Riða greindist í Húnaþingi Vestra.
Í tilkynningu frá Matvælastofnun er greint frá því að greinst hafi eitt riðutilfelli á bænum Stórhóli Í Húnaþingi Vestra en um 600 kindur eru á bænum.
„Á hverju hausti er tekinn fjöldi sýna úr fullorðnu fé sem sent er til slátrunar og þau rannsökuð m.t.t. riðu. Þetta sýni var eitt af slíkum sýnum. Ekki hafði borið á neinum sjúkdómseinkennum í viðkomandi kind né öðrum á bænum. Bærinn tilheyrir Húna- og Skagahólfi. Riða greindist síðast á bænum árið 2006 en á nágrannabæ hans árið 2021. Undirbúningur aðgerða er hafinn. Faraldsfræðilegum upplýsingum verður safnað og áhersla lögð á að rekja hvert kindur af bænum hafa verið fluttar,“ sagði í tilkynningu MAST.
Í samtali við RÚV segir Sigurborg Daðadóttir, yfirdýralæknir MAST, að mögulegt sé að ekki þurfi að skera allt fé á bænum niður.
„Nú er náttúrulega ekki eins mikil tímapressa á þessum aðgerðum og eins og var í kringum sauðburð.“