Lögreglan á Austurlandi hefur ekki náð að ljúka þremur stórum málum sem hún rannsakaði, með afgerandi niðurstöðum.
Hundadauðinn í Breiðdalnum
Samkvæmt Austurfrétt hafa engar vísbendingar komið fram um það hvað olli dauða tíu hunda á bóndabæ í Breiðdal í sumar og hefur rannsókninni verið hætt í bili. Þá hefur rannsókn á upptökum eldsvoðans í Vaski á Egilsstöðum, ekki heldur borið árangur.
Í júlí kom hundaræktandi á bæ í Breiðdal að tíu hundum sínum dauðum, eftir að hafa skroppið af bænum part úr degi. Í upphafi fór Matvælastofnun með rannsókn málsins og óskaði því að tveir hundanna yrðu krufðir. Tilraunastöð Háskóla Íslands í meinafræði í Keldum sá um þær krufningar. Einnig voru sýni send til eiturefnagreiningar hjá Rannsóknastofu háskólans í lyfja- og efnafræði. Engar vísbendingar komu þar fram um dánarorsök hundanna.
Var þá málið sent áfram til lögreglunnar á Austurland sem skoðaði meðal annars umhverfi hundanna, veðurfar og annað í kringum atburðinn. Þá var einnig rætt við aðila sem mögulega gætu búið yfir vitneskju um dauða þeirra. Ekkert kom út úr því sem gat upplýst um dánarorsök hundanna og hefur því rannsókn á málinu verið hætt en hægt er þó að taka hana upp aftur ef ný gögn koma fram.
Kettlingadauðinn á Eskifirði
Það sama má segja um rannsókn á kettlingum sem fundust dauðir í læk á Eskifirði í mars í fyrra. Matvælastofnun hóf einnig rannsókn þess máls og lét kryfja kettlingana en vísaði svo málinu til lögreglunnar, sem leitaði að vitnum og athuguðu hvort efitrlitsmyndavélar í nágrenninu hefðu náð einhverju.
Samkvæmt krufningunni er talið líklegast að kettlingarnir hefðu drukknað en lögreglan fylgdi ábendingum eftir, sem skiluðu ekki frekari upplýsingum.
Eldsvoðinn í Vaski
Þá er rannsókn lögreglu á orsökum eldsvoðans í verslun og efnalaug Vasks á Egilsstöðum í september árið 2022, lokið án óyggjandi niðurstöðum um eldsupptök. Vettvangur var rannsakaður af bæði Húsnæðis- og mannvirkjastofnun og lögreglunni á Austurlandi, auk þess sem skýrslur voru teknar af vitnum. Þrátt fyrir að eldsupptök séu ókunn, sýna gögnin þó að enginn grunur sé um saknæma háttsemi sem valdið hefði brunanum.