Ertu að glíma við sykurfíkn og hvíldarþörf? Ertu slappur og í yfirþyngd? Borðaðirðu of mikið um jólin og fékkst samsviskubit? Viltu breyta lífi þínu til hins betra og öðlast betri lífsgæði og hæfni til útvistar? Ef þér líður þannig skaltu skoða dagskrá Fyrsta skrefsins sem hefst um miðjan janúar. Verkefnið er byggt upp á vikulegum göngum á létt og þægileg fjöll. Smám saman er byggt og þrek og úthald og þegar maímánuður rennur upp verður haldið á sjálfan Snæfellsjökul.
Fyrsta skrefið er að hefja sitt sjötta ár undir fána Ferðafélags Íslands. Verkefnið samanstendur af fjallgöngum, fræðslu, æfingum og söng. Fjölmargir hafa í þeim félagsskap náð að rjúfa kyrrstöðu og öðlast hæfni til að ganga á fjöll. Stærstur hluti félaga Fyrsta skrefsins eða yfir 70 prósent hefur náð því markmiði sínu að toppa Snæfellsjökul.
Mynd: Reynir Traustason
Sem dæmi um fjöll sem verða toppuð er að haldið er á flest lægri fjöll á höfuðborgarsvæðinu. Úlfarsfell, Helgafell og hlíðar Esju eru þess á meðal. Þá verða gosstöðvarnar heimsóttar og helgarferð til Vestmannaeyja verður farin um miðjan maí. Ævintýrin verða við hvert fótmál. Lagt er upp með að ganga á hraða sem hentar öllum hópnum. Það er á færi flestra að taka þátt í verkefninu.
Reglubundnar göngu vinna gegn bæði líkamlegum og andlegum kvillum. Áreynslan bægir frá þunglyndi og kvíða auk þess að líkamlegur styrkur eykst. Margir hafa vitnað til þess að þjálfun á vegum Ferðafélags Íslands hefur hjálpað þeim til að öðlast aukin lífsgæði.
Hámarksfjöldi er í hópnum. Aðeins 40 manns verða teknir inn. Fyrir ári síðan seldist upp í verkefnið. Kynningarfundur verður í beinu streymi á Facebook kl. 20, annað kvöld.
Hér getur fólk bókað sig á námskeiðið.