Við Austurhöfn Reykjavíkurborgar rís ný byggð um þessar mundir, nýtt borgarhverfi í hjarta miðbæjarins með fallegu útsýni yfir höfnina og sundin blá.
Hið nýja hafnarhverfi er um margt sérstakt, á jarðhæð verður úrval verslana og veitingahúsa en á efri hæðum verða vandaðar íbúðir af ýmsum stærðum. Við hafnarbakka Reykjavíkur myndast því skemmtilegt og aðlaðandi göngu- og verslunarsvæði með fjölbreyttu menningarlífi, nátengdu viðburðum og þjónustu gamla miðbæjarins.
Tengir Hörpu við gamla miðbæinn og Kvosina
Íbúðir Austurhafnar verða sjötíu og ein talsins af ólíkum stærðum en allar verða þær einstaklega vandaðar og margar með fallegt útsýni yfir sundin. Austurhöfn, sem hönnuð er af T.ark arkitektum, mun skapa þægilega tengingu milli Hörpu og gamla miðbæjarins. Framhlið byggingarinnar er brotin upp með ólíku efnisvali sem sækir innblástur í eldri borgarmynd Reykjavíkur og mun því skapa aðlaðandi borgarbrag sem tengir vel við miðbæinn.
Iðandi hafnarlíf og stemning
Fasteignafélagið Reginn hf. hefur sterka sýn fyrir hafnarhverfið en það hefur fest kaup á öllu verslunar- og þjónusturými Austurhafnar sem stendur við Geirsgötu og liggur með fram hafnarbakkanum og göngugötunni Reykjastræti. Öll verslunar- og þjónusturými á þessu einstaka svæði verða því vel úthugsuð, skipulögð og rekin sem ein heild en með því næst að tryggja rétta samsetningu á hinum fyrirhugaða verslana- og þjónustukjarna. Um ellefu rými verða leigð verslunar- og veitingaaðilum á þessu 2.700 fermetra svæði með það að markmiði að skapa iðandi hafnarlíf og stemningu á svæðinu.
Handan Geirsgötu hefur Reginn einnig til umráða sambærileg rými á því svæði sem í daglegu tali nefnist Hafnartorg en þar verður starfræktur fjöldi verslana með sterkum vörumerkjum. Hugmyndin er að skapa á svæðunum tveimur sterkan kjarna verslunar- og veitingahúsa sem mun verða mikil lyftistöng fyrir miðbæinn og Reykjavík í heild sinni.
Rólegt andrúmsloft með sýn út á hafið
Verslunarrýmin við Austurhöfn, sem munu að megninu til snúa að Geirsgötu og Reykjastræti, eru einstök að því leytinu til að sérstaklega hátt er til lofts í þeim, þau eru með hágæða verslunargluggum og munu rýmin standast alþjóðlegan samanburð hvað varðar gæði og ásýnd.
Við hafnarhlið Austurhafnar er hins vegar ætlun að hafa veitingastaði með góðu rými fyrir utan sem hentar vel til útiveitingasvæða. Þar verður því tilvalið að setjast á góðviðrisdögum og njóta iðandi mannlífs og einstaks útsýnis yfir höfnina og sundin.