Sigurvin og Freyja æfðu drátt á Siglufirði – Sjáðu myndirnar!

Landhelgisgæslan hélt samæfingu tveggja skipaáhafna á Siglufirði á dögunum.

Áhöfnin á varðskipinu Freyju hélt á Siglufjörð á dögunum þar sem haldin var samæfing með björgunarskipinu Sigurvin. Samkvæmt síðu Landhelgisgæslunnar var markmið æfingarinnar meðal annars að prófa dráttargetur Sigurvins en þar var ekki riðið á garðinn þar sem hann var lægstur því Sigurvin var látinn draga varðskipið Freyju. Gekk æfingin einstaklega vel en Sigurvin dró varðskipið áfram á 1,2 hnúta ferð undir 60 prósenta álagi.

Samkvæmt síðu Gæslunnar er koma Sigurvins til Siglufjarðar afar mikilvæg en þar hafa sjófarendur eignast mikinn liðsstyrk með tilkomu þessa öfluga skips eins og það er orðað á síðunni. Til gamans má geta er varðskipið Freyja stærsta skipið í íslenskri skipaskrá. Að lokum segir á síðu Gæslunnar að æfingar sem þessar séu mjög mikilvægar til að stilla strengina enn betur saman en Gæslan og Slysavarnarfélagið Landsbjörg hafa í áratugi átt í traustu og góðu samstarfi.