Bæjarstjórn Vestmannaeyja lýsir yfir áhyggjum vegna uppbyggingar á Skerjafirði.
Bæjarstjórn Vestmannaeyja tók fyrir umræðu um samgöngumál á fundi sínum í gær en þar var meðal annars rætt um fyrirætlanir ríkisins og Reykjavíkurborgar um að hefja undirbúning íbúðaruppbyggingar í Skerjafirði. Frá þessu er sagt á eyjafrettir.is.
Eftirfarandi ályktun sendi bæjarstjórnin frá sér vegna málsins:
Bæjarstjórn Vestmannaeyja lýsir yfir áhyggjum vegna fyrirhugaðrar uppbyggingar í Skerjafirði. Með ákvörðuninni verður samkomulagi ríkisins og Reykjavíkurborgar frá 2019 teflt í tvísýnu þar sem forsenda þess var að tryggja rekstraröryggi Reykjavíkurflugvallar þar til nýr flugvöllur er tilbúinn til notkunar.
Reykjavíkurflugvöllur sinnir mikilvægu hlutverki og er lífæð landsbyggðanna. Með uppbyggingu í Skerjafirði gæti öryggi landsbyggðanna verið ógnað gagnvart sjúkraflugi og nauðsynlegri heilbrigðisþjónustu sem og aðgengi almennings, atvinnulífi og stjórnsýslu að mikilvægum innviðum.
Bæjarstjórn Vestmannaeyja skorar á borgarstjórn að fresta byggingaráformum og virða í hvívetna samkomulag ríkis og borgar frá 2019 þar til framtíðarlausn innanlandsflugs er tryggð.