Föstudagur 29. mars, 2024
-0.2 C
Reykjavik

Íslenskt lambakjöt og grilluð pera í listilegum búningi

VefTv

- Auglýsing -

Hlaðvörp

- Auglýsing -

Mathús Garðabæjar er fjölskylduvænn veitingastaður sem tekur þátt í Food & Fun í ár. Þar er það enski matreiðslumeistarinn Richard Falk sem töfrar fram ljúffengan matseðil þar sem meðal annars er að finna brauð sem er bakað eftir leyniuppskrift hans, gljáða seljurót, þorsk, lambakjöt, bláskel og grillaða peru.

Breski matreiðslumeistarinn Richard Falk hefur hannað matseðilinn sem verður í hávegum hafður á Mathúsi Garðabæjar, Garðatorgi 4B, á meðan Food & Fun stendur yfir. Falk vann hlutastörf á veitingastöðum í London á meðan hann stundaði nám í verkfræði á sínum tíma og í staðinn fyrir að snúa sér að rannsóknum fór hann alfarið að starfa sem matreiðslumaður í borginni. Hann vann á veitingastaðnum The Dairy þegar hann var valinn „Best Chef“ á þeim tíma sem verðlaunin „Young British Foodie Awards“ voru veitt.

„Ég mæli alltaf með lambakjöti, fiskinum okkar og hörpuskel svo eitthvað sé nefnt og svo hannaði Falk matseðilinn út frá sínum hugmyndum.“

„Falk byrjaði á að spyrja mig hvaða hráefni ég mælti með,“ segir Fannar Vernharðsson, yfirkokkur hjá Mathúsi Garðabæjar. „Ég mæli alltaf með lambakjöti, fiskinum okkar og hörpuskel svo eitthvað sé nefnt og svo hannaði Falk matseðilinn út frá sínum hugmyndum.“

Það verður gælt við bragðlauka þeirra gesta sem koma á Food & Fun í Mathúsi Garðabæjar. „Gestir fá fyrst smakk en við verðum með baby gem-salat sem verður borið fram með heimalöguðum sýrðum rjóma og stökku kartöfluhýði. Í forrétt verður gljáð seljurót með svörtum hvítlauk, döðlum og beiskum salatlaufum.
Næst kemur þorskur og með honum verður borin fram hveitibjórsósa, sætt hvítkál og silungahrogn.
Lambakjöt verður í aðalrétt en þemað í aðalréttinum er mjög skemmtilegt en með lambinu verður íslenskt þang, bláskel og kartöflur.
Eftirrétturinn samanstendur af grillaðri peru með þeyttri jógúrt, dökku súkkulaði og heslihnetum.“

Nýjar aðferðir
Fannar segir að mikil vinna liggi að baki öllum undirbúningi fyrir þátttökuna í Food & Fun en að þetta sé að sama skapi ótrúlega gefandi og skemmtilegt. „Ég er búinn að vera það heppinn að fá skemmtilega og góða kokka í þau skipti sem ég hef tekið þátt í hátíðinni en það eru held ég 14 skipti. Þetta er bara stemningin. Maður lærir alltaf eitthvað nýtt á hverri Food and Fun-hátíð og oftar en ekki eignast maður góða vini í leiðinni og er kominn með gott tengslanet um allan heim. Það eru alltaf einhverjar nýjar aðferðir og engir tveir kokkar hugsa eins og það er skemmtilegt að fá önnur sjónarmið. Það er góð auglýsing að taka þátt í Food & Fun en það er fyrst og fremst skemmtunin sem við erum að leita að og aukareynsla fyrir utan að um er að ræða góðan mat og góða drykki á góðu verði.“

Á Mathúsi Garðabæjar er almennt lögð áhersla á vandaðan mat úr fyrsta flokks hráefni, bæði í hádeginu og á kvöldin. „Í hádeginu er hægt að koma í fisk dagsins fyrir litlar 1990 krónur, hamborgara eða jafnvel nautasteik svo eitthvað sé nefnt, á kvöldin er svo matseðillinn stærri og er t.d. þriggja rétta matseðill í boði á mjög góðu verði eða 6.490 krónur. Um helgar er svo brunch-hlaðborð í hádeginu og á sunnudagskvöldum er steikarhlaðborð sem er mjög vinsælt og algjör snilld fyrir fjölskyldufólk.“

- Auglýsing -

Mathús Garðabæjar er fjölskylduvænn veitingastaður og er lögð áhersla á að koma til móts við börnin en veitingastaðurinn er með sérstakan barnamatseðil. „Hingað kemur margt fjölskyldufólk. Við erum með barnahorn sem er sérherbergi þar sem börn geta horft á teiknimyndir og leikið sér, nóg er af bílastæðum og staðurinn er hlýlegur og kósí. Það er algjör snilld að fara með börn á Mathús Garðabæjar. Ég fer allavega ekkert annað með börnin mín.“

Aðalmynd: Breski matreiðslumeistarinn Richard Falk hannaði matseðilinn sem verður í hávegum hafður á Mathúsi Garðabæjar á Food & Fun. Mynd / Jade Nina Sarkhel.
Myndir / Aldís Pálsdóttir

 

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Lestu meira

- Auglýsing -

Veistu meira um málið?

Deila

Nýtt í dag

Mest lesið í vikunni

Raddir

Í fréttum er þetta helst...

- Auglýsing -