Ný smábátahöfn mun rísa í Brjánslækjahöfn. Framkvæmdaleyfi fyrir höfninni var samþykkt af bæjarstjórn Vesturbyggðar.
Bæjarstjórn Vesturbyggðar hefur nú samþykkt framkvæmdaleyfi fyrir byggingu á nýjum grjótgarði fyrir smábátahöfn í Brjánslækjahöfn. Bæjarins besta sagði frá málinu en þar segir að útlögn á grjóti og kjarna úr námu og af lager, eru samtals um 27.300 rúmmetrar og uppúrtekt og endurröðun um 1.200 m3. Er áætlað að verkinu ljúki á gamlársdag 2022.
Skipulagsstofnun hafði komist að þeirri niðurstöðu að framkvæmdin væri ekki líkleg til að valda umtalsverðum umhverfisáhrifum og því sé framkvæmdin ekki háð umhverfismati.
Opnað var fyrir útboðum síðastliðinn maí og bárust þrjú tilboð. Íslenskir aðalverktakar hf. Reykjavík voru lægstbjóðandi og hefur verið samið við þá. Hljóðaði tilboð þeirra upp á 114.741.981 krónur sem er 39% umfram áætlaðan verktakakostnað í kostnaðaráætlun Vegagerðarinnar sem var 82.415.000 krónur. Önnur tilboð voru frá Flakkaranum ehf., Brjánslæk sem bauð 118.407.000 kr. og Grjótverk ehf., Ísafirði. Tilboð þeirra var 140.535.000 kr.