frá stríðshrjáðum löndum.
Andreja Pejic hefur varpað ljósi á málefni transfólks innan tískuheimsins.
Andreja Pejic
Andreja hefur verið kölluð fyrsta transsúpermódelið. Andrej var fæddur í fyrrum Júgóslavíu en alinn upp í Melbourne í Ástralíu. Áður en hann fór í kynleiðréttingu árið 2013 var hann þegar þekkt fyrirsæta innan tískuheimsins og vakti útlit hans víða athygli, enda átti hann auðvelt með að fara í hlutverk beggja kynja. Síðustu árin hefur ferill Andreju blómstrað og hún meðal annars setið fyrir á forsíðum tímarita á borð við Elle, L’Officiel, Fashion og GQ. Árið 2015 varð hún fyrsta transfyrirsætan til þess að vera andlit snyrtivörufyrirtækis en hún landaði stórum samningi við Make Up For Ever. Andreja hefur varpað ljósi á málefni transfólks og opnað dyr fyrir fjölbreyttari hóp innan tískuheimsins.
Charli Howard og Clémentine Desseaux
Líkamsímynd hefur verið mikið tískuorð upp á síðkastið í bransanum og sem betur fer eru sífellt fleiri týpur sem ná árangri í tískuheiminum í dag. Þær Charli Howard og Clémentine Desseaux vöktu heimsathygli fyrir verkefni sitt All Woman Project sem er myndasería, sem hefur ekki verið átt við í Photoshop, af konum af öllum stærðum, gerðum, litum og aldri sem sanna það að fegurð kemur ekki í einni staðlaðri stærð.
Hér er uppskrift að ekta fiskisúpu í anda Miðjarðarhafsins.
4 msk. olía
1 laukur, saxaður smátt
4 hvítlauksgeirar, saxaðir
1 fersk fenníka, sneidd
1 stór gulrót, í litlum bitum
1 lítill blaðlaukur, sneiddur
300 g tómatar, saxaðir
safi úr 1 appelsínu
safi úr 1 sítrónu
1 tsk. þurrkað tímían
2 tsk. paprika
12 dl fiskisoð eða vatn og fiskikraftur
1 ½ dl hvítvín
1 msk. tómatmauk
1 msk. sykur eða hunang
1-2 tsk. salt
300 g lax
400 g stórar rækjur
300 g langa eða annar hvítur fiskur
2 msk. þurrkuð steinselja
Steikið laukinn í olíunni þar til hann fer að verða glær. Bætið hvítlauk, fenníku, gulrót og blaðlauk út í og steikið aðeins áfram. Bætið öllu nema fiski og steinselju út og látið súpuna sjóða í 20 mín. Bætið fiski út í og látið sjóða í 4-5 mín. í viðbót. Stráið steinselju yfir í lokinn.
Anna Bryndís Skúladóttir er mikil fjallageit og gefur ráð varðandi búnað.
Anna Bryndís Skúladóttir er mikil fjallageit og hefur ásamt félögum sínum í Fjallgönguklúbbnum Fjallhress gengið á marga flotta austfirska tinda. Við fengum hana til að segja okkur fá eftirminnilegustu göngunum og gefa okkur nokkur góð ráð um búnað.
Á toppi Hvannadalshnjúks.
„Falleg náttúra og að kljást við fjölbreytt landslag og ögrandi fjöll er það skemmtilegasta við fjallamennskuna. Ég fer mikið ein á fjöll og finnst það frábært en það er líka mjög gefandi að ganga með vinum mínum í Fjallgönguklúbbnum Fjallhress og um leið eykur það öryggi á fjöllum,“ segir Bryndís. Hún er deildarstjóri í Seyðisfjarðarskóla á leikskóladeild og starfar einnig sem fjallaleiðsögumaður og landvörður á sumrin. Í frítíma sínum stundar hún fjallgöngur og kajakróður.
