Þrír brunar hafa orðið í Vestmannaeyjum þessa vikuna en tveir af þeim eru íkveikja, að mati Slökkviliðsstjóra Vestmannaeyja.
Tígull segir frá því að Slökkvilið Vestmannaeyja hafi sagt frá því á Facebook-síðu sinni að slökkviliðið hafi brugðist við þremur eldsvoðum í vikunni en í tveimur tilvikum hafi verið um íkveikju að ræða.
„Undanfarna daga höfum við fengið nokkrar tilkynningar um eld í sinu.
Í hádeginu á föstudaginn kviknaði í sinu á túninu við Höllina þar sem líklega var um að ræða slys vegna sígarettu sem hent hefur verið út um bílglugga.“ Þannig hefst tilkynningin. Og hún heldur áfram: „Seint á laugardagskvöldið var svo eldur laus í sinu við Týsheimili/knattspyrnuhús þar sem Lögreglan í Vestmannaeyjum náði að slökkva strax.“Slökkt í sinubruna. Ljósmynd: Facebook-síða Slökkviliðs Vestmannaeyja
Þá segir í tilkynningunni að í gær hafi slökkviliðið svo þurft að fara á athafnasvæði Kubbs á nýja hrauninu þar sem eldur var laus í gróðri og var farinn að berast í dekk og fleira lauslegt rusl sem var á svæðinu.
Kemur fram að um ljótan leik sé að ræða.
„Það er nokkuð ljóst að seinustu tveir eldsvoðar eru af manna völdum og því um ljótan og hættulegan leik að ræða því aðeins heppni og snör viðbrögð réðu því að ekki fór verr.
Það er mikið ábyrgðar og hugsunarleysi að vera að fikta með og kveikja elda, hvort sem er í gróðri eða öðrum hlutum því hlutirnir hafa tilhneigingu til að fara hratt úr böndunum með ófyrirsjáanlegum afleiðingum.“Slökkviliðsmenn að störfum í Vestmannaeyjum. Ljósmynd: Facebook-síða Slökkviliðs Vestmannaeyja
Að lokum eru þeir sem ábyrgð bera á íkveikjunum hvattir til að hætta þessu.
„Við viljum því hvetja þá sem bera ábyrgð á þessu fikti að hugsa sinn gang og hætta þessari iðju nú þegar áður en frekara tjón hlýst af.
Þeir sem hafa einhverjar upplýsingar um þessa eldsvoða eru beðnir um að hafa samband við lögregluna í Vestmannaeyjum.
