Ólafur H. Guðgeirsson er löggiltur fasteignsali hjá Stakfell fasteignasölu, menntaður í almannatengslum og markaðsfræðum og með MBA-gráðu til viðbótar. Hann býr yfir áratuga reynslu af markaðsmálum og rekstrarráðgjöf, á þrjú börn og eina stjúpdóttur á aldrinum 14, 16, 23 og 25. Hann er í sambúð með Kristínu Þórisdóttur, viðskiptafræðingi í fjárreiðudeild Símans. Bjó sjálfur í úthverfi Reykjavíkur í áratugi en er nýlega fluttur til Kristínar í Vesturbæinn þar sem hann kann vel við sig.
Hvað heillar þig mest við starfið?
„Má segja að það sé tvennt: Annars vegar það að starfið krefst náinna persónulegra samskipta við fólk sem statt er á öllum mögulegum stöðum í lífinu. Oft þarf að nálgast úrlausn mála af mikilli varfærni og yfirvegun, en einnig þarf maður að vera hugmyndaríkur og reyndur til að gera þetta vel.
Hins vegar þá er þetta starfsumhverfi nátengt ástandinu í hagkerfinu og við verðum vör við breytingar í efnahagsmálum á undan flestum öðrum. Ef eitthvað kemur upp sem skapar óöryggi á markaðnum, til dæmis kosningar, umtal um samdrátt í ferðaþjónustu eða breytt gengi krónunnar, þá finnum við strax breytingar, þannig að það ýmist hægist á eftirspurn eða hún herðir á sér. Fyrir mig sem rekstrarhagfræðing þá er þetta mjög spennandi.“
Geturðu lýst hefðbundnum vinnudegi hjá þér?
„Yfirleitt reyni ég að vera mættur um klukkan átta, byrja á að fara yfir verkefni vikunnar og hvernig þeim hefur miðað áfram. Fer í að fylgja málum eftir, en ég skipulegg verkefnin eftir því hvort hvort um er að ræða söluverkefni, öflun eigna í sölu, eftirfylgni kaupsamninga eða markaðssetningu. Fæstir dagar hins vegar fara eins og lagt var upp með heldur gerist alltaf eitthvað nýtt og óvænt.“
„Fyrir mig persónulega skiptir síðan máli að hafa bílskúr þar sem ég get dundað mér í jeppanum og skrifborð fyrir tölvuna og myndavélarnar, en jeppar og ljósmyndun hafa fylgt mér frá unglingsárum.“
Hvað er það sem þér finnst gera heimili að heimili?
„Mér finnst heimili þurfa að vera þannig að fólk geti gleymt skólatösku á ganginum, hengt jakka á stól eða skilið eftir peysu í sófanum án þess að allt liti út fyrir að vera á öðrum endanum. Það sem ég á kannski við er að heimili megi að mínu viti ekki vera yfirhönnuð og stíliseruð. Fyrir mig persónulega skiptir síðan máli að hafa bílskúr þar sem ég get dundað mér í jeppanum og skrifborð fyrir tölvuna og myndavélarnar, en jeppar og ljósmyndun hafa fylgt mér frá unglingsárum.“
Getur þú líst þínum stíl?
„Á erfitt með það en gallabuxur, skyrta og jakki er það sem ég vel mér helst ef það segir eitthvað.“
Áttu þinn uppáhaldsarkitekt?
„Uppáhaldsarkitektinn minn er Kjartan Sveinsson, af nokkrum ástæðum. Eignir eftir hann eru yfirleitt einfaldar, hann raðar saman stofum og eldhúsi þannig að það er auðvelt að breyta eftir kröfum nútímans og hann er snillingur í að leyfa birtu að njóta sín sem allra best. Arkitektar í dag nýta vissulega plássið betur en Kjartan gerði, en mig dreymir engu að síður um að eignast ákveðna týpu af sérhæð eftir hann.“
Áttu þinn uppáhaldshönnuð?
„Ég held mjög upp á danska hönnuði eins og Börge Mogensen og Lois Poulsen. Ég á sófa eftir Börge Mogensen, en ég á reyndar líka tvo íslenska stóla frá því um, 1970 sem ég lét gera upp fyrir nokkrum árum. Veit því miður ekki hver hannaði þá en myndi gjarnan vilja komast að því.“
Hvað hefur þig alltaf dreymt um að eignast en ekki eignast hingað til?
„Mig langar í stóla sem heita Mogensen 2204, en veit ekki hvort ég kem nokkurn tíma til með að vera í húsnæði þar sem hægt væri að koma slíkum gripum fyrir svo vel færi.“
Uppáhaldsliturinn þinn?
„Mér finnst bláir tónar yfirleitt fallegir, samanber sixties-stólana mína, en ég held líka mjög upp á litinn sem er á vel notuðu brúnu leðri.“
Hvar líður þér best?
„Það væri undir stýri á jeppanum, með útilegudót og útivistarföt, í ferðalagi með fjölskyldunni.“
Svalasti veitingastaðurinn á Íslandi í dag?
Margir fínir veitingastaðir hafa sprottið upp á undanförnum árum, en ég borðaði í gær í Englendingavík í Borgarnesi. Fékk þar einhvern þann fallegasta mat sem ég hef borðað, sérlega gott sjávarréttapasta, en svo er birtan og útsýnið á staðnum þannig að maður vill helst ekki standa upp og fara.“
Er einhver byggingarstíll sem heillar þig meira enn annar?
„Klárlega sixties-stíll eins og frá Kjartani Sveinssyni og Sigvalda Thordarsyni. Þó að þeir séu ólíkir þá eru þeir báðir gott dæmi um það tímabil sem mér finnst flottast í byggingum hér á landi.“
Að lifa lífinu lifandi er að … hafa gaman af því sem maður er að gera, vera með gott fólk í kringum sig og reyna að vera sæmilega góð fyrirmynd fyrir krakkana sína.
Myndir / Aldís Pálsdóttir