Björgunarskipið Hannes Þ. Hafstein bjargaði í gær fiskiskipi sem var í vandræðum 15 sjómílur norðvestur af Garðskaga en Víkurfréttir greindu fyrst frá málinu.
Fiskiskipið hafði sent út aðstoðarbeiðni síðdegis í gær en samkvæmt þeirri beiðni var aðalskrúfa skipsins óvirk en vélar í lagi. Sem betur var ekki nein yfirvofandi hætta á ferðum en var engu að síður ljóst að skiptið þyrfti á aðstoð að halda. Það reyndist þó vera erfitt að koma dráttartaug í skipið og var björgunarskipið Jóhannes Briem sent á staðinn. Á endanum tókst þó að festa taug frá Hannesi í fiskiskipið en Jóhannes hélt áfram sinni siglingu ef ske kynni að sú taug skyldi slitna.
Skipin komust öll til baka í land í Njarðvík og verður unnið að viðgerðum fiskiskipsins þar.
Hér fyrir neðan er hægt að sjá myndskeið frá Slysavarnafélaginu Landsbjörg.