„Súla, hæsti tindur Dyrfjalla, er í uppáhaldi vegna þess hve mikil fjölbreytni er í gönguleiðinni og einstök innkoma á þetta mikla klettafjall, sem er blómi skrýdd klettarák. Útsýnið af toppnum er magnað. Eftirminnilegast er þó líklega þegar dóttir mín hringdi í mig þar sem ég var að koma niður af Hvannadalshnjúk og sagði að það væri farið að gjósa á jöklinum. Nei, ég hélt nú ekki. ,,Jú mamma, þetta er bæði í fréttum í útvarpi og sérútsending í sjónvarpinu sagði hún mjög angistarfull.“ Þá sneri ég mér við og sá þá gosstrókinn stíga upp til himins. Þetta var Grímsvatnagosið í maí 2011.“
Mikilvægt að láta vita af sér
Hvað þurfa byrjendur í fjallamennsku að hafa í huga og hvaða búnaður er nauðsynlegur? „Það þarf að huga að veðurspá og láta aðra vita hvert halda skal og hvenær þú áætlar að koma til baka. Góður bakpoki undir skjólfatnað og nesti er mikilvægt. Ólíkan búnað þarf í vetrarfjallamennsku og sumarfjallgöngum. Létt föt, sólgleraugu og sólarvörn í sólinni á sumrin. Muna líka að hafa sólgleraugu og sólarvörn í vetrarsól í snjó og á jökli, ullarfatnað innst og góðar ullarpeysur undir skjólgóðri skel er mjög gott. Göngustafir koma sér vel við ýmsar aðstæður og að vetri eru broddar og ísaxir oft nauðsynleg. Sími, áttaviti eða GSP-tæki eru allt góð öryggistæki. Ekki gleyma vatni á brúsa í allar lengri göngur.“
Hvaða nesti finnst þér best að hafa? „Það fer eftir árstíðum og erfiðleikastigi. Léttari samlokur og ávaxtasafa á sumrin en á veturna kæfusamloku, lifrarpylsu og egg. Svo er ég alltaf með svart te á brúsa. Snickers er ómissandi og reyndu ekki að koma með súkkulaðirúsínur þar sem ég er,“ segir hún hlæjandi.
Hún hvetur fólk hiklaust til að stunda fjallamennsku. „Fjallganga er gríðarlega góð alhliða hreyfing og gott sport bæði fyrir sál og líkama. Náttúran er endalaus uppspretta fegurðar og fjölbreytileika en það er ekki síður magnað að upplifa náttúruna í ham þar sem mannskepnan fær ekki beislað hana, s.s. í jarðskjálftum, gosum, flóðum og skriðuföllum.“
Og það er skemmtilegt göngusumar fram undan hjá Bryndísi en hún ætlar meðal annars að ganga á Búlandstind, Grjótfjall og Þriggjakirknafell, einnig Kverkfjöll og í Hveradal, á Jónsfjall og í Mínuskörð í botni Borgarfjarðar eystra og loka þar með fjallahringnum í firðinum. Þá mun hún fara í fimm daga ferð um Víknaslóðir sem leiðsögumaður, ganga Fimmvörðuháls og fara í kjakferðir í fjallvötnunum á hálendinu.
Aðalmynd: Bryndís ásamt Skúla Júlíussyni á Stöng í Berufirði.
Hér er uppskrift að salati sem er ekki bara bráðhollt heldur algjört sælkerafæði líka.
Hollt og gott. Appelsínusalat með súkkulaði-sorbet.
Appelsínusalat með súkkulaði-sorbet
fyrir 4
Ráðlagður dagskammtur af hreinu súkkulaði, samkvæmt ofurfæðiskenningum, er u.þ.b. 15-20 grömm. Það er nú alveg næg ástæða til að skoða þetta fæði svolítið betur.
Hér er uppskrift að súkkulaði-sorbet sem er dökkur og seiðandi og með appelsínum og granateplum er hann alveg ómótstæðilegur.
3-4 appelsínur
1 granatepli
Súkkulaði-sorbet
3 dl vatn
40 g kakó (eins dökkt og þið hafið efni á)
100 g hrásykur
100 g 70% súkkulaði, saxað
½ tsk. vanilludropar
svolítið salt
Sjóðið vatn, kakó og sykur saman. Bætið súkkulaði út í ásamt vanillu og salti og hrærið í þar til súkkulaðið er uppleyst, kælið. Frystið í ísvél eða í frysti. Ef þið setjið ísinn í frysti er gott að setja þunnt lag í stórt form svo hann frjósi fljótt og hræra í öðru hvoru á meðan ísinn er að frjósa.
Hátt hlutfall andoxunarefna í dökku súkkulaði geri það að hinu fullkomna sælgæti. Súkkulaði er ríkt af flavoníðum sem sannað hefur verið að auka blóðflæði, draga úr hósta, bæta minni og mýkja húðina. Þeir sem aðhyllast ofurfæðiskenningar segja ráðlagðan dagskammt vera 15-20 grömm á dag.
Í nýjasta tölublaði Vikunnar er að finna ítarlegt viðtal við Kristínu.
Kristín Tómasdóttir rithöfundur hefur á undanförnum árum skrifað sex bækur ætlaðar ungum krökkum. Hún leggur áherslu á að byggja upp sterka sjálfsmynd og efla vitund þeirra um eigin tilfinningalíf. Nýjasta bók hennar, Sterkar stelpur, hefur þó ákveðna sérstöðu því hún er ætluð yngri lesendahópi og er tileinkuð yngstu dóttur hennar sem er trans stúlka.
Kristín hefur einnig sett saman sjálfstyrkingarnámskeið fyrir stelpur og ferðast um landið í þeim tilgangi að efla íslenskar stelpur.
„Ég fann fyrir mikilli eftirspurn meðal foreldra sem voru farnir að finna fyrir því að sjálfsmynd stelpna þeirra væri farin að þróast í neikvæða átt fyrr en þá hafði grunað,“ segir hún. „Við erum að sjá stelpur niður í 6 ára fara í megrun og alls kyns önnur merki sem foreldrar hræðast en vita líka að hægt er að koma í veg fyrir með fyrirbyggjandi sjálfstyrkingu.“
Ítarlegra viðtal við Kristínu er að finna í nýjustu Vikunni.
Þegar farið er í frí um landið hættir okkur til að stoppa bara á þekktustu stöðunum því við vitum ekki af öllu hinu sem Ísland hefur upp á að bjóða.
Suðurlandið er einn vinsælasti staður ferðamanna sem koma hingað til lands og geymir ótrúlegar náttúruperlur. Hér eru nokkrir staðir sem minna hefur farið fyrir og við mælum sannarlega með að þið skoðið.
Þótt núna sé kannski ekki eins sumarlegt um að lítast og á þessari ljósmynd þá er óhætt að segja að Svartifoss sé einn fallegasti foss landsins.
Fjaðrárgljúfur
Fjaðrárgljúfur er virkilega falleg náttúrusmíð rétt við þjóðveg númer eitt, skammt vestan við Kirkjubæjarklaustur. Ekið er að gljúfrinu um Lakaveg og þaðan gengið upp með gilinu. Einnig er hægt að ganga upp eftir gljúfrinu sjálfu en það gæti þurft að vaða töluvert. Mikilfenglegar móbergsmyndir prýða gilið og þetta getur verið skemmtilegt stopp fyrir alla fjölskylduna.
Gljúfrabúi
Fossinn Gljúfrabúi er aðeins nokkur hundruð metrum fyrir innan Seljalandsfoss og fellur bak við hamravegg úr móbergi, kallaður Franskanef, sem lokar fossinn af. Hægt er að komast inn í hellinn um op að framanverðu þar sem áin Gljúfurá rennur út og það er töfrum líkast að sjá fossinn steypast niður þessa 40 metra. Einng má klifra upp á Franskanef og sá fossinn að ofanverðu en munið að fara að öllu með gát.
Svartifoss
Svartifoss er einn fallegasti foss á landinu þar sem hann fellur niður ægifagurt stuðlaberg í Skaftafelli. Frá Skaftafellssofu er hægt að ganga að Svartafossi en leiðin er tæpir tveir kílómetrar og tekur um 35-45 mínútur. Gengið er meðfram tjaldsvæðinu og beygt upp á hæð sem heitir Austurbrekkur. Farið er yfir Eystragil á göngubrú og á leiðinni sjást Hundafoss og Magnúsarfoss. Þegar komið er upp hæðina er gott útsýni að Svartafossi og svo er gengið niður í gilið til að komast alveg að fossinum.
Þakgil
Þakgil er falinn gimsteinn á Höfðabrekkuafrétti staðsett milli Mýrdalsjökuls og Mýrdalssands um 15 kílómetra frá þjóðveginum en beygt er út af þjóðvegi númer eitt við Höfðabrekku sem er fimm kílómetrum fyrir austan Vík. Þar er gott tjaldsvæði, veðursæld og stórbrotin náttúra. Ef þú ert á leiðinni í útilegu þá er þetta staður sem er virkilega þess virði að skoða. Einnig er hægt að leigja smáhýsi á staðnum. Margar fallegar gönguleiðir við allra hæfi eru á svæðinu.
Ingólfshöfði
Fjölskyldufyrirtækið Öræfaferðir á Hofsnesi sem staðsett er rétt hjá Fagurhólsmýri við rætur Öræfajökuls býður upp á spennandi lunda- og söguferðir út í Ingólfshöfða á heyvögnum sem eru hengdir aftan í dráttarvélar (sjá aðalmynd). Ferðin tekur alls tvo og hálfan klukkutíma og ferðin í vagninum um það bil 25 mínútur hvora leið. Það kostar 7.500 kr. fyrir fullorðna, 2.500 kr. fyrir börn á aldrinum 8-16 ára en börn frá 4-7 ára frá frítt. Gengið er um höfðann með leiðsögumanni og það eru 99% líkur á því að sjá lunda á svæðinu yfir sumartímann. Skemmtileg ævintýraferð fyrir fjölskylduna í sumarfríinu.
