Konu sem dvaldi í snjóhúsi í nótt bjargað á Lyngdalsheiði – Hafði villst af leið

Björgunarsveitin Ingunn á Laugarvatnig og hjálparsveitin Tintron í Grímsnesi voru kallaðar út klukkan 5:22 í morgun þar sem ferðalangur nokkur óskaði eftir aðstoð á Lyngdalsheiði.

Var þar um að ræða konu sem dvalið hafði í snjóhúsi á heiðinni í nótt og hafði hún í tvo klukkutíma gengið frá snjóhúsinu í blindbyl. Var ætlunin að komast í bifreið hennar sem var lagt skammt frá fjallaskálanum við Kringlumýri en hafði hún farið af leið. Björgunarsveitirnar fundu hana nokkuð vestar á heiðinni.

Sunnlenska.is sagði frá þessu en upplýsingarnar voru fengnar frá Facebook-vegg Ingunnar. Þar kemur fram að aðgerðin hafi gengið vel og að konan hafi fljótlega komist inn í hlýjan bíl.