Þóra Birgisdóttir er fasteignasali vikunnar.
Þóra Birgisdóttir er löggildur fasteignasali og framkvæmdastjóri Borgar fasteignasölu. Hún er gift Ingimundi Árnasyni og á 3 börn, Birgi Viðar 26 ára, Ingu Rós 15 ára og Árna Þór 14 ára. Fjölskyldan býr í notalegu og fjölskylduvænu húsi í Suðurhlíðum Kópavogs við Hlíðarhjalla 72.
Hvað heillar þig mest við starfið? „Að vinna með fólki og í þeim miklu samskiptum sem starfið krefst á sama tíma og tölur og samningar leika stórt hlutverk – þannig hef ég náð að sameina áhugamál og menntun en ég er menntuð í viðskiptafræði og er löggildur fasteignasali.“
Getur þú lýst hefðbundnum vinnudegi hjá þér? „Hann getur orðið æði langur – ég er B-manneskja og reyni að komast í ræktina sem fyrst að morgni – annars fer ég ekki þann daginn. Í vinnunni er oft mikill erill og áreiti og margt sem þarf að bregðast við án fyrirvara þannig að enginn dagur er eins, flestir dagar enda þó með sýningum á fasteignum milli 16.30-19.00 sem einnig er algengt um helgar.“
Hvað er það sem þér finnst gera hús að heimili? „Fólkið sem þar býr en auðvitað er innbúið og andinn sem þar ríkir það sem gerir gæfumuninn. Við fjölskyldan fluttum fimm sinnum á fimm árum hér fyrir nokkrum árum, en við áttum draum um að byggja okkar eigið hús sem ekki varð af því við fengum ekki lóðina sem okkur langaði í. Þá fann maður að það eina sem skipti máli var að hafa fjölskylduna og hlutina sína í kringum sig og það er heima hverju sinni.“
„Heitur pottur er á óskalistanum og helst heilt garðhús utan um hann.“
Getur þú lýst þínum stíl? „Hann er örugglega frekar sundurleitur, hluta til gamaldags og hlýlegur en á sama tíma reyni ég að vera nýtískuleg og hafa allt í röð og reglu að ósk dótturinnar en það er bara ekki alveg ég.“
Áttu þinn uppáhaldsarkitekt? „Hér heima hef ég verið hrifin af húsum sem eru byggð í funkisstíl og hús kennd við Sigvalda Thordarson, sem alls ekki var arkitekt heldur verkfræðingur, hafa mjög sterka skírskotun hjá mér.“
Áttu þinn uppáhaldshönnuð? „Anna Þórunn vinkona mín er vöruhönnuður sem ég hef miklar mætur á enda hlutirnir hennar alveg einstakir.“
Hvað hefur þig alltaf dreymt um að eignast en ekki eignast hingað til? „Eggið eftir Arne Jacobsen, hlýt að finna að minnsta kosti eitt slíkt í stofunni hjá mér fljótlega.“
Uppáhaldsliturinn þinn? „Blár litur ratar alltaf inn á heimilið bæði í hlutum, listaverkum og vefnaði.“
Hvar líður þér best? „Heima hjá mér í kósíheitum með fjölskyldunni.“
Nú er sumarið komið og margir huga að garðinum, er eitthvað sem þig langar að eignast í garðinn? „Heitur pottur er á óskalistanum og helst heilt garðhús utan um hann.“
Svalasti veitingastaðurinn á Íslandi í dag? „Apótekið er í uppáhaldi hjá mér og mínum.“
Að lifa lífinu lifandi er að … taka það ekki of alvarlega – njóta hverrar stundar eins og hún kemur fyrir – hvort sem er í vinnu eða með fjölskyldunni úti að leika.