- Auglýsing -
Þeir Markús Gústafsson og Róbert Már Kristinsson færðu Hollvinasamtökum Sjúkrahússins á Akureyri eina milljón króna að gjöf, af því tilefni að þeir hafi nú verið viðskiptafélagar í aldarfjórðung.
„Viðskiptasamband okkar hófst í maí árið 1998 í Nætursölunni, stað sem seint mun gleymast, þannig að í fyrra höfðum við unnið saman í 25 ár ,“ segir Markús við Akureyri.net. „Í stað þess að halda veislu í tilefni afmælisins ákváðum við að gefa frekar peninga í eitthvert gott málefni.“
Markús segir ennfremur að í þetta skiptið hafi Hollvinasamtökin orðið fyrir valinu, vegna þess hversu gríðarlega mikilvæg stofnun sjúkrahúsið væri, allir þurfi þangað að leita á einhverjum tímapunkti og þá sé mikilvægt að sjúkrahúsið sé vel tækjum búið.
„Það var heldur betur gaman að hitta meistara Jóhannes Gunnar Bjarnason, formann Hollvinasamtakanna. Hann fékk á sínum tíma það frábæra verkefni að kenna árgangi 1974 íþróttir í Gagganum, sællar minningar, þá nýútskrifaður úr námi,“ sagði Markús og lagði hlæjandi áherslu á orðið frábæra … eins og það er orðað í frétt Akureyri.net